Imphal to Kolkata flight in Bengaluru tuh train a tung din kongki thawi khesuk hi. Kolkata ah zankhat giahna di lodging centre khat a single bed room la in zan hun ka ngak top. Chim sim ka hi dia corridor a tu in ka phone ka khoihkhoih mai. 5pm lak ahita, Mizo nungak nih hong pai ua ka room toh opposite a room ah hong lut uhi. Khatpen kum 25 leh khat pen kum 18 mi khawng ahi di uh. Sawtlou nungin room sungah ka luta, sungten le lamsaupi pai ka hih ziaka hon lung himoh kha thei uh chi'n ka fon hi. Hon sawl om bang hialin, lung himohlou ding leh lawmnei ka hih dan ka gen kha zozen.

Huai mizote' ziaka lawmnei banga kingai ka hih leh bangziaka ana houpih tellou ka de aw..amau le pasal omlou, kawl-le-vai laka hon muanga hon ngaina petmah di uhia. Kaki ngaihtuah vungvung a, kamit ana tai lua a bangmah dang phawk pha hetlou kahihdan ka thei khia. Kum 18 vel ding penin ka mit ala petmah, skirt dum tengin akhuk chiang pha a, jacket vom, angphel leh anuai ah t-shirt light-green silha khedap tosangte bun in aki fit petmah. Asam in aliang kheng suk zeka, dam theih melin mingou lua hikei mahleh avaklam pang ahi. Amit hah siang sitset a, abiang san hiuhiau toh a etlawm petmah, "van sawlchak ahem" ka chimai. Muh ka ut laia, houpih a kilawm bawl di ka ut bok ziakin hongpawt kha uhiam chiin room kongkhak khawng apan ka en gugu hi. Muh ut kia hilou houpih ka uta vapat hial lah ka ut kei. Ka om thei non keia, room konga pawt khia in Mizote ka lawmkhat, ka houpih ngei le hilou pi khat, numei tegel zak din ka houpih lomlom hi. Ka gin tak ngei bangin lawm ngailua ana hisam ua hawng houpih pah uhi. Aroom uah ka va luta, hohna di leh kipatna khawng kaki dong ua ken chuh, Aizawl apan Bengalore a BCA 2nd yr simlai, Lalmalsawmi pen kia kaza nuam. "Oho.! keia dia Lalmalsawmna maw na hih?" ka chi ngal chuh haa(teeth) kilawm leh siang sitset toh mitsika nui hiuhiau kawma hon en in ka nervous system subuai hialin ka thei. Zan ana sawt manta, giak din hon chial mah le uh ki gospel sak(numei kia oma pasal vagiah kilawm salou) in ka paisan ta.

Aziing in Bangalore lam chuh kon panta ua passenger atam louh ziakin a tuanna cabin(sleeper class) uah amau gelkia ahihziakun hawngzawn ua, Sawmi in akhut lum leh nem ngii ngeia hong leen zaw anialna awsuak di himhim kanei zou kei. Tutna ah kong tukhawm ua thu tuam tuam genin ka houlim uhi. Numei maia zahkai leh zum hatlua kaki sak leh amau anui nuam ua paunuam leh maitai gige ahihman un zumna ki chi himhim ka thei kei. Thangkura(comedy) leh Mizo laa ka ngaih mun ziakin chiamnuih thutak genna di ka theitam khopmai. Dakkal sawm val bang tuangkhin himah le ung Sawmi toh hun pailam ka theikei uh. Kou tegel kalah bel TITANIC ana piang mawk hi.

36hrs khawng ka tai nungun Bengalore, tonim hialin ka tung khong uhi. Ka pai na'ng lah Taxi a dalkal khat bang ngai di, gari tuan kalit banah lawmten giak dia hon hah zot luat ziakun azinga awla pai din ka thupuk hi. Autorickshaw in 10mins vel kapai nungung Sawmite' omna room katung uh. Sawmi melhoih salou mihing a om leh piangsual hidin ka koih top. Autopu inle mirrora pan a en en chih ka haih kei, ka hehtha lam bang ana suak mawk ve e.
Khual leng amial ta. Ka lawmnu un alawmte kiang phak kawma mehdi lei din hon pawt sana kou Sawmi toh kia ka om uhi. Golden chance ka mu. Aihangin, bang gena bang chi om di chih ka theizou kei. Itna thu ka gen pih diam. Amahle aki hong thou chih lah akam pau apan theilua hi'nga. Amah numei eivoi, kei sa'nga naupang zaw hilai.. Ka gen ngam kei leh zaw pasal zoulou ka hi di e. Zumna leh zahkaina kahi chihauh tel lam dang kasa lua.. Chia kaki ngaihtuah laitakin door bel hong ging guiha Sawmi in va hong hi. Sawmi' u' lawmte dana ki genin vaite thum hong lut ua, Autopupa le hong tel ahihmanin ka om amuang kei lua. Sawmi leh minih a uu' room en dia kuanin kei leh mikhat nutsiat in ka om uhi.

Sawmi ana deihta lua man ka hi di maw bang ziaka hiai, mulkin huaina peel dia paisuak teitei mailou ka hia. Thakhat in ka gilah pistol lawngin hon phupheia ta'ng leh paulou a om dia theihsak in ka om hi. Room sungah thawm hong om paha Sawmi tuh sualluih a om ahih ka theimai. Aw Sawmi,, na melhoihna, na chitna, nasiang thouna hibanga hihbuah din zaw kaphal mah mah kei. Panpihtu ngena mangbanga nakikou ging kaza. Pammaih hina tel chia. Nang hon siamtu'n hiai sanga melse zaw in honna siam mai leh zaw maw.. Na min na pokha kei ngei mai. Panpihtu dia na hon muan kei, tu in kalkhat suan leng si di. Kei si leng nangle na suah tak ka gingta kei...hon ngaidam in. Kenle vannuaia melhoih kasak luat, kakianga mangbanga mau zaw kaza thei kei. Nang min a sih zaw ka lin kei, kei ziaka athuah a na thuak sawn di ngaingam lou ka hi..hon ngai dam in aw..

Minute 10 bang ahi ta, kangaih tuahna ah Jetli, Jacky Chand, Airforce I, II chihte hong lang dundun, Sawmi' mau ging le kaza non kei. Hong man le uh dama nutsiat in ka om di uam? Ka sisanin itna,thangpaihna leh muhsitna apo nuam non kei. Ka chi' hong luma, sihna himhim ka lau non kei. Gilou' tungah zahngaihna ka nei kei di.. Ka mit bang hong mial pianin ka hatang athak litlit. Huchih laitakin door bell hong ginga, kei hon guardpa le lungbuai ahi ngei di konglam naih in apai hi. Kenle deitawka plastic stool in a dek ka vel ek a khophawk louin hon tuksuk hi. A pistol la in inn kong ka hong ngala panpihna ngenin kaki kou zaak hi. Kim leh kianga ten hon delhpah ua, thu theinuam mi hong tam petmah uh. Kenle room sunga Sawmi bolhloh sakte kaplup ngei sawmin kadiang phei ngal. Room aki sung kilh ziakin ka gam tang thei kei. Amau' vang maw keivang, policete hong tun ziakun ka pistol ka surender angaita. Awlin kong ka hong thei khong ua, kintakin Somi kava naih pah a Sawmi in, pathian leh mihing mitmuh a chitna nei nawn lou leh kei hon mohsak dan khawng khase takin hon gena, za'k hak kasa lua. Thil om dan ka gena, kei si leng amah le suakta lou di ahih dan ka gen bok. "Hon ngaidam in.. Keia din na siangthoua, kon sit het kei. Na hon ita non deih nak leh bang kima mansa ka hi." Ka chih leh aman, nang naki ita, na hinna zaha kei hon it ngamlou pasal din kon muang ngam dia hia hon chi zaw kah khiak tuaituai mai bang ka ut hial hi.

A zingkhua hong vaka Sawmi lah nelou dawnlou in akap den hi. Ken le paisan sawmta ka hihmanin a room ah kava lut leh akhasiat dante ana gen lailai hi. Kenle Sawmi, kei mohvek ahi, keiziaka sia tuh keimah in ka lam nawn ding, ka itna kemin la kenle nanga ka keptei kul hi. Ka hon khase sak kei dia na tungah thousi natan ka tusak kei di. Gillou, vompi-ngaltang ituah lehle na ma ah ka ding diing chi in kaki chiam hi. Hu chi-a hon ita, nangziaka sia tuh lam nawn sawm na hih leh tun, nangle hon lup pihve leh ahon chih leh etna di le ka thei kei. Kaki muh tung ua pen ka deihtaak dan leh, sih poisa loua ka gamtat dan hon theisiam khawnga ka paisan thei khawng hi.

Ni tengin thumvei sanga tawmzaw lou ka ki fon zel ua, aman le ita hon ngai lua ahihdan leh amin siatna theisiam pih pen dia hon gingta ahihdan hon gen hi. Kipak mah leng lungkhamna hon guan tu ahi zaw. Kei lah pi ching lua hinailou, amah keisanga naupang zaw hilai, kiten di hon sawm mawk kalung a dong petmah. Ka kumin hon chin lehle huchimok thei din ka man nai kei. Aihangin, ka nial ngam kei. Ataksa pian lah dem ba'ng hetlou, apau nuama alungsim asiangthou, bangah, nial mawkleng ase thei tawp ki pia-a thil hoihlou ahi ngei ka gingta. Hichi mawka ki gawm theilou ihihmanin na nu leh pa' kiah iki ngen phot di ka chih leh alungsim lamtak ahi ngei dia ki pahthu bang hon gen tuantuan hi. Ni bangzah hiam nungin ka tup uh taangtun sawmin Aizawl lam kazuan uhi. Sawmi' pa ten hong dawn ua, Lengpui apat innlam zuana ka pai lai un, ka gen didan ka ngaihtuah nilouh a, huchilai Sawmi in ka lung tup uh hon gena, gen theih gen moh in kamsiam theih tawpin ka ki ngen uhi. Ka gente uh apan hong kum het kei. Inn ka tung ua himah leh kei innsung lutsakin ka om kei. Ki salh ging leh kah thawm kazak ziakin kingak na'ng hotel zongin ka vak khia hi. Zing khovak tanin Sawmi in lah hon contact lou ahihmanin paimai kasawmta. Kapaima a Sawmi muh ka ut manin a inn lam uh kazuana, kong kava kiu hi. Apan hong hawnga, ka thilsawm uh ahihtheih louh dan hon gen hi. Pa aw, kei loua Sawmi na kepzoh di uleh nangthu hihen, paisawm ka hihmanin Sawmi hon musakin ka chih leh awlin room sungah ava lut hi. Ka it pen in atangtawn nun di lam honna zotsanta. A nu leh pan kei, Sawmi in vangsiatna atuah laia keikia athu thei, mit ngeia mu kahi-a, Sawmi ka deih ziaka ka thil bawl hidin ana koih uhi. Kisikin kap mahle uh aki khelta.