“France’98 World Cup stadium di lam a kuan Pa Kham hong tungta in, Pa Thang a heita amanghilh se ziakin hausapu opening ceremony uap a kuan toh hong tung ton ding uhi,” chi a nganza kham sim philphel a tangval li leh nga in chiamnuiha agen uh kana ngaingai a. Khat in, “tei, theihah bawn chiah, hung tung kimta uh ei. Heita mangpen tunitan muh khiah hinailou, Brazil’ mistryte muanmoh huai asahdan uh agengen ve vualeh.” Chiin nuikhawm hahak uhi. Hichi-a houlim maimai a ahun uh zatbei mai di pammaih sa deuh Pa khat akiang uah vapaiin, nitak AG Biakinn dakgin chia AG Biakinn a kikhom vek din va thukim pih hi.

Thanlon apan mitam apemkhiak luat ziakun tua mipa AG saptuama amah kia om kha ahita hi. Nitak 6:00 velin dak hong gingta ngei, biakinn lam manoh kua mah om ta monglou. Dak 7 bang hong gin hial chiangin amah le Bazar lama taikhe tou in, vakai khom thouthou hi. “Bangziaka nong kuanlouh uhiam?” chia adot leh amau, dakgin zalou chiin dak khen thak sak uh. Biakinn sunga amasapa ze- awl lua, anunglam akhatin, “kinta un, nazang uh maw” hon chi phei nalai dep. La hon pan uh, Hmar la sa thei omlou, atawpa atheih rualpen uh, “Aw naupangte na ngaidih ua” chihla sak pih ek mai. Thugen hon panta. “Haleluiah” chih thugenpan achih khak nak leh tuh biakinn sung mau-a-mau vengvung mai. Mi’n deihsakna toh khitui luangzen a thumna aneih leh khatin, “Ehe.. kap zomah lai” chi hiauhiau lel. Dak 10 bang gingta mahleh World cup 12:30am akipan di ngak hak chilolai chi in thugenpa vaphongin zan lenkhom pih ek uh. Khat nganza khama hong lua, akianga pa'n, “Eh! Ui ann tah na maw’ chi lai dep. Dak 11 vel dingin kouloi le, zuha kuangta khat, agim namna din kava kihawm ua, mi sawm val khong ihih chianga sikkeu khat kan kitanglou. Kamsunga muam zokin muk zuutna a nei geih. Kua nuih kua dah phoklou in khawdungah zawlla sa in kaki veiphei ua, Pa Khaimeng kava tong ek uhi. Bazar lam manoh in kapai phei non ua, nam’ sepaihte li toh kaki tuak ua hon ban zep geih lel uh aka. Thautawi keile uh asuakta kei hial di uh. Koule heh kisa in AG Biakinn a lengkhomte kava bu den ekta mai ve uah. Dak 12:00am in Policelane ka tunggeih uhi.

Hiai DD (tv channel) khonga World cup live telecast et di chih zenzen. Mi tam toh thousi thak toh, ihmut suah toh football lah pek ngeilou uh ahih chia'h lung kia in 2:30am velin kapai uhi. A ngakzouten zaw thupha ngah uh hin teh, “World Cup suah chi uh iva et leh ball ana kipeh nuinui uh,” achi theile om hiven. Lumthang bazara pan toupai di keikia kahi a lawmte kia mangpha chiin kapaisan ta hi.

SDO Quarter, Block veng ateng kahi ua, bangmah le ngaihsak khollou in kapaitou zela. SDC office kong ka tun in mikhat hong sukpai kamu a, keile kizekaisak in culvert mun ah kana ngakbawl hi. Kakiang honnaih simtakin lamsak lampang aneh hiai hiaia, guamkom ah mangtou mok hi. Huai guam lah kul-a-kul hingal, nahpateh khong bek ling ngal leh kilawm hia. Lamdang sa sim in kava en hoih kha zawzen. Paisan di chi in kaki nung heia, thakhat in tui luang mah bangin hong ging zoizoia kalau sim thak hi. Taimok di lah ka inn uh naichik hita. Ki hangsan sakin kapai thoh teitei hi. Ka deksam hong thou sungsunga, kabiang bang bawk thiethuai in ka thei. Kakal suan bang kin theilou mah abang mai hi. Inn kongkhak ana kisung kalh zomah lai. Nunglam le nga ngam nawnlou. Kong hong hon uh, khesil,puan suah chih te om nawn vetlou, kanun bang hong chi e chia hon kan, zingkal chiah chih san geih. Lum pah, bang mah lah ngaihtuah theilou, ka chi khong vot sungsung hin ka theia khosik mah kabang hi. Nidanga kanute lupna toh kinaih lua kaki chih hia...

Buai veng pan phet ahih chiang in Thanlon khua akial mahmah hi. Nitengin sahbawn, chii leh vannen pua in kanu Hanship ah ann zong in kuan hi. Pawl nga kasim kum ahi a, School kai natawp phet chiah nong dawn di aw chiin hon vai khak a kenle nitaklam football pek lunggulh ngoihngoih pi’n kanu kanial ngamlouh manin nam leh ippi khat sakhau a kuah in nitaklam dak 3 lak khong in Bukpi lampi zui in ka kuan khia hi. Thanlon gam kheng, Bukpi gam ka tunin zaw ka hat pai nonkei. Kanu ana ngak din lah avan puak lela hong bah lua ahih khak di kalau a ka khol ngamkei. Dak 5 bang hong gin hial chiang in keile ka chimoh simta. Tutan kituak khalou, kanu Hansip a hong nituang a hi de aw..chia ngaihtuah kom in maban ka suan zel hi.

Thanlon apan Hanship kigam la khollou, pasal thahatte dakkal 6 khong paitheihna ahi hi. Bukpi ahihleh lamkim khong lel ahi di. Bukpi toh Thanlon kigam gitna munah kawl thupi mahmah “Putek kawl oma, huai putek kawl pen dawite kulhpi thupi mahmah ahi achi uh. Nidangin Thanlon ah dawi toh kizawl pitek khat oma, tua pitek in putek kawl va hahsiang zel hi. Aman agenna ah dawite kumpi lian mahmah khat oma, vot(leech) sialpi chiachia nih in aveng uh chi hi. Hiai kawl toh kizom tou in Khuaikawl kichi om hi. Hiai kawlte gel kikal ah Bukpi lampi paitou hi. Hiai lampi khah tou law mahmah, nupi, “Helvei” kichi khat paikai tou zoulou in a tonpih pasalpa’ kiangah “hon paw kaitou inla na utut hon loh in” chin ki paw kaitou saka huai ziakin amah min tamin hiai lamtou khah “Helvei tou” kichi hi.

Keile Bukpi khua bang va lut hial ding ka hih tak chiangin lungkia in Thanlon lam zuanin ka kinung hei nawn mai hi. Ni lah tum hi ta, nunglam nga kom in ka paizela Bukpi mi vaipaite toh kaki tuak zel ua, hon kan chiang un Thanlon zuan ding kahih dan kagen zel hi. Naupang khawmuizula gam hiaitan pai ding hon muangmoh mahmah mai ahi ding ua Bukpi a giaka zingkal chianga pai dingin hahzot in hon zawn zel uhi. Kei lah ka ut dek kei. Mi vai hong paite’ thom ging khong kazak chiangin kana kibu zaw mah.

Khua mial kheding ahita. Pucca Road apan Helvei lampi manoha kong kal khiak touh tak in chuh ka thomhau mahmah ta. Bukpi lama kik mai di ahi de aw chih bang ka ngaih tuaha. Kik hilengle mial thouthou ding, kuate’ inn vanaih mok ding. Bangziaka vaipaiten honzot lai ua ana mang khalou kahi de aw chia kingaihtuah komkom toh, kanu bang hehsan tha asuak mahmah mai. Chimohlua kap komin thumna bang kanei zel hi. Lamtunga vasa giak dite bang ka phong kha zela, huai chiangin kalauhna hon behlap law mahmah, tai in katai thoh zel hi. Kasak zekah sakhi ahong hawk zomah. Chikmaha hichituk naia sakhi hawk kazak ngeilouh hia. Atawpin chuh Mualvum (kileen zaakna ka chih uh) ka tungtou ta. Huih ahat mahmah mai, sakhi hawkin lah hon naih deuhdeuh abanga, tunglam lah vuahzu dia kisa in mei akaai ngoingoi mai hi. Kapai sukna di “Helveitou” ka ena, kawlse lak, sing lian pipi nuai mialin amial suk ngem-ngom mai hi. Thomging bang zak di atam mahmah mai. Sawtlou nungin kakhang ah mi hong kikou om a, lawm nei di chiin kalung amuang mahmaha, kinem takin kana ngak hi. Ahong kikou tou zela, honnaih simtakin mihing aw di abang nawnkei, hon kheeng duldul hial in ka thei. Lamdang kasa lua a kana kibu hi. Ahong tungtou, mi hia? saa hia? chih ka muchiang kei, alian mahmah chih ka thei. Taangdung zui in kapai louhna di lamah apai mangtou hi. Ka lau law pet mah, khawl thei ka hinawn takei. Ka paisukna di lah kangam mahmah kei zel. Kachii khong hong ling singsinga, kasam neelteng thou khia hin kathei. Nidanga ka inn kiang ua ka sikha muh kalauh luat chuh aneepte hita mai. “Toupa aw, hon taisan mahmah ken aw,” chia mittui luang hithit komin ka sakhau kakawnga hoih deuha khihkip in ka paisuk ta hi.

Khatvei kapu toh lou akipan in ka zanpai kha ngei ua, lampi ah suang khongin lamkhang khawng ka deng hi. Kapu’n, “Zaana suang lot theihlouh, gamsa, sahang-vompi suk heh theih ahi” hon chih kaphok khia hi. Kapaina lah khoubaang bang akeen, khomial toh sikna di lah kimu theilou, suangsi lak hizomah lai. Mun khat isik chiangin suang khong atolh noinoi hi. Lamkhang khongah ka tolh khe zela, sahang khong ana om khak di kalau mahmah. Khen chiah suang lian pipi nuaiah kapai khazela, baak lian pipi khong hong leng khopkhop zel ua dip akisai litlit, chiltui bang omlou, dang ahul mahmah hi. Khen chiah singluang khong kaan ngai khawn ana om mawk hi. Kalampi zuih khah zui kha nawnlou kana himai mah. Kik non di lah kanung di ka thei zou nawnkei. Lamkhanga tolh khe kha kahi deh aw, aihkei leh lamkawina a paisuak kha ka hi diam aw chia ngaihtuah in lau leh mangbang se lua singluang tungah ka tu kha velval zezen hi. Huchia kakhawl lai in hiai Helvei toua thiltung agen zeuhzeuh uh ka ngaih tuah khe zungzung mai hi.

Kum bangzah hiam paita in Hanship akipan naupang damlou hon pua ua, hiailam suk hong tun un nupi khat lamkhanga singluang tunga naupom akap amu ua, adamlou puak uh gimlua ahih manin ngaihsak manlou in hon taisan ua, anunga hong paiten bang mah hon tuaklou uh chih khong ngaih tuahna ah hong kilang dunduna, ka lauhna hong ki behlap deuhdeuh hi. Hiai singluang ngei atut na hi din ka um zomah hi. Katu muang thei nonkei, koilam manohta di? Nuailam manoh in tholhin kaki tholh sukmai hi. Munzang deuh ka tunin lampi hiailam deuh hidia kagin takna lam kanaih bawl hi. Thom neng kha adaih zek chiangin ngaihtuahna hong kipan nawn zel.

Nidangin, kapute khat hiai lamtou kipatna atunin aliangah mikhat va tuanga, mualvum atunin kum khia chih kaphok khe nawn hi. Hiai kangaihtuah leh ka chii hong gik abanga ka ding tang thei nawn keia vakin ka vak thoh mai hi. Vangphat huaitakin kapaama luiguam lakah mipau ging kaza hi. Kenle mi sing-aat a gamgiakte hi din ka um a kava naih bawl hi. Luiguam a mipauna mun ka tunin bang mah muh di omta kei. Kalauh dan tuh gen thei ahi nawnkei. Vuahin hon pha zomah lai. Kek kia in van khawng aging dumdum hi. Kawl hong phiat chiangin hong vak puak zela hon muthei khong om disa in kaki selbawl zomah hi. Luiguam kazui suka saulou nungin lampi ka tungsuk hi. Thanlon gam ahi ta a, lampi phei in anuam mahmaha vuah le theuta ahihmanin tai in ka tai mai hi. Kalung amuang sot mahmah ta hi. Helvei tou toh kaki gamla mahmah ta ua, nidanga loukuan gamlak vaka kapai gigena uh ahih manin kalung amuang mahmah maita hi. Ka maa ah saangsim in vaksim pempuam khat alenga, Pathianin kathumna hon dawnga, Suahlam mipilte aksi a api banga keile pathianin vaka hong pi eive chin kazui a, ka makhelh khak chiang bang in kana ngak zel hi. Saukhop tak kazuih nung in huaivak pen nih leh thum bang hong kisuah thei moka lamdang sakna leh lauhna in hon tuam nawn. Nidanga ka pate’ thugen kathei khia. “Gamkaupi” achihte uh ana hi a lau in katai non zel. Ahihangin kawla kaki tholh laia kakhuk katah khakna hong naa deuhdeuha katai hat thei mang nawnkei. Gamkau inle hon zui nawnlou a ka theih manin ka pai zoh dandanin kapai thoh ta mai hi.

Dak 9 chih khong ahi ta di, kagil akial mahmah ta, ka vuah thuakna toh katha atawl law petmah ta hi. Khua le ka tung dekta a, meipi kaile theng hita ahihman in avak hiuhiau hi. Awla kapai laiin kanung ah hon kai om hin kathei hi. Ka nung heia bang mah lah muh di a omkei, thom ging di himhim le omlou ahih manin kagim luatziak hi dingin ka um hi. Himahleh ka khetul natan hong kisui hin ka thei. Nihvei bang hong hichih hial chiang in chuh lungsim anuam nawnkei. Mi’ houlim kazak khak ngeina ah, “Sikha khetul sui” achihte uh ahi chih ka phok khia hi. Hiaite khah, nang masa aw chia lampi i ot leh om nonlou achih uh ka thei khe thak. Himahleh awn himok lengle ken sikha nungzuih hi di, mabana bang tuaktou di ka hia chih kitheilou. Buai lawtel, awn maidia kaki sak dek chet in kagal ah ka uute hong zong dia hong kuanin honsap uh kaza a HOIII! chia kikou in delhin ka delh mai hi.

Inn ka tun un dak 10 aging phialta. Ei khosakna phok phalou in, Bangdia hon hichi pai hak tele chiin hon tai zomah lai uh. Kahmai louh chuh hih theih omlou himai. Kanu kiangah. “Nu, tuban zaw gimin tawl mah lechin, nang dawna kuan ka ut nawnkei,” Ka chih leh kanun, “Pau, ken zum leh zah khuallou, kagim ka tawl genlou a inek di zonginga nang hon huchih tel di maw?” Hon chi tuh, kagil kial, katha tawl toh ka kahkahna kongkaw in ka sih loh dektak hi. Akho nunga ka theih thak leh kanu Hanship lama kuanlou in Zoutung lama kuan ana hi a, mi hon thukhah ten agen uh kazaak chianglouh man ana hi maimah.