OPEN LETTER – II (Zomi Nam Ni 2016)

User Rating: 0 / 5

Star InactiveStar InactiveStar InactiveStar InactiveStar Inactive
 

OPEN LETTER – II
(Zomi Nam Ni 2016)
20/02/2016
To,
Zomi Nam sunga pan,
JAC, MTF-D,
JPO, Zomi Council, Mipi Palaite,
ZRO...

a heutu hihna leh mohpuakna a na nei kha khempeuhte.....

Khovel mun tuamtuam a om Zomite, Zomi Nam Ni itna Chibai kong buk hi!

Pasian in mihingte A bawl lai in Zomi ding a hong bawl a hih man in lungdam huailua hi. Tua ban ah Zomite khang semsem ding, ki it sem ding, Khovel Nam Changkangte lak a simtel hi thei dia hon lamkaih a, Nam Ni nei thei ding tan a hongpi tou a, Zomi Nam a hong piangsak, Pasian tung ah lungdam thu i gen uhi. Lamkhat ah, Zomi Nam dia hon bawl hina zenpi, Zomi ihih lam a ki pkhawk nailou pawl khat om a, tua ban ah ut hunhun/mimal khasiatna ziak hang khawnga kei Zomi hi nawn kei ning chi mawk! (Ei ut zia- utlouh ziak hilou a Pasian in Zomi dia hong bawl ziak a Zomi ki hi lel hi) bang ngaihtuahna neu ziakin ki om thei dekdek a, tuate zong Pasian itna leh Amah in Zomi a hong bawl ahihdan i theih siamsak ding uh poimoh toutou ding hi. Zomi pe'n kuamah mimal leh pawl khat a hi mawklou a, Pasian in a bawl Zomi Nam tengteng a hi ahi hi.
Tu Kum a Zomi Nam Ni toh kisai in Khovel mundang a omte kong itna uh lian in zong hong phawk mahmah ung. Kum bangzah hiam paita a Manipur a Unau mel haih hunlai a, nong itna uh, nong aangvanna uh, ka kul uh leh poimohte uh nong piakna uh, nong panpihnate uh chik mah chiang in India lam a om Zomi te in mangngilh ngei kei ni ung. Zomi hih mah nuam hi, Ki it dialdial. Tun hih lai dal ah India a om, a bik deuhin Manipur a om Zomi sung ah ki houtuahna, tut khawmna poimoh a hin dan saulou in hong gen ning:
Gam-le-Nam itna hang a hun paisa a hinna manphatak ana piate, tunai a hina manphatak ana pia tutan a luang uh vuinailouh a om mi 9te Zahna lianpi toh Salam i buk hi.
1. ZRO: Gam-le-Nam a dia ki pia a, sih-le-hin zong khawksalou a hun tamtak ana zanga, zangtou lellelte, khat veivei i Gam i Nam i itluat hangin mipi lamin zong hong ki iplah hun zong om mahmah hi. A hih hang in, noute in gensiatna tamtak tuak mah le chin zong, Gam-le-Nam itna hang a kal nong suan teitei na uah lungdam lua ung.

Pawlpi te ki discipline loulua uh, ki control zoulou lua uh chia na hoihlouhna lam uh muthei mahmah a ki omlai in, Manipur Govt in 31st August, 2015 a Bill 3te discussion zong omlou a hong passed lai un, tua mipi thangpaihna pai toutou in President Pa' in hal in hong om mawk hi! Tua hun laitakin Pawlpi a heutute a tamzaw tua mun ah om, Zogam Tangvalte zong tua mun ah tampi mahmah om, a hih hangin mipite na itna uh leh i Gam na itna hang ua bangmah action la omlou a nong ki Control zohna pe'n uh thupi gen hongsa mahmah ing. Discipline neitak leh heutute thu mangtak a om na hihdan uh hiai ni in hong ki lang mahmah hi. Tua bek thamlouh in, Presiden Pa' in tua bang a khut khial kha a amah tenna in hal a pangte' ngaidam a hihdan hon puan khiat ban ah, Pawlpi in zong tua bang a gamtangte thunung thu ma omlou dia ngaidam a hihdan nong gen khiat uh, thupi hong sa mahmah ing.

UPF & KNO makaihna nuai ah pawl tuamtuamte meeting nong neihna uah, tua Tribal Martyrs 9 te luang vui khiat ding thu discussion omlou leh mipi lametna bangloutaka 13 February 2016 vui ding a thupukna hong ki la hi. Tua thupukna pe'n discussion zong omlou leh mipite ngaidan a hihlouh dan thei chiang mahmah na hih chiang un, Pawlpi in hiai ni a thupukna ki la pe'n hoih nasaklouhdan uh leh mipi deihna dan a pai ding nong chih ngamna tung uah, i Gam maban ding uh leh mipi te aw/Voice nong ngaihna uah lungdam na lian mahmah hi.

2. JAC, MTF-D, JPO, Zomi Council, mipi Palai te (MP, MLA MDC): Hiai Pawl tuamtuam a ana ki helkha Zomi nam sung apante, i Gam i Nam na itna hang ua na kalsuannate uh thupi kongsa mahmah hi. Mipi nnasep pe'n thubaih hetlouh a hihdan hun paisate ah i theihsa uh himahleh, tutung Manipur Gamsung baina ah theih khiat thaktahk in hong om hi. Noute in gim-le-tawl khawksalou, zan zong ihmu manlou leh na innkuante uhtoh zong om khawm theilou zah dong a kal na suanlai un, mimal a ki demna, mimal a ki chihna, ki vauna, ki gensiatna tamtak na tuak uhi. Tua bangteng na tuah zoh nung ua zong, i mi isa, i Gam leh Manipur na Tribal mite uh a dia lungkiat huai tamtak sung ah, kal nong suan pih teiteina hang un na tung uah lungdamna lian mahmah hi. Khat veivei ei sung ah, khat veivei i Tribal pihte lak a pan leh khat veivei State Government leh Central Government apat in haksatna na tuah hun uh tammahmah ding, tuate tengteng mipite leh gam itna hang a kal nong suan pih teitei na uah, thupi gen lua na hi uh.

Heutute aw,

Manipur a Tribal mipite leh noute in zong na gen tampen uh, tomchik in gen le hang tua Manipur State ah innkuan khat dan in om nawn keini uh, Manipur State toh ki innveng hoih hita ni uh, chi leng khial lawmlawm ding in ka um kei hi. Tua ban ah, tu leh tu in Manipur a Tribal te tenna teng ah dai hoihtakin kai ni uh (India Constitution nuai a, Tribalte gam leh leitang kepbitna ding te in), chihte a hi nawn hi. Hiai te muh theihna ding in, heutute'n nou hoihsak dandan chiat, a ki hou khukkhak zong omlou, paikhawm sawm lah bang sawmloulah banga, nong paipih sawm nilouh mawk uh leh mipite zong lungbuai gawp a ki om thei a, tua ban ah paidan tuam chiat a i pai teltul mawk uh leh, mipite zong ki lung-am gawp thei hi. Nou ka heutute uh' na kipiakna uh, na gim - na tawlna uh, Gam-le-Nam na itna uh leh mipite lamet te a mualsuah theihna ding un bang kisam hiam, chih non zon uh poimoh mahmah hilou ding hiam? Tu kum 2016 Zomi Nam Ni in ngaihtuahna thak leh kalsuanna thak a hoihzaw lam ah kikawkmuhna hi leh chih lunggulh huai sa mahmah ing.

Zomi te Vaphual/Phualva toh a ki chiamte te ihi uh. Vaphual in itna nei lian mahmah, a innkuante a itdan, a innvengte toh ki tuaktak a a om khawmdante ki hah gen mahmah a, tuate Zomite nuntak zia toh zong ki tuak sakin om mahmah hi. Tu Kum 2016 Zomi Nam Ni in a diakin Heutute lak ah ki itna, hoihlouhna lamte sangin hoihna lam omte ki genna leh kalsuan khawmna hon tut leh lunggulhna lian mahmah ei. Tua bang a Heutute nong om peuh mah uh leh Na Gam uh leh Mipite a hampha hi ding hi ung.

Manipur Tribal mite lunggulhte muhna ding in, Pawl tuamtuam a ana ki helkha Zomi Nam sung ate, Kumpi a mipite sik-le-tanga palai nna ana sem khate, hong tukhawm unla, thu hong ki kum unla, kal hong suan khawm unla, mipite lampi khat ah pi ding in hong kisa ve ua maw? Hun paisa a i bawl khelh, i hih khelh om khate khat leh khat thupha ki tawituah a, ki ngaihdam tuah a, kalsuan khop ki samlua hilou hiam? Nouteng in thu khat la khat non sat khawm theihnak uh leh Manipur a i Tribal pih dangte toh, thukhat - la khat sat zong hong nuam tuam ding hi. Manipur a Tribal te lunggulhte muhna ding i Tribal pih dangte hoihsakdan bang hi hiam, chite zong i etpih a lou theilou hong hi ding hi. Manipur Tribal te i pankhawm kei uh leh bang mah i lohchina ding uh omlou dia, Manipur Government a vualzou hi lel ding hi. Deihzawk tel ding nih om hi; Zomi sung a heutute hoihtaka nong ki hou khawm ua, hoihlouh kisaknate nong ki ngaihdam ua, kal non suankhawm ua, i Tribal pih dangte toh a hoih zaw ding lampi a non paipih ua, Manipur Tibalte lunggulhte muh ding, A HIH KEI LEH Zomi sung a heutu tuamtuam te leng ki hou khawm louh ding, khat-le-khat ki gen siasia ding, mahni hoihsak dan chiat a pai ding, Tribal pih dangte toh leng nnasep khawm sawm vetlouh ding in a tawp chiang a LAMETNA TOH MANIPUR TRIBALTE MANGTHANG DING in Manipur Government vualzou geih lel ding. Koi pe'n heutute'n hon tel pih ding na hi ua, noute honpi dandan uh na it uh na mipite uh leh i Gam in a gah kilou lel ding hi.

Mipite leh Gam a it pha penpen in nou ka heutute tengteng uh kimuh khawm ding vai hon sai ve ua maw....Saptuam heutute in zong Simleivai a i heutute kimuh khawmna ding a sai leh thu hoih mahmah hi ding in um ing. Heutute thukhat nong sat khop theih kei uh leh, mipite ki satzakna zong tung thei dep hi. A hih kei leh na mipite uh leh Gam it sanga, a taktak a.... nou thu kia deih, hoihlounate ki gen den, thupha ki toituahna leh ki ngaihdamna zong sawmlou omlou, pawl dang toh tukhawm a damdam a ki houkhawm zong utlou, Tribal pih dangte zong kul sa vetlou na hi uhiam? Tua bang a hih leh nou ka heutute uh hang a na it uh na mipite uh (Zomi te) hong ki satzak sak ding uchin a, Manipur a Tribal te bangmah suaklou ding a, tua Salpha mi 9te luang vuinailouh a omte, Ui sih- Ak sih a sisak ding na hi uh! Tua zaw deih ngal kei ni uh teh maw?

Tu Kum 2016 Zomi Nam Ni in Zomi sunga Pawl tuamtuam a heutu tavuan/mohpuakna a neih khempeuhte, mimal ki-itna taktak toh thukhat la khat sat khawm dia ki houkhawmna leh pankhawmna ban ah Manipur Tribalte a dia suahtakna lampi kawkmuhtu hi ding in Pathian vaulzawlna leh Thupha hong piak lungulh huailua.

Awlmohna toh

Sang Hangsing
New Lamka

press-release-logo