Nisin Thuhiltu – 2 October 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Teksia te thakhel ah nominee te'n teksia pension sum lakpiak thei di: CM

Imphal, Oct. 1 *(Nisin Thuhiltu)* : Social Welfare Department at Multipurpose Hall, Near Bal Bhawan, Khuman Lampak, Imphal East District ah tuni'n International Day of Older Persons, 2018 mat in a um hi. Zia hun chu Chief Minister N. Biren Singh in chief guest hina tawh a uap a, ama'n a thugenna a chun, State Government in kum upa, teksia kum 80 chunglam te ding ah nominees te'n teksia pension sum tesia te thasik ah ladawk thei ding ah dan siam thak a hidan gen in, queue ah teksia te a din ding uh lemchanglo a hina chung ah kum 80 sunglam mi te'n umna Deputy Commissione te tawh teksia te thasik ah pension sum lakdawna ding ah nominate khat in kihiatthiamna suai a kawi ding uh ti'n a gen hi. Teksia, nu leh pa hepina neilo, teksia ngainep te'n damsung ah lawtinna kiti mungai ngailo ding un le a gen a, State Government in tumasang ah thusua a bawl dungzui ah govt. employees nu leh pa enkawllo ah gentheitak ah kawi te chung ah legal channel chiapi hiding in a gen hi. State Government order dungzui ah govt. employees nu leh pa enkawl nuamlo te a thalaw uh cut piak hiding, teksia a nu leh pa teu piak ding ti a hi.

Chief Minister in hun matna uap mipi te chu teksia te'n thawveng tak ah hinkhua amat theina ding ua panlakna neichiat ding ah chialna bawl in, State Government in chenna ding neilo teksia Old Aged Homes ah um te Chief Ministergi Sotharabasing-gi Tengbang Scheme nuai ah Maintenance Grant piak ding ah lemsakna a neina chung ah financial support Rs 1000 per month per person piak ah um ti'n a gen hi. India ah teksia population pung hatlo a hidan gen in, kum 1951 ah teksia population 1.98 crore al hi chu, kum 2021 ah 14.3 crore tung thei ding ah ginchat hin a gen hi.

Zia hun matna chu Social Welfare Minister Nemcha Kipgen and Education Minister Th. Radheshyam te'n Functional President leh Guest of Honour hina tawh a uap ua, Nemcha Kipgen in teksia kituptak ah etkawl chu Pathian nasepna chikhat a hidan gen in, Social Welfare Department nuai ah NGO te etkawlna Old Age Homes 15 um in a gen hi. Hun mat sung in teksia telchuam ah um te thilthawnpiak piakna um in, medical camp le bawl a hi.

Hijam Irabot Day mang
Imphal, Oct. 1 *(Nisin Thuhiltu)* : Manipur state government organised bawlna' tuni'n a khatveina ding in, Jana Neta Irawat Day (Irabot Day) mat in a um hi. Zia hun a chun, Manipur State Legislative Assembly complex kiangnai Irawat Square ah Hijam Irabot, Statue siamna ding ah foundation suangphu hawnna Chief Minister N. Biren Singh in Deputy Chief Minister Y. Joykumar Singh leh Art and Culture Minister L. Jayantakumar Singh te uapna tawh a hawng hi. Hijam Irabot @ Lamyanba Hijam Irabot ahileh 30 September 1896 ah piang, 26 September 1951 ah thi a hi. Manipur apat freedom fighter, politician leh social activist a hia, Communist Party of India (CPI), Manipur founder leaders khat le a hi.Writer khat ahi banah sportsman le a hia, ama chairman hina nuai ah 4th Session of Nikhil Manipuri Mahasabha kiti le a la um hi. Nupi Lan, 1939 in social injustices dodalna ama mapuina nuai in a um a, Manipur Assembly, June/ July 1948 election ah Irabot chu Utlou Constituency ah mipi palai ding ah teltin in a la um hi. Chun, India Prime Minister Atal Bihari Vajpayee hun a khan, kum 1998 ah NDA Government in Irabot’s min in commemorative stamp released a la bawl hi.

ATSUM in ni 7 sung State Govt. hun pia
Imphal, Oct. 01 *(Nisin Thuhiltu)* : Tribal Students’ Organizations te'n Tribal Research Institute, Chingmeirong ah tuni'n Manipur university buaina tawh kisai genkhawmna a nei ua, All Tribal Students Union Manipur (ATSUM) president, Vareiyo Shatsang in Manipur University buaina chung ah a phalam ah thil chiadan a kilatlo a, state government in ni 7 sung ah buaina sukven lo ahileh kiphinna zat chuamchuam ATSUM in pan ding ti'n a gen hi. State government in student leh mipi te haksatna a hiatpi pawimaw in le a gen a, ni 2 masang ah ATSUM in government thuneitu te kimupi ding gua maleh government lam a pat dawnhuna umlo in a gen hi. ATSUM in buaina a vaima theilam ah sukven ding leh ngaina gual ah University a um kit ding dawi in a gen hi. Hiatthei khat chu, May 30, 2018 apat Manipur University buaina kipan ah tuni tiang ah class um theilo, exam tiang leh thawveng tak ah chiatha theilo ah um a hi.

YPA GHQ in October 3, 2018, 10:00 AM apat 4:00 PM sung Total Shutdown puang
CCpur, Oct. 1 *(Nisin Thuhiltu)* : Young Paite Association (YPA), General Headquarters in tuni ah thusua a bawlna a chun, Lianmuanthang Valte, General Secretary, Young Paite Association General Headquarters tha ding ah vauna a kibawlna tawh kisai a taklang hi. Thusua in a taklat dungzui in, a chiata 22nd September, 2018 nitak dak 8:57 ah phone no +917085246105 apat Lianmuanthang Valte, General Secretary in call mu, zia hun a chu ama inn ah umlo a hi tawh kitawn ah ama kimupi nuam leh a inn ah ngak a hidan phone call bawltu'n a gen dungzui ah, General Secretary le inn a tun ah inn mai ah Activa kang khat kinga mu'n, innsung a lut leh Hotupa, John kahi ti ah a la hopi ngal a, kum 2013 vel ah Bethsaida Rehabilitation Centre ah a la umkha a hidan genkawm ah Lianmuanthang Valte, General Secretary in Bethsaida Rehabilitation Centre ah class leh Thugenna hun a neina a pat a la hiakha hi ah holimpi kawm ah, pilvang in “Fimkhur rawh” ti ah a gen tawh kitawn ah General Secretary inle bang ziak ah em? a ti leh, ZRA ten hung tha ding gua a hiu ti ah dawnhuna bawl. Zia nung a chu, Lianmuanthang Valte, General Secretary in dawtna siam kit ah, Kua gen? Khawi ah thupukna a hi em? a ti leh‘‘Cabinet” a kipat ti ah dawnhuna mu ti a hi. Zia nung a chu, Romeo min sua ah, chia ing katin hung call kit ding kahi ti tawh pawtdaw san ti a hi. Zan dak 9:27 ah John in General Secretary call kit a, “tu mama, tuzan mama in taimang in”, "Ka hung lungsia taluai" a ti tawh a phone off ti le a hi.

Zia zaw a chu, Police kiang ah thil umdan tut a hi tawh kitawn ah John kiti Lianmuanthang Valte, General Secretary kimupi leh phone call bawltu chu police in mandawk a, a min diktak Mr Lalnuntluanga s/o (L) Lalhmingthanga of Salem Veng hiat ah hiatdaw ah um, Police in amat niu ah Young Paite Association General Headquarters lawiupa te kimupi sak a, YPA GHQ lawiupa te'n holimpina a nei hun ua, Mr Tluanga in phone call leh message mumu ziang nalai, “Organisation sum tam laneta lua tai, la nasep ding la semdawk hak taluai" a hung tiu tinalai ti a hi. Tamveipi attempt a bawltak himaleh ngamlo kahi'h ti ah le gen in a kigen hi.

Zia gual thiltunna chung a chu, Paite Tribe Council General Headquarters in panlakna nasatak a neina chung ah kipak um a hidan taklang in, thil tung tawh kisai dawilo suklatna YPA GHQ in October 3, 2018 dak 10:00 AM apat 4:00 PM sung Total Shutdown puang in a taklang a, Total Shutdown sung ah Permission dang himhim bawl hilo ding ti a hi. Chuleh, Young Paite Association General Headquarters General Secretary thana ding ah tuni tiang ah kigawlkha, Mr. Lalnuntluanga s/o (L) Lalhmingthanga, Salem Veng leh Mr Romeo, Ex-Town Commander, ZRA te chung ah Lawyer leh midang kuama in panlakna neilo ding ah dawtna leh hiatsakna bawl in, panla teitei a um leh YPA in ziagual mite chung a chu action khauhtak la ding, kuama'n NAM thil ah latheilo ding ti'n T.Khailianthang, President leh S Lalkhanlian , Joint Secretary Young Paite Association General Headquarters te suaikaina press release in a taklang hi.

International Day of Older Persons mang

CCpur, Oct. 1 *(Nisin Thuhiltu)* : National Health Mission (NHM) nuai ah National Program for Health Care of Elderly (NPHCE) leh Non-Communicable Disease (NCD) Clinic kithua in tuni, October 1, 2018 zingkallam dak 9:00 in International Day of Older Persons kiti MS Conference Hall, District Hospital, CCpur in a mang ui. Zia hun chu, Krishna Kumar, IAS, Assistant Commissioner in Chief Guest hina tawh a uap a, Dr. J. Son Goukham Samte, Chief Medical Officer/District Mission Director in Functional President hina tawh uap in, Dr. Vumchinpau Tonsing, Medical Superintendent, District Hospital in Chief Host hina tawh a uap hi. Zia hun a chun, Dr. Alex Thangjalet, District Nodal Offficer, NPHCE in vaidawnna leh hun matna tawh kisai genlatna a nei a, zia nung a chu khuallian te pat thugenna a um hi. Dr VC Pau Tonsing, Medical superintendent CCpur District Hospital in khawvel ah kum upa-te haksatna hiatpi a hi dungzui ah, khawvel khangthu amasapen ding ah International National Day of Older Person ti min vua ah tuni khawvel mun chuamchuam ah mat ah um a hidan gen in, Ccpur District ah kum upa-te etkawlna ding ah government in a bawl Ceriatic Ward/Clinic hawn ah um, zia mun a chu teksia te etkawl hiding a hidan a gen hi. J Songokham Samte, Chief medical officer, CMO CCpur in district hospital a ki-etsak ding kum 60 chunglam te ki-etsakna ding ah Ticket la ding ah kitian ngailo, ticket counter ah direct a ticket lak ah doctor ki-etsakzaw takleh mi 10 luptheina ding ah kisiam Geriatic Ward/Clinic ah a um ding uh ti'n a gen a, Geniatic ward/clinic a semtu ten mapui ding leh apawimaw ding bangkim ah kaihuai ding uh ti'n a gen hi. Chief Guest Krishna in a thugenna a chun, teksia te pawimawna hiatdaw thak ding a nawpthu gen in, khenkhat in teksia te amatna ding umlo gual ah a kawi sek uh thil diklo ti'n a gen a, kum upa-te innsung banah khua tang a ding ah mi pawimaw mama, khangthak te tu dinmun a tun theina ding gim leh chawl ah pan a la latu te a hidan uh a gen hi. Chun, teksia te za-bawl ding leh chawisan zing ding a nawpthu a gen hi.

NT 02oct2018b

Trail cum Selection Test 2018 um ding
CCpur, Oct. 1 *(Nisin Thuhiltu)* : District Youth Affairs and Sports Officer, Ccpur-Pherzawl in thusua a bawlna a chun, October 16 apat October 18, 2018 sung ah Peace ground district headquarter Tuibong ah District Level Inter Schools Games Trail cum Selection Test 2018 um ding a hi. Zia hun a chu pawsal kum 14 leh kum 17 nuai lam-te a ding volleyball leh pawsal leh numei kum 17 nuai lam-te a ding ah Handball ah kihel ding selection bawlna um ding a hi. Lunglutna nei CCpur leh Pherzawl district sung ah school ten October 3, 2018 apat DYASO Office ah eligibility certificate leh official entry form lathei ding, October 15, 2018 tiang ah a piaklut kit uh ngai ding in a taklang hi.

Ukha Loikha khua a ding Solar Systems flag-off

CCpur, Oct. 1 *(Nisin Thuhiltu)* : Thangzalam Haokip, Chairman Hill Area Committee HAC & MLA 57-Henglep Assembly Constituency in tuni October 1, 2018 zingkallam dak 9:30 in SDO Henglep Office, Bijang ah Government of India in apatdaw Deen Dayal Upadhyaya Gram Jyoti Yojana DDUGJY scheme nuai ah Henglep sub division sung ah Ukha Loikha khua ah hawpdaw ding, Solar Systems hawndawna leh flag-off bawlna a nei hi. Zia hun chu T Joseph Lhungdim, MCS, SDO Henglep, Thienmang Haokip, Chief of Ukha Loikha, Randhir Sharma project manager, CYGNI Energy Private Limited, Ukha Loikha khua mi leh official hunkhawp te'n le a uap ui. T Joseph Lhungdim, MCS, SDO Henglep in scheme umdan genlatna a nei a, Thangzalam Haokip, Chairman Hill Area Committee HAC & MLA 57-Henglep A/C in solar systems sâng ding te'n Solar Systems piak ah um te a phachuam thei ding pen leh khawsung salvaktu apansak ding uh a nawp thu gen in,
SDO Henglep leh official-te panlakna pakcha mama kawm in, Government Of India in gamsung ningtin ah Electric meivak tunlona Solar Systems kawi ding ah panlakna a nei zing tawh kitawn ah solar system hawp ah um hin a gen hi. Tuni ah Ukha Loikha khua a ding, solar system flag-off kibawl chu, Phase I a ding ah a tawpna, Phase I ah Henglep Sub Division sung ah khua 30 ah solar systems hawpdaw ah um, inn 600 val in phatchuampi, Phase II ah khua 15 kiang ah hawpdaw kit hiding ti a hi. Tuni ah flag-off kibawl solar systems chu, Ukha Loikha ah khua ah insuan in set khat chiat chang ding, set khat ah Solar light, Solar Stand, Solar Plate, Solar Battery, solar gui, ban ah Solar Ceiling um hin a kigen hi.

Tha 5 sung ah khut ngei ah Bible zik suak

CCpur, Oct. 1 *(Nisin Thuhiltu)* : Nu Chongnunmawi@mawipi w/o Ginthiansiam Secretary Central Kristian Khanglai Pawl (CKKP), Khuga Sadar Presbytery (KSP) of T. Loklaiphai, Ccpur in 26/April/2018 ni ah ama khut ngei ah Bible a zikpat chu 22nd September 2018 in a zikzo hi. Zia ah a Bible zik chu 1st/Oct/2018 ah KSP Office in a pelut a,, CKKP Ex Secy Lalsam tawh kikhut san na nei in, Rev Siama Phaltual Executive Secretary KSP in kipak thugenna leh malzawl dawk piak na a nei hi. Tuni tiang ah CKKP-(KSP) sung ah khut ngei ah Bible Zik Suak Co-ordinator khut ah apelut mi 19 hita hin a kigen hi.

One Day Legal Awareness bawl ding
CCpur, Oct. 1 *(Nisin Thuhiltu)* : District Legal Service Authority Ccpur in Community Development Society, Lamka kithuapina' October 3, 2018 zingkallam dak 11 leh Dorcas Jubilee hall, Hebron Veng , New Lamka ah One Day Legal Awareness bawl ding a hi. Zia hun chu Salam Imocha, Retired District and Session Judge Thoubal & President Officer, Family Court in Chief Guest hina tawh uap ding, Kabib, IPS, senior SP CCpur in Functional President hina tawh uap ding leh kimneinieng Shoute, District and Session Judge, Ccpur leh Uccam, Advocate ten guest of honour hina tawh uap ding a hiu. Zia hun chuleh, Ginsianlal Naulak, Advocate and Secretary, Ccpur District Bar Association in Relationship Between Police Bar Association, Court leh Legal Volunteer tawh kisai genna nei ding, Kabib K IPS Senior SP CCpur in Law and Order leh Case Investigation tawh kisai genna nei ding, Salam Imocha, Retired District and Session Judge Thoubal & President Officer, Family Court in Crime leh Human Rights tawh kisai genna a nei ding a hi.

Gandhi Jayanti mang

CCpur, Oct. 1 *(Nisin Thuhiltu)* : Zonal Education Office ZEO CCpur in tuni October 1, 2018 zingkallam dak 11 in Vimala Raina government high school IB Road ah Mahatma Gandhi,150 Birth Anniversary " Gandhi Jayanti" amang hi. N Chingkhei singh, MES ZEO CCpur in Chief Guest hina tawh hun matna uap in, Vimala Raina government high school ah kai class IX leh X student-te'n hun matna a uap ua, Jangkhohao AI of School Ccpur in Gandhi Jayanti mat ah a umna ziak genlatna nei in, Nangkhanlal DI Nodal Officer in kipakthu gen in hun amang zo ui. Chief Guest N Chingkhei Singh, MES ZEO CCpur in a thugenna a chun, India gam zalenna ding leh lam chuamchuam ah khantona a um theina ding ah panlakna chungchuang diak nei Mahatma Gandhi pianni October 2 ah mat hisek a hidan gen in, Government of India in Mahatma Gandhi chu apan lakna te ziak ah India PA ti minvua in a gen a, Mahatma Gandhi panlakna leh kipiakzawna chu ettawn tak a hidan a gen hi.

MUP, CCpur in International Old Age Day mang

CCpur, Oct. 1 *(Nisin Thuhiltu)* : Mizo Upa Pawl (MUP) Churachandpur Branch in tuni, October 1, 2018 nitaklam dak 1:30 in YMA Hall, Hmuia Veng ah International Old Age Day amang hi. Upa V. Emanuel-a, Finance Secretary in hun matna mapui in, hun mat sung in, Upa S. Rthangpuia, Treasurer in January apat September 2018 sung a member thina tuak mi 19 te min simdawna nei in, suunna hun a nei ua, MS Dawngliani, Member in MUP Headquarter, Aizawl ah President apat message simdawna nei in, Upa C. Phunthanga, Adviser mapuina' member kum 90 chunglam mi 14 te kiang ah chawihawina Memento piakna um in, Franky P. Gangte, Adviser mapuina' Flower Cometition kipakman piakdawna a um a, J. Chamliana mapuina laa sak kidemna a nei ui. President SM Hranghleia in MUP tawh kisai a genna a chun, Aizawl ah Headquarter um a hidan gen in, Sub-Headquarter 6 nuai ah Area 83 ah Branch 581 apat member 61,078 um in a gen hi.

Khuga Battalion in UKB team thakdawna nei

CCpur, Oct. 1 *(Nisin Thuhiltu)* : Nowgong Sports Association saina, Nagaon, Assam ah 70th All India Independence Day Cup Prize Money Football Tournament 2018 ah kihel ding, United Khawzim Brothers (UKB) team-te, September 30, 2018 in 6th Battalion, Sikh Light Infantry (Khuga Battalion) in a thakdawna a nei hi. UKB team-te ahiuleh Gurudwara Sahib in Pathian malzawlna dawt piak in, Khuga Battalion ah officer-te tawh thingpi dawnkhawmna hun a nei ua, Flag-off bawlna kawm in, Subedar Major Baljinder Singh in player zosia te kiang in P-Cap khatchiat piakna a nei hi. All India Independence Day Cup Prize Money Football Tournament ahileh All India Football Federation leh Assam Football Association hiatpina' Nowgong Sports Association in a conduct ding, September 30 apat October 13, 2018 sung ah kihelna um ding, UKB in first match ah October 3, 2018 leh kihelna nei ding a hi. Tournament ah Quarter Final tiang tungzo te Rs. 15,000 piak hiding ahiu a, Semi-Final tiang tung te Rs. 25,000 piak hiding, Final Match ah Winner in Rs. 1,00,000 leh Runners-up in Rs. 50,000 sâng ding ahiu.

ZSP in thupi tak ah Diamond Jubilee lawm ding

CCpur, Oct. 1 *(Nisin Thuhiltu)* : Zou Sangnaupang Pawlpi (ZSP) General Headquarter in tuni, October 1, 2018 nitaklam dak 12:30 in Zouveng ah thuthak lakhawm mite kimupi in, ZSP GHQ Diamond Jubilee matna ding tawh kisai ah Action Plan chuamchuam a neiteu taklatna a nei ui. Chinkhenpau, General Secretary, ZSP GHQ in a genna a chun, ZSP GHQ in December 12, 2018 ah ZSP Diamond Jubilee thupi tak ah mang ding a hidan uh gen in, zia ding tawh kisai a chu June 22, 2018 ni ah Singtawm Vangkhua, Sugnu Sub-Division ah Special Assembly-cum-Felicitation nei ah Michael Ginzasuan, Ex-President in Diamond Jubilee Action Plan hawndawna nei in a gen hi. Action Plan dungzui ah August 2018 sung ah Workshop leh Seminar neizo ta, tu October 2018 ah Cultural and Literary Meet nei ding, November 2018 ah Sangnaupang exposure nei ding, December tha leh hunpi matna um ding in a gen hi. Cultural and Literary Meet hun ah Cultural and Literary Competition um ding, Cultural ah Phiit Lam leh Cultural Dance, Cultural Fusion (Choreography) leh Solo (Gamngaih la) banah Literary ah “Nampi khantona ding ah Sangnaupangte tung ah kinga hi” ti thupi nei ah Debate um ding, “Siamzilna leh Nampi Khantouhna” ti thupi nei ah Essay Competition, “Exploring Education – Zolei Zuun Vai” ti thupi nei ah Elocution leh Quiz Competition um ding in a taklang hi.