Nisin Thuhiltu – 21 July 2018

User Rating: 0 / 5

Star InactiveStar InactiveStar InactiveStar InactiveStar Inactive
 

11th Manipur Assembly, Fifth Session kipan; Opposition MLA te’n lung-awilo ziak ah Assembly Hall pawtdaw san

Imphal, July 20 *(Nisin Thuhiltu)* : 11th Manipur Legislative Assembly, Fifth Session tuni’n a kipan hi. Ni 2 sung Monsoon Session ah Manipur House ah - “The Manipur People Bill, 2018” leh “The Manipur Liquor Prohibition(Second Amendment) Bill, 2018” panna bill chuamchuam pass hiding in a kigen hi. 11th Manipur Legislative Assembly, Fifth Session chu 11th Manipur Legislative Assembly member thina tuak te leh nimchip (landslide) ziak ah Tamenglong District ah 10th July, 2018 ni ah mi 9 thina tuak te suunna tawh a kipan hi. Suunna hun matzaw in, leader of the House, Chief Minister N. Biren Singh in “The Manipur People Bill, 2018” luidawna nei in, Deputy Chief Minister (in-charge of Excise) in “The Manipur Liquor Prohibition (Second Amendment)Bill, 2018” luidawna a nei a, Minister of Education, Th. Radheshyam Singh in “The Manipur International University Bill, 2018” a luidawk hi. Chief Minister N. Biren Singh in border pillar leh Manipur University dinmun tawh kisai Innn vaihawmna a taklatna a chun, state government in state interest thil te vengbit zing ding a hidan gen in, a pawimaw dungzui ah a kisaikhakpi te tawh kithua hiat ah state government in issue umte sukven ding dawizing hi’n a gen hi.
Border pillar issue tawh kisai ah State government in Ministry of External Affairs kiang ah zikthaw ah 3th July 2018 ni ah thil umdan tutna neikawm ah a thak ah pillar Number 81, verification bawl ding ah phutna nei hi’n a gen a, zia chu tawh kitawn ah 16th July 2018 ah Ministry of External Affairs in state government chu joint team - Ministry of External Affairs & Survey of India in July 25th leh verification bawlna a thak ah nei ding hi’n a gen hi. Zia ah verification survey chu political party, civil society organisations leh a kisaikhakpi zosia’n a kithuapi chiat ding uh a nawp thu le a gen hi. Mr. Biren Singh in opposition members te chu survey bawlna kithuapi ding in a chial hi.
Manipur University ah Vice Chancellor apanmun a pat paithakna ding tawh kisai a genna a chun, Vice Chancellor paithak leh paithaklo ding chu State Government thuneina khel ah um a hina chung ah state government in Centre kiang ah thil umdan tutna nei ah enquiry committee in leave ah chia, Prof. A.P. Pandey chung ah ngawna um te khualna a nei ding, zia hun a chu ngawna um te a dik ah mudaw ahileh apanmun a pat Vice Chancellor paithak hiding ti’n a gen hi. Manipur University ah Vice Chancellor paithakna ding ah kiphinna a um zing ziak ah student te thiamzilna chawbuai ah um zing chu state government in ngaikhawk mama a hina chung ah joint delegation in New Delhi ah 17th July 2018 ni ah Union Human Resource Development Minister kimupi ah thil umdan tutna nei hi’n a gen hi. Chuleh, Justice (Retd.) Nandakumar Singh mapui ding, enquiry committee khat siamdaw ah um, zia committee chun, Vice Chancellor Prof. A.P. Pandey chung ah ngawna um te khualna nei ding, zia zaw tak chuleh Union Human Resource Development Ministry ah report pelut ding, ngawna um te a dik hi ah mudaw ahileh Prof. A.P. Pandey chu paithak hiding ti’n a gen hi.

Alangkhat lam ah Opposition Members Gaikhangam, Kh. Joykishan Singh leh N. Lokenproposed te’n Sixth Report of the Business Advisory Committee, 2018 tawh issue chuamchuam um te tu session ah genkhawm ding in phutna anei ua, Assembly Speaker kiang in ni 2 sung mai session ah issue chuamchuam pending ah um te genkhawm thei hilo ding a hina chung ah session suksaube ding a nawp thu’u a taklang hi. Zia nung a chun, Speaker Y. Khemchand Singh in House ch chutkhawmna ding hun kituptak ah bithiatzaw a hitakna chung ah zia hun sung a chu member te’n ngaidan leh dawidan pawlut thei ding a hidan uh a gen a, zia te chu tu session ah gelfel ahitheilo ahileh next sitting ah genkhawm hiding, apawimaw leh sitting suksaube thei ding hi’n a gen hi. Himaleh Opposition MLA te’n Business Advisory Committee (BAC) tawh kisai genkhawm ding ah phutna a nei uh Speaker in a ngaisaklo ziak in Assembly House a pawtdaw san ua, Chief Minister N. Biren Singh in BAC report a piakna a chawkbuai bawk ui. Opposition member MLA Joykishan in House leader Chief Minister N. Biren Singh in issue chuamchuam genlang maleh Citizenship (Amendment ) Bill 2016 leh Frame Work Agreement tawh kisai genkhak hilo in a gen a, natural disaster ziak ah mi 9 thina tuak te chungchang le genkhawm ding ah um himaleh ni 1 sung mai ah zia issue te chu genkhawm man a hina diam? ti’n dawtna a siam hi.

Mobile Internet service khak ah um; GST filling tawh kisai ah mi tamtak in haksatna tuak

CCpur, July 20 *(Nisin Thuhiltu)* : Manipur phaizang bial ah Manipur University ah Vice Chancellor Prof. A.P. Pandey paithakna ding ah kiphinna sosang tak ah a um zing tawh kitawn in Manipur state government in thudiklo, video leh message diklo thezak ding venna’n Mobile Internet Service te ni 5 sung khak (off) hiding in a puang a, zia chu tawh kitawn in Mobile Internet Service zosia khak in a um hi. Alangkhatlam ah Mobile Internet Service kikhak ziak a chun, mitamtak in buaina a tuak ua, GST tax return filling bawl theilo mi bangzat a hem a um bawk hi. Manipur Home Department in thusua a bawlna a chun, social media - Whatsapp, Facebook etc ah thuzuau leh thu diklo thezak khak ding venna ziak ah internet service khak ah um hi’n a taklang a, himaleh Goods and Services Tax (GST) tax return filling last date tuni, 20th July 2018 tawh a kituak khakna chung ah GST tax return file theilo in a um ua, BSNL Broad Band service mang ah file bawl thei himaleh BSNL Broad Band service manglo te ding ah thil buai um mama a suak hi. Hiatthei khat chu, GST tax return file theilo ni 1 sung vaigei (late) te ding ah tax department in late fine Rs 50 a lak sek a hi.

Panglian khua-mi poision tui dawnkha hiding ah muanmaw mi 4 Hospital ah admit

CCpur, July 20 *(Nisin Thuhiltu)* : Panglian khua ah tuinek laklutna lui ah poison kikawi nung poision tui dawnkha hiding ah muanmaw damlo mi 4 te tuni July 20, 2018 in District Hospital ah admit in a um ui. Poison tui dawnkha hiding ah muanmaw damlo admit ah um te chu - Nemneikim (24) w/o Jangminthang, Jangboihlun (20) s/o Hemjathang, Helun h/o Niengpi, Kimjouhoi (2) d/o Thangjahao te ahiu a, Panglian khawmi ahi vek ui.
Hiatthei khat chu, July 18, 2018 nitak lam a melhiatlo te’n Panglian khua mipi’n tuinek lakna a nei uh luikhuk kiang ah poison mang ah ai/aicha amat uh, zia lui tui chu khawsung tuinek lakna tanky tawh kizawm ahi ziak ah, tui lak ah poison kihel chu lut, mi 4 in tanky apat kila tui a dawn khak ziak ua, poison dawnkha suak ua gen a hi. Nemneikim (24) w/o Jangminthang, leh Kimjouhoi (2) d/o Thangjahao te ahiuleh tui tamlo khawn/no khat ding vel dawnkha ti a hia, Jangboihlun (20) s/o Hemjathang ahileh half liter val dawn hi’n a kigen hi. Jangboihlun (20) s/o Hemjathang in tui a dawn kuan ah, damdawi gim namsa maleh Tanky kiang ah hampa thana ding ah damdawi kimang gimnam hiding ti ah lungnuam tak ah a dawn ti a hia, aNu Lhingjanieng ahil apat Tanky tui ah poison kihel ahilam hiatdaw ah um, zia apat chu khosung mi kuaman tanky tui dawn lo ding leh tui manglo ding ah khawsung ah tangko ah um ti a hi. Tanky tui dawn kha mi 4 ten tui a dawn khak nung ua a gil uh sa asak ban ua, atha uh chau in, a annkam uh tuilo ti a hia, himaleh ann ne zing thei thi uh ti a hi. Tanky tui dawn kha mi 4 te chu tuni, July 20, 2018 zingkallam dak 10 vel in District Hospital Casualty in a ki-etsak ua, doctor ten hun bangchan ahem sung, Observation Room ah a umsak nung un, Nemneikim (24) w/o Jangminthang, Jangboilun (20) s/o Hemjathang leh Helun h/o Niengpi te chu medicine ward ah admit in, Kimjouhoi (2) d/o Thangjahao ahileh Children Ward ah admit in a um hi. Amau sia chu hal mama, Drip khai ah um in, a dinmun uh lauthawn umlo in a kigen hi.

A langkhatlam ah zia ah poision chu banggual poision, banggual ah mihing damtheina susia thei, tui lak ah poision kikawi chu bang tiang ah a gu hat ti te hiat ahipua, zia thu zik ahi tiang ah sample test a kibawl leh bawllo hiat ahi puai.

Lamka Dryclean & Laundry hawng

CCpur, July 20 *(Nisin Thuhiltu)* : MELC Road, Simveng ah tuni, July 20, 2018 zingkal dak 7:00 in Lamka Dryclean & Laundry hawnna a um hi. S. Khaikhopau Ngaihte, MCS, Assistant Commissioner, Churachandpur in zia hun chu Chief Guest hina tawh a uap a, Lamka Dryclean & Laundry hawnna leh Ribbon Cutting nei in vanmat chuamchuam te etthakna anei nung in, S. Suanthang Ngaihte mapuina’ Lamka Dryclean & Laundry Pathian kiang a latna Pastor Tualkhothang, Local Pastor, Bethel Baptist Church, EBCC in a nei hi. Chief Guest apat thugenna um in, Laundry neitu, S. Liankhanmuan apat thugenna a um hi. Chief Guest Khaikhopau in zia hun a chun, Licence kituptak neisa Lamka Dryclean & Laundry hawndaw theina ding ah panlatu leh a neitu Liankhanmuan pakcha mama a hidan gen in, Lamka Dryclean & Laundry lawting tak ah a chiato ding a dawisakna thu a lan hi. Lamka Dryclean & Laundry ahileh tu leh tu Washing Machine chi 2 nei a hia, Woolen Shawl, Blanket/Rizai leh puan chi chuamchuam sawpsak thei ding, Dryclean in Leather Jacket, Coat Suit, Wedding Gown ti te le sawpsakna thei a hi.

Training of ASHAs on Population Based Screening chiatha zing

CCpur, July 20 *(Nisin Thuhiltu)* : National Health Mission (NHM) CCpur saina’ CMO Conference Hall ah July 17 - July 21 2018 sung ah ni 5-sung Training of ASHAs on Population Based Screening of Common NCD kiti chu a chiatha zing hi. Training hun in District sung ah ASHA workers te a pang ua, Resource Person chuamchuam NHM State apat ASHA Trainer M Memcha Devi, Sh. Aribam Gunachandra leh NHM CCpur apat ASHA Trainer Lamsanglian, BPM Thanlon ten ziltilna a nei ui. Zia training chu national program for prevention and control of cancer, diabetes, cardiovascular disease and Stroke NPCDCS nuai ah nei a hi. Training hun sung ah ASHA ten natna kikaisawn theilona ding, Breast Cancer, Throat cancer, cervical cance, oral cancer, zunthum leh natna dangdang nei mite hawldaw dingdan tawh kisai zil ding a hiu a, India government in damtheina lam tawh kisai ah gamsung pumpi ah Ayushman Bharat for a New India 2022 tawh kituak ah health & wellness centre lakh khat leh kim hawndaw ding ah thupuan a bawl sukpitin theina ding ah zia training chu nei ah um a hi. CCpur district a ding in Singngat Assembly constituency ah Suangdoh sub-division headquarter, Suangdoh PHSC le Health & wellness centre ding ah kawi in a um a, maban ah lamzang khua ah le kikawi ding hi’n a kigen hi. Health & wellness centre a chu natna chi chuamchuam naupang, numei nauvawp te ki-etsak thei ding a thawn ah test chi chuamchuam bawl thei ding ti a hi.

YPA GHQ in Changmai Festival 2018 mang ding

CCpur, July 20 *(Nisin Thuhiltu)* : Young Paite Association (YPA) General Headquarter in Changmai Festival 2018/ Tangmai Festival 2018 mat a guatna tawh kisai in, tuni, July 20, 2018 sunnung dak 2:00 in YPA GHQ Office, Hiangtam Lamka ah Press Briefing a um hi. Zia hun a chun, Khailianthang, President, YPA GHQ in Paite Nam in Festival, Sawngpi kiti neilo a hidan taklang in, March 2, 2018 ni ah YPA GHQ mapuina nuai ah General Body Meeting hun ah Agenda khat ah Festival matna ding tawh kisai genkhawm ah a um nung ah lemsakna nei ahi tawh kitawn ah Changmai Festival 2018 mat ding ah lemsakna um hi’n a gen hi. Zia festival matna ding tawh kisai a chu, Sub-Committee le siamdaw ah umta leh August 4, 2018 ni ah YPA GHQ Hall, Hiangtam Lamka ah zia festival chu mat hiding in a gen hi. Changmai Festival 2018Organizing Sub-Committee Chairman ding ah Vungzapau, Treasurer, YPA GHQ guat ah um in le a gen a, Nam dang te’n min chuamchuam mang ah Festival a kinei chiat gual ua, Paite Nam in Changmai min mang ah Festival mat ding a guatna chung ah Budget Rs. 1,50,000 bithiak ah um, a thupi theipen ah 1st Changmai Festival 2018 chu mat hiding in a gen hi. Zia Changmai Festival 2018 matna ding a chu Organizing Sub-Committee in Changmai 5,000 apat 6,000 vel chawmkhawm ding, a nenuam taphawt in a nek thei ding ua kawi hiding ti’n le a gen hi.

K Salem khua latna nei ding
CCpur, July 20 *(Nisin Thuhiltu)* : Tualnuam leh Mualkot kikal ah masang ah Yaiphakol a la kiti sekna mun ah K. Salem kiti khua (village) thak Pathian kiang ah a latna 21st July 2018, zingkallam dak 11:00 leh um ding a hi. Zia hun chu, D. Khuala Vaiphei in mapui ding, Upa Thangkhawlal of K Salem in hunkawt hawnna nei ding, Rev. Retd. Paugen, Chief of Suangpha in lamtuana thucha gen ding leh Kh. Thianna, Chief of K. Salem in khawsatna tawh kisai genlatna nei ding a hi. Chun, Dr. Rev. Kaitinkap in Pathiang ah K. Salem khua latna nei ding, Rev. HL Vena Bialtu Pastor in Pathian kiang ah khua hausa te ding ah malzawl dawt piakna nei ding a hi.

MU issue ah CSO chuamchuam in meeting nei; memorandum piakit
Imphal, July 29 *(Nisin Thuhiltu)* : Manipur University ah Vice Chancellor Prof. A.P. Pandey paithakna ding ah kiphinna a um zingna tawh kisai in tuni’n All Manipur United Club Organisations (AMUCO), United Committee Manipur (UCM), Community of Civil Society Kangleipak (CCSK), Ethno Heritage Council, ( HERICOUN), IPSA, MEELAL with MUSU, MUTA leh MUSA leader te panna civil society organisation chuamchuam in joint meeting a nei ua, zia hun a chun, Vice Chancellor Prof. A.P. Pandey paithak ahimasia kiphinna sutzawm ding in lemsakna anei ui. Diklo tak ah Vice Chancellor Prof. A.P. Pandey paithakna ding ah phutna tawh kisai kigen chu joint meeting in demna bawl in, retd. Justice khat mapui ding, Fact Finding Committee kiti kisiamdawk chu Committee of Enquiry Act dungzui ah chiapi ahiloleh umzia neilo in a gen ui. Dakkal 6 sunglam thil umdan a genkhawm nung un, Vice Chancellor Prof. A.P. Pandey chung ah avaima theipen ah judicial enquiry bawl ding, zia hun sung a chu namphu leave ahiloleh suspension ah Vice Chancellor Prof. A.P. Pandey kawi ding, investigation hun sung ah in-charge Vice Chancellor guat ding, CSO chuamchuam te’n memorandum a thak ah piaklut ding in lemsakna a nei ui. Zia nung a chun, CSOs palai te’n Chief Minister office ah memorandum piaklutna a nei ui.

Kiphinna nei gua student te police te’n nung sawl
Imphal, July 20 *(Nisin Thuhiltu)* : Manipur University ah Vice Chancellor Prof. A.P. Pandey paithak ding phutna kiphinna a um zing tawh kitawn in tuni, 20th July 2018 zingkallam dak 11:00 in TG Higher Secondary , Iboton Sana Higher Secondary School, CC Higher School leh Johnston School apat student tamtak te Johnston School ah chiakhawm in, Western Kangla gate mai ah kiphinna nei gua’n Kangla gate lam zuan in lampi zuina a nei ua himaleh Police te’n lampi tingtan in student kiphinna nei gua te chu a nungsawl kit vek ui.

WhatsApp ah chat 5 bep msg forward thei hita
New Delhi, July 20 *(Nisin Thuhiltu)* : Messanging app kithang mama, WhatsApp in message forwarding limit a siam hi. WhatsApp in tuni thusua a bawlna ah gamdang sang ah message, lim, video forward kiha bawl zawkna, India ah khatvei thu ah chat 5 khel message khat forward thei hitalo ding leh media messages kiang ah quick forward button lakdaw hiding in a taklang hi. Thulêng leh news lêm thezaklo na ding ah Indian government in social media site leh messaging apps te kiang panla ding ah a naw tawh kitawn ah zia gual dân thak hi WhatsApp in a puakdaw ahi. WhatsApp hi messaging apps te lak ah zângkhâi leh bailam mama ahina ah a mang le mi tam mama in, news a hiloleh thu lêm chuam chuam thezakna ah khenkhat in a ha mat mama ziang uh ahi.

Delhi ah Manipur mi khat sawisak lup ah um

New Delhi, July 20 *(Nisin Thuhiltu)* : Manipur apat kipan, kum 25 ah upa pawsal khat a sanggam pa tawh sum thu ah kinial buaina kha in vuaklup in aum hi. Sunlight Colony area, south Delhi ah inn a lua khawmpi u pa gen dan ah thina tuak chu Suhaimi Khangah ahia, zia thiltung chu police kiang ah zingkal lam dak 5:30 tuam ah hiatsak aum ahiu. Deputy Commissioner of Police Chinmoy Biswal gendan in, Suihaimi Khangah A.S chu a luchang ah liamna tuak pum ah AIIMS Trauma centre tut himaleh a liamna a pat damdawk zolo in a la mualliam hi. Police in a suizuina apat, ama chu a upa A.S Shunreiwung leh a sanggampa Lei Shingham tawh inn luakhawm leh call centre chuam chuam ah nasem a hidan uh a hiadawk u’i. Lei Shingham a account a pat Suihaimi Khangah A.S in sum ladawk hi ah ngaw in a kinial ua, zia chu sosang kha ah zia thilsuak chu tung ahi. Tuhin Lei Shingham umna hiat ahilo tawh kitawn ah police in mat ding in a hawl zing hi.