Nisin Thuhiltu - 20 July 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Chief Minister in kiphinna ziak ah liamna tuak te etthakna nei

Imphal, July 19 *(Nisin Thuhiltu)8* : Chief Minister N. Biren Singh in tuni’n kiphinna ziak ah student leader liamna tuak Raj Medicity, Imphal ah etkawl ah um Democratic Students’ Alliance of Manipur, General Secretary Sheetal Oinam vena a nei hi. Ama chu Deputy CM leh Cabinet Ministers, OSD to Chief Minister Sumant Singh, SP of Imphal West Haobijam Jogeshchandra te’n le a zui ui. Chief Minister N. Biren Singh in thuthak lakhawm mite kiang ah a genna a chun, State Government in Manipuri University community te demand sukven theina ding ah panlakna nasatak nei zing a hidan gen in, MUTA, MUSU leh MUSA te dawidan zil ah State government in Central Government thuhiat ah Vice-Chancellor Prof. AP Pandey chungchang khualna nei ding ah retired Chief Justice of High Court mapui Committee khat siamdawk a hidan a gen hi. Vice-Chancellor Prof. AP Pandey chung ah ngawna um te a dik ah mudaw ahileh paithak hiziang ding in a gen a, Manipur University chu Central University ahina chung ah State government in kigawl theina tiang limit nei in a gen hi. State government in Cabinet thupukna dungzui ah Central Government chu thil umdan khualna nei ding ah nawna nasatak ah bawl zing a hidan taklang kawm in, Governor Dr. Najma Heptulla le kimupi ah thil umdan tut ah umta hi’n a gen hi. Zia chu tawh kitawn ah Governor in President of India kiang ah thil umdan hiatsak ta hi’n a gen hi. Student kiphinna neite chung ah huham tak ah gamta, police personnel te chung ah government’s action ding tawh kisai ah dawtna a dawnhuna a chun, kiphinna nei te chung ah huham tak ah gamta Sub-Inspector 1 leh Constable 1 suspend bawl ah umta hi’n a gen a, liamna tuak te ki etkawlna bangkim chu State govt. in puakdaw piak ding, a dawmdaw kit pai ding uh a nawp thu le a gen hi.
Police suspend thu ah Police te’n kiphinna nei

Imphal, July 19 *(Nisin Thuhiltu)8* : Manipur University Student Union (MUSU) in DESAM, MUTA leh MUSA te support bawlna Manipur University ah Vice-Chancellor Prof. AP Pandey paithak ding phutna kiphinna aneina chung ua, Student kiphinna neite tawh kinawptuana huham tak ah gamta, police personnel 2 te chung ah state government in action la, Sub-Inspector Gunachandra Chanam leh Constab HC Sidarth Thokchom te suspend a bawlna chung in, Manipur Police Personnel te’n lung awilo thu taklang in, service meithal kawi tha’n suspension order zukkit ahiloleh duty bawllo ding un kiphinna a nei ui. Manipur Police Personnel te’n ziagual kiphinna chu nei a hidan uh a hiat uh tawh kitawn in High Commanding Officers of Manipur Police - DGP, IGP, SP Imphal West te’n Commando Complex, Minuthong ah police personnel service meithal kawitha te kimupi in kihona a neipiu a, zia nung a chun police personnel te’n kiphinna a chawlsan ui. A langkhatlam ah Manipur University Student Union (MUSU) in DESAM, MUTA leh MUSA te support bawlna dakkal 48 sung bandh in Imphal area ah hindan ngaina nasatak in a chawk buai a, President, DESAM Salam Akash in VC Adya Pandey paithak ahimasia MU Community in kiphinna chawlsanlo ding uh hi’n a gen hi. Himaleh bandh a um zawm leh umzawmlo ding thu zia thu zik a hi tiang ah bangma hiat a hi puai.

YVA GHQ mapuina' Panglian khua mipi te tui thiang pia

CCpur, July 19 *(Nisin Thuhiltu)8* : Young Vaiphei Association (YVA) General Headquarters (GHQ) mapuina’ Singngat Assembly Constituency huapsung ah um, Panglian khua ah tuni, July 19, 2018 in phatchuam ngai mi bangzat a hem te’n DI Pickup 2 mang in tuidawn ding piakna a nei ui. A kihiatdan in, Lamka leh Singngat kikal Tedim Road in a chawtkhak Panglian khua ah tuinek ding kilakna, Panglian Lui ah zanni nitaklam ah kua ahi hiatlo te’n Gu (poison) a va kawi uh ti a hia, tui ah damdawi gim anam banah Sanga neu tanky sung ah a thisa mudaw ah um ti a hi. Zia chu tawh kitawn ah khawsung mipi’n tanky sung tui luanlut saklo ah, nek-leh-dawn ding ban ah kisilna le manglo uh hi’n a kigen a, zia ziak a chu tuithiang taksapna a tuak uh tawh kitawn ah YVA GHQ in P. Kamkholal, EM, ADC Churachandpur thuhiat ah, EM-pu’ sumpiak ah DI Pickup 2 mang ah Panglian khaw mipi’n in amatkawm ding uh tui leh dawn ding tuithiang Mineral Water le hunkhawp a piak uh ti a hi. Zia ah thiltung tawh kisai a chun, Vaiphei People’s Council (VPC) GHQ leh Zillai Churachandpur District ah lawiupa te’n le Panglian khua ah thil umdan kanthakna a nei ua, Panglian khua ah thil umdan genkhawmna a nei bawk ui.

Upa Vungminthang, President, YVA GHQ in YVA in dawtna a siam dungzui ah P. Kamkholal, EM/ADCC in a pawimaw ding zat sum a piakna chung ah kipakthu gen in, gamtatna hawilo ziak ah Panglian khua-mipi’n haksatna a tuakna chung ua Police in gamtatna hawilo chiapi te matdawna ding ah panlakna a nei ding a nawp thu gen in, ziagual thil chu tunung ah a tun kitlo ding a nawp thu le a gen hi. Khatkhotong Baite, President, VPC GHQ in Panglian khawsung in tui ah haksatna a tuakna chung ua YVA panlakna pakcha a hidan gen in, gamtatna dawi umlo tak chiapi te hawldaw ding pawimawsa hi’n a gen hi. YVA hi’n, Zillai hitaleh thilpha a bawl teu chu VPC leh Nam pumpi a ding ah minphatna hi’n a gen hi. Thiltung tawh kisai a chun, YVA GHQ leh Zillai Churachandpur District in demna a bawl ua, VPC GHQ in police ah FIR bawl ding leh kigawl khakna nei te avaima theilam ah matdawna ding ah panlakna um ding hi’n le Khatkhotong Baite, President, VPC GHQ in agen hi.

PTC Mizoram in Assembly cum Election nei

Aizawl, July 19 *(Nisin Thuhiltu)8* : Paite Tribe Council PTC Mizoram Headquarter in tuni, July 19, 2018 in MJA Press Club,Champhai, Mizoram ah PTC Mizoram Headquarter Special Assembly cum Election 2018 a nei hi. Zia hun chu uap ding in PTC GHQ apat in member 6, V Vungzathang, CWC Chairman,, K Suanthang, President, G Vungsuanthang Vice President, Thangzamuan Tombing, General Secretary, Chinkhup R Tombing, Secretary External leh T Awnkhanlun, Secretary Internal ten July 17 zingkal dak 5:30 in Churachandpur nusia’n Champhai Mizoram a zuan ui. PTC Mizoram Headquarter Special Assembly cum Election hun ah Assembly Speaker in C Lawmkim, Chairman, CEC PTC Mizoram HQ leh Deputy Speaker in Damsavung, Vice Chairman, PTC Mizoram HQ te a pang ua, Speaker mapuina nuai ah vaihawmna hun nei in, Assembly hun ah khuallian B Suanzalang, IFS Retired, K Suanthang, Inteekpa, President, PTC Mizoram HQ, President, SSPP Mizoram HQ banah President, ZCS Mizoram ten thugenna a nei ui. PTC Mizoram Headquarter Special Assembly cum Election 2018 a chun, PTC Mizoram Headquarter apat Office Bearer leh CEC, Sub HQ ah office bearer, block a office bearer leh executive member, Unit tin ah member 5 banah PTC GHQ leh Candidates-te te a pang ui, Election ahileh PTC GHQ vaisaina nuai ah nei in a um a, Paite Tribe Council PTC Mizoram Headquarter ah 2018-2021 sung vaipaw ding in President-Vanlalveni @ Maveni Hangzo, Aizawl, Vice President SB Dochinthang, Vaikhawtlang leh Treasurer ding in V Ginsiam, Mimbung te a tel ting ua, teltin thak ah um te chu V Vungzathang, CWC Chairman, PTC GHQ in kitiamsakna nei in, Upa Zamzalang in Pathian kiang in a pauchap piak hi.

ZSF in khamthei dodalna pan ding
CCpur, July 19 *(Nisin Thuhiltu)8* : Lamka khawpi sung ah Khamtheih (Drugs) ne/kikap te leh zuakte zalentak a gamta a hidan uh gen ah a um zing tawh kitawn in Zomi Students’ Federation (ZSF) General Headquarter in July 21, 2018 apat Anti-Drugs Drive pandawk ding hi’n a taklang hi. Zia chu tawh kitawn ah Zomi Students’ Federation (ZSF) in panlakna neingal ding a hina chung ah Bazaar sung leh mipi mu ah khamthei kikap/ne leh zuak te’n a chawlsan ding un ZSF in hiatsakna thusua a bawl a, zia hiatsakna chu zuilo a um leh a chung ua action khautak lak hiding in le a taklang hi. Chun, ZSF “Anti-Drugs Drive” chu mipi’n kithuapi chiat ding in ZSF in chialna a bawl hi.

Nahlip Lui ah okcha thisa kipai
CCpur, July 19 *(Nisin Thuhiltu)8* : Bungmual khawsak ah Nahlip Lui ah tuni, July 19, 2018 in vokcha a thisa khat kipaimang mudaw in a um hi. Vokcha ahileh tuk 5 vel ding a lian hi a, mudaw ah a um hun ah nam seta hi’n kigen hi. Naplip Lui ahileh Lanva Lui a luanglut ahia, mi khenkhat in Lanva Lui ah tui matkawm ah a nei uh a hisekna chung a ziagual ah vokcha thisa kipai chun, tui subuak chuam mama ding in a kilang hi.

Free ECHO Screening bawl ding
CCpur, July 19 *(Nisin Thuhiltu)8* : State Mission Director, National Health Mission NHM nuai ah Sky Hospital, Imphal in July 21, 2018 sunma dak 10:30 apat District Hospital ah lungchang lam a buaina nei-te a ding in Free ECHO Screening bawl ding a hi. Zia hun a chu mi mi 100 tiang screening bawl hiding, Cardiologist ten lungchang lam a buaina nei alo thei lo ah, Echocardiogram bawl ngai-te en ding a hiu.

Routine Immunization nei ah um
CCpur, July 19 *(Nisin Thuhiltu)8* : Khawpi sung, Veng/khua chuamchuam ah Routine Immunization patdaw a hitawh kitawn in, District Family Welfare Officer DFWO, CCpur in Routine Immunization neina ding mun, a ni leh a hun ding a taklat tak tawh kitawn in thasin leh Ningani, ani thumna (Third Thursday) sin ah New Bazar, Salem Veng leh Red Cross area a ding ah zingkallam dak dak 10:00 apat Hill Town Community Hall, Thanzam Road ah Routine Immunization chiapi ding ti a hidungzui in tuni’n Routine Immunization chiapi in a um hi. District Family Welfare Officer DFWO, CCpur in Routine Immunization neina ding tawh kisai a taklat dungzui ah, Kiginni (Third Saturday) sin leh Neihsial Veng, Nazareth Veng, Khuga Christian Meitei leikai leh Nengthawng Avenue area ding te a ding ah zingkal dak 6:00 apat Neihsial Veng hausapa inn ah um ding, Go Cin Khup Veng area a ding ah zingkal dak 6:00 apat Aganwadi Centre, Go Cin Khup Veng ah um ding, Bijang khopi leh Bijang B ASHA area a ding ah zingkal dak 6:00 apat Bijang community hall ah um ding, Kamdou Veng, B Phaicham leh kim leh kiang a khua/veng ban ah Tedim Road Kamdou veng apat peace ground tiang te a ding ah zingkal dak 6:00 apat Tuibuang 2 ASHA inn ah um ding, Tuinom khua a ding ah zingkal dak 6:00 apat in Tuinom hausapa inn ah um ding, Headquarter Veng ASHA A leh B te a ding ah zingkal dak 8:00 apat in Headquarter Veng Community Hall ah um ding a hi. Khawsak dan kituplo ziak ah Routine Immunization tawh kisai ah District Immuniztion Office DIO zuan zo lo te khualna ziak ah DFWO in Fixed immunization site ah Routine immunization chiapi ding ah lemsakna a nei tawh kitawn ah Khawpi sung, Veng/khua chuamchuam ah Routine Immunization chiapi ah um ding a hi.

PLA attack te attack ah AR personnel 1 liam
Imphal, July 19 *(Nisin Thuhiltu)8* : Aimol Joupi area, Indo- Myanmar border, Chandel District ah phaizang thingnuaimi People's Liberation Army of Manipur (PLA) te’n IED bomb mang in 29 Assam Rifles personnel routine patrol duty ah chi ate attack a bawl ua, ziana a chun 29 Assam Rifles personnel 1 in liamna a tuak hi. Thudawnna’n a taklat dan in, Major Subash mapui 29 Assam Rifles column khat routine patrol duty ah a chianau ah tuni, 19th July 2018 zingkal vaima tak ah IED bomb a kam uh supuak kawm ah PLA te’n meithal ah kap tawh thua ah attack a bawl uh hi’n a gen a, hun chawmkhat kikaptuana piang in le a gen hi. A langkhatlam in zia attack chu amau bawl a hidan PLA in a taklang a, Assam Rifles personnel 4/5 te’n liamna tuak ah genkawm in, amau cadre te chu bittak ah suakcha vek un a taklang hi.

Heroin No . 4 powder tawh mi 1 mat ah um
Imphal, July 19 *(Nisin Thuhiltu)8* : Imphal West District Police Commando team khat in khamthei No. 4 powder tawh mi 1 Moirangkhom, Imphal in amandawk ui. Mat ah um chu Khumanthem Tomba Singh (38) son of Kh. Raghumani Singh of Moreh ward No. 7, PS-Moreh, Tengnoupal a hi. A Heroin No. 4 powder puak chu 400 grams a hia, a sum ah Rs. 1,500/- le a taksa chung apat in mudaw in a um hi. Zia tawh kisai a chun, Imphal Police Station ah case ziklut in a um a, khamthei a lakna leh a piakna ding te khualna chiatha zing hi’n SP, NAB, W. Basu Singh in thuthak lakhawm mite kiang in a gen hi.

Rajya Sabha in Prevention of Corruption (Amendment) Bill pass; Lok Sabha in Fugitive Economic Offenders Bill pass

New Delhi July 19 *(Nisin Thuhiltu)8* : Rajya Sabha in tuni’n voice vote in Prevention of Corruption (Amendment) Bill, 2013 passed a bawl hi. Zia Bill chu public servant, Officer te kiang ah gawlgukna um theilo ding, sum gawlgukna chiapi a um leh a chung gawtna piak theina ding in provision a um hi. Bill tawh kisai a chun kinialna (debate) hun chawmkhat sung a um a, zia hun a chun, Minister for Personnel and Public Grievances Dr. Jitendra Singh in Bill tawh kisai chu Standing Committee, Law Commission leh Select Committee te tawh genkhawm ah a um nung ah Innpi ah puaklut ah um a hidan a gen hi. AIADMK, CPI leh DMK te panna political party chuamchuam a pat member te’n Bill tawh kisai genkhawmna nei hun in pan a lau a, Bill dungzui ah sum ah gawlgukna chiing te direct ah dankal ti a hi. Chun, sumpetu te’n ni 7 sung ah gawlgukna tawh kisai law enforcement authority te kiang a tut ahileh ama chu thiamlo chan hilo ding a hi. Chuleh, Prevention of Corruption Bill, 2013 dngzui ah nekguk dodalna kawng ah dân lui sang ah khau zaw diak ah panlakna ding ti ahia, gawlgukna pete humbitna ding provision le lakdaw in a um hi.

A langkhatlam ah Lok Sabha in Fugitive Economic Offenders Bill, 2018 passed in a um a, zia chu Rajya Sabha ah luidaw kit hiding a hi. Lok Sabha ah Union Finance Minister Piyush Goyal in Fugitive Economic Offenders Bill tawh kisai a genna a chun, Fugitive Economic Offenders ordinance tuhun ah pawimaw mama a hidan gen in, Fugitive Economic Offenders Bill ahileh March 12, 2018 ah Lok Sabha ah luidaw in a um a, zia Bill dungzui a chu diklo tak ah nasep thilbawl, gawtna maitua ding lau ziak ah gam chuam ah kipemdawk/zamdawk te chung ah gawtna piakna ding tawh kisai provision a um hi.