Nisin Thuhiltu – 13 May 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Aina Battalion in galvan tawh UTLA cadre 3 man

Lamka, May 12 *(Nisin Thuhiltu)* : Red Shield Division nuai ah Aina battalion in Khonjang Khoppi, Thanlon Sub-division (Pherzawl District) ah nisung, 11 & 12 May 2018 in UTLA (United Tribal Liberation Army) cadre 3 - Self style Surgeon Major Soilienmang@Marcus h/o Kimboi, Lalthang leh Papau te aman hi. Mat ah um te a pat a chun, meithal, meichang leh kihona matna vanmat chuamchuam le a mudawk ua, galvan a matdaw teu chu inn kiang ah kisel hi’n Assam Rifles thusuak in a taklang hi. Mat ah um cadre 3 leh galvan te chu Police station Churachandpur khut ah piakdaw in a um hi.

Kpi CSO te’n local elected palai te tawh district chunchang genkhawm
Kangpokpi, May 12 *(Nisin Thuhiltu)* : Kuki Inpi Kangpokpi District mapuina nuai ah tuni’n Kangpokpi district sung ah civil society chuamchuam te leh ADC Sadar Hills Councilors te’n district khat ah siamdaw himaleh tuni tiang ah District khat gual ah Kangpokpi District thuneina piak ahilona chungchang genkhawmna a nei ui. Zia meeting chu ADC Sadar Hills, Chairman Haokholal Hangshing, Vice Chairman, Thangjakam Misao, Executive Member Kaikhosei Lhouvum leh Councilor Dama Vaiphei te’n uap vek maleu, Social Welfare and Cooperation Minister, Nemcha Kipgen, MLA Ngamthang Haokip, MLA Yamthong Haokip te’n le uap ding uh ti himaleh uaplo uh hi’n a kigen a, civil society organizations leaders - Kuki Women Union, Mother’s Union, Kuki Students’ Organization, United Welfare Committee, Thadou Students’ Association, etc te’n uap vek uh hi’n a kigen hi.

Meeting ahileh Kuki Inpi Kangpokpi District President, Seikhomang Khongsai leh Secretary Lamminlun Singsit te’n amapui ua, tuni tiang ah Kangpokpi District ah DC leh SP te thuneina kituptak ah piak ahilona, boundary issue, CM in district development packages a puan sukpitinlo ah a umna tawh kisai banah CSO te’n ‘Kumbul Kithin’ (annual assembly) resolutions neiteu genkhawmna leh etthakna a nei ui. Chief Minister umlo hun ah Chief Minister in-charge Works Minister, Th. Biswajit in November 11, 2018 ah thutiam a bawl te tuni tiang ah sukpitin ah a umlo chu meeting in demna nasatak in a bawl a, state government chu a vel ah hiatsakna bawl ding in lemsakna a nei ui.

Hiatthei khat chu, CSOs Kangpokpi in Kuki Inpi mapuina nuai ah state Government chu October 2017 ah DC leh SP te thuneina bukim piak ding ah huntiam ala bawlkhum, NH-2 (Imphal-Dimapur road) leh NH-37 (Imphal-Jiribam road) ah dakkal 36 sung November 15, 2017 a pat chiapi ding ah vauna tiang a bawl, state government in a thilphut uh sukpitin piak hiding ah thutiam a bawl ziak ah kiphinna nei a guat uh a chawlsan kit uh himaleh tuni tiang ah bangma sukpitin piak hinailo ti a hi.

Free Cancer Detection Camp bawl

Lamka, May 12 *(Nisin Thuhiltu)* : Manipur Oncology Society (MOS) in Vaiphei Officers’ Forum (VOF) leh Young Vaiphei Association (YVA) GHQ support bawlna’n tuni,12th May 2018 in Vaiphei Peoples' Council Community Hall, Bethel Veng, Churachandpur ah ‘One-Day Camp on Cancer Detection and Awareness’ a bawl hi. Zia hun a chun, damlo tamtak te a ki-etsak ua, Manipur Oncology Society a pat Doctor 26 in mi en in, a pawimaw dungzui zel in damdawi a thawn in a hawm ui. Zia camp a chun, cancer natna kiti mihing a ding ah natna lau umtak himaleh a kihiatdaw vak ahileh zendam thei hi’n a kigen hi.‘One-Day Camp on Cancer Detection and Awareness’ hun chu VPC GHQ President Khatkhotong Baite leh Secretary Nangzakai Suante, YVA GHQ President Upa Vungminthang leh Vice President H. Sangpi mapui YVA GHQ cabinet member te leh Vaiphei Officers’ Forum (VOF) Chairman, LM Khaute,IPS, DGP, Manipur leh Vice Chairman Henlianthang Thanglet, Dr Seanboi Vaiphei te’n le a uap ui.

YVA Town Unit Office -cum- Store Room hawnna leh latna nei

Lamka, May 12 *(Nisin Thuhiltu)* : Young Vaiphei Assciation (YVA) Town Unit/Hilltown in tuni, 12 May 2018 zingkal dak 7:30 in YVA Town Unit Office -cum- Store Room hawnna a nei hi. Zia hun chu Thangkhosuanmun Guite, MDC/ADCC banah Chief of Hiangtam Lamka in Chief Guest hina tawh uap in, Office -cum- Store Room hawnna a nei a, Rev. ST Khuppa in Pathian kiang ah a latna a nei hi. Zia hun matna chu Lalson in amapui a, Khupminthang in vaidawn thugenna nei in, Th. Chinthang in Report piakna a nei a, Khatkhotong Baite, President VPC GHQ, Vungminthang, President YVA GHQ leh Chief Guest te a pat thugenna um in, K Khama'n kipakthu gen in, Upa S Thonglam in hunkhakna a siam hi. YVA Town Unit Office -cum- Store Room hawnna hun chu, P. Kamkholal Vaiphei, EM / ADCC in, D. Khuala Vaiphei, Project Director, NERCORMP, Churachandpur leh khawhausa, YVA Town Unit cabinet member te, nungak tangval, leh mipi hunkhawp te’n le a uap ui.

CCpur Dist. Hospital ah State Level Intl. Nurses Day mang

Lamka, May 12 *(Nisin Thuhiltu)* : Florence Nightingale Brithday/International Nurses Day ah May 12 mat a hi sek tawh kitawn in tuni’n Manipur State Level ah Churachandpur District Hospital ah Florence Nightingale Brithday/International Nurses Day mat in a um hi. Tuni May 12 International Nurses day ahihtoh kiton in Ground Floor, OPD Block, District hospital ah Trained nurses association of India, TNAI, Manipur State Branch leh CCpur Nurses saina nuai ah Nurses A Voice To Lead Health is a human Rights chih thupi zang in International Nurses day zat in om hi. Zia hun chu V Hangkhanlian, Minister, Agriculture, Veterinary and Animal Husbandry in Chief Guest hina tawh uap in, Dr Kimngaihching Simte, Chief Medical Officer (CMO) CCpur, Dr VC Pau Tonsing, Medical Superintendent MS, District hospital, CCpur, Th Nandarani Devi, President, Trained Nurses Association of India (TNAI), Manipur State Branch leh Sangthuam Tonsing, Nursing Superintendent Incharge District Hospital Ccpur te’n Guest of Honour, Functional President leh Chief Host hina tawh a uap ua, District sung ah Medical Department official, nursing school chuamchuam ah student leh tutor te’n a uap ui.

Hun matna ahileh Niangneihhoih, Staff Nurse, District Hospital leh Janice Lalparvul Tutor, Bethesda College of Nursing te’n amapui ua, GNM School of nursing te’n vaidawnna la sa’n, khual lian te’n lamp lighting a nei ui. Hun mat sung in GNM School of Nursing, Ccpur leh Bethesda College of Nursing te’n damlo te etkawlna leh a insungmi teu leh doctor/nurse te mawpuakna tawh kisai drama ah suklatna a nei ui.

Chief Guest V Hangkhanlian in a thugenna a chun, damtheina tawh kisai ah programme chuamchuam a uapna doctor leh nurse te kipiakzawna chu thupi sa leh za mama a hidan gen in, Lady Florence Nightingale sulnung zui ah damlo etkawlna nurses leh a zil lai student-te mi tampi-te lak ah mi vangpha mama in a gen hi. Chun, tu ah nurse zillai te chu lungkelo ah a zilnau kituptak ah a zaw theina ding ua panla chiat ding in tilkhona a bawl hi. Chuleh, Manipur government in state sung ah damtheina lam tawh kisai ngai khawk mama a hidan gen in, Manipur Chief Minister N Biren Singh in state sung ah inchen haksa te khualna neikawm ah Chief minister-gi Hakshelgi Tengbang (CMHT) a patdaw chu mitamtak in a phatchuampi ding a nawpthu a gen hi. OPD Block ah International Nurses day amatzaw un, Imphal a pat Trained Nurses Association of India, TNAI, Manipur State Branch a pat medical team te’n district hospital ward chuamchuam etthakna nei in, damlo te holimpina le a nei ui. Florence Nightingale Brithday/International Nurses Day ahileh kumsin ah kimang sek a hia, state level ah Distirct khat in zintun sek a hina chung ah tukum ah CCpur district in a zintun a hi.

Ex-Serviceman Rally nei

Lamka, May 12 *(Nisin Thuhiltu)* : Churachandpur Assam Rifles kithuapina tawh Khuga Battalion (6th Sikh Light Infantry) saina tuni, May 12, 2018 zingkallam dak 9:30 a kipat in Tuibong ah District Training Centre ah Ex-Serviceman Rally a um hi. Zia hun chu V. Hangkhanlian, Minister, Agriculture, Veterinary & Animal Husbandry, Manipur in Chief Guest hina tawh a uap a, Shyam Lal Poonia, IAS, DC Churachandpur in Guest of Honor hina tawh a uap hi. Major Kunal Bhuria in hun matna amapui a, Brigadier Ajay Kumar, Commanding Officer, 27 Sector Assam Rifle, Tuibong in vaidawnna thu gen in, Ex-Serviceman Rally hawnna a nei a, thilpiak piakdawna a nei hi. Chief Guest apat thugenna um in, ex-servicemen, liam-le-bai tuak te leh gal ah thi, sepai zite’ kiang ah thilpiak piakdawna nei in, stall chuamchuam ah registration a kipan hi. Chief Guest V. Hangkhanlian in a thugenna a chun gamsung humbitna ding ah panla, sepaite leh pension sate zana sangtak pekawm in, gam humbitna ding ah thina tuak insungmite leh liam-leh bai te chu civil administration lam in le panpi nuam zing himaleh sum lam ah taksapna a um ziak ah duthusam gual ah panlakna umtheilo hi’n a gen a, himaleh Brigadier Ajay in government apat phatchuampi thei ding thil te mang ah panlakna a neizing chu kipakpi mama in a gen hi.

Hun matsung in, disabled soldier 8, war widows 15 leh veer naris 9 kiang ah kipakpina thilpiak piakna a um a, pension tawh kisai ah lekha fello te sukfelna ding ah Suvigya Cell hawng in, Career Counseling Cell banah Gyandeep NGO nuai ah sepna hawlzing lai khangthak te registration bawl piak in, Free Medical Check-up bawl in a um hi. Chun, October 15 apat October 23, 2018 sung ah Churachandpur ah Army Recruitment Rally a umna ding tawh kisai ah Mobile Interactive Terminal for Rural Area (MITRA) nuai ah pawsal 141 leh numei 65 a kigawm ah khangthak 206-te a thiamnau tawh kituak in registration a bawl piak ui. Zialo a chun, Know Your Army stall, Local handicraft stall leh Live music band & cultural program a um hi.

"Meegamgi Numit" 23 May zawk ah um ding
Imphal, May 12 *(Nisin Thuhiltu)* : P Gojendro Singh, Under Secretary to Chief Minister, Manipur in thusua a bawlna a chun, "Go to Village/ Khungang Chatse" chiapi ding a hi tawh kitawn ah thasin leh "Chief Minister in a chiapi "Meegamgi Numit" chu 15th May 2018 (Tuesday) ah um ding himaleh 23 May 2018 (Wednesday) ah kichawn hi'n a taklang hi.

Awareness Seminar on Forest Rights in Hill Areas

Lamka, May 12 *(Nisin Thuhiltu)* : Joint Action Committee JAC against Kailam Wildlife Sanctuary saina’ tuni sunma dak 11:00 a pat in Simte Inn, Simveng ah Awareness Seminar on Forest Rights in Hill Areas of Manipur State kiti a nei ui. Awareness programme a chun, Kailam wildlife sanctuary in khua asuk khak khaw-hausa-te a pang ua, Elder T Kamzachin, Treasurer, JAC against Kailam Wildlife Sanctuary in hun matna amapui hi. Elder Khuallianmang, Chief of Phailianbung in pauchapna tawh Awareness hawnna a nei a, hun matsung in Thangkholal Thangsing, Chairman, JAC against Kailam wildlife Sanctuary in vaidawnna thu banah Awareness Seminar on Forest Rights in Hill Areas of Manipur State neina ziak gen in, Hauneilal, Secretary, JAC against Kailam Wildlife Sanctuary in Awareness ah Resource person te leh khaw-hausa te introduce bawlna a nei hi. Resource person in Dr. R Sanga, Social Activist, Thiankholian Guite, Chief of Songtal banah Adviser JAC against Kailam Wildlife Sanctuary in Forest and Future of Manipur Tribals te’n Chieftainship Institution in the Hill Areas of Outer Manipur ti thupi ah nei in ziltilna hun a mang ui.

Huntawp ah Thangkholal Thangsing, Chairman, JAC against Kailam Wildlife Sanctuary in awareness nei hun sung ah thupukna siam ah um te simdawna nei in, G Mangkhenpau, Vice Chairman, JAC Against Kailam Wildlife Sanctuary in kipakthu genna nei in, M Ginzalian, Chief of Aina in pauchapna tawh hun khakna a nei hi. Kailam Wildlife Sanctuary ahileh khua 103 sukha ding hi’n a kigen hi.

UNPFII ah pang te vaidawnna nei

Lamka, May 12 *(Nisin Thuhiltu)* : Kuki Women Organization for Human Right (KWOHR) mapuina ah tuni, May 12, 2018 sunma dak 11:00 in M. Songgel Community Hall ah United National Permanent Forum on Indigenous Issues (UNPFII) ah pang, Kuki Organization for Human Rights (KOHUR) Chairman, Dr. T. Lunkim leh Dr. Satkai Chongloi, Secretary, KUHOR vaidawnna a um hi. Zia hun a chun, UNPFII ah pang, Dr. Satkai Chongloi in Report piakna a nei a, Dr. T. Lunkim, Chairman, KOHUR, Thangkhosei Haokip, (KUMPI), Lunpi S. Gangte, President, KIM leh Daniel Gangte, President, KIC te a pat le thugenna um in, Lunsei Touthang, Executive Member, KOHUR in huntawp ah kipakthu genna nei in, Rev. Ngamboi Haokip in pauchapna tawh hunkhakna a bawl hi.

Dr. Satkai in Report a piakna a chun, United Nations chutkhawmna Kuki tawh kisai a kigenna leh bangtiang tungta a hi em ti genna a nei a, UNPFII ah Dr. Lunkim chu10 vei lam chiata, ama 2 vei a chiana hita a hidan gen in, United Nations ah Kuki tawh kisai chu UN Economic and Social Council in Kuki mite’ thi leh man, haksatna chuamchuam a tuak teu 4 vei genlangta a hidan a gen hi. United Nations Danpi ah genkhawm ding ah July 26, 2016 ni ah “Special Consultative Status” ah kawi a hi dungzui ah, UN in Special Consultative Status a piak, 2,829 lak ah Kuki le pangkha hi’n a gen hi.

Dr. Lunkim in United Naga Council thupiak dungzui ah NSCN-IM in Kuki te chung ah gal a bawl ziak ah June 23, 1993 ah Kuki Inpi phudaw ah um in a gen a, October 2, 1995 ah Kuki Movement for Human Rights kiti phudaw kit a hi nung ah UN in 1945 masang ah Nam, pu-pa gam nei ah liangvaitak a um te hawldawna a pat nung ah Kuki min ah kalsuanna kipan hi’n a gen hi. Kuki mite India, Bangladesh leh Burma/Myanmar gam pathum ah kithezak, a gam in Kukite buaina a gen piak theilo, United Nations in a gen piak ding ah “Special Consultative Status” kiti Kuki te piak ah um, zia dungzui a chu UNPFII ah Chief Secretary in hiatsakna a bawl dungzui ah KOHUR in April 25, 2017 ah Kukite buaina tawh kisai kizikna pek 500 chu UNPFII ah pelutta hi’n a gen hi. Zia ah vaidawnna hun chu KIM nuai ah um - KSO, KWU, KCA, KKL, TKSU lawiupa te’n le a uap ui.

Cage Fish Farming member te’n panlak dingdan genkhawm

Lamka, May 12 *(Nisin Thuhiltu)* : Churachandpur Cage Culture Fish Farming and Research Centre a member te’n tuni May 12, 2018 zingkal dak 7:00 in New Lamka Hebron Veng ah meeting a nei ui. Zia hun a chun, Mung Naulak in Meeting neina ziak leh Agenda chuamchuam um te genlatna a nei a, member chiakhaw te tawh agenda chuamchuam te genkhawm in, member chiakhawm te’n North Eastern Regional Institute of Water and Land Management (NERIWALM) in May 25, 2018 ah Workshop a bawlna ding tawh kisai ah kisaklawkna pattak ding in lemsakna a nei ui. Khuga Dam tui chu a phachuam theipen ah mat guat ding leh a thupi theipen ah Workshop ah panlak ding, fish caging tawh kisai ah le training bawl ding a hina chung ua member dang a ut a um leh laklutbe thei zing ding, Store Room siam ding, zia Room a chu Fish feed leh Chart kawi ah, cages ti details taak zing ding, zia planning siam ding a chun Vungzamuan a guat ui.

Zan kal ah Kochuam Office ah gucha pawl khat lut
Lamka, May 12 *(Nisin Thuhiltu)* : Evangelical Baptist Convention Church (EBCC), Zion Kochuam Office chu gucha pawl khat in Tala khensia, a sung ah lut maleu bangma gukdaw neilo uh hi’n a kigen hi. Kochuam office sung a chu Computer Set 2, Inverter leh Battery banah Almirah sung ah thil pawimaw chuamchuam leh Laptop le kikawi hi’n a kigen hi. Office sung ah lut te chun, Almirah kawt zosia, Table tawh kithua drawer um te le hawngdawk vek maleu bangma lakdaw neilo uh ti a hi. Tulai in Churachandpur khawpi sung ah gucha laang thak mama in a kilang a, guchate gamtatna hiat leh mu ding um zing a hitawh kitawn ah pilvan chiat pawimaw in a kilang hi.

State Level Tribal Cultural Festival khak hita

Imphal, May 12 *(Nisin Thuhiltu)* : “Tribal Culture for Peace and Unity” ti thupi nei ah Ministry of Tribal Affairs, Government of India sponsored bawlna nuai ah Tribal Research Institute (TRI) saina’ TRI, Auditorium, Imphal ah Annual State Level Tribal Cultural Festival ni 2 sung kimang chu tuni’n khak in a um hi. Closing ceremony chu Manipur Deputy Chief Minister Yumnam Joykumar in khuallian hina tawh a uap a, ama’n a thugenna a chun, state sung ah community chuamchuam te cultures ah kipumkhat ding a hidan gen in, khat leh khat culture kiza piaktua ding, culture mitamtak kankhawm thei hi’n a gen hi. State sung ah culture chuamchuam um maleh a kibatna um dualdual in le Deputy Chief Minister in a gen a, state sung khantona ding leh masawnna ding ah kipumkhatna pawimaw in a gen hi. Zia hun matna chu K. Leishiyo, MLA in le a uap a, tribal community chuamchuam te a pat Cultural troupes te’n nam lam suklatna leh chawndan tawh chuamchuam suklatna a nei ui.