Nisin Thuhiltu – 27 February 2018

User Rating: 0 / 5

Star InactiveStar InactiveStar InactiveStar InactiveStar Inactive
 

MP Thangso Baite in Model Village ding ah Serou Village hawng

Lamka, Feb. 26 *(Nisin Thuhiltu)* : Under Sansad Adarsh Gram Yojna (SAGY) nuai ah Serou Village chu MP ( Member of Parliament) Thangso Baite in Model Village khat hiding ina puang a, zia chu tawh kitawn in tuni’n District Administration Kakching saina’ Serou Mayai Leikai Community Hall ah foundation suangphu hawnna a um hi. Chief Guest hina tawh Thangso Baite in zia hun chu uap in foundation suangphu a hawng hi.
MP (Member of Parliament) Thangso Baite in a thugenna a chun, Model Village concept chu Model Village ti ziak ah Project leh Schemes ah thil zosia bawl ziang ding hizawlo ah thianthona leh sanitation kituptak a um theina ding ah a khua ah um ten panlakna a nei uh pawimaw a hidan gen in, model village chu khaw sung ah um zosia te Aadhaar enrolment bawl a hi vek ding, naupang zosia immunization bawl ding, birth leh death record kituptak a um ding a hidan a gen hi. Chun, ecological system balance theina ding ah thingno tamsem phu ding pawimaw in a gen hi.

BDO Langmeidong Anjali Chongtham in a genna a chun, Sansad Adarsh Gram Yojna/ MP Model Village Scheme chu Father of the Nation, Mahatama Gandhi ideology tawh kituak ah chiapi ah um a hidan gen in, Scheme chu 15th August, 2014 ah Prime Minister of India, Narendra Modi in Independence Day speech ah a puan, Scheme Guidelines 2016 ah kisiam dawk, MP khat in ama constituency sung ah Model Village khat a siamdaw ding, kum 2019 ah model villages 2 a siamdaw ding ti a hidan taklang in, Manipur ah MP ten Model Villages ding ah Ngairangbam Village (MP Inner Parliamentary Constituency), Kangvai Village (MP outer Parliamentary Constituency) Hayen Hangoon Village (Rajya Sabha MP) leh Serou Village (MP outer Parliamentary Constituency) hinalai in a gen hi.
MLA Sugnu A/C K. Ranjit Singh; Adhyaksha, Kakching Zilla Parishad Phuritsabam Jiten Singh; Zilla Parishad Member Melody Leima; Pradhan Serou GP Salam Naobicha Singh leh Deputy Commissioner Kakching Neilenthang Telien ten le zia hun matna chu a uap ui.

District police leh Diesel Auto Assn. panlak dingdan genkhawm

Lamka, Feb. 26 *(Nisin Thuhiltu)* : District a ding ah Meeyamgi Numit (People’s Day) tuni, February 26, 2018 in Traffic Control Police (TCP) Office, Police Station ah mat in a um hi. Zia hun achun, Ginmuan Ngaihte, MCS, AC to DC; Glory Kim Singsit, Junior MCS, SDC; Binod Ranjan Singh, MPS, Additional SP (Operation), Churachandpur; Lunkhomang Khongsai, MPS, Additional SP (Law & Order), Churachandpur; Augustine Khongsai, MPS, SDPO Thanlon leh Lianthansang, SI, OC Traffic ban ah District sung ah Diesel Auto line 21 apat palaite le pang in, District sung ah transport tawh kisai ah mawpuakna liantak nei, Diesel Auto-te kithunun leh kituak tak ah um dingdan leh, mipite a ding ah mat phatchuam zawk thei dingdan genkhawmna a nei ui. Zia dungzui chun, Diesel Auto Association chuamchuam 21 sung ah Association khat ah line chuamchuam-te, Association Number umsa ban ah Line tawh kituak ah Alphabet belap ding in lem a sau a, kâl ni sung ah sufel ding ua hiatsak ahiu. Zia chu Line No. 1, Bungmual-Tuibong Diesel Auto Service Association (BUTDASA) nuai ah Line 6 a um a, Line No. 1A, 1B, 1C ti ah chiato ding ahi. Thupukna tawh kisai Auto Owners’ Association inle lemsakpi in, ni 2 ni 3 sung ah saifel ding ah a kinep thu uh a gen ui.

ICI in 34th General Conference mang
Lamka, Feb. 26 *(Nisin Thuhiltu)* : Independent Church of India(ICI) ah Kristien Thalai pawl(KTP) in “Ralkhing Tieng Sawn Kai Ei Tiu” ti thupi mang in, February 23 apat ICI Rengkai Biak-In ah a 34-veina General Conference a mat uh zani, February 25 in lawting tak in a mangzo ui. Zia hun chu, February 23 nitak dak 5:30 in Rev Neichawngthang, Local Pastor, Rengkai in khawmpi hawnna leh Conference Hall latna a nei a, Rev L Joshua, Finance Secretary, Central KTP in vaidawnna thu gen in, Rev Thangngur Music Award competition first round a nei ui. Khawmpi sung in Evan Chawngtuolur in “Should I Not Be Concerned” ti thupi mang in sharing a nei a, Miss Esther laltankim in, “I can do all things through jesus Christ” ti thupi mang in thu a gen hi. Swatch Bharat Abiyan- Clean India Movement tawh kisai in seminar a um a, zia hun achun, Upa Dr Dawlthanglien in “Clean India Movement- A Responsibility Of Christian Youth” ti thupi mang in ziltîlna a nei hi. Chun, Choir leh Solo for Mission Fields te’n Buonglienkung Misic Award kidemna a nei ua, youth challenge and presentation a um ban ah, youth challenge on various career, special focus on modern technology tihaw in kiziltîlna a nei ui. Khawmpi tawpni February 25 nitak in kidemna chuamchuam ah kipakman hawmdawna a nei ua, Rev HP Runremthang in Pathian thu genna nei in, nitak dak 8 ah kipat singing festival cum variety show a um a, Guwahati City Church KTP in Christian Home tawh kisai drama a bawl ban un, New Delhi KTP in “The Lost Son” ti thupi mang in skit a thaw ui. Zia khawmpi uap ding hin ICI nuai ah Presbytery chuamchuam; Tuithaphai Presbytery, Cachar Presbytery, Manipur Tampak Presbytery, Hmarbiel North Presbytery, Hmarphei Presbytery, Aizawl Presbytery, Sadar Presbytery, Hmarbiel south Presbytery, Vangai Presbytery, Jiribam Presbytery, Tuivai Presbytery, Guwahati Presbytery, New delhi Presbytery, Meghalaya E Presbytery, Meghalaya CW Presbytery ban ah Assam Mission Field, Tripura mission field, NTK Mission Field, Arunachal Pradesh Mission Field leh Manipur Mission Field apat palai 350 a chiakhawm ui.

Skill Development Training khakna nei

Lamka, Feb. 26 *(Nisin Thuhiltu)* : Krishi Vigyan Kendra(KVK), Churachandpur Training Hall, Pearsonmun ah tuni zinglam dak 11 in ni 15 sung Skill Development Training Program on Bamboo and Cane Craft for Rural Youths kiti hun khakna a mang ui. Zia hun achun, Ajay Arora, AC To DC CCpur in Chief Guest hina tawh uap in, Thangchinkhup Guite, AGM-DD, NABARD CCpur in Guest of Honour ban ah Dr Niranjan Lal, Senior and Head, KVK CCpur in Functional President hina tawh a uap ui. Hun matzaw in guest te’n training ah pangte khutsuak thil chichuamchuam etna a nei ui. Training program ahileh NABARD sponsor-na nuai ah hi’n a kigen hi.

CCpur District Nurses Associaition in election nei
Lamka, Feb. 26 *(Nisin Thuhiltu)* : CCpur District Nurses Associaition (CDNA) in tuni’n IB Road, Synod Hall ah General Assembly & Election leh Pension-te thakna a nei hi. Hekim Guite, Treasurer in zia hun matna chu a mapui a, programme hun sung in Association ah member T. Chinzaniang, Nsg, Suptt; Phallam, SN, VL Biakin, SN; Niangtinhoi, SN; Mankhanching, SN; Niangneihoi, SN leh Saikhomawi, FHW te pension ta ding a hina chung ua Bel khat chiat piakna nei in pakkhi awsakna a nei ui. Election hun ah Presiding Officer in Upa T. Tunkhosong, Vice President, CDNA a pang a, Polling Officer in P. J. Pary, L. T. Siami, Beulahlane leh Nengzalian te pang in kum 2018-20 sung ahCDNA committee member ding telna a nei ui. Candidate 41 um te chu mi 64 te’n vote khia’n lawiupa thek ding telna a nei ua, zia hun a chun mi 15- Zoukhum, Sangthuam, Hekim Guite, Lydia Niangpi, Beulalane, Chingkhovung, Tunkhansong, Chalsiam, Chinzaniang, Niangtinhoih, VL Biaki, PJ Pari, L Nenem, Chingngaihmang leh Nengvung te teldawk in Upa T. Tunkhansong in result puandawna a nei hi. CDNA ahileh 1989 kum ah kiphutdawk, tu leh tu member 180 nei a hia, tukum ah member a la famta Aikhovung SN, w/o (late) Hilkham leh Rebecca Hmar, w/o (late) Jeff Biekthang te tuni hun ah galna nei in a insung mite Rs. 25000 gel piakna le a nei ui.

BSNL Broadband mattheilo ah um zing
Lamka, Feb. 26 *(Nisin Thuhiltu)* : National Highway Infrastructure Development Corporation Limited te’n Imphal leh Lamka kikal Lampi kekletna nasep a chiapi zing uh tawh kitawn ah nasem ten BSNL line a suktan ziak un January 2018 a pat CCpur District ah BSNL Subscriber te kituptak ah Broadband mang theilo in a um ua, zia chu tawh kitawn in BSNL Subscribers, CCpur in BSNL Telephone Exchange ah Jan & Feb sung ah Broadband a siat tawh kitawn ah a fee rebate ding in petition submit a bawl ui. A langkhatlam ah BSNL Telephone Exchange Office ah official ten BSNL line hawilona chung ah panla’n a siamphatna ding in panlakna anei zing ua, HQ Veng ah BSNL tower a kipat Microwave System mat theina ding ah Feb. 25, 2018 ah machine fitting zo maleu tuni tiang ah Landline leh Mobile network bep pedawk thei, Broadband a hawina ding ah Feb. 27, 2018 ah Imphal a kipat department official ten checking bawl ding uh hi’n a kigen hi.

Evangelistic Week 2018 mang

Lamka, Feb. 26 *(Nisin Thuhiltu)* : Rostad Memorial High School, Compound Veng, D. Phailian in ni 4 sung dai ding Evangelistic Week chu tuni hawnna a nei ui. Zia Evangelistic Week chu Rev. K. Neihsial, Co-ordinator, Manipur Area in hawndawna a nei a, Dr. Soilalsiam, Principal, RMHS inle thugenna a nei hi. Chun, zia Evangelistic Week hun sung ah Rev. Malakia Lalnunfela, i/c Mata Pastor Bial, Pro. Pastor S. Thangthianlal, Mata Pastor Bial leh Pro. Pastor Siamlalron Neihsial, Lamka Pastor Bial te chu Speaker ah pang in student te kiang ah Pathian thugenna hun mang ding a hiu. Chuleh, zia Evangelistic Week khakna chu March 1, 2018 leh nei ding a hiu.

Handloom MELA-Exhibition khak hita
Lamka, Feb. 26 *(Nisin Thuhiltu)* : Autonomous District Council (ADC) Churachandpur saina nuai ah YPA GHQ Hall, Hiangtam Lamka ah ni 5 sung Handloom MELA-Exhibition um chu February 24, 2018 in a zo thiang ui. Handloom Mela ahileh P Kamkholal, Executive Member, ADC Churachandpur in a hawndaw a hia, Mela-cum-Exhibition hunsung in Stall 25 kihawng in, puan ah kisiam van chi chuamchuam zawk a hi. Handloom MELA-Exhibition ahileh Rothienghlim, EO Town, ADC Churachandpur in a khakna a nei hi. Mela-cum-Exhibition ah stall bawlte ahiuleh; Window Welfare Association Asia, Cherry Traditional Store, Sahei Self Help Group, Somen, Salem Handloom, Momoi Hiangtam Lamka, Hepi Dawr, Nunnom Self Help Ground, Thangneihching, Ahsi Jolneng, Abigail, Immanuel, Nenem, Jamhoih, Khum-i, Ngakmoi, Vunghoih, CBWS, Mami’s Collection leh Goulal ti te a hiu.

New Lamka Legal Aid Clinic hawng

Lamka, Feb. 26 *(Nisin Thuhiltu)* : Manipur State Legal Services Authority nuai aom, District Legal Services Authority (DLSA) leh Community Development Society (CDS) in tuni, February 26, 2018 sunnung dak 2:00 in CDS Office, Dorcas Veng ah New Lamka Legal Aid Clinic a hawng dawk ui. Letkho Kipgen, Chief Judicial Magistrate-cum-Secretary, DLSA in New Lamka Legal Aid Clinic a hawng a, K. Thangliansang, Program Manager, CDS in hun matna amapui hi. Rev. V. Nenglian, Divisional Superintendent, EBC Lamka South Division in PLV-te leh New Lamka Legal Aid Clinic a ding in pauchapna a nei a, D. Khuala Vaiphei, Project Director, NERCORMP, Churachandpur apat thugenna um in, Grace Chiinhoihniang, LAC Judicial Magistrate First Class in Para Legal Volunteer-te mawpuakna tawh kisai genlang in hun a mang zo ui.

13 Days Skill Development Training khakna nei

Lamka, Feb. 26 *(Nisin Thuhiltu)* : Centre for Community Initiative (CCI) in NABARD kithuapina tawh 13 Days Skill Development Training for Persons with Disabilities a bawl chu tuni sunma dak 11 ah Malsawm Ability Resource Centre (MARC) Pearsonmun ah khak in a um hi.Zia hun chu TMI a kai student leh staff te banah Shyam Lal Poonia, IAS DC CCpur, Umarani Devi, District Social Welfare Officer, DSWO, CCpur ten hun matna uap in, Jacintha Lazarus, IAS, Director, Department of Social Welfare, Government of Manipur, Niangkhanvung, DGM NABARD, Manipur Regional Office, Imphal ten khuallian hina tawh hun matna a uap ui. Ni 13 sung Training on Skill Development for Persons with Disabilities hun sung in CT Lian Guite in Entrepreneurship & Book Keeping tawh kisai in ziltilna a nei a, Pauzagin Tonsing in Rights & Entitlement, Niangngaihmang in Personality Development, Language & Communication Skill banah CCI-TMI ah Special Educator te’n ziltilna nei in, Artificial Flower Making tawh kisai in Manngaihkim, Pickle Making tawh kisai ah Joy Singson in ziltilna a nei hi.

Nemcha Kipgen inspiritual leader Ravi Shankar kimupi

Bengaluru, Feb. 26 *(Nisin Thuhiltu)* : Social Welfare & Cooperation Minister Nemcha Kipgen in Art of Living International Center, IT city, Bangaluru ah spiritual leader Ravi Shankar kimupi in Manipur ah BJP-led Government in Chief Minister N. Biren Singh mapuina nuai ah state sung ah khantona ding ah ppanlakna chuamchuam a neite taklangkawm in Ravi Shankar chu Manipur ah community chuamchuam te kal ah chamna leh muanna kituptak a um theina ding ah ngaidan, dawidan tawh kisai suggestion bawl ding in chialna a bawl hi.

Lampi quality neitak siamdawna ding ah engineer, contractor leh labourer te’n mawpuakna liantak nei: Work Minister

Imphal, Feb. 26 *(Nisin Thuhiltu)* : Hotel Classic, Imphal ah tuni’n “2-day Workshop on Quality Control in Road Construction and Preparation of DPR for Roads and Bridges” a kipan a, zia hun chu Works Minister Thongam Biswajit Singh in khuallian hina tawh a uap hi. Works Minister in a thugenna a chun, State Public Works Department in media coordinator ah officials khenkhat guat ding leh department leh general public kal ah technical clarifications kituptak a um zing theina ding ah panla ding a hidan gen in, department leh general public kal ah communication a hawilo ziak ah a phalo lam ngawn ah ngaitua um in a gen hi. Lamlian siamna tawh kisai ah engineers, contractors leh labourers ten quality construction a um theina ding ah mawpuakna liantak nei a hidan uh gen in, construction material leh DPR kituptak siamna a pat nasepna gasua hawitak um thei ding hin a gen hi. Social media leh local media khenkhat ah lampi siamna hawilo suklat ah um sek te chu media person ten a bawl ding him uh, a mawpuaknau a hidan gen in, public haksatna chung ah media te panlakna government in hiatthiampi hin a gen hi. Zia hun matna chu Chief Engineer Building Ch.Noren, Project Director, EAP, PWD, Manipur Y.Joykumar Singh, department officials leh staff tamtak ten le a uap ui.

MGSF in indefinite cease work strike pan ding
Imphal, Feb. 26 *(Nisin Thuhiltu)* : Manipur Government Services’ Federation (MGSF) in 27th February 2018 a pat 7th Pay Commission recommendation chiapi ding phutna indefinite cease work strike pan ding a hi. Demand sukpitin masang sia kiphinna chiapi ding uh hin general secretary, MGSF Purujit Lairikyengbam in a gen a, cease work strike chun a chiatha zing class X leh XII te board exam ziak ah education department huamkhalo ding hin a taklang hi. A langkhatlam ah 11th Manipur Legislative Assembly, 4th session ah February 6, 2018 a khan Finance Minister Leh Deputy Chief Minister Y. Joykumar in 7th Pay Commission recommendation chiapi theina ding lampi government ngaitua zing himaleh bangtik hun ah chiapi pat thei a hidan ti gen lawk thei hinailo in a la gen a, cease work strike in banggual gasua a nei diam ti chu ngaitua khamtak ting in a kilang hi.

Meghalaya leh Nagaland Assembly election ah vote khiak hiding

Shillong/Kohima, Feb. 26 *(Nisin Thuhiltu)* : North-eastern states pani - Meghalaya leh Nagaland Assembly election ah tuni 27th Feb. 2018 ah vote khiak hiding a hi. Zingkal dak 7:00 a pat nitak lam dak 4:00 sung ah vote khiak hiding a hi. Meghalaya leh Nagaland state chu Assembly seat/ constituency 60 umna himaleh seat 59 gel ah vote khiak hiding a hi. Meghalaya ah East Garo Hills district huapsung ah um Williamnagar Assembly seat/ constituency ah NCP candidate Jonathone N Sangma in February 18, 2018 ah IED bomb attack ziak ah thina a tuakna chung ah Williamnagar Assembly seat/ constituency ah election cancel ah um a hia, Nagaland, Northern Angami-II constituency ah chuutu umlo ah NDPP chief Neiphiu Rio teltin ah puan a hi tawh kitawn ah zia seat a chu vote khiak hilo ding a hi. State 2 Assembly election ding tawh kisai ah polls campaign ahileh 25th Feb. 2018 nitak ah khak a hi.

Meghalaya ah Congress in seat 59 in candidate a kawi a, BJP in seat 47 in candidate a kawi hi. Lok Sabha speaker lui famta P A Sangma chapa Conrad Sangma mapui National People's Party (NPP) chu North East Democratic Alliance (NEDA) nuai ah BJP' partner in a pang hi.

Meghalaya's Chief Electoral Officer (CEO) F R Kharkongor in Meghalaya ah total candidate 370 um a hidan taklang in, total voters 18.4 lakhs ten polling stations 3,083 ah vote khia ding uh hin a gen hi. Meghalaya Assembly election khangthu amasapen ding ah women polling stations 67 leh model polling stations 61 siamdaw ah um in a gen hi. Chun, total candidate 370 um lak ah numei candidate 32 um in a gen a, zia chu Meghalaya Assembly election ah numei candidate tamna pen a hi. Meghalaya CEO insecurity dinmun tawh kisai a genna a chun, Central Armed Police Forces (CAPF), 10 additional company te lak ah company 6 te buaina mun ah kihia East leh South Garo Hills district ah kikawibe hin a gen hi.

Nagaland ah Neiphiu Rio mapui NDPP (Nationalist Democratic Progressive Party) in seat 40 in candidate a kawi a, a partner BJP in seat 20 in candidate a kawi hi.
Chief Minister pathum a la neita Congress in ahileh, seat 18 bep in candidate a kawi a, BJP sang ah seat 2 ah candidate kawi tawmzaw a suak hi.

Nagaland's CEO Abhijit Sinha in a genna a chun, service voters 5,925 te panna Nagaland ah total voters 11,91,513 ten polling stations 2,156 ah vote khiakna nei ding un a gen a, polling stations 40 ahileh Northern Angami-II constituency ah chuutu umlo ah NDPP chief Neiphiu Rio teltin ah a umna’n a huap hin a gen hi.

Election duty ah government employees 15,000 te kimang ding, constituency 25 huapsung ah all-women polling stations 177 um in a gen hi. Core Committee, Nagaland Tribal Hohos leh Civil Organisations (CCNTHCO) in Naga political issue sukven ding phutna nei ah election boycott ding ah a puan bak ua kiphinna a nei ziak ua Nagaland Assembly election ding ah kisaklawkna haksa mama ah gen in a um hi.

Nagaland's CEO Abhijit Sinha in a genzawm zelna a chun, Nagaland Assembly election a ding ah total candidate 227 um a hidan taklang in, Central Armed Police Forces (CAPF) company 281 ten vote khiakna mun te venbitna peding uh hin a gen a, polling stations 2,156 lak ah polling stations 1,100 chu critical, vulnerable 530 leh normal 526 ah kipuang in a gen hi.

Meghalaya leh Nagaland Assembly election results ahileh Tripura Assembly election results tawh March 3, 2018 ah puankhawm hiding a hi.

Thupi tak ah GNLA chief Sohan D. Shira luang vuiliam ah um

Williamnagar, Feb. 26 *(Nisin Thuhiltu)* : A chiata 25th Feb. 2018 (Kiginni) ah Meghalaya Police nuai ah Special Force - 10 commandos ten Bawangre village, Dobu, East Garo Hills ah a kaplup uh, “Meghalaya’s most wanted militant” ah kipuang Garo National Liberation Army (GNLA), chief Sohan D. Shira (41) luang chu East Garo Hills ah Williamnagar town, Simsang river gal lam ah um Chasatgre village ah Pathiani a khan thupi tak ah vuiliam in a um hi.

GNLA chief Sohan D. Shira (41) luang ahileh Williamnagar hospital ah post-mortem bawl in a um a, zia nung a chu a innsung mite kiang ah piakdaw a hi.

GNLA chief Sohan D. Shira (41) chu a zi chenna inn tut ah a um nung in a nu lemsakna tawh a chenna inn kiang ua, a pa Golendro T. Sangma than kiang ah vuiliam a hi. GNLA chief Sohan D. Shira (41) suapinu (elder sister) Aruna D. Shira in tunaicha a khah central government official 2 ten Sohan D. Shira chu mainstream a chiapi theina ding ah zawl ding ah chialna a bawl dungzui ua, theitawp sua Sohan D. Shira chu mainstream zui ding ah zawl maleh goverment in masang ah a thugen uh a sukpitin seklona chung ah government taksanglo ah mainstream zui nuamlo ah um hin a gen hi. GNLA chief Sohan D. Shira (41) ahileh A’chik National Volunteer’s Council (ANVC) ah a la pang, kum 2014 ah a la chawlsan himaleh security personnel ten a sukbuai zing ziak ua GNLA ah lut kit hin a kigen hi.

OLA in Mizoram ah service pan ding ah puang

Aizawl, Feb. 26 *(Nisin Thuhiltu)* : Cab-hailing company OLA in North East state Assam ah service a pat nung in Mizoram ah service pan ding a hidan a puang hi. Mizoram capital ‘Aizawl’ ah service pan ding a hidan taklang in, state government tawh kihona dungzui ah company’n service pat ding ah lemsakna a nei tawh kitawn ah Mizoram’s capital ah drivers 200 tuam tawh suai kaita a hidan uh le a taklang hi. OLA in ningkum a khan transportation department of Assam tawh pilot river taxi service a ding in MoU suai a la kai a, Mizoram transportation department tawh MoU suai a kai kit tawh kitawn ah OLA ding ah Mizoram chu second partner hiding a hi.
Hiatthei khat chu, Mizoram ah local taxi ah ah kimang a tamzaw Maruti 800 / Zen, a hia, ziana chung a chu Ola’s services um ding a um hi.

Meghalaya ah BJP’n gual a zaw leh inn sung ki check ding: Ghulam Nabi

Shillong, Feb. 26 *(Nisin Thuhiltu)* : Meghalaya ah ruling Congress party assembly election ah gualzaw kit tei ding ah panlakna nei in, Prime Minister Narendra Modi chu direct tak in demna a bawl zing a, agenda ah “Hindutva” nei in ngawna a siam hi. Rajya Sabha ah opposition leader leh senior Congress leader Ghulam Nabi Azad in Rilbong, South Shillong constituency ah public rally ah a thugenna a chun, North Eastern Region ah Rashtriya Swayamseak Sangh (RSS) sukhat ding nawp ziak ah Prime Minister Narendra Modi in North Eastern Region ngaikhawk thak mama ah ngawna siam in, Christian dominated area ah Rashtriya Swayamseak Sangh (RSS) munpi siamguan le ngawna a siam hi.
BJP in Kashmir leh Northeastern state te ah strategy kibang chiapi kawm ah Meghalaya ah Hindutva sukhat gua a hidan gen in, BJP chu anti-Christian, mentor RSS in Christian states te thuzaw theina ding ah panla zing hin a gen hi.
Chun, NDA government in Uttar Pradesh ah Muslim te chenna inn sa (meat) a um em ti ah check a bawl zing gual ah BJP in Meghalaya ah thuneina a chan ngei ngei leh Meghalaya ah le banggual sa (meat) a um em ti ah check kibawl ding hin a gen hi.

Veteran footballer Bhaichung Bhutia in Trinamool Congress member hina a pat haina siam in, TMC ah official leh political post bangma neitalo, political party dang tawh le kizawp matna neilo in a taklang hi. *(Nisin Thuhiltu)*

Women's Tennis Association, world ranking thak ah Romanian professional tennis player Simona Halep in No 1 hina a lua a, Caroline Wozniacki (DEN), Garbiñe Muguruza (ESP), Elina Svitolina (UKR) te chu 2nd, 3rd leh 4th in a pang ui. *(Nisin Thuhiltu)*

Khantona ding ah state govt. panlakna lungtun um: Chief Minister
_Joint Hill Leaders’ Day leh Meeyamgi Numit ah complaints 380 ngaithakna nei_

Imphal, Feb. 26 *(Nisin Thuhiltu)* : Manipur Chief Minister N. Biren Singh in tuni’n zingkal lam dak 9:00 a pat nitaklam dak 1:00 sung in joint Hill Leaders’ Day leh Meeyamgi Numit ah mi 800 tuam te kimupi in ama mimal tak in complaints 380 val ngaithakna a nei hi. Joint Hill Leaders’ Day leh Meeyamgi Numit ah ama kimupi nuam te a kimupi zaw nung ah thuthak lakhawm mite kiang ah Chief Minister in a genna a chun, state government in khantona ding ah panlakna a neidan chu lungtun um a hidan gen in, government in panpi ngai leh disabled persons te ding ah welfare leh health schemes chiapi a hidan a gen hi. Meeyamgi Numit leh Hill leaders’ a pat haksatna tamtak ngaithak thei ah um leh mitamtak te loan leh thil chuamchuam ah panpina piak ah umta hin a gen hi. State sung ah haksatna tuak te haksatna hiatpi leh sukven theina ding ah Meeyamgi Numit leh Hill Leaders’ Day umsak zing hiding a hidan gen in, mi tamtak te’n self employment a ding ah financial assistance dawn a hidan uh gen in, SBI leh Manipur Rural Bank te panna bank chuamchuam ah official te chu financial lam thil ah haksatna tuak te loan leh lam chuamchuam ah panpina ngaitua piak ding ah Hill Leaders’ Day leh Meeyamgi Numit duty bawlsak ah um in a gen hi. Chief Minister in SBI official te chu migenthei leh panpi ngai te chu loan peding leh loan processing time suchawm ding in hiatsakna a bawl a, Health department official te le CM-gi Hakshelgi Tengbang scheme nuai ah health card tawh kisai ah buaina neite buaina sukven piak ding in thupiak a bawl hi. Chief Minister in tunaicha MPSC nuai ah Medical Officer ding ah recruit thak ah um doctor ten ama kimupi ah government in recruitment bawlna transparency a chiapi kipakpi mama a hidan uh tutna nei un a gen a, Medical Officer laklut thak ah um te’n remote leh hill areas ah kituptak ah nasem ding ua thutiam bawl un a gen hi. N. Biren Singh in media te kiang ah a genna a chun March 1 to 15 sung ah Manipur ah BJP-led State Government first anniversary lawpna kawm ah projects 80-100 hawn ah um ding, Union Home Minister Rajnath Singh in March 14 leh anniversary lawpna uap ding, Prime Minister Narendra Modi’s in Manipur a phak hun ding ahileh confirm hinailo ah gen in, confirm pai hita ding in a gen hi. Prime Minister Narendra Modi in Manipur a phak hun ah Sports University leh Regional Football Academy foundation suangphu hawnna nei ding, Ministerial Block of Civil Secretariat, Dolaithabi leh Thoubal Project etc hawng ding, Khuman Lampak Main Statdium chu avaima theipen ah upgrade bawl hiding in a gen hi. Hiatthei khat chu thasin date 10 leh 15 ah “Hill Leader’s Day” leh “Meeyamgi Numit” mat hisek maleh tut ha February 2018 ah 11th Manipur Legislative Assembly, 4th session ziak ah tuni, 26th February ah Hill Leader’s Day” leh “Meeyamgi Numit” matkawp ah um a hi.