Nisin Thuhiltu – 24 February 2018

User Rating: 4 / 5

Star ActiveStar ActiveStar ActiveStar ActiveStar Inactive
 

State Assembly, 4th Session khak hita; District khenchuam umlo: Chief Minister

Imphal, Feb. 23 *(Nisin Thuhiltu)* : A chiatha zing 11th Manipur Legislative Assembly, 4th Session ah tuni’n Bills palai (4) viz. the Manipur Parliamentary Secretary (Appointment, Salary and Allowances and Miscellaneous Provisions) Repealing Bill, 2018, the Manipur Public Service Commission (Additional Functions) Second Amendment Bill, 2018, the Manipur (Hill Areas) district Councils (Fifth Amendment) Bill, 2018 leh Manipur Agriculture Produce and Livestock Marketing (Promotion and Facilitation) Bill, 2018 te passed in a um hi. Manipur Appropriation (No.2) Bill, 2018 chungchang genkhawm hun ah Chief Minister N. Biren Sigh in Opposition MLA te nialkalna a hilchianna a chun, tu ah state government in district zosia kawidan kibangtak ah kawi leh khenchuam neilo a hidan taklang kawm in education system leh educational institution siamdawna ding ah district zosia government in ngaikhawkdan kibang ah kawi in a gen hi. Hill areas ah tui thiang dawn ding a taksap sekna chung ah government in hill district te ah rain water harvesting projects chiapi ding leh haksatna um te sukvenna ding ah guanggalna nei a hidan taklang kawm in, kikawmtuana lampi hawilo chu buaina dang khat a hidan gen in, a vaima theipen ah district zosia lampi siamhawi hiding in a gen hi.ADC nuai ah teacher ten tha 3-4 sung thalaw a mulona ziak uh chu hun chiasa official records kituplo ziak a hidan gen in, a kisaipi thuneitu ten sukvenna ding ah panlakna nei zing uh hin a gen a, a vaima theipen ah thalaw sanctioned hiding in a gen hi.

DRDA Chandel kituplona tawh kisai Chief Minister in a genna a chun, diklo tak ah Rs. 7 crore ki suthelthang a hidan mudaw ah a um in a gen a, khualzuina nei ah a um tawh kitawn ah diklo tak ah nasem mi 2 hiatdaw ah umta hin a gen hi. MGNREGS leh ADC fund pending ah um te a vaima theipen ah
Chief Minister release hiding ah gen in, thil chiadan sukfel pawimaw um in a gen hi.

Sports tawh kisai Chief Minister in a genna a chun, Central sponsored Khelo India programme nuai ah Sub-Divisional levels tiang ah Sports masawn theina ding ah panlakna umzing ah gen in, hill district chuamchuam ah mini-sports complexes kisa hin a gen hi.

VIP te security personnel piak ah a umna tawh kisai a genna a chun, Home Department ah a kisaipi thuneitu te lemsak dan zil ah security personnel piak ah um, Opposition leh Ruling party te kal ah security escorts kikhiatna umchuamlo in a gen hi. April 1, 2018 a pat Manipur police a ding ah transfer policy kisiam zuipat ah umta ding, Centre in tunaicha a khah state sung ah IRB Battalions 2 simdawbe ding ah lemsakna nei, Union Home Minister Rajnath Singh in March tha ah Manipur a phak hun tak leh a puandawna nei ding hin a gen hi.

A langkhatlam ah 11th Manipur Legislative Assembly, 4th Session (budget session) chu nitaklam in Speaker Y. Khemchand in a khakna a nei hi. 4th Session (budget session) ahileh February 2, 2018 ah kipan a hia, session hun sung in sitting 15 vei a um a, Obituary Reference khat, Starred Questions 125, Unstarred Questions 22, Committee Reports pathum leh Calling Attention Motions 6 a um hi.

NFSA anchang hawmdawk

Lamka, Feb. 23 *(Nisin Thuhiltu)* : Headquarter veng ah um FCS Godown ah CCpur District leh Pherzawl District a ding National Food Security Act NFSA Anachangg December 2017 quota ding hawp in a um hi. NFSA anchang December 2017 quota ding ahileh February 21 a pat hawpdaw ah um a hia, zani masa leh zani a khan CCpur Assembly sung ah Rationing Agent ten amau chan ding kilak in, tuni February 23 a pat February 26 sung ah Saikot Assembly constituency ah rationing agent ten amau a ding chiat la ding, February 27 ah Thanlon Assembly, February 28 ah Tipaimukh Assembly Constituency leh Sangaikot Block ten la ding, March 1 ah Singngat Assembly constituency, March 2 ah Henglep Assembly Constituency sung a rationing agent ten la ding a hiu. December 2017 quota dungzui ah Churachandpur AC a ding Quintal 2536.50 a hia, zia lak a chu Saikot AC quota a ding Quintal 3746; Thanlon leh Mualnuam kigawm quintal 911; Tipaimukh ah vangai bial panglo ah quintal 611; Singngat AC ah quintal 2290.40 leh Henglep AC a ding Quintal 1914.50 a hi. December quota hawpdaw ding National Food Security Act (NFSA) Anchang chu tuni’n le FCS Godown, Imphal a pat truck 8 a tun be kit hi.

Sapam Thoibi Devi thu kiholem

Lamka, Feb. 23 *(Nisin Thuhiltu)* : Churachandpur Districtr Hospital ah February 21, 2018 zan dak 10:30 vel ah nau nei ding ah operation kibawl, thina tuak Sapam Thoibi Devi (24) w/o Sapam Somarjit Singh of Torbung Bangla chungthu ah tuni’b Churachandpur Police station ah Police, Doctor leh 'JAC against the killing of Sapam Ongbi Thoibi Devi with baby during delivery dead' te mapui mithi lam te’n kihona a nei ua, zia hun a chun, mithi galna dan ah Rs 5 lakhs ah kiholemna nei un a kigen hi. Zia kihona a chun, Addl SP (Ops) leh Addl SP (L&O), JAC makai-te, victim family leh hospital administration banah Dr. Zuii Hauzel innsung vaihawm-te a pang ui.
Kiholemna tawh kisai Mutum Birachandra, Member Zilla Parisad leh JAC in media-te kiang ah a gendan in, customary dungzui ah thunung thuma umlo ding ah kiholemna siam a hidan uh taklang kawm in, kiholemna a um tak tawh kitawn ah Feb. 24, 2018 leh morgue a ki pat thiluang puakdaw hiding, Imphal ah post-mortem bawl hiding leh Torbung ah amau chawndan tawh kituak ah thi-luang kawidawna nei ding uh hin a gen hi.

Khuga Battalion in mipi te khut ah piakdawna nei

Lamka, Feb. 23 *(Nisin Thuhiltu)* : 27 Sector, Assam Rifle nuai ah Khuga Battalion in tuni, February 23, 2018 in Singngat Sub-Division huapsung ah um Suangkuang khua ah Tui Khawlna ding ah a siam uh mipi te khut ah piakdawna a nei hi. 27 Sector Assam Rifle Headquarter in gamgizul leh thingtang gam ah muanna leh bitna a etzui bep hilo ah mipite a ding ah pawimaw leh lam chuamchuam khantona a um theina ding ah panlakna a nei zingna chung ah area mipi’n kipakthu a puang ui.
Suangkuang ahileh Myanmar tawh gamgi kiangnai ah um, Singngat Sub-Division sung a khua khat a hia, tui lakna kituptak a umlo ziak ah khua mipi’n haksatna a tuak zing sek uh sukvenna ding ah zia tui khawlna chu Water Supply Scheme leh Border Area Development Project (BADP) nuai ah Khuga Battalion in a siam piak a hi.

Medical Team in Henglep zuan

Lamka, Feb. 23 *(Nisin Thuhiltu)* : State Level leh District Level a pat Medical Team in tuni, February 23, 2018 zingkal dak 8:00 in Henglep Sub-Division a zuan ui. Medical Team te’n Henglep Sub-Division ah um Vungmol leh Nahjang khua ah Medical Camp leh Health Awareness bawl ding a hiu. District Medical Team-te te chu Dr. Kimngaihching, CMO mapui, Ngahneikim Haokip, DSO, John Baite, District Epidemiologist, IDSP, Johny, DEO, IDSP, Dr. Robinson, MO, Henglep PHC, Solomon Neihsial, Block Finance Manager, Henglep, Fancy, Block Data Manager, Henglep, Thangthianmuan, Consultant, NVBDP ban ah Henglep PHC a pat Nurse leh Malaria Department a pat Multipurpose Worker te a hiu a, State Team-te ahiuleh Dr. Kh. Sasheekumar Mangang, Additional Director (Public Health), Dr. L. Gojendra Singh, State Surveillance Officer, IDSP, H. Shyamkishore Sharma, State Microbiologist, IDSP, Anuradha Sagolsem, State Entomologist, IDSP, Antony Haorakcham, State Data Manager, IDSP, W. Holland Singh, State DEO, IDSP, L. Regan Singh, State DEO, IDSP leh S. Nganthoi Chanu, State Training Consultant, ISDP te a hiu.

KIM President mualliam
Lamka, Feb. 23 *(Nisin Thuhiltu)* : Kuki Innpi Manipur (KIM) ah President Khamliankhup Lianzaw (540 s/o Upa (late) Chinkhopau of M. Thingjabuong (Near K. Salbung) chu tuni, 23rd Feb. 2018 zingkallam dak 2:00 tuam in Churachandpur District Hospital in a mualliam a, M. Thingjabuong thanmual ah vuiliam in a um hi.
Khamliankhup Lianzaw sunna programme ahileh KBC C/C M. Thingjabuong inntekna a chenna inn ah nei in a um a, Kuki Innpi Pa’ Thangsei Haokip, PS Haokip, President KNO, TT Haokip, MLA & President Manipur Pradesh Congress Committee (MPCC) panna District chuamchuam ah Kuki Innpi, Civil Society Organization chuamchuam - Kuki Innpi leh CSO-te, KoHOR, Khongsai Inn-pi GHQ, KIC, KKL KSO, kWU, KWHR leh KCA lawiupa ten a gaalna nei in, M. Thingjabuong thanmual ah Rev. Jangkholen Haokip, Pastor KBC C/C M. Thingjabuong in a vuiliam hi. Khamliankhup Lianzaw ahileh August 9, 1964 kum ah New Khaukual Village ah piang , pianpi numei 4 leh pawsal 4 nei, a zi Manneihching tawh chapa pawsal 2 le numei 2 nei a hi.

Lenlai CLub in Cup lawpna nei ding
Lamka, Feb. 23 *(Nisin Thuhiltu)* : Lenlai CLub in 70th Zomi Nam Ni Football Tournament- 2018 leh Zou Gal Centenary Shied- 2017/18 ah Champion leh Runners-Up a lak uh Feb, 24, 2018 zingkal lam dak 11:30 ah Toms' Villa Annexure, Chiengkawnpang ah a lawpna leh Pathian kiang ah kipakthu genna nei ding a hi. Zia hun chu, Chief Guest hina tawh V. Hangkhanlian, Minister (Agri, Vety & AH) in uap ding, Functional President hina tawh Khaipao Haokip, Chairman ADC/CCpur in uap ding leh Guest of Honour hina tawh T. Paukhanlian, EM in uap ding a hi. Chun, Chief Host hina tawh Th. Jamchinthang Simte, MDC in uap ding a hi.

Weaver’s I-Card tawh kisai ah hiatsakna bawl
Lamka, Feb. 23 *(Nisin Thuhiltu)* : Nianglian in a kisai khakpi te hiat ding ah thusua a bawlna a chun, puan-khawnna tawh kisai ah Weaver’s I-Card bawl bawl zosia’n passport stamp size khat leh bank passbook xeroz copy khat tu Pathianni February 25, 2018 tiang ah pelut ding in hiatsakna a bawl hi. Zia hiatsakna chu ngaikhawk chiat ding ah a kisaikhakpi te chialna bawl in, I-card chu siamzaw hita himaleh cluster pting ding ah dawtna siam a hi zingna chung ah hawpdaw ziang hithei nailo in a gen hi. Chun, tunung ah biometric lakna a fel tak leh Weaver’s I-Card hawpdaw hiding in a gen hi.

Gari registration no. bei leh tinted glass phal hitalo ding: Traffic OC

Lamka, Feb. 23 *(Nisin Thuhiltu)* : Churachandpur district sung, a bik tak ah Lamka khawpi sung ah Traffic tawh kisai enzuitu Traffic OC SI Liankhansang in tuni ah thuthak lakhawm mite kiang ah a genna a chun, District sung ah February 26 a ki pat gari ah tinted glass mat phal hitalo ding a hidan taklang in, gari registration no. umlo ah tai le phal hitalo ding in a gen hi. Car, SUV, Gypsy leh a dangdang a pawlam a pat gari sung mu let theilona ding ah kibel tinted glass/film, February 26 a pat phal hitalo ding, zia chu Motor vehicles Act nuai ah rule no. 92/100 CMV, 1989 kal hin a taklang hi. Zia chu a bawtsia teitei a um leh Under Section 177 nuai ah mat thei hiding leh dangka Rs 500 liausak thei a hidan gen in, kuama’n tinted glass mangtalo ding ah chialna bawl kawm in drive bawl masang ah a mangkha ten a lakdaw ding uh pawimaw a hidan a gen hi.

Chuleh, gari Registration number takdawklo (display lo) ah gari tai te le Motor Vehicles Act nuai ah Rule no. 50 of CMV, 1989 bawtsia a hidan uh taklang in, registration number takdawklo te Under Section 192 nuai ah mat hiding, Rs 10,000 tiang liausak thei a hidan a gen hi. Drive nei masang ah gari registration number takdawklo ten a takdaw ding uh pawimaw a hidan gen in, gari chawthak registration lam fel nailo a um leh District Transport officer ah acknowledgement slip chawi ah Traffic police te etsak zing thei ding ah um chiat ding in hiatsakna a bawl hi.

Annual General Body meeting nei ding
Lamka, Feb. 23 *(Nisin Thuhiltu)* : Churachandpur District Handicrafts & Handloom Supply and Marketing Cooperative Society Limited in Member te hiat ding ah thusua a bawlna a chun, March 10, 2018 sunma dak 10:00 leh Society Office, Hmarveng Community Hall ah Annual General Body meeting nei ding a hiu a, zia hun a chun Society ah Board of Director ding kitelna, 2016-2017 sung Balance Sheet leh Bank Account ti te panna agenda chuamchuam genkhawm ding a hiu.

First class ah BDS zo
Lamka, Feb. 23 *(Nisin Thuhiltu)* : Dentist doctor khat hiding in tuni’n Chiinthianmoi d/o S Kamthang Ngaihte, College Veng New Lamka in a zilna ITS Dental College Hospital and Research Centre Noida ah Bachelor of Dental Surgery (BDS) first class in a zo hi.

AIIMS ah Eye Specialist zil ding

Lamka, Feb. 23 *(Nisin Thuhiltu)* : All India Institute of Medical Sciences (AIIMS) saina nuai ah PG Entrance Examination (12th November, 2017) ah Dr Thanglalmuang s/o Singtinsoi of ECCI, Campus, Nehru Marg lawting in Eye Specialist MS (OPTHALMOLOGY) zil thei ding in a um hi. A zilna mun ding ahileh AIIMS, Rishikesh, Uttarakhand hiding a hi. Chun, 5th March 2018 ah join ding a hi. Eye Specialist MS (OPTHALMOLOGY) course ahileh kum 3 sung hiding a hi.
Tv Dr Thanglalmuang ahileh 2015 ah RIMS, Ranchi, Jharkhand State ah MBBS zo, 2016 ah Internship a zaw nung ah tu leh tu RIMS, Ranchi ah House Surgeon (HS) ah sem a hi.

Trial-cum-Selection neizawm
Lamka, Feb. 23 *(Nisin Thuhiltu)* : Churachandpur District Sports Association (CDSA) saina’ Inter District Under 17 Football Tournament a ding ah Football Trial-cum-Selection nei ah um chu tuni, February 23, 2018 zingkal in Lamka Football Ground ah sutzawp in a um hi. Zia hun a chun, zani Trial-cum-Selection hun ah mi 51 lak ah mi 21 shortlist bawl ah um lak ah regular a kuan mi 18 in Liankhosiam, Coach hina nuai in practice a pan ngal ui. Shortlist ah um mi 21-te ahiuleh; Janggoulian, Gingoulian, Chinminlun, Paulunsiam, Johnson, Thangsuanlal, Thangkhosuanmung, Reuben, Sanglian, Letminlian, Muanliankhum, Pauthiansang, Paokhongam, Sangpu, Sanglianmang, Boisang, Lianzasiam, Craig, Lalsiem, Thangmuanlal, Hangkhanpau te a hiu a, teldaw ah um ten March 1, 2018 a pat Artificial Turf Ground, Imphal ah Inter District Under 17 Football Tournament ah District ai-aw ding a hiu.

Women’s Football Tournament um ding
Lamka, Feb. 23 *(Nisin Thuhiltu)* : March 8, 2018 ah International Women’s Day matna ding tawh kisai in, Action for Women and Child advancement (AWCA) saina’ March 1-8, 2018 sung ah Lamka Football ground ah 1st Churachandpur Women’s Football Tournament um ding a hi. Zia Numei Football tournament a chu First Prize Rs 10,000 + Trophy+ Certificate; Runners Up- Rs. 5000 + Trophy + certificate hiding a hi. Lunglutna nei ten, SG Computer, opp Dorcas Hall, New Lamka; Excel travels, New Bazar Traffic point leh CDSA office ah Entry form lak thei ding, February 27, 2018 tiang ah Entry fee 700 tawh form lakna mun ma ah piaklut kit ngai ding a hi. Chun, match khat ah ah mi/player 7 zel kihelsak hiding a hi.

ADCC/Chairman in Computer training Centre hawng

Lamka, Feb. 23 *(Nisin Thuhiltu)* : Manipur State Co-operative Union (MSCU) in tuni sunnung dak 12:30 in District Co-operative office complex, Ccpur ah Central Co-operative Management Computer training Centre, CCpur Branch hawndawna a nei hi. Computer training Centre chu Khaipao Haokip, Chairman, ADC/CCpur in Chief Guest hina tawh a hawng a, L. Tombipishak, President, MSCU; Jeena Potsangbam; Hemanta, Co-operative Member; L Basanta Sharma, Co-operative Member; Paolal Haokip, MDC leh Jangkhongam Haokip, Vice President MSCU (Hills) ten Functional President, Chief Host, Guest of Honour hina tawh a uap ui. Training centre hawnna neizaw in Rev. L. Khupboi Vaiphei in Pathian kiang in a latna a nei hi. Khaipao Haokip, Chairman ADCC in Manipur state co-operative Union panlakna nuai ah CCpur district sung ah umkha nailo, Central Co-operative Management Computer training Centre, CCpur Branch hawn thei ah a um chu District a ding a ding ah tepte kham ting a hidan gen in, Co-operative Society I kiti society kumlui mama leh a pawimaw mama hin a gen hi.

High Court of Manipur Chief Justice thak Justice Kotiswar
Imphal, Feb. 23 *(Nisin Thuhiltu)* : High Court of Manipur ah senior most judge Justice N. Kotiswar chu High Court of Manipur Chief Justice thak ding ah guat in a um hi. Joint secretary to the government of India, Ministry of Law and Justice in notification a sua dungzui ah High Court of Manipur ah numei Chief Justice masapen ding ah Justice Abhilasha Kumari guat ah um himaleh ama retirement hun a hitak tawh kitawn ah Justice N. Kotiswar chu mawpuakna piak thak ah um hin a gen hi.

Myanmar ah Manipur displays organic products chi chuamchuam suklat ah um

Imphal, Feb. 23 *(Nisin Thuhiltu)* : Manipur organic products chi chuamchuam te Mandalay Region Chamber of Commerce and Industry, conference hall ah ni 2 sung um ding North East India-Myanmar EXIM Conclave ah suklat in a um hi. Zia Conclave a chun, Debadutta Sharma in Manipur Organic Mission Agency (MOMA) tawh kithua in Manipur organic products chi chuamchuam um te a sulang hi. North East India-Myanmar EXIM Conclave ahileh North Eastern states of India ah a bik tak ah horticulture, handloom & handicrafts, bamboo products te promote bawlna ding ah organize kibawl a hi.