Nisin Thuhiltu – 20 January 2018

User Rating: 0 / 5

Star InactiveStar InactiveStar InactiveStar InactiveStar Inactive
 

PMUY nuai ah LPG connection piakdawna nei

Lamka, Jan. 19 *(Nisin Thuhiltu)*   : Pradhan Mantri Ujjwala Yojana (PMUY) LPG connection scheme nuai ah tuni’n M/S Kim-Joe Agency,Nehru Marg, Central Lamka, Churachandpur in beneficiary 38 te kiang in LPG free connection piakdawna tuni,19th January 2018 in a nei hi. Zia hun a chu Joel G. Haokip, MCS, SDO/BDO, Kangvai Sub-Division in khuallian hina tawh uap in, beneficiary te kiang in LPG Cylinders, stoves/burner leh item chuamchuam te piakdawna a nei hi. Chun, beneficiary te chu Safety tips leh amatd ding dan tawh kisai ziltil in a um ui.

6th Biennial Conference -cum- Golden Jubilee lawpna kipan  

Saipum, Jan. 19 *(Nisin Thuhiltu)*   : Khuga Sadar Presbyterian (KSP) nuai ah Presbyterian Women Fellowship in 18th - 21th January 2018 sung ah “ Lalpa Thagau ziak bep in a hi” (Zach. 4:6) ti thupi nei ah Saipum Presbyterian Church ah “6th Biennial Conference -cum- Golden Jubilee (1968-2018)” a mat ding uh chu, 18th January 2018 nitak in a kipan hi. Zia hun a chun, Khawmpi hawnna leh malzin lawplutna Rev. Thanglianmang, Moderator, Khuga Sadar Presbyterian (KSP) in a nei a, Saipum KKP te a pat lapawl sakna um in, District tin ah Secretary te leh Fraternal Delegates ten report piakna a nei ui. Chun, Jubilee Magazine hawnna, Rev. S.T Kaia Vaiphei in Executive Secretary, Manipur Synod in a nei a, Mrs Rochhungi in Pathian thutak genna a nei hi. Zia hun matna chu chiazawm in tuni, 19th January 2018 in Kitelna leh Vaihawmna a nei ui.

Khawmpi hunsung a chu, Rev. Thanglianmang, Moderator, Khuga Sadar Presbyterian (KSP) in   Golden Jubilee (1968-2018) suangphu hawnna nei ding leh telchuam ah um ten Jubilee dak khetna nei ding a hiu a, Mrs Rochhungi, Tuibong, HQ Church, Mrs Tingnu, Full Time Secretary, PWF (KSP), Mrs. Thianhoi, Imphal, Mrs. Deem Melody, outgoing Chairperson leh Rev. Siama Phaltual, Executive Secretary i/c PWF te Speaker ah pang ding a hiu. Saipum KKP; Sadar District PWF, Khuga District Choir, KKP; Tuithanak District Choir, KKP, Miss Hatshi & Miss Siami of Leilon, Miss Chinneikim, Miss Tinghoithiam, Miss Tinghoilal & Mr Thangliankhom of Saipum te leh Miss Mami of Ngathal ten Pathian chawihawina laa sa ding a hiu. Chuleh, Devotion puitu’n Pastor Khaithiandam pang ding a hi.

CDVDFWA kiphinna haisanta ding

Lamka, Jan. 19 *(Nisin Thuhiltu)* : Laltingen, President, Churachandpur District Village Defense Force Welfare Association (CDVDFWA) in tuni, January 16, 2018 sunnung dak 3:30 in Mini Secretariat Complex, Tuibuang ah thuthak lakhawm mite kimupi in, November apat thalaw a mulo ziak ua January 16, 2018 apat kiphinna a nei uh, zing Janaury 20 apat chawlsanta ding ahidan uh a gen hi. Zia tawh kisai a chu tuni January 19, 2018 ah Village Defense Force Welfare Association puitute’n Imphal a Police Headquarter ah Dr. S Ibocha Singh, Inspector General of Police Administration a kimupi hun ua, Dr. S Ibocha Singh in CPIS chiazing ahidan taklang kawm ah, kiphinna haisan ding ah dawtna a bawl dungzui ah All Manipur Village Defense Force Welfare Association in kiphinna haisan ding a hi thu a gen hi. Zing January 20, 2018 apat ngaina gual ah VDF personnel te’n duty pankitta ding ahiu. All Manipur Village Defense Force in January 16, 2018 apat kiphinna a nei hun sung ua, VDF te haksakna hiatpi ah kithuapina pia District tin ah Superintendent of Police leh Police Officer-te chung ah kipakthu a gen ban ah, mipi leh Press/Media-te chung in kipakthu le a gen hi.

OPD Case leh Blood Collection enkawl ding

Lamka, Jan. 19 *(Nisin Thuhiltu)*   : State Mission Director, State Health Society, Manipur thupiak dungzui in a hung tung ding January 20, 2018 apat District Hospital, Churachandpur a Out Patient Department (OPD) Case leh Blood Collection tawh kisai Imphal a pat Krisnaa Diagnostic Private Limited in enkawlta ding ahidân Dr. Vumchinpau Tonsing, Medical Superintendent, District Hospital, Churachandpur in thusua a bawlna a chun a taklang hi.

 

Zomi Namni matna ding tawh kisai genkhawm

Lamka, Jan. 19 *(Nisin Thuhiltu)*   : A 70-veina Zomi Namni Organizing Committee mapuina in tuni, January 19, 2018 sunma dak 11:00 in ZOLLS Office, Gouchinkhup Veng, New Lamka ah Sub-Committee chuamchuam tawh meeting a um hi. Meeting hun in Khatkhotong Baite, Chairman, Organizing Committee leh H. Pauzalal, Secretary, Organizing Committee te’n a mapui ua, meeting hun ah Sub-Committee chuamchuam apat Report piakna a um ban ah, panmun hawpna le a um ngal hi. Meeting hun ah Zomi Council nuai a Frontal Organization chuamchuam, Zomi Youth Association (ZYA) General Headquarter, Zomi Mothers’ Association (ZMA) General Headquarter, Zomi Students’ Federation (ZSF) General Headquarter, Zogam Artists Association (ZAA) General Headquarter leh Zomi Football Club (ZFC) apat palaite a pan ban un, ZYA Bengaluru apat palai pani le a pang ua, a 70-veina Zomi Namni 2018 lawting tak ah mat ding dan a genkhawm ui. Zomi Namni mat ding ah thupukna siam ahi dungzui ah, January 25, 2018 tiang ah Namni Wish leh Chibai bawlna feet 4 a lian, feet 10 a sau Banner takdawk chiat ding ah thupukna a lak uh tawh kitawn in, Frontal Organization chuamchuam lak ah sem buting ding in dawtna a bawl ui. Main Banner, Roadside/Electric Post a ding poster/banner, Namni Flag leh Badge bawlna ding tawh kisai ZSF leh a nuai ah Unit umte’n mawpaw ding ahiu. Chun, Main Gate leh Khawpi sung mun pani ah Welcome Gate bawlna ding tawh kisai ZYA in mawpua in, Sound System, Artist Selection leh Public Campaign tawh kisai ZAA in mawpaw ding ahiu. A 70-veina Zomi Namni ahileh ZYA Bengaluru mapuina in Bengaluru ale hun mat hiding in a kigen hi.

AIDS chungchang ah performance review meeting nei

Lamka, Jan. 19 *(Nisin Thuhiltu)*   : District AIDS Prevention & Control Unit (DAPCU), Churachandpur in tuni, January 19, 2018 sunnung dak 1:00 apat DACO Office Chamber, CMO Complex, IB Road ah Performance Review Meeting a nei ui. Meeting ahileh Dr. Romeo Sanate, DACO, Churachandpur in a mapui a, zia hun a chun, December 2017 ah nasepdawsate etkitna leh AIDS tawh kisai, Folk Performance tawh kisai ah Second Phase ban ah thu pawimaw chuamchuam a genkhawm ui. Meeting hun ah MSF, DSRC, ICTC-te, Partner TI-NGO-te, ART Centre, LWS leh F-ICTC apat palaite chiakhawm in, zia hun a chun District TB Office a CB Net a siat ziak ah HIV-TB referral bawl theilo ah hun sawttak umta tawh kisai, a kin theilam ah bawl pawimaw ahidan ART leh ICTC chuamchuam apat palai te’n thu a pawlut ui. Meeting hun ah Folk Performance tawh kisai Churachandpur District sung Block chuamchuam mun 18 a nei ding ah lemsa in, zia dungzui a chun Sangaikot Block, Thanlon Block, Singngat Block leh Saikot Block ah mun ni chiat ah nei ding, chuleh, Tuibuang Block leh Lamka Block a mun 4 chiat ah nei hiding in a thupuk ui.

Children’s Retreat zothiang ta

Lamka, Jan. 19 *(Nisin Thuhiltu)*   : For One Life, Asia saina ah Children’s Retreat, Churachandpur kiti HSA Campus, Rengkai Road ah um chu tuni January 19, 2018 in a zawthiang ui. Children’s Retreat ahileh a achiata January 15, 2018 a pat kipan in, zia hun sung a chun, Bible ah mi chuamchuam chanchin thaw-kawm etsakna, Pathian chawihawina’ lasakkhawmna leh Game chi chuamchuam ban ah thu-le-laa kiziltilna a um hi. Children’s Retreat mang ding in For One Life, Asia in bus 6 mangcha in khawpi sung mun chuamchuam apat naupang a puikhawm ua, Thenmuol, Muolbem, Sielmat, Khawmawi, Saidan, New Lamka, Khapuibung, Saikot te ah bus a kidaw hi. US apat leh Local Volunteer kigawm mi 35 vel in hun matna a enzui ui.

Sunday School inn leh kochuam office hawnna nei

Lamka, Jan. 19 *(Nisin Thuhiltu)* : New Lamka, Vengnuam South a um Jordan EBCC in amau Biakinn huangsung ah Sunday school inn leh kochuam office ding sakzaw ahi dungzui in, tuzingkal dak 7:30 ah Upa B Ginzathang, Local Chairman, Jordan EBCC mapuina’n, Pastor K Pumsuanthang, Local Pastor in Pathian kiang ah latna a nei hi. Jordan EBCC nuai ah ziltiltu 13 leh Sunday school naupang 600 a um hi.

1st DPMF Tournament hawnna nei

Pengjang, Jan. 19 *(Nisin Thuhiltu)* : Young Pengjang Association (YPA) saina nuai ah 1st Dyna Pauminthang Memorial Football Tournament – 2018 chu tuni’n a hawnna nei in a um a, hun matna chu P. Kamkholal, EM, ADC/ CCPur in Chief Guest hina tawh a uap a, Holkhomang, Chief Functionary (RAS) in Functional President leh Paukholal, Chief of Pengjang in Chief Host hina tawp a uap hi. Chief Guest in puanlap kaipalna nei zaw ah Young Pengjang Association (YPA) Anthem sakna um in hun matna a kipan a, Chief Guest in a thugenna a chun, kihel-gualsiak nasatak ah chiapi ding leh khamthei a pat kikawi kang ding in khangthak te a tîlkho a, sports a pat nek hawl thei a hi dan le a genlang hi. Functional President in le sports chung chang leh maban ah khawmite tawh project chuam chuam tawh kisai ah pankhawm ding dan genlatna a nei hi. Hun matna zaw ah Chief Guest in kick-off a bawl a, referee mapuina’n (L) Dyna Pauminthang hiatzingna’n ‘1 minute silent’ nei ah um in kihelna pat a hi. Tournament ah a kigawm in team 16 a pang ua, zia te chu pool 4 ah khen ah um in Winner te’n kipakman Rs. 10,000 leh trophy banah runners-up te’n kipakman Rs. 5,000 dawng ding a hiu.

YMA Manipur in Annual Sports 2018 nei

Lamka, Jan. 19 *(Nisin Thuhiltu)*   : Group YMA Manipur in Nghathal Playground ah Annual Sports 2018 a mat uh tuni, January 19, 2018 sunnung in Closing Ceremony leh Final kihelna a nei ui. Zia hun chu Darsangluaia @ Tetea, Mahajon in Chief Guest hina tawh uap in, James Lalthlengliana, Mahajon in Guest of Honor leh Albert Colney, Mahajon in Functional President hina tawh a uap ui. Chuleh, CV Duhawma, President, Group YMA Manipur in Chief Host hina tawh a uap hi. Tlanmawia Colney, Member, Sports Sub-Committee in hunmatna a mapui a, Roberta in hunhawna pauchapna nei in, Khaiminlala, Secretary, Sports Sub-Committee in vaidawnna thu a gen hi. Guest-te apat thugenna a um a, Lallawmthanga, Chairman, Sports Sub-Committee in kipakthu genna nei in, football final kihelna pat in a um hi.

State Level Workshop nei di

Imphal, Jan. 19 *(Nisin Thuhiltu)*   : Manipur Family Welfare Servicers Conference Hall ah zing, January 20, 2018 sunma dak 10:00 leh State level Workshop on Intensified Pulse Polio Immunization (IPPI)/ National Immunization Days (NIDs), 2018 um ding a hia, zia hun chu Chief Medical Officers (CMOs), District Family Welfare Officers leh District Immunization Officers (DIOs) tin in uap chiat ding in Dr. K. Rajo SIngh, Director, Family Welfare Services, Manipur in hiatsakna thusua a bawl hi.

 

Moreh – Nanphalong ah Joint Cleanliness Drive nei

Moreh, Jan. 20 *(Nisin Thuhiltu)*   : 26 Sector Assam Rifles ah 11 AR te’n Myanmar Army leh gam 2 te ah Civil Administration te tawh kithua in tuni’n Indo-Myanmar Border ah Border Pillar 78 leh Gate number 2 kikal a chun Joint Indo-Myanmar Cleanliness Drive a nei ua, ziana’ chun, India a pat civilian 156 leh Myanmar a pat 114 a pang u’i. Drive hun a chun, India leh Myanamr in JCB khat gel tuak dawk in thakuan te’n dakkal 3 val na a sem u’i. Joint Cleanliness Drive hun ah Moreh leh Namphalong a pat Scoiety Organisation chuam chuam member te banah, 11 AR ah Commandant, 89 LIR Myanmar Army ah Commanding Officer, General Staff officer, DC Tamu, SP Tamu, SP Tengnoupal, chuleh Moreh ah SDPO leh ADC te le a pang ua, thianthona leh gam 2 te kal ah kihiat thiam tuana a pawimaw dan suklat in a um hi.

Late Rajeshori in National Bravery Award mu ding

Imphal, Jan. 19 *(Nisin Thuhiltu)*   : Nupi khat leh a chanu hukdawna ding ah a hinna a la chân, phamta Loukrakpam Rajeshwori Chanu kiang ah National Bravery Award piak hi ding ahia, award dawng ding ah teldaw aum numei 7 lak ah ama min le chuansak in a um hi. Bravery Award a hileh a hung tung ding January 24 ni leh Prime Minister Narendra Modi in New Delhi ah piakdawna nei ding a hia, award dawng te chu Rajpath ah Republic Parade 2018 hun ah pang ding a hiu. Zia award dawng ding a chun a kigawm ah mi 18 teldaw in a um u’i. A chiata November 10, 2016 ni a khan Ongbi Kebisana chu a chanu Inunganbi (3) leh Rajeshwori Chanu (14) te Imphal river chung ah thing ah kisiam lei (bridge) khat a lawn lai ua Inunganbi chun tawpel in lui in a khetha, zia chu a mu phat ah a nu Ongbi Kebisana chun le tui zap theilo himaleh lui sung ah chawmtha in a chanu hukdaw na ding a ngaitua hi. A hinla, ama chu tui zaptheilo a hi ziak ah buaisiat gua a hi dan Rajeshwori in a mu in lui sung a chun a chawmtha, theitawp sua ah nuchan te chu luipang lam in a pui hi. Luipang a tung kuan ah a tui zana chu lel talua a hina ah panpi tu ding a ko a, a kiang tuam ah te’n a thawm git a hiat phat ua del ngal in nuchan te chu tui a pat a kaidawk man ua, a hinla Rajeshwori Chanu chu tui in tawk man in a luang chu ni 3 zaw ah mudaw a la hi pan hi.

Chandel a ding NFSA annchang te diklo tak ah kibawl:NCAC

Imphal, Jan. 19 *(Nisin Thuhiltu)*   : Chandel District ah National Food Security Act (NFSA) nuai ah October leh December ah hawp daw ding annchang te chu contractor, transporter leh agent te’n diklo tak ah bawl ah hawm dawklo uh hi’n Naga Chiefs Association, Chandel (NCAC) in tuni’n ngawna a siam hi. NCAC in zia gual ah District sung ah cheng, chaga te a ding sîk gu tute chung ah gawtna a sang thei pen piak ding dawi thu a puang hi. October leh December, 2017 a ding, NFSA nuai ah annchang chu district mipi te’n mulo uh a hi dan taklang kawm in, association in Chandel DC kiang ah complaint lekha a la pelut ta ti’n thusua a bawlna a chun NCAC in a puang hi. NFSA dungzui ah agent ding guatna ah political lam ah kigawlna bangma umlo ding ti a la himaleh agent te lak ah 99% chu political appointment a pat guat ah um uh ahina ah zia gual nekgukna ah politician thunei mama kigawl hi tei ding in ginchat thu le a taklang hi.

Kohima ah 'Naga Day' kimang

Kohima (Nagaland), Jan.18 *(Nisin Thuhiltu)*   : Forum for Nagas Reconciliation saina’n tuni’n Nagaland capital Kohima huapsung ah um, Khuochiezie, local ground ah 'Nagas Without Borders' ti thupi ah nei in "Naga Day" mat in a um a, Reverend Dr. Wati Aier, Convener, Forum for Nagas Reconciliation in a thugenna a chun, “Tuni hi Ni lopi tak a hi” ti kawm in a 1000 ah sim Naga te Nagas reconciliation ziak ah chiakhawm thei ah a um chu a thu mai ah a la kigen sek a taksuana a hidan a gen hi. Naga Day mat ah a umna ziak ah Naga mipi te kipumkhat ding dawina ziak a hidan gen in, Naga mipi te lak ah socio-culture lam thil ah chamna leh kituakna a um ding a nawp thu a gen hi. Zia hun mat chu, Konyak tribe a pat Tribal warriors ten 'dakpi' khen in, meithal kapna tawh hun a mang ua, Naga choir ten laa sakna nei in, Nagaland Chamber Choir leh laa thiam chuamchuam ten le laa sakna a nei ui.

Mizoram in kum 10 sung ah Long Agriculture Link Roads 1591 km siam

Aizawl, Jan. 19 *(Nisin Thuhiltu)* : Mizoram government in kum 10 sung ah 1591 km ah sau agriculture link roads siamdawk a hidan Minister of State (MoS) for agriculture KS Thanga in tuni’n agriculture link roads construction programme hawnna nei hun in thuthak lakhawm mite kiang in a gen hi. KS Thanga in family 2,6147 te chu state flagship programme New Land Use Policy (NLUP) nuai ah agriculture department in kithuapina pia a hidan le taklang in, beneficiary ten NLUP project ziak ah Rashtriya Krishi Vikas Yojana (RKVY) le phatchuampi uh hin a gen hi. Minister KS Thanga in a genbelapna a chun, central government in 2012-2013 sung ah agriculture links roads siamna ding ah RKVY nuai ah Rs 462 crore sanctioned bawl in a gen a, zia fund chu mang ah 773 km ah sau, agriculture links roads siam a um, gam 2,680 hectare te chu wet rice cultivation sua ah um, lobawl mite kiang ah 888 power tiller hawpdaw ah um hin a gen hi. Chuleh, NLUP project nuai ah custom hiring center 72 hawn ah um a hidan taklang kawm in, Mizoram state government in centre 30 hawnbe ding ah guanggalna nei in a gen a, NLUP project a ding ah fiscal 2016-2017 ah Rs 4,340 lakh bithiat ah um, New Economic Development Policy nuai ah tu fiscal year a ding ah Rs 9,855 bithiat ah um in a gen hi.

Tripura in Kolkata via Dhaka bus service neibe

Agartala (Tripura), Jan.19 *(Nisin Thuhiltu)* : Kolkata via Dhaka, second passenger bus chu tuni’n Agartala, Tripura ah flag-off bawl in a um hi. Zia bus tai pani te chu India leh Bangladesh in gamgi tuam ah trans-border relationship siamhawi ding ah kinawptuana a neina chung ah service sak ah um a hiu a, Maitre-2 ti ah kihia a hi. Tripura Road Transport Corporation Chairman Rajendra Reang leh MLA Ratan Das ten zia bus thak chu Agartala ah flag-off bawlna a nei ui. Hiatthei khat chu, Kolkata leh Agartala kikal 1,650 km a hia, himaleh Bangladesh gamsung chuan ah Kolkata leh Agartala kawmtuana 515 km a hi. Prime Minister Narendra Modi leh a hina kibatppi Bangladeshi PM Sheikh Hasina in Dhaka-Shillong-Guwahati leh Kolkata-Dhaka-Agartala bus services chu Modi in Bangladesh a phak hun flag-off a la bawl uh hita a hi.

National Security Guard, DG thak ding Lakhtakia

New Delhi, Jan 19 *(Nisin Thuhiltu)* : Senior IPS officer Sudeep Lakhtakia chu Director General (DG), 'black cats' commando force NSG ding ah guat in a um hi. Prime Minister Narendra Modi mapui Appointments Committee of the Cabinet (ACC) in Telangana cadre, 1984-batch Indian Police Service (IPS) officer Sudeep Lakhtakia appointments order chu tuni ah a suadaw a hia, Sudeep Lakhtakia ahileh tu leh tu Special DG in the Central Reserve Police Force (CRPF) headquarter ah sem a hi. Ama’n zia mawpuakna chu January 31, 2018 leh NSG DG panmun nusiata ding S P Singh thasan ding, July 2019 tiang ah zia mawpuakna chu tu ding a hi. National Security Guard (NSG) ahileh 1984 ah federal contingency force dan ah counter terrorists leh hijack thil te maitua ding ah a la kiphutdawk a hi. Chun, high-profile VVIPs - Home Minister Rajnath Singh leh chief minister khenkhat te body guard ah kimang a hi.

Arunachal ah WW II ah lenna tuaksia hiding khat kimudawk

Itanagar, Jan. 19 *(Nisin Thuhiltu)*   : Arunachal Pradesh, Kimin Papum Pare district a pat khangthak hawn khat in, Arunachal Pradesh leh Assam gamgi zul, Bogi Nodi kiangnai ah um gammang lak in, World War II (WW II) lai ah lenna tuaksia hiding ah ginchat, lenna themhal a mudawk ua, zia lenna chu World War II lai ah US Air Force te lenna ketha hiding ah muanmaw hin a kigen hi. Kimin Papum Pare a pat khangthak hawn khat mapuitu (team leader) Taba Nobin in a genna a chun, lenna themhal a mudaw teu chu ‘hump’ ti ah kihia US Air Force te lenna hiding ah muangmaw a hidan uh gen in, a umna mun, engine model te a pat US Air Force te lenna hiding ah ginchat um hin a gen a, himaleh expert ten verification a bawl uh pawimaw ding in a gen hi. Khutmat kituptak a neilo ziak ua, lenna themhal te chu kituptak ah ladawk theilo a hidan le gen in, lenna themhal khenkhat leh lenna umna mun tuam chu GPS device mang ah marked bawl uh leh limlak (photographs) kawi a hidan uh le a gen hi.

Achiata kum 3 sung a sapen (hottest) hi ah record

UN, Jan. 19 *(Nisin Thuhiltu)*   : United Nations weather agency in a chiata kum 3 sung chu a sat pen kum (hottest year) ah record a hidan a taklang hi. World Meteorological Organization in, international weather agency 5 te a pat data chawmkhawm dungzui ua, 2015, 2016 leh 2017 chu "warmest years" ah record hin a taklang hi. Kum 2016 rEl Nino ziak ah "hottest year" ah record leh kum 2017 chu non-El Nino, "hottest year" ah record in a taklang bawk hi.