Nisin Thuhiltu – 17 November 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Vaiphei Welfare Association, Mizoram in Conference mang

Aizawl, Nov. 16 *(Nisin Thuhiltu)* : Vaiphei Welfare Association of Mizoram in Ramhlun, Indoor Stadium ah tuni’n 1st General Conference cum General Election a nei hi. Zia hun chu C Rorammuana, IPS (retd) in Chief Guest hina tawh a uap a, Young Vaiphei Association (YVA) General Headquarter President Vungminthang mapui VYA GHQ team khat in le hun matna a uap ui. Hun matna ahileh HV Lianna VWAM Chairman in a mapui a, V Vungliana, General Secretary VWAM in report piakna nei in, Kaste Romalsawma, Organizing Chairman/EM VWAM in Vaiphei History sutna a nei hi. Chuleh, Sangsang Bawk-bawk laa ah nam lam suklatna, Dar Robin, Elezabeth Suantak, T Minlun te a pat Special items um in, khuallian te a pat thugenna a um hi. Zia nung a chun, Election Commissioner te mapuina ah Vaiphei Welfare Association of Mizoram vaipaw thak ding telna a um a, Executive Member ding ah HV Liana of Ramhlun, V Vungliana of Electric Veng, G Liana of Ramhlun, S.T Lala of Durtlang, Kaste romalsawma of Electric Veng leh Latei Zothansangi of Zoltlang te teldaw in a um ui.

CM in accident ah liamna tuak te leh thina tuak insung mite vena nei; Thina tuak insungmi te Rs 20 lakh chiat piak hiding ah puang

Imphal, Nov. 16 *(Nisin Thuhiltu)* : Chief Minister N. Biren Singh in tuni’n JNIMS Morgue ah zani Tamenglong District ah security escort Gypsy khat in Khongsang leh Keikao kikaal, Kawl ah taitha, accident a tuak ziak ah Gypsy ah chuang 5 MR Personnel 6 te lak ah thina tuak MR personel 3, insungmi te kimupi in suunpi thu leh thawkpi takzet a hidan taklang kawm in thina tuak Hav. No. 15007008 Somorjit Singh, Rfn. No. 05976166 Dominic leh Rfn. No. 05126981 Kh.Bungo Singh insungmite government in financial assistance Rs 20 lakh chiat peding hin a puang hi. Chief Minister in thuthak lakhawm mite kiang ah a genna a chun, government “Go to the Hills” mission nuai ah line of duty ah thina tuak security personnel te chu ngaikhawk mama hin a gen a, liamna tuak te chu financial support Rs 5 lakh chiat piak hiding a hidan taklang in, financial aid tawh kisai chu Cabinet mawpuakna kawi hiding in a gen hi. Chandel district ah ambush ziak ah Assam Rifles jawan thina tuak te chungchang ah thuthak lakhawm mite dawtna a dawnhuna a chun, Chief Minister in gitlo bawlna’n buaina suvenglo ding hin a gen a, state sung ah chamna leh muanna susiatu mai hizaw hin a gen hi.

Bang issue hitaleh sukven a hitheina ding ah Political dialogue pawimaw mama a hidan le gen in, Centre in thingnuaimi te tawh kihona nei ding ah lemsakna a piak leh State government in state sung ah thingnuaimi group te tawh political dialogue nei ding ah guanggalna nei ding lemsa hin a gen hi.

MP Rajya Sabha Ksh. Bhabananda Singh, Minister for Forest and Envinronment Th. Shyamkumar, Minister for Agriculture V. Hangkhanlian, Parliamentary Secretaries, MLA leh DGP ten le Chief Minister chu zui in, accident ziak ah thina tuak insungmi te leh liamna tuak Shija Hospital ah etkawl ah um te dinmun kanzuina nei in, liamna tuak insung mite chu financial assistance tawh vena a nei hi. Chun, Shija Hospitals ah doctors leh paramedical staffs te chu theitawp sua ah liamna tuak te enkawl ding in chialna a bawl hi.

Healthy Mother and Baby Show Competition nei

Lamka, Nov. 16 *(Nisin Thuhiltu)* : State Health Mission, Director thupiak dungzui in tuni, November 16, 2017 zingkallam dak 10:00 in District Health Society, Churachandpur saina’ DFWO Office, District Hospital ah Healthy Mother and Baby Show Competition a um hi. Competition kipat masang in inaugural function mat in a um a, Panthoi Devi, CO, DFWO in hun matna amapui hi. Dr. Jamthianlal, District Family Welfare Officer (DFWO), Churachandpur in Healthy Mother and Baby Show Competition tawh kisai genna a nei a, Chief Guest Shyam Lal Poonia in thugenna saulo nei in, Competition hawndawna a nei hi. Zia zaw a chun, Dr. Kimngaihching, Chief Medical Officer, Churachandpur in thugenna a nei a, Zenngaihlun, District Program Manager, NHM, Churachandpur in huntawp ah kipakthu genna nei in, Healthy Mother and Baby Show Competition pat in a um hi.
Healthy Mother and Baby Show Competition ahileh Category pathum - Category I ah naupang tha 6 a pat tha 11 kikal mi, Category II ah naupang tha 12 a pat -t ha 23 kikal mi te, Category III ah naupang tha 24 a pat 35 kikal mi te pansak a hiu.
Registration, document chuamchuam verification bawl in a um a, naupangte etthakna chi 7 ah nei a hi. H. Kamlian, Community Mobilizer leh H. Dilip Kumar, Computer Operator te’n zia hun a chun, Registration tawh kisai a enzui ua, V. Vumzalian, DVSM leh Nandababu, SI te’n Immunization Card verification tawh kisai enzui in, Sister Zahnun, ANM, Sister K. Biaklun, ANM, Sister Thianching, ANM leh Sister Zenthianngai, ANM te’n Biometric Measurement/Physical Growth tawh kisai a en ui. Dr. Tongzakai Haokip, Pediatrician, Dr. Lalzarzolien Hmar, DNO, SNCU, Dr. Paulunmang Vaiphei, in-charge, PPC te’n Developmental Milestone, Personal Hygiene, General Physical Examination, S. Nalini Devi, DPHNO leh Panthoi Devi te’n ANC Card Verification tawh kisai enzui in, Healthy Mother and Baby Show Competition a pan ui. Kidemna Category-I ah Ivana Lalhrietzing d/o J. Lalnunsang Pulamte of Rengkai in winner hina a chang a, Cing Hoih Niang d/o Tuanlianmang of Vengnuam, New Lamka in 2nd hina chang in, Destiny Moilalpekhlu d/o Henry Tinmuanthang of Hill Town in 3rd hina a chang hi. Category-II ah M. Joseph Liankhankhual s/o M. Chinzading of Bungmual in winner hina a chang a, Jaden Hauzel s/o James Minlun of Gangte Veng, Bijang in 2nd, Chingnunhoih d/o Thangchinlian of Vengnuam, New Lamka in 3rd hina a chang hi.
Category-III ah Siamzamuan Hauzel s/o Thuamkhanmung of Jamsuan Road, College Veng, New Lamka in winner hina a chang a, Abigail Zoremsiam d/o L. Thanglungmuan of Nehru Marg in 2nd, Mungliansiam Guite s/o Ginneithang Guite of Hebron Veng, New Lamka in 3rd hina a chang hi. Kidemna ah Category zosia winner te Rs. 10,000 leh certificate piak in a um ua, Second te Rs. 5,000 leh certificate, Third te Rs. 2,500 leh certificate piak a hiu. Category pathum ah winner te chu November 21, 2017 leh Imphal ah State Level ah kidemna District min ah pang ding a hiu. Tuni, Healthy Mother and Baby Show Competition a chun, Category I ah naupang 26, Category II ah 46 leh Category III ah naupang 13 a pang ui.

Special Summary Revision (SSR) 2018 training bawl

Lamka, Nov. 16 *(Nisin Thuhiltu)* : Electoral Roll tawh kisai ah Special Summary Revision (SSR) 2018 training chiatha zing in, tuni’n District Training Centre, Tuibong ah Tipaimukh Assembly Constituency leh Thanlon Assembly Constituency nuai ah Booth Level Officer te’n training a nei ui. Zia hun a chun, Tipaimukh SDO W Ibhohal Singh in Form 6, Form 7, Form 8 leh Form 8A tawh kisai in ziltilna a nei hi. Form 6 ahileh kum 18 ting thak vote nei thei ding ah um te min khumlutna a hia, Form 7 ahile voter thisa leh umna kichawn te min lakdaw/sukbeina a hi. Form 8 ahileh Electoral Roll ah min diklo leh belap ngai te belap theina, Form 8A mang ah umna mun, Constituency khat a pat Constituency dang ah kichawn nuam te a sukdikna kimang a hi. BLO te’n Form tawh kituak ah vote neitu’ suai la, amau block tin ah SDO Office chiat ah November 30 tiang ah a piaklut ding uh pawimaw in a kigen hi.

VPC Hall sakna ding ah sum donate

Lamka, Nov. 16 *(Nisin Thuhiltu)* : Vaiphei Peoples Council (VPC) Community Hall Construction Committee Chairman Mr Henlianthang Thanglet leh VPC GHQ ah President Mr Khatkhotong Baite mapuina’n VPC Community Hall Construction Committee in Imphal Area ah Community Hall sakna ding Fund drive a bawl ua, 15th Novemver 2017 ah mi banghem zat in ngawm tawk tiang sum donate a bawl nung un, tuni, 16th November 2017 ah Soiminlian Lengen, MCS, Under Secretary Health & Family Welfare in Rs 50,000/-, S. Gentinlian, Deputy Director, State Intelligence Bureau (SIB) in VPC Community Hall sakna ding in Rs 20,000/- donate a bawl a, Lamsei Baite, Indian Forest Service (IFS) in Rs 1,00,000/- leh L M Khaute, IPS, Director General of Police, Manipur in Rs 3,00,000/- donate a bawl hi. VPC Community Hall sakna nasep ahileh tukum 2017 sung ngei ah zawthian ding ah Construction Committee in panlakna neizing in a kigen hi.

One Day Legal Awareness Campaign bawl

Lamka, Nov. 16 *(Nisin Thuhiltu)* : Manipur State Legal Services Authority (MSLSA) nuai ah Churachandpur District Legal Services Authority (CDLSA) saina’ National Legal Service Campaign matna chiatha zawm zel in tuni, November 16, 2017 in HSA Campus, Rengkai Road ah One Day Legal Awareness Programme a um hi. Zia hun matna chu Lalthomawi, Advocate in amapui a, Grace Chiinhoihniang, LCA, JMIC, Churachandpur in hun matna tawh kisai taklatna nei in, L. Margareth, Advocate, LAC CJM, Churachandpur in “Scheme for Para Legal Volunteers” ti tawh kisai in ziltilna hun a nei hi. Zia hun matna chu District sung ah Legal Aid Clinic 4; Koite Legal Aid Clinic, Churachandpur College Legal Aid Clinic, Rengkai Legal Aid Clinic leh Sakang Legal Aid Clinic te a pat in Para Legal Volunteer hunkhawp a pang ua, Para Legal Volunteer-te’ nasep ding tawh kisai le gen in a um hi. Zialo a chun, case nei, nu-pan kal thubuai, innkuan thubuai leh a dangdang, Court tut khel khello ah Para Legal Volunteer te’n kiholemna a um theina ding ah panlakna a nei ding dan uh le gen in a um hi. National Legal Service Campaign matna ahileh November 18, 2017 ah zo thiang ding a hiu a, zia masang a chu, District sung ah Cycle Rally le organize bawl ding un a kigen hi.

Tuithaphai TP Shopping Mall hawnna nei
Lamka, Nov. 16 *(Nisin Thuhiltu)* : Tuithaphai Presbytery (Presbtyterian Church of India) Manipur Synod in IB Road ah gam a neina mun ua, Tuithaphai TP Shopping Mall ding a sak, luathei tak ding ah a zaw thian uh tawh kitawn in tuni, 16th Nov. 2017 nitaklam dak 3:00 in a hawndawna leh a latna Rev Lalthantluanga, Moderator in a nei hi. Tuithaphai Presbytery Manipur Synod Tuithaphai Presbytery in kum 2016 ah building lui pheltha’n, December 1, 2016 ah building sakthakna nasep a pat a hi. TP Shopping Mall building chu luathei ding room 6 panna, dawr chuamchuam bawl theina ding room 13 a um hi. Dawr bawl theina ding room te chu a luama’n Rs 2500 to Rs 4000 kikal hiding in standing committee a pat hiat in a um hi. TP Shopping mall sakna tawh kisai Rev R Lalnunmawi-a Executive Secretary in a genna a chun, Tuithaphai Presbytery in kochuam sum mutheina ding ah khawmpi thupukna tawh December 1, 2016 a pat shopping mall sakna nasep kipan in a gen a, tuni tiang ah Rs 91 lakh sengta uh hin a gen hi.

UKB in 22nd Manipur Winner Cup 2017 Champion hina la

Imphal, Nov. 16 *(Nisin Thuhiltu)* : 22nd Manipur Winner Cup 2017 final match ah tuni’n Artificial Turf Ground, Khuman Lampak, Imphal ah United Khawzim Brothers (UKB), Churachandpur leh Athopam Football Club (AFC), Thoubal te a kihel ua, full time tiang ah goal kikhumtua a umlo ziak in penalty peksak in a um ui. Penalty ah United Khawzim Brothers (UKB) in Athopam Football Club (AFC) chu goal 4-3 in a zo a, 22nd Manipur Winner Cup 2017 Champion hina la in, Trophy leh cash prize Rs 50,000/- a sang hi. Chun, Runner-up Athopam Football Club-Thoubal in trophy leh cash prize Rs 30,000/- a sang hi. Zia kihelna en ding a chun, Churachandpur District a pat UKB fans tamtak te bus leh mimal lemchan dan zil ah Artificial Turf Ground, Khuman Lampak, Imphal zuan in UKB player te nasatak in cheer-up a bawl ua, Manipur Winner Cup 2017 ah match chuam chuam ah club te fans dinmun et in UKB chu Manipur ah football club tamtak um te lak ah fans neitampen ah muthei in a kilang hi. Hiathei khat chu tuni ah 22nd Manipur Winner Cup 2017 final match ah kihel United Khawzim Brothers (UKB), Churachandpur leh Athopam Football Club (AFC), Thoubal chu Manipur State League ah le pang gel ta ding a hiu a, UKB ahileh Churachandpur District a pat Manipur State League tiang tungzo football club pali tinna a hi. Tumasang in, Churachandpur District a pat ZFC, RACC leh New Lamka Youth Club (NLYC) te State League tiang a la tung ui.

Khantona ding ah Media te zalenna pawimaw: Minister Karam Shyam

Imphal, Nov. 16 *(Nisin Thuhiltu)* : Directorate of Information and Public Relations, Govt. of Manipur organize bawlna’ 1st Bn. Manipur Rifles Banquet Hall, Imphal ah tuni’n National Press Day cum One-Day Workshop on “Challenges before the Media” mat in a um a, zia hun chu Manipur Consumer Affairs, Food and Public Distribution Minister Karam Shyam in khuallian hina tawh hun matna a uap hi. Ama’n a thugenna a chun, zalen tak ah Media a function theilo a hileh State khangto theilo ding hin a gen a, State dang sang ah Manipur ah journalist te dinmun dengdelzaw a hidan a gen hi. Buaina a tun zing ziangna mun, Manipur ah media person te’n khenchuam neilo leh hangsan tak ah nasep thil bawl a nei ding uh thil haksa mama suak sek a hidan te taklatna nei in, State government gamsung a ding ah journalists te panlakna hiatthiampi mama hin a gen hi. Zia hun matna a chun, journalists 8 te kiang in Manipur State Journalist Award 2017 piakdawna le a um a, award dawng te a hiuleh - Editor Hueiyen Lanpao (Manipuri), Hemanta Kumar Ningomba (Best Editor on National Integration and Communal Harmony); Senior Staff Reporter Sangai Express Laishram Shamungou Singh (Science and Technology); Political Chief Sangai Express Ahongsangbam Dilipkumar Singh (Parliamentary Reporting); Reporter Hueiyen Lanpao Kumari Ashem Babycha (Art and Culture); Sub-Editor Poknapham Daniel Chabungbam (Rural Reporting); Staff Reporter Sangai Express Kumari Sapam Aruna (Women and Children); Staff Reporter Poknapham Ibomcha Yumnam (Public Health and Hygiene) leh Staff Reporter Sangai Express M. Romen (Sports Reporting) te a hiu. Chun, One-Day Workshop on “Challenges before the Media” hun ah moderator in, A.K. Sanaton Former President of AMWJU a pang a, resource person in Sunzu Bachaspatimayum, Member AMWJU, Yumnam Rupachandra, Secretary, Editors Guild Manipur and Sothing Shimray, Ex-President, Manipur Hills Journalists’ Union (MHJU) te a pang ui.

Chief Minister in Sangai Festival matna ding ah kisingsakna entha

Imphal, Nov. 16 *(Nisin Thuhiltu)* : Chief Minister N. Biren Singh in tuni’n Hapta Kangjeibung, Lamboi Khongnangkhong ah November 21, 2017 leh kipan ding, Manipur Sangai Festival 2017 matna ding tawh kisai ah panlakna um te dinmu etthakna a nei hi. Zia hun a chun, Chief Minister in Hapta Kangjeibung, BOAT, Keishampat -Airport road, Lamboi Khongnangkhong, Imphal West ah Trade & Permanent Exhibition Centre umna ding mun ah panlakna um te dinmun ama mimal tak in etthakna a nei a, a kisaipi official te chu lawting tak ah Festival mat a hitheina ding ah panla chiat ding in hiatsakna a bawl hi. Chun, Environment, PWD leh Forest Department official te chu Festival hun sung ah Imphal khawpi sung thiangtho tak leh hingzinzen ah kawi ding in hiatsakna a bawl a, sun leh zan ah panlakna nei ding in le thupiak a nei hi. Chief Minister in Sangai Festival 2017 matna ding tawh kisai ah panlakna um te inspection bawlna hun a chun, MP Rajya Sabha Ksh. Bhabananda Singh, Minister for Forest and Environment Th. Shyamkumar, MLA and Chairman, Tourism Corporation Manipur Limited Dr. Sapam Ranjan, Principal Secretary (Tourism) P.K Singh, Special Secretary (Tourism) R. Sudhan te’n le a zui ui. Hiatthei khat chu, President of India, Ram Nath Kovind in 8th Manipur Sangai Festival 2017 chu 21 November 2017 leh Hapta Kangjeibung ah a hawnna nei ding a hia, festival Curtain Raiser ahileh Chief Minister N. Biren Singh in 19 November 2017 leh Keibul Lamjao ah hawng ding a hi.

Indian President in Manipur a phak ding CorCom in boycott: 21 Nov. ah Genral Strike puang
Imphal, Nov. 16 *(Nisin Thuhiltu)* : Thingnuaimi pawl chuamchuam - KCP, KYKL, PREPAK, Progressive faction (PREPAK-Pro), Revolutionary People's Front (RPF), People's Liberation Army (PLA), UNLF, UPPK ti te kikhaikhawmna Coordination Committee (CorCom) in thusua a bawlna a chun, November 21, 2017 leh Imphal ah Indian President Ramnath Kovind in Manipur Sangai Festival 2017 hawnna a nei ding chu boycott bawl ding a hidan puang in, November 21 zingkal dak 5:00 a pat Novemeber 22 zingkal dak 8:00 sung chu general strike chiapi ding hin a puang hi. CorCom in President of India kiti India ah thuneipen a hi tawh kitawn ah Manipur colonized bawlna panlatu khat ah kawi a hidan taklang in, Armed Forces Special Powers Act (AFSPA) ziak ah state sung human rights violation nasatak um a hidan a gen hi. A langkhatlam ah genral strike hun sung a chu, emergency services, medicals, Media, religious activities, electricity leh Water Supply te thakawl hiding in a taklang hi.

Minister Biswajit in 12th NE Business Summit ah investor te Manipur ah invest bawl ding ah chial

Imphal, Nov. 16 *(Nisin Thuhiltu)* : The Lalit, New Delhi ah tuni, Manipur Textiles, Commerce and Industries, Works, Power, Rural Development and Panchayati Raj, Administrative Reforms and Information and Public Relations, Minister Thongam Biswajit Singh in 12th North East Business Summit “Transforming North East: The Engine for India’s Growth” ah a thugenna a chun, India gam sung ah investor te chu Manipur vena nei ding leh invest bawl ding in chialna bawl in Manipur chu gateway of India to South East Asia hiding in a gen hi. Manipur khawpi Imphal ah kum 2019 leh railway connectivity tungta ding a hina chung ah state in industries chuam chuam ah investment lam thil ah lemchang hawi tak nei thei ding a hidan le a gen hi.

State Industrial policy “A New Industrial & Investment Policy of Manipur 2017” nuai ah Manipur ah Micro, Small & Medium Enterprises sector masawn mama in le a gen a, State in organic Agro-horti raw materials, medicinal herbal aromatic plants tamtak a nei banah thing leh guaa, coffee, tea leh rubber ti te chiin theina ding ah theina (potential) nei hawi mama in le a gen hi. Zialo a chu handloom, handicraft leh textile industries lam thil a le Manipur in theina (potential) hawitak nei in a gen a,artistic textile product tamtak muthei ah um in le a gen hi. Zia ah hun matna chu Governor of Mizoram, Lt.Gen. Nirbhay Sharma, Minister for the Development of North Eastern Region, Dr.Jitendra Singh, DoNER Secretary Naveen Verma, Ministry of External Affairs Secretary (East) Ms. Preeti Saran, Principal Scientific Advisor of the GOI, Dr. R Chidambaram, ICC North East Regional Committee and chairman Tea Board PK Bezboruah, Additional Chief Secretary Department of Industries and Commerce, Government of Assam Ravi Capoor, IRS Secretary IWAI Shashi Bhushan Shukla, Indian Chamber of Commerce President Shashwat Goenka, Indian Chamber of Commerce Director General Dr.Rajeev Singh te’n le a uap ui.

Martyred jawan luang thâkdaw ah um

Imphal, Nov. 16 *(Nisin Thuhiltu)* : Chandel district, Sajik Tampak, Chamol Village ah 15th November 2017 zingkal dak 5:00 tuam ah 4 Assam Rifles te leh rebel group Revolutionary Peoples’ Front, PLA te kikaptuana 4 Assam Rifles jawan 1 thina tuak Rifleman Jai Prakash Oran chu tuni’n a chenna, Raghunathpur, District Ranchi, Jharkhand tut ding ah zana sangtak tawh thâkdaw in a um hi. Rifleman Jai Prakash Oran ahileh a zi leh a chanu nusia a hi.