Nisin Thuhiltu – 30 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

TSA in kum 60 tinna, Diamond Jubilee lawm

Kangpokpi, Oct. 29 *(Nisin Thuhiltu)* : Thadou Students’ Association (TSA) General Headquarter in tuni, October 29, 2017 sunnung dak 12:30 in Damdei Christian College, Taloulong Village, Kangpokpi District ah TSA kum 60 tinna, Diamond Jubilee lawpna a nei hi. Zia hun chu Thangzalam Haokip, Chairman, Hill Areas Committee, Manipur in Chief Guest hina tawh a uap a, Vungzagin Valte, Chairman, Manipur Tribal Development Corporation in Guest of Honor hina tawh a uap in, Nemcha Kipgen, Minister (Social Welfare & Cooperation), Government of Manipur in Functional President hina tawh a uap bak in K. Lhouvum, IDES in Special Guest hina tawh a uap hi. Hunpi matna a kipat masang in Chief Guest Thangzalam in TSA Flag kaipalna a nei a, TSA Diamond Jubilee suangphu hawng in, Rev. Lunlal Kipgen, Thadou Baptist Association, India in Pathian kiang ah a latna a nei hi. Guest leh telchuam ah um mi 60 in Jubilee Dakpi khetna a nei ua, VC Kipgen, Haojamang leh Tracy Lhingneihoi te mapuina tawh TSA Theme song sakna’n a zui hi.
Michael Lamjathang Haokip, General Secretary in vaidawn thugenna nei in, functional President leh Guest of Honour Vungzagin Valte in Diamond Jubilee Souvenir hawnna a nei a, President a patn Presidential Address um in, Guest of Honour a pat thugenna’n a zui a, TSA Chandel in Cultural Show a bawl hi. Chief Guest in thugenna nei in, TSA Sadar Hills in Cultural Show bawlna a nei a, Special Guest leh Dr. Ngamkhohao Haokip, Advisor, TSA in hun tawp ah kipakthu genna a nei hi. Functional President Nemcha Kipgen in a thugenna a chun, nampi ding ah khuampi pawimaw tak hung hiding khangthak te’n kipumkhat theina ding ah panlakna a nei ding uh a nawp thu gen in, nomenclature ah Kuki kihimaleh pau mat chuam chuam ki um in a gen a, Manipur ah Thadou kiti chu centre government in nam lianpen ah recognized a bawlna a hidan taklang in kipumkhatna ding ah khangthak te panla ding in chialna a bawl hi. Guest of Honour Vungzagin in pau chuam chuam mang te kihi himaleh suan khat nei kihi vek in a gen a, zia gual hun matna chu ki uaptua chiat ding pawimaw a hidan a gen hi.
Chief Guest Thangzalam in a genna a chun, Haokip leh Thadou kiti a chuam chuam a hi ti ah pawng panlo ding a hidan gen in, Manipuri kiti le Meiteite bep genna hilo ah Manipur ah cheng mizosia genna hin a gen a, TSA in lekha simna lam bep hilo ah sports lam leh competition chuamchuam ah le nasatak ah panla ding in chialna a bawl hi.
Nitak hun ah Cultural Program matna a um a, zia hun chu Tongbram Robindro Singh, Chairman, Planning & Development Authority, Manipur in Chief Guest hina tawh uap in, Adim Pamei, Vice Chairperson, MSDMA in Guest of Honour hina tawh a uap hi. Chun, Haokam Kipgen, General Secretary, Thadou Innpi General Headquarter in Functional President hina tawh a uap hi. Thadou Students’ Association ahileh October 29, 1956 ah Kangpokpi District, Motbung khua ah Lalkhopao Chongloi, Founder President leh C. Doungel, Retd. IRS & Ex-Finance Minister, Manipur Founder Secretary hina tawh a la phudaw uh a hi.
Army recruitment written exam bawl

Lamka, Oct. 29 *(Nisin Thuhiltu)* : Leimakhong, Army recruitment 2017 um hun ah tai (run) leh medical zo candidate te ding in tuni, 29 Oct 2017 in Bhagat Stadium Rangapahar, Dimapur ah Common Entrance Examination (CEE) a um hi. Zia hun a chun, total candidate 1568 um lak in category less Sol NA candidate 1442 te’n exam a bawl ua, a dang exam bawl nailo te’n 02 Nov 17 leh exam bawl ding a hiu. A langkhatlam ah Leimakhong rally ah lawtinna nei Sol NA candidate 126 te’n 28 January 2018 leh Rajiv Gandhi Indoor Stadium, Mualpui Aizawl (Mizoram) ah exam bawl ding a hiu. Tuni (29 Oct 2017) ah Common Entrance Examination (CEE) results ahileh 20th Nov 2017 leh Sol GD, Tech, Tdn 10th, Tdn 8th candidate te ding ah official website ah suadaw hiding, Sol Clk category te ding ah 10 Dec 17 leh suadaw hiding a hi.

Minister Biswajit in Sangai Festival umna ding mun leh lampi entha

Moirang, Oct. 29 *(Nisin Thuhiltu)* : State government spokesperson leh Works Minister Thongam Biswajit Singh in tuni’n Thanga leh Moirang areas ah Manipur Sangai Festival 2017 umna ding mun leh mual etthakna a nei hi. Zia hun a chun, Works Minister Thongam Biswajit Singh in Manipur Sangai Festival 2018 chu mun 3 - Hatta Kangjeibung, Lamboi Khongnangkhong leh Keibul Lamjao ah mat hiding in a gen hi. Keibul Lamjao ah opening ceremony um ding demand bawl JAC member te le kimupi in opening ceremony um ding mun chawn ah a umna ziak a hiatthiam sak a, Keibul Lamjao chu khanglui a pat munpi khat a hidan taklang kawm in state a ding ah mun pawimaw mama khat hin a gen hi. Keibul Lamjao chu Sangai Festival munpi pen ah mat hiding leh food stalls panna stall 25 hawn hiding in le a gen a, a pawimaw dungzui ah stall hawnbe hiding in a gen hi.
Himaleh Sangai Festival 2017 inaugural function chu Hatta Kangjeibung ah um ding a hidan puang kawm in India President panna gam chuam chuam a pat mitamtak in zia hun chu uap ding a hina chung ua Imphal ah inaugural function a um ding chu lemchangzaw ding ah ngaituana um hin a gen hi.

Keibul Lamjao ahileh Manipur Sangai Festival 2017 a tawp tiang ah umna ding mun hin a gen a, local mi leh JAC te chu Keibul Lamjao ah Sangai Festival matna ding tawh kisai programme um ding dan chung ah ngaidan leh dawidan pelut ding in a chial hi.
Works Minister Thongam Biswajit Singh chu Moirang MLA P Sarat, Thanga MLA T Robindro, Chief Engineers Works Kh Temba te’n le a zui ua, Moirang-Sendra Road, approach road - Takmu Water Front Resort leh Thanga Tongbram Leikai ah lampi dinmun le et-thakna a nei ui. Lampi dinmun etthakna a nei zaw ah thuthak lakhawm mite kiang ah Minister Biswajit in a genna a chun, lampi siamthakna leh lampi kuakna mun te siamphatna nasep festival masang ngei ah zaw hiding in a gen a, BJP mapui state government thak in rural area panna state sung pumpi huap ah road connectivity siamhawi ding a nawpna ziak ah lampi dinmun entha hin a gen hi.

YVA Game Village Unit cabinet member ding guatna nei
Lamka, Oct. 29 *(Nisin Thuhiltu)* : Young Vaiphei Association (YVA), National Game Village Unit in Chairman leh Vice Chairman thak ding telna a nei hun ua Chairman leh Vice Chairman ding ah Henlal Vaiphei leh Pastor Joy te teltin a hi’u tawh kitawn in teltin thak ah um Chairman leh Vice Chairman in cabinet form bawl in , YVA Game Village Unit General Secretary ding in S Kamminlun Vaiphei, Joint Secretary ding in Pauneigen; Finace / Treasuerer ding in Allûm Suantak te a guat ua, Game Village Area in-charge ding in, Malsawm leh Haupu Neihsial te a guat ui. Chun, Area in-charge Langol ding in Paulalmuan leh Ginmuanlal te a guat ua, Advisor ding in - Ginkholian, Henna leh Ginkhokam te guat in a um hi.

DC/CCpur in khuallian hina tawh Rolling Trophy final uap ding
Lamka, Oct. 29 *(Nisin Thuhiltu)* : Hmar Youth Association (HYA) in a 12-veina General Conference-cum-Dr. HT Sangliana Rolling Trophy Final kihelna a hung tung ding, October 31, 2017 sunnung dak 1:00 leh Sielmat Playground ah nei ding a hi. Zia hun chu Shyam Lal Poonia, IAS, DC Churachandpur in Chief Guest hina tawh uap ding, Rakesh Balwal, IPS, SP Churachandpur leh Michael Ginzasuan, DSO Churachandpur te’n Guests of Honour hina tawh uap ding a hiu a, Lalramsang Infimate MCS, Additional DC, Churachandpur in Functional President hina tawh uap ding a hi. Chun, HK Joute in Chief Host hina tawh uap ding a hi. Blessed Choir, HYA Cultural Troupe, leh Artiste chuamchuam a pat laa ngaithakna um ding, Football Final Match ah HYA, Saikot Branch leh HYA, Saidan Branch te kihel ding a hiu. A langkhatlam ah October 30, 2017 sunma dak 11:00 in Saikot Playground ah HYA-12th General Conference-cum-Dr. HT Sangliana Rolling Trophy Volleyball Match, Knockout system Semi Final, HYA Branch chuamchuam team 14 in nei ding a hiu a, Opening Program matna hun chu Lalropui Famhoite in Chief Guest hina tawh uap ding, Rohminglien in Guest of Honour hina tawh uap ding leh Chief of Saidan leh Chief of Saikot James Cole te’n Functional President hina tawh uap ding a hiu. Chuleh, Gloria Lalmalsawm Khawlhring leh Valentina Tusing te’n a chiakhawm mipi te chu laa tawh awi ding a hiu.

VPC Joint Meeting um ding
Lamka, Oct. 29 *(Nisin Thuhiltu)* : Vaiphei People Council (VPC) General Headquarter in 31 October 2017 leh VPC GHQ Office, Bethel Veng New Lamka ah VPC Block chuamchuam ah Chairman leh Secretary te tawh Joint Meeting nei ding a hi. Zia hun a chu, VPC General Fund chungchang, VPC Block te function dan leh thil chuamchuam genkhawmna nei ding a hiu. Zia hun chu pello ah uap chiat ding in Mr Nangzkai Suante, General Secretary, VPC GHQ in hiatsakna leh chialna a bawl hi.

MBBS student 1 in Education Deptt. Nuai ah kum 5 sung teacher thalaw la
Imphal, Oct. 29 *(Nisin Thuhiltu)* : Jawaharlal Nehru Institute of Medical Sciences (JNIMS), Porompat, Imphal ah MBBS student khat in a chiata kum 5 sung ah Education (s) Department nuai ah Primary Teacher thalaw la-dawk zing a hidan taklat in a um hi. Zia MBBS student chu Md Taj Mahammad s/o Md Dim Mahammad of Mayang Imphal, Bengun hi ah hiat a hi. MBBS a zil masang ah SSA primary teacher ding ah sepna join himaleh teacher na semkeilo ah kum 5 sung chu thalaw mu leh nuam tak ah mang a hi. A langkhat lam ah zia gual thil diklo um a hidan chu hiatdaw a hi tawh kitawn in Education (S) Director Th Kirankumar in Md Taj Mahammad appointment order cancel a bawl a, ZEO, Zone-I in kum 5 sung ah Md Taj Mahammad thalaw lakdaw Rs 10 lakh tuam chu tha 6 sung ah a nung piak kitna ding ah panlakna nei ding in hiatsakna a bawl hi. Zia hun sung a chu a piaklut kitlo ahileh a chung ah FIR file hiding leh action khautak lak hiding in a kigen hi. Md Taj Mahammad appointment order ahileh September 25, 2012 ah suak a hia, himaleh ama August 28, 2012 a pat MBBS regular class ah pang hita a hi.

NSCN-K in mawpuakna hawm gual thak
Imphal, Oct. 29 *(Nisin Thuhiltu)* : Government of India in NSCN-IM demand chung ah final solution a um theina ding ngaitua panlakna a nei zing lai in, NSCN-K in activity sukhat thakna ding in Southern Nagaland ah works jurisdiction a siambe thak hi. Col. Isak Sumi, MIP, GPRN in thusua a bawlna a chun, Trade & Commerce In-charge, Dy. Kilonser, Hripunii chu Highway 39 leh Highway 53 ah trading leh commercial activity um te enzui ding ah mawpuakna piak ah um a hidan taklang in Revenue Ministry, Kilonser Starson chu South(Manipur State) ah State leh Central Governmental nuai ah nasepna Departments, Contract & Supplies, Wholesale dealers leh suppliers, retailers etc te financial/ revenue affairs dinmun enzui ding ah mawpuakna piak ah um hin a taklang hi.

Interactive Session on Drugs
Imphal, Oct. 29 *(Nisin Thuhiltu)* : Distric legal Services Authority, Bishnupur leh New Life foundation Manipur saina’n Hotel Classic Sendra, Bishnupur district ah tuni’n “one day interactive Session on Drugs and Crime & its preventive measures” ti a um hi. Zia hun a chun, “rehabilitation and prevention” ti thupi mang in Manipur State legal Services Authority K. Saroja Devi in thugenna a nei a, Manipur Advocate Th. Hemchand in Crime and Drug tawh kisai in thugenna a nei hi. Zia hun matna chu government official, Civil Society chuam chuam ah member te leh NGO member tamtak in a uap ui.

State Congress leh Siva Sena in NPF dem
Imphal, Oct. 29 *(Nisin Thuhiltu)* : Chief Minister N. Biren Singh mapuina zani ah All Political Party meeting hun ah Naga People Front (NPF) palai te a panlo uh chu State Congress leh Siva Sena party te’n demna bawl in NPF chu NSCN-IM demand support bawl in ngawna a siam ui. Congress leader Tongbram Mangi Babu in thuthak lakhawm mite kiang ah a genna a chun, all political party meeting ah NPF a panlo chu Manipur territorial integrity venbit ding nuamlo a hidan uh a kilatna hin a gen a, state integrity siatna ding ah NSCN-IM panlakna banggual hileh le a support ding ah kimansa a hidan uh a kilatna hin le a gen hi. A langkhatlam ah Siva Sena State president M. Tombi in, NPF in NSCN-IM demand support a hidan sulang in a gen a, NSCN-IM demand dodal dingdan genkhawmna ah NPF panglo hin a gen hi.

Free Medical & Dental Camp sai

Imphal, Oct. 29 *(Nisin Thuhiltu)* : Wakha Noimaijing Ching, Imphal East district ah tuni’n 6th Assam Rifles of 9th Sector Assam Rifles in Rotary Club, Imphal tawh kithua in free Medical cum Dental camp Assam Rifles a bawl hi. Zia hun sung a chun Assam rifles a pat Medical Officer 2 leh paramedical staff 7 banah Rotary Club member 28 leh civil doctor 30 te’n damlo te etna a nei ua, a thawn in a kituakpi ding uh damdawi piakna a nei ui. Medical cum Dental camp hun sung a chun, mi 351 a ki etsak ua, zia lak a chun pawsal 170 leh numei 110 banah naupang 71 a pang hi.

I HO LEH BIAK DAN UH ET-THAK PAWIMAW
Editorial- Nisin Thuhiltu 30 October 2017
Bible thiam leh zilna sang tak neilo kihi maleh Bible ah a kimu dunzui in gingtu te ding ah biak-inn kai ah Pathian ho ding leh Pathian thu leh laa kiziltil tua ding chu thil pawimaw a hi. Hun dang ah biak-inn a la kai te chu apostles’ thuhilna gual ah ann-ngal ah pauchapna neikhawm in hun a la mangsek ui ti, Acts 2:42 in a muthei hi. Zia hun a chu biak-inn building hawi tak leh thupi tak tak a la umpua, himaleh Pathian biakna mun a chu mipi te chiakhawm in, khat leh khat kihepina ding ah luaithena a la neisek ui ti Acts 2:46 ah a mu thei hi. Mipi te a kimukhawm tak uh leh gingtu te’n fellowship nei in Pathian thu leh laa’n kiziltilna nei sek a hidan uh Hebrews 10:25 in a taklang a, kimukhawm leh Pathian biakna chu habit gual ah nei ding leh chiapi zing ding pawimaw in a gen hi. Biak in chu gingtu te khat leh khat kihepi tuana mun (1 John 4:12), khat leh khat kitilkho tuana mun (Hebrews 3:13), (Hebrews 10:24) Pathian hepina thu kiziltil tuana mun, (Galatians 5:13), khat leh khat kisawm-dawl tuana mun, (Romans 12:10) khat leh khat kichawisan tuana ding mun leh (Ephesians 4:32) khat leh khat ki ngainatna a piansakna ding mun a hidan muthei in a um hi. A langkhatlam ah biak-inn kai mai ah Jesu nungzui hiding chu a hawntak lo a hidan Bible ah muthei in a um a, gingtu te khat leh khat kipanpi leh kihepi tua chiat ding a hidan (1 Corinthians 12:21–26) ah muthei in a um kit hi.

A hileh tulai in ei uh Pathian ho dan te hi et in a style thei mama a, smart tak leh nal tak ah biak-inn sung valut mai a huntawk hileh a kilawm ta a hi. Biak-inn kai kawm ah khat leh khat ki demtua, kiho tua lo, biak-inn kai taima mama ziang a sepna lam ah gin-umna kiti pang ta mawngmawng lo tamtak a ki um kit hi.
Khawmpi tamveitak a kimang a, kikhawp khawmna zingkal nitak in a um zing a, Pathian thugentu ten gen zing in a ngaithatu te’n le a kingaitha zing a, himaleh hindan kisang ti a um chuamlo a hi. Pha kisakna a bei diak pua, pil kisakna a bei diak pua, hia kisakna a bei diak pua, bawl thei kisakna a bei diaklo a hi. Khat leh khat kihepi leh kisawmdawl tuana sang in ki engsiatna a uang a, kichuam khennna leh ki bung khenna’n I gam uh a lua dimta a hi. Zia hih a hiding him a hi diam ti vang genchian haksa mama himaleh I ho leh biak dan uh etthak ding pawimaw in a kilang hi.

Galatians 3:28 ah a kimu gual in Pathian in mi hausa leh migenthei, numei pawsal khenchuam a neilo dan muthei in a um hi. Himaleh tulai in kochuam leh khawtang in Very Very Improtant person hinawpna lunggel nei tamtak ki um a hidan muthei in a um a, I jeep leh car teu et mai in le a kichian tawk hi.
Lampi dungzui ah gari itai tak a hileh emergency tak ah meeting pawimaw uap ding neilo hiziang leu le Minister, MLA etc escort bawl te’n gari dang te khut zak khum in, mawl tawh gari khen in gari dang te taikhel (overetake) a gua sek ui. Zia’n a etsak chu “mi dang sang ah kei mi pawimaw kahi” thuneizaw kahi, a dang te mi pawimaw a hi puau ti etsakna a hi. Ziagualma a chun, kochuam leh khawtang in le mani kikawisanna leh kikawi chungnunna lunggel nei tamtak a ki um hi.

I ho leh biak dan uh zia gual hi a hi tak ziak in i society, I khawtang ua, VIP culture kiti chu a um ding him in a kilang a, a min mai ah biak-inn kaite I hi ziak un society sung ah kihepina, kisawmdawltuana, kipumkhatna, khat leh khat kihiathiam tuana a um thei talo a hi. Khawtang leh society sung siamhawithakna ding in zia hi I et-thak uh a pawimaw hi.