Nisin Thuhiltu – 26 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

TMI ah e-Saadhya hawnna nei

Lamka, Oct. 25 *(Nisin Thuhiltu)* : Manipur ah amasa pen ding in Department of Electronics and Information Technology, Ministry of Communication and Information Technology, GoI nuai ah Centre for Development of Advanced Computing (C-DAC) in The Malsawm Initiative (TMI), MARC Pearsonmun ah e-Saadhya kiti hawnna a nei hi. Hawndaw a hi tawh kitawn ah TMI Staff 4 leh Cherry Blossoms (Nagaland) a pat Staff 2 banah SSA a pat Staff khat in training la in Dr. NS Sreekanth mapui C-DAC a pat member 6 in ziltilna a piau hi. e-Saadhya a hileh Mild Mental Retardation leh Autism nei naupang te gamtat - khawhei panpina ding ah Framework khat a hia, hawn a hi tawh kitawn ah C-DAC in Technical Support leh Coordinator a ding kum khat sung thalaw a piak ding banah Desktop Computer le set 2 peding a hi.

MS in DFWO & DIO mawpuakna piadawk

Lamka, Oct. 25 *(Nisin Thuhiltu)* : Dr. Vumchinpau Tonsing in Medical Superintendent (MS), District Hospital mawpuakna a lak tawh kitawn in tuni, October 25, 2017 sunma dak 11:00 in Dr. Jamthianlal khut ah District Family Welfare Officer (DFWO) mawpuakna a piadawk hi. Seiminlian Lengen, MCS, Under Secretary, Health & Family Welfare in a chiata October 17, 2017 ni’ Medical Department nuai ah semte transfer/ posting order a suana a chun, Dr J Songokham Samte, Medical Superintendent, District Hospital in CMO Imphal East ah Senior Specialist tu ding a hia, ama thasang ah Dr Vumchinpau Tonsing, DFWO & DIO in MS mawpuakna la ding leh DFWO & DIO mawpuakna chu Dr Jamthianlal, Deputy Director, (MD-Training) Medical Directorate, Imphal leh SNO (Training) NHM in lua ding ti’n a taklang hi.

MGSF in kiphinna a nei guat chawlsan phawt
Lamka, Oct. 25 *(Nisin Thuhiltu)* : Manipur state government nuai ah nasem te kipun khawmna lian pen, Manipur Government Services’ Federation in central paid tawh kituak ah 7 Central Pay Commission mat ding phutna in tuni a pat mass casual leave pat ding a ti himaleh government lam a pat thutak a um ziak ah kiphinna chawlsan ah um phawt in a pangai gual ah office a kai ui. Manipur Government Services’ Federation in ahileh central government employee te law tawh kituak ah state government in 7 central pay a mat ding dawina’n state government kiang ah dawtna pe maleh government a pat dawnhun lungtung umlo a sak ziak ah tuni a pat Manipur pumpi ah casual leave pat ding a ti himaleh zani nitak ah RR Rashmi, Chief Secretary, GoM in thusua bawl in state government employee te 7 central pay commission tawh kituak ah thalaw piakna ding tawh kisai ah Fitment committee phudaw ah um leh committee subuai thei ding ah kiphinna bawl lo ding ah chialna a bawl ziak ah kiphinna a chawlsan uh a hi.

Free Coaching camp zothiang

Lamka, Oct. 25 *(Nisin Thuhiltu)* : 6th Sikh Light Infantry (Khuga Battalion) in sepai lunglut khangthak pawsal te a ding ah Khuga Dam ah Free Coaching Camp a nei zawthian a hi tawh kitawn in tuni, October 25, 2017 in Camp a pat naupangte thadaw in a um u’i. Free Coaching Camp a hileh Physical a pat Written Test a ding tiang ah tha 3 sung a nei uh a hia, Khuga Battalion in Camp ah Written Test a ding ah kisa lawk naupang 92 umsak in, nek -leh- chak banah giakna ding a piau a, innmun a pat kilethaw le hunkhawp um in a kigawm ah mi 120 tuam pha uh hi’n a kigen hi. Camp zaw a hi tawh kitawn in Khuga Battalion in naupangte maban ah a lawtinna ding uh dawisakna’n Gurudwara ah Puja bawl in Athul, Second-in-Command in tilkhona thu a gen a gen hi.

Arms Dealer mat ah um te lak ah 1 in khaw-min diklo mang
Lamka, Oct. 25 *(Nisin Thuhiltu)* : Assam Rifles leh Churachandpur Police kithua team khat in zani’n K Vanhlir (35) s/o Joy Kumar of Saikot village man in a taksa chung ah 9mm Pistol khat mudaw in a um a, ama kipuanna a pat galvan ah kivei a hi dan hiatdaw in a um hi. Mat ah um a hileh security force te’n police khut ah a galvan tawh a piadawk hi. A chiata October 23 ni’n AR leh CCPur police kithua team khat ma in operation a neina a pat galvan ah kivei mi 3 a mandawk hi. Mat ah um te chu New Lamka a pat Tunkhopau Tonsing (37), s/o Tualgou Tonsing, leh Paubawi Paite (27) s/o M Sanga Paite banah Lalboi Misao (22) s/o Letmang Misao of Misao Lhahvom a hiu. Thutut kimu dungzui in, thudawtna nei lim ah Lalboi Misao in a hina leh a khua a la îm Saipum ah cheng hi ah a la lep hi’n a kigen hi. Mat ah um te mi 3 te a hiuleh hun sawttak a pat galvan ah kivei uh hi’n a kipuang ua, amau a pat Sten Gun khat leh a magazine banah Honda Activa 1 leh sumtang mudaw in a um hi.

Hill Dist. Badminton Tournament ah pang ding CDBA Team kipandawk

Lamka, Oct. 25 *(Nisin Thuhiltu)* : Manipur Hill District Badminton Tournament ah pang ding, Churachandpur District Badminton Association (CDBA) Team khat tuni, October 25, 2017 in a kipan dawk a, amau a hileh Lamka Community Hall ah a kingakkhawm ua, Rev. E. Paukhanlian, Divisional Superintendent, Lamka South Division, EBC in pauchap piakna nei in Thienlaljoy Gangte, AC to DC, Churachandpur in a thadawk hi. Tournament ah a hileh Under 13, Under 17, Under 19, Under 35, Under 40, Under 45, Under 50, Under 55, Under 60 leh Men’s Open banah Mix Double um ding a hia, CDBA a pat mi 48 a kuan u’i.

2 Days Workshop nei di
Lamka, Oct. 25 *(Nisin Thuhiltu)* : JNU, New Delhi saina nuai in JNU Convention Centre, JNU New Delhi ah October 26-27 sung “Two Day Regional Workshop on Disasters and Community Resilience in the Northeastern States” ti um ding a hia, zia hun chu Kiren Rijiju, MoS Home Affairs in Chief Guest hina tawh uap in Workship hawnna nei ding a hi. Hun matna a chun Disaster tawh kisai a nasem, North East India sung state chuam chuam a pat NGO/ CBO, Social Worker/ social Activist hunkhawp pang ding a hiu a, Churachandpur District a pat Social Activist leh MDC, CT Lian Cuite leh Khamlianlal @ Khams Zotal te pang ding a hiu.

Refresher In-Service Teachers Training um ding
Lamka, Oct. 25 *(Nisin Thuhiltu)* : Lalhmasawn, Deputy Inspector of School, Tipaimukh Block Pherzawl District in teachers training ding tawh kisai ah hiatsakna thusua a bawlna a chun, DRDA/BRGF Hall, Parbung ah October 30 a pat November 3 sung Tipaimukh block a teacher te a ding ah ni 5 sung daiding Refresher In-Service Teachers Training um ding leh zia hun chu a kisaipi teacher te pangkum chiat ding in a taklang hi.

Zou gal Centenary T_Shirt hawnna leh latna nei
Lamka, Oct. 25 *(Nisin Thuhiltu)* : Zou gal centenary matna ding tawh kisai ah kisak lawkna chiatha zing in zani amsa, October 23 a khan ZYO Complex, Awnchinkap khua Zou gal Centenary, Information & Publicity Department in a bawl, Zou Gal Centenary T-Shirt hawnna leh latna a la um hi. T-Shirt ahileh sunnung dak 1:50 in Zou Gal Centenary Open Volleyball Tournament neina mun ah hawn ah um a hia, zia hun chu P. Kamkholal, Executive member, ADC CCpur in Chief Guest hina tawh a uap banah ADCC a pat Paukhanlian, Executive member leh Hausuanthang Executive member te’n le a uap u’i. Chief Guest in T-Shirt hawnna a nei hun ah a thugenna a chun, India-Burma, Chin hills leh Southern Manipur ah thingtangmi te khenzaktu British te ipu-ipa te’n a lo do uh chu dotâk ma a hiu ti’n a gen hi. British vaihawmna in amau khutnuai ah a hung gawpkhawm hilo in a khenzak a hi dan taklang kawm in zia gual ah unau khenzak tu te khangsawn te’n le do pawimaw a sak thu a gen hi. P. Kamkholal in a genbena ah,pau – leh- ham ziak ah nam chuam chuam kikhen maleh unau khat, thisan khat hi ziak ah Churachandpur a chengkhawm te’n common plateform khat nei pawimaw a sak thu a puang a, kituakna leh kihiatthiam zawkna ding ah sports sai a hina ah a chiatha zuinzing Zou Gal Volley Ball Tournament chu manphatak ah kuamasap in mang chiat ding in a chial hi.

1 Day training nei di
Lamka, Oct. 25 *(Nisin Thuhiltu)* : SSA/RTE Tipaimukh Block saina’ Buonzawl, HSA Campus, Rengkai Road ah zing, October 26 leh ‘One Day Capacity Building of Elementary Teachers On Learning Outcome SSA/RTE Tipaimukh Block’ kiti training um ding a hia, zia hun ah Gospel Laltanthang leh Lokee te’n thupi chuam chuam mang ah ziltilna pia ding a hiu.

YPA New Lamka Block Meet 2017 mang di
Lamka, Oct. 25 *(Nisin Thuhiltu)* : Young Paite Association (YPA) New Lamka Block in a hung tung dung November 1-4 sung “Oho, Nang Nana Hi Maw” ti thupi tawh YPA New Lamka Block Meet 2017 mang ding a hia, ziana ding ah November 1, 2017 zingkal dak 5:00 leh Marathon um in Langkhanpau Guite, Advisor, YPA New Lamka Block in Flag-off ding a hi. Marathon a chun pawsalte Mohan Junction, Mata a pat New Lamka YPA Hall tiang tai ding a hiu a, numeite a hiuleh Lingsiphai a pat New Lamka YPA Hall tiang tai ding a hiu. Sun hun ah a hileh kihelna chuam chuam um ding a hia, November 2, 2017 nitak 6:00 ah YPA Hall, New Lamka ah hun matna um in zia hun a chun Rev. V. Khamvum, Principal, GBC leh Lianchinpau te’n thugenna nei ding a hiu. Chun, a hung tung ding November 3, 2017 nitak hun ah Lapawl leh Lâm kitetna um ding a a hia, November 4, 2017 sunnung 1:30 leh Meet khak hi ding leh zia hun ma a chun Lottery draw a hi ding banah kipakman chuam chuam piakdawna um ding a hi.

MPCC in office of profit panmun MLA te disqualify bawlna ding ah representation pelut

Imphal, Oct. 25 *(Nisin Thuhiltu)* : Manipur Pradesh Congress Committee (MPCC) in tuni’n Parliamentary Secretary ding ah guat ah um MLA te chu office of profit panmun lua a hidan taklang kawm in disqualification ding tawh kisai in Manipur Governor Dr. Nazma Heptulla kiang in representation piaklutna a nei hi. Congress Bhavan, BT road ah MPCC President TN Haokip in thuthak lakhawm mite kiang ah a genna a chun, constitution of India, article 192 ah Governor chu MLA, Parliamentary secretary panmun lua te disqualify bawl theina ding ah thuneina piak ah um a hidan taklang in, July 26, 2017 ah Supreme Court of India in Parliamentary secretary ding ah MLA guat ah um chu constitution kal (unconstitutional) ah thutanna siam in a gen a, zia dungzui a chu Mizoram government nuai ah Chief Secretary in appoint a bawl, Parliamentary Secretary 7 te a panmun a ua a pat zukdaw kit ah um leh financial benefits a mu teu le nung piak kit ding ah order sua ah um hin a gen a, zia ziak a chu Parliamentary Secretary 7 te ki resigned, himaleh mi 5 in office of profit panmun chu lua zawm zing nalai un a gen hi. AICC President Sonia Gandhi leh UP ah MP Jaya Bachan te le kum 2004 ah zia gual panmun luana a pat chu ki resigned a hidan uh taklang in, MPCC President TN Haokip in Manipur ah parliamentary secretary 12 te chu Constitution of India, article 192 tawh kituak ah disqualify bawl ding a hi em ahiloleh a panmun uh a lua zawm zing ding uh a hi em ti’n dawtna a siam a, representation in governor chu parliamentary secretary te disqualify bawlna ding ah sun dak 12:30 ah phutna lekha pelut a hidan uh a gen hi. Alangkhatlam ah October 31 leh state Congress in famta Indira Gandhi, death anniversary mang ding hin a gen a, November 19 leh a kum a sim famta Prime Minister Indira Gandhi death anniversary observance hawnna um ding hin a gen hi.

Police ten puimang ah um pawsal chapang khat hukdawk
Imphal, Oct 25 *(Nisin Thuhiltu)* : Chakpikarong police team khat in OC mapuina’n a tunna hiatlo ah um mi khat Chakpikarong area in a hukdawk ui. Kum 15 ah upa pawsal chapang Moirangthem Sitaljit Meitei s/o M. Pakchao Meitei of Langathel kangjeibung Leikai chua tunna hiatlo ah um a hidan Chakpikarong police station ah report a hi nung ah police team in Chakpirong bazaar area ah search operation a bawl uh tawh kitawn ah building kisa zing lai khat sung ah a mudaw uh a hi. Hukdaw ah a um tawh kitawn ah a insungmite khut ah piakdaw in a um hi.

Imphal Airport ah Chinese tourist 1 mat ah um
Imphal, Oct 25 *(Nisin Thuhiltu)* : Ministry of Home Affairs a pat Protected Area Permit (PAP) neilo Chinese tourist khat CID Special Branch Imphal in Tulihal Airport Imphal ah tuzingkal dak 9.50 in a man hi. Official thusuak in a taklatna a chun Chinese Tourist mat ah um chu October 22 ni ah Manipur lut hita hin a gen a, Imphal a nutsai ding kuan ah CID team in Indigo counter, Imphal Tulihal Airport ah a mat uh hin a gen hi. Mat ah um Chinese tourist Liu peng (34) kiti chu Mumbai via Kolkatta, Indigo flight 6 E- 202 ah chuang ding ah kisa hin le a kigen a, mat ah a um nung ah Singjamei Police khut ah piaklut in a um hi. Hiatthei khat chu PAP kiti Manipur panna North Eastern states of India pumpi huap ah kum 5 sung lak daw ding ah lemsakna um himaleh Chinese, Afghanistan leh Pakistan gam mite ding ah PAP lakdaw hilo a hi.

HM in Journalist te bitna ding a panla ding ah state te hiatsak
Imphal, Oct 25 *(Nisin Thuhiltu)* : Union Home Ministry in states zosia chu journalist te’n freedom of speech & expression kituptak ah a mat zing theina ding ua, journalist te venbitna kituptak ah peding in hiatsakna a bawl hi. Bengaluru ah journalist Gauri Lankesh leh Tripura ah journalist Shantanu Bhowmik te attack ah a um nung ua ziagual hiatsakna chu home ministry in a bawl a hi. Home ministry in state te a hiatsakna a chun, journalist te attack ah a um ua leh a hunhun ah khualna pan ding leh journalist te bit theina ding ah panlakna neiding in a hiatsak hi.

UNC in District kisiam thak te zukkit ding dinpi zing

Imphal, Oct 25 *(Nisin Thuhiltu)* : Congress mapui Manipur government in state sung ah district tha 7 a siamdawna chung ah United Naga Council in district kisiam dawk thak te nung lakdaw kit ding ah panlakna a nei chu sunzawm zel in zani a khan Kamjong Headquarters ah Tangkhul Naga Zingsho Longphang saina district kisiam dawk thak te nung lakdaw kitna ding tawh kisai campaign a um hi. UNC President Gaidon Kamei in campaign hun ah a thugenna a chun, Naga/UNC dinpi chu district ki siam dawk thak te roll back ding leh tu ah GoI leh Naga Peace Talk support ding a hidan gen in, Naga te gam venbit zing hiding leh kiho lemna um masalo ah Naga gam ah district thak kisiam chu pawm thei ding gual hilo in a gen hi. Zia hun matna a chun, moderator in UNC General Secretary, S Milan a pang a, Naga organization, kochuam, village authority leh student organization chuam chuam a pat leader hunkhawp a pang ui.

Editorial
MLA Funds mat diklona chung ah kua ngaw ding?
Tunaicha a khan, Shillong South MLA Sanbor Shullai in MLA fund Rs 4.23 crore su-thelthang ti ah Civil Society woman organization (CSWO) in ngawna a la siam a, Sohra ah um firm khat kiang ah zia sum lawm chu kipia ti’n a la gen ui. Zia gual thil hi thil thak gual ah kilang maleh thil thak a hilo a hi. Zia hi Manipur a le a um mun mama thil a hi. Manipur ah MLA 60 um te chung ah RTI filed kibawl henlah MLA fund kimatna kituptak in kisuizui taleh phawldaw ding tamtak um ding a hi. Hiatthei khat chu -MLA funds kiti community go (assets) - lampi, footpaths, community halls, water supply leh mipi phatchuampi thei ding thil kituplo um te siamhawina ding a hi. MLA funds kiti luaithena ding, luaithena thil te chawkna ding, chairs leh tarpaulin iti te chawkna ding a hilo a hi. Zia gual chawkna kimang chu vote mutheina ding mai ah kibawl a hi. Ei uh lak ah MLA te’n langva, (CGI sheet) chaw leh hawm mun mama ua kihia sek chu kituptak ah official record a um diam? I gingchalo a hi. Zia ziak a chun, Shillong South MLA Sanbor Shullai nekgukna kigen chu thil thak a hipua, ei uh lak in le MLA fund a hi ding tak ah a kimatlona tamtak um a hidan I lampi teu et mai in le muthei in a um hi.

Zialo a chun, mipi te fund MLA’s private project - residential complex leh thil chuamchuam ah kimang muthei ding le tamtak a um a, MLA hausa tultul ziang tamtak muthei ding a um hi. A langkhatlam ah voter te lak ah hunkhawp in public sum gukdawna’n MLA te i kithuapi kit ua, RTI file hihen lah a hiding gual tak ah thil umdan phawldaw hileh public sum nek gukna ah MLA te nung ah mi bangzat a hem a diing ding ki um ding a hi.

Zia gual a um theina ziak pipen chu teltin ah a um MLA te’n teltin a hina ziak uh a hiatlo ziak uh a a hipen a, a chawmlam tak ah gen ding in amau mawpuakna chu- dan leh thupiak dinmun siamhawi ding, amau constituency sung bep hilo ah District pumpi, state sung pumpi a khantona ding ah panlak chu teltin ah um te mawpuakna a hi.

Khenkhat in i ha bawl mama sek uh, elected leader te chawihawina leh chawisanna a hi sek a, zia a pat chu mimal hitaleh hawn khat in phatchuamna mu ding ti a hisek hi. Khenkhat vang in elected leader te a pat kithuapina a mu uh chu amau mimal sakhau a pat kila dawk ah kithuapina mu gual in iki kawi sek hi.

Zia hi, elected leader te bep thiamlo chan thei a hi pua, a mipi te mama’n le public sum gukdaw ki chiing a hi ziak in gam sung khantona ding ah fund umte a hiding gualtak ah mat a hitheina ding ah panthak ah pan I lak ding uh a pawimaw hi.

Centre, State government, non-tribal ahiloleh MLA, MP te dem dem leh thiamlo chan haisan in, nekguk chakgukna tawh vote khia te’n nekguk chiing government inei ding chu hiatsa a hidungzui ah I chan ding ua kilawm government nei sek ihi’i!
*(Nisin Thuhiltu)*

Centre in March 31, 2108 tiang ah Aadhaar linkage deadline susau

New Delhi, Oct. 25 *(Nisin Thuhiltu)* : Centre government in tuni ah Supreme Court a hiatsakna a chun, government schemes chuam chuam nuai ah benefit mutheina ding ah alotheilo ah Aadhaar link bawlna ding ah deadline Deecember 31, 2017 tiang hiding ah um chu 31st March, 2018 tiang ah suksau ding ah lemsakna um a hidan a hiatsak hi. Attorney General K K Venugopal in Chief Justice Dipak Misra mapui Supreme Court bench ah thil umdan a genna a chun, government in deadline March 31, 2018 tiang ah suksaube ding ah lemsakna a neina chung ah bank accounts ahiloleh mobile number tawh Aadhaar link bawllo te chung ah action lakna ding ah bangma thupiak umlo in a gen a, deadline nung ah Aadhaar link lo te chung ah action lak hidiaklo ding hin a gen hi.

Delhi ah Nov. 3 leh North East Festival kipan ding
New Delhi, Oct 25 *(Nisin Thuhiltu)* : Indira Gandhi National Centre for the Arts (IGNCA), New Delhi ah November 3 leh 5th edition, North East Festival kipan ding a hi. Zia hun sung a chu Delhi ah um colleges leh bands chuam chuam te’n football match leh rock music contest nei ding a hiu a, North East ah Nam lam chi 30- Naga warrior dance, Thang ta of Manipur, Hojagiri of Tripura, Bamboo dance of Mizoram, Wangala dance of Meghalaya, Lion dance of Arunachal Pradesh ti te um ding a hidan Shyamkanu Mahanta, chief organiser in a gen hi. Chun, NE a pat Musicians -Bollywood singers Assam Papon leh Zubeen Garg, rapper Borkung Hrangkhal, international DJ Teri Miko leh a dang dang ten le perform bawl ding a hiu a, North-Eastern films chuamchuam le suklat ah um ding a hi.