Nisin Thuhiltu – 05 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

New Bazaar ah Malcha zawkna building phiat leh sakphat hiding

Lamka, Oct. 4 *(Nisin Thuhiltu)* : New Bazaar ah Malcha zawkna building sakzaw himaleh dengdel ah hiat a hi ziak ah luahlo ah a um zing chu phel ding leh sakphat kitna ding in tuni, tuni, October 4, 2017 in nasepna a kipan hi. Nasep pat a hina ding in Bazaar Building chu Langva mang ah umkhual masat in a um a, Red Cross Road leh Thangzam Road lampang le um bit hiding in a kigen hi. Chun, Nasepna mun ding uumna zawthian a hi hunhun ah Building phelna kipan ding a hi. Nasepna mun ding a hileh a kim-le-kiang a umte a bitna ding uh khualna kibawl hin a kigen a, zia mun tuam chu lua ah van chuamchuam zuakte, New Bazaar Bus Parking ah Temporary a Bazaar kibawlna chutsak a hiu. Alangkhatlam in nasepna mun ding uumkualnan lampi kimkhat lam a lua tawh kitawn in van zuak khenkhat in meikang-patau thil umkha thei ding ah lauthawnna nei a hidan uh a taklang ui.

EOC HQ in Nam lawiupa te pauchappiakna nei

Lamka, Oct. 4 *(Nisin Thuhiltu)* : Evangelical Organization Church (EOC) Headquarter in tuni, October 4,2 017 sunnung dak 1:00 in EOC Office, Hmuia Veng ah Nam lawiupa te hun matpi in Nam lawiupa te pauchappiakna a nei ui. Rev. Dr. Robert H. Vaiphei, Director of Missions in hun matna amapui a, Harry Muanlal, Executive Director in hun matna tawh kisai genlatna nei in, Wumen Christian Organization (WCO) leh Young Christian Organization (YCO) kum 60 tin lawpna ding tawh kisai ah EOC Headquarter in T-Shirt a siam uh, VPC General Headquarter, YVA General Headquarter leh Zillai, General Headquarter ah President te piak in a um ui.
Rev. Dr. S. Lalpi Vaiphei, Executive Chairman in Pathian’ thu ah Nam lawiupa te tilkhona a nei a, Khatkhotong Baite, President, Vaiphei People’s Council, General Headquarter, Vungminthang, President, Young Vaiphei Association leh Dr Haominthang Vaiphei, President, Zillai General Headquarter te a pat thugenna um in, Rev. Lamkhogin Khaute, Moderator in Nam lawiupa te pauchapna a nei piak hi. Chun, Rev. L. Khupboi Vaiphei, Director of Ministries in pauchapna tawh hun khakna a bawl hi. EOC a Executive Chairman, Rev. Dr. S. Lalpi in a thugenna a chun, nam vai tawh kisai ah organization um te’n sepna ah Pathian dawidan leh Bible tawh kituak a, Jesu Krista lam et zing kawm ah nasep ding a hidan a gen a, sep-le-bawl a Nehemia ettawn ding leh puitu hina ah Mosi, Joshua, Eliza, Paul ti te ettawn ding ah dawi a hidan a gen hi. Chuleh, Vaiphei te kipumkhatna ding leh a pawimaw uh hiadawk thei ding ah panla ding in lawiupa te tilkhona a nei a, Gin-umna, Diktatna leh Muan-umna ti te kawltup zing dawi dawi a hidan le a gen hi.

NT05oct2017a

Sept. tha sung ah Malaria vei mi 11 kimudawk
Lamka, Oct. 4 *(Nisin Thuhiltu)* : Malaria Department, Churachandpur in SMO, Regional Health & Family Welfare, Imphal leh Director, Health Services, Government of Manipur ah report a piaknau a chun, thalui September thasung ah Malaria vei ding ah muanmaw thisan sample 2,842 test a bawlnau in, mi 11 Positive leh Khat Plasmodium Falciparum (PF) in a mudawk ui. Zia lak a chun, September 1 a pat September 15, first Fortnight sung ah thisan sample 672 test a bawlnau ah Malaria positive 4 a mudawk ua, PF mudaw neilo, September 16 a pat September 30, 2017 sung ah thisan sample 2,170 test a bawlnau ah mi 7 te Malaria Positive leh mi khat PF hi ah mudawk a hidan a taklang hi.

ZYA GHQ team in Moreh zuan
Lamka, Oct. 4 *(Nisin Thuhiltu)* : Moreh ah get-together nei ding in tuni’n Zomi Youth Assocation (ZYA) GHQ team te ZYA GHQ President Lianzalal mapuina nuai ah Bolero nih leh mini-bus khat mang in Lamka nusia in a kipan dawk ui. ZYA GHQ team a hileh Myanmar a um ZYA–te tawh Moreh ah Myanmar-India ZYA Get Together nei ding a hiu a, 5th October ah Lamka tung kit ding a hiu.

District 2nd leh 3rd Div a ding ah Entry Form lak thei
Lamka, Oct. 4 *(Nisin Thuhiltu)* : Churachandpur District Sports Association (CDSA) in hiatsakna thusua a bawlna a chun, Peace Ground, Tuibong ah a chiatha zing Churachandpur (Late) Khaikhanlian Memorial District First Division Football League 2017 kichai tak leh Second Divison leh Third Division football league kipan ngal ding a hidan taklang kawm in Second Divison leh Third Division nuai a um team/club ten tuni’ October 4 a pat CDSA Office, Cummunity Hall, Hiangtam Lamka ahiloleh Peace Ground ah match um sung ah Official table ah Entry Form lak theih ding a, October 13 tiang ah Players aadhar card exrox copy tawh entry form piaklut ngai ding in a taklang hi.

District Level ah 62nd Wildlife Week 2017 kimang
Lamka, Oct. 4 *(Nisin Thuhiltu)* : India in 62nd Wildlife Week 2017 matna a nei tawh kitawn in, Divisional Forest Officer, Southern Forest Division saina ah tuni’n District Level ah celebrate rights of wildlife ti thupi mang in 62nd Wildlife Week 2017 mat in a um hi. Zingkal in Tedim Road, Tuibong range office ah kingak khawm in, Shyam Lal Poonia, IAS DC CCpur, Rakesh Balwal, IPS SP CCpur banah Forest department staff, student leh teacher te panna, Wildlife Week Rally a um a, T Kammuanlal Simte, MCS, CEO ADC CCpur in rally flag off a bawl hi. Wildlife rally a hileh Tuibong range office a pat tedim road chuan in New Lamka manaw in, Rayburn College, Hebron Veng, New Lamka tiang nei in a um hi. Rally ah pang te’n gammang leh gamsa venbitna panlakna nei ding a hidan uh suklatnan Banner ah kitiam suai a kai ui.
Wildlife Week 2017 hunpi matna ahileh Rayburn College Auditorium ah nei in a um a, Shyam Lal Poonia, IAS DC, CCpur in chief guest hina tawh hun matna uap in, Rakesh Balwal IPS SP CCpur in functional president hina tawh a uap hi. Chun, Horary Wildlife Warder, Dongzakai leh H Thangdam leh Suanni maw team ten le hun matna a uap ui. KS Mung Tawmbing IFS, DFO in a thugenna a chun, India ah kum 1952 ah gammang leh gamsa-te nasatak ah suk mangthai ah um ahidan taklang kawm in, Government of India in gammang leh gamsa venbitna ding ah Indian wildlife a phudaw a hidan a gen a, kum 1955 ah October hapta masa chu Wildlife Week ah puan ah um leh kum sin ah zia chu chiapi hizing a hidan a gen hi. Shyam Lal Poonia, IAS DC leh Rakesh Balwal, IPS SP ten a thugennau a chun, gammang leh gamsa pawimaw dan genna a nei ua, venbitna ding ah mizosian panlakna a nei ding uh pawimaw in a gen ui.
Zia hun matna a chun, September 26 ni ah Divisional Forest Officer, Southern Forest Division saina’ Churachandpur Government College ah On-the-Spot Painting Competition prize hawpdawna le a um a, Painting Competition ah First , Joseph Genmuansang, Class 8 of Don Bosco Higher Secondary School kiang ah Certificate leh Rs. 2,000 piak in a um a, Second, Boyai Class 8 of Hermon English School in certificate leh Rs 1,500 a sâng hi. Third Muangminthang Tonsing Class 8 of Don Bosco Higher Secondary School in Certificate leh Rs 1000 sâng hi. Chun, Wildlife Conservation & Tribal Society in Ccpur ti thupi nei ah thumal 250 ah On-the-Spot Article Writing competition ah First, Nengpilhing Class X of St. Stephen English School in Certificate leh Rs. 2000, Second, Khai Eleazar Thatsing Class XI of Don Bosco Higher Secondary School in certificate leh Rs 1, 500 leh, Third, Chingthianhoih Class XII of Don Bosco Higher Secondary School in certificate leh Rs 1000 a sâng hi. Debate Cumpetition ah First, Chawnglenmmawi Class XII of Don Bosco Higher Secondary School in Certificate leh Rs 2000, Second, Chiinneiching Zou of Class XI in certificate leh Rs 1500, Third, Florence Nengneivah Baite Class IX of St Mary high school leh Jabez Thangmingou Haokip Class X of St Mary high school ten consolation prize a sâng ui.

Dist. Level Student Sc. Seminar nei

Lamka, Oct. 4 *(Nisin Thuhiltu)* : Science Unit, Zonal Education Office (ZEO) Churachandpur saina’ tuni, October 4, 2017 sunma dak 11:30 in Swachh Bharat: Role of Science and Technology “Prumises & Challenges” ti thupi tawh a 39 veina District Level Student Science Seminar nei in a um hi. Seminar pat masang ah competition ah pang student te’n Aptitude Test a nei masa’u a, Praneshari Devi, Science Supervisor, Science Unit, ZEO, Churachandpur in vaidawnna thu a gen hi. Competition a chun District sung ah School 5 a pat Student 11 a pang ua, amau a hiuleh Don Bosco Higher Secondary School a pat Student 2, St. Mary’s School a pat Student 3, INA Memorial High School a pat Student 2, Gandhi Memorial Government Model High School a pat Student 2 leh JNV a pat Student 2 a hiu a, Shyamkishore Singh, Environmentalist leh Science Columnist leh Dr. H. Manoranjan Sharma, Associate Professor, Department of Botany, Thoubal College te a endiktu ah pang in dawtna leng bawl ngal uh hi. Competition zawthian hun ah kipakman piakdaw na um ngal in hun matna Chief Guest hina tawh uap, Kaikhanlian Guite, Deputy Inspector of School, Churachandpur in a piakdaw a hi. Competition ah khatna la te’n kipakman Rs. 1,200 leh Certificate a sâng ua, 2na in Rs. 1,000 leh Certificate banah kitetna a pang mi 4 kiang ah Consolation Prize Rs. 800 leh Certificate piak ah um in a dang a pang zosia kiang ah Participation Prize Rs. 600 leh Certificate piak ahi ban ua, Winner a dingah Teacher Guide in Rs.1,000 Incentive a sâng hi. Kitetna ah khatna la te chu October thasung ah um ding State Level ah pang ding a hiu a, State leh Union Territory tin a pat State Lebel ah khatna late’n a hung tung ding November 9, 2017 leh Birla Industrial & Technological Museum, Kolkata ah National Level kitetna nei ding a hiu.

CM Relief Fund ding ah thaw (donate)

Imphal, Oct. 4 *(Nisin Thuhiltu)* : Manipur ah tui-let ziak ah haksatna thuak te kithuapina ding ah mimal leh pawl chuam chuam in Chief Minister’s Relief Fund (CMRF) ding ah sum donate a bawl zing uh tawh kitawn in tuni’n Public School, Koirengei in Rs. 25, 950/- donate a bawl ua, Chief Minister’s Secretariat ah Education Minister Th. Radheshyam leh Principal Secretary (Education) Vineet Joshi uapna tawh Chief Minister N. Biren Singh khut in piakdawna a nei ui.

Kangla ah Mera Houchongba Festival kimang ding
Imphal, Oct. 4 *(Nisin Thuhiltu)* : Manipur Government in Sanakonung tawh kithua in zing October 5, 2017 leh Kangla ah Mera Houchongba Festival organize bawl ding a hi. Zia festival mang ding a chu hill district a pat khua-hausa leh nungak tangval hunkhawp Imphal tungta a hidan uh thudawnna a gen hi. Manipur Government in a siamdaw - State Level Mera Houchongba Committee mapuina a khatveina ding ah Mera Houchongba Festival chu kimang ding a hi. State Level Mera Houchongba Committee member te a hiu leh, Chairman- Chief Minister; Convener - Commissioner of Art and Culture Department hi a hia, minister leh MLA zosia chu State Level Mera Houchongba Committee member a hiu. Festival matna’ Titular King, Meidingu Leishemba Sanajaoba in hill district chuam chuam ah khua-hausa te mapui ding leh Kangla ah zingkal dak 8 ah lamzawtna nei ding a hiu a, Kangla, 'Men tongba' leh 'Yelhing thaba' ah tradition tawh kituak ah pathian biakna um ding, nitak lam dak 1:00 leh Kangla ah main function kipan ding a hi. Manipur Chief Minister N. Biren Singh, Meidingu Leishemba Sanajaoba leh Art & Culture Minister L. Jayantakumar te’n hun matna chu Chief Guest, President leh Guest of Honour hina tawh uap ding a hiu.

Handicraft leh handloom sector in sepna nasatak ah belap chuam thei: Minister Th. Biswajit

Imphal, Oct. 4 *(Nisin Thuhiltu)* : Manipur Textiles, Commerce & Industry Minister Thongam Biswajit Singh in Classic Hotel ah tuni’ Combined Programme of 10 Handicrafts Cluster Projects (Technical Training Programme,Integrated Design Development Project and Design Development Workshop) inaugural function hun ah a thugenna a chun, government schemes zosia a mu ding in kitup tak ah a mu theina ding ua panla chiat ding government official te hiatsakna a bawl hi. State sung ah handicraft leh handloom sector in sepna nasatak ah belap chuam maleh awareness, capital leh exposure banah modern technology matthiamlo ziak ah sector masawn theilo hin a gen hi. Product kibelap theina ding ah khutthiam thilbawl mi te ziltil leh hiatthiam sak ding pawimaw in le a gen hi. Textiles, Commerce & Industry Principal Secretary P.Vaiphei in a thugenna a chun, Manipur chu handloom leh handicrafts tradition ah hausa mama hin a gen a, a diak ah rural areas ah handloom leh handicraft sector ah inkuan tamtak in sum hawlna nei a hidan uh a genkawm in, handloom leh handicraft sector chu mitamtak te sum hawlna leh panlakna hin a gen hi. Zia chu tawh kitawn ah handloom leh handicraft sector promote bawl ding pawimaw in a gen a, handloom leh handicraft product te’n kipatna, culture, history leh tradition sulang hin a gen hi. Zia hun matna a chun, Director Handlooms & Textiles, Manipur and Managing Director (Manipur Handlooms & Handicrafts Development Corporation Ltd. K.Lamlee Kamei in Handloom & Handicrafts Delivery Scheme tawh kisai ah hiatnuam nei te’n department a thuhiat theina ding un toll free helpline No. 18002120403 puanna a nei hi. Chairman MHHDC Ltd. leh Dy. Chairman, Manipur State Planning Board S Rajen Singh te’n le hun matna a uap ui.

Dy CM in Badminton Player te panpina sum pedawk
Imphal, Oct. 4 *(Nisin Thuhiltu)* : Manipur Deputy Chief Minister Yumnam Joykumar Singh in tuni’n Naoremthong, Imphal ah a chenna huangsung in Junior Badminton Player 4, Asian Badminton Championship, 2017 (Under-15 & Under-17) ah India min ah kihel ding nu leh pa te khut in financial assistance Rs. 50,000 chiat piakdawna a nei a, ama’n a thugenna a chun, Indian Badminton player te chu standard sangtak ah um a hidan uh genlang kawm in khawvel ah top player hina ding ah challenge sang mama in a gen hi. Asian Badminton Championship, 2017 (Under-15 & Under-17) ahileh Yangon, Myanmar ah tuni’n a kipan a, World Junior Badminton Championship, 2017 (Under-19) ahileh 9th October 2017 leh Indonesia ah um ding a hi. Manipur Deputy Chief Minister in a genna a chun, tuhun ah Badminton min chia mama a hidan taklang kawm in India, a diak ah Manipur a pat player kibelap zing hin a gen a, player National leh International tournament ah pang thei te chu gamsung chawisangtu a pan ding uh a nawp thu a gen hi. Chun, Under-17 Football World cup ah Manipur a pat player 8 India min ah kihel ding te le dawisakna a lan hi. Asian Badminton Championship 2017 (Under-15) ah pang ding player 4 te chu -Punshiba Yenkhom of Kakching Mayai Leikai; Maisnam Meiraba Luwang of Sega Road; K. Dingko leh Kh. Manjit of Ningthoukhong Ward No. 12 & 13 te a hiu.

ADC member leh DLO te’n joint meeting nei

Kangpokpi, Oct. 4 *(Nisin Thuhiltu)* : Autonomous District Council Hall, Kangpokpi ah tuni’n Kangpokpi District ah kivaihawmna hawitak leh kituptak a um ding dawina ziak in District Level Officer te leh Sadar Hills ADC member te’n Joint Meeting a nei ui.
SH-ADC Chairman Haokholal Hangshing in a thugenna a chun, Manipur (Hill Areas) District Council Act passed ah um himaleh thuneina a hiding gual tak ah piak hilo a hidan uh taklang kawm in Manipur ah ADC te function dan chu government department khat sang ah le hawizaw theilo a hidan a gen hi. T. Ranjit Singh, DC/Kangpokpi in district administration in district sung ah panlakna chi chuam chuam um te taklatna a nei a, district khantona ding ah panlak khawm chiat ding pawimaw a hidan a gen hi. Zia hun matna a chun, elected member te leh DLO te’n interaction leh discussion session le a nei ui.

State cabinet in Mission for Economic Empowerment of Traditional Artisans/Craftsmen chiapi ding ah lemsa
Imphal, Oct. 4 *(Nisin Thuhiltu)* : Manipur Chief Minister Nongthombam Biren Singh chairman hina nuai ah tuni’n Manipur State Cabinet in state sung ah khutthiam thilbawl mite (traditional artisans/craftsmen) te support bawlna ding ah Mission for Economic Empowerment of Traditional Artisans/Craftsmen (MEETAC) chiapi ding in lemsakna a nei hi. Proposed sub-mission chu global standards tawh kituak ah state sung ah traditional crafts/arts sector masawnna ding ah panlak ding ti a hia, zia a pat chu economy siam hawi ding ti le a hi. May 3, 2017 ah cabinet lemsakna umsa dungzui ah State Mission on Employment, Housing and Drinking Water for Each Household by 2022 nuai ah sub-mission chu chiapi (implement) hiding a hi. Textiles (handicrafts/handlooms), pottery, cane & bamboo crafts, jewellery (gold and non-gold), reed craft, stone carving, wood carving, dolls & toys, block printing, terracotta, hand embroidery (Zari etc) leh tribal arts/crafts etc te chu sub-mission cover sak ding ah list kisiam item te lak ah pansak a hi.

Department of Water Resources, Manipur in revenue village 91-A Lamphelpat ah tui (water) lam thil masawnna ding ah a mat ding gam (land) 393.64 acres lak ding ah proposal um le lemsakna a nei a, a chiata December 18, 2016 ni ah Khurai Heikru Makhong, Imphal East District ah mipi buaina ziak ah nei leh go suksiatpiak ah um mi 409 te compensation piak ding in lemsakna a nei hi. Behiang ah police station kawina ding ah gam (land) chawk ding in le lemsakna a nei a, Mantripukhri, Imphal East District ah State Guest House leh Minister leh official te residential complex sakna ding gam chawk ding le lemsakna a nei hi.

Cabinet in gam chawkna ding tawh kisai ah general guideline siam ding leh Direct Purchase Committee mang ah gam chawkna thil chiapi ding in guanggalna a nei a, kum 2018 sung ah ni 24 chu General Holidays hiding leh ni 17 chu Public Holidays ding in lemsakna a nei hi. Manipur Waqf Regulation, 2017 kisiam le hawisa a hidan taklang kawm in Cabinet in MHS Grade-II (Allopathy) esignation chu MHS Grade-II (AYUSH) ah a min san (re-designation) bawl ding in lemsakna a nei a, Additional Public Prosecutor-cum-Additional Government Advocate (High Court), Manipur designation chu Additional Government Advocate (High Court), Manipur ah san ding in lemsakna a nei hi. Chuleh, State Cabinet in state sung ah Pradhan Mantri Kaushal Vikas Yojana (PMKVY) scheme lawting tak ah chiapi a hitheina ding ah a pawimaw staff guatbe/lakbe ding in thupukna a siam hi.