Nisin Thuhiltu – 25 September 2017

User Rating: 0 / 5

Star InactiveStar InactiveStar InactiveStar InactiveStar Inactive
 

YPA Lamzang Unit hawnna nei

Lamka, Sept 24 *(Nisin Thuhiltu)* : Young Paite Association (YPA) Lanva Block mapuina’ tuni sunnung dak 3:00 in Lamzang Khua ah YPA Lamzang Unit hawnna a um hi. Hun matna chu Liankhanmung Hatlang, Assistant Secretary, YPA Lanva Block in amapui a, Khailianthang, President, YPA GHQ in Unit thak hawnna nei in, T. Jamsonggin, YPA Lanva Block in Unit hawn thak ah um vaipaw ding te kitiamsakna nei in Pastor Ginkhanthang, Local Pastor, EBCC Lamzang in pauchap piakna a nei hi. Hun mat sung in, S. Hauzakhual, President, YPA Lamzang Unit, Sumpi Hanghal, President, YPA Lamka Block, S. Manlian, President, YPA New Lamka Block leh Cin Ngaih Pau, Chairman, CEC, YPA GHQ te’n thugenna a nei ui. YPA Lamzang Unit ahileh 1997 vel a pat puksia, YPA Lanva Block hawn thak ah a um tawh kitawn ah sukhin thak ah um a hi. Unit sung in innkuan 38 vel um in a kigen hi. Unit hawn thak ah um chu Block zosia’n phung vukna nei in thil piak chuam chuam piakna le a nei ngal ui. Thipiak piak ah um te a hileh YPA Lanva Block in Tudal 3, Blecha 2, longkhawl 1, thingpi awmna ding belpi khat leh no 120, YPA Pearsonmun leh Bungmual Unit in no Dozen 4 gel, YPA New Lamka Block a pat Parachute khat leh YPA Flag 3, YPA Khominthang Unit a pat Donation Box 1, YPA Kanaan Unit a pat chutna 5, YPA Vaalveng Unit a pat Khuang khat, Ketli khat, Thingpi no 120 leh sum Rs, 500, YPA V. Munhoih Unit a pat chutna 3, YPA Dorcas Veng Unit a pat Ketli, Thingpi Bel, Thingpi No 120 leh Rs. 500, YPA Elim Veng Unit a pat Rs. 1,000, YPA Zion Veng Unit a pat Rs. 1,000, YPA Hebron Veng Unit a pat chutna 3, YPA Vengnuam South Unit a pat chutna 5 a hia, zia van te chu President, YPA Lamzang Unit khut in a pedawk vek ui. YPA Lamzang Unit Vaipawte ahiu leh; S. Hauzakhual, President, S. Ginkhansuan, Vice President, G. Goukhanmuan, Secretary, Pausonlian, Assistant Secretary, T. Thangkhanson, Finance Secretary, G, sumliankap, Treasurer leh Member ding in Thangzasiam, Thonglianmang, Puuminlun banah Adviser ding in V. Ginzalian, S. Khamlian leh H. Vumzathang te guat a hiu.

DC/CCpur mapuina’ Biometric Enrolment tawh kisai genkhawm ding
Lamka, Sept 24 *(Nisin Thuhiltu)* : Mr S Thienlaljoy Gangte, Assistant Commissioner for Deouty Commissioner Churachandpur in tuni thusua a bawlna a chun, Shyam Lal Poonia, IAS, Deputy Commissioner in mapuina’ 25th September 2017, 12:00 PM leh Conference Hall, Deputy Commissioner Office, Churachandpur District ah a chiatha zing Biometric Enrolment/Aadhar Generation dinmun et-thakna leh Biometric Enrolment masawnna theina ding ah action plan ding genkhawmna um ding hin a taklang a, Churachandpur District sung ah Sub-Divisional Officer, District Level Officer, District Manager zosia pangkim chiat ding in hiatsakna leh chialna a bawl hi.

Andrew Paoginlen Lotzem in kipakpina nei

Lamka, Sept 24 *(Nisin Thuhiltu)* : Mr Andrew Paoginlen Lotzem s/o Lt. Colonel Daniel Lotzem & Kim in 18 September 2017 ah kipan Under-15, All India National Badminton Ranking Tournament, Tirupur, Tamil Nadu ah Bronze Medal a lakna chung in tuni’n Kuki Inpi Meghalaya leh Kuki Students' Organisation in kipakpina a nei ui. Hiatthei khat chu, Mr Andrew Paoginlen Lotzem in tournament, quarter final hun in a kimai tuapi Navyaranjan Das of Assam chu 21-23. 21-14. 21-12 in a zo a himaleh Semi final ah Pranav Gambhan of Telangana state chu 23-25.21-15.21-11 in a lel hi. Mr Andrew Paoginlen Lotzem ahileh Meghalaya State min ah kihel hi a hia, ama tunna tiang tungzo Meghalaya leh Manipur a pat um nailo in a kigen hi. Chuleh, Mr Andrew Paoginlen Lotzem hi International level ah India min in Serbia in a la kihel a, Silver Medal a la sang hi.

32Assam Rifles in Khawmpi kithuapi
Dimapur, Sept. 24 *(Nisin Thuhiltu)* : Evangelical Baptist Convention, Karbi Anglong Mission Field nuai ah Kochuam pali(4)- Dimapur, Kohima, Diphu leh Manja ten September 22-24, 2017 sung ah EBCC Compound, Burma Camp Dimapur mun ah Bial Khawmpi thumveina amatna ua chun, 32 Assam Rifles ten malzin giakna ding Mattress banah plastic chair tamtak a matsak banun tent pani ava siampiak uh a hi. Zia gual ah khawmpi a kithuapina ziak un 32AR te chung in EBCC, Dimapur in kipakthu a puang hi. EBCC, Karbi Anglong Mission Field Bial Khawmpi ahileh September 22, 2017 nitak ah kipan a hia, khawmpi hun sungin Upa T. Paukhansiam, Missions Co-Ordinator in thugenna hun a mang a, khawmpi a chun, Bial sung ah Baptist Youth Fellowship, Baptist Dorcas Fellowship leh Bial Working Committee puitu ding kitelna le anei ngal ua, teltin ah umte namdetna leh pauchap piakna Rev. M. Zalian, Field Secretary, Karbi Anglong Mission field in a nei hi. Zia hun ahin Kohima, Diphu, Manja leh khawmpi zintuntu Dimapur kochuam apat khawmpi palai leh mipi tamtak ten a uap uh a hi.

Confernece-cum- Raising Day mangzo
Lamka, Sept 24 *(Nisin Thuhiltu)* : South Lamka Presbytery Youth Fellwship (SLPYF) in Confernece-cum-M. Tanglian PCI (R) Raising Day matna a nei uh tuni’n a mang zo ui. Conference hun ahileh Rev. Goukhansiam, Adviser, SLPYF in September 22, 2017 ni ah a hawn a hia, tuni’n Rev. Khen P. Tombing, Chief Coordinator, PCI (R) in Kum 10 tin kizikna suangphu hawnna leh Pathian’ thutak genna a nei hi. Sunnung hun in Contest Department mapuina Indoor Item chuam chuam - Drama, Solo, Quartet, Double Preaching, Bible Action in kidemna a nei ua, nitak kikhop hun ah Rev. Khamlianmang, Youth Coordinator, PCI (R) in Pathian’ thutak genna a nei in Pastor Paukhansiam, Moderator, SLPYF in Conference khakna a nei hi.

Chandel ah dakkal 48 sung bandh puan ah um
Imphal, Sept 24 *(Nisin Thuhiltu)* : Chandel district ah Naga Chiefs Association leh Kuki Chief Association in Spetember 25, 2017 zan a pat dakkal 48 sung Chandel district in bandh a puang hi. Naga Chief Association Chandel in thusua a bawlna a chun, September 22 ni ah Zion Village Authority Office Chandel ah Naga Chief Association Chandel, Kuki Chiefs Association Chandel member te leh Chandel ah Job Card holder te’n meeting a nei hun ua MGNREGS 2016-17 nuai ah ni-khawtha a hiding gual tak ah a mulona chung ua Manipur Government kiang ah thil umdan a vel vel ah a tuttak nung ua sit-in-protest nei ah Manipur Chief Minister kiang ah memorandum piakna nei maleu tuni tiang ah panlakna bangma a umlo ziak ah dakkal 48 sung Chandel district bandh bawl ding ah lemsakna um in a gen a, bandh hun sung ah Press, electricity, PHED, Medical, religious Service, Military force leh School te thakawl hiding in a taklang hi.

Lampi pam ah ni’n pai haisan ding a hi: Minister Karam Shyam
Imphal, Sept 24 *(Nisin Thuhiltu)*: CAF & PD Minister Karam Shyam in tuni’n Lilong Nagar Panchayat ah Panchayat Chairperson Lalamni leh Vice Chairperson Sanatomba te uapna tawh Swachhta Hi Seva campaign hawnna a nei hi. Ama’n a thugenna a chun, India Prime Minister Narendra Modi in India gamsung sukthianthona ding ah “Clean India” mission a pat daw dungzui ah mipi te’n kim leh kiang sukthian zing ding chu thil pawimaw mama hin a gen a, Manipur mi te’n lampi pam dung ah ni’n pai ngaina gual ah a chiapiu chu haisan ding pawimaw in a gen hi. Lampi kiang tuam ah ni’n kipai thang zengzung kiti gam khantona um mipi te’n chiapi lo uh hin le a gen a, “Clean Manipur” a lawtin theina ding ah panla chiat ding in mipi te chialna a bawl hi.

Indo- Naga dialogue chung ah pauchap khawmna
Imphal, Sept 24 *(Nisin Thuhiltu)* : Council of Nagalim Churches (CNC), General Secretary, Rev. Seksim Kasar in thusua a bawlna a chun, Indo- Naga Political dialogue sukven pai a hi theina ding ah September 24 ah kipan ding, tha 1 sung pauchapkhawmna’ ah a kisaipi zosia pangkim chiat ding in chialna a bawl a, “tu ah I lawsap ua leh kum 1000 zaw leh le ki lawting talo ding a hi” ti tawh tuhun ah lemchang thasuaklo teina ding ah pauchapna panla chiat ding in Nagalim member zosia chialna a bawl hi.

Min Biswajit in PMAY-G implementation chungchang hilchian
Imphal, Sept. 24 *(Nisin Thuhiltu)* : Manipur Rural Development & Panchayati Raj Minister Thongam Biswajit Singh in tuni’n ama official quarter ah thuthak lakhawm mite kimupi in, Pradhan Mantri Awas Yojana-Gramin chung chang ah ngawna um te a hilchian hi. Mr Biswajit Singh in State sung ah Pradhan Mantri Awas Yojana-Gramin chiapi ding tuktanna bangma umlo a hidan taklang kawm in ngainep hilo in a gen a, beneficiary list re-verification chiapi a hiziak ah kituptak ah scheme chiapi hithei nailo hin a gen hi. FY 2016-17 ding ah beneficiary 9740 um a hidan taklang in thiangtho tak leh full transparency tawh Pradhan Mantri Awas Yojana-Gramin scheme chiapi hiding in a gen hi. Beneficiary selection ziak ah hun sawttak lut hin a gen a, Socio Economic Caste Census 2011 dungzui ah beneficiary list siam ah um, verified bawl thak kit ah um a hidan a gen hi.Verification Process zawthian vang hita in a gen a, September tha tawp tiang ah beneficiary list siamna zawthian hiding, SECC, 2011 ah pangkhalo khenkhat te’n Appellate Committee ah application file ah kum kit beneficiary list ah pansakna ding ah panlakna nei un le a gen hi. Minister Biswajit in Direct Benefit Transfer ah beneficiary te chu October first week leh fund, 1st instalment sanctioned hita ding in a gen a, fund transfer bawlna chung ah Transparency chiapi hiding in a gen hi. Pradhan Mantri Awas Yojana-Gramin kiti fully government sponsored scheme a hi dungzui ah government in private firm taw fund release bawlna ding ah kizawpmatna bangma neilo in a gen a, PMAY-Urban chu municipality areas ah chiapi hiding, PMAY-G ahileh rural leh hill areas ah chiapi hiding in a gen hi.

‘Night Plaza’ hawn hiding: Minister Th. Shyamkumar

Imphal, Sept. 24 *(Nisin Thuhiltu)* : MAHUD & Town Planning Minister Thounaojam Shyamkumar in Conference Hall, Old Secretariat, South Block, Imphal ah tuni’n Press Conference ah ‘Night Plaza’ hawn hiding a hidan taklatna a nei a, state traditional culture dawpkang hileh Imphal city ah insung hinkhua damthei chuam ding hin a gen hi. Manipur mi leh tourist te kal a hawi zawk sem theina ding ah State Government in 2nd October, 2017 a pat Kangla moat (eastern half of NH-2 from Raj Bhavan turning to PWD turning) ah ‘Night Plaza’ hawng ding hin a gen hi. ‘Night Plaza’ chu Kigini leh Pathianni nitak lam dak 7:00 -10:00 sung ah hawn hisek ding, entry fee umlo ding hin a gen hi. Manipur Sangai Festival hun ah ‘Night Plaza’ chu ni 10 sung a kizawm ah kihawng ding hin a gen a, ‘Night Plaza’ stalls ahileh department in guidelines a siam tawh kituak ah hawn hiding in a gen hi.

Additional Chief Secretary (MAHUD), IAS, Dr. J. Suresh Babu in ‘Night Plaza’ um dingdan a genna a chun, ‘Night Plaza’ stalls chu category 2 ah kikhen ding – Sale & Entertainment leh Food hiding in a gen a, temporary/portable stall operator te’n stalls a kihawnna ding ua bangkim a kipuakdaw ding uh hin a gen hi. MAHUD Department in project, arrangement leh stall allotment tawh kisai ah mawpuakna la ding leh Town Planning Department in recreational activity, entertainment programmes leh live concert mawpua ding hin a gen hi.

Panpi ngai te a pawimaw hun ua panpi thei mi chu mihausapen a hi: Th. Radheshyam

Imphal, Sept. 24 *(Nisin Thuhiltu)* : Ibotonsana Girls Higher Secondary School, Imphal ah tuni’n Bharat Vikas Parishad, (BVP) Manipur State saina’ First State Level Annual Conference of Bharat Vikas Parishad, (BVP), Manipur kiti mat in a um hi. Zia hun chu Education, Labour & Employment Minister Thokchom Radheshyam Singh in khuallian hina tawh a uap hi. Ama’n a thugenna a chun, panpi ngai te a pawimaw hun ua panpi thei mi chu mihausapen a hiu ti’n a gen a, mihausa taktak ten panpi ngai leh tawsawt ngai te hemil sek uh hin a gen hi. Society a phatlam ah kisan theina ding ah khawvel in mi khuatua -thiam, hiatthiamna nei mi ahiloleh thilpha bawl chimchaklo mi te pawimaw in a gen a, Bharat Vikas Parishad, (BVP) Manipur in panpi ngai te panpina ding ah panlakna a nei sek chu kipakpi mama hin a gen hi.Khantona ding leh masawnna ding ah government in a chiapi – “Sabka Saath Sabka Vikas” chu thil pawimaw mama hin le a gen a, gamsung khantona kiti chu mizosia kibang tak ah a um thei hun hun ah um theipan ding in a gen hi. Zia hun matna a chun, National Additional Secretary General North East BVP Swadesh Ranjan Goswami in le thugenna a nei a, Regional Patron BVP, North East Dr. Rajendra Singh, President BVP, Manipur B. Biramangal Sharma te’n le hun matna a uap ui. Bharat Vikas Parishad, (BVP) ahileh kum 1963 ah Lala Hans Raj leh Dr. Suraj Prakash te’n Swami Vivekananda chiapi leh thuhilna te a pat India masawnna ding leh khanto theina ding ah a la phudaw uh a hi.

UPF, Mega Marathon ah mi a 1000 ah sim pang
Imphal Sept 24 *(Nisin Thuhiltu)* : United Peoples’ Front (UPF) Manipur saina’ tuni’n 11th Mega Marathon (22 kilometer) a um hi. Marathon a chun, mi 1000 ah sim a pang ua, RK Ranendrajit, Chairman Sport’s movement committee of Khuman Lampak Main Stadium in flag-off bawlna a nei a, Laithangbam Ranjan Singh of Sunu Siphai, Bishnupur District leh Nongthombam Chaoba Devi of Luwangshangbam te’n men’s leh women’s title a dawng ui. Men catergory ah Somong Raman leh Khundongbam Romajit Singh te chu 2nd leh 3rd in a pang ua, Women catergory ah Konsam Bibicha Devi of Manipur Police Sports Club leh Azima of Lillong – te chu second leh third in a pang ui. First te chu cash prize Rs 40,000, Second Rs 30,000 leh Third Rs 20,000 piak in a um ua, 4th -15th place tiang ah pang te chu cash prize Rs 3000 chiat piak a hiu. Prize distribution function chu Forest & Environment Minister Th. Shyamkumar leh UPF president lui Kh. Ratan in khuallian hina tawh a uap ua, UPF President S. Ratankumar in prize hawpdawna hun amapui hi.