Nisin Thuhiltu – 05 September 2017

User Rating: 0 / 5

Star InactiveStar InactiveStar InactiveStar InactiveStar Inactive
 

One Day Discussion nei

Lamka, Sept. 4 *(Nisin Thuhiltu)* : All Manipur Recognized Private School nuai ah Coordinating Committee of Recognized Private School, Manipur siana in tuni sunma dak 10 a pat Dorcas Mini Auditorium Hall, New Lamka ah ‘One Day Discussion On Elementary D El. Ed. Training under NIOS & The Manipur Private School (Registration & Regulation) Bill 2017’ kiti nei in a um hi. Zia hun a chun, Churachandpur district sung ah recognized private school chuam chuam a pat Headmaster, Headmistress leh Principal banah computer staff te a pang ua, Coordinating Committee of Recognized Private School a pat Joy, Secretary pang in member 4 ziltilna a piau hi. India Government in 2019 tiang ah student te hilding teacher te’n a niam pen ah Elementary Education ah Diploma course tiang bek a zaw ding uh a ti tawh kitawn ah training chu a nei uh a hia, resource person te’n D.El.Ed. Untrained teacher tawh kisak ah NIOS nuai ah online ah min khumlut ding dan leh form fill up ding dan a ziltil u’i. Zia hun ma a chun, state sung ah Private School te’n a zui ding ua Manipur government in Bill thak a passed, The Manipur Private School (Registration & Regulation) Bill 2017 tawh kisai ah private school te’n a dawilona ziak uh ti te genkhawmna le a nei ui.

Aug. sung ah malaria 20 leh PF 5 mudawk
Lamka, Sept. 4 *(Nisin Thuhiltu)* : Malaria Department, Churachandpur in August 2017 sung ah Malaria vei hi ding ah muanmaw thisan sample 3,833 test a bawlna lak ah Positive mi 20 leh Plasmodium Falciparum (PF) mi 5 a mudawk ui. Malaria Department, Churachandpur in SMO, Regional Health & Family Welfare, Imphal leh Director, Health Services, GoM ah report piak dungzui in August 1 - 15, 2016 sung ah malaria vei hi ding ah muanmaw mi 1,269 te thisan test lak ah Positive 7 leh PF 2 mudaw ah um in August 16 - 31, 2017 kikal ah thisan 2,564 test na lak ah Positive 13 leh PF 3 a mudawk hi.

Assistant Professor muthak
Lamka, Sept. 4 *(Nisin Thuhiltu)* : Dr Elizabeth Kimneihat Vaiphei d/o T.Manga Vaiphei, Ex-MLA of Langgol, Manipur in National Institute of Mental Health & Neuro Sciences (NIMHANS), Bengaluru ah Assistant Professor of Psychiatric Social Work a muthak hi. NIMHANS hi India Government a ding ah Mental Health leh Neuro-Sciences ah No.1 hi ah hiat a hi. Dr Elizabeth ahileh St. John's Medical College ah Associate Professor semlai a hia, International Level ah seminar pia -South Korea, Barcelona, Singapore a le ala chiakha ngai hita a hi.

Office building thak hawnna leh latna nei
Lamka, Sept. 4 *(Nisin Thuhiltu)* : MELC Kochuam in Zomi Colony ah Office Building ding a bawl chu zawthiang a hi tawh kiawn in tuni zingkal dak 7:00 in a hawnna leh latna a nei u’i. MELC Office Building thak a hileh Upa V Lawmsang, Moderator, MELC in a hawnna leh Pathiang kiang ah latna a nei hi. Office hawn zaw ah a sung ah hun saulo matna a nei ua, zia hun a chun Rev (Retd) Dr Hangminthang, Bishop MELC in office building bawl dan tawh kisai report piakna a hi. MELC Office Building thak hawnna leh latna hun chu MELC kochuam a pat puitu hunkhawp in a uap u’i.

ZEO staff Pension te thâkna nei

Lamka, Sept. 4 *(Nisin Thuhiltu)* : Zonal Education Officer (ZEO), Churachandpur nuai ah sem leh tukum ah pension staff 4 thâkna tuni’n ZEO Office huangsung ah nei in a um a, M. Thangzalian, Head Clerk in Pensioner te mel lakna a nei a, pensioner te pakkhi awsakna a um ban in, N. Chingkhei Singh, MES, ZEO Churachandpur in thilpiak piakna a nei hi. Zia hun a chun, pensioner te, ZEO leh T. Goukhomang, Former ZEO banah mimal khenkhat in thugenna hun a mang u’i. Tuni thâk ah um te chu - H. Pauzachin, MES, H. Amzatuan, AI of School, Paukam Tonsing, Head Clerk leh Joysi Luankhoching, Senior Accountant a hiu. H. Pauzachin in kum 39 a sep nung in February 28, 2017 a khan a pension a, H. Amzatuan in le kum 39 ma a sep nung ah March 1, 2017 a khan a pension a, Paukam Tonsing in kum 37 sem in May 31, 2017 ni’ pension in Joysi Luankhoching le kum 37 a sep nung ah August 31, 2017 ni’n a la pension hi.

9th Seikam Memorial Football Tournament
Lamka, Sept. 4 *(Nisin Thuhiltu)* : 9th Seikam Memorial Open Football Tournament chu Kholmun Youth Club saina nuai ah a hung tung ding September 23 leh kipan ding a hia, zia na ding ah entry form chu September 9 a pat mu thei ding a hi. Form a hileh Hoinu Pharmacy, Tuibong Bazaar leh Kholmun Youth Club Office ah Rs. 100 piak ah lak thei ding a hia, September 20, 2017 tiang ah piaklut thei ding a hi. Tournament ah pang nuam team/ club te'n entry fee Rs. 3000 + 1000 (security) a piak uh ngai ding a hia, prize a hileh Champion te a ding Rs. 70,000 + Trophy + Certificate banah Runners-up te a ding Rs. 50,000 + Trophy + Certificate hi ding a hi. Individual award ah Best Player, Top Scorer leh Best Keeper um ding a hia, zia award te chu Rs. 3,000 + Certificate in zui ding a hi.

PTC in Assembly tawh kisai ah hiatsak
Lamka, Sept. 4 *(Nisin Thuhiltu)* : Paite Tribe Council (PTC) GHQ in 57th General Assembly -cum- Election 2017 a neina ding tawh kisai ah thusua a bawlna a chun, PTC GHQ, CWC in August 30, 2017 ni’ a thupuk dungzui ah 57th General Assembly -cum- Election 2017 chu Thanlon Sub-Division huapsung, Bukpi khua ah neih ding ti a hi tawh kitawn ah a chiakhawm ding khawmpi palaite a uap nuam mipite chiana ding gari ngaitua hipan ta ahi dan puang kawm in a chia nuam tapo kisalawk ding leh Block te’n amau nuai ah um unit tin te hiatsak ding in le a dawn hi.

Teachers’ Day mang di
Lamka, Sept. 4 *(Nisin Thuhiltu)* : Zing, September 5 Teachers’ day a hi tawh kitawn in district sung ah government leh private school te’n mang ding a hiu a, District Level ah Zonal Education Officer (ZEO), Churachandpur saina in Synod Hall, IB Road ah District Teachers’ Day lawpna um ding a hi. Zia hun chu Shyam Lal Poonia IAS, DC/ Chairman, District Educational Board in chief guest hina tawh uap ding a hia, hun mat sung a chun District sung ah Government School a pat nâ sem hawipen Teacher 4 - Sunita Devi Science Graduate Teacher, Bijang Loubuk Junior High School; L Birachandra Singh, Sceince Graduate Teacher, Sagang High School; K Nityaichand Singh, Headmaster, Ningthiching High School leh Thangkchinkhup, Headmaster, Hiangdung Aided Lower Primary School te’n pakchatna lekha sâng ding a hiu.

Monthly Review Meeting um di
Lamka, Sept. 4 *(Nisin Thuhiltu)* : District AIDS Control Officer (DACO), Churachandpur mapuina nuai ah a hung tung ding September 8, 2017 sunnung dak 1:00 leh District AIDS Prevention & Control Unit (DAPCU) nasepna tawh kisai ah Monthly Review Meeting um ding a hia, meeting a chun NACP, Churachandpur nuai ah Counselor leh DEO, ART Centre, Targeted Interventions NGO ah Project Manager te zosia leh DRP-LWS banah DPM, NHM Churachandpur te thawn lo ah pang ding ua hiatsak a hiu.

Super Division League khakna um di
Lamka, Sept. 4 *(Nisin Thuhiltu)* : Churachandpur District Sports Association (CDSA) saina nuai ah (L) T. Lianboi Simte Memorial District Super Division League -2017 khakna (closing program) 9th Sept., 2017 (Saturday) leh Peace ground, Tuibuong, CCpur ah nitak lam dak 1:00 ah um ding a hi. Zia hun chu V. Hangkhanlian, Minister (Agri, Vety & Animal Husbandry), GS Haupu, MLA & Chairman MANIREDA, Hrila Hmar, EM ADC/CCpur te’n khuallian hina tawh uap ding a hiu a, final match ah United Khawzim Brothers (UKB) leh Headquarter Sports Club (HSC) te final kihel ding a hiu.

A 41 veina Khawmpi lian um di
Lamka, Sept. 4 *(Nisin Thuhiltu)* : A hung tung ding September 7 - 10 sung, EBC Gospel Centenary Hall, New Lamka ah EBC Dorka Khawmpi lian a 41-veina um ding a hia, September 7 nitak dak 6 leh Rev Paukhanmang Guite, Director of Ministries in hawng ding leh September 10 nitak kikhawp hun ah Rev V Thangkhangin, Director of Missions in khawmpi khakna nei ding a hi. Khawmpi hun sung ah Rev S Vung Minthang, General Secretary, EBC in speaker hina tawh uap ding a hia, Rev Kumam Suresh Singh in Phillipi Laibu ah pansa kawm in bible study mapui ding a hi. Khawpi ah Seminar le um ding leh zia hun a chun thupi chuam chuam mang ah Dr Niangsangching, Lily Tombing, Muani Tombing, Vungkhawmching, Manzavung Thomte leh Lalhlimpui te’n ziltilna pia ding a hiu. Chun, buaina chuam chuam neite a ding ah counseling um ding a hi.

Numei te’n a thuneinau a mutheina ding ua panlakna a nei ding: Governor

Imphal, Sept. 4 *(Nisin Thuhiltu)* : Manipur Governor Dr. Najma Heptulla in numei te’n a thuneinau a hi gual tak ah a mutheina ding ua panlakna a nei ding leh a hangsannau a pat justice a mu ding a hidan Durbar Hall, Raj Bhavan, Imphal ah tuni 35mm ah sau Manipuri film 'Nangna Kappa Pakchadey – Tears of a Woman' kiti sua ah um a et nung in a gen hi. Zia film chu PK films5th production a hia, Dr. Makhonmani Mongsaba director hina nuai ah shooting ki bawl, Thouyangba leh Thoungamba te’ producer hina nuai ah kisiam dawk a hi. Chuleh, a story chu famta Maharaj Kumari Binodini Devi in a la zika hi.

Minister Biswajit in a kitup theipen ah panla ding ah department official hiatsak

Imphal, Sept. 4 *(Nisin Thuhiltu)* : Commerce, Industry & Textiles Minister Thongam Biswajit Singh in tuni’n Conference Hall, New Secretariat, Imphal ah Commerce & Industrys department official te monthly review meeting a neipi a, zia hun a chun, te chu department official te Moreh ah trade and commerce, status report pelut ding in hiatsakna a bawl hi. State sung ah Act East Policy lawtin theina ding leh Industry lam ah masawn theina ding ah panla chiat ding in le chialna a bawl a, official te chu Moreh Border market ah van ki pawlut leh ki pawdawk te chu kituptak ah check bawl ding in hiatsakna bawl hi. Pradhan Mantri Employment Generation Programme, KISAN SAMPADA kituptak ah implement theina ding leh Industrial Estates, Manipur Food Industry Corporation Limited function hawi theina ding tawh kisai le genkhawmna a nei ua, Khadi leh Village Industry Centres, Khadi banah Village Industry Boards leh District Industry Centres te chu PMEGP implement bawlna mat dingdan le a gen ui. Chun, kituptak ah beneficiary backlog list te enzui ding in official te a hiatsak a, KISAN SAMPADA tawh kisai ah awareness chiapi ding in le thupiak a bawl hi. Chuleh, scheme nuai ah provisions leh benefit um te chu h mass media – newspapers ti te ah advertise bawl ding leh mipi te hiatthiam theina ding pen ah panla chiat ding in a hiatsak hi. Zia meeting chu Director M. Luikham District General Managers leh district zosia department official te a pang ui. Commerce & Industry department official te meeting a neipi zaw in, Handlooms & Textiles Department official te monthly review meeting a neipi kit a, zia hun a chun, central sponsored schemes chiapina ding ah guidelines te taklatna a nei hi. A hun tak ah Utilisation Certificates (UC) piaklut a hilo ziak ah Centre a pat department a ding fund tawm a hidan te taklang kawm in official te’n scheme guidelines ahi ding gualtak ah zui dik leu Utilisation Certificates (UC) piaklutna lam ah bangma buaina umlo ding a hidan a gen hi. Official te chu Handloom & Handicrafts Delivery Scheme kitutap tak ah chiapi ding in Minister Biswajit in thupiak a bawl a, government in pat (yarn) 50,000 stock a nei te chu puankhawng mite kiang ah hawpdaw hiding leh a puankhawng daw teu nung chawk kitna ding ah Rs 1 crore um in a taklang hi. Official record dungzui ah August 7, 2017 tiang a khah puankhawng mi total 2236 registered ah um, Handloom & Handicrafts Delivery Scheme nuai ah department target dungzui ah enroll leh register kibawl puangkhawng mi 5000 um in a gen hi. Minister in official te chu Solar Home Lighting System nuai ah hawpdaw nailo ah um solar lamp te chu a vaima theipen ah beneficiary kiang ah piakdawna nei ding a hiatsak a, State Level Project Committee in NERTPS nuai ah Cluster Development Projects 80 chiapi ding ah lemsakna nei a hidan a gen hi. Zia dungzui a chu NHDP nuai ah Block Level Cluster 20 um, Mega Handloom Clusters leh Handloom Parks nuai ah cluster 2 gel um leh MSME nuai ah Handloom Cluster 20 um in a gen hi. Minister Biswajit in officials te chu sum muta leh munailo beneficiary te minlist pelut ding in le hiatsakna a bawl hi. Meeting a chun, Principal Secretary (Textiles, Commerce & Industries) L. Lakher, Director Lamlee Kamei, Project Manager leh district zosia department official te a pang ui.

Playground te etkawl hawi pawimaw: Minister Radheshyam

Imphal, Sept. 4 *(Nisin Thuhiltu)* : Education, Labour & Employment Minister Thokchom Radheshyam Singh in tuni’n khuallian hina tawh Tourangbam Leikai Ground, Heirok ah Tourangbam Leikai Youth Club (T.L.Y.C.) saina’ 3rd District Level 7 A Side Under 13 Football Tournament – 2017, Closing Function a uap a, ama’n a thugenna a chun, playground te etkawl hawi ding leh khangthak te sports lam ah a thnawpnau sukpitin theina ding ah panlak pawimaw a hidan a gen hi. Sports chu education gual ah ngaikhawk ding leh naupang te a phallo ah a chialona ding ua panlak ding hin a gen a, state in sports lam ah thiamna hau mama in a gen hi.

NSCN (K) in peace talks ding ah guanggalna nei nailo
Kohima, Sept. 4 *(Nisin Thuhiltu)* : Government of India leh NSCN (I-M) in kihona nei ah kinawptuana chi chuam chuam nei maleu Naga insurgency sukbeina ding ah Khaplang faction (NSCN-K) in peace process chiapi ding ah lemsakna nei nailo a hidan The Asian Age in a taklang hi. Myanmar pansa banned NSCN-K top leader khat in The Asian Age tawh kihona a nei hun ua, peace process chiapi ding ah sections chuam chuam a pat chialna bangma a mu nailo bak ua, amau panlakna ziak ah peace process in final settlement umsak thei chuamlo ding a hina chung ah peace process chiapi ding ah guanggalna nei lo a hidan uh a gen hi. Hiatthei khat chu Naga civic organisations chuam chuam - Naga Mothers’ Association, Naga Hoho leh Eastern Nagaland Peoples’ Organisation in NSCN (K) chu talks process ah panla ding ah chialna a bawl zing bak ah Nagaland chief minister T.R. Zeliang in le a kisaipi “stakeholders” zosia chu final agreement um theina ding ah panla chiat ding ah chialna a la bawl a hi. Kum 1999 a pat NSCN (I-M) leh government in official flag chuam, constitution chuam, dual citizenship leh Assam, Manipur leh Arunachal Pradesh huap ah Naga-inhabited areas zosia physical integration a um ding ti panna demands 33 chung ah kihona a neipat hita ah taklat in a um a, Naga insurgency movement — kum 60 lam chiapi a hitak nung ah Government figures dungzui ah mi 3,000 in thina tuakta leh unofficial figure dungzui ah mi 50,000 te’n thina tuakta ti a hi.

Army recruitment training run sai

Moirang, 4 *(Nisin Thuhiltu)* : October leh Leimakhong ah Army Recruitment Rally a umna ding tawh kisai a, Army recruitment rally ah pangnuam te ding in Army te’n Moirang Police, Gandhi Memorial Club, Phubala leh Kwakta Youth Association te kithuapina tawh Seprember 3, 2017 a khan Bishnupur leh Churachandpur district in training run organize a bawl ui. Zia hun a chun, National Highway - Moirang leh Terakhongsonbi chuan in Ningthingching - Kwakta kikal in 10 km marathon a um hi.

Kângkal hawm

Tamenglong, Sept. 4 *(Nisin Thuhiltu)* : Senapati Brigade nuai ah Tamenglong Battalion in Kekru Naga village, Tamenglong district ah thokang puan (mosquito nets) 40 hawpdawna leh medical camp a nei ua, medical camp hun ah mi 150 te kiang in medical facility piakna a nei bawk ui. Chuleh, Senapati Brigade nuai ah Jwalamukhi Battalion in 16 Mile leh 17 Mile villages,Kangpokpi district ah solar lamp hawpna a nei ua, electric meivak kituptak umlo ahina chung ah villager te haksatna dawnzangkhai theina ding ah solar lamp chu a hawp uh hin a kigen hi.

Damlo etkawlna ah doctor leh patient kihomat pawimaw: CM

Imphal, Sept. 4 *(Nisin Thuhiltu)* : Chief Minister N. Biren Singh in tuni’n Jawaharlal Nehru Instituteof Medical Sciences (JNIMS) Auditorium ah Jawaharlal Nehru Institute of Dental Sciences (JNIDS) hawnna chu Chief Guest hina tawh a uap a, zia hun ah thugenna a chun, damlo etkawlna ah doctor leh patient hawitak ah a kiho mattua pawimaw leh nurse te’n patient innsung mite a thamuan ding uh hi’n a gen a, damlo te chu damdawi bep hilo ah thuhawi – thupha tawh le zen khawm ding hi’n a gen hi. State sung ah doctor leh paramedical staff te chu talent, skill leh innovative hawitak nei a hina’u a gamsung pumpi ah zâna chang uh hi’n a taklang hi. Chief Minister in a gen bena a chun, tu dinmun ah doctor leh paramedical staff te’n professional ethics a nei zing uh pawimaw a hina bak ah mawpuakna te sep pitin theina ding ah a kithuakhawm uh pawimaw hi’n a gen hi. Student leh patient te’n JNIMS leh JNIDS a del thei na ding ua minphatna pawimaw a hina ah faculty leh staff te’n institute minphat theina ding ah gunchu tak ah nâ a sep uh pawimaw hi’n a taklang hi. JNIMS ah semtu ding tasam a hi dan hiatpi hi ah puang kawm in official leh administrative staff te kiang ah institute in a mamaw te chu hawi tak ah gekhawm ding in a chial a, staff leh faculty kivât te chu hukdim hipai ding hi’n a gen be hi. JNIMS ah matchak hawitak tua zaw tak leh Neurosurgery Department chu function ta ding ahi dan puangdawk kawm in hawitak ah institute a function theina dingah JNIMS sakna leh upgrade na ding blueprint pelut ding in JNIMS administration te kiang in a dawn a, JNIMS ah Cancer Hospital siamdawna ding ah Detailed Project Report (DPR) chu suk fel hipai ta ding ti’n CM Biren in a gen hi. Biren in khang hung um ding te a ding ah napha sem ding ah kitiam ding in state mipite a chial a, kivaipuakna a kitupna ding ah government in mipi te a pat ngaidan mamaw zing hi’n a gen hi. Minister for Health & Family Welfare, L. Jayantakumar in a thugenna a chun, government in sum leh pai ah buaina leh taksapna maitua maleh kitup tak ah institute a function theina ding dan ngaitua zing hi’n a gen a, state ah healthcare service hawi zaw a um theina ding ah doctor leh paramedical staff te’n professional ethics a vawp zing uh ngai hi’n a gen hi. Manipur Development Society (MDS) ah sum chiadan a kitup lo na chung ah CM lui O Ibobi leh bureaucrat lui 5 chung ah FIR ziklut na tawh kisai ah Minister L. Jayantakumar in hialchetna a bawlna a chun, diklo tak ah fund mangtu hawl daw na ding hi ah taklang kawm in political party a hiloleh mimal chung ah phuba lakna ding ah bawl hilo hi’n a gen hi. JNIDS hawnna hun chu Parliamentary Secretary (Home) L. Susindro Meitei, MLA S. Subhaschandra Singh, JNIMS Director Dr. Th. Bhimo, JNIDS Principal Dr. M. Angou banah JNIMS ah faculty leh student te’n a uap u’i.