Nisin Thuhiltu – 27 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Haryana ah Dera Sacha Sauda sect te kiphinna ah mi 36 thi; 269 liam

Chandigarh , Aug. 26 *(Nisin Thuhiltu)* : Haryana, Panchkula leh state sung mun chuam chuam ah Dera Sacha Sauda (DSS) sect supporter te’n zani, 25 August 2017 ah CBI special court in rape case ah Dera Sacha Sauda sect chief Gurmeet Ram Rahim Singh thiamlo a chan dawilo ah kiphinna nasatak a nei hun ua, security forces te tawh kinawktuana leh suang ah kisetuana ah mi 30 in thina a tuak bak ua, mi 250 val in liamna a tuak nung un tuni’n le kiphinna a um zawm a, kiphinna nei pawl in public property tamtak a susiau kit ui. Thina tuak le kibelap in thina tuak mi 36 a tingto a, kiphinna a huaisiat diakna mun Panchkula ah Army te ki ko lut in security sukkhau in a um hi. Haryana DGP B S Sandhu in a genna a chun, thina tuak mi 36 te lak ah mi 6 te chu Sirsa a pat leh a dang 30 te chu Panchkula a pat mi hi ah hiat hin a gen a, mi 13 te hina hiatchian ah umta hin le a gen hi.

Dera Sacha Sauda nunungzui te kiphinna sukthip theilo ziak in Haryana government in tuni’n Panchkula, Deputy Commissioner of Police suspend a bawl a, state’s Deputy Advocate General, Gurdas Salwara chu Dera Sacha Sauda chief Gurmeet Ram Rahim Singh a kithuapi ziak in sepna a pat terminate a bawl bawk hi. Haryana police te’n state sung mun chuam chuam ah um Dera centres te khualchilna a nei hun un, AK-47 rifle leh Mauser khat gel, Dera nungzui te gari khat a pat in a mudawk ua, mun chuam chuam chuam ah rifles 2 leh pistols 5 le a mudawk ui. Zia kiphinna tawh kisai a chun mi 552 mat in a um ui. Punjab ah leh Chief Minister Capt Amarinder Singh in Dera centres te khualchilna nei ding ah state police office te thupiak a nei tawh kitawn in police ten ‘Naam Sacha Ghars’ (congregation centres) 98 khualna a nei hun un, mawl, pipes leh thikpum, heicha leh petrol bomb tamtak mudawk un a kigen hi.

A langkhatlam ah rape convict Dera Sacha Sauda chief Gurmeet Ram Rahim Singh chu Rohtak District Jail ah air-conditioned room piak ah um leh VIP treatment kibawl ah gen ah um chu Haryana government in pawmlo a hidan a taklang a, self-styled godman thupi bawlchuam thei hilo in a gen hi. Media report dungzui ah Dera Sacha Sauda chief Gurmeet Ram Rahim Singh chu special helicopter leh air-conditioned room banah police officer te mat ding ah facility chuam chuam um te (Manohar Lal) Khattar government in pia leh Honeypreet kiti numei khat a ma kithuapi ding leh a enkawl ding ah custody ah kikawi ah kigen maleh Haryana Director General of Police (Prisons) KP Singh in ziagual media reports chu pawmlo a hidan gen in Dera chief chu ordinary inmate gual ah prisoner dang te tawh kikawi khawm leh arrangements bangma a chuam ah umlo hin a gen a, "Qaidi No. 1997" (prisoner number 1997) tag ah um hin le a gen hi. Haryana Chief Secretary DS Dhesi in a genna a chun, state government in Panchkula a pat Rohtak ah Dera chief a tutna tawh kisai ah helicopter mat ah a umna ziak chu security concerns ziak hin a gen a, thiamlo chan ah a um tawh kitawn ah Dera chief, Z-plus security piak ah um le sukbei ah um hita hin a gen hi.

Dera sadhvi khat in Dera chief Gurmeet Ram Rahim in pawngsual sek leh Dera sadhvi tamtak luppi zing sek a hidan taklang ah Prime Minister Atal Bihari Vajpayee lekha a thawtna chung ah Punjab leh Haryana High Court in sadhvi's letter panchak ah nei ah CBI chu Dera chief chung ah sexual exploitation case register bawl ding ah thupiak a nei tawh kitawn in CBI in khualchianna a pat a hia, special CBI court in July 30, 2007 ah chargesheet a filed, 2008 ah Gurmeet Ram Rahim chung ah trial kipan leh September 6, 2008 ah Section 376 (rape) leh Section 506 (criminal intimidation) of the Indian Penal Code nuai ah case ziklut thak ah a um nung ah CBI Special Judge Jagdeep Singh in Punjab leh Haryana ah nungzui mi a lakh ah sim nei Dera chief chu raping & sexually exploiting case ah thiamlo a chan a hi. Chuleh, a chung ah gawtna piak gawtna piak ding chu tu Seppatni leh puan hiding a hi. Zia kawmkal a chun, Punjab leh Haryana High Court in kiphinna suksiat ah um thil zosia chu Dera Sacha Sauda (DSS) in compensate a bawl ding in a puang a, thil kisusia te list pelut ding in le hiatsakna a bawl hi.

Nimchim in Imphal-Dimapur NH-39 lampi khak
Senapati, Aug. 26 *(Nisin Thuhiltu)* : Gua zuk ziak in Makhan area, Senapati district ah nimchim in Imphal-Dimapur NH-39 ah kikawmtuana lampi a khak hi. Zia nimchip ziak a chu Imphal-Dimapur NH-39 ah lampi feet 80 chimtha hin police thusuak in a gen a, Assam leh Nagaland a pat nisin pawimaw van pua tamtak te tângden in le a gen hi.

VPC President in Maicham siam
Lamka, Aug. 26 *(Nisin Thuhiltu)* : Vaiphei Peoples’ Council (VPC), General Headquarters President ding ah teltin thak ah um Khatkhotong Baite s/o (late) Hemkhothang Baite in tuni’n ama chenna inn, S. Munnuam, CCpur ah President ding ah teltin ah a umna chung in maicham siamna a nei hi. Zia hun chu Young Vaiphei Association (YVA) General Headquarters President leh a cabinet member te, Zillai General Headquarters President leh a cabinet member te banah VPC Block leh Unit lawiupa chuam chuam ten a uap ua, Rev. L Khupboi Vaiphei in Pathian kiang ah malzawl dawt piakna a nei hi.

Gua tamtak zu thei ding
Lamka, Aug. 26 *(Nisin Thuhiltu)* : Indian Meteorological Department (IMD) Weather Forcast Report dungzui ah Manipur ah next dakkal 72 sung ah 115.6-204.4 mm ah hat gua zu thei ding in MH Khan Principal Secretary (Relief & DM) Govt. of Manipr in a taklang a, Deputy Commissioner zosia a pawimaw dungzui ah panla chiat ding in hiatsakna a bawl hi.

“Ei Pel Kin” hawnna leh latna nei

Lamka, Aug. 26 *(Nisin Thuhiltu)* : Mizoram Presbyterian Church Synod (MPCS), Manipur Area nuai ah Lamka Pastor Bial in Gospel Music Video Album a bawl masakpen, “Ei Pel Kin” chu tuni’n Hill Town Biakinn Gosptel Centenary Hall ah Pastor Jerry Zoliansanga, Bialtu Pastor in a hawnna leh latna a nei a hi. Album hawnna a nei zaw in a khat-veina dia kichi abawl uh honna leh latna nei uhi. Gospel Music Video Album hawnna hun a chun, Haulemthang, Secretary in Lamka Pastor Bial lapawl kipatdaw dan genna a nei a, Sangkhum, Choir Conductor in gospel album ‘Ei Pel Kin’ kipatdan a genna a chun, Lamka Pastor Bial a ding ah tepte kham ting, zia Gospel Album siamdaw thei chu Choir member te panlakna leh kipiak zawna ziak hi ah taklang kawm in album bawlna ding tawh kisai ah a kûl leh pawimaw bangkim, a tam zaw choir member te puakdaw a hi banah Pathian dawisakna chang ah kithutuakna leh pangkhawmna te ziak ah album bawldawk thei uh hi’n a gen hi. Album hawnna hun mat sung in Lamka Pastor Bial a pat lapawl sakna le a um hi. Hawndaw ah um “Ei Pel Kin” Gospel Music Video Album a chun Pathian pakna lâ thingtang pau 3 mang ah kisa lâ 8 a um hi.

NQAS team in hospital entha

Lamka, Aug. 26 *(Nisin Thuhiltu)* : District Hospital, Churachandpur Ward chuam chuam ah nasepna hawizaw a um ding dawina in tuni’n NQAS a pat team khat in etthâkna a nei u’i. NQAS team a chun - Monota Ngasepam, Facilitator, Regional Resource Centre (RRC), North East, NHM leh AK Karnabir Singh, State Quality Consultant, NHM a pang ua, tha banghem zat chiata ah Inspecting Team khat in District Hospital etthâkna a nei hun ua Hospital in Quality ah 52% a mu chu 70% tiang tunsak na ding ah a vât um te Medical Superintendent, Deputy Superintendent leh Nursing Superintendent tawh gen khawmna a nei u’i.

Dustrict BJP President thak ding ah Lienkanglo guat ah um

Lamka, Aug. 26 *(Nisin Thuhiltu)* : Churachandpur District BJP in tuni, BJP Office, Vengnuam, Hiangtam Lamka ah Press Conference a kona a chun, BJP High Command in thusua bawl in District BJP President ding ah Lienkanglo guat a hi dan Khaisei Haokip, Spokesperson, BJP Churachandpur in puangdawk kawm in zia chung chang a chu District BJP in bangma hiatpilo hi’n a gen hi. Ex-President, K. Vungzalian in BJP a ding ah panlakna te thupi mama in ama president hina nuai ah District a pat BJP MLA 3 teltin a hi banah Minister le khat nei hi’n a gen a, zia chu a hi zing lai ah District BJP hiatpilo ah President thak ding guat a hi chu High Command bep in a ziak hia ding hi’n a gen hi. President ding ah guat thak ah um, Lienkanglo in thugenna a nei hun a chun, Government a pat scheme hawi tak tak hung te chu a hi ding gual tak ah chia sak ding dawi leh sep piting ding chu a tup hi’n a puang a, zia ding a chun kuamasap in kithuapi ding ah chialna bawl kawm in diklo tak ah thil bawl te a kituakpi gawtna piak hi ding in hillawkna a bawl hi. Lalrothang Infimate, Senior BJP Leader in mipi te kiang ah gawm ding ah Public Distribution System (PDS) ah hung ann-chang te chu a chang ding dawl te’n a hi ding gual tak ah a chang ding uh hi’n a gen hi. District BJP President ding ah guat thak ah um, Lienkanglo in zia panmun chu 2018 December tha tiang a tuk ding a hi.

Career Seminar Cum Weapon Display neipi

Lamka, Aug. 26 *(Nisin Thuhiltu)* : Assam Rifles, Churachandpur Battalion in tuni’n Rayburn College Auditorium, New Lamka ah Rayburn NCC Cadet leh tu lai tak ah Army kilakna ding ah Assam Rifles in training a piak te a ding in Career Seminar Cum Weapon Display kiti a nei piu a, zia hun a chun AR te’n galvan a mat te uh suklatna a nei ban ua Career seminar le a neipi ngal u’i. Seminar hun ah Rayburn NCC Cadet leh Army recruitment training la te a pang ua, Assam Rifles a pat Major Radha Krishnan, Major Pankaj leh Major Narender Sharma te’n India Army nuai ah sepna chuam chuam um te genlatna leh Indian Army ah luttheina ding ah taksa leh thiamzilna lam a titna chuam chuam te banah entrance exam ah lawtin theina ding ah kisaklawk ding dan a ziltil ua, numei te a ding a le Indian Army nuai ah sepna chuam chuam um a hi dan gen kawm in a lunglut te a ding in Indian Army lut theina ding lampi a kawk mu u’i. Assam Rifles Churachandpur Battalion in a hileh khangthak lekha thiam sepna neilo leh school/college student te lak ah India government nuai ah sepna chuam chuam umte tawh kisai ah awareness taksapna lian tak um hi ah a mu tawh kitawn ah khangthak leh student te lak ah career seminar a nei uh a hia, zia a pat chu tamtak in sepna a mu thei uh dawina ah a sai uh a hi. Hun matna a chun, Rayburn NCC Cadet banah Army recruitment training piak ah um te mu ding in Instructor Subedar Ranjit Singh Rawat leh a team te’n Indian Army te galvan suak thak te lak ah galvan chuam chuam te khawi ding dan leh a mat ding dan a ziltil ua, galvan suklat ah um te a hileh 7.62mm MMG, 30mm AGS, 5.56mm Insas LMG, 7.62mm LMG, Insas Riffle, Carbine, AK Rifles a dang dang a hi.

Distt. Hospital ah Biochemistry Deptt. nasep dan lungtun umlo
Lamka, Aug. 26 *(Nisin Thuhiltu)* : Churachandpur District Hospital Ward khenkhat ah Medical Officer (MO) khenkhat ginatlo ziak in Ward ah semtu khenkhat te nasep dan chu mipi a ding ah lungkim umlo mama a hi dan thutut a ki dawng hi. Hapta masa Kiginni, August 19, 2017 a khan S. Suangin (78) of Singngat in damlona ziak ah test chuam chuam bawl ding in District Hospital Biochemistry ah chia maleh dak 11:00 tiang ah chiate bep test bawlpiak uh a hi dan hiatsak a hi dungzui un Seppatni, August 21, 2017 ah a innkuan te’n a puikit ua, Ultrasound laksak masak a hi ziak ah dak 11:20 ah Biochemistry tungpan in, a zing ah hung thak in ti’n a la hiatsak u’i. Zia a pat chu thuneitu sang zaw kiang ah a thu hiatsak a hi dungzui ah a ni ma ah test ding in lekha zik maleh thuneitu sangzaw kiang ah a thu tut ti ziak in Test bawl piaklo ding uh hi ah hiatsak in a um u’i. Thiltung chu Reporter khenkhat in a hiat ziak ua a thu kanchian ding in Biochemistry a chiau a, zia hun a chun Technician khat in ngainep tak in a la bawl hi. Biochemistry mun ah zia gual thiltung chu a khatveina hi talo hi’n a kigen a, zia gual chu damlo tamtak a ding ah buai um mama ding hi’n a kilang hi. Dak 11 zaw nung ah bang ziak ah test bawl theilo a hi em, bang guideline a zui uh a hi em ti chu a kisaipi te’n mipi te kiang ah a hiatthiam sak uh pawimaw a hia, damlote a ding ah puak gik kibelapna a hilona ding ah thuneitu te’n pan a lak uh a pawimaw mama hi.

BDF, Lamka North Division khawmpi
Lamka, Aug. 26 *(Nisin Thuhiltu)* : Evangelical Baptist Convention (EBC), Baptist Dorcas Fellowship (BDF), Lamka North Division in August 25 a pat August 27 sung EBCC Hiangtam Lamka ah “Na omdan uh Khrist Tanchinhoih Toh Kituaksak Photphot Un” ti thupi mang ah a 9-veina Khawmpi a nei ding uh chu zani’n Rev. E. Paukhanlian, Divisional Superintendent, EBC Lamka North Division in a hawnna a nei a, khawmpi hun sung a chun thugentu ah Rev. S. Vung Minthang, General Secretary, EBC pang ding a hia, Liankhoman, Dorcas Coordinator, EBC Seminar in khawmpi thupi “Na omdan uh Khrist Tanchinhoih Toh Kituaksak Photphot Un” ah pansa in seminar hun mapui ding a hi. Tuni sunnung in Rev E Paukhanlain, Divisional Superintendent, EBC LND mapuina nuai ah Division Baptist Dorcas Fellowship Committee 2018-2020 sung vaipaw ding kitelna a um a, zia hun a chun puitu ding 22 umna lak ah a chiakhawm member te’n puitu ding in mi 15 a tel dawk ua, teldaw ah um mi 15 te chu zing leh Rev. E. Paukhanlian, DS, EBC LND in namdetna leh pawuchappiakna nei ding a hi.

Senapati district ah tui-let in chenna inn tamtak chup

Senapati, Aug. 26 *(Nisin Thuhiltu)* : Manipur Senapati district ah gua zuk ziak in tui a let nasa mama a, chenna inn tamtak tui in a chup bak in orphanage home khat tui in a tawk mang hi. Chakhumei ah chenna inn 7 te le tui in a chup a, mitamtak te tui in a chup khum khak ding lau ziak in mun bitzaw’n a kichawn dawk ui. Imphal leh state ding kawmtua passenger buses leh trucks khenkhat le Mao gate in a tângden ua, mun tamtak in tui-a let hi. Karong area ah orphanage home “Compassionate Children Ministry orphanage” enkawltu te lak ah khat Robin Raomai in a umna inn uh tui in a tawmang tawh kitawn ah junior school leh hostel ah um a hidan uh a gen a, Senapati district deputy commissioner Athem Muivah kiang ah thil umdan a tut nung ua, deputy commissioner in district administration in blankets 100, anchang bags 20 leh relief material peding ah thutiam bawl in a gen hi. Church Road Colony ah cheng M Thowo kiti’n a genna a chun, tuchung ah tui-let chu kum 30 nung ah a huaisiat diakna hin a gen a, thakhat thu tui let zak ziang hin a gen hi.

W. L. Hangshing in Chief Minister kimupi

Imphal, Aug. 26 *(Nisin Thuhiltu)* : W.L.Hangshing Chief Commissioner, Central GST & Customs,NER,Shillong in tuni’n CM Office ah Manipur Chief Minister N. Biren Singh a kimupi a, Good & Service Tax (GST) tawh kisai panna thu chuam chuam genkhawmna a nei ui.

CM in Rs. 5 Lakh Ex-Gratia piakdawna nei

Imphal, Aug. 26 *(Nisin Thuhiltu)* : Chief Minister N. Biren Singh in Chief Minister’s Secretariat ah tuni’n (L) Sapam Robinhood innsung mite kiang ah ex-gratia Rs 5 lakh piakdawna a nei a, zia hun chu Deputy Commissioner, Imphal East leh Robinhood kithana tawh kisai ah kiphutdawk, JAC ah member te’n le a uap ua, CM Biren Singh in Robinhood nu leh pa te kiang in cheque piakdawna a nei hi. Tukum June tha a khan, State Cabinet in Sapam Robinhood pianna nu, RK Robita kiang ah a kituakpi sepna piak ding ti’n lemsakna a la nei hi. Class XI sumlai Sapam Robinhood a hileh a chiata 2015 kum ah Manipur ah Inner Line Permit System (ILPS) kawi ding phûtna ah police te rubber bullet in a kapliam leh a liamna a pat damdawk zolo ah mualliam a hi.

Symbols piakna um ding
Imphal, Aug. 26 *(Nisin Thuhiltu)* : Returning Officer/SDO Sawombung in thusua a bawlna a chun, Gram Panchayats election umna ding ah Imphal East Zilla Parishad - 1-Tellou Chana Seijang, 2-Sawombung, 3-Dolaithabi, 4-Khundrakpam, 8-Khurai Nandeibam Leikai and 9-Khurai Chingangbam Leikai Zilla Parishad constituencies and Pradhans and Members of 1/1- Tellou Chana Seijang, 1/2-Nongren Chingnungkhok, 1/3-Takhel, 2/4-Sawombung, 2/5-Pungdongbam, 2/6-Kangla, 3/7-Makeng Dolaithabi, 3/8-Uyumpok, 3/9-Pukhao, 4/10-Khundrakpam, 4/11-Haraorou Tangkham, 4/12-Waiton, 8/20-Khurai Nandeibam Leikai, 8/21-Khurai Konsam Leikai, 8/22-Khurai Laishram Leikai, 9/23-Khurai Chingangbam Leikai, 9/24-Khurai Khaidem Leikai leh 9/25-Moirang Kampu Gram Panchayats ah ah nominated candidate te ding ah 29th August, 2017 nitaklam dak 3.30 pm leh Returning Officer/SDO Sawombung, temporary office, DC, Imphal East Office complex, Porompat ah symbol allotment um ding hin a gen hi.

Old Age Pension Card piakdawna nei

Imphal, Aug. 26 *(Nisin Thuhiltu)* : Social Welfare Minister Nemcha Kipgen in state sung ah teksia (old-aged) te thuneina rights kituptak ah zabawl piak hiding ah thutiam a bawl tawh kitawn in tuni’n department official te’n pian a pat khua-mulo, government scheme nuai ah pension benefits mukha nailo le hi, kum 87 ah upa Mainam Ningol Chaobi Devi (87) of Thoubal chu a chenna inn mun ah Old Age Pension Card piakdawna a nei ui. Zia hun a chun, Manipur Old Age Pension (MOAP) Scheme nuai ah MOAP card banah kum 1 sung full pension sum le Chaobi Devi kiang in department official te’n a piadawk ui.

Minister Jayanta Kumar in Pineapple Festival, 2017 hawng

Kangvai, Aug. 26 *(Nisin Thuhiltu)* : Manipur Art and Culture Minister L. Jayanta Kumar Singh in tuni’n Khousabung Village, DCC Headquarters, Churachandpur ah 10th State Level Manipur Pineapple Festival, 2017 hawnna a nei a, ama’n a thugenna a chun, competitive spirit nei kawm ah festivals organised kibawl chu pakcha mama a hidan gen in lengthei (pineapple) chiing te kal ah panlak khawmna, khat leh khat kal ah kihiatthiam tuana a um ding pawimaw in a gen a, lobawl mite kipumkhatna pawimaw mama in a gen hi. Lo-bawl mite’n thaichi-piang a kibelap theina ding ah panlakna kituptak ah a nei ding uh pawimaw hin le a gen a, thaichi piang a tam hun hun ah company leh firm chuam chuam in zawk sawn ding ah chaw ding uh a hidan te a gen hi. Zia hun matna a chun, Minister L. Jayanta Kumar Singh in pineapple farmer a lawting penpen mi pathum te kiang in cash prizes piakdawna le a nei a, festival Souvenir hawnna le a nei hi. Festival zingkal session chu T Thangzalam Haokip chairman HAC, Vungzagin Valte Chairman MTDC leh Shyamlal Poonia, IAS DC Churachandpur te’n khuallian hina tawh a uap ui.

Leimakhong ah Army Recruitment Rally um ding
Imphal, Aug. 26 *(Nisin Thuhiltu)* : PIB Defence, Imphal in tuni thusua a bawlna a chun, Indian Army in Leimakhong ah 3rd -10th October 2017 sung ah Manipur khangthak te a ding bik ah Army recruitment rally sai ding a hidan a taklang a, lunglutna nei recruitment rally ah pang nuam te chu www.joinindianarmy.nic.in. ah a ki registered masat uh ngai ding hin a taklang hi. Post kila ding te chu Soldier GD (10th & 12th std), Soldier Technical (12th Std with Physics, Chemistry, Maths & English), Soldier NA (12th std with Physics, Chemistry, Biology & English), Sol Clerk/Store Keeper Technical / Inventory Management (12th std with English & Maths/Book Keeping/Accounts as compulsory subject either in 10th or 12th), Soldier Tradesmen (8th &10th std simple pass) hiding a hia, GD candidate te 01 Oct 1996 & 01 Apr 2000 ah kikal ah piang mi a hiding uh leh post dang dang te chu 01 Oct 1994 & 01 Apr 2000 kikal ah piang mi a hiding uh ti a hi. Thuchian kimzaw hia-nuam te’n phone No 03862-248845 & 8974958673 ah thuchian kimzaw kan thei hiding leh Last date of registration 18 Sep 2017 hiding a hi.

Minister Biswajit in ZED Certification apply ding ah entrepreneur te chial

Imphal, Aug. 26 *(Nisin Thuhiltu)* : Manipur Commerce & Industries Minister Thongam Biswajit Singh in tuni’n MSME-DI, Imphal saina nuai ah One Day Awareness Programme on ZED Certification hawnna Classic Hotel, Imphal in a nei a, ama’n a thugenna a chun, Micro, Small and Medium Enterprises te chu Zero Defect Zero Effect, ZED Certification apply bawl ding in chialna a bawl a, ZED scheme nuai ah benefit chuam chuam um te taklatna a nei hi. Minister Biswajit in entrepreneur te’n gamsung integrity sukhatna ding leh employment generate bawlna lam thil ah panmun pawimaw tak nei a hidan gen in, MSME sector ah product quality leh global standards tawh kituak ah product a um theina ding ah ZED scheme chiapi ah um hin a gen hi. Zero Defect Zero Effect, ZED Certification chu alotheilo (mandatory) hilo himaleh ZED mark a pat product chu global competition ah pangthei hi ah a kilatna hiding in a gen hi. Zia hun matna chu Trade, Commerce and Industries Director M.Luikham, MSME-DI Imphal Dy. Director i/c Mitra leh All Manipur, Entrepreneurs Association, President S Rishikumar te’n le a uap ui.

Governor in 7th Conclave of Ramalingaswami Fellows hawng ding
Imphal, Aug. 26 *(Nisin Thuhiltu)* : Manipur Governor Dr. Najma Heptulla in Hotel Classic Grande, Chingmeirong, Imphal East ah 28/08/2017 (Monday) nitaklam dak 6:00 leh 7th Conclave of Ramalingaswami Fellows hawnna a nei ding a hi. Chuleh, Project Director, Loktak Development Authority saina’ 28th August ,2017 leh Sendra, Moirang ah Minister Shri Th. Shyamkumar ( Forest& Environment/MAHUD/Horti.& Soil Conservation) in "Barges" hawnna a nei ding a hi.