Nisin Thuhiltu – 25 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Full State honours tawh CM lui Rishang Keishing luang vuiliam hita

Imphal, Aug. 24 *(Nisin Thuhiltu)* : Famta Chief Minister leh Parliamentarian lui Rishang Keishing sûnna leh zana piakna tuni’n Manipur Baptish Convention Church, Chingmeirong Imphal in a um a, Chief Minister N. Biren Singh mapuina ah full State honours tawh vuiliam in a um hi. Rishang Keishing luang a hileh Mantripukhri, Imphal East District ah a chenna huangsung ah vui in a um a, Deputy Chief Minister Y Joykumar, Ministers, MLAs, top civil leh police officer te banah mitamtak in a gâlna a nei u’i. IRB contingent te’n guard of honour leh gun salute le a nei ua, Chief Minister N. Biren Singh mapuina ah minute 2 sung zana piakna’n thip chiat in sûnna hun mat in a um hi. Chief Minister N. Biren in a thugenna a chun, veteran politician Rishang Keishing panlakna thupi mama leh state kipum khatna ding leh chamna leh muanna a um theina ding panlatu, ettawn tak mama a a hidan a gen a, a thugen nunung pen leh advice a bawl te chu hemillo ding a hidan a gen hi. Chuleh, famta Rishang Keishing principles leh thil dawi te a pitin theina ding ah panla ding a hidan genkawm in State Government leh State mipi te thasik in famta Rishang Keishing insungmite lusuunpi thu a puang hi.

VPC/GHQ President leh Vice President thak ding telna um ding; Candidate pathum gel um
Kangvai, Aug. 24 *(Nisin Thuhiltu)* : Vaiphei Peoples’ Council (VPC), General Headquarters, tu ah vaipaw te kum 3 term a bei tak tawh kitawn in August 25, 2017 zingkal lam dak 7:00 a pat nitak lam dak 2:00 sung in Kangvai Community Hall, Kangvai, Churachandpur district ah kum 2017 – 2020 sung vaipaw ding telna um ding a hi. Vaipaw thak ding telna hun chu Election Commission, VPC GHQ in mapui ding a hi. Election Commission member te chu Mr Pauchungnung Vaiphei , Chief Eleection Commission, D Khuala Vaiphei, Member leh Tonglal Baite, Member a hiu. Zingkal lam dak 7:00 a pat nitak lam dak 2:00 sung sung ah vote khiak hi ding a hia, President leh Vice President bep tel hi ding a hi. VPC Cabinet member dang te a hiu leh kivaihawmna Dan dungzui ah teldaw ah umte’n a vaima thei pen ah a leptuak ding uh a hi. President leh Vice President telna ah vote neithei ding electoral college in vote 818 a um a, zia ah vote nei te chu Vaiphei nam sung ah dinmun chuam chuam neite a hiu. Electoral college ah vote tamnapen chu VPC unit-te a hiu a, Unit 240 a pat vote 316 a um hi. Unit zawmtu chu Vaiphei khua hausate a hiu a, khua 230 tepte ah um hausate’n vote 230 a nei ui. A ban in Vaiphei officer te a hiu a, vote 175 a um hi. VPC block 17 ten vote 3 chiat nei in, a kigawm in 51 a pha zo hi. Kochuam chuam chuam a pat in vote 11, VPC ex-president-te vote 7, VPC GHQ cabinet-te 22 ban in, Vaiphei nam sung ah kilawikhawmna poimaw bik Zillai, Young Vaiphei Association (YVA) HGQ leh Vaiphei Literature Society (VLS) ten le vote 2 chiat a nei ui. Manipur pawlam ah sepna neite leh Assam ah block khat leh unit 8 umte a ding in SMS in vote khiaksak hi ding a hia, vote 80 vel um ah tepte a hi.VPC election 2017 a hin President leh Vice President ding ah candidate mi 3 tuak a um ui. President ding ah candidate-te a hiu leh tu ah President hizing lai Khatkhotong Baite s/o (late) Hemkhothang Baite, Chief of S. Munnuam, CCpur; Hauneilal s/o (late) Khaizalam, Chief of Munpi Village, Henglep Sub-Division leh S. Jamthang Baite s/o S. Janglet Baite of Moreh, Tengnoupal District te a hiu a, Vice President candidate te a hiu leh tu ah Vice President hizing lai Lalzakhai Vaiphei s/o (Late) Lamkhopau of K. Kotlian, CCpur; Lunkhomang s/o (late) Thuamlal of Gangpimual, CCpur leh Ngulzathang s/o Thianlam, Chief of Nazareth Village, CCpur te a hiu. Chun, Election kipatna ding ah pauchapna Rev. S. Khaikholam in nei ding a hia, nitaklam dak 2.00 ah vote khiakzaw a hi tak leh vote sim hingal ding a hi. Chuleh, nitak lam dak 3.30 p.m. – 4.00 p.m. kikal ah election result puandawna leh telthakte kitiamsakna in zui in ding a hia, Rev. Khupkam Vaiphei in Pathian kiang ah kipak thugenna leh telthakte pauchap piakna nei in hun khak hi ding a hi. Hiatthei khat chu, President candidate Khatkhotong Baite in VPC GHQ ah term 3 a kizawm ah contest a bawlna ding hita a hia, Hauneilal ahileh a kizawm ah 2 vei contest a bawlna hita ding a hi. S. Jamthang Baite ahileh a khatvei contest na hiding a hi. Chun, Vice President candidate Lalzakhai Vaiphei ahileh term 3 a kizawm ah contest a bawlna hita a hia, Lunkhomang leh Ngulzathang te a hiu leh a khatvei contest nau hinalai ding a hi.

‘Awareness and Screening on Prevention and Control of Deafness’ nei

Lamka, Aug. 24*(Nisin Thuhiltu)* : National Health Mission nuai ah National Program for Prevention and Control of Deafness (NPPCD), CCpur District saina’n Saikot Government High School, Saikot ah ‘Awareness and Screening on Prevention and Control of Deafness’ kiti neih in a um hi. Dr Jire Pudiate, District Nodal Officer, NPPCD in school student te lak ah khaw hiatna, Bil kepbit ding dan tawh kisai a ziltil na a chun, mihing taksa bâk te lak ah pawimaw pen bil hi’n a gen a, bil kepbitna ding ah mimal hithei - Bil sung ah thil himhim thun lo ding, mi bil bet piak lo ding, thil gi ngai chuam chuam a pat bil vengbit ding, bil ah tui lutsak lo ding banah pat leh thil dang dang ah kibawl bil sukthianna Ear Bud mat lo ding ti te a gen banah bil lam tawh kisai ah buaina nei te’n a kisai pi doctor etsak pai ding in a hil hi. NPPCD, ccpur district a pat Margaret, Audiologist in machine mang in Saikot Government High School a kai student te bil etthâkna a nei hi. Awareness and Screening on Prevention and Control of Deafness a hileh NPPCD, Manipur in school student te khawhiatna tawh kisai District tin in etthâkna a nei na ding ua Information Education Communication (IEC) Activities nuai ah program khat ding ah a guat a hia, zia tawh kitawn a chun CCpur district ah Private School khat, Hill top Heights School, Sielmat pang in Government School chuam chuam - Saikot Government High School, Saikot, New Lamka Upper Primary School, New Lamka, Lanva Model Government High Schoo, Lanva, Thangkai Government High School , Pearsonmun, Gandhi Memorial Government High school, Molnom, Tuibong Government High School, Tuibong leh Rengkai Government Higher Secondary School, Rengkai te teldaw in a um hi. Teldaw ah um school te a chun, Dr Jire Pudaite, DNO, NPPCD CCpur District mapuina’n hapta sin Nilaini leh Awareness and Screening on Prevention and Control of Deafness nei zel ding a hiu.

NT 25aug2017b

Upa Lamsuanthang luang mudaw hita
Lamka, Aug. 24 *(Nisin Thuhiltu)* : Khuga Dam ah khetha, Upa Lamsuanthang s/o Nekkham of Phaibem hawlna a ni 7 tinni, tuni zingkal dak 7 tuam in tui chung ah mudaw in a um hi. Upa Lamsuanthang a hileh a chiata August 18 ni ah Khuga Dam gal, T. Kotlian khel lam ah thingsat a kuan, sunnung dak 1:30 tuam ah innlam zuan ding ah kisa tuichung ah a thingsat te tawh a chuanna lawng a pat khetha in zia a pat chu a sulnung hiat a la hipua, Zou Youth Organization (ZYO) Phaibem Unit leh ZYO GHQ malatna nuai ah phatchuam ngai mimal leh pawl chuam chuam te’n August 18 a pat tuilak leh gamlak ah a hawlna a la nei uh a hi. Upa Lamsuanthang hawlna tawh kisai ah Bialtu MLA V. Hangkhanlian, Minister (Agriculture, Veterinary & Animal Husbandry), Manipur, Ginsuanhau @ GS Haupu, Chairman, MANIREDA leh MLA 60 Singngat Assembly Constituency, Thangboi Gangte, SDO, CCpur, Johny Sharma, SDPO, CCpur Police banah MDC te’n Phaibem khua pha in a innsung mite kiang ah panpina a piak ban un thamuanna thu genna le a nei u’i. Khuga dam ah Lamsuanthang luang hawlna a chun mimal leh pawl chuam chuam banah Khuga Battalion 6th Sikh Light Infantry te’n le kithuapina a piau hi. Upa Lamsuanthang luang a hileh tuni zingkal in Khianglam khawtaw lam ah tuichung ah kilapdawk mudaw in a um in a inn mun tut in a um a, zia chuh District Doctor leh District Police te’n postmortem a bawl ngal u’i. Thiluang a hileh zing leh Phaibem thânmual ah vuiliam hi ding a hi.

Sa zuakna leh nekthei siamna mun entha

Lamka, Aug. 24 *(Nisin Thuhiltu)* : Churachandpur Food Safety & Standard Wing, Autonomous District Council, Churachandpur leh Churachandpur Consumers’ Club kithua in tuni’n khawpi sung ah sâ zuakna leh nek leh chak bawlna mun 2 gel etthâkna a nei u’i. Amasa pen in Damkam Bazaar, New Lamka ah sa zuakna etthâkna a nei ua, sa zuakna mun thiangtholo leh a tuang (floor) cement ah zût a hilo banah sâ kikawina/zuakna dawkan kimangte a nit thei takluat ziak ah Inspecting Team te lungtunglo in Bazaar enkâitu ko in thuhilna hawitak in a nei u’i. New Bazaar Sa Lane etthâkna a nei hun ua sa kawina dawkan Aluminium Sheet ah kituamlote hapta khat sung ah tuamchiat ding ah hiatsak a hi ban un Trade Licence neichiat maleu Food Safety & Standard Wing a pat licence chuam a nei uh ngai ding hi ah hil kawm in hapta khat sung ah a sep pitin lo uh le a trade license uh cancel piak hi ding in a hillawk u’i. Thangjam Road ah Cine View Restaurant etthâkna nei ah um in nekthei bawlna mun te chu a etchian hun ua thiangtho lo leh damthei huailo talua a hi dan a mudawk u’i. Thangjam Road ah um Deb Bakery etthâkna a nei hun ua Bakery chu thiangtho tak ah etkawl ah um in nekding bawl zosia’n apron a sil ban ua a sam uh a tuam ua, nekbawlna sung zosia carpet pha in a sung ah kengtaw/ chapal bulut phal a hi puai. Bakery a hileh Inspecting Team in etthâkna a nei masak uh sang ah thiangthona lam ah khanto mama hi’n a gen ua, Bakery in biscuit zosia ni 5 leh bread te ni 3 sung nektâk a hi dan zikthaw in a sung ah a kawi u’i.

NT 25aug2017c

Inter School Competition kipan

Lamka, Aug. 24 *(Nisin Thuhiltu)* : Nehru Marg a um The Pathway School saina in amau school huangsung ah ni 2 sung dai dang, Inter School Competition chu tuni’n a kipan a, competition a hileh ‘Symphony of Ideas’ ti thupi ah mang kawm ah a sai uh a hi. Tuni sunma dak 10 ah Rev. Fimthasang in pauchapna tawh Inter School Competition hawnna nei in competition chi chuam chuam pat in a um ngal hi. Sunma dak 10 a pat sun dak 12 kikal ah Junour Group Fusion Dance leh Spelling Bee kidemna a um a, sunnung dak 12:30 a pat sunnung dak 3 kikal in Fusion Western, Indian leh Classical dance kidemna a um banah, Mono-acting nei in, kidemna a kipakman te hawpdaw a hi ngal hi. Inter School Competition ni 2na zing leh nei hikit dig a hia, sunma hunsung in Junoir Group Fusion Dance leh Recitation ah kidemna um ding leh sunnung hun ah Quiz, Poster Making ah kidemna nei ding a hiu. Inter School Competition khakna hun ah Guest teacher te a pat thugenna um ding a hi leh Rev Samuel K Joute, Chairman School Managing Board in pauchapna tawh khak ding a hi. Competition a chun, Ccpur district sung ah school 6 - Young Learners’ School, The Pathway School, VK Tawna High, St. Paul Institute leh Don Bosco Higher Secondary School te a pang u’i.

NT 25aug2017d

MiCoGoJ 2017 hawnna leh Press Conference nei

Lamka, Aug. 24 *(Nisin Thuhiltu)* : Mini Auditorium ah tuni’n Missionary Conference -cum- EBC Missions Golden Jubilee Celebration (MiCoGoJ) 2017 hawnna leh Press Conference kithua nei in a um a, Rev. S. Vung Minthang, General Secretary, EBC in MiCoGoJ 2017 hawnna leh Pathian kiang ah latna a nei hi. MiCoGoJ 2017 a hileh November 30 a pat December 3, 2017 sung EBC Gospel Centenary Hall, New Lamka ah mat hiding a hia, zia ding tawh kisai ah Departmental Sub-Committee a Coordinator te’n maban panlak dan ding guatlawksa ah a nei teu Press Conference hun ah genlat in a um hi. Press Conference a chun, Rev. V. Thangkhangin, Chief Coordinator in MiCoGoJ kipat dan leh a thiltup te puandawna a nei a, Rev. N. Pumsuanmung, Coordinator, Media & Publicity, Upa T. Paukhansiam, Missions Coordinator, Rev. V. Nenglian, Coordinator, Program & Worship, Rev. E. Paukhanlian, Coordinator, Publication, Upa Herbert T. Sumpi, Coordinator, Transportation & Accomodation, Upa S. Vungzasiam, Coordinator, Planning & Physical Arrangement, Upa Shinkhokam, Coordinator, Finance leh Upa Joel G. Hangzo, Chairman, CMSC te’n lawting tak ah MiCoGoJ mat a hi theina ding ah kisaklawkna a nei teu leh maban ah pan a lak ding teu genlatna a nei u’i.

NT 25aug2017e

Blood Donation Camp -cum- Awareness Programme nei di
Lamka, Aug. 24 *(Nisin Thuhiltu)* : Rayburn a pat Student, NCC, NSS leh Red Ribbon Club te’n zing, August 25, 2017 sunma dak 11:30 a pat Blood Bank, District Hospital, Churachandpur ah a 2veina Blood Donation Camp -cum- Awareness Programme nei ding a hiu a, zia hun chu National Health Mission sponsor na nuai leh Blood Bank, District Hospital kithuapina tawh nei ding a hiu.

Black market ah LPG cylinder kizuak sukbeina ding ah panlakna pat hita: Minister Karam Shyam

Imphal, Aug. 24 *(Nisin Thuhiltu)* : M/s Mahalakshmi Indane Gas saina ah tuni’n Safety Clinic cum Pradhan Mantri Ujjwala Yojana Awareness programme a um a, zia hun chu Chief Guest hina tawh Consumer Affairs, Food and Public Distribution Minister Karam Shyam in a uap a, Stephen Chinkhanson Guite, Manager- LPG Sales, Imphal II leh Wairokpam Gonendro Singh, Advisor- AMUCO, Manipur te’n Guest of honour leh Functional President hina tawh a uap ui. Minister Karam Shyam in a thugenna a chun, black market ah LPG cylinder a ki zawkna tawh kisai etzui hiding a hidan genkawm in, a etzuina nasep kipanta hin a gen hi. Survey zaw ah um hita leh Indian Oil Corporation (IOC) official te tawh tunung sawtlo ah meeting um ding hin a gen a, zia hun a chu black market ah LPG cylinder zawk ah a umsekna tawh kisai etzuina ding tawh kisai genkhawm hiding hin a gen hi. LPG distributor te tawh le meeting nei hiding in a gen a, distributor te tawh meeting hun ah beneficiary, multiple LPG connection nei te’n black market ah LPG cylinder a zawk sek uh sukbei dingdan genkhawm hiding in a gen hi. PMUY scheme nuai ah beneficiary te benefit mu tawmcha a umna chung ua awareness programme pawimaw nalai in le a gen a, PMUY Scheme chu June 5, 2017 a khah hawn ah umta leh August 21, 2017 tiang ah total beneficiary 8,572 um pan leh August 21, 2017 tiang ah ah application cleared 13,119 um hin a gen a, distributors, IOC officials leh stakeholder te chu target 2.43 lakh beneficiary a um theina ding ah panla thak ding in chialna a bawl hi. Guest of Honour hina tawh hun matna uap, Stephen Chinkhanson Guite, Manager- LPG Sales, Imphal II in a thugenna a chun, consumers te chu LPG cylinder taksaplona ding ah guideline - one LPG connection per house chiapi chiat ding in chialna a bawl a, distributors te chu home delivery, SMS services leh a dang dang upgrade bawl ding ah chialna bawl kawm in, distributor te chu numei beneficiary te ngaikhawk ding in a hiatsak hi. Zia hun matna a chun, Minister Karam Shyam in Pradhan Mantri Ujjwala Yojana nuai ah numei beneficiary 88 te kiang in LPG connection piakdawna a nei a, LPG consumer te ding ah safety demonstration le a um hi.

Security forces te’n galvan tamtak mandawk

Kangvai, August 24 *(Nisin Thuhiltu)* : Churachandpur district huapsung ah um Lukhumbi village kiangnai ah combined team - state police commandos leh Assam Rifles te’n zani a khan galvan chi chuam chuam sel ah um tamtak a mudawk ui. Galvan mudaw ah um te lak a chun, AK-56 rifle leh magazine, 50 rounds of 7.62 mm, 9 mm pistol 1, live rounds 9, hand grenades 3, lathode shells 4, assorted detonators 14, 9mm Luger rounds 2, 18 rounds of .32 leh 4.35 rounds a pang hi. Zia ah meithal leh meichang mudaw ah a umna tawh kisai a chun Kumbi police station ah case ziklut in a um a, himaleh galvan chu kua te selguk, bangziak ah zia mun a chu ki selgu a hi em ti suklat in a um puai.

Thanglenmang puimang ah a umna tawh kisai ah mi 1 kiman
Lamka, Aug. 24 *(Nisin Thuhiltu)* : Melhiatlo pawl khat in gun-point ah 22 August 2017, zan dak 11:30 tuam ah a puimang (kidnapped) uh Mr Thanglenmang Khongsai s/o Satkhohao Khongsai of Thingkaiphai, CCpur hawlna Churachandpur Police in Songpi area a nei nung un, Thanglenmang Khongsai chu hentang ah a umna mun a pat hung zam dawk thei hin a kigen hi. Thanglenmang Khongsai puimang ah a umna tawh kisai a chu Churachandpur Police in Thenthang Haokip of Mata Lambulane man in le thudawnna a taklang a, Thenthang Haokip inn a chu Thanglenmang Khongsai puimang tu te’n ann a nek bak ua hun chawm khat chawlngak mang un le a gen hi. Thanglienmang Khongsai ahileh VDF personel hin le a kigen a, puimang ah a umna tawh kisai ah Churachandpur Police station ah case c/w FIR No.70(8)2017 CCP-PS u/s 447/365/34 IPC, 25(1-C) A. Act ah ziklut in a um hi.

Indo-Naga political talk
Imphal, Aug. 24 *(Nisin Thuhiltu)*: India Government leh National Socialist Council of Nagalim (Isak-Muivah) in zani a khan New Delhi ah Naga political talk a nei ua, kihona’n masawn lo a hidan NSCN senior functionary khat in a gen hi. Nagalim (Nagaland) in constitution chuam a nei ding, flag chuam a nei ding demand thu ah kihona masawn theilo hin a kigen hi. Zia ah kihona a chun NSCN (IM) team te Chief Negotiator, Thuingaleng Muivah in amapui a, Union Government’s interlocutor R N Ravi tawh kihona sosang mama hi ah le hiat a hi. Chun, next Naga political talk chu a hung tung ding Sepkitni leh sutzaw hiding ah ginchat a hi. NSCN (IM) in constitution leh flag chuam um ding ah demand chu chiapi zing hiding in a gen a, Indian Constitution chu pawm hilo ding leh Naga Constitution chuam a um ding hin NSCN (IM) leader dang khat in a gen hi.

Aina Battalion in zu tamtak man

Imphal, Aug. 24 *(Nisin Thuhiltu)* : Aina ah um Aina Battalion in a chiata 20th August 2017 ni, Mizoram a pat Churachandpur zuan Bolero Pick up- MZ01N 2026 check a bawl hun un zu (liquor) tamtak a mandawk ui. Matdaw ah um zu chu Cane Beer bottle 64 leh Beer bottles 18 hin PIB Defence, Imphal in a taklang a, diklo tak ah Aizawl a pat Churachandpur tut ding ah kipua hin a gen hi. Zu puakna gari driver chu Lal Lian Tluanga (30) s/o Mr Din Khuathuang, of Sairang (Mizoram) a hia, a kitawnpi Mr Nalal Awmpuia (23) s/o Mr Liana of Sairang (Mizoram) tawh a van puak uh banah gari chu Excise Department Churachandpur khut ah piakdaw a hi.

NT 25aug2017f

Moreh ah Integrated Check Post siamzaw pai hita ding
Moreh, Aug. 24 *(Nisin Thuhiltu)* : India leh Myanmar banah South East Asian gam te tawh trade leh commerce lam ah kikawmtuana hawizaw sem a um ding tupna ah Ministry of Home Affairs nuai ah Land Port Authority of India in Moreh Gate Number 1 ah Integrated Check Post, ICP a siam chu October leh siamzaw hita ding a hidan P.K. Mishra, Director (Projects) Land Port Authority of India, Ministry of MHA in a gen a, tha 2 sung ah mathei ding ah siamdaw hiding in a gen hi. P.K. Mishra leh Anil Bamba, Member of Planning and Development chu ni 3 sung nasepna mun ah thil umdan et-thakna nei a hiu a, Assam Rifles, National Highway Infrastructure Development Limited, NHIDCL, SP Tengnoupal, District, Immigration Officer, Department of Commerce & Industries, BSNL leh Land Customs official te le kimupi in Integrated Check Post, ICP chungchang a genpi bawk ui.

Rs 1.5 crore man ding Tobacco products matdaw ah um
Imphal, Aug. 24 *(Nisin Thuhiltu)* : Imphal West district police team khat in zani a khan, Imphal West Addl. SP (Law and Order) Priyadarshini Laishram leh Imphal West SDPO AG Sharma te mapuiba’n, Singjamei police station huapsung Mongsangei Mayai Leikai ah truck khat a pat in tobacco product Rs 1.5 crore man ding a man dawk ui. Truck a pat tobacco product a suathak hun ua nitaklam dak 7:15 tuam ah police team in tobacco product te chu a matdaw uh a hia, truck bearing registration number, MN04-A-4602 driver Md Nazir (22) s/o Md Salawan of Lilong Usoipokpi le mat ah um a hidan Addl. SP Priyadarshini Laishram in a gen hi.

Xth Manipur Pineaple Festival
Kangvai, Aug. 24 *(Nisin Thuhiltu)* : Khousabung Churachandpur ah 25th leh 26th August 2017 sung ah Xth Manipur Pineaple Festival um ding a hi. Zia umna ding tawh kisai a chu District Health Society Churachandpur in Free Medical Camp organised bawl ding hin a kigen a, tukum ah Pineaple Festival chu Lengthei (pineapple) chiin kum 70 tin a lawpna tawh matkhawm hiding a hi.

NE first 100 % computer literate village, Nungthaang Tampak
Imphal, Aug. 24 *(Nisin Thuhiltu)* : Saikot Assembly constituency huapsung ah um Nungthaang Tampak village (Kom village) chu North East leh Manipur State sung ah ‘100 percent computer literate’ um masakna pen hi ah puan in a um hi. Rural development tawh kisai nasem “Mangaal Rural” kiti NGO te’n Digital India program nuai ah All India Society for Electronic and Computer Technology (AISECT) tawh kithua ah training program a chiapi nung ua, Nungthaang Tampak village ah mizosia chu computer khawi thei vek hita uh ti a hi. Nungthaang Tampak village chu inn 45 umna leh total population 200 hi ah hiat a hia, zia lak a chu mi 180 in tuhun ah information leh technology lam thil ah buaina bangma neitalo ding uh ti a hi. Director of Mangaal Rural, N. Surjit in a genna a chun, Nungthang Tampak chu India’s second 100 percent computer literate village in India hin a gen a, Kerala’s Chamravattom village chu India’s first 100 percent computer literate village hi ah puan a hidan a gen hi. Nungthaang Tampak village khua ah kum 23 ah upa nupi, Mangte Shashniya in a genna a chun, naupangcha a hi a pat computer knowledge nei nuam himaleh lemchang mungailo hin a gen a,himaleh Mangaal Rural panlakna ah basics computer knowledge a nei theitakna chung ah kipak mama hin a gen hi. Nungthaang Tampak khuami te chu internet surf dingdan, Microsoft words mang ah thuzik dingdan, save ding dan, photoshop, e-mail thawt dingdan, store data leh print outs bawl ding dan ti te ziltil a hiu.