Nisin Thuhiltu – 07August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Damlo te ding ah helicopter services a umtheina ding panlakna chiatha zing: Governor Dr. Najma Heptulla

Imphal, Aug. 6 *(Nisin Thuhiltu)* : Japanese Second World War Victims Memorial Hospital Trust, Manipur sponsored bawlna nuai ah tuni’n JNIMS, Porompat, Conference Hall ah Japanese Hospital Manipur staff panlakna chung chuang diak te ding in Prize Distribution Ceremony a um a, zia hun chu khuallian hina tawh Manipur Governor Dr. Najma Heptulla, Director JNIMS, Dr. Th Bhimo Singh ; Medical Superintendent JNIMS, Prof. L Ranbir Singh; Nursing Superintendent JNIMS, P.Landhoni Devi; President of Japanese Hospital Manipur, T.M. Rajen Ayangba; National Secretary, All India Dalit Development Association, Yumnam Mahendrakumar Singh leh Japanese Hospital Manipur, Treasurer H. Suraj Sharma te’n a uap ui. Prize Distribution Ceremony ahileh Padmashree awardee Dr. W .Gojen Meitei laa siam, title “Ho ima nungshibi, poknapham lamdam paamubi,ima nangi natambaakshe, yengbagi penba naideda” ti laa sakna a kipan hi. Manipur Governor Dr. Najma Heptulla in a thugenna a chun, Manipur chu climate hawi tak leh biodiversity thupi tak umna mun himaleh state sung ah mipi te’n damtheina lam ah haksatna a tuak teu sukvenna ding ah ngaikhawkna tasam a hidan gen in, damlo te a ding ah helicopter services a um theina ding ah Civil Aviation Minister tawh kihona chiatha zing a hidan a gen hi. Zia kihona dungzui a chu, Manipur ah helicopter services / Air Ambulance Services a um theina ding leh a pawimaw van mat chuam chuam te chawkna ding ah Civil Aviation Ministry in Rs. 25 crores sanction a bawl ding, khawpi sung leh mun gamla, tanggam ah um te a pawimaw hun ah helicopter mang ah puakvel ding ti ah guanggalna um in a gen hi. Manipur leh Japan kal (relation) tawh kisai a genna a chun, Bishnupur district, Maibam Lokpa Ching (Red Hill) ah Peace Park, ti ah le kihia, Peace Memorial Hospital umta a hidan gen in Second World War ah Japanese War Veterans te hiatzingna ding ah zia hospital chu kisiamdawk hin a gen hi. Japanese Hospital Manipur a umna a pat Manipur leh Japan kal hawi zawm zel a hidan sulang ah genkawm in hospital authority te chu medical facility umlona mun - tanggam leh mun haksatna mun te ah le chia ding leh health services pawimaw leh migenthei te kithuapina ding ah panla ding in chialna a bawl hi. Natna chi chuam chuam - malaria, tuberculosis, cholera etc leh HIV/AIDS banah H1N1 te a pat kivenna ding leh dodalna ding ah sen leh so um te chu Manipur context ah thil thupi mama hidan le a gen hi. Tu ah state in dengue leh Japanese Encephalitis natna ziak ah challenge tuak zing a hidan gen in, kituptak ah dodalna a um ding pawimaw hin a gen hi. Chuleh, Japanese Hospital staff te’n natna chi chuam chuam um te dodalna ding ah panlakna a nei zing uh chu thupi mama in a gen hi.

VPC GHQ President candidate ding ah S. Jamthang Baite in nomination file

Lamka, Aug. 06 *(Nisin Thuhiltu)* : Vaiphei Peoples’ Council (VPC), General Headquarters President leh Vice President thak ding telna (election), 25th August 2017 leh a umna ding ah 5th August 2017 ni a khan, S. Jamthang Baite of Moreh in President candidate ding in nomination a file hi. Election Commission a pat a kihiat dan in, President candidate ding ah nomination file mi pali umta leh Vice President candidate ding ah nomination file mi 2 um ah hiat a hi. President candidate ding ah nomination file ta te chu - Hauneilal (date 7/7/2017); Ngulzathang (date18/7/2017); Khatkhotong Baite (date 22/7/2017) leh S. Jamthang Baite, Moreh (05/08/2017) te a hiu a,Vice President ding ah nomination file a hiu leh Lalzakhai Vaiphei (date 22/7/2017) leh Lunkhomang Vaiphei (date 26.7.2017) te a hiu. Hiatthei khat chu Election commission in June 20, 2017 ni notification a sua a hia, VPC constitution tawh kituak ah titna nei te’n nomination fee pia'n nomination file thei ding uh ti a hi. Nomination ahileh July 1- August 10, 2017 sung ah file thei ding, Aug. 11 ah scrutiny um ding, Aug. 12-14 sung ah withdrawal bawl thei ding a hi. Nomination form dawi ten VPC Office Bethel Veng, New Lamka ah lakthei ding ti a hi.

Church Leaders Consultative Meet nei

Lamka, Aug. 6 *(Nisin Thuhiltu)* : Vaiphei People's Council (VPC), Eastern Block saina nuai ah a chiata August 4, 2017 ni'n Tribal Research Institute (TRI), Chingmeirong, Imphal ah "Oneness in Christ" ti thupi tawh 'One Day Consultative Meet for Church Leaders of Eastern Vaiphei' nei a la hi. Consultative meet a hileh zingkal lam dak 7 ah pat a um in sunnung dak 3 tiang nei ah um in session 2 ah khen a hi. Zia hun a chun, Kochuam leh nam thudawl ah maban panlak ding dan genkhawmna nei a hia, Kochuam puitu, University ah professor, lecturer, civil servant leh nam leader hunkhawp te'n le a uap u'i.

PTC Unit thak hawng

Lamka, Aug. 6 *(Nisin Thuhiltu)* : Paite Tribe Council (PTC) GHQ vaisaina ah tuni’n G. Tonzang khua ah PTC Unit phudawna nei a hia, L. Pumlianpau, President, PTC GHQ in Unit thak hawndaw a hi dan a puandaw zaw a chun Chinkhenmang in Unit vaipaw thakte kitiamna a nei sak hi. Unit vaipaw ding ah kitiamna nei te a hiuleh; President - Upa V. Chinsiam, Vice President – Haukholian, Secretary – Ngamminlun, Assistant Secretary – Tunpau Thomte, Finance Secretary – H. Lamzathang, Treasurer – David Chingousuan leh Executive Member ding ah S. Kamkapsing, S. Gouzakap leh S. Pauzagin te a hiu. Pumlianpau, President, PTC GHQ in a thugenna a chun, tulai khawvel ah Facebook leh WhatsApp ah puitute kigenna tam mama in a sepdaw zosia uh puandaw ding chu a kilawmlo tiang le umsek a hi mipi te’n le ahiatthiam uh pawimaw hi’n a gen a, bang hem tia hiachian nuam te’n office ah kanchian zaw ding in le a gen hi. PTC G. Tongzang Unit a hileh PTC New Lamka Bock nuai ah Unit 16 na a hia, Unit sung ah innkuan 27 a um hi.
NT 07aug2017c

Police Station mai ah Sit-in-Protest nei di

Lamka, Aug. 6 *(Nisin Thuhiltu)* : Sawisak lup a um Thangkhanlun Taitom thina tawh kisai ah bawldaw a um, JAC againts the Killing of Thangkhanlun (JAC-AKT) in tuni’n Simte Inn, Simveng ah maban panlak ding dan genkhawmna a nei a, zia hun a chun Churachandpur District sung ah nam chuam chuam a pat leader leh Philanthropic Organization chuam chuam puitute’n uap in ngaidan a gen khawm u’i. JAC-AKT in Thangkhanlun thana tawh kisai ah kigawl, Romeo matdaw na ding ah District Administration leh District Police khut ah huntawp a piak a bei tawh kitawn in maban ah Sit-in-Protest neihto hiding in a gen a, mipi dawtna leh ngaidan sunkhawm a um a pat minautang haksatna hiatpi kawm ah kiphinna dang sang ah Sit-in-Protest nei ding ah a thupuk uh hi’n le a hilchian hi. Zing, August 7, 2017 a pat Police Station mai ah sit-in-protest nei ding a hina ah mipi a tam thei pen chiakhawm ding ah JAC AKT in chialna bawl kawm in a thil phût uh sukpitin a hilo leh a pawimaw dan zil ah DC Office leh SP Office mai ah le kiphinna chu nei hi ding ti’n le a gen hi.
NT 07aug2017b

Dorcas Veng VA leh YPA Unit in demna bawl
Lamka, Aug. 6 *(Nisin Thuhiltu)* : Dorcas Veng Village Authority leh Young Paite Association (YPA) Dorcas Veng Unit in thusua a bawlkhawmna ua chun, sawisak lup a um T.Thangkhanlun s/o T.Pumthang kithana chu nasatak ah dem leh thiamlo chan hi’n a taklang a, Assam Rifles leh numei police te’n Dorcas veng a cheng, Mankhanniang w/o Vumthianlal, ZRA town commander a sawisaknau chule nasatak ah dem hi’n le a taklang hi. Thiltung chu kuama’n nam thil ah lalo ding ah dawn kawm in vengsung ah zia gual chu a um sak talo ding in a kisaipi te kiang ah chialna a bawl hi.

General Strike
Imphal, Aug. 6 *(Nisin Thuhiltu)* : All Manipur Police Constable (male/Civil) Viva-Voce Completed Candidate Batch "2016, 10+2" in thusua a bawlna a chun, government in July thasung ah recruitment result puandaw ding a la ti himaleh a sukpitin lona chung ah lungkimlo suklatna ding in August 6 zankhang a pat August 7 zankhang tiang Manipur pumpi general strike um ding hi'n a taklang a, kiphinna chu Civil Society Organisation (CSO) leh club chuam chuam banah meira Paibi te'n le zathuapna pia chiat ding in le candidate te’n a dawn u’i.

Delhi Zillai FC in final pek di

New Delhi *(Nisin Thuhiltu)* : Hmar Students' Association (HSA) Delhi te saina 10th Delhi Hmar Premier League/(L) Fimlunghnem Memorial Trophy 2017 chu DDA Sports Complex, Vasant Khunj mun in a chia tha zing hi. Zia tournament a hin a diak ah Manipur a pat student te haw team chuam chuam bawl in a kihel ua, League match haw a chai zaw nung un, Delhi Zillai FC leh Muvanlai FC chu August 12, 2017 ni leh final ah ki maitua ding a hiu. Delhi Zillai FC a hileh Delhi mun ah Zillai lekha sim ah um bana sepna nei, ball pek lunglut mama te kigawmkhawm a hiu a, Team Manager ah Ginlalchung, Team coach in Kamminlian leh Team Captain in Major Gigin Baite te a pang ui.

3-Member Committee in khualna nei ding: Minister Shyamkumar

Imphal, Aug. 6 *(Nisin Thuhiltu)* : Thangmeiband MLA Kh. Joyskishan in tunchai State Assembly Budget Session last day ni ah Imphal Municipal Corporation (IMC) fund diklo tak ah kimang ah ngawna a siamna tawh kisai ah Thounaojam Shyamkumar, Minister Municipal Administration, Housing and Urban Development (MAHUD) in tuni, press conference ah hilchianna a bawlna a chun, Special Secretary MAHUD mapui three-member committee in Imphal Municipal Corporation (IMC) ward zosia public funds a kimatdan khualna nei ding a hidan gen in, diklo tak ah fund kimang ah kigen chu ngai serious mama hin a gen hi. Government masa nuai ah kum 2012-2016 sung ah fund kimatna kituptak ah khual (investigate) hiding in a gen a, official thiamlo chan a um leh law of land tawh kituak ah gawtna piak hiding in a gen hi. Chuleh, investigation bawlna hapta 1/ 2 sung lut ding hn a gen a, thiamlo chan ah um te kuama suakcha lo ding hin le a gen hi. Congress MLA Kh. Joykishan in ngawna a siam dungzui ah danlo gual tak ah road roller 1, water tanker, tipper trucks 2, tractors 2, Mahindra Jeep 1 leh Ambassador car 1 auctioned kibawl ti le a hi.

RTE lawtinna ding ah pankhawm pawimaw: Education Minister

Imphal, Aug. 6 *(Nisin Thuhiltu)* : Manipur Education Minister Th. Radheshyam in tuni’n khuallian hina tawh Heingang ah Heingang United Clubs Organisation (HUCO) saina’ 8th Meritorious Award 201 hawpdawna a uap a, ama’n a thugenna a chun, government schools kituplo tak ah um te siam hawi a hitheina ding ah nu leh pa, local mite kithuapina pawimaw a hidan gen in, Right to Education Act (RTE) nuai ah naupang kum 6 a pat kum 14 kikal mite free & compulsory education kiti chu panlak khawmna bei ah lawting theilo ding hin a gen hi. Awards Ceremony mat ah a um sek chu student te tilkhona hawitak a hidan le gen in, a lawting te sang ah a lawsam te tilkhona pawimaw zaw a hidan le a gen hi. Hun matna uap, Joint Director MAHUD, Ng. Uttam, MCS in a thugenna a chun, mi zosian mi lawting hiding leh mi nuamsa hiding tup chiat maleh society a ding ah thilpha bawl thilpawimaw mama hin a gen a, student te chu mi dang te compete thei ding ah panla chiat ding leh hun matdan thiam ding in chialna a bawl hi. Commandant 1st MR N. Herojit Singh, IPS in a thugenna a chun, student te’n a pha chuam ding te ngaikhawk ding leh a phalo lam thil te ah kisukbuailo ding pawimaw in a gen hi.

Education in literacy bep a ngaikhawk lo ding: Minister Karam Shyam

Imphal, Aug. 6 *(Nisin Thuhiltu)* : Consumer Affairs, Food & Public Distribution Minister Karam Shyam in tuni’n Chief Guest hina tawh Mongshangei, Imphal West ah Trinity Public School, Annual School Day Function a uap a, ama’n a thugenna a chun, education in literacy lam bep a ngaikhawk lo ding, naupang te a tun theina ding tiang uh a tun theina ding leh society phatchuampi a hitheina ding uh ngaikhawk ding pawimaw hin a gen a, khangthak student te mi lawting a hitheina ding ua teacher leh guardians te’n mawpuakna liantak nei un a gen hi. Naupang te chu knowledge, discipline leh moral character hawina ding ah tilkhona piak ding pawimaw in le a gen a, school teacher te chu student te ding ah role model hithei ding ah panla chiat ding in chialna a bawl hi. Guest of Honour hina tawh hun matna uap, Dr. RK. Lenin Singh, Professor, Department of Psychiatry, RIMS in a thugenna a chun, teacher te’n marks hawi muna ding mai ah student te ziltilo ding a hidan a gen in, a talent uh amat thiam theina ding ua panlakna a nei ding uh pawimaw hin a gen a, student te ding physical fitness a pawimaw dan a gen hi. Zia hun matna chu Wangkhemcha Shamjai, President All Manipur Working Journalist Union (AMWJU), Khoisnam Sarma Devi, SP Traffic Control Wing, Imphal City te’n le a uap ui.