Nisin Thuhiltu - 06 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

ART Centre a pat damdawi tamtak kigu dawk

Lamka, July 5 (Nisin Thuhiltu) : A 3 veina ding in zankal ah melhiatlo pawl khat in ART Centre, District Hospital bulu in damdawi, Oral Subsitution Therapy (OST) tamtak a pawdawk ui. ART Centre ah shutter kamna banah a sung ah damdawi kawna pindan chuam chuam kikamna tâla zosia khetsiat a hia, OST a kimang, P. Buprenorphine (2 mg) chang 6,996 gukdaw in a um hi. Damdawi kigukdawna tawh kisai ah Dr. Leivon Bellamy Kom, Medical Officer in-charge, OST Centre in police ah Report a bawl dungzui in tuni sunnung in Lunkhomang Khongsai, Additional SP (Law & Order) leh Johnny Sharma, SDPO Churachandpur malat Police Team khat in a mun ah etthâkna a nei hi. Centre in tu dinmun in Registered Client 573 nei in zia lak a chun Regular Client 160 tuam a um hi. Centre a hileh District Hospital huangsung ah um maleh Block dang tawh a kigamlat ziak in Staff te’n thil nuamlo tamtak tuakzel uh hi’n a kigen a, zalentak ah guchate gamtat theina a hi banah Staff khenkhat in vauna le tuaksek uh hi’n a kigen hi.

Monthly Review Meeting

Lamka, July 5 (Nisin Thuhiltu) : Churachandpur a ding ah District AIDS Control Officer (DAPCU), Dr. Romeo Sanate in tuni’n ama office chamber ah District AIDS Prevention & Control Unit (DAPCU), Churachandpur nasepdaw tawh kisai Monthly Review Meeting a ko a, zia hun a chun Nishi, Project Officer, TI-NGO a pat Report piakna nei in Benjamin, District Superviser, DAPCU, Churachandpur in Meeting nunungpen ah thupukna lak a umte nung etkikna sepdaw um te genlatna a nei hi. Nishi in LRRC Drop-in-Centre (DIC) chu New Bazaar a pat Bungmual ah chawn ding leh LRRC Sub-DIC mang ah Singngat ah OST Satellite hawn hiding hi’na gen a, MACS in Annual Action Plan a bawl chu NACO in pawmpiak hi’n le a gen hi. Benjamin in June 15, 2017 ni a la um meeting a chun People Living with HIV (PL-HIV) te zosia kiang ah I-Card piak ding tawh kisai ah DAPCU in I-Card a piakdaw thei masang ah Government hiatpi ICTC test ah HIV positive a hina Result chu matthei ding ah thupuk a um hi’n a gen hi. June 16, 2017 ni ah DC tawh Meeting hun ah PL-HIV-te I-Card piak ding tawh kisai ah First Round a I-Card bawlna’ mat ding ah District Administrator in Rs. 10,000 pia ding ah kimansa um hi’n le a gen hi. Overdose Management tawh kisai ah Transport Association leh District Administration in kihona nei ding ban ah June 20, 2017 a pat ICTC District Hospital a RPR test le bawlthei hita hi’n le a gen hi. Meeting a chun Counselor, ART Centre, Targeted Interventions ah Project Manager zosia, District sung a National AIDS Control Program nuai ah Link Worker Scheme chuam chuam a palai banah District Program Manager, NHM Churachandpur te a pang u’i.
NT 06july2017b

District Level Badminton Championship khak hita

Lamka, July 5 (Nisin Thuhiltu) : Churachandpur District Badminton Association (CDBA) Tournament Board in a sai, 17 veina District Level Badminton Championship 2017 chu tuni’n khak a hi. CDBA Indoor Stadium, Hiangtam Lamka ah tuni’n Category chuam chuam a ding ah final match nei in a hi. Hun matna chu Bijoy Koijam, President, Manipur Badminton Association leh IK Muivah, IPS, DIG (Range-III), Manipur te’n Guest of Honor hina tawh uap ua, Shyamlal Poonia, IAS, DC Churachandpur in Functional President leh Thangkhosuanmung Guite, MDC, Chief of Hiangtam Lamka in Chief Host hina tawh a uap ui. Zia hun a chun, Taichin Gangte, Secretary, Tournament Bard, CDBA in tournament tawh kisai report piakna nei in Guest te a pat thugenna a um hi. Chief Host Thangkhosuanmung in badminton ah lunglut mama hi ah taklang kawm in badminton chu taksa a ding bep hilo in lungthim a ding a le phachuam mama hi’n a gen hi. Kihelna in gamgi neilo a hina dungzui in buaina umlo final tiang tung thei in zia chun kinaina hung tut ding ti’n le a gen hi. Functional President, Shyamlal Poonia in taksa yhuzawna ding ah kihelna pawimaw a hi dan genlang kawm in taksa hawi taka h sawizawi a hi masia lungthim ngaituana le lamzang theilo hi’n a gen hi. Guest of Honor IK Muivah in Badminton kihelna chu thingtang District te ah a khan theina ding ah panlak a um hi’n a gen a, Kakching leh Thoubal ah Coaching hawitak ah chiatha in Indonesia a pat Coach hung te’n ziltilna a piak gual gual ua thingtang district zosia a le Coaching pat a hi thei na ding ah panlak a um hi’n a gen hi. Zia hun chu Manipur DGP leh Hill District Badminton Association, Manipur ah President, LM Khaute, IPS chu Chief Guest ding ti himaleh a lemchang lo ziak in Tournament Board panpina ding in sum Rs. 25,000 a pia’i. Closing Ceremony zaw in Category chuam chuam ah Final match kihelna banah Exhibition Match le a um hi. A 17-veina District Badminton Championship 2017 ah Under 14 Boys single ah mi 10 leh double ah 4, Under 17 boys single ah mi 6 leh double ah 6, under 19 boys single ah mi 11, double ah 5, open men’s single ah mi 20 leh double ah 23, women open single ah mi 5 leh double ah 4, kum 35 chunglam single ah mi 10 leh double ah 15, kum 40 chunglam single ah mi 4 leh double ah 9, kum 45 chunglam single ah mi 4 leh double ah 4, kum 50 chunglam double ah 4, kum 50 chunglam men’s veteran single ah mi 5 leh double ah 4 a pang ua, Tournament ah Under 14 a pat Under 19 numei leh pawsal single ah khatna’n latu’n kipakman Rs. 1,500 leh runners-up in Rs. 1,000 a sâng ua, Open Double ah winner in Rs. 2,000 leh runners-up in Rs. 1,000, Men’s Open Single ah winner in Rs. 2,000 leh runners-up in Rs. 1,000 banh Men’s Open Double ah winner in Rs. 3,000 leh runners-up te’n Rs. 1,500 sang ua, kipakman lakha zosian Yonex a pat rucksack khat chiat a kisâng ui.
NT 06july2017c

Book Fair chia tha zing

Lamka, July 5 (Nisin Thuhiltu) : Bookline, Kolkata in July 1 a pat “4th Book Fair 2017” a nei chia zawm zel in tuni’n le mi hunkhawp in lekhabu chuam chuam a chaw u’i. Book Fair ah lekhabu chi chuam chuam, a neu a pat a lian chan in a simthei ding tuanthu bu ban ah student te ding Study Material chuam chuam, naupangte lunglut thei ding lekhabu chi tamtak chawk thei ding in a um a; Novels, literature, Comics ti te pang in lekhabu sîng val a um hi. Zia hun ah lekhabu te chu a man kizik sang ah 10% a tawmzaw’ kizuak a hia, Delhi, Kolkata, Guwahati ah lekhabu kizuak te sang ah a man niam zaw a hi. Kolkata in a hileh Manipur Synod inntekna nuai ah Book Fair chu a sai leh July 1 ah DC/CCpur Shyamlal Poonia, IAS in a la hawn a hia, July 8 leh khak hi ding a hi.
NT 06july2017d

Ex-Servicemen Rally nei ding
Lamka, July 5 (Nisin Thuhiltu) : A hung tung ding July 8, 2017 zingkallam dak 9:00 leh Khuga Dam a um 6 Sikhs Light Infantry saina nuai in District Training Center, Tuibong ah Pensioner te a ding in Ex-Servicemen Rally nei hi ding a hia, zia hun chu DC/CCpur leh SP/CCpur banah 27 Sector Assam Rifles te'n uap ding a hiu a, Zilla Sainik leh Bank chuamchuam te'n ex-servicemen te haksatna dawn zangkhaina ding in stall bawl ding a hiu. Chun, natna chuam chuam neite a ding in free medical camp le um ding a hia, District Hospital a pat doctor chuam chuam te'n damlote en in a thawn ah damdawi le pia ding a hiu. Rally a chun, Lamka khawpi leh a kiang tuam a um Ex servicemen leh Veer Naris a tam thei pen pang ding in CO/Khuga Batallion in chialna a bawl hi.

MSRLM leh M/s Apollo Medskils Ltd in DDU-GKY chiapina ding ah MoU suai kai

Imphal, July 5 (Nisin Thuhiltu): Manipur ah Deen Dayal Upadhyaya Grameen Kaushalya Yojana (DDU-GKY) implement bawlna ding in Manipur State Rural Livelihoods Mission (MSRLM ) in M/s Apollo Medskils Ltd tawh tuni’n New Secretariat office ah first Memorandum of Understanding (MoU) suai a kai a, zia hun chu Rural Development and Panchayati Raj Minister Thongam Biswajit Singh in le a uap hi. Manipur State Rural Livelihoods Mission (MSRLM ) thasik in State Mission Director, R Sudhan, IAS in suai a kai a, M/s Apollo Medskills lam a pat Senior Vice President-Projects S Sridhar in suai a kai hi.
DDU-GKY thiltup ahileh National Rural Livelihoods Mission nuai ah rural area ah khangthak te skill hawitak neisak ding leh poverty a pat productivity sua ding ti a hia, MSRLM in a tup ahileh March 2019 tiang ah rural area ah khangthak 10518 te skill training neisak ding ti a hi.

Home Guard Employee te’n tuilet ziak ah haksatna tuak te panpina ding Rs 1,00,000 donate

Imphal, July 5 (Nisin Thuhiltu): Manipur Home Guard Employees Welfare Association in tuni’n Chief Minister’s Secretariat ah Chief Minister N. Biren Singh kimupi in tuilet ziak ah haksatna thuak te kithuapina mat ding leh CM Relief fund ah lut ding in Rs 1,00,000 donate a bawl ui. Zia hun a chun, Chief Minister N. Biren Singh in Home Guards te panlakna pakcha mama a hidan genkawm in state sung ah haksatna tuak te dawn zangkhai theina ding ah panlakna pawimaw in a gen hi. Hiatthei khat chu, tunai ah tui let in chenna inn a 1000 ah sim te a chup ziak ah mi tamtak te chenna leh giakna kituplo tak ah khawsa a hiu a, State government in kithuapina ding ah panlak theina lam chuam chuam ah panlakna neizing kawm ah “State Calamity” hi ah a puan nung ah 24X7 State Disaster Control Room (0385-2443441) le hawn a hi.

Manipur ah Employment dinmun in niamkiaklam manaw
Imphal, July 5 (Nisin Thuhiltu): Directorate of Employment, Employment Exchange Complex, Lamphelpat in tuni a taklat dungzui in February 2017 ah Employment Exchange office ah registration bawl thak kiam deu in a taklang hi. Tha masa January ah registration bawl mi 4,080 um chu February ah 763 tung in a taklang a, zia lak a chu numei 240 leh pawsal 523 um in a taklang bawk hi. Imphal West district chu applicant 174 tawh applicant tamna pen district in a pang a, Tamenglong ah applicant tawmpen leh applicant khat le umlo in a taklang hi. Chuleh, a chiata tha 10 sung sang ah career information vena nei, vacancy notified le niamkiak mama in a gen a, career information vena nei, vacancy notified khat le umlo in a gen hi. A langkhatlam in February tha sung in Self Employment Promotion Cell ah register kibawlsa le san danglam bang umlo in numei 1, 219 panna applicant 4,370 a hizing hi.

Kangpokpi District ah thingnuaimi cadre 6 mat ah um
Kangpokpi, July 5 (Nisin Thuhiltu): Kangpokpi District huapsung mun chuam chuam in Red Shield Division troop te’n Kuki Unification Frontal Organization (KUFO) leh Thadou People’s Liberation Army (TPLA) cadre 6 a man ui. KUFO cadre khat chu 38 Assam Rifles in Ccommand Maj. Syed Irfan, Post Commander, 38 AR Kpi Post mapuina nuai ah Kangpokpi DHQ ah a chiata June 29 zan dak 10:30 ah a khah general area Kangpokpi DHQ ah amatdaw uh a hia, mat ah um KUFO cadre chu Satkholen@ C. Sent (28), s/o Doukholun of Lasan village , T.Waichong Sub Division, Kangpokpi District hi ah hiat a hi. Chun, National Highway kiangnai ah um Changoubung ah TPLA cadre khat zani a khan 38 Assam Rifles Kangpokpi Post leh Maram Battalion in joint operation a nei hun un a man dawk kit ua, mat ah um cadre chu Demginlun Kipgen (18), s/o Haokai Kipgen of Kangpokpi Ward No.2 a hi. Changoubung village ah sum demand a bawl hun ah matdaw ah um hin le a kigen hi. Zani ma a khan, Senapati Brigade nuai ah Jwalamukhi Battalion troop te’n Saikul Sub Division ah KUFO cadre 4 a man dawk kit ua, mat ah um te chu - Henjahao Kuki (19), s/o Mangchong Lhouvum of Thenjang village, T.Waichong Sub Division; Letminlen Lhoujem (26), s/o Jemlun Lhoujem of Wakotphai village, T.Waichong Sub Division; Thongkholun Lhoujem (20), s/o Sehjang Lhouvum of Motbung village, Saitu Sub Division leh Lunjahao Lhouvum (23), s/o Thangkom Lhouvum of Lasan Village, T.Waichong Sub Division te a hiu. Thudawnna’n a taklat dan in mat ah um cadre te ki puan dan ah Kangpokpi District huapsung ah amau organization min ah dawi umlo nasep chi chuam chuam chiapi uh leh April 13 ni Forest Officer Angam Kom kidnapped bawlna kigawl ah Letminlen Lhoujem kipuang in a gen a, mat ah um te a pat automatic rifle 3, pistol 1 leh meichang hunkhawp banah galvan zat chuam chuam le matdaw ah um in a gen hi.

Sadar Hills ADC Canteen hawnna nei
Kangpokpi, July 5 (Nisin Thuhiltu): Sadar Hills Autonomous District Council office complex ah tuni’n Canteen kisazo thak hawnna a um a, Thangjakam Misao, Vice Chairman, ADC Sadar Hills in DK.Thangboi, MCS, Chief Executive Officer, SHADC Kangpokpi leh department official chuam chuam te uapna tawh Canteen a hawng hi. Canteen hawnzaw in SHADC Kangpokpi, Conference Hall ah semtu mi 12 retired ta te thaakdawna (farewell party) a um hi. Semtu retired ta te chu - Irene Doungel (Accounts Officer); Tingneilam (Accountant); Thanglen (PA); Chongneilhing (DIS); Shongkhokam Gangte (R/M); Kumar (Driver); Onjam Neishel (FA); Hempao Vaiphei (Chowkidar); Ngamsong Kamei (Chowkidar); Thangkam Doungel (Peon); Sehlal Hangshing (Peon) leh W.Chaoba Singh (Peon) te a hiu. ADC Sadar Hills Chairman, Haokholal Hangshing, Vice Chairman Thangjakam Misao, Executive Members leh ADC Sadar Hills Member te banah department chuam chuam ah official leh staff te’n zia farewell party chu a uap ua, Chairman Haokholal Hangshing in a thugenna a chun, retired ta semtu te panlakna thupi mama a hidan gen in, ritired tiang ah sepna sem tung thei ah a umna chung un kipakpi thu le a puang hi.

Rs 33 lakhs man ding Ganja man dawk
Imphal, July 5 (Nisin Thuhiltu): Local market ah Rs 33 Lakhs man ding leh International market ah Rs 1 crore man ding Ganja tuni'n Imphal East District Police te'n Palace Coumpound, Imphal kiangnai in truck khat a pat in a man dawk ui. Matdaw ah um Ganja te chu plastic plothene 107 ah ki chuun, chunkhat ah kg 15 -16 kg ah gik a hi.

DC/ Thoubal in SDC Lilong Sub Division man ding ah SP hiatsak
Imphal, July 5 (Nisin Thuhiltu) : Thoubal District Deputy Commissioner , L Nabakishwar Singh, IAS in Thoubal District Superintendent of Police (SP) chu SDC (HQ) Lilong Sub Division, Mr Md. Itocha man ding in a hiatsak hi. Tui-let ziak ah mitam tak in haksatna a tuak lai ua, official duty kihiatlo sak a, a hi ding gual tak ah nasep a neilo ziak SDC (HQ) Lilong Sub Division, Mr Md. Itocha chu a chenna Hiyangthang, Thongkhong, Imphal West ah matdaw ding ah Deputy Commissioner in SP a hiatsak a hia, SDC in kituptak ah panlakna a neilo ziak ah flood relief operation kituplo leh publice servant khat um ding dan tawh kituaklo ah a um ziak ah a chung ah arrest warrant issue bawl ah um hin le Thoubal District Deputy Commissioner in a taklang hi.

Plastic âktui khap ah um
Moreh, July 5 (Nisin Thuhiltu): Lawrence Kapkhenmang Munlua, MPS, SDPO/ Immigration Officer, Morech in Assisatant Commissioner Custom Preventive Force, Moreh a hiatsakna a chun, China product Myanmar a pat Manipur state sung kipua lut, Plastic âktui (eggs) kizuak a hidan hiat a hi tawh kitawn ah zia âktui (eggs) product te chu mihing a ding ah phalo leh damtheina lam sukha mama a hina chung ah Moreh gate no.1 & 2 ah Plastic âktui (eggs) puaklut khap ding leh khak ding in a hiatsak hi.

Manipur ‘Miracle Man’ IAS Armstrong Panme in Simhaini sin leh School naupang te dinner neipi sek

Tamenglong, July 5 (Nisin Thuhiltu) : _Manipur IAS Officer, Facebook page mang ah lampi siamna ding Rs 40 lakh hawldawktu leh government kithuapina panglo ah Manipur -Nagaland leh Assam kikawmtua theina ding 100km ah sau lampi “Peoples’ Road,” kiti siamdawk tu ah mitamtak in a hiat, ‘Miracle Man’ ti hial khawp ah kigen, tu leh tu Tamnenglong District, Deputy Commissioner Armstrong Pame in Simhaini (Friday) sin leh Class 5 -10 kikal simlai school naupang 10 te rotation basis ah select bawl in dinner a neipi sek hi. Government kithuapina panglo ah 100km ah sau lampi “Peoples’ Road,” a siamdaw mitamtak in thupi leh lamdang a sak uh bei nailo ah Simhaini (Friday) sin leh student te dinner a neipi sek hi mitamtak te lamdang sak khat in a pang kit hi. ‘Miracle Man’ IAS Armstrong in School naupang te dinner a neipina ziak ahileh District Administration khat panlak dan leh hun matdan te school naupang te’n a hiatthiam ding uh dawina ziak leh tunung ah maban hawitak a nei theina ding ua tilkhona tawh hun a matpi sek hin a kigen hi. Chuleh, zia hun a chu school naupang te’n a thanawpnau leh a lungtup teu Armstrong Pame genpi sek un le a kigen hi. Armstrong Pame ahileh St. Stephen’s College, Delhi ah kum 2005 a khah graduate zo, Civil Services Examination 2007 ah Indian Revenue Service (IRS) (Custom and Central Excise department) mu a hia, UPSC exam 2008 ah Indian Administrative Service (IAS) piak ah um a hi. Kum 2012 a khan CNN-IBN Indian of the Year in Public Service category ah nominate in a um a, kum 2015 a khah India’s Most Eminent Indian Administrative Service (IAS) Officer Award 2015 award piak in a um hi.
NT 06july2017e

Chief Minister mapuina GST tawh kisai genkhawmna nei; Sub-Division level ah SDO te GST Nodal Officer hiding

Imphal, July 5 (Nisin Thuhiltu): Chief Minister N. Biren Singh mapuina tuni’n Conference Hall, Old Secretariat ah Goods and Services Tax (GST) tawh kisai in high level meeting a um hi. Meeting hun ah Chief Minister a kisaipi thuneitu te indirect tax regime thak kituptak ah hiatchian gua ding leh grassroots level ah mipi te hiatthiam sak ding pawimaw in a gen a, revenue/tax collection bailamzaw leh lemchangzaw a um theina ding ah panla chiat ding in chialna a bawl hi. DC leh SDO te revenue collection lam thil te ngaikhawk ding leh a hawithei ding pen ah panla ding in le hiatsakna a bawl a, high level meeting chu GST hawina leh hawilona genkhawmna ding ah um a hidan a gen hi. Goods and Services Tax (GST) kiti thil thak a hina chung ah Government machinery te’n implementation a hawi theina ding ah kituptak ah panlakna a nei khawm ding pawimaw a hidan le a gen hi. Deputy Chief Minister Yumnam Joykumar Singh, Chief Secretary O. Nabakishore, Administrative Secretary te, Deputy Commissioner te, SDO leh high ranking officer chuam chuam te’n zia meeting chu a uap ui. Chief Minister in Old Secretariat complex ah biometric attendance machine leh room chuam chuam te le etchilna a nei hi. Meeting zaw ah Chief Minister in thuthak lakhawm mite kiang ah a genna a chun, Sub-Division level ah SDO te chu GST Nodal Officer ah guat ah um a hidan uh a gen a, tax regime thak kituptak ah chiapi a hitheina ding ah grass-root level ah wareness pawimaw in a gen hi. Tumasang ah Centre leh State levels ah goods and services tax te chi chuam chuam 17 ah khen hisek maleh GST nuai ah zia tax zosia te chu gawpkhawm ah um hin a gen a, Prime Minister Narendra Modi in North East State te ding ah 90:10 Central – State share siamthakna nei maleh developmental project te State financial dinmun ah kinga a hidan a gen hi. Zia chu tawh kitawn ah Government in tax/revenue collection system a siamhawithak leh a sukhat thak ding pawimaw in le Chief Minister in a gen hi. State in tui-let ziak ah haksatna nasatak a tuakna tawh kisai ah Central Government a pat kithuapina banggual a um em? ti ah dawtna a dawnhuna a chun Chief Minister in State government in “State calamity” ah state dinmun a puan tawh kitawn ah Prime Minister kiang ah thil umdan a tut thei bep leh phone ah Union Home Minister Rajnath Singh thil umdan genpita hin a gen hi. State Plan size tawh kisai dawtna a dawnhuna a chun, tunung sawtlo ah State’s Plan size fixed bawl hiding in a gen a, state government in skill development, connectivity, infrastructure, drinking water leh basic amenitie te ngaipawimaw mama in a gen hi.