Nisin Thuhiltu - 18 June 2017

User Rating: 0 / 5

Star InactiveStar InactiveStar InactiveStar InactiveStar Inactive
 

TUIBUANG AH OLD AGE HOME SAK HIDING : MINISTER NEMCHA KIPGEN

Tuibuang, June 17 (Nisin Thuhiltu): Saikholal Ideal School Campus, Canan Veng, Tuibuong ah tuni’n Kuki Senior Citizens’ Welfare Forum (KSCWF) in 4th Anniversary a mang a, zia hun chu Chief Guest hina tawh Social Welfare Minister Nemcha Kipgen in a uap a, DC, Churachandpur Shyam Lal Poonia, IAS, Chairman, ADC Churachandpur Khaipao Haokip, DSWO A. Umarani Devi te’n Special Guest, President leh Host of Honour hina tawh a uap ui. Minister Nemcha Kipgen in a thugenna a chun, teksia te kithuapina thei tiang ah kithuapina peding a hidan thutiam bawl in, teksia te ngakhawk thak ding pawimaw hin a gen hi. Tuibuong, Churachandpur ah Old Age Home sak hiding in le a puang a, tek sia te ding ah centrally sponsored schemes chuam chuam te chu a mu dingdawl te’n a mutheina ding panla ding a hidan le a gen hi.Indira Gandhi National Old Age Pension Scheme (IGNOAPS) nuai ah kum 80 chung lam mi te’n pension sum Rs.200 a musek uh chu Rs 400 ah sukpun ding ah panlakna um hin le a gen a, old age pensions sum kihawp dan a diklona tawh kisai ah complaints tam tak a muna chung ah a kisaipi department official te thil umdan enzui ding ah a pawimaw dungzui ah action khautak la ding ah thupiak ah um hin a gen hi. Minister Nemcha in a gen zelna a chun, old age pension card khenkhat pensioner te kiang ah umlo, agents te kiang ah um tamtak um a hidan a gen a, District Social Welfare Officer (DSWO) mapuina nuai ah ziagual card te chu a neitu diktak pensioner te a piak ding ua thupiak nei a hidan a taklang hi. A kisaipi DC leh department officer te le teksia te bailam tak ah a tun theina ding mun ua old aged sum hawm ding in hiatsakna a bawl a, old age pension sum kihawpna MLA te’n a uap ding uh pawimaw in a gen hi.

ZILLAI KANGVAI IN FELICITATION PROGRAMME MANG

Kangvai, June 17 (Nisin Thuhiltu): Zillai Kangvai Block (ZKB) in tuni’n Kangvai Community Hall ah tukum 2017 ah Cclass X leh XII zo thak, lawtinna sang tak tak neite kipakpina (Felicitation Programme) a nei a, zia hun chu P. Kamkholal, EM, ADC, Churachandpur, Vaiphei Peoples Council (VPC) Kangvai Block, Chairman Lamneimang Vaiphei leh Young Vaiphei Association (YVA) Kangvai Block, President K Chung Vaiphei te’n khuallian hina tawh a uap ui. Chun, khuallian te’n zillai te tilkhona thucha a gen ua, C Lalvenhawi leh El. Muan Vaiphei te a pat chawihawina laa ngaithak in a um hi. Hiathei khat chu, tukum 2017 ah Zillai Kangvai Block (ZKB) huap sung in zillai 18 te’n first division in class X a zo ua, zillai 31 te’n second division in class X a zo ui. Chun, zillai 25 te’n First Division in Class XII a zo ua, 27 te’n second Division in class XII a zo ui. Class X leh XII zo thak zillai 101 um tina a suak a, Zillai Kangvai Block (ZKB) topper in Haoboi Baite s/o Thenkholal Baite of B. Phaicham (83%),St.Mary's High School a pang hi. Lawtinna chang zillai te chu Rev. B Lala, KSP Khuga District in malzawl dawt piakna a nei hi.
NT 18June2017b

A THISA NU CHINGZASIAM KIMUDAWK
Lamka, June 17 (Nisin Thuhiltu): A chiata June 7, 2017 ni a pat a tunna hiatlo ah um Nu Chingzasiam kum 46 w/o Kapkhankhual of Vengnuam, New Lamka chu tuni’n M Geltam leh Suangnal kikal ah Tuai Tengvum ah a thisa mudaw in a um hi. Nu Chingzasiam ahihleh June 7 a pat a umna hiat a hilo ziak ah hawl ah um hizing a hia, tuni All Lanva Youth Club ALYC, Thangkhal Youth Organization TYO leh Zomi Youth Association, ZYA te panna mi pha chuam ngai pawl chuam chuam te Lanva lei ah kingak khawm ah a hawlna a sutzawm uh tawh kitawn ah mudaw ah um a hi. Chun, a luang chu tuzan dak 9:10 vel in Churachandpur District Hospital puak tung in a um a, innkuan a langnih leh police te dawina gual ah zing 18 June ah post-mortem bawl ding ah lemsak a hi. Chun, District hospital Morgue ah a luang kawi in a um hi. Himaleh a thina ziak kichian tak ah zia thu ziak a hi tiang ah hiat a hi puai.

CCPUR AH DENGUE CASE KHAT MUDAW AH UM

Lamka, June 17 (Nisin Thuhiltu): District Malaria Officer (DMO), Churachandpur mapuina tuni, June 17, 2017 sunnung in CMO Mini Conference Hall, CMO Complex ah National Dengue Day 2017 mat in a um hi. Zia hun matna chu S. Thangthianmuan, DPO in amapui a, Dr. Steve Minlun, Medical Officer, Behiang in khawtang ah Dengue natna a pat kiven ding dan leh ki etkawl dingdan tawh kisai genna nei in, Dr. Kimngaihching Simte, CMO Churachandpur in District sung ah Dengue natna dodalna ding ah mipi leh Health Staff-te nasatak ah pankhawm pawimaw a hidan gen in, Dr. Jamthianlal, DMO Churachandpur in District sung ah Dengue natna dodalna ding ah panmun kihawm ding leh nasep dingdan tawh kisai genna a nei hi. State leh Centre government in Dengue natna a pat a thi kuama a umlo ding ti ah a tangko dungzui ah Malaria Department in State leh District zosia nasatak ah panlakna nei zing ah hiat a hi. A langkhatlam ah District Malaria Officer, DMO CCpur a pat a kihiatdan in JNV Tuinom Hostel ah um student kum 14 a upa pasal khat in dengue natna vei a hidan JN Hospital ah thisan test kibawlna result dungzui ah mudaw in a um hi. Dengue veitu ahileh ttutha June 13 ni ah District hospital ah ki-etsak, duty doctor ten hospital ah admit a bawl uh, a khawsikdan zil ah doctor ten dengue natna vei ding ah muangmaw, June 14 ah doctor ten JN hospital ah ki-enkawl ding ah a referred uh le a hi. JN Hospital ten thisan test a bawl nung ua, Dengue vei ahidan mudaw a hi. Zia chu tawh kitawn in Malaria Department ten tuni’n JNV Tuinom vapha in thokang nou hunkhawp a man ua, test ding in Imphal lam in a thawt ui. Dengue case mudaw ah a um tawh kitawn in Malaria Department in tuni nitak lam in JNV Tuinom leh Zenhang Lamka area ah fogging le a kap ngal ui.
NT 18June2017c

SYO IN CEO/ADCC KIPAKPINA NEI

Lamka, June 17 (Nisin Thuhiltu): Simte Youth Organization (SYO) General Headquarter in tuni, June 17, 2017 sunnung in Autonomous District Council (ADC), Churachandpur a CEO thak T. Kammuanlal Simte, MCS kipakpina nei in Simte Puanlaisan silsakna leh pauchap piakna hun a matpi ui. Rev. Dr. Liankhanlal in Kammuanlal a ding in malzawl dawt piakna a nei a, SYO GHQ lawiupa te tawh holim khawmna le a nei ui. T. Kammuanlal Simte, CEO ADC Churachandpur ahileh District a ding ah Chief Executive Officer (CEO) a 38-na a hia, ama’n a chiata June 8, 2017 ni a khah Soiminlian Lengen, MCS a pat mawpuakna a lak leh a thasan a hi. Chuleh, T. Kammuanlal Simte hi Simte sung a ding ah Autonomous District Council, Churachandpur a CEO dinmun tute lak ah a pani na a hia, tumasang a khan T. Ngaihte in October 1, 1981 a pat December 2, 1981 sung in CEO mawpuakna a al tuk hi. Hun a matzaw un, Khaipao Haokip, Chairman, ADC Churachandpur le Simte Puanlaisan silsakna a nei ui.
NT 18June2017d

ZAN-KHAWVAK PAUCHAPKHAWMNA NEI
Lamka, June 17 (Nisin Thuhiltu): Prayer Department, All Tribal Women Union (ATWU) General Headquarter mapuina June 16, 2017 nitak 8:00 a pat a khan Beulahlane ah gam leh nam chungchang banah Tribal Movement tawh kisai in zan khawvak in pauchap khawmna a nei ui. ATWU ahileh Tribal Movemnet tawh kisai in February 8, 2016 a pat pauchap khawmna a la pat a hia, Sixth Schedule phutna nei ah New Delhi ah India Prime Minister, Home Minister, Minister of State for Home banah North East in-charge minister ti te kimupi ah Memorandum piakna a nei takna chung ua hun lemchan dungzui zel ah a thil phut teu delzui zel uh hin a kigen hi. ATWU lawiupa te gendan in, Guite Road kisiamna le May leh August thatawp ah etthakna a nei nung ua Ministry of Home Affairs kiang ah Quality hawitak ah lampi siam ding phutna nei a hidan uh taklang kawm in June 2, 2017 ni ah le etthakna vanei kit a, lungtun um sa mama un a gen ui.

HBS LEH VBS KHAKNA NEI

Lamka, June 17 (Nisin Thuhiltu): Baptist Children Department (BCD), Lamka South Division, EBC saina ah “Just Like Jesus” ti thupi mang ah Holiday Bible School (HBS) nei ah um chu tuni’ June 17, 2017 in Centenary Hall, New Lamka in a zo thiang ui. HBS hunsung in Devotion leh Worship Service hun Centenary Hall ah mat in a um a, Class ahileh Ebenezer Academy Classroom ah lak in a um a, Pauzarual, M. Div, GBC in Devotion hun ah Pathian’ thutak genna a nei bak in Biaklal leh Khenthang te’n counseling a neipi ui. Tuni a ni 4-ni “Cultural Day-Nam hina tawh Pathian chawihawina hun a mat uh tawh kitawn in Class a lak zaw vek nung un, naupang te kitiang in Peter Mung in pauchapna tawh Pathian khut ah kikawl sakna nei in, Pathian chawihawina’n Lampi zuina a nei ui. Zia lampi zuina chu Ebenezer Academy a pat Dorcas Road zui in Marian Street chuan in Tipaimukh Road a man ua, Presbyterian Street, Phailian apat Gouchinkhup Veng lutsuk in Tedim Road mansawn in, zia a pat chu Centenary Hall ah hunkhawkna a siam ui. Zia hun chu tawh kibang in EOC Central Church, Hill Town ah Vacation Bible School (VBS) nei ah um le tuni’n khak in a um a, kipakman piakdawna leh VBS Report piakna a um bak ah Rev. Lamkhogin Khaute, Chairman, EOC Ministerial Board in VBS khakna a nei hi. VBS hunsung in James Lalpu leh hotu te’n naupang 300 val kiang ah Pathian thu leh laa ziltilna a nei ua, Evangelist TL Mang Vaiphei, Child Promoter, EOC in naupangte counseling a neipi hi.
NT 18June2017e

KHAWVEL IN I SKILLS NEITEU EI TET ZO LO DING: CM

Imphal, June 17 (Nisin Thuhiltu): Project Management Complex, Sagaipat, Imphal ah tuni’n Department of Sericulture, Government of Manipur saina nuai ah “felicitation programme cum distribution of machines and equipments” kiti a um hi. Zia hun chu Chief Minister N. Biren Singh in a uap a, state human resource te chu tuhun tawh kituak ah mat thei ding ah heidaw hileh khawvel in kukal tak ah nasep I chiapi teu leh skills inei teu tet (compete) zo lo ding hin a gen a, Sericulture Department chu farmer te leh Self Help Groups te tilkho tu a hi zingna chung un pakchat thu a gen hi. Government in sericulture department ngaikhawk ding leh sericulture productivity a kibelap semna ding ah panlakpi zing ding a hidan le a gen a, sericulture schemes chuam chuam te kituptak ah chiapi hiding in a gen hi. Department official te chu a vaima theilam ah plan ahiloleh blueprint pelut ding in le hiatsakna a bawl a, zia dungzui a chu financial assistance ngaitua hiding in a gen hi. Chun, sericulture reeling machine siamdawk thak local entrepreneur Wangkheimayum Shanta chu award piak hiding in a puang a, 15th August leh award piakdawna nei hiding in le a puang hi. Zia hun matna a chun, beneficiary mi 23 te Motorised Twin Charkha machines piak in a um ua, beneficiary mi 10 te kiang ah Motorised Paddle Spinning mill leh beneficiary mi 5 te kiang Solar Operator Spinning mill piak in a um hi. Parliamentary Secretary (Agriculture and Sericulture) Awangbow Newmai, Parliamentary Secretary (Finance) Th. Satyabrata Singh, Parliamentary Secretary (RD & PR) H. Dingo, Secretary, Sericulture, Th. Gopen leh Director, Sericulture S. Kunjakishore te’n le a uap ui.

MEGA MANIPUR SCHOOL IN RS 15,000 DONATE
Imphal, June 17 (Nisin Thuhiltu): Manipur ah tuilet ziak ah haksatna tuak te kithuapina ding in Mega Manipur School, Yaralpat ah students, teaching leh non-teaching staff te’n Chief Minister N. Biren Singh kimupi in sum a dawl khawm uh CM Relief fund a ding in Rs 15,000 donate a bawl ui. Chief Minister in ziagual panlakna chu kipakpi mama kawm in haksatna tuak te dawn zangkhaitu a pan ding thu a gen hi. Chuleh, global warming chu tuhun ah challenge thupi mama hin a gen a, gam leh gua te’n mihing te pawimawlo himaleu mihing te’n kipawimaw hin a gen a, hun haksa tuak hun ah State mipi te kipumkhat ding leh panpi ngai te kipanpi tua di dial ding hin a gen hi.

MEGHALAYA NIMCHIP ZIAK AH MI 3 THI; 2 TUNNA HIATLO AH UM

Shillong, June 17: Meghalaya, Ri Bhoi district huapsung ah um Tharia khua ah tuni’n nimchim (lnaslide) a um a, ziana a chun, mi 3 te’n thina a tuak ua, mi dang 2 tunna hiatlo in a um hi. State capital Shillong a pat Tharia chu 20 km ah gamla um a hia, zingkal dak 4:30 tuam ah a imut lai tak ua, a inn uh tawh nimchim in mi 3 te chu a vukkhum a hi. Thina tuak te chu Laba Mahanta, Bobi Mahanta leh Shanti Lama te a hiu a, Kristina Lama kiti leh a chanu Rina Lama te chu a tunna hiatlo a hiu. Nimchim in pacha’n te chu a vuk khum hiding ah muanmaw a hia, liamna tuak hun khawp te chu Shillong ah hospital mun 3 ah etkawl in a um ui. Thina tuak te chu labour a hiu a, Assam leh Nepal mi hi un a kigen hi. Ri Bhoi deputy commissioner (district magistrate), CP Gotmare in a genna a chun, nimchipna tawh kisai ah magisterial inquiry ordered sua ah um a hidan a gen a, ADM Kum D Phawa in magisterial inquiry mapui ding a hidan taklang kawm in, Disaster Response Force (SDRF) leh Fire Brigade te’n rescue operation chiapi zing uh hin a gen hi. Nim chim in a chipkhum a tamzaw te chu labourer a hiu a, a nasepna mun ua a ingsungmi teu tawh khawsa, lui (river) tawh kinainacha khaw sa a hiu.
........................................................................

COLLEGES 40 AH VOCATIONAL TRAINING UMPAITA DING: CHIEF MINISTER

Imphal, June 17 (Nisin Thuhiltu) : City Convention Centre, Palace Compound ah tuni’n Board of Secondary Education, Manipur (BOSEM) leh Council of Higher Secondary Education, Manipur (COHSEM) nuai ah tukum 2017 ah Class X leh XII top rank holder te ding in prize distribution function a um hi. Zia hun chu Chief Minister N. Biren Singh in Chief Guest hina tawh a uap a, Prize piakdawna a nei hi. Chief Minister in a thugenna a chun, Government teacher te chu Government educational institute te a hawitheipen ding ah panla ding in chialna a bawl a, nu leh pa tamtak in chate lekha zilna sum tam tak tak seng a hidan uh a taklang hi. Government educational institute te a hawilo a hileh insung haksa mi tamtak te’n a chateu thiamzilna lam ah haksatna tuak zing ding a hidan uh le gen in, State Government thak in health leh infrastructure/communication sectors banah education sector siamhawina ding ah panlakna nasatak nei hin a gen hi. Education sector siamhawina ding ah SSA nuai ah school 41 leh RMSA nuai ah school 9, a kigawm ah school 50 te kituptak ah siamhawi thak ding pawimaw in a gen a, Government tunung sawtlo ah college 40 ah vocational training in neina ding ah panla hin le a gen hi. Chuleh, Government in Imphal East district a ding District Institute of Education &Training (DIET) centre hawng ding hin le a gen a, transparent tak ah teacher te transfer leh posting policy chiapi hiding a hidan le a puang hi. Private schools leh coaching centre te panlakna etzui theina ding ah Manipur Private Schools (Registration) Bill, 2017 leh Manipur Coaching Institute (Control and Regulation) Bill, 2017 chu State Assembly next session hun ah luidaw hiding in le a gen hi. Education Minister Th. Radheshyam in a thugenna a chun, Chief Minister N. Biren Singh mapui State Government thak in education leh health sector a hawithei ding pen ah siamhawithakna ding ah panla a hidan a gen a, Government in Class X lehXII examinations ah rank holder te ding ah joint prize distribution function nei ding ah lemsakna nei hin a gen hi. Prize winner te’n student dang te a tilkho ding uh ginchatna a nei bak ah a lawsam te’n le kingaisiatna nei mailo ah lesson thak bawl khialna a pat zilbe ding um a hidan a hiat ding dawi a hidan le a gen hi. Function hun a chun Chief Minister N. Biren in website - www.edusuggest.in kiti hawnna le a nei a, zia chu education sector ah public in pan lakna a nei theina ding ua hawn a hi. Chuleh Class X leh XII ah top 10 te prize piak a hiu. Zia hun matna chu Gopimohon Maibam Jt. Director Education –S ; W. Chandrakumar Singh Addl. Director SAT; Dr. Dhanabir Laishram Social Activist Prof. W. Nabakumar Singh Manipur University; Prof. Mc Arun Manipur University and H. Jayantakumar Singh HoD/Maths (Retd.), Principal Secretary (Education-S) Shri Vineet Joshi, Education (S) Director Shri Th. Kirankumar Singh leh COHSEM Chairman Shri L. Mahendra Singh te’n le a uap ui.

JULY 1 A PAT ELECTORAL SPECIAL DRIVE PAT HIDI: CEO

Imphal, June 17 (Nisin Thuhiltu): Conference Hall, Old Secretariat , Imphal ah Manipur, Chief Electoral Officer (CEO) Vivek Kumar Dewangan in tuni press conference ah a taklatna a chun, Election Commission of India (ECI) in July 1, 2017 a pat vote nei thei ding te elector roll ah registered bawlna ding leh diklo tak ah vote nei ah kikhumkha te sukbeina ding ah Special Drive pat ding ah lemsakna nei hin a gen a, zia ding a chu 'No voters to be left behind' ti thupi nei hiding a hidan a taklang hi. Khangthak kum18-19 kikal mi tamtak te a ki enroll theina ding ua state zosia special drive nei ding ah lemsakna um a hidan le a gen a, zia drive chu 31st July, 2017 tiang ah zawthian hiding in a gen hi. Zia ding a chu State election official ten panlakna chuam chuam nei ding uh leh EROs office ah Form 6 te mang ah, National Voters' Service Portal (NVSP) ah Post, Online ah submission min khumlut thei hiding leh oinline ah Common Service Centres (CSCs) ah min khum thei hiding in le a gen hi. 8th & 22nd July, 2017 leh Special Campaign sai hiding in le a gen a, zia sung a chu polling station zosia camp bawl hiding leh BLO te Form 6 kining ting tak ah polling station zosiaa um ding uh pawimaw hin le a gen hi. Chuleh, Special camps chu Government leh Private Educational Institutions (colleges and schools)/Vocational training institutes te ah le 1st July 2017 leh 31st July 2017 kikal ah nei hiding in a gen hi. Special Drive hun sung ah a la famta elector te min lakdawna le um ding hin a gen a, Registrar of Death te kiang ah famta te detail lak hiding in a gen hi. CEO Vivek Kumar Dewangan in a gen belapna a chun, Presidential election umna ding ah election notification sua hita leh 17th July, 2017 zingkal dak 10am a pat nitaklam dak 5pm tiang ah vote khiakna um ding a hi, 20th July, 2017 leh New Delhi ah vote sim hiding a hi.