Nisin Thuhiltu -16 May 2017

User Rating: 0 / 5

Star InactiveStar InactiveStar InactiveStar InactiveStar Inactive
 

MEEYAMGI NUMIT: CM KIANG AH COMPLAINT 350 LUT;
BIAL SUNG AH BIAL MIPI TE HAKSATNA NGAITHA MLA HIAT DING UMLO   
Imphal, May 15 (Nisun Thuhiltu): Chief Minister Secretariat, Imphal ah tuni’n first ‘Meeyamgi Numit’ hun in mitamtak in Chief Minister N. Biren Singh kiang in a haksatnau a tut ua, Chief Minister in ama mimal tak in mi 350  lam te complaint ngaithakna a nei hi. Zingkal lam dak 10:00 a pat nitak lam dak 5:30 tiang ah mi a 1000 ah sim te’n Chief Minister a kimupiu hi. First ‘Meeyamgi Numit’(Peoples Day) a hi tawh kitawn in Chief Minister kimupi nuam mi tam mama in visitor te umna ding in CGI-sheet roofed makeshift Mandab (hall) sakbe in a um a, seating arrangements, dawn ding tui, thingpi leh nekthei kituptak ah visitor te piak in a um ui. Damlona ziak ah buaina tuak kha thut a um khak leh ti’n mbulance leh medical team te le duty sak in a um ua, visitors/groups te chu serial wise ah hall sung ah a ban ban ah ko lut in a um ui.  Chief Minister kimupi  te’n complaint a bawl uh issue chuam chuam te lak a chun, Mega Tourist Circuit, Khongjom sakna ding ah agricultural land lakpiak ah um te kituptak ah compensation piak ding,  Indira Gandhi National Old Age Pension Scheme leh Autonomous District Councils member lui te pension sum kihawpna tawh kisai khualna nei ding ti te issue thupi deu in a pang hi. Chief Minister N. Biren Singh in thasin leh dat 15th  ‘Meeyamgi Numit’ ah mat ding ti ah state government in lemsakna a neina ziak a genna a chun, grass-roots level ah mipi dawidan leh a haksatnau hiatchian ding dawina ziak hin a gen a, mipi te’n government thak in activity a neina zosia transparency chiapi a hidan a hiathiam theina ding uh a hidan le a gen hi. Tuni ah mipi te’n haksatna a tut zosiau chu list bawl thak ah um ding leh kituptak ah study bawl masat hiding, zia zaw tak chuleh sukfel thei thei sukfel hiding in Chief Minister in a gen a, tuni ah ama kimupi leh haksatna tun zosia te chu zikthaw ah banggual panlakna um thei ding a hem ti te hiatsakna bawl hivek ding a hidan le a gen hi. Ama kiang ah file piaklut ah um zosia photostat copies chu ama office in kituptak ah kawl ding leh Minister ahiloleh a kisaipi official te a pawimaw dungzui ah thuhiat hiding ti’n le a gen hi. Media publicity hawi ziak ah mitamtak te’n a haksatnau ama kiang tut a hidan uh le N. Biren in a gen a, ziagual panlakna a pat chu mipi te leh Government kal ah dawidan leh ngaidan kibatlona um te sukbei hiding leh regular tak ah Govt-public interaction a pat hiatmil khak ah um te dinmun le hiatzui zing hiding in a gen hi. N. Biren in a genbelapna a chun, differently-abled persons te serial wise ah a din uh chu ngai khawk mama a hidan a taklang a, tu a pat district headquarter zosia differently-abled persons te physical verifications leh medical tests bawl hiding in a gen hi. Chuleh, State Government in mi cham (common man) haksatna sukven theina ding ah micro level ah panlakna nei zing a hidan a gen a, Imphal Urban Co-operative Bank Ltd chu a pawimaw dungzui ah villager te loans pe ding leh a diak ah Soibum (fermented bamboo shoot) product kibelap theina ding ah Kwatha villager te loan a piak ua pha a hidan a taklang hi. First ‘Meeyamgi Numit’ a hi tawh kitawn in Works, Information &  Public Relations, Rural Development &  Panchayati Raj, Commerce & Industries, Power, Administrative Reforms & Training Minister Thongam Biswajit in le ama New Secretariat office chamber ah tuni’n mitamtak te a kimupi a, zia hun a chun, public leh Government kal ah gap a umlona ding ah ‘Meeyamgi Numit’ chiapi a hidan taklang in, elected representative te date 15th sin le kimupi thei a hidan uh a gen hi. Minister Thongam Biswajit kimupi tamzaw te’n a haksatnau leh a lungkimlo nau a tut nau a chun, a tamzaw’n hills leh Assembly constituency chuam chuam ah development works kituplo dan te a tut ua,  zingkal lam dak 10:30 a pat in zan nung tiang in ama kimupi ding mi a um ui. Health and Family Welfare, Art & Culture, Law and Legislative Affairs Minister L. Jayantakumar Singh kimupi le mi tam mama in  Old Secretariat Complex ah ama chamber in ama kiang ah chia mipi te haksatna ngaithakna a nei a, mi 250 ten issue chuam chuam ah a haksatnau a tut ui. Consumer Affairs Food and Public Distribution Minister Karam Shyam in le public mipi tamtak te Secretariat South Block, ama office in a kimupi a, media person te kiang ah a genna a chun, Chief Minister in state sung ah VIP culture sukbei ding leh mipi te haksatna ngaithak theina ding ah ‘Meeyamgi Numit’ a pat chu pil huai tak ah panlakna a hidan a gen hi. Education, Labour & Employment Minister Th. Radheshyam in le mi 300 lam te a ma chenna - RMSA complex, Babupara mun in a kimupi a, mipi haksatna chuam chuam tut te holimpi in a pawimaw dungzui ah panlak hiding in thutiam a bawl hi. Chun, ‘Meeyamgi Numit’ a hi tawh kitawn in Minsiter dang dang in le amau lemchanna mun chiat in mipi te a kimupiu a, Minister te bep hilo district zosia Deputy Commissioner te’n le district mipi te haksatna chuam chuam ngaithakna a nei ua, bureaucrat te’n le mipi te kimupi na’n tuni hun a mang ui. A langkhat lam in, ‘Meeyamgi Numit’(Peoples Day) a hi tawh kitawn ah MLA tamtak te a bial mipi teu in a haksatnau tut nuam ding ua ginchatna liantak um maleh MLA te a bial sung ua ‘Meeyamgi Numit’(Peoples Day) mang hiat ding a um pua,  tunung ah ‘Meeyamgi Numit’(Peoples Day) hun tak leh MLA te’n a bial ua hun a mat ua, a bial mipi teu haksatna a ngaithak piak ding uh ti chu mitamtak te dawidan a hi.

PUBLIC GRIEVANCES REDRESSAL DAY MAT NA LEH HOTLINE NO. HAWNNA NEI   
Lamka, May 15 (Nisun Thuhiltu): Superintendent of Police (SP), Churachandpur malatna in tuni sunma dak 11:00 in SP/Churachandpur Conference Hall, SP Office ah One Day Public Grievances Redressal Day-cum-Opening of SP-Churachandpur Hotline Number nei in a um hi. Rakesh Balwal, IPS, SP Churachandpur mapuina nuai ah kimang zia hun chu Lhunkhomang Khongsai, MPS, Additional SP (Law & Order), Churachandpur, M. Kumarjit Singh, Additional SP (Operation), Churachandpur leh Augustine J. Khongsai, MPS, SDPO Thanlon te ban ah District sung ah Tribe leh Civil Society Organization chuam chuam puitu te’n le uap in District sung ah dan leh thupiak dinmun tawh kisai leh maban panlak ding dan gen khawmna a nei ui. khawmna nei hi. Manipur a N. Biren Singh mapui solkal in tha sin ah tarik 15 ni chu mipi te’n haksatna leh buaina chuam chuam a tuakteu thuneitute tawh genkhawmna ni ding ah a guat dungzui ah Churachandpur a le pat a um a hia, tuni’n dan leh thupiak, Traffic, Drugs / Narcotics leh District sung a Gari kigumang te tawh kisai genkhawm in a um a, Hotline Number hawnna le a um. Zia hun matna a chun, Rakesh Balwal, SP Churachandpur in District sung hawina ding ah mipi tawh kithua ah pan lak khawm pawimaw a hi dan gen kawm in diklo tak ah tawi police a hilo leh thil hawilo tungsak thei ding ah ginmaw um leh a dang dang hiakha ta phawt in Hotline Number 7085-256-377 ah kintak ah WhatsApp leh SMS mang ah hil thei ding a hia, a thu kin deu, thumal zik manlo te’n le zia number chu 27x7 call thei ding uh hi’n le a gen hi. Chun, zia hun ah thu pesawntu te hina chu kepbit a kuama hiatsak hilo ding ti’n le a gen hi. Churachandpur Women Police leh Anti-Human Trafficking Unit (AHTU), Churachandpur vaisaina nuai ah tuni sunnung dak 2:00 in Public Grievances Redressal Day mat na a um kit hi. Hun matna chu Women Organization chuam chuam - Hmar Women Organization, Zomi Mothers’ Association, Kuki Women Organization for Human Rights, Mizo People’s Convention, Women’s Wing, Child Welfare Committee, Churachandpur, Meitei Women Society leh a dang dang te’n le uap in thugenna hun le a mang ui. Zia hun a chun, a chiakhawm te’n numei leh naupang chung ah tatsiatna thiltung tawh kisai ah maban panlak khawm ding dan tawh kisai a gen khawm ui.

KINIAL BUAI ZIAK AH CHEM A KIDAWT   
Lamka, May 15 (Nisun Thuhiltu): Yaiphakawl khua a um Ramdinsanga Chhakchhuak (37) s/o Sapnel in Lalminthang s/o Sehmang, Chief of Misao Lhahvom chu chem ah a dawt ziak in Misao Lhahvom khawmipi hunkhawp te’n tuni zingkal lam dak 9:30 chuam  in Ramdinsanga inn a va hal piak ui. Thutut kimu dan in, zani zan dak 9-10 kikal ah Yaiphakawl ah Ramdinsanga te inn ah khawlai leng Lalminthang leh a inn nei te kinial buai in Ramdinsanga in chem mang ah Laminthang a la dawt hi. Zia thu chu a hiat phat un, Misao Lhahvom ah mipi hunkhawp te’n buaina tung na mun chu del in inn nei te nupan a sawisak ban ua inn van le hunkhawp a khensiau hi. Thiltung tawh kisai ah police in a zan zan in Yaiphakawl khua del ngal in buaina a sosang diak ding vengna in mipi lungna’ kitawm te delmang na ding ah tear gas na tiang mat a hi. Buaina tung na mun a chun police personnel te’n zan khawvak in duty a puaklaw ui. A hinla, zingkal lam ah police te umlo kal in mipi te va kuan kit in Ramdinsanga inn chu a va hal tha ua, thiltung ziak in inn a giak ngamlo in mun dang ah a la giak dawk a hiu. Liamna tuak Lalminthang a hileh District Hospital puaktung himaleh doctor te’n Imphal ah etkawl ding ah refer bawl in zia chun etkawl a hi zing hi. Thiltung tawh kisai ah tuni’n Ramdinsanga inndawngcha te’n liamna tuak Lalminthang te inn ah hiamkham va bawl in vawk 1 a va that ui. Zia buaina a hin mipi kuama’n dân chu amau khut ah la lo ah police te khut ah kawi ding leh buaina sosang sakthei ding thil bawl lo ding in Churachandpur police ah Additional SP (Law & Order), Lhunkhomang Khongsai in chialna a bawl hi.

PENSIONERS WITH AADHAAR - SUBMISSION OF DOCUMENTS KIPAN   
Lamka, May 15 (Nisun Thuhiltu): Department of Information Technology, Manipur; Digital India leh e-Governance Services India Limited kithua in tuni, may 15 a pat Treasury Office, Tuibong ah Pensioners with Aadhaar - Submission of Documents kiti pat in a um hi. Zia hi a hileh Pensioner te Pension Pay Order (PPO), Aadhaar Card leh Bank Passbook ah min zik dan kituaksak na ding ah bawl a hia, PPO leh Aadhaar Card ah min zik dan kituaklo te Aadhaar Card lakthak a hiu a, zia na ding a hin Treasury Office in tuni’n Token 200 hawmdawk in zia lak a chu 100 chan bawldik a um in zing leh 101 a pat 200 chan bawl hikit ding a hi. Document sukdikna ding in Pensioner te’n PPO pêk masa leh pek 2na, Aadhaar Card leh Bank Passbook te self attested photocopy a chawi uh ngai ding a hi ban ah original copy le etsak ngai ding a hi. Document suk dikna hi a hileh May 31 chan um ding a hi.

OPTICAL FIBRE VUITE’N MIPI TUINÊKNA SUBUAI
Lamka, May 15 (Nisun Thuhiltu): Chawlkal masa a pat Airtel Company in Lanva a pat Mualkoi haw ah Optical Fibre a vui ziak un mimal tui lakna tamtak a suksiat ban ah vengsung buan thuaksak mama hi’n a kigen hi. Thutut kimu dungzui in, Mualkoi khawsung a tuilakna kibawlte mimal â a hi ziak ah tui dawite’n a dakkal a sim ah sum a piak uh ngai hi’n a kigen a, tuilawng a suksiat bep uh hilo in guazuk tawh a kituakkhak ziak in vengsung buan a thuak sak a, tuilawng nei te leh Company te’n kihona nei uh hi’n le a kigen hi.

4TH ASSAM REGT IN MOTHER’S DAY MANG
Chandel, May 15 (Nisun Thuhiltu): HQ IGAR (South) nuai ah 4 Assam Regiment of 26 Sector Assam Rifles in Pathianni a khan, Mother’s Day a hi tawh kitawn in Parlon leh Khangbarolvillages, Chandel district in special church service organized a bawl ui. Khengjoisub division huapsung ah numei te panlakna leh a haksatnau suklat theina ding bak ah a chawisanna ziagual programme chu siam ah um a hidan defence thusuak ina  gen a, Assam  Regiment troops te chu church service ah villager te tawh kikhawpna pang ah, medical camp leh thil thawn piak chi chuam chuam a nei bak ua, refreshment kituptak ah hawm un le a kigen hi.

NCFTSR NUAI AH TRAINING COURSE ZILNUAM TE’N NGAIVEN THEI
Imphal, May 15 (Nisun Thuhiltu): National Council for Training & Social Research, New Delhi  nuai ah Government Departments leh Autonomous body chuam chuam a pat training course chuam chuam zil nuam te’n News Section, DIPR, Keishampat ah zingkal lam dak 11 a pat nitak lam dak 4:00 kikal ah (office hour) ah thuchian kan thei ding a hi. Zia ah training program chu 21st June, 2017 leh kipan ding ti a hia, topics leh course fee chu courses offered dungzui ah a chuam chuam hiding a hi.

MANIPUR RS BY-POLL  DING AH BJP BHABANANDA IN NOMINATION  FILES
Imphal, May 15 (Nisun Thuhiltu): Bharatiya Janata Party state unit president K Bhabananda in tuni’n  Manipur ah Rajya Sabha by-poll umna ding ah last hour in nomination papers a file hi. Rajya Sabha by-poll umna ding ah returning officer (RO) leh Manipur Legislative Assembly secretariat, secretary Ramani Devi kiang in K Bhabananda in nomination paper file a bawlna hun chu, Chief minister N Biren Singh in le a uap a,  propose bawltun’n Thanlon MLA leh MTDC Chairman Vungzagin Valte a pang hi.  A langkhat lam ah Congress candidate E Dwijamani in le nomination papers a file a, Rajya Sabha by-poll ah party 2 kal ah gualzo ding kichuna nasatak um ding tina a suak hi. Hiatthei khat chu February tha ah damlona ziak ah Congress’ sitting member Haji Abdul Salam in a term bei manlo ah thina a tuak ziak ah by-poll um ding a hia, Seat 60 umna Manipur Assembly ah Rajya  Sabha seat khat um sun kichuna a chu MLA 29 nei BJP leh MLA 22 nei Congress kal ah Rajya Sabha seat luatu ding kichuna’ a hung tung ding 25 May 2017 leh vote khiak hiding a hi.

IGNOU JULY SESSION A DING ADMISSION KIPAN
New Delhi, May 15 (Nisin Thuhiltu): Indira Gandhi National Open University (IGNOU) ah tukum July session a ding in admission hawn a hitai. Admission online ah bawl thei ding a hia, a kigawm ah programme 173 a um hi. University thusuak in a taklat dan in, master, bachelor, diploma leh certificate programme chuam chuam te a ding ah online admission chu June 30, 2017 tiang ah bawl thei ding a hia, student te’n science, social science, humanities leh management ah programme chuam chuam um te apply thei ding a hiu a, admission tawh kisai ah thuchian kimawzaw chu university website, www.ignou.ac.in ah et thei ding hi’n le a kigen hi.