Tuhun Khristiante' Kisap

User Rating: 0 / 5

Star InactiveStar InactiveStar InactiveStar InactiveStar Inactive
 

TUHUN KHRISTIANTE’ KISAP
Rev. Dr. J.M. Ngul Khan Pau

jmpaupu
Tuhun Pasian nasepna ka cih ciangin ka tunai a ka lunghihmawh, kisam kasak thuli kong gelh hi.

1.    I THEOLOGY LEH NISIM KISAPNA KITUAK LO
Tunai in Lamka lamah thuhilh dingin ka ciah uh hi. Thu kikupna ah dotna hong om pen, ‘i theology pen vantunggam tunna dingin kicing mahmah napi’n leitung nuntakna dingin kicing khin lo tawh kibang hilo hiam’ cih ahi hi. A hangin tuni a kisapna, lungkhamna panin lungnopna, cinatna panin cidamna, zawnna panin cihtheihna cih ahi zongin kigen khollo hi. Jesu in tawntung natna (mawhna) hong damsak ahih leh tu mahmah in ka pumpi natna hong damsak thei lo ding hiam, ciin hong kidong leh bang ci’n i dawng ding hiam? Jesu sisan vangliatna in leitung panin vantung hong tunpih zawh hangin tuni in dawi leh kau panin hong suaktasak zolo hiam? Ahih keileh damlo a om ciangin siavuan (doctor) leh zatui tawh dam ding i lamen a, ahi zongin hong dam thei het kei leh bang i cih tam?

Jesu Khris sisan mawhmaina ding bek in kingaihsun a, vantung paina ticket ciang bekin kigen hi. Ahi zongin Rom 10:9 sunga sawltak Paul in, “Jesu pen Topa hi, ci-in na kam tawh na pulak a, sihna panin Pasian in amah hingkiksak zo hi, ci-in na lungsim sung uhah na up taktak uhleh hotkhiatna na ngah ding hi,” ci hi. Hih lai a hotkhiatna kici pen sozo cih kammal panin hong kila hi a, a khiatna pen damna bukim (complete wholeness) cihna hi. Tua in i kha hotkhiatna leh vangam tunna ding bek hi loin - damna, suahtakna, hauhna, thuneihna, leh vangliatna zong huam hi. Hanmual a zat ding thu bek hi loin, tuni mahmah in Khris ka damna, ka hauhna, ka lungkimna, ka vangliatna leh nopna ahih ding hi. Hih bangin i meetpih kei leh Topa in nuntakna cingtaak (abundant life) a cih kinei ngei lo ding hi. Vantung a i neih ding thu genna bek hi loin hih leitung ah zong neih ding thu ahi hi.

Kum tampi sung kei zong cialpi bawl in ka vak hi. Topa hehpihna tawh piangthak, nungtolhsa hong thokik tampi ka mu hi. Tua hun lai-in ka ngaihsut ngei loh, ahih hangin Lamka lam ka hawh simin ka zak tam pen ahih leh “cialpi” bawl ding cih hi. Tua zong pianthakna camp mah hi a, piangthak zel ahih hangin pianthak zawh thu kisinsakna kicing a om loh manin hong nungtolh kik uh ciangin, piangthak nawn lo kisa in pianthakna camp ah va hawh kik zel hileh kilawm hi. Pianthak zawh a paisuakte Lai Siangtho sin ding hiam, Missionary ding hiam in kipia in kuan uh hi. Nungzuisuahna pen kithupi sim lo hi dingin ka um hi. Tua hangin kum simin piangthak camp bawl leng, a piangthak sate mah hong pai kikkik in hong piangthak kik ding hi leh kilawm hi. Sawltak Paul in, “Eite hong it pa hangin  hih thu khempeuhah a gualzo pente i hi hi,” (Rom 8:37) a cih hangin gualzo pente nuntakna ngah theih ahih lam zong kithei lo hi leh kilawm hi.

2.    KHA LAMAH KEUNA LIANPI OM HI
Biakinn sungah kha nasepna hangin mi tawm khat hong gamlum a om ciangin kilaupahpah a, paikhial a om khak ding siate leh upate lunghimawh uh hi. Lunghimawh ding mah ahih hangin khitui luangziahziah a thungen hong om nawn loh ciangin keuna lianpi om a, kilunghimawh leuleu hi. Lungdamna leh lamna hong om nawn loh ciangin i biakinnte khing hi. Khalam a lathak nei hong om nawn loh ciang la luite bek mah i saksak ciangin keuna lampi tawnin a pai i hi uh hi. Kha thu ah a hat deuh hong om ciang buaipih ding, a hat lo hong om ciang lah buaipih ding i hih leh i buaipih ding hong tam mahmah ding hi. Pasian kha nasepna pen ei deih ciang bekah kikoih sawmin, ei deih bangin hong gamtang leh i cih manin i biakinn sungah ta zo nawn lo hi. Pentecost ni ‘thangvan mei hong kuang in’ cih la i sak hangin hong kuan taktak ding lau mahmah leng kilawm hi. Mawhna thu a siatna bangin kigen nawn lo hi. Sumhau deuhte in biakinn sungah thu nei in, amau thu loin biakna kivaihawm thei lo hi. Khalam a khuamuhna nei i cihte mi citheite na hi kim lo hi. Upate leh pastorate nangawn zahmawh thu ah buaina nei i tamzo hi. Tuucing (shepherd) nasem dingte zong a tuumangte zong lo bek hi loin amau mahmah zong mangkhin zo hi.

Tua hangin khalamah keuna lianpi om kasa hi. I lasakte zong a thu hoih mahmah napi’n a sate lungsim hong lawngkha lo tawh kibang hi. I thuzakte zong a thupi lam leh a lamdang lamlam i za nuam uh a, zuih ding lam kuamah in thudon lo hi. I doctrine zuih hoih peuh leh ci-in doctrine thu i theih mahmah uh hangin kha lamah hatna lungdamna hong tunpih kei hi. Doctrine a hoih mahmah ahih hangin kha thu ah keu mahmah cih mi tam mahmah hi. Lai Siangtho thu ah kinialpih ding hi leng maingaphuai het lo ahih hangin tua thute in ama nuntakna ah nasem lo, ama deihtelna ah Pasian thu tawh kituak lo na tam mahmah hi.

Mi nautangte gen vet loh, upa kicih ding lunggulh mahmah ahih hangin nekguk thu-ah kilawm keng ci loin kisuanlahna om loin ne ziahziah hong tam hi. Hite hangin i biakinn sung gamlum zo nawnlo in gamkhing hong bang hi. La phuak Siampu in “Zogam tulpaan kai zota” a cih bangin i biakinn sung zong tulpaan kai zota ci leng kikhial lo ding hi.

3.    KIBUMNA, DAWI LEH KAU VAI HONG LAANG
Pasian thu in a luahna mite leh gamte ah dawi leh kau thu kigengen loin khantohna leh lungdamna thute tamzaw hi. Ahih hangin kha lamah i niamkiat ciangin dawi leh kau, kibum leh kiai cihte hong thang mahmah hi. A lamdang mahmah ahih leh nungak khat in, “Pa Pau, thungetna hong neihsak in, nitak ciangin pasal khat in hong buan thei zel hi,” ci hi. Tua a buanpa’ cih pen pumpi va pai loin ahih hangin numei nu khut leh pumpi ah liamma om hi. Dawi nasepna kinakzat semsem ahih hangin i thugente in hih lam thu ah bangcih ding cih tawm mahmah hi. Power Encounter cih ciangin kha lam galdona cih zong kihilh loin galpi i do hi.

Leitung galkapte’n zong galdo dingzia sin tangtang uh a, a sinna uh tawh kisai gal neu leh gal lian do dingin kikhen thei hi. Osama Bin Laden that ding a kitel khia Navy Seals te bang a kisinna uh haksa penpen dingin kigen hi. Bang hang hiam cih leh a do dingte uh thahatna leh siamna nang zo dingin kithawi uh ahi hi. Eden huan sung panin mihing khem bek hi loin Pasian in vantung mite a bawlzawh a kipan a langpang ngiat Satan leh a lawmte i galte ahi uh hi. Ei zong kha lamah gal i do uh hi. Lai Siangtho in hih galte bang ci do ding cih hong hilh hangin kihilhna a tawm manin a do dingzia zong thei loin ki-om hi. Gallelhna i thuakna hang zong i et ciangin kamsang Hosea in, “Ka mite thu theihna a kisap manun kisia uh hi,” (4:6) a cih tawh kituak mahmah hi.

Lai Siangtho sanginn ah kibumna thu, dawi leh kau vai kigen ngei lo hi. Tuate omna lak a nasem ding a kihih hangin i theology pen Western Theology ahih manin gen dingin i ngaihsun ngei kei hi. A hang pen amau theology ah hih thute na om nawnlo hi. Amau theology a kihel lo peuh mah en zong hel loh dingin i ngaihsun kha hi. Khutlam en thei, mitphial siam, aisaan siam, bum leh ai siam cih bang ahi zongin tuni dongin i gam sungah om hi. Dawi leh kau vai, kibum vai zong thungetna tawh siansuah in nawh khiat ding cih ngaihsutna kinei lo hi. Dam lote hong dam theih het loh ciangin tua bang mite kiangah i pawlpi mite pai lo uh a, thu umlote tung panin huhna na lamen uh hi. Kha thu ah makai dingte’n makai nawn lo i hih manin i mite’n amau mit-a hoih a sak bangun na gamta uh hi.

Satan biakna thu thang in North East India khuapite hong zeel hi. Nagaland khuapi Kohima ah mi 3000 bang om dingin kituat a, Garo te khuapi Tura ah zong tampi mah om cih kiza hi. Lamka ah om nawn lo hi loin gamdai in nasem uh cihna hi. I biakinnte thupi thei mahmah ve’n, kha thu ah bangzah in vangliatna i nei tam maw? Khangno makai khat in amau biakinn ah khangno kikhawm zapai ah 40 khawng bek hi, 60te hong kikhawm lo uh hi, ci hi. Tua ahih leh i pawlpi mi khangno tampite hong kikhawm lote bang cih ding i hiam? Centenary i bawl theih i lungdam hangin tuban kum 100 sungin bang i suak ding hiam?

4.    PASIAN NASEMTE ZONG BUAI
Satan in Pasian nasemte hong nawk masa loin i kep pawlpi nawk ngei lo ding hi. Pastor te leh hunbit nasemte hong buaisak theih leh ama nasep a kimkhat zawhsa hi ding hi. Nidang lai in America gam khawngah Pastor te zahmawh thu ah buaina nei cih i zak pen tuhun ciangin ei sungah zong hong tung hi. Pastor te amau mimal in a buai loh hangin innsung buaina hong tun ciangin Pasian nasepna ah thazawm uh hi. Fuller Theological Seminary leh Barna Research teamte’n America pawlpite a survey na panin hih bangin mukhia uh hi.

•    Khasim in pastor 1500 in mawhna hang, gimluat man leh pawlpi mite tawh kitelkhialh manin amau nasepna nusia uh hi. (Ei gamah zong nek leh tak buai lo ding hi leng bang zah in Pasian in hong sam takpi mah hi ci-in i kipaisuak diam maw?).
•    Pastor a kim khat (50%) kitenna buai in a zite uh tawh kikhen ding uh hi. Tua zah mah in hi thei hi leh amau nasepna nusiapah nuam uh hi. (Deihtel theih hi leh mi bangzah in pastor hihna i lensuak diam maw? Tua bek hi loin zite tawh kikal bangzah taktak a cidam i om diam maw?).
•    80% pastor te amau nasep ah cing kisa loin lungkiat manin tawp ding uh hi. (Hih pen Lai Siangtho sanginn zawh phet sem mite hizaw deuh uh hi. Amau a sep tungun cing kisa kha uh a, hong sep taktak uh ciangin pastor hi dingin midang itna, thuakzawhna, lungduaina, cihtakna cih bang nei kisa lo uh hi).
•    80% Lai Siangtho sangkah khit zawh ciangin Pasian nasem ding a kipia mite, amau nasepna kum nga ma-in nusia ding uh a, pawl khatte’n leitung nasepna zong ding uh hi. (A thu-a theih leh a tak-a sep kibang lo ahih manin laisim lai-in sem thei mahmah ning a ci tampite’n hong sep taktak uh ciangin haksa sa, lungkia in tawp kik nuam uh hi).
•    70% pastor in lungkiatna buaipih in nisim in zatang ne in kikem uh hi. (Lungkiatna depression hangin zatang ne Pasian nasem tampi om uh hi. Midangte’ kiangah ‘Jesu Khris in na vangik uh hong puakpih ding hi’ a cih uh hangin amau mahmah in zong amau vangik na buaipih uh hi).
•    40% in nu leh pa kikal ah buaina nei-in lungsim nuam lopi-in Pasian nasem uh hi. (Counselling khawng ah numei tawh sawtpipi a kihote upmawh sangin zahmawh thu-ah kizopna nei nuam mahmah uh hi. Pastor khen khat in hih mawhna midang tungah pulak ngam loin amau bek in thuak uh hi).
•    70% in thugen dingin a kithawi bek uh ciangin Lai Siangtho sim uh hi. Tua loin sim ngei lo uh hi. (Pasian nasemte’n Lai Siangtho i deih manin sim tangtang tawm mahmah a, thugen nading hangin sim tamzaw hi. Tua bek hi loin, Nipi ni a thugen Pastor tampi in a um taktak uh hiam cih dong thei leng, a um lo zong honpi khat mah om dingin kituat hi).

    Topa Pasian in i theology i innkuan sung, i khalam nasepna leh eima mimal nuntakna mahmah zong a kiphungvuh dingin thupha hong pia ciatta hen. Pastor tampite siatna sungah a bual uh hangin tampi mah Pasian zat nei I hih manin lungdam hang. Topa in ama nasemte leitung gimna tawlna ah tawldamna leh vantung pan hong pai lungnopna kha thuphate a kicingin hong piaksak hen. //