Zogam Thupuak - 16 July 2014

User Rating: 0 / 5

Star InactiveStar InactiveStar InactiveStar InactiveStar Inactive
 

MLA-te’ LAD fund Rs. 75 lakh akipan Rs. 1 crore hitou ding
CM in kum 2014-15 ading Budget luikhia

Imphal, July-15: Finance mawhpuakna tawh thuahkhawm Chief Minister O. Ibobi in tuni’n Manipur Assembly session ah Rs. 4045.16 crore vel hiding a bikhiah kum 2014-2015 sunga Manipur in a sumzat ding ‘Budget Estimates, 2014-2015’ luikhia(present) a, huai dungzui in tu financial year(fiscal 2014-15) bei hun ah deficit budget Rs. 549.03 crore vel hiding hi’n gen a, huai bel Growth State Domestic Product a 2.99 % hi’n gen hi.MLA te’ Local Area Development Fund tuma in kum 1 a Rs. 75 hisek pen leng tukum akipan in Rs. 1 crore hiding chi’n Chief Minister in gen hi.

Chief Minister O. Ibobi in tuni’n Assembly session ah Budget Estimates, 2014-2015 luikhe kawm in a genna ah tukum(2014-2015) adia Manipur Plan size ding zah bikhiah nailouh ahih ziakin Rs. 3,200 crore vel hiding a tuat hi a, North Eastern Council(NEC) leh Non-Lapsable Central Pool of Resources(NLCPR) nuaia project leh scheme tuamtuam sepkhiak dinga sum zat naihlouh a omte Centrally Sponsored Scheme leh Central Plan Schemes akipan State Plan a Central Assistance dia heikhiak nungin State Plan a total expenditure Budget(2014-2015) Rs. 4045.16 crore hiding in gen hi.CM in a genzeldan in kum 2012-2013 sunga Per Capita Income 43,673 hi a bikhiah himahleh Manipur a sum dinmun(financial position) in hoihlam nawt in kum 2014-2015 sunga per capita income Rs. 59,386 hiding a lam-et hi’n gen hi.

Kum 2014-2015 a Budget Estimates dungzui in total receipt Rs. 9385.14 crore hiding a tuat hi a, Revenue receipt Rs. 8826.42 crore banah Public Account telin Capital receipt Rs. 558.72 crore hiding a tuat leh bikhiah ahi hi.Manipur state in tax dana a muhkhiak Rs. 620.83 crore leh Non-Tax receipt Rs. 284.06 crore vel hiding a gintak ahi hi. Manipur a receipt (muhna) pipen deuh hi a kigen Value Added Tax(VAT), Motor Vehicle Tax lehProfessional Tax akipan muhkhiak ding a kigawm in Rs. 500 crore hidinga bikhiah hi’n CM in gen hi.

Huaibanah kum 2014-2015 sunga total estimated expenditure Rs. 9687.83 crore hi a, huai lakah Plan akipan Rs. 4045.16 crore hiding tuat hi a,Non-Plan nuaia senna 5189.68 crore hiding a ngim hi’n CM in gen hi.Huai akipan Rs. 452.98 crore velte bel Centrally Sponsored Schemes, Central Plan Schemes leh NEC scheme tuamtuam adia senna hiding hi.Budget Estimates lak apan Rs. 704.78 crore vel Charged expenditure hiding a,adang Rs. 8983.04 crore bel Voted expenditures hiding hi. Capital Outlay Rs. 1739.33 crore hiding ngim hi a, huai belt total State Plan expenditure budget lak apan 43% hipha ding hi.
Budget Estimates, 2014-2015 tungtawn a ngaih poimawh hiding sector tuamtuam a ding leng fund bikhiah hiding a, huaidungzui in agriculture & Allied Activities adin Rs. 139 crore, Rural Development adin Rs. 176.66 crore, MLA Local Area Development Fund ading MLA 1 zel adin Rs. 1 crore, IFCD sector adin Rs. 618.71 crore, power sector a Rs. 110 crore telin energy sector adin 113 crore, General Economic Services leh adangdang adin Rs. 1287.88 crore, Social Services adin 661.91 crore, Welfare of SC & ST and Development of MOBC adin 54 crore, Social Security leh Social Welfare adin Rs. 38.47 crore banah Urban development adin Rs. 38.47 crore bikhiah hiding hi.

DC in Girls’ Hostel hong ding
Lamka, July-15: Rengkai, Muolhlum ah numei naupangte omna ding a Hostel kibawl ‘GNB Girls’ Hostel’ kichi July 16, 2014 zinglam dak 11.00 in PK Jha,IAS, DC/CCpur in khuallian a pang in hong ding a, Rev Dr J. Khuma in latna(dedicate) nei kawmin thumsak ding hi.


JSSK a MOU hun kha 5 behlap
Lamka, July-15: Numei-naupaite etkolna ding in June 2011 a scheme thak kipan Janani-Shishu Suraksha Karyakram(JSSK) kichi Dist. Hospitalah zat hi a, JSSK tup-le-ngim pipen ahihleh numei naupaite leh naungekte panpihna tawh kisai hi a, naungek apian nung ni 30 tan a thawn a etkol ding, inn akipan hospital tan free transport telin hamphatna tuamtuam om hi. Dist. Hospital a JSSK Programme adia MoU abawl uh ahunbei ziakin tuni’n Medical Suptd/Dist Hospital makaihna in review meeting om a, huai ah Dy Suptd/Dist. Hospital; CMO; DFWO banah stakeholder -te tawh nasepdan kikum in tuni akipan kha 5 sung daih dingin MoU hun behlap uhi. Tulelin JSSK Program ah stakeholder- Pharmacy 3, Diet Supplier 1 leh Transporter 3 om hi.


Tongneh tuni’n kapliam in om
Lamka, July-15 : Tongneh (45) s/o (late) Ngulkhothang of D. Phailien tuni nitak dak 8:30 velin meltheihlouh thautawi pawl khatin Kaprang area a GL Brick field a omlai kapliam uhi. Tongneh bel huai Brick field a nasem (employee) hi’n kigen a, tuni nitakin phatuamngaite’n kintakin district hospital pawtung uh a,kapliam ahihna a khe ah sisan tamtak pawt hi’n kigen hi. Thu kizadan in kalkhat paisa in galvantawi pawlkhat in GL Brickfield ah demand letter pia uh a, zanhal July 13, 2014 in vau (threatened) nawn uh a, tuni in hibang thiltung hi’n kigen hi. Hiai thu sut ahihtanin Dist Hospital ah police tamtak om in, thil omdan suizui lel uh hi’n kigen hi. Huai brickfield aneitu Lalboi Lhungdim s/o(late) Tintong Lhungdim of Chiengkawnpang hi’n kigen hi.


Arun Meitram in Singngat pha ding
Lamka, July-15: Arun Meitram, Preproductive Maternal Neonatal Child Health + Adolescent (RMNCH+A) Co-ordinator, National Health Mission/State Health Society, Manipur in July 16, 2014 in Singngat PHC enkhe ding hi. Aman NHM nuai a Signgat PHC ah Health Service tawh kisai thil tuamtuam a kisam leh nasepdan enkhe ding hi’n kigen hi.


Early Childhood Care & Edn
Lamka, July-15: Manipur Alliance for Child Right CCpur Chapter (MACR-CC) inntekna in tuni’n M.Ramthar ah ‘1-Day consultative meeting on Early Childhood Care & Education (ECCE)’ om hi. Huai ah Rev Nicky Thanga, Convenor, MACR-CC in keynote address gen ECCE tawh kisai Sangthanchami Gangte, Member MACR-CC in gen hi. Bungmual a papi 1 in a tate numei naupang 2 a zuakte muhkikna dinga panla ZMA, ZYA, ZSF leh Child Welfare Committee (CWC) leh naupang 2te omna hilhtu kiangah present pia uhi. Consultative hun ah ECCE nuai ah Social welfare deptt tungtawn in kum 8 tan Education piak ding tungtang sepsuah dingdan, naupangte’ diet tawh kisai Anganwadi-te’ mawhpuakna bangchi sepsuah ding, ECCE nuai a govt scheme omte bangchileh mipi’n thei ding ? chih tel in thu tuamtuam gen uhi.


Khua 35 ah DDT 2nd round kap ding
Lamka, June-15: Dist Malaria deptt DDT 1st round kap(spray) zou uh a, PHC tuamtuam ah DDT 2nd round pan ding uhi. 1st batch te’n Henglep PHC nuai a PHSC 2-Tuilaphai leh Santing bial sunga khua 26 a inn omteng ah DDT 2nd round kap ding uh a, Senvon PHC nuai a PHSC 3- Leisen, Parvachom leh Sipuikon bial sunga om khua 9 a inn 1034 ah kap (spray) ding uhi.


Custody ah July 18 tan om ding
Lamka, July-15: CCpur Police te’n zan in CJM court ah Kh Ramananda Singh (29) s/o Khumanthem Tomba Singh of Thengra Leirak pawkhia uh a, CJM in July 18, 2014 tan Police custody om ding inCJM phalsak hi. Kh Ramananda Singh ahihleh helpawl a member lui hi a, 7-A/R pawl in July 11, 2014 nitakin inn apan mankhia in Lamphal PS ah pekhia uh a, huai apan CCpur Police te’n a case lasawn uhi.


BC thak om hun in sum draw theihding
Lamka, July-15: Dist Social Welfare office te’n tunai zekin teksum (old age pension), meithai panpihna leh vualphaloute panpihna sum mimal’ bank account ah kha 9 ading koih(deposit) uh a, New Lamka area a mi 400/500 te’n Bank Correspondent omlouh ziak in bank apan sum latheilou uhi. UBI Chief Manager in a gendan in ni 2/3 nung in Bank Correspondent thak ding guan hiding a, huai tungtawn in sum draw theih ding chi’n kuamah patau lou dingin theisak hi.


Ki-report ding hun kisuan
Lamka, July-15: Manipur Police deptt ah kum 2010 Sub-Inspector, Asst. Sub Inspector (Male/Civil) leh Jemadar (M/R, IRB) recruitment ah CCpur dist apan SI mi 23, ASI mi 34 leh Jemadar mi 8 te’ July 16, 2014 in Police HQ a i/c Recruitment Cell ah document poimawh lading aki-report dingin IGP (Admn) in theisak mahleh thuthak om hunchiam omlou din tuni sunnung in ahun kisuan(postponed) chih ahi hi.


SUUNNA
Mungpu (50) h/o Ginngaihching of Suangdai village(Singngat sub-divn) tuni nitak dak 8.25 in Dist Hospital ah awmna ziakin si a, a khua ua vui dingin kipua hi.


IMPHAL NEWS:
Water supply scheme 403 bawlkhia
Imphal, July-15 : Th. Shyamkumar, MLA(Andro A/C) in kum 2012 akipan PHED in mipi zat dingin Water Supply Scheme bangzah bawlkhia hiam chih dotna a bawl PHED Minister I. Hemochandra in a dawnna ah in PHED dept.in kum 2012 akipan in mipi in a phattuampih dingin water supply scheme tuamtuam 403 bawlkhia hi’n gen hi. Minister in a genzeldan in tulel in PHED in PHE divn tuamtuam ah mipi adingin Water Supply Scheme chi tuamtuam 367 bawl lel uh hi’n gen hi.


IM-te hit list ah mi 8 om - Dy CM
Imphal, July-15 : Manipur Assembly session ah tuni’n I. Ibohalbi,MLA in Ukhrul ADC Member Ngalangzar Malue thahna tawh kisai Calling Attention Motion a pualut in Dy CM banah Home Minister Gaikhangam in dawnna pekawm in a genna ah Ngalangzar Malue thahna tawh kisai in govt om maimai lou ding hi’n gen a, NSCM (IM)te gamtatna a mawkna a koih hilou din gen hi. Aman a genbehna ah NSCM (IM) hit list ah mi 8 om uh hi’n intelligence thusuak kingah a, amaute humbitna din naktak a panlak hi’n gen hi. NSCN (IM) in India govt tawh ceasefire nei mahle uh huai ceasefire pen Nagaland state sung kia huam a, tua ziakin Manipur ah nuamtaka hong gam uh hi’n gen hi. NCSN(IM) te’n kum 1980 akipan tutan in mi 100 val that uh hi’n leng gen hi.


CBI khut ah pe ding in ngen
Imphal, July-15: Dr. I. Ibohalbi, MLA in apoimawh leh Ukhrul/ADC member Ngalangzar Malue thahna tawh kisai CBI khut ah pekhe ding in state govt. ah ngen hi’n kigen a, huai tawh kisai political party tengin leng kihoukhawmna neih poimawh hi’n gen hi. L. Ibomcha, MLA/Keishamthong A/C in tuni’n Asembly session a Zero hour hun ah kum 1997 apan Centre govt. tawh ceasefire agreement bawl apeace talk neilel NSCN(IM) te ‘Unlawful organisation’ a puang dingin govt. ah ngetna bawl hi’n kigen hi.


Combing operation nei
Imphal, July-15: Imphal East Police Commando leh Porompat Police station a civil police te’n tuni zinglam dak 9:00 apan dakkal 1 sung Mahabali Kabui Khul ah combing operation bawl uh a, huai ah bakery a sem non-Manipuri 1 mankhia in verification bawl ding in Porompat P/S tun uh hi’n kigen hi.


ZRF cadre 2 mankhia
Imphal, July-15: PIB(Defence Wing) thusuak in a gendan in July 14, 2014 in New Lamka a College Veng ah ZRF cadre 2 in sumkhon sawm chihthu zak ziakin Red Shield Divn nuai a Assam Rifle te’n nitak dak 10:10 velin operation bawl uh a, huai ah ZRF cadre 2 mankhia uh hi’n taklang hi. Mat a om s/s Brig. P.S. Hangshing(43) s/o (late) Doupu of Ccpur leh s/s Def. Secy Lun-te (25) s/o Khanzachin of Ccpur hi uh a, amau apan single barrel 1, mobile phone 2, Sim card 2, ZRF-te’ extortion book 1, combat dress pair 1, Mag pouches 3 leh combat carry bag 1 muhkhiak hi a, Imphal West Police Station ah pekhia uh hi’n thusuak in gen hi.


Tyre guksawm pasal 1 mankhia
Imphal, July-15 : Th., Shyamkumar, MLA(Andro A/C) omna quarter kong ah tuni’n pasal khat in Tata Magic tyre guk sawmlai matkhiak in om hi. Mat a om Tellem Robindro (35) s/o T. Thoiba of Nilakuthi Keikol Makha Leikai hi a, Tata Magic driver Konthoujam Somendro (27) of Yairipok Angtha in Th. Shyamkumar’ quarter kongah a Gari park in hih ding aneih ziakin pawtkhiak san hi. Tellem Robindro in tyre ana lakhia in paw ding kisalai Konthoujam in mukha in mantang hi Shyamkumar omna quarter ah pilut hi a, huai ah press-te ma ah lah in om hi. Amah thudotna akipan in Md. Raffizuddin (48) s/o Hessamuddin of Hatta Golapati in tyre gu dia asawl hi’n kipuang hi. Hessamuddin in Hatta Golapati ah dukan bawl a, a van tamzawte a guk hi’n kigen hi.


Post Matric Scholarship
Minorities and Other Bakcward Classes(MOBC), Govt of Manipur nuai a Post-Matric Scholarship (Renewal), 2013-2014 mu dinga recommended puankhiak hi a, deptt website www.mobcmanipur.gov.in ah detail ettheih ding chih ahi hi.


Transfer & Posting:
1. M. Gouro Singh, MCS, Asst. Revenue Commissioner as Jt. Director (Lotteries), Manipur & Chief Executive Officer, Zilla Parishad/ Imphal west.


TUNI THUPI:
“Huchi’n lemna dingin ni tengin bawngtal khelhna thillat dingin na la ding hi: huai dia lemna na bawl zawh chiangin, maitam na susiang dia, thau na nilh dia, na siangthou sak ding.”
–Eksodas 29:36

zogam thupuak logo