Zogam Thupuak - 11 June 2014

User Rating: 0 / 5

Star InactiveStar InactiveStar InactiveStar InactiveStar Inactive
 

Papi khat in a tanu 2te Rs 30,000 in  zuak
Lamka, July-10:Thangchinmang (45) s/o (late) Khanzam of Bungmual, Hausa Veng in a tate numei 2- alianpen kum 5 pha nailou deuh Mawi(amin kikheng) leh aneupen kum 3 leh akim ding vel mi Nenem(amin kikheng) Rs 30,000 in Moirang area mi nupi 2 kiangah zuak a,thil omdan hahtaka suizui nungin  naupang 2te a omna mun ua pan tuni sunnung in Lamka Police-te leh civil society organisation (CSO) tuamtuamte panlakna ziakin hutkhiakin om uhi.

Manipur Express in hiaithu  July 2, 2014 ni’n  theipah in suizui hi a, News a suahkhiak hileh naupang 2te muhkhiak ahih gintak-huailou chih thuguk ngah ahih dungzui in  naupang 2te muhkhiak ma in suahkhiak hilou phot hi. Express staff te’n Bungmual Village Authority(V/A), pawlpi tuamtuam,civil  society organisation-te banah police official hunkhop kithuzakpih a, tuni a naupang 2te damtak a hutkhiak ahihna tung ah thil suizuina ‘investigation’ a pan late leh hutkhiakna nasemte pahtak-huai sakthu puang hi.

Muanhuaitak apan kizadan in Thangchinmang of Bungmual azi in pasal dang a neihsan ziaka kingaisia in  July 1, 2014 in Lamka a Orphanage Home khat ah “Ka ta 2 te hon kepsak mai un” va chi a, himahleh orphan home neitute’n  “Zingchiangin hong nawn inla, na tate kep dingdan i ngaihtuah ding” ana  chi uh hi’n kigen hi. Himahleh aman huai ngak zoulou in Meitei nupi 2 kiangah  tanu neu chikchik 2 nei hi a gen in Rs 30,000 in zuak hi. Nupi 2te’n leng July 2 in New Bazar  a kimu ding in hilh uh a, Thangchinmang in leng a tate 2 tonpih in  pekhia hi’n kigen hi. Nupi 2 te’n bangmah thei nailou naupang 2te  Jeep Service-te ah a tuanpih dek lai un naupang 2te’n Jeep sung apanin ‘Papa bye bye’ chilai uh hi’n kigen hi. Bungmual V/A leh Manipur Express in thiltung a zakin a innkuanpihte tawh July 2, 2014 zan khangin delhzui  ngal in Thangchinmang kiangah thil omdan dong uhi. Aman   July 2, 2014 in sum Rs 10, 000 alak khit banah July 7, 2014 chiangin Rs 20,000 a lakkawm in ‘agreement’  bawl ding uh hi’n gen a, a thiltup uh dal in omthei pah hi. Ni 9 kivei nunga naupang kumchinglou 2te hutkhiak a om pe’n lamdang leh thil kipahhuaitak hi’n ngaihsut theih hi.

Manipur Express in thiltung hoihtak  a suizui in naupang 2 leitute L Indubala Devi (contact No 8575614788) of Terembam Leikai leh Bijenti (8415304778) of Moirang Khunou hi’n theihkhiak hi a, naupang neuchik 2te hutkhiakna ding tawh kisai a panla ZRA, ZMA, ZYA, ZSF, Bungmual V/A, Child Welfare Committee (CWC)/CCpur leh Police-te’ tungah thil omdan zakha phot kipak in lamdang sahial uhi. Lamka Police-te leh CSO te’ panlakna ziakin tuni sunnung dak 1:30-2;00 kikal in Moirang Khunou ah a lianpen hutkhiak hi a, a neupen  Moirang a INA complex gei a Moirang Khuman mun ah khutkhiakin om chih ahi hi.

SP/CCpur  office chamber ah tuni sunnung in naupang hutkhiatna dinga panla leh buaipihteng SP/CCpur in  kimuhpih in kipahthu gen hi.SP in  Investigation Officer Thanglianmang Hanghal  kipahman piak hidia a gen banah higher authority ah recommend ding hi’n leng gen hi. SP in agenbehna ah zan nitak in naupang 2 zuak khiat thu information ngah hi a, suizui ngalin tuni’n hutkhiat theih a om hi’n gen hi. Naupangte’ pa leng Police custody a omlel hi’n gen a, naupang zuakkhiatna a kigolhkha teng matkhiak hidin leng gen hi.

ZYA Gen Secy in naupang 2 hutkhiat theihna ding apanla SP leh anuai a semte; Child Welfare Committee/CCpur a Chairman Rev Dr Nicky; Vungzagin Valte MLA & Parliamentary Secy; KT Vaiphei, IPS, IG ban ah Moirang Police-te tung ah kipahthu gen hi. SP office apan CWC/CCpur te’n naupang 2te la in Khomawi a CCpur Observatory Home ah koih uh a, huai apan ZMA-te’ khut ah pekhia uhi. Police te’n Thangchinmang’ tung ah FIR No.71 (7) 2014 CCP-PS U/S 372/373 IPC & 23 Juvenile Justice Act register in thil omdan suizui uhi.

Synod Hall ah tuni’n ‘Free Animal Health Campaign’ om
Lamka, July-10:Director of Vety & AH Services  saina  in Synod Hall, IB road ah tuni’n ‘Free Animal Health Campaign’ om a, Health Minister Phungzathang Tonsing in khuallian a pang in a honkhiak zawhin ganvulh tuamtuamte etkolna dingin manbei in  damdawi  hawmkhiak hi a,Vety dept apan specialist doctor  4, Gynea 1,  Surgery 1, Specialist Bacteriolgy 1 telin doctor 30 velin natna tuamtuam apan kivenna ding damdoi in galvulh tamtak kap uhi.Tuni a programme zatna ah Functional President in Vety & AH Minister Govindas Konthoujam pang a, Guest of Honour in L. Lakher,IAS, Commissioner(Vety & AH) pang hi.

Chief Guest in a genna ah ganhingte adin leng  damtheihna poimawh a, siangthou taka kep ngai ahihdan gen hi. Azi (late) Chhungi Tonsing in damtheihna a ngaihkhawk dungzui in aman leng ngaikhawk a, health(damtheihna) lam adia panlakna paizom zelin Ambulance kichingzaw  neih lunggulh hi’n gen a,haksatna omte mipi tawh pangkhawm panlak hidingin gen  hi.

Functional President in  Manipur mipite’ adin niteng in sa leh ngasa poimawh  a, mihing damtheihna leh ganvulhte damtheihna kizom mahmah ahihman in ganvulhte siangthou tak a kep ding ahihdan gen hi. Ganvulhte siangthou a a damtheih leh aneitu mihingte leng damthei ding a, natna tuamtuam apan kivenna dingin ganvulhte siangthou theipen a etkol poimawh chi hi. Angora Rabbit kichite asa(meat) aksa sangin limzaw a, amul leng puanbawlna dinga hoih in, kg 1 ah Rs. 1500 man hi’n gen a, Manipur a district teng ah beneficiary ding mi 6 chiat select hiding chi hi. Torbung khua a Piggery farm leng hoihtak a etkai hidingin gen hi.

Guests of Honour agenna ah Manipur adia Animal Health Campaign om masakna Lamka hi  a, ganvulhte’ damtheihna dingin a neitu mah in pilvang taka kep ngai a, ganvulh tungtawn in khawsakna leh nek-le-tak zonna piangthei ahihdan gen hi. Tuni a Free Animal Health Campaign ah Chairman, ADC/Ccpur;  DC/Ccpur telin EM/ADC-e banah DLO tamtak tel uhi.

July 19 in Hospital Building thak hon hiding
Health Minister in Hospital omdan enkhia

Lamka, July-10: Health Minister Phungzathang Tonsing in tuni’n District Hospital a nasepna va enkhia a, hospital omdan enthak in  hospital puahphatna adia nawngkai khate Family Welfare Shed, Casualty Shed, leh gate kianga Bamboo shed omte lakkhiak dingin nasemte theisak hi. Hospital khanglam a building  kibawl thak leng July 19 a hon  hiding in gen a, Casualty kong leh Family Welfare omna a nullahte leng tui luankhiakna ding in  tangtak a bawl dingin gen theisak hi.  

Hospital building khanglam kibawlthak pen Special Ward honkhiakma a Gate bawlzawh ahihchiang in gate bul ah Police-te adi’n Sentry Post  bawl hiding chi a, gate khangnung pen khaktan hiding leh akhangzek a bawl dingin zingchianga nasep kipan din gen hi. Hospital nasepna zawhsiang chiangin ganhing lutsak nawnlou ding in gen a, casualty omna lam a Bungkung sak mun-awng(ground) om pen ah gari lutsak hi nawnlou dinga gen in gate bullam, nidang a Surgical Ward  kimlak teng gari parking  hidin gen hi. Hospital building kibawlthak pen Special Ward dan in Children ward leh Medicine Ward a zat ding himahleh latrine/toilet omlou a, huaite koih hiding chi a gen in,  Room allocation  bawl dingin  Health Director  sawl ding hi’n gen hi.

OPD nihte a damlou ki-ensakte leh a ngakte et dingin Minister  leh ADC Chairman in khat chiat  pe ding uhi. Minister in Health worker-te’n uniform silh chiat dia theisak kawm in Grade-IV ten leng uniform silh dingin theisak a, electric buainate leng panla lel hi’n gen hi. Minister in Hospital  a etkhiak hunah Chairman, ADC/Ccpur leh DC/Ccpur banah Medl Suptd; Dy. Medical Supdt;CMO; DFWO IPS, SP/Ccpur telin mi tuamtuam te’n zui uhi.

DC/Ccpur in Henglep Road enkhia
Lamka, July-10: Socio-Economic Development Organisation (SEDO) pawlin Tuibuong- Henglep  kawmtuahna ding lampi a bawl uh tuni’n PK Jha, IAS, DC/Ccpur in va enkhia hi. DC/Ccpur in  SEDO-te lamlian bawl  tawn in D.Vaison village kianga Koite luidung a sing a kibawl lei(bridge) omlel pen RCC bridge a bawl dingin panlakpih ding hi’n gen a, aman Hengjang khua tan va enkhia hi.

Saikot ah Financial Literary Camp
Lamka, July-10: Manipur State Co-operative Bank Ltd saina in Saikot Community Hall ah July 12, 2014 zinglam dak 10.30 akipan in Financial Inclusion-cum-Financial Literacy camp om ding hi.Session masa zinglam dak 10.30 in kipan ding a,bank leh mi tuamtuam akipan thugen ngaihkhiak hiding hi.Session 2na technical session zinglam dak 11.30 in kipan ding a, huai hun ah Axix bank, MSCB,LIC leh DCO apan thupi tuamtuam zangin sinsakna om ding hi.
 

‘YPA Waiting Shed’ bawlthak uh
Lamka, July-10: District Hospital a YPA Lamka Block in a etkol ‘YPA Waiting Shed’ tuni’n YPA Lamka Block in bawlthak uhi. Tuma in huai bawlthak himahleh lungtun huailou sa in YPA te’n bawlthak  uh chi’n Sumpi, C-in-C, YPA Lamka Block in gen hi.  Waiting Shed bang(wall) tuma deuh in gari khat in phusia a, hospital a ki-ensakte leh mipite adia poimawh ahihman in, tuni’n bawlthak ahihban ah rong leng nuh ding uh a, lighting system leng koih ding uh hi’n Sumpi in gen hi.

(Late) T.Chhungi Memorial Free Health Camp
Lamk, July-10: YPA Gen HQ leh Raj Medicity pangkhawm in Hiangtam Lamka a YPA Gen HQ Hall ah July 12, 2014 zinglam dak 10:00 akipan in “One Day (late) T.Chhungi Memorial Free Health Camp” omding a, Health Minister Phungzathang Tonsing khuallian apang in hong ding hi. Huai ah Functional President in Vungzagin Valte, Parliamentary Secy, Guests of Honour in Ginsuanhau, MLA leh P.K Jha, IAS, DC/CCpur hiding a, Special Guests in Chairman ADC, EM-te, MDC-te pang ding uhi. Free Health Camp ah Doctor 20 val tel in Medical Team member 63 te’n damloute en ding uhi.

1st Consultative meeting neihpih
Lamk, July-10: Thangzangam Taithul in tuni in Zomi Colony ah Singngat ADCC nuai a hausate 1st consultative meeting neihpih a, kum 2015 a MDC election ah candidate sawm hi’n gen hi. Manifesto leng awla bawlkhiak hiding in gen a, sepzawh louh ding manifesto ah guanglou ding a, sepzawh dingte kia guan hidingin gen hi.Tunung in election committee bawlkhiat hidin leng gen hi.
 
FHW Entrance Exam omding
Lamk, July-10: FHW Training School, R & D Wing Complex, Lamphel ah July 13 (Sunday) zinglam dak 10:00-12:00 sungin FHW course zil ding lakna dia  Entrance Examination 2014 omding hi. Huai ah Family Welfare nuai a om FHW Training School, Lamphel; Medical Directorate nuai a FHW Training School/CCpur leh FHW Training school, Imphal ah academic session 2014-15 a FHW/ANM zilding applicant teng telding uh a, CCpur dist apan candidate 111 tel ding uhi. Huai ah Superviser 3 leh Invigilator 7 duty ding uhi.

Hospital compound ah Blacktopping
Lamka, July-10:  MLA’ Local Area Development Fund tungtawn in District Hospital campus puahna paizel a, tuni’n  asaklam teng Black topping kipan a, nullah bawlna leh  campus sung puahna  nasepna paizom zel hi.

Diesel auto-te theihsakna bawl
Lamk, July-10: Khawpi sunga Diesel Auto-rickhaw apan passenger-te a kumkhiak hun uah taklampang(right side) ah kum zel uh a, gari in phukha dek in lauhuai mahmah a, auto rickhaw sung apan veilam(left side) kia a  kum hile uh bit  pen ding uhi. Huai thu ah SP  thupiak dungzui in Traffic police te’n Diesel Autorickhaw teng kiangah kalkhat sung mahni auto a passenger-te taklam (rightside) a  kumkhe saklou ding leh taklam panga kumkhiatna hubing chiat dingin theisak uhi. Kal khat nungin diesel autorickshaw teng check hiding a, taklam banga passenger-te kumkhiatna hubing loute’ mat leh liausak hiding uhi.
 

KNLA chih ding hizaw
Zan issue Manipur Express ah  Tuibuong Service Station a thiltung ‘KNLF in amau thilhih hi’n puang’ kichi  pen KNLF hilou in ‘KNLA in amau thilhih hi’n puang’ chih ding hizaw hi.

IMPHAL NEWS

Manipur Assembly session kipan ding
Imphal, July-10:Manipur Assembly term 10na adia session 8veina Assembly Budget Session kichi July 11, 2014 zinglam dak 11.00 in Chingmeirong a Assembly Hall thak ah om ding hi. Assembly session July 28, 2014 tan om ding a, session om dingin sitting 12 vei om ding hi. July 11, 2012 session kipatni in member sisate suunna(obituary reference) om ding hi. Finance tawh lenkhawm Chief Minister O. Ibobi in July 15, 2014 in Budget Estimates, 2014-15 luikhe ding a, July 16 in Budget Estimates tawh kisai general discussion kipan ding hi.   July 17 akipan in Deands for Grants, 2014-15 tawh kisai discussion leh voting om ding a,July 28 tan sunzom ding uhi. July 28 in finance tawh kisai appropriation Bill 2 passed hiding hi.

High Court a Chief  Justice thak kichiam
Imphal, July-10: Manipur High Court a acting Chief Justice Laxmi Kanta Mohapatra in Manipur High Court a Chief Justice hiding in kichiam hi.Tuni in Raj Bhavan ah Durbar Hall ah Manipur Governor VK Duggal in Manipur High Court a Chief Justice dingin Justice Laxmi Kanta Mohapatra kichiamsak a, huai hun ah Chief Minister O. Ibobi, Dy Cm Gaikhangam,  PHED Minister I. Hemochandra; Education Minister M. Okendro leh Social Welfare Minister AK Mirabai banah top civil leh police official-te’n  tel huai hun uap uhi. Chief Justice thak in High Court a Judge kisam laite akinlama a om theihna dia panlak hiding in gen hi.

BJP President Chaoba paihkhiak sawm  om
Imphal, July-10 : BJP Manipur Pradesh President Th. Chaoba in zanzek in party dankalh chih ziakin mi 3 suspend a,huai lemtang a zangin BJP sunga om mah amah deihlou pawlte’n paihkhiak sawm in panla uh hi’n kigen hi. Thutut kingah dan in BJP Manipur Pradesh President -lui min in tuni’n BJP National President thak Amit Shah kiangah Th. Chaoba paihkhiakna ding  memorandum piak in om hi. Huai memorandum ah BJP  Manipur Pradesh te’n President lenlel Th. Chaoba tungah muanna nei nawnlou uh hi a taklang kawm in amah
paikhe dingin phut uhi. Huai tawh kisai in  July 12, 2014 in BJP delegation team khat in  New Delhi phak sawm uh chihthu om hi.
 

B.Ed zouloute’ tawpsak hiding
Imphal, July-10: DM College of Teachers’ Education te’n 2014-15 session a B.Ed student te ading in tuni’n DM college a Lecture hall ah ‘The induction cum orientation programme’ sai uh a, huai ah Chief Guest in Paulunthang Vaiphei,IAS, Commissioner(Hr & Technical Education) pang hi. Aman a thugenne ah Right to Education (RTE) Act guideline dungzui in B,Ed course zillou non-trained teacher-te’ tawpsak(terminate) hidin gen a, kum 2015 tan a 2-yr BEd course zoulou teacher-te’n  service tungtang ah bangmah gen theilou ding uh hi’n leng gen hi. Teacher te’n subject 1 kia ah siam sawmlou in thil bangkim ah student-te’ huh dia mansa a om ding leh student-te’ chauhnate’ theihkhiak a sawm ding uh hi’n leng taklang hi.
 

Post awng omte hudim dingin phu uh
Imphal, July-10: All Manipur Bar Association (AMBA) President Khaidem Mani in tuni’n a office chamber ah press-te kimuhpih a, Manipur High Court a Acting Chief Justice  Laxmi Kant Mohapatra in full-fledged Chief Justice of Manipur High Court dia telkhiak ahih  AMBA te’n kipahpih thu puang uh hi’n gen a, amau pawlin High Court a judge post awng omte hudim(fill-up) kin dingin akisaipihte nawh ding uh hi’n gen hi. Aman agenzelna ah Manipur High Court adin Judge post 4 sanction himahleh High Court in Judge 5 tan lakna ding thuneihna nei a, bangziak in  High Court a Judge 1 lakna ding zekaisak a om hiam chi’n leng gen hi.
 

Illegal migrant mi 11 kaikhawm
Imphal, July-10: Federation of Regional Indigenous Society (FREINDS) te’n fake ID zang in Assam apan Manipur lutsawm non-Manipuri mi 11 kaikhawm uh hi’n kigen hi. FREINDS publicity secy. W. Santa Meitei in a gendan in Shillong apan Imphal zuan Royal Rajdhani Bus (No. MN01/1387) ah Manipur ah aguk a lutsawm i 11 vel om chih thuguk zak dungzui in Sangakpham a petrol pump ah mi 11 te’ mankhia in FREINDS office tun  uh a, check a bawlna uah mi 11 te’n ID bawltawm zang uh ahihdan mukhia uhi Huai mi 11te Assam a Murigaon village apan hi a, akigendan in Symplex Company a supervisor Nurul Amin in Mantripukhri a State Secretariat building bawl dingin mi 11te   labourer dia Manipur a  pilut sawm hi’n gen uh a,  FREINDS pawlte’n Symplex company-te’ kiangah mi 11te’ sawlkik dingin ngen  uh hi’n kigen hi.

zogam thupuak logo