Zogam Thupuak | 3 July 2014

User Rating: 0 / 5

Star InactiveStar InactiveStar InactiveStar InactiveStar Inactive
 

Phalna bei a electric late zongkhe di
Lamka, July-2:DC/CCpur in a gendan in Dist Administration, Electricity deptt leh Security pangkhawm in kalnawn akipan khawpi sungah phalna(permit) neilou a electric meivak late zonna(mass drive) kipanding chi’n gen hi. Manipur ah phalna beia electric la atamluat ziakin electric meivak/power a kidaihlouh ban ah govt in electric revenue tamtak an muhlouh ziakin zan in Imphal a official meeting ah dist tengin phalna beia electric late zonkhiat kipan dingin thupukna om hi’n gen hi. Mass drive ah prepaid meter box tamtheipen thuah hi ding a, huchi’n meter box dungzui in electric bill bawl hidin leng gen a, hausa leh V/A te’n kithuahpih dingin ngen hi.


Rakesh in Lamka hongpha ding
Lamka, July-2:Rakesh,IAS (retd) Chairman, 3rd Manipur State Finance Commission in July 7-12, 2014 sung Manipur hongpha ding a, July 9, 2014 in Lamka hongpha ding hi. Aman July 9 zinglam dak 11:00 in Chairman, ADC/CCpur tawh kimu ding a, huai zawh sun dak 12:00 in DC/CCpur tawh meeting neiding hi. Sunnung dak 1:45 in DC tawh kithuah in Village Development Council(VDC) 1 enkhe ding a, huai zawh nitaklam dak 3:00 in Lamka nusia in Moirang pha ding hi.


NLUP tawh kisai Dist Level Consultative
Lamka, July-2: DC/CCpur makaih in Tuibuong a Dist Training Centre (DTC) ah July 4, 2014 zinglam dak 11:00 apan in New Land Use Policy (NLUP) tawh kisai Dist Level Consultative meeting om ding a, J.C Ramthanga, IAS, Commisssioner (Hort &SC, RD& PRJ) hongtel ding hi. Huai hun ah CEO/ADC; SDOs, BDOs; DFO(Forest); DAO(Agri); Dy Director, Vety; DO(Hort &SC); DFO(Fishery); GM/DIC; Dy Director, TD; EE/PWD; EE/IFCD& MI; EE/PHED; DSWO; PO, IWMP/DRDA; Chairman/Secy Sub Divn/ Block Level Chief Assn.; President/Secy Philantrophic Orgn. telding uhi.


Financial Awareness Camp,2014
Lamka, July-2: Manipur State Co-operative Bank(MSCP) Ltd saina in July 12, 2014 zinglam dak 11.00 akipan in Saikot Community Hall ah Financial leh Loan Recovery tawh kisai Awareness Camp,2014 om ding hi. Huai ah CCpur district sunga bank function teng in leng huai Camp uap ding uh chihthu om hi.


Mipi pilvang dingin ngen
Lamka, July-2: Khawlum hun(summer session) leh tuuktui luan ziakin thoukang tam mahmah a, khawpi sung leh singtang lamte’n leng nitak lup hun in thousilen (mosquito net) zakchiat ding, khawsik kuapeuh in PHC leh CMO office a Malaria clinic ah sisan test ding leh kuapeuh in damdoi lazel ding in CMO/Ccpur in theisak a, PHSC a semtute’n Malaria office ah damdoi indent zel dingin leng CMO in theisak hi.


ZRO in thupuan poimawh bawl
Secretary(Planning & Social Development)/ZRO Gen HQ akipan thusuak in a gendan in Lamka area, akim leh kianga innmun hawmte leh a hawm dingte’n genkhawm ding thu poimawh a om ziakin July 10, 2014 ma ngei in ZRO office ah office kaihun zinglam dak 10.00 akipan nitaklam dak 3.00 kikal in Planning & Development kimuhpih dingin theisak hi.


Kapkhovung Samte’ suang puahthak in om
Lamka, July-2: Kapkhovung Samte in a damlai in Mission Compound zuan kawmin Lanva-lui akipan suang liantak a doptouh tuni’n Pearsonmun Hausa innkuante’n bawlhoih in puahthak uhi. Kapkhovung Samte bel feet 7.1 in sang a, Manipur a singtangmite laka lianpen a chiamteh ahihbanah thahatpen a chiamteh ahi hi.August 5, 1941 in Mission Compound ah hihding poimawh nei in Lanva lui a suang liantak om domtou a, kilometre kimkhat vel a doptouh nungin Pearsonmun khawlai ah koih a, tu in Pearsonmun playground kiangah hausa innkuan-te’n puahpha uhi. Huai tawh kisai Pearsonmun hausa T.Thanchhung’ tapa T.Kaikhomang in a gendan in Pearsonmun hausa leh khua sattu apu (late) Thangkhai Tonsing leh Kapkovung kihouthei mahmah uh a, Kapkhovung leng Mission Compound a hawh ding chiangin a inn uah vatung zel chi hi. Tua ziakin a suang puak amah theihgigena dinga puahphat hi’n kigen a, khangthakte leh muntuamtuam a omte’n a et theih ding un granite ah alim koih in, huaitung ah suang liantak koihkhia uh hi’n kigen hi. Midangte sang a khang hatzaw a aletzawk ziakin in Kapkhovung Samte en nuam in mi’n khawlai ah a muhkhak chiang un um lutlut hial uh hi’n kigen hi.


Doctorate(Ph.D.) degree ngahthak om
Lamka, July-2: Rev Van Lalnghakthang Khawbung s/o Pastor Laltlunglien of Parbung in International Institute of Christian Management nuai ah Missional Study tungtawn in Doctor of Philosophy(Ph.D.) mu a, June 28, 2014 in Chennai a Convocation hunah degree piak in om hi. A thesis bel ‘Goodness to the poor-the instrinsic call of the church with special references to Churches in Northeast India’ chih ahi hi.Aman Pastor semkawm in Ph.D. sin a,huaima in National Institute of Business Management (NIBM) nuiaah MBA 1st class (DE) in zou hi. Tulelin RPCNEI ah ‘Evangelist AT Large’ semlel lai hi’n kigen hi.


Tunnu Bakes and Cakes in theisakna bawl uh
Lamka, July-2: Tunnu Bakes and Cakes ah tulaiin machine kizangte servicing leh repairing a pailel ziakin nidang a zah product bawlkhiak theih hilou a,July 5, 2014 vel akipan ngeina dan in product kiching taka bawlkhiak theih ahih lam-et thu kigen hi.Huaima in customer-te’n theisiam dingin nget hi uhi.


Kuki Inpi’ Public Rally-cum-Public Meeting nei
Lamka, July-2:NSCN(IM) in 1990s hunlai a Kuki mite 905 that in UNC in Quit Notice a piak ziakin khua 360 val ah mihing lakh 1 valin innlum nusia in Naga mite tawh kinaihna area pawtsan uh hi a taklang kawm in kithahna thiltung suizui dinga KIM in Centre leh Manipur govt. a ngetna a bawl tunidong pichin ahihlouh ziakin July 4, 2014 in Lamka, Moreh, Tengnoupal, Sugnu, Saikul, Kanggui(Kangpokpi), Kangchup, Chalwa/T.Waichong-IT Road, Phaitol/Jiri, Litan/Mongkot leh Imphal ah Public Rally-cum-Public Meeting om ding hi’n Kuki Inpi/CCpur thusuakin taklang hi. July 1, 2014 in KIC offfice ah Kuki Inpi, KKL, KSO, KWHRO, TKSU, KWU, KCA(CCpur) leh District level Orgn te’n thil omdan genkhawm in Public rally neih din thupuk uh a, nungak-tangval leh nupi-papi banah kuapeuh huai hun a tel dingin chial uhi. Hiangtam Lamka a Public Ground ah July 4, 2014 zinglam dak 11.00 in kingak khawm hiding a, huaimun akipan Tedim road zui in DC /CCpur office ah memorandum pe ding uh chi’n leng thusuak kingah hi.


Disability Certificate form hunkhop hawmkhia
Lamka, July-2: Lamka ah June 4, 2014 in Disability Certificate Medical Board kichi kiphutkhia a, Chairman in Dr Thangchinkhup Guite, CMO; Member-Secy in Dr V.C Pau Tonsing, DFWO ban ah member 8 om a, amaute’n CCpur dist a Disability Certificate muthei dingte sitting hun ah medical examination bawlding uhi. Huai ading in zan apan CMO office ah Disability Certificate form kihawmkhia mi 40 val in la uh a, July 15, 2014 tan form kihawm ding a, kimtaka fill-up khit in July 17, 2014 tan in submit theih ding hi.Application submit hun ah residence proof document leh passport lemlak 2 leng atel ngai ding hi. Hiai tawh kisai thilhihna ah Persons with disabilities-te himhim manbei(free of cost) a sepsak hiding uh a,Assessment Camp om hun ding leng tunung a bikhiah hiding hi.


Electric tungtang ah DLEDRCMC meeting omding
Lamka, July-2: DC & Chairman Dist Level Energy Distribution & Revenue Collection Monitoring Committee (DLEDRCMC) makaih in July 3, 2014 zinglam dak 11:30 in DC office chamber ah electric tawh kisai meeting omding hi. Huai ah veng leh khaw tuamtuam ah electrc fee ba tungtang, electric fee khonkhikazah tawh kisai leh load shedding program tungtang genkhawm ding uhi. Huaiah makai tuamtuam leh pawl tuamtuam a heutute tel ding uhi.


Lhingneichong om na kitheilou
Lamka, July-2:Miss Lhingneichong @ Chongpi (14) d/o (late) Thongkholun of S.Molcham, tulela Bethel khua a Happy Heart School ah Class VII simlel June 30, 2014 nitak dak 6:00 vel in inn apan pawtkhia tunitan tungkiklou hi. Huai thu ah a innkuante uh Vahneihoi Touthang w/o Mangkhogin Touthang of S.Molcham in tuni’n Police ah report bawl a, Chongpi mukha leh a omna theite’n Contact No. 8731839713 thuzak ding in ngen hi.


Suangphuh khua ah Focal Spray
Lamka, July-2: Singngat sub-divn a Behiang PHC bialsung a om Suangphuh khawmi 4 apan malaria PF 4 muhkhiak ahihziak in CMO/DMO, CCpur thupiak dungzui in July 3, 2014 in Malaria deptt te’n Suangphuh khua ah DDT ‘Focal Spray ’ding in kuan ding uhi.


Ph.Leihou omna kitheilou
Lamka, July-2: Ph.Leihou(46) w/o Ph So Amuthoi of Thingkangphai apaisa June 26, 2014 zinglam dak 10:30 vela inn apat potkhia, tunitan inn tungkiklou hi. Amah mi gawng, feet 5 vel a sang, puan-ak ngou(white) silh, dialsan (red) bat, puanten vomgial teng a, khedap bulhlou hi. Amah mukha leh a omna theite’n # 9615597368, 8014395029, 8974615048, 8413856446 leh 8974960365 contact din in a innkuan te’n ngen uhi.


SUUNNA
PC Lalnuntluanga (49) h/o Lalnunmawii of Zion Street, Centre Lamka tuni zinglam dak 10:40 vel in sinna in si a, Lamka hanmual ah kivui hi.
Mrs. Chingzavung (75) w/o Pastor (retd) B.Ginsong of Mission Veng, Hiamtam Lamka tuni nitaklam dak 4:30 velin BP stroke in si a, July 3, 2014 in Lamka hanmual ah kivui ding hi.


IMPHAL NEWS:
High Command ah memorandum pia
Imphal, July-2:Manipur a ministry lepthakna(reshuffle) omsak dinga phut MLA 25 te’n Congress President(Congress High Command) Mrs Sonia Gandhi kiangah ah memorandum thon uh a, Congress Working Committee(CWC) meeting ah Manipur a MLA-te’ thilnget leh haksatna a tuahna uh tungtang pawlut dingin ngen uhi. Manipur ah Congress in term 3na dia govt a bawlna hun uah CM O. Ibobi in Minister len khaloute’ ading in term kimkhat a chin hunhun in reshuffle om ding a, Minister lenteng kikhek ding hi’n gen hi. CM leh Dy.CM in CWC meeting a teldin zan in Delhi ah zin uh a, reshuffle tungtang ah Congress High Command in pan alak keileh MLA te’n assembly session a boycott ding uh hi’n gen uhi.


Jiribam ah Truck tamtak tang
Imphal, July-2: MG Avenue a All Manipur Road Transport Drivers and Motors Worker Union(AMRTDMWU) office ah tuni’n press conference om a, Gen.Secy, AMRTDMWU in Jiribam bial ah teacher koihbeh ding leh educational infrastructure puah dinga student pawlin ngetna a bawl uh phutna in kiphinna a neih ziakun Imphal zuan ding Gari tamtak Jiribam ah dinkhawl(stranded) uh hi’n kigen hi. Tuni’n Truck 600 vel security escort tawh kithuah in Imphal apan Jiribam zuan uhi. Akigendan in AMSU, MSF, DESAM leh KSA te’n a thilnget uh pichinsak ahih keileh Jiri-Imphal highway kikal July 5, 2014 zankim apan indefinite blockade pan ding uh chih ahi hi.


Kiran Bedi in Helpline hongkhia
Imphal, July-2: India a numei IPS officer masapen Dr. Kiran Bedi in tuni’n Imphal a GM Hall ah Aryans Group of College, Chandigarh saina in ‘Aryans Scholarship Mela’ kum 2vei na ding hong hi.Huai bel Chandigarh a Aryan Group of College ah course tuamtuam sin theihna dingin khawsakna haksa deuhte khualna a scholarship hi’n kigen hi. Dr. Kiran Bedi in Toll free Helpline No. 1800-30000-388 leng hongkhia a, huai no. tungtawn in student- te’ ki-registered thei ding banah scholarship tungtang kanthei ding uh hi’n kigen hi. Scholarship ngahna ding course tuamtuamte B.Tech, MBA, BBA, BCA, BA, B.Com, B.Ed, Nursing, Polytechnic +1(Non Medical) leh adangdang ziltheihna hi a, Aryan leh Bank te’n seh bangzah hiam pe ding a, adangte student te’n a kipuakkhiak ding uh hi’n kigen hi. Scholarship muthei ding student-te’ July 30, 2014 tan in telkhiak hidi’n kigen hi.


Helpawl atel mi 2 mankhia
Imphal, July-2:Imphal East police commando te’n June 30, 2014 in Khoyathong area apan RPF/PLA active member K. Ranbir Meitei @ Bir (40) of Langdum Maning Leikai mankhia uh a, amah apan kg 3.4 a gik IED 1, battery 1, remote control 1 leh mobile phone 2 mukhia uh hi’n kigen hi.Huailou in Thoubal police commando leh 22-A/R combine team te’n Wangoo Mamang Sabal Leikai waiting shed apan PREPAK a S/S Pvt. N. Thoi @ Tomba Singh of Wangoo Mamang Sabal Leikai mankhia uh a,aaman Wangoo, Sugnu leh Kakching Khunou area-te ah extortion lam a mawhpua hi’n kigen hi.


Jiribam ah teacher koihbeh ding
Imphal, July-2: Jiribam a student pawl 4te’ ngetna dungzui in Education deptt in Jiribam a Primary leh upper-primary level-te’ ah SSA nuai a teacher koihbeh ding a panlak hi’n kigen a, Education deptt in Imphal East a sub-divn khat ading in subject tuamtuam ah lecturer 8 lak dingin thusuah uh hi’n kigen hi. Jiribam a teacher poimawhna bik school te ah SSA nuai a teacher 10 piak hidin kigen a, Hr Sec level a Maths, Bengali, botany, commerce, English, History leh physics subject ah teacher 2 zel contract basis alak hiding a, huai dinga selection process ah written test omlou ding a, academic performance ah et hiding a,interview in 10% mark paw ding hi’n kigen hi.


SDO in aguk a thilsai in ngawh
Imphal, July-2: MGNREGS Job Card Holder Association te’n DC/Tamenglong kiangah SDO/Nungba in MGNREGS leh BRGF scheme a social audit a guk asai hi’n theisak uh a, SDO office in June 18, 2014 a social audit pan dingin notice suak mahleh tuni tan a pat hinai lou hi’n leng taklang uhi.SDO/Nungba in MGNREGS 2013-14 sunga ni 15 ading material components leng implement lou a, huai scheme tawh kisai a work order teng a guk a kem hi’n leng taklang uhi.


TSA ten dakkal 72 bandh puan sawm
Imphal, July-2:Thadou Students’ Assn, General HQ ten thusuah a bawlna uah July 6, 2014 akipan dakkal 72 sung statewide bandh bawl ding uh hi’n taklang uhi.TSA thusuak in a gendan in June 16, 2014 in 7th IRB a CO Chaoba Lokho makaihna a IRB ten Koirengei leh Khonghampat kikal ah Alto Car (ML 05F/2825) a sung a minautang 6 tuangte phu in taisan uh a, huai tungtanf ah state govt kiangah IRB a CO Chaoba Lokha terminate dingin phu uh a, terminate ahih kei aleh July 6, 2014 akipan dakkal 72 sung statewide bandh hiding chi’n gen uhi. Amau tuni’n Manipur Press Club ah Press-te kimuhpih in gen uh a, TSA/CCpur ten leng statewide bandh thuap ding uh hi’n taklang uhi.


Yairipok bandh in hindan nawngkaisak
Imphal, July-2 : Hidam Bobby Singh (35) thatte mawhpaihna in tuni in Yairipok Mamang Leikai ten dakkal 24 sung Yairipok ah general strike puang uhi. Hiai general strike bel tuni zinglam dak 5:00 in kipan a, tua ah dukan telin school leh govt office-te kikhak vek in hindan ngeina naktak in nawngkaisak hi. Hidam Bobby Singh bel Yairipok PS huamsung a Yairipok Universal College kianga nullah ah zan zingkal in sisa in kimukhia chih ahi hi. Amah bel azi leh tate 2 tawh Yairipok Mamang Leikai ah omlel ua, June 30 nitaklam a cycle a pawtkhia inntung kiklou ahi.


Sainik School te’n Champion vala uh
Imphal, July-2: East Zone U-14 Sainik School Football Championships-2014 kichi Nagaland a Sainik School Phunglwa mun ah June 24-27, 2014 sung om hi. Huai hun in Sainik School, Imphal te’n West Bengal,Assam leh Nagaland a Sainik school-te zoukhia in champion la uhi. Tua tawh kiton in khanawn in Rajasthan khawpi Chittorgarh a Sainik School mun ah Inter Zonal Sainik School Football Championships om ding ah va kihel ding uhi. Hiai championships ah Cdt. Imran of Class IX in best player hihna leh top scorer hihna la hi.


Jiribam a ZEO office hal in om’
Imphal, July-2 : Meltheihlouh kuate hiamin zan nitak dak 11:00 velin Jiribam a ZEO Office mei in vahal uhi. Huai hun in ceiling tunglam pang leh lehkhabu bangzahhiam kangman zek mahleh Jiribam Fire Service ten amun vadelh pah in meikuang phelhmit man uh a, kangse law manlou hi. Huai tawh kisai in kuate hal hihiam, chih theih hilou a, akipuang leng omlou uhi.


Assam Rifle te’n mipi kiangah biakinn pekhia
Imphal, July-2: PRO, IG/AR(S) thusuakin a gendan in 26-Sector Assam Rifle nuai a 6-DOGRA te’n Khengjoi Block a Moltuk village ah Baptist Church a puahthak uh zawhsiang ahihtawh kiton in zan in 26-Sector A/R Commander in Moltuk khawmite’ kiangah pekhia hi. 6-DOGRA unit te’n Baptist Church tuang teng cement flooring, khongkhak leh window teng bawlthak ahihbanah biakinn bang leng rong nuhthak vek uh a, biakinn lutna ding tan ah leng rain shed bawlsak uh hi’n kigen hi.


TUNI THUPI:
“Mi gilou-salou nakpi taka thu nei a, a pouna mun a singnou dawng thenthon bang a, ka biambuam lai ka mu a.”
–Sam 37: 35

 

zogam thupuak logo