UPDATES:

Zogam Thupuak | 22 June 2014

Green Seminar & Workshop tuni’n zou uh
Lamka, June-21: Delhi Paite Indongta (DPI) leh Environment Friends pangkhawm in Ministry of DoNER akipan huhna zangin New Lamka ah Rayburn College ah zan in ‘The Green Seminar & Workshop & Seminar” pan uh a, tuni a sunzom nawn in zousiang uhi. Rev. Khen P. Tombing in thumna in Seminar hong a, Biaklun Shoute, President, DPI in vaidawn thu gen kawmin Seminar piankhiakdan pulak hi.
Tuni a Green Seminar hun ah Soumen Dey, WWF in ‘Web of Life’ thupi zang in seminar hunah sinsak a, Haukhum Hauzel,IAS(retd) Member Secretary, Mizoram Planning Board in ‘New Land Use Policy and Green Initiatives’ sinsak in Sikkim Team akipan ‘Talk on Eco-Tourism chih thupi zangin sinsakna om hi. Mumung Tonsing, Chairman, Environment Friends(EF) in tunitan amau pawlte panlakna taklang a, college leh student-te tawh pangkhawm a kalsuan in mun tuamtuam ah singnou suan uh ahihdan gen hi. Ni 2 sung Green Seminar & Workshop hun zatna ah makai tuamtuam banah student leh Environment Friends volunteer tamkhop tel uh a, singnou suan a poimawhdan leh tunung a khaw omdan hong hoihsem theihna dingin environment kepbit a poimawhdante seminar ah sinsak in om hi.

SSC saina nuai ah exam om ding
Lamka, June-21: Staff Selection Commission (SSC) saina in June 22, 2014 (Sunday) zinglam dak 10:00 akipan sun dak 12:00 tan CCpur govt college ah Delhi Police nuai a semding SI, banah CAPF, CISF nuai a ASI sem ding lakna dingin SSC Combined Graduate Level examination, 2014 om ding hi. Huai ah candidate 781 vel exam ding uh a, invigilator 71 duty ding uhi.


Farmers Awareness Program
Lamka, June-21: Dist Agri Officer(DAOi) makaih in Saidan khua ah tuni’n Agri. deptt saina in Rashtriya Krishi Vikas Yajana project nuai ah Farmers Awareness Program om hi. DAO) in agendan in CCpur dist ah tuilou a buhchi zatding farmer(loubawlmi) te’n a telsiam uh poimawh a, Agri deptt te’n buhchi tuamtuam mipi adia kiching nei a, office ah laktheih hi’n gen hi. June 23, 2014 in Thingkangphai khua ah Farmers Awareness om nawn ding a, July 2014 khasung in khua/veng tuamtuam a om ding in gen hi. Awareness program ah K,Ranju (Agri officer) leh Azil, Plant Health Clinic/CCpur te’n sinsak uh a, loubawlmi 50 vel telte lakah buhchi hunkhop leng hawmkhia uhi.


Gari leh khe apaite di’n nawngkai
Lamka, June-21: Tuni zinglam apan in Lamka khawpi leh akimlak ah vuah tamtak a zuk ziakin nullah kuak apan hawktui luangkhia a, huaite’n lampi lai tum(submerged) in gari a taituah leh khe a paite adi’n nawngkai mahmah hi. IB road, New Bazar Bus station apan hawktui luangkhiate’n IB Road-Nehru Marg junction a Tedim Road lak nawksuk a, Nehru marg lampi zuisuk in lampi lai ah hawktui luang hi.


Dist Level Essay competition
Lamka, June-21: Dist Legal Services Authority/CCpur leh Manipur State Legal Services Authority saina in June 22, 2014 sunnung dak 1:00 in V.Tawna College ah‘Fundamental Duties of Indian Citizens’chih thupi zang in Dist Level Essay Writing Competition om ding hi. Kidemna category 3 in kikhen ding a, huaite class IV- VII, class VIII- XII leh college student in khen hiding uhi.


Mi 17 in sisan thawhkhawm uh
Lamka, June-21: Young Mizo Association(YMA), Chiengkawn Branch te’n June 16, 2014 a YMA Day a zat uh sutzopna in Dist Hospital a Blood Bank tawh pangkhawm in tuni sunnung in Chiengkawnpang Community Hall ah ‘One Day Blood Donation Camp’ nei uhi. Huai ah YMA member numei 6 leh pasal 11 in Dist Hospital a damlou om sisan piak ngaite’ hinna humbitna dingin in sisan thawhkhawm (donate) uhi.


BJP CCpur Dist Emergency meeting
Lamka, June-21: Tuni’n BJP CCpur Dist emergency meeting om a, BJP Mandal a President/Secy teng ban ah BJP Morcha-Cell a President/Secy te leh BJP Mahila makaite tel uhi. Lhunkhojang Haokip, President BJP CCpur in agendan in June 17, 2014 in M.Chungkhosei in Lalditsang, MDC(Senvon) a laklut thil diklou hi’n gen a, Manipur a Non-Naga lakah State BJP Executive Committee in mi 3-Tongminthang Lhungdim, MDC (Sagang), T.Hangkhanpau, ex-MLA leh Tongmang of Sadar Hills kia om a, midang kuamah omlou hi’n gen hi. Party member dia laklutna din BJP Mandal tungtawn in Primary enrolment bawl ngai hi’n gen hi. Maban ah kuapeuh in party thu ah Dist President theih pihlouh in bangmah hihlou dinn gen a, tuni’n BJP Mandal tungtawn a primary member din mi 2 enrolment bawl hi’n gen hi.


Mi 2 kiang ah Rs 5 lakh tuak pia
Lamka, June-21: Mannuamching, CEO/ADC in tuni sun dak 12:00 in a office chamber ah CCpur Dist Council Teachers’ Assn (CDCTA) member apang teacher sepna akipan pension (retd) Tualkhokhai leh V.K Puia kiangah Pension-cum-Gratuity sum Rs 5 lakh tuak pia hi.


Primary teacher-te adin Workshop
Lamka,June-21:ZEO leh ADC/CCpur nuai Primary teacher sem ‘untrained’ teacher-te adingin June 24, 2014 zinglam dak 9.30 in Rengkai Hr Sec School leh GM High School a Study Centre ah IGNOU nuai a DEI Ed Course tawh kisai workshop om ding a, Mannuancgiung,MCS, CEO/Ccpur khuallian a pang in hong ding hi. Training atel untrained Primary teacher te’n amau Study Centre chiat ah zinglam dak 9.00 akipan Workshop a tel chiat dingin theihsak hi uhi.


Tuipiphai Aided Jr H/S in masawn
Lamka, June-21: Thanlon block a om Tuipiphai Aided Jr H/S building leh kitchen kisiatluat ziakin huai asem teacher, khawsung mipi leh hausa pangkhawm in school building leh kitchen bawl uh chih thutut kingah hi. Huai school ah tukum in student ki-enrol 57 pha hi’n kigen hi. DI of schools leh AI of school/Thanlon te’n Tuipiphai Aided Jr H/S staff, mipi leh hausa panlakna kipahpih in volleyball, football leh student- te adin uniform pia uh hi’n kigen hi. Tuipiphai Aided Jr H/S teacher te’n school akai student leh school a kailou khawsung a student kigawm 87te coaching pia in lai hilh zel uh hi’n kigen hi.


Jerusalem Clinic 2nd Anniversary
Lamka, June-21: New Lamka a EBC Auditorium ah June 23, 2014 sunnung dak 1.30 akipan in Jerusalem Clinic 2nd Anniversary zatna om ding a,huai ah Dr Th. Dhabali Singh,MD(Pathology),Managing Director of Babina Diagnostic Centre,Imphal; Dr LF Tusing, Physician, retd Med Supdt/Dist Hospital leh Dr Kh. Palin, MS, Mch(Plastic Surgery), Managing Director of Shija Hospital,Imphal in thugen ding uhi.


SUUNNA
Nemzachong (78) w/o V Tuangkam of Gangpimol tunitak dak 7:30 velin teknat in si a, June 22, 2014 in Gangpimol hanmual ah kivui ding hi.

zogam thupuak logo

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING