UPDATES:

Zogam Thupuak | 20 June 2014

Dynamo battery koihte mankhia
Lamka, June-19: Zan sunnung in College road, New Lamka a Sauliim Book Barn kong ah Dynamo rechargeable battery khat kikoih a,bomb hi maithei chia mipi patausak Thangthianmuang (20)s/o Hauzachin of ColonyVeng, Bungmual leh Kamkhankhup Thomte (24) s/o Dalzachin of Zoar Veng, Bungmual tuni’n Police te’n mankhia uhi. SP/CCpur apan kizadan in zuauthu(rumours) ziak a numei-naupang leh mipi patausakte banah namkal hihbuai thei ding social networking a thehdalhte kuamah koih maimai hilou ding uh a, huchibang hihte tungah Police te’n action khautak la ahi chih theihna dingin mi 2 te lock-up ah koih a om uh hi’n gen hi. Mi 2te’ tung ah FIR bulhkhum hiding a, CJM court a dinsak ahihzawh un Jail a koih hiding un gen hi. SP in a genbehna ah Sauliim Restaurent kim a dynamo battery koih a mipi hihlautu tulel a CCpur PS nuai a VDF semlel Kamkhankhup leng tuni mah in a sepna tawpsak(dismissed) hi’n gen hi.

Gari’ phutkhak damzoulou in si
Lamka, June-19: Torbung khawlai a Tedim Road ah tuni nitaklam dak 4:00 velin Imphal apan Lamka zuanlai Gypsy 1 in Ibungo (7) s/o Sulchandra of Torbung phukha a, kintak in Dist Hospital zuatpih himahleh etkolmanlouh in si hi. Thu kizadan in Ibungo’ taklam bil(ear) tunglak liam a, abil ah sisan pawtkhia hi. Ibungo tulelin Torbung a Unique Public School ah class I simlel hi a, lampi kan(crossing) lai gari taituahte’ kal ah Gypsy in phukha hi’n kigen hi. KKL ambulance in Dist Hospital apan siluang pawkhia in a inn uh tun a, June 20, 2014 in Torbung ah siluang haltum hiding a, huai zawh in gari neite leh misi lam te’n kihouna nei ding uh hi’n kigen hi.


DC makaih in DAPCC meeting om
Lamka, June-19: DC/Chairman Dist AIDS Prevention & Control Committee (DAPCC) makaih in tuni’n DC’s office a BRGF Resource Centre ah 1st DAPCCC meeting 2014-15 om hi. Huai ah F-ICTC-te ah HIV test bawlvek ding, staff duty utlou a omleh CMO in khalawh a hentang sakding in thupuk uhi. Line deptt tawh sepkhawmna hatsak sem banah mipi tamzaw in a hamphatpih ding gelsak ding, NACP Facilities centre a office timing bikhiah ding, huai din Med Suptd/Dist Hosptial in mawhpaw ding, Dist Hospital ah June 4, 2014 a kihong thak Opioid Substitution Therary (OST) Centre a staff ding DC in Competant authority ah remind thak dingin thupuk uhi.


CBA Naupang camp, 2014 om
Lamka, June-19: Gilead Tlang, Kawnpui Tlangnuam ah ‘ Kote in zong Jesu ka munuam uh hi’ chih thupi zangin tuni akipan June 22,2014 tan sutzop ding CBA Naupang camp kipan a, huai ah thugentu in Dr B. Kam Za Mung, Principal, Bethany Christian College pang hi.


CCpur MLA’ nominee in lakhia
Lamka, June-19: 58-CCpur MLA’ nominee N.Mangpu in tuni zinglam in HQ Veng a FCS godown apan April 2014 quota PDS antang APL 200 quintal; BLP 819 quintal leh AAY antang 320 quintal lakhia in agent-te pekhia hi.


Bungmual V/A in mawhpaih
Lamka, June-19: New Lamka a Sauliim Restaurant kiangnai a mi supatau thei dia ‘hoax bomb’ om tawh kisai a Bungmual khawmi 2 a kigolhkhakna tungah Bungmual Village Authority in ngaikhawk mahmah in thiltung poisakthu puangkawm in naktakin mawhpaih uhi. Bungmual V/A te’n tuni zingsang in mi 2 te sam in thudong uh a, maban ah hibang a gamtang nawnlou ding leh Bungmual khua hih minse nawnlou dingin kichiamsak uh hi’n V/A Chairman H Mangchinkhup leh Secretary Khamkhanthang Valte te’n thusuah bawl uhi.


AWCA saina in training om
Lamka, June-19: Ministry of Minority Affairs , New Delhi panpihna tawh Action for Women and Child Advancement (AWCA) saina in 6 - days Leadership training for Minority Women 2nd batch ah mi 25 in tuni in training zou uhi. Tuni tan in hiai training ah mi 50 val sinsak in om ua, huai ah Esther K Suantak, Grace Zamnu leh Jonathan Naulak te’n Issues related to women, Leadership of Women, Government Mechanism, Personality Development, Schemes and funds available for women, Health and Hygiene, Life Skills, Family Planning, Common Childhood illness and Immunizations, Public Distribution Systems, Schemes/ programmes for the welfare of Minorities, Home management chihte thupi pansan in sinsak uhi.


Malaria positive 4 mukhia
Lamka, June-19: Singngat sub divn sung Behiang PHC nuai a om Suangphuh khawmi Suanliantung (14) s/o Lampau; Lampau 54) s/o Thongkhanthang; Peter (33) s/o Kamsuanmung leh Martha (25) w/o Peter tunaizek in khawsik ziakin Dist Hospital ah admit hi uhi. Tuni’n Malaria Clinic ah mi 4te sisan test hi a, avek un malaria positive hi un kigen hi. CMO/CCpur in June 20, 2014 in Suangphuh khua ah Medical team 1 sawl ding a, amau sisan testna(kit), damdoi, thousilen(mosquito net) leh damdoi a thousilen diahna leng paw ding uhi chih ahi hi.


CCpur ai-oh in mi 25 telding
Lamka, June-19: Addl Director of Education (S)/Hills saina in June 23-30, 2014 sung Takyelpat a State Academy ah Computer Literacy, Service Matter, RTI, Finance Management leh Human Rights training om ding a,June 23-25 sungin RTI training ah CCpur dist apan in mi 5, June 23-27 sung Service Matter ah mi 5, June 25-20 sung Computer Literacy leh Finance Management training ah mi 10 leh June 26-28, 2014 sung Human Rights training ah mi 5 telding hi.


NYC (NYV) ading interview
Lamka, June-19: Maniram Sharma, IAS, Addl DC/CCpur office chamber ah June 25, 2014 in NYK/CCpur nuai a National Youth Corps (National Youth Volunteer) semding lakna dingin interview omding hi. Huai hun ah tulel a NYC (NYV) a semlelte leh applicant thak teng interview hun ah telngai ding hi’n kigen hi.


Training atelte adi’n Workshop kipan
Lamka, June-19: DIET Centre/CCpur ah ZEO/Ccpur leh ADC/CCpur nuaia sem untrained teacher kigawm 300 te’n Diploma in Elementary Teachers Training nei uh a, huai a telteng adi’n June 19-30, 2014 sung daihding huai mun mah ah ‘10 days Workshop’ kipan hi. Workshop ah DIET Centre a Lecturer- Th Sanayaima Singh, S.Bidyananda Singh, W.Somorjit Singh leh Meenashi Devi in sinsak ding uhi.


ANM zil utte’n application form
Lamka, June-19: Female Health Worker Training School ah kum 2014-15 session a ANM zil nuamte’n CMO/CCpur office ah Rs.20/- pia in application form laktheih a, June 2014 khasung mah in submit ngai ding hi. Huaiban ah tuni sunnung dak 1:00 in CMO makaih in ama’ office chamber ah Persons with Disable Certificate tawh kisai Medical Board member te’n meeting nei uhi.


Electric current ziakin liam
Lamka, June-19: Samuel Goulen (16) s/o Ngamthang of S.Molcham tuni nitaklam dak 4:00 velin electric post akipan inn a electric lakna ding bawlsawm a kaltou lai electric current in man in a force in sawnkhia a, atal(forehead) leh veilam lenuai liam a, Hospital ah admit in om hi. Samuel’ in electric post a a kaltouh laitak in electric paikei mahleh vuahzuk ziak in electric post ah current om a, huai in sawnkhia hi’n kigen hi.


Village tawh kisai detail pelou ding
Lamka, June-19: United Chiefs’ Committee(UCC) pawlin June 18, 2014 a emergency meeting a thupukna dungzui in CCpur district sunga hausate’n Village tawh kisai information bukim form fill-up in govt a piaklut ding chih himahleh thuthak om masiah Hausa kuamah in pelutlou ding in thupukna bawl uh chihthu Jt Secy/UCC apan thutut kingah hi.


COPS te’n Get-together neiding
Lamka, June-19: Civil Officer Pensioners’ Society (COPS) pawlin June 20, 2014(Sintawpni) sunnung dak 12.30 akipan in Dorcas Hall Compound(New Lamka) a EBC Jubilee Hall ah Kithuahkhawmna(Get Together) hunzang ding uh a, Langkhanpau Guite,Chairman, ADC/CCpur in huai hun uap in hugenna hun leng nei ding hi. Programme zawh in ankuang umkhawm ding uh chihthu om hi.


June 25 tan tui kailou ding
Lamka, June-19: Khuga Dam akipan Lamka khawpi adia tui supply-na(tui lakna) bawlthak ngai a om ziakin June 25, 2014 tan tui kailou ding a, huaiziakin consumer te’n theisiam ding in PHED apan thutut kingah hi.


SUUNNA
Ngaikhannuam (65) w/o Rev Nengkhanmang chief of Jangnuam village tunitak dak 9 velin damlou in si. Zing chiangin Jangnuam khua ah kivui ding hi.
Sonpu (44) s/o Goihzangai & c/o Upa M Ginzalian of Vengkhang, Pearsonmun, hun sawttak sungna ziaka damlou a lupna ngak tuni sun in si a, Pearsonmun hanmual ah kivui hi.
Gouminmang (30) s/o Chuonkap of Chiengkawnpang sungna ziaka Imphal a etkol dinga kipua lampi ah si a, tuni mahin Chiengkawn hanmual ah kivui hi.

zogam thupuak logo

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING