Hornbill News | 08 August 2013

User Rating: 0 / 5

Star InactiveStar InactiveStar InactiveStar InactiveStar Inactive
 

hornbill news logo*SSA Residential School Naupangte Kiang Ah Uniform Hawmna Om
*Tuibuang Women Welfare Committee in Khamtheih Douna Pan; Mipi Zathuapna leh Panpihna Ngen Uh
*District Cooperative Office Luigawp; Atung Pilhkhia
*Thanlon Constituency Sung a Ding Manipur Old Age Pension (MOAP) Identity Card Hawmkhiak Hiding
*CDSA leh District Sport Association Tamenglong in Friendly Match Nei Ding

Tanchin Kimzaw:
***Khominthang, New Lamka a om Sarva Siksha Abhiyan (SSA) Residential School student-te'n hun bangtan hiam uniform neilou a school a kai nung un tuni sunma dak 11:30 in student-te kiang ah SSA tungtawn in Free Uniform ngahta uhi. Hiai hun ah Kaikhanlian DI of School CCpur leh M. Gouzamang EM/ADCC, Member School Management Development Committee SSA Residential School-te'n student-te kiang ah uniform piakkhiakna nei uhi. SSA Residential School ahihleh apaisa April 16, 2013 a honkhiak ahi a, tuni tan in student 250 vel hiai school ah kai uhi.

***Zu leh khamtheih chi tuamtuam doudalna'ng in apaisa August 3, 2013 in Peace Ground ah Tuibuang Women Welfare Committee phuhkhiak in ana om hi. Tuibuang Women Welfare Committee makaite apan thu kiza dan in Women Welfare Committee phuhkhiak ahih nung Tuibuang khosung ah zu leh khamtheih chi tuamtuam zuakte kiang ah khawlsan ding in ni 4 sung hun pia ua, zan in a hun piak uh a beita a, tua toh kiton in tuni apan in khosung mun tuamtuam ah numei pawl in duty pan uhi. Rebecca, Secretary Tuibuang Women Welfare Committee in a genna ah tuni a duty neih pat in om a, zu leh khamtheih matkhiak bangmah om nailou ahi chi hi. Tua banah numei pawl in khosung leh vengsung hoihna ding a nasep apat uh toh kiton in numei pawlte adia niteng a thumsakna nei mi 16 bang om ahihdan leng gen hi. Tua banah numei pawl in hiai bang nasepna hon patkhiak uh toh kiton in kuapeuh in kithuahpihna pe chiat ding in mipite kiang ah ngetna bawl hi.

***District Co-operative Office Tuibuang a Accountant sem lel C.Ramzoui' room zan nitaklam dak 2:00 vel in building tung (roof) a cement ki-plaster kokkhia in kia hi. Hiai hun laitak a room sung ah kuamah a omlouh ziak in liamna tuak omlou hi. S. Kaikhanthang ARCS, DCO in a gendan in Office building kibawlna sawtlaw mahmahta ahihziak in building-te segawp in mun tamzaw khaang (crack) khinvek hi'n gen a, vuahzuk hun chiang in office staff-te room sung ah kuamah om ngamlou in office polam ah pawtkhe zel uh ahihdan leng gen hi. Tua banah Co-operative head Office Imphal kiang ah Office puahthakna ding in ngetna bang zah vei hiam bawlta ua, tukum in major repairing-na ding in 15 lakhs proposal pelut mahle uh Finance Dept lam in 9 lakh kia hon pia uh chi hi. Aban a gen zelna ah kum paisa 2005 vel in khat vei co-operative office repairing ana kibawl ngei a, zan a office inntung kia toh kisai leng tuni a head office Imphal ah thil omdan zasak ahihdan leng gen hi.

***Manipur Police Sporting Club (MPSC) Football Team-te saina in hong tung ding August 16-24, 2013 kikal sung in Manipur Police Training Centre (MPTC) Panggei football ground ah trial-cum-selection om ding hi. Hiai hun ah, CCpur district apan a min pelut mi 282 val tel ding uhi.

***District Administration CCpur saina in hong tung ding August 14, 2013 in Lanva lui nak ah singnou chi tuamtuam suanna neih hiding hi. August 14, 2013 zingkal dak 8:00 in singnou suan dingte khakkhiakna Langkhanpau Guite Chairman ADC/CCpur in nei ding a, Jacintha Lazarus IAS DC/CCpur in thugenna hun zang ding a, hiai ni mah nitaklam dak 5:00 in Lamka Public Ground ah Independence Day Eve Celebration zatna om ding hi. Hiai hun ah Cultural Programme, Independence Day Theme: Clean & Green CCpur leh Fire Works neih hiding a, nitak dak 7:30 in DC Bungalow ah nitak-ann nekkhawmna om ding hi.

***Thanlon MLA Vungzagin Valte Parliamentary Secretary in a bialsung a pitek leh putekte kiang ah Social Welfare Department tungtawn in Manipur Old Age Pension (MOAP) Identity Card hawmkhiakna hong tung ding August 10, 2013 zinglam dak 10:00 in Niangzen Khualbuk Dorcas Veng New Lamka ah nei ding hidan in thutut kingah hi.

***CCpur District Sport Association (CDSA) leh District Sport Association, Tamenglong-te'n zingchiang zinglam dak 11:00 in Tamenglong Play Ground ah Unity Through Sport chih thupi a nei in football friendly match nei khawm ding uhi. CDSA team apan in mi 15 va kuan ding ua, amaute khakkhiakna zingchiang zingkal dak 9:00 in CDSA Office Hiangtam Lamka ah T. Sumlianthang MDC, President Veteran Sport Association CCpur (VSAC) in nei ding hi. CDSA team te ahihleh zingchiang in Tamenglong ah zan giak ding ua, zinghal in Lamka hong tung kik nawn ding uhi.

Gamdang Tanchin:
***August 8, 1988 in Burma mipite'n mipi vaihawmna, democracy phutna in Yangon ah kiphinna nasa mahmah ana nei ua, mihing lakh nga vel in mass uprising ana nei uhi. Huai hun in Myanmar sepaih vaihawmtu, military junta in thagum huaisia mahmah tawh mipi kiphinna neite maituah ua, minautang tamtak ana kaplum uhi. Huai hun theih gigena ding in kum 25 nung in, 8888 Silver Jubilee chi in tuni'n amasapen ding in Yangon ah anniversary zatna om a, peace rally thupitak in nei uhi. Hiai hun uap ding in leitung mun tuamtuam apan a Burmese-te paikhawm in anniversary zatna thupitak in nei uhi. Pro-Democracy leader Aung San Suu Kyi in leng hiai hun zatna ah thugenna nei hi. Tu'n kum nih paisa apan in military junta in mipi telching palaite kiang ah vaihawmna leh thuneihna tamzaw piakhiata a, bangtan hiam ah masawnna leh kikhekna muh theih in omta hi.

***Kenya's Jomo Kenyatta International Airport apan a meikang nasatak a piankhiak nung a Airport khak ahihnung in Ningani in kihong nawnta a, London apan lenna khat bawh masapen a, huainung in Thailand leh Tanzania apan in leng lenna dang bawh behlap uhi. Airport meikang tawh kisai suizuina pai lel a, local newspaper khenkhat in meikang pen electrical short circuit ziak hi'n gen ua, Kenyan thuneitute'n meikang ziak a siatna leh manthatna tungzah tuatkhiak tum in panla lel a, meikuang kipatna diktak pen suizuina pailel ahihman in kuapeuh in dawhzoutak a ngak hamham ding in ngetna bawl uhi.

***US intelligence thuguk puangkhiatu Edward Snowden kiang a Russia in hun sawtlou a ding lel himahleh bukna, temporary asylum a piakziak in US solkal thangpai mahmah a, a lungkimlouhna uh bel diplomatic pau kilawmtak zang in 'disappointed' chih tan lel in taklangta a, US lungkimlouhna latsakna ding in September a St Petersburg ah G20 Summit a om hun a US-Russia in Bilateral Summit neih ding a guangsa a om pen na-ngawn US President Barack Obama in cancelled a, maban a gam nihte kihouna ding poimawh mahmah khenkhat omlaite na-ngawn thulh a om vek ding a gintak ahi. G20 Summit hun-awngkal a Russia leh US in gam nihte kal a kisumdawntuahna, missile defence leh human rights tawh kisai a summit nei ding uh hi'n kigen a, Edward Snowden thubuaiziak a President Obama in huai summit a tellou ding ahihdan a puanziak in Russia in leng lungkimlouhthu taklang hi.

***Egyptian Interim solkal in Morsi gumtute'n a kiphinna uh khawlsan leh kongzing nusia ding a theihsakna leh vauna a bawl uh atawpna, final ahihdan puang a, Muslim Brotherhood in bel hichibang a kiovauna leh thagum suahna leh hiamgamna tellou a kiphinna a, lungkimlouhna langsakte tung a vauna leh gamtatna in Egypt ah sisan luanna tamsem piangsak ding hi'n dawngthuk uhi. Numei leh naupangte tel in Morsi gumtute'n Egyptian President hihna, vaihawmna leh thuneihna dan bangtak a mipi'n vaihawmna makaihtu dia a telching Mohammed Morsi kiang ah thuneihna leh vaihawmna piakkik ahih mateng kongzing nusialou ding uh hi'n gen ua, thudik leh thildik, vaihawmna dik gum a si ngam uh ahihdan uh gen uhi. Himahleh, Egyptian Army-te zathuapna leh gupna tawh bawlkhiak a om interim solkal in kongzing apan a Morsi gumtute, a kikulhna ua pan hawlzak ding in thupuan bawl a, himahleh bangchibang a hawlzak a, bangchik chiang a hawlzak ding chih bel bangmah chiangkuang bel om nailou hi.

***Ohio, US ah, pasal khat Ariel Castro kichi in kum sawmval numei thum a a khumbichilhna inn, house of horrors chih aom hihsiat in omta hi. Ariel Castro in numei thum kum sawm val ana khumbichilhte, victim-te leh a lawmte'n khumbichilh a ana omna inn uh hihsiatna, demolition en in, pimang a ana om naupangte' nu-le-pate kiang ah lam-etna omlai ahi chih etsakna di'n balloon khahna nei uhi. Nipikallui in hiai inn pen Ariel Castro in plea deal a bawl hun in piakkhiakna nei a, si ding a thutanna bawlkhum a a omsang in kum sang khat sung suangkul taang a telzawk ziak in kum sang khat jail taang dia thutankhum a om ana hita hi.

***Hong Kong Custom thuneitute'n sai hapak, chingpi mawl/ki leh gialbem vun tamtak mankhia ua, sum a tuat in US $5 million hhu khawng hi'n kigen hi. Matkhiak a omte lak ah sai hapak 1,120, chingpi ki 13 leh gialbem vun 5 ahi a, singkuang bawltawm 21 ah kithundim thikthek hi'n kigen hi. Hiai illegal cargo bel Nigeria apan Shanghai zuan hi'n kigen hi.

***December 2012 a Delhi bus a numei khat sualluih nung a thahna thubuai a kigolh kha naupang kum chinglou khat khum a a omna, Delhi a Majnu Ka Tila kiang a Juvenile Home ah, inmate, suangkul taangte lak ah buaina kipan in kisualzakna piang a, si-le-liam bel bangmah report omlou hi. Juvenile Home a omte, inmate-te leh Juvenile Home enkaitute kal ah kihoulemna a om theihziak in buaina pen betdaih a om theipah hi'n kigen hi.

***Ni tamlou paisa a India-Pakistan gamgi LOC dung a Indian Jawan a kaplup a a omna u'tawh kisai a Indian Defence Minister AK Antony in statement ana suahkhiaksate ah demna leh mawhsakna nasatak tuak a, Indian Parliament na-ngawn opposition-te'n a sukbuai hilhel nung un Defence Minister in statement thak suahkhia nawn a, Pakistan Army-te kigolhna tellou a LOC ah helpawlte kia gamtang ngeilou uh ahihdan gen in naktak in mawhpaih a, Pakistan tawh kizopna leng et thak hiding in gen hi. Lok Sabha Opposition Leader Sushma Swaraj in Defence Minister in a statement suahkhiaksate zukkik a, statement dikzaw leh muanhuaizaw a suahkhiak thak ziak in kipahthu gen a, Indian vaihawmna innpi in aw khat luang a India leh Pakistan kal a kizopna leh kitanauna pen Pakistan in ahiding mawng a a koih a, a ut dandan a India tung a gamtang theilou ding ahihdan khauhtak in i hilh thei ding uh chi'n gen hi.

***Indian vaihawmna innpi nihte lak a upper house leng kichi Rajya Sabha Official Bullettin in zan a Parliament hihbuaina ah Member of Parliament mi 22 min taklang a, huai lak ah BJP MP 20 leh TDP MP 2 tel uhi. Hiai thuziak in BJP thangpai mahmah nawn a, Rajya Sabha proceedings omlaite'ng leng boycott ding a vauna bawl in innpi apan a pawtkhiaknung un Rajya Sabha Bullettin List apan in innpi subuai chi a chiamteh a omte'ng a min uh lakkhiak thak in om hi.

***CBI-te'n Indian Mobile phone bawltu Micromax neitu Rajesh Aggarwal leh a lawm Manish Tulli-te'n Municipal Council of Delhi a junior engineer khat kiang ah golhgukna a piakziak un mat in om ua, hiai thu tawh kisai mah in MCD official thum leh DDA official khat leng mat in om uhi. Wazirpur a MCD-te banquet hall khat regularize bawlna ding in mobile phone company neitu'n Rs lakh 40 golhgukna tawh deal bawl uh hi'n kigen hi.

***Reliance Industries Chairman Mukesh Ambani kiang a solkal in Z-Category Security a piakna tawh kisai a social activist nih in Public Interest Litigation khat Bombay High Court ah a thehlut nung un Bombay High Court in PIL nawlkhinsak hi.