Hornbill News | 16 May 2013

User Rating: 0 / 5

Star InactiveStar InactiveStar InactiveStar InactiveStar Inactive
 

hornbill news logo* PHC leh PHSC tuamtuam a Medical Officer, ANM leh ASHA member ten Reproductive Child Health (RCH) Camp nei.
* Paite Tribe Council (PTC) GHQ deihna bang in tunni in PTC Conference Hall ah Central Comittee 9 vei tut khawmna neih in om.
* Manipur Pradesh Trinomool Congress Party President Kim Gangte in tuni in Lamka hong pha in Press leh media te kimuhpihna nei.
* District Incharge Minister Phungzathang Tonsing in Press meet sam.

Tanchin Kimzaw:
District Family Welfare Officer, CCpur saina in zan May 15, 2013 apan in PHC leh PHSC tuamtuam a Medical Officer, ANM leh ASHA member ten Reproductive Child Health (RCH) Camp neih uhi. Zan in B. Kalzang PHSC mun ah nei ua, tuni in Mission Compound PHC ah nei uhi. Zingchiang in Ngurte PHSC ah nei nawn ding ua, tua ban ah May 20, 2013 in Khonomphai PHSC leh Sagang PHC ah nei nawn ding uhi.

Paite Tribe Council (PTC) GHQ in deihna bang in tuni sunma dak 11:00 in PTC Conference Hall ah Central Comittee 9 vei tut khawmna nei uhi. Tua ah PaiteLiterature Soceity in nam puan design a bawl te uh pulakna nei ua, CWC mun awng sukdimna, PTC Guideline, Paite Customary leh a kizatna te ban ah PTC 64th Rising Day June 27, 2013 a neih ding thu gen khawm na nei uhi.

Manipur Pradesh Trinomool Congress Party President Kim Gangte in tuni sunnung dak 2 in Lamka hong pha in M. Songgel Hausa pa inn ah Press leh media te kimuhpihna leh Henglep bialsunga khohausa hun khopte toh maban a panlak ding dan gen khawmna nei uhi. Hiai hun a Kim Gangte in a thugenna ah District sung a khan touhna development hong pian khiakna ding in grass root level a kipat poimoh pen ahi chi hi. Zan zek a Gaikhanngam Deputy Chief Minister, in phaijang leh hill district tenga khantouhna kibang a om ahih dan a gen pen nak tak a nial ahih dan gen hi. Congress Goverment in singtangmite dopsangna ding a tuni tan bang mah sepsuah nei lou ahih dan uh leng taklang hi.

District Inchangre Minister Phungzathang Tonsing apaisa May 6 leh 10, 2013 a pamphlet kitheh zak thu toh kisai in tuni sunnung dak 2:30 in ama tenna inn mun New Lamka ah District sunga MLA teng, SP leh SDO/CCpur ban ah Civil Society leaders teng toh joint meeting nei uhi. Meeting neih zoh in Minister in press te kimuhna nei a, tua ah hiai bang a gamtang te tung ah dan banga action khauh tak lak hi dinga, tua ban ah hiai bang a gamtang te theikha a, report pe thei a om leh kipahman in dangka lakh 1 piak chiam hi. Tuaban ah, Cyclon in CCpur district hon nawk kha ding hidan in gen a, a diak in Thanlon bial a Zopi, Hanship, Aibulon, Bungpilon, Palkuang, Sumtuh, khazang, Phaitong, Khuanggin leh Sinzawl ban ah Tipaimukh bial a Sipuikawn, Tovakawn, Senvon, Sitam, Pervachom, Lungthulien leh Lensen te pilvang ding leh kigin gige a om ding in Minister in thei sak hi. Research Group te gen dan in Lou a le'ng a kuan louh ding ban ah Cyclon hong tung phut thei a hihziak in kua peuh pilvang ding leh inn sawng te a omlou dinga theihsakna abawl ban ah Institution teng leng zingchiang a pan khak vek ding in school Authority te kiang ah ngetna bawl hi. Hiai toh kisai in DC in leng District sunga Office om teng zingchiang suty puang ua, thilsia tung om leh kin tak a Mobile No. 9612482009 a thuzak ngal ding in thusuah bawl hi. Tua ban ah cyclon ziak a thiltung om phut theih ahih ziak in civil organisation tuam tuam te kigingsa a om ding Minister in ngetna bawl hi.

GAMDANG THU
Kabul ah, NATO makaih International Security Assistance Force (ISAF)-te' convoy, suicide bomber khat in phu a, Afghan minautang guk in sihna tuak uhi. Sihna tuakte lak ah naupang nih tel a, midang 30 liam uhi. Sihchilh bomb puahzak ziak in a kim-le-kiang ah inn 10 naktak in kisia a, NATO in a zat gari pen kisia dimdem hi. Taliban toh kizopna nei insurgent group khat; Hez-e-Islami-te'n phone tungtawn in BBC-te kiang ah amau gamtatna leh sulnung ahihdan zasak ua, a tup uh bel US military adviser-te ahi. May kha sung in Afghanistan ah ISAF 15 in sihna tuakta uhi. Afghanistan a NATO combat missions bel kumnawn in bei ding a, tu apan in sepaihte kizukkhia panpanta uhi.

Iraq khopi-Baghdad, Kirkuk, Mosul leh Tarmiyah ah, atuamchiat a bomb puak ah mi 38 si in midang hunkhop liam uhi. Kirkuk leh Baghdad bomb puak ah a kigawm in mi 38 si ua, mi 120 val liam uhi. Baghdad a Shia-te tamna mun ah a kizom in car bomb puakzak a, atawmpen in mi 14 si ua, 47 liam uhi. Baghdad, Kirkuk leh Tarmiyah ah dakkal khat sung in bomb 11puakzak hi. Nilaini baihtak in Kirkuk ah car bomb hattak nih puakzak a mi sawm si uhi. Kirkuk bel Arab-te, Kurd-te leh Turkomen-te khosak khawmna hi a, Iraq a ding a thautui tamna bial leng ahi. Hiai Iraq mallam ah Kurd-te'n self-rule deih mahle uh Arab leh Turkomen-te'n deihlou uhi.Baghdad khopi mallam aom Tarmiyah ah, motorcycle a tuang sihchilh bomb pua khat in police checkpoint phu a, bomb puakzak in police khat a sih banah, police li liam uhi. Mosul a roadside bomb puakzak ah police khat si a, midang nih liam hi.

Dakkal khat a kilometer-za-a-hat huihpi toh Cyclone Mahasen in Asia gambup a gam zawng leh tuantual diak nih - Bangladesh leh Myanmar a nuai toh kiton in mihing sang tamtak mun bitzaw ah tuahkhiak in om uhi. United Nations thusuak dungzui in, Northern Indian Ocean a hong kipan tropical cyclone, Mahasen in Bangladesh, Myanmar leh Northeast India ah ah mihing million 8.2-te hinna lauhthawnghuai dinmun ah koih hi. Bangladesh in mun niam zaw a khosa mihing nuai sagih-te mun bitzaw ah tuahkhia a, Myanmar in north-west coast a mihing sang za-le-sawmguk-le-guk-te mun bitzaw ah tuahkhiak hi ding hi'n puang hi.

Storm surge pen meter 2.1 tungzou dia tuat ahihdungzui in Bangladesh a Chittagong port leh Cox's Bazar aom local airport-te khak in om a, Bangladesh in storm warning, scale ah 1-10 a zat lel pen leng 7 ah koihtou hi. Cyclone Mahasen ziak in, Sri Lanka ah mi sagih in sih lohta ua, sang tamtakte inn-le-lou bei in koih hi. Bay of Bengal tuipi tung ah Bangladesh lam nawt a hong kivei touh toh kiton in cyclone tuh hatsem ding a gintak ahi. Bangladesh a mihing million 153 val omte lak ah million 30 khawng tuipi toh kinaih, mun niam a khosa hi uhi. Myanmar tualgal ziaka Bangladesh a galtai Ronghiya Muslim-te lak a damlou leh nupi gaailaite camp apan damdawi inn ah tuahlut in om uhi. Chittagong's export processing zone aom factories tengteng khak in om hi. Local official-te'n a gendan un medical teams 113 mansa in om ua, volunteers sing nga-te leng kigingsa in om uhi. Bangladesh Government employee kuamah kiang ah leave piak hilou a, Cyclone Mahasen maituah ding in Myanmar sang in Bangladesh kisakkholhna muanhuai zaw hi. Bangladesh ah Cyclone Mahasen ziak in mikhat in sihna tuakta hi.

Syria a hiamgamna leh thagumsuahna, tunitan a daih tuan ziak UN in mohpaih hi. UN General Assembly in human rights violations ziak a Syria mohpaihna ding in resolution passed-na ding leh, Transitional Government a kinlam a dinkhiak ahihtheihna ding a nawhna bawlna ding in vote la hi. Syria in human rights, a palsiat ziak a mohpaihna ding vote lakna ah gam 107 in gupna in vote khia ua, Russia tel in gam 12-te'n a gumlou lam ah vote pia ua, India tel in gam 59 in vote khia lou uhi. UN resolution in nakpitak in Syria solkal mohpaih hi. Syria government in mi nautangte tung ah chemical weapon a zat pen UN in ngai poimoh mahmah a, vaihawmna khekna ding, political transition a omna ding in naktak in nawhna bawl hi. Syria ah kum nih sung civil war omta a, atawmpen in mihing sing giat sita hi. Himahleh, Syria a opposition group, Syrian Observatory for Human Rights (SOHR) in Sepnawni a a taklatna uah, atawmpen in mihing sang sawmkua-le-li sita ua, Hoihtak a investigation bawl hileh,civil war ziaka misi sing sawm-le-nih tungzou ding chi uhi. Syria gamsung mun tuamtuam ah kikaptuah na leh kibeihna paitou zel lai hi.

Nigeria a states thum- Borno, Yoba leh Adamawa ah state of emergency puan ahihnung in Nigerian sepaih tamtak; hiai states thum-te ah tolhlut hita uhi. Islamic helpawl Boko Haram-te'n Borno a pansan pipen uh ahihman in, offensive pen Borno ah nasa mahmah ding a gintak ahi. Kum 2009 apan in Boko Haram-te'n Nigeria ah Islamic state tuam bawlkhiakna ding in solkal ana kap pan uhi. Hiai Islamic helpawlte'n tunaizek apan in government installations leh security forces-te naktak in bei ua, inn leh loute halsia in, minautang tamtak mangbang leh beidong in koih uhi. Tu'n dawrte leh school-te khak in om a, kongzing ah sepaihte chihlouhminautang muh ding tamlou uhi. Official-te gendan in Islamic fighter-te'n Borno state ah districts 10 thuneih khum ua, Cameroon, Chad leh Niger gamgite kantan in galvan lalut uhi

Centre government in June ni khat apan in India gamsung a districts 20 ah cooking gas (LPG) ah direct transfer of cash subsidy panta ding. Huaibel, subsidy outgo diversions ziak a kumteng a solkal supna crore sing khat tan a hihbei tupna ahi. Oil Minister M Veerappa Moily in Nilaini a a gendan in, districts 20 apan consumers lakh 76-te'n LPG refill-na ding a booking a bawlteng un a bank account uah Rs 435 zel ngah ding uhi. Moily in a genna ah, solkal in hiai scheme pen gamsung pumpi ah zat ding lunggulh a, himahleh timeline ding bel bangmah puanglou hi. Districts 20 a a kizatna apan result dungzui in India gamsung a district dangte ah leng extend touh hizel ding hi. LPG ah direct cash transfer subsidy ngahna ding in UID neih kul ding a, bank account ah tua sumte direct in ki-transfer zel ding hi. Ditricts 20 ah LPG subsidy a kizat chiang in, Aadhar/UID neiloute'n khathum, grace period sung a a neih uh kul ding a, a bank account uah cash subsidy mu ding ua, amau' market price in LPG lei zel ding uhi. Solkal in hiai scheme a zat nung in kumteng in LPG subsidy tungtawn in Rs Crore sang giat apan sing khat kikal save zoh kilam-en hi. KYC-Know-Your-Customer tungtawn in LPG connection muhna ding a duplicate leh a kibawltawm consumers lakh 63-te paihkhiak hita ua, huai kia lel ah leng solkal in subsidy ah Rs crore sang nih humbit ban hi. India gamsung pumpi ah LPG consumers, crore 14 vel om a tuat ahi a, tuate lakah crore 2.5 consumer-te'n address kibang in LPG connection khat sang a tamzaw nei uhi. Tulel in, LPG consumer-te'n subsidised rate in kumkhat in LPG cylinders 14.2kg-a-gik buk kua ngah thei uhi. Tua solkal in LPG a ding a DBT a zat sawmna districts 20 ah consumers lakh 76 om a, LPG dealers 520 om uhi. LPG consumers 89 per cent in Aadhar number nei ua, 52 per cent-te national LPG database ah seeded hi ua, 15 per cent-te' UID number leh a' bank account uh seeded hita hi.

**** Cyclone Mahasen in Ningani nitak in India malsuah bial nawk thei dinmun a om ziak in Mizoram solkal in, tuni'n dakkal 12 holiday puang a, Zirtawpni'n leng Mizoram state sung a skul om teng khak ding in thupukna bawl hi. Hiaibel huihpi leh vuahpi apan kivenbitna tupna ahi. Himahleh government office-te khak ding leh dinglouh thupukna bel bangmah omlou hi. Mizoram state Planning Department nuai a Science and Technology wing a Principal Scientific Officer, Vanlalzara in bel, Cyclone Mahasen in Mizoram mallam pang nawkkhalou thei ahihdan gen hi. Guwahati pansan Regional Meteorological Centre in a taklat dan in, Mizoram state simlam district Lunglei leh adangte naktak a nawkkha thei dinmun ahi chi'n taklang hi. Cyclone pen ahong kipatna asang in hatlou hiaihiai himahleh, Ningani nitak a Mizoram leh Northeast India ahong tun chiang in bel, huchilua in hat nawnlou ding chih ahi a, vuah bel tam mahmah ding hi'n kigen. Huchilai in, nipikallui a Aizawl menchim ah, Nilaini tan in siluang teng pholhsuah hita, mi 17 si uhi.

****Cyclone Mahasen in tunitak a Northeast state-te hon nuai thei dinmun aom ziak in Assam gamsung pumpi ah alert kibawl hi. Brahmaputra luipi tung a boat leh ferry service tengteng tuni apan ni thum sung khawlsak hiding a, ngasa man mite'n a nna uh khawlsan phot ding a theihsak ahi uh. Assam gamsung a district headquarters teng ah control room bawlkhiak in om a, himahleh, mipite bel mun bitzaw ah tuahkhiak chih omtuanlou hi. South Assam or Barak Valley in Cyclone Mahasen thuakkha ding a gintak ahi a, mundang ah bel uang lawlou ding a gintak himahleh, vuah bel tamtak a zuk gintak ahi. Vuah toh kithuah huihpi bel dakkal khat a kilometer 55 apan 65 kikal a hat in nung ding a, dakkal 48 sung in huai in Mizoram, Manipur, Nagaland, Tripura leh Assam simlam nuaikha ding a gintak ahi.

****IPL Series 6-na pailel ah spot-fixing ziak in Kerela apan Indian pacer Sreesanth leh Rajasthan Royal player nih Delhi police-te'n man uhi. Sreesanth, Ajit Chandila leh Ankeet Chavan-te Mumbai ah mat in om ua, court a dinsak ding in Delhi puaktung hiding uhi. Kum 29-a-upa Chandila ahihleh Haryana leh Delhi Daredevils a di'n kimawl a, Chavan bel Mumbai Indians a ding in kimawl hi. Sreesanth in ahihleh India min in ODIs 53 leh test matches 27 ah kimawlta hi. Police-te'n bookies sagih leng man uhi. Rajasthan Royal bel Bollywood star Shilpa Shetty in midang khat toh kikop a a etkol uh ahi. Spot-fixing bel match result apan betting hilou in, balls leh overs banah mimal kimawlmite perfomance a betting ahi. Kimawlmite'n no-balls ding in tupmawng in bowled thei uhi. Spot-fixing in kimawlna result/outcome pen a affect kei maithei himahleh scorecard naktak in impact ban hi. Bookies-te a ding in sum muhna hoihtak ahi. Spot-fixing tuh Pakistan, Bangladesh leh West Indies ah kithang mahmah a, India ading in bel a khat-veina hilai hi. India ah, Sports khatpeuh a betting bawl tuh dan kalhna ahi a, IPL betting ngial ah sum tam mahmah a, Mumbai leh gamsung muntuamtuam apan underworld a run uh ahi. Kumteng a IPL ah, betting ziak in bookies-te'n crore sang nga val luak ban ding un kigen hi.

****1993 a Bombay serial bomb blasts a kigolh kha chih ziak a moh khuksak aom actor Sanjay Dutt, tuni'n Special TADA court ah ki-surrendered a, jail taang ding abat omlai kha 42 sung suangkulh ah om ding in Yerwada Jail ah lut hi. Hiai case ziak in Sanjay Dutt tuh jail ah kha 18 ana taang khinta hi. Sanjay Dutt ki-surrender-na ding hun behlap ding a film producer-te'n a ngetna uh Supreme Court in Sepnawnni in nawlkhin sak hi. May 10 in, Sanjay Dutt in kum nga jail taang ding a mohpaih a aomna judgement pen review bawl in ding ngetna nei mahleh huai leng Supreme Court in a nawlkhin sak sa ahi.

****Khovel a club lohching leh minthang mahmahte laka khat; Diego Maradona, Gabriel Batistuta leh Carlos Tevez-te club lui Boca Juniors in, Bangalore ah football school hongkhia. Boca Juniors Chairman Daniel Angelica ahihleh, India ah Argentinian style football a hon puaklut theihman in kipak mahmah a, kilawp mahmah theuhtheuh hi. "India ah Boca Juniors Footbal School k'ong hong theih man un ka kipak mahmah. Kum teng in India ah football ngaihnatna lian deuhdeuh a, hiai sport pen India ah develop-na ding a panna ka neihkhak man un ka kipak mahmah," chi hi.