UPDATES:

Nisin Thuhiltu - 19 April 2017

Nisin Thuhiltu - 19 April 2017 Wednesday | via Zogam.com

*NH -2 (Imphal-Dimapur) ah thautui paw-gari ambush kibawl; Ambush bawltu te ni 15 sung ah matdaw hiding: CM Biren*

Imphal, April 18 (Nisin Thuhiltu): National Highway (NH) -2 (Imphal-Dimapur) lampi ah Thautui pua gari (oil tanker), security escort tawh Imphal zuan, gari 600 tuam ki zui te Kangpokpi district headquarter section ah tuni, 18 April 2017 zingkal dak 5:45 in thingnuaimi pawl khat in meithal mang in a kap ua, ziana a chun petrol leh diesel pua, oil tanker 2 mei chang leng in a sep kha himaleh a puakzak bangma a um puai. Zia gari kap/ambush ah um te chu CRPF personnel te'n venbitna a piak (escort) uh a hia, ambush ah a um uh tawh kitawn ah escort team in le ambush bawltu te a kapthuk kit banua, police reinforcement team in ambush na mun del ah ambush bawltu te hawlna nei maleu ambush bawltu te zam mang man un police thusuak in a gen hi. Chun, meichang in a se-khak petrol leh diesel tanker 2 te chu leak maleh Imphal tiang a tai tung thei ui. Hiatthei khat chu Manipur Chief Minister Nongthombam Biren Singh in Highway Protection Force ah IRB battalion 4 mat ding ah Centre Government in lemsakpina nei a hidan a taklat nung ah National Highway (NH) -2 ah Highway Protection Force ah IRB leh MR te kawi a hi. A langkhatlam ah zia thiltung tawh kisai a chun, tuni'n All Manipur Petroleum Products Transporters Association leh All Manipur Petroleum Products Drivers Association in hun tiam umlo ah cease work strike pat hiding in a puang ua, Chief Minister Office ah Chief Minister Nongthombam Biren Singh kimupi in ambush bawltu te matdaw ding leh gawtna piak ding phutna a nei ui. Chief Minister in Association 2 ah palai te'n a haksatnau a tut uh a ngaithak nung in, security cover leh patrolling sukhat thak hiding in thutiam a bawl a, ambush bawltu te matdawna ding ah combing operation khautak chiapi hiding leh ni 15 sung ah ambush bawl tute matdaw hiding in thutiam a bawl hi. Chuleh, state government in driver leh transporter te line of duty hun ah liamna tuak ahiloleh thina tuak a um ua leh compensation kituptak peding hi'n thutiam a bawl bawk hi. Chief Minister leh All Manipur Petroleum Products Transporters Association leh All Manipur Petroleum Products Drivers Association palai te meeting chu CAF & PD Minister Karam Shyam, Parliamentary Secretary (Home) L. Sushindro Meitei, Parliamentary Secretary( RD& PR) Heikham Dingo Singh, Addl. Chief Secretary (Home) Suresh Babu, DGP L.M. Khaute leh top civil leh police official hun khawp te'n le a uap ui.

nisinthuhiltu19april2017

*UKB U-17 trail-cum-selection kipan*
Leisang, April 18 (Nisin Thuhiltu): Churachanpdur district sung a Football Club minthang mama te lak ah khat, United Khozim Brothers' (UKB) in a Club sung ah kum 17 nuailam player ding lakna tuni zingkal dak 9 a pat in Leisang Playground ah trial cum selection a nei hi. Zia hun a hin district sung ah football kihel lunglut, kum 17 nuai lam mi 166 pang in zia lak a chun first round selection a ding in mi 31 teldaw in a um ui. UKB Under 17 player lakna final round a hileh zing, April 19 sunma dak 10 a pat Leisang Playground ma ah um kit ding a hi.

*License renew bawl hun kisusau*
Lamka, April 18 (Nisin Thuhiltu): Mr. Soiminlian Lengen, Chief Executive Officer, Autonomous District Council, Churachandpur District in thusua a bawlna a chun, Churachandpur Town huap sung ah business establishments/ dukan/ dawr neitu te ding ah trade license renew bawl hun chu 31st May 2017 tiang ah suksau ah um in a taklang a, hun kipia sung ah trade license renew bawl ding te'n kituptak ah license renew a bawl ding uh pawimaw a hidan taklangkawm in hun kipia sung ah trade license renew bawllo te late fee Rs 50/- per month ah lak hiding in a gen hi.

*Minister in Seminar hawng di*
Lamka, April 18 (Nisin Thuhiltu): Rayburn College, New Lamka, Churachandpur ah North Eastern Council (NEC) sponsored bawlna nuai ah 2-Day National Seminar on "Protection of Forest for sustainable development in Manipur" kiti tuni 19th April 2017 ah kipan ding a hi. Agriculture and Veterinary & Animal Husbandry Minister V Hangkhanlian in Chief Guest hina tawh inaugural function uap ding leh seminar hawng diang a hia, Adya Prasad Pandey, Vice-Chancellor, Manipur University in Guest of Honour hina tawh uap ding a hi.

*AR in TMI ah van piakdawna nei*
Lamka, April 18 (Nisin Thuhiltu): 25 Assam Rifles in The Malsawm Initiative (TMI) a kai Student leh Staff te mat ding vanmat chuam chuam piakdawna chu tuni'n Malsawm Ability Resource Centre (MARC), Pearsonmun ah a nei hi. Assam Rifles in AR CAP nuai ah 2016-2017 a ding ah thiamzilna tawh kisai a mat ding van chuam chuam a piak uh a hia, zia hun chu TMI Student leh Staff te ban ah Assam Rifles lam a pat Major Radha Krishan malatna in personnel hunkhawp in le a uap ui. Assam Rifles in a hileh thiamzilna ban ah khawtang khantona ding tawh kisai in panlakna chuam chuam neizel in electric tunglona thingtang a le Portable Solar Light leh tuidawn ding khawlna ban ah khawmi te mat ding vanmat chuam chuam le a la pe sek ui.

*KIC Cabinet ah laklut thak te'n kitiamna nei*
Lamka, April 18 (Nisin Thuhiltu): A chiata April 11, 2017 ni ah Kuki Innpi Churachandpur (KIC) in kum 3 sung vaipaw ding kitelna a nei zaw in tuni'n KIC Administrative Office, Tuibong ah Cabinet Expansion bawl in laklut thak a umte'n kitiamna a nei ban un President thak khut ah mawpuakna piakdawna le a um hi. Khamliankhup Zou, General Secretary, Kuki Inpi Manipur in laklut thak a umte kitiamsakna nei in, Rev. Dr. Nguljathang Khongsai in pauchapna a nei piak hi. KIC Outgoing President, Thangjang Haokip in thugenna a nei zaw in teltin thak a um Daniel Gangte khut ah mawpuakna piakdawna nei in KIC Administrative Office chabi le a pedawk ngal hi. Thangjang in thugenna a nei hun a chun, kum 3 term a puak sung ah sawlkal tawh pan lakkhawm thei ziak ah ma vang mama a hi dan a genlang a, nampi a ding ah nasep chu law neilo a hina ah lungkia lo hial ah sem ding ah tilkhona le a bawl a, a term sung ah napha a sep khenkhat um maleh a bawl khial a la um khak leh zia chu mipi'n ngaidam ding in le a dawn hi. KIC in vaipaw thak ding kitelna a nei hun ua chun, President ding in Daniel Gangte teltin a la hia, Vice President ding in Home ah Thangboi Baite leh Administration ah Letpu Haokip te chu teltin ala hiu a, General Secretary ding Lalkhohao Chongloi leh Information Secretary ding in Jampao Haokip teltin a la hiu hi. Cabinet kekletna ah laklut thak a um te chu - Henkhopao Haokip, Vice-President, (Relief & Dev.), Thangjahel Singson Vice-President (Art & Culture), Lalvullien Hmar, Vice-President (Youth Affairs & Sports), Ashong Kom Vice- President (External Affairs), Ngamkhai Haokip, Secretary Finance Thanglen Touthang, Secy. (Home & Judiciary), Thangneo Lhungdim, Asstt. Secy. (Home & Judiciary), Thangbem Lhungdim, Secy. (Relief & Development), Sothang Mate, Asstt. Secy. (Relief & Development), S. Paominthang Vaiphei, Secy. Organisation, Thangkholam Hanghal, Asstt. Secy. Organisation, D.J. Haokip, Asstt. Secy. lnfn. & Publicity Letkam Haokip, Secy. Asst. Finance, Ch. Lhunchon, Secy. (Youth Affairs & Sports), Lamkhopao Kipgen, Secretary (Art & Culture), Mangtinlal Haokip, Asstt. Secretary (Art & Culture), Thangboi Simte, Asstt. Secretary, Henkholun Khongsai, Secretary (Legal Affairs) leh Letjamang Haokip, Speaker ban ah Home & Judiciary Board ding in Thangboi Baite, Chairman, Thanglen Touthang, Secretary, Letkam Haokip, Member, Mangtinlal Haokip, Member, Lamkhopao Kipgen, Member, Thangneo Lhungdim, Member leh Jampao Haokip, Member te a hiu.

*CCPur police in zuzuakna mun bulu*
Lamka, April 18 (Nisin Thuhiltu): Churachandpur Police nuai ah Drug Cell in tuni'n Torbung ah zu huanna ding a ki bil, anchang leh zu huanna ding a kimang vanmat hunkhawp ban ah local zu tamtak a man dawk ui. Rakesh Balwal, IPS, Superintendent of Police, Churachandpur thupiak dungzui in Drug Cell in Torbung gamsung a um Waikhurok a pat zu huanna diing ah kimat gua anchang tin 65 leh local zu liter 125 ban ah chawl (yeast cake) Kg 6 man in Police Station puaktun a hia, zia a pat chu Excise Department khut ah piakdaw a hi. Churachandpur SP in District sung ah zu leh khamthei chi chuam chuam a pat a thiangthona ding dawina ziak in Drive Against Drug, Alcohol, Waste ti a la bawldawk a, zia tawh kitawn a chun police in mun chuam chuam ah drive a la bawl zing hi.

*DAPCU in media mai ah report pia*
Lamka, April 18 (Nisin Thuhiltu): Churachandpur District sung a HIV/AIDS dinmun tawh kisai ah tuni'n thusua mite'n DAPCU Office ah kum chiasa a pat tuni chan ah HIV/AIDS dinmun kanchetna a nei ui. Zia hun a hin T Benjamin, District Supervisor DAPCU in April 2016-March 2017 annual report a pia, zia dungzui a chun 2016-2017 sung ah mi vântang 6957 ki testna lak ah HIV Positive 157 mudaw a um in amau lak ah mi 147 te chu ART ah ki-register ua, mi 60 in ART damdawi pan in midang 10 te a hiuleh a sulnung uh hiat phak a hi taklo ziak ah Department in ngaihkhawk mama a hidan a gen hi. Zia hun sung ma a hin nauvawp ANC mi 6126 test kibawl lak ah nu 70chu HIV positive a hiu a, amau lak ah 69 te'n nau a vawp sung ua damdawi hawi tak ah a nek ziak ua nau a a nei uh chu damthiang maleh numei khat in damdawi a nek hawilo ziak ah a nau chu damdawk zolo hi'n le a gen hi. Injecting Drug User (IDU) mi 1714 test bawlna lak ah HIV positive mi 5 mudaw a um in mi 3 chu ART Centre ah ki-register ua, damdoi nek le pan ngal uh hi'n le a gen hi. Chun, zia hun sung ma a hin Female Sex Worker (FSW) mi 1754 test bawlna lak ah numei 3 HIV positive a um ua, amau chuleh ART centre ah ki-register in numei 2 in damdawi nek a pan ngal ui ti'n le thusua mite kiang in a puang lang hi. Department in Churachandpur District sung a HIV/AIDS dinmun tawh kisai a mu dan a genna a chun, I district ah khamthei kikap leh numei kizuak lak ah HIV Positive kiam hiaihiai ah kilang maleh, minautang lak ah HIV kikâi sawn in pung lam a nawt ziak ah district a ding ah thil lau um tak hi'n District Supervisor chun a gen a, khangthak, nungak, tangval, nupi lâ, papi lâ lak ah HIV tawh kisai awareness bawl tam pawimaw a sak thu le a puang hi.

16th– 20th May sung ah Shirui Lily Festival 2017 mat hidi

Imphal, April 18 (Nisin Thuhiltu): Government of Manipur saina a hung tung ding 16th – 20th May 2017 sung ah Shirui Village, Shirui Lily (Lilium mackliniae) leh Ukhrul ah ni 5 sung Shirui Lily Festival 2017 um ding a hi. Zia ding tawh kisai a chun, Organizing Committee of Shirui Lily Festival 2017 in tuni'n Cabinet Hall, Chief Minister's Secretariat ah Chief Minister Nongthombam Biren mapuina'n meeting a nei ui. Meeting hun ah Chief Minister in khawvel (world) mun dang ah kimulo Manipur ah thil pathum - Sangai, Shirui leh Manipuri Polo um a hidan taklatna a nei a, state Government in Sangai leh Manipuri Polo min (name) mang ah festivals organized bawl zingta himaleh Shirui festival chu a bul patna hiding in a gen hi. Chun, Organizing Committee in Opening Ceremony chu IFAD Ground, Shirui Village ah nei ding in meeting hun in lemsakna a nei a, Tangkhul Naga Long ground, Ukhrul ah Closing Ceremony mat ding in lemsakna a nei bak in Sub-Committee, Programme Sub-Committee, Cultural Sub-Committee, Exhibition Sub-Committee, Media Sub-Committee leh Transport Sub-Committee ding le siam ding in lemsakna a nei hi. Shirui Lily chu Britisher Frank Kingdon Ward in kum 1948 ah a la mudaw, Shirui tang bep ah kek, May leh June ah pak sek a hi. State in State Flower ah kum 1989 ah a puan a hi.

nisinthuhiltu19april2017b

Solar a pat 105 M/W electricity generate bawl ding ah GoM kisingsakna nei
Imphal, April 18 (Nisin Thuhiltu): Manipur government in solar energy a pat electricity 105 M/W generate bawltheina ding in kisingsakna a nei a, zia chu Government of India in solar energy a pat power 1 lakh M/W generate bawl ding ah target ah a nei sukpitinna ding chi khat hi'n O. Nabakishore, Chief Secretary of Manipur in tuni'n thuthak lakhawm mite kiang in a gen a, National Hydroelectricity Power Co-operation (NHPC) in state sung ah 50 M/W solar power plant siamdaw ding ah lemsakna a nei bak ah Yaithibi Loukon, Thoubal District ah tuma National Sport University (NSU) umna ding ah a kigenna mun chu solar power plant kawina mun ding ah entha khata a hidan uh a kalang hi. A langkhat lam ah NHPC in zia mun chu mun niam (low lying area) ah um a hi ziak ah solar power plant kawina ding ah lemsalo un a gen hi. Chun, state government leh NHPC in Manipur ah 50 M/W solar power plant siamdawna ding ah kinawptuana a nei takna chung ah tha 6 sung ah mun lemchang pen pen ah solar power plant siamzaw hiding in a gen hi.

Cooperative kiti Socio-Economic dinmun siamhawina ding a hi: Nemcha Kipgen

Imphal, April 18 (Nisin Thuhiltu): National Cooperative Union of India (NCUI), New Delhi sponsored bawlna, GM Hall, Imphal ah tuni'n One day State Level Seminar on "Sustainable Development of Manipur State through Cooperatives" kiti a um a, Minister, Social Welfare & Coop. Nemcha Kipgen in Chief Guest hina tawh inaugural function uap in a hawng hi. Minister Nemcha Kipgen in a thugenna a chun, Manipur ah Development & socio-economic condition siam hawi thak ding pawimaw in a gen a, Development & socio-economic condition siamhawina ding ah panlak khawm chiat ding pawimaw in a gen hi. Puan khawng entrepreneur tamtak in technology lam masawnna um te ziak ah competition ah lam ah gual phak haksa sa a hidan uh le a gen a, ngaina gual ah puan khawng te'n technology mang ah puan khawng te phazo lo a hina chung ua panlakpi thei a hina ding uh leh a masawn theina ding ua CM N. Biren Singh in Cooperative chu government department khat ah kawi a hidan genkawm in local khutsuak te ngaikhawk thak ding a nawp thu a gen hi. Zia inaugural function chu Minister Nemcha Kipgen banah Registrar, Coop. Societies L. Nabakishwar Singh, IAS, President, MSCU & Chairman, ICM, Imphal L.Tompishak Singh leh Director, ICM, Imphal Dr. N. Ranjana Devi te'n Guest of Honour, Functional President hina tawh a uap ui.

nisinthuhiltu19april2017c

Familiarisation Exercise nei ding
Imphal, April 18 (Nisin Thuhiltu): National Disaster Response Force (NDRF), 12 Battalion, Doimukh (A.P) a pat personnel 25 te tuni'n Familiarisation Exercise nei ding in Imphal a tung ui. Amau chun Imphal West District, Deputy Commissioner Office, Imphal West, Lamphelpat ah 29 April 2017 leh Familiarisation Exercise bawl ding a hiu a, DLO zosia'n uap chiat ding in Deputy Commissioner, C. Arthur Worchuiyo, IAS, in chialna leh hiatsakna a bawl hi.

Assam Rifles Ex-Servicemen rally um di
Imphal, April 18 (Nisin Thuhiltu): Mantripukhri, Imphal ah 22 April 2017 leh "We Connect We Care' ti thupi mang ah HQ IGAR (South) nuai ah Assam Rifles Ex-Servicemen rally um ding a hi. Zia rally chu Assam Rifles Veteran gamsung a ding ah theitawpsua pan a la latu te hiatzingna ding ah organize kibawl a hi. Zia hun a chu Maj Gen Virendra Singh, VSM, IGAR (South) in Chief Guest hina tawh uap ding a hia, Veer Naris, Widows leh Veteran te pension, financial issue, post retirement facilities leh benefit tawh kisai ziltilna nei hiding leh kithuapina piak hiding ti a hi.

Imphal East BJP President mulliam
Imphal, April 18 (Nisin Thuhiltu): Imphal East District, Bhartiya Janata Party (BJP) President Md Abdullah chu damlona ziak in tuni'n Rahman Hospital Guwahati in a mualliam hi. Kum 68 ah upa Md Abdullah chu chapa 4 leh chanu 3 nusia a hi. Chun, a luang chu a chenna, Keirao Mangjil Sabal Leikai, Imphal tut in a um a, BJP Imphal-East District office, Lairelpat, Thongju ah BJP Core Committee leh member te'n suunna a nei ua, Manipur Chief Minister Nongthombam Biren Singh in Md Abdullah mualliam chu party leh mipi te ding ah manna liantak hin a gen hi.