Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

JE leh Dengue tawh kisai ah interaction nei

Lamka, July 19 (Nisin Thuhiltu): Dr. Karan Lokendro Singh, Director, Health Services, Manipur malat Medical Team leh Press/Media te’n tuni’n BRGF Resource Centre, DC Office, Tuibong ah Churachandpur District a Japanese Encephalitis (JE) leh Dengue natna hilêng tawh kisai genkhawmna a nei ua, zia hun a chun mimal chuam chuam a pat thudawtna um te chu Medical Team in dawn huna a pia’i. Dr. Sashikumar Mangang, Additional Director, Health Services, Government of Manipur in Dengue leh JE natna kilatdan tangpi leh a kipatna te genlatna a nei a, Dr. Jamthianlal, District Malaria Officer, Churachandpur in natna hilêng tawh kisai District Malaria Department panlakna te genna nei in Dr. Kimngaihching Simte, Chief Medical Officer, Churachandpur in zathuap in damdawi kimang leh Medical Team bawldaw a um tawh kisai genna a nei hi. JE leh Dengue dodalna ah ASHA te mawhpuak tawh kisai ah Dr. Somorjit Ningombam, State Nodal Officer, ASHA, NPCDCS, NTCP in ASHA te’n a umna khua ua damlo a um leh report a piak ding uh hi’n a gen hi. Dr. Lokeshwar Singh, Associate Professor, Department of Medicine, JNIMS in JE leh Dengue natna tawh kisai ah natna kilatdan, damdawi mat ding te banah natna vei te lak ah inn a etkawl thei ding leh etkawl theilo ding te hilchianna a bawl a, tu tiang ah Thoubal leh Churachandpur a pat JE ziak ah mi 1 gel in thina tuak ta maleu a vei khate lak ah a tamzaw chu serious lo uh hi’n a gen hi. Dr. K. Benedict Maring, State Nodal Officer, AYUSH in Ayush damdawi te a hilo tawp a le bep Paracetamol bep mang ah JE leh Dengue vei te etkawl ding in a thuhil hi. Shyamlal Poonia, IAS, DC Churachandpur in Director malatna nuai ah Health Department in zia gual ah a hun tak ah pan a lak kipakpi a hi dan a gen a, natnate dodalna ding ah District Administration in le theitawp sua ding hi’n a gen hi. Dr. Shyamsunder, Additional Director, Health Services, Manipur in Medical Staff te’n haksatak leh fund umlo kawm ah zia natna te dodalna nasep a pat a hina ah District administration a pat fund a um thei dan dan ah pia ding in a dawn hi. Dr. Lokendro in kumdang banglo tak ah zia natna hilêng ziak ah mipi te lauthawnglo ah a um theina chung ua kipakthu a puang a, hun matna uap zosia te kiang in le kipakthu a gen hi. Zia hun matna a chun District sung ah Media House zosia a pat reporter/palai khat chiat a chiakhawm u’i.

Auto chung chang ah thusua bawl
Lamka, July 19 (Nisin Thuhiltu): Shyam Lal Poonia, District Magistrate, Churachandpur in District mipite bitna ding khualna’ khawpi sung a Auto Rickshaw a chuang leh kumthâkna tawh kisai thusua a bawlna a chun, District Police a pat thutut dungzui ah District sung a Auto Rickshaw chang lam kawt ah kal leh kum tamtak um in zia chu tamtak a ding ah buaina a tut banah tamtak te hinna a ding ah le lauthawng um a hi ti hiat a hi ziak in changlam pang ah kal leh kum khap a hi ban in auto changlam pang ah signboard tâk ding in le thu a pia’i.

Milk Parlor hawnna leh latna nei

Lamka, July 19 (Nisin Thuhiltu): Centre Road, Hiangtam Lamka ah tuni zingkal in Milk Parlor hawnna leh latna nei a hia, zia hun a chun, Khaipao Haokip, Chairman, ADC Churachandpur in Lamka ah a la um kha nailo, bawngnawi dawite’n bangtik hun a le a chawk thei na ding uh, Milk Parlor chu Lawmthang panlakna zal ah hawnthei a hi kipakpi thu puang kawm in Parlor chu mipi’n a phatchuampi ding uh dawina tawh a hawng a, Pastor D. Kamchinmang, Local Pastor, EBCC Hiangtam Lamka in Pathian kiang ah latdawna a nei hi. Lalhrillien, EM, ADC Churachandpur a thugenna a chun, bawngnawi nektam chu taksa a ding ah hawi mama in bawngnawi netam gamte a taksa uh hawi in lian uh ti’n a gen a, tuhun in eilak ah bawngnawi kiningting mu theina ding ah zia gual panlakna chu kipakpi mama a hi dan a puangdawk hi. Milk Parlor a hileh Manipur Milk Producers Cooperative Union Limited nuai ah um in bawngnoi a pat kibawl - Dahi (lassi), Paneer leh a dang dang le zia tak a chun muthei ding hi’n a kigen a, Parlor neitu Lallawmthanga in a hileh a chenna, Nghathal ah Punjab a pat kilalut bawngpi 6 nei in nisin leh zingkal nitak ah bawngnawi liter 70/80 tuam a piadawk zo hi.

Henglep AC ah Rationing Agent te’n anchang lâ
Lamka, July 19 (Nisin Thuhiltu): National Food Security Act (NFSA) nuai ah May kha quota ding anchang tung te chu tuni’n Henglep Assembly Constituency a Rationing Agent te’n FCI Godown, Headquarter Veng a pat a kilâk ui. Anchang a hileh Henglep Assembly Constituency a ding ah Quintal 2,529 a hia, Henglep AC Rationing Agent te’n zing leh lazawm in July 21- 22 leh Saikot Assembly Constituency a Rationing Agent te’n la ding a hiu a, Saikot AC a ding in anchang quintal 3,727 issue a hi. Chun, anchang piakdawna hun chu SDO Henglep leh SDO Saikot te’n a ensui ui.

E-mail hawn dan training
Lamka, July 19 (Nisin Thuhiltu): Shyamlal Poonia, DC Churachandpur malatna ah tuni sunnung in BRGF Resource Centre, DC Office ah E-mail Account hawndan ding dan tawh kisai ah training nei a hia, zia hun a chun Government Mail Server - mail.gov.in mang ah e-mail account hawn ding dan ziltilna a um a, training a chun Deputy Commissioner leh Autonomous District Council nuai ah District Level Officer (DLO) hunkhawp a pang u’i.

Free Medical Camp
Lamka, July 19 (Nisin Thuhiltu): District Health Society (DHS) Ccpur saina nuai ah tuni’n Henglep Block sung a um M Silen leh M Bongmol khua te ah Free Mobile Medical Unit (MMU) Camp a um a, zia hun a chun BPM Henglep kithuapina tawh Dr Jotin, MO PHC Sagang malat medical team khat in damlo te etna a nei hi. Medical team a chun - Dr Lhingdei Thangngeo, MO DMMU, Chungzaniang, GNM, Chingngaihhau, Laboratory Technician, banah X-Ray Technician te a pang ua, CARITAS/DSS Imphal leh DVBDCP, NHM CCpur leh KSO Leimatak kithua in M Silen leh M Bongmol khua ah Camp nei a hi. Zia medical camp a chun khawmi 100 val a ki etsak ui.

GST tawh kisai Awareness nei di
Lamka, July 19 (Nisin Thuhiltu): Lamka Traders & Self Employed Association (LATSEA) saina’n a hung tung ding July 23, 2017 sunnung dak 1:30 leh St. Paul’s Institute, New Lamka ah Goods & Services Tax (GST) Bill tawh kisai ki ziltilna leh Campaign nei kawp hiding a hia, zia hun chuleh Commissioner, Central GST Imphal Commissionerate, Imphal in ziltina pe ding leh GST tawh kisai buaina neite leh hiatbe nuam neite’n a mun ah Free Registration bawl in pang thei ding a hiu. LATSEA saina nuai ma in a chiata July 16 a khan le zia gual programme chu nei a la in tamtak in phatchuam pi uh a hidan a kigen hi.

One day referee clinic
Lamka, July 19 (Nisin Thuhiltu): Churachandpur District Sports Association (CDSA) in a hung tung ding July 24 leh Peace Ground, Tuibong ah One day referee clinic sai ding a hia, zia ding tawh kisai ah lunglutna nei ten a bio-data kimtak tawh passport 2 chawi ah July 22 chan in CDSA Office, Hiangtam Lamka ah office kai hun sung, zingkal lam dak 7 a pat sunma dak 10 chan ah piaklut theih ding a hia, zia hun a chun CDSA nuai ah Super division club zosia’n mi khat chiat a sawl ding un le hiatsakna a um hi.

Mizoram ah panpina pe te vaidawn
Lamka, July 19 (Nisin Thuhiltu): Young Paite Association (YPA), General Headquarter puitute’n Mizoram ah tuilian leh nimchim thuakte panpina pia zo ah Lamka a tung kit uh tawh kitawn in tuni’n YPA HQ Hall, Hiangtam Lamka ah vaidawnna leh report piakna a um a, zia hun chu YPA Block chuamchuam ah puitu te’n a uap u’i. Mizoram pha YPA puitu te - Chingngaihpau, Lianmuanthang Valte leh Khanpau te’n report piakna a um ban in puitu chuam chuam te’n Mizoram ah a thil tuak teu genna a nei u’i. YPA lawi upate’n report a piak dungzui un Manipur ah Tuilumjang leh V Munlai leh Mizoram sung Keifang khua ah gari in buaina tuak in hun chawmkhat kichawl uh hi’n a gen ua, Mizoram ah te kipiakzaw dan ettawn tâk a sak thu uh le puang kawm in panpina dawlkhawmna ah pan nasatak ah la, Block leh Unit te chung in le kipak thu a puang u’i.

Project Manager, NERCORMP in Shillong zuan
Lamka, July 19 (Nisin Thuhiltu): NERCORMP, Multi State Central Sector Project, Govt of India, Ministry of DoNER, NEC Flagship project Shillong Regional office in, kum 2017-18 kum sung ah 1st Qtr Quarterly Review Meeting ah pang ding in D. Khuala Vaiphei, Project Manager, NERCORMP Churachandpur in tuni’n Shillong a zuan hi. Zia meeting a chu NERCORMP nuai ah SHGs 917 um te bank linkage chungchang leh achievement dinmun te genkhawmna um ding hin a kigen hi. Chuleh, Chuarchandpur ah NERCORMP Office mun ding gam, nei pai ta ding dinmun ah a um uh tawh kitawn ah NEC officials te kiang ah office sak ding thu proposal le Project Manager, NERCORMP Churachandpur in buaipi ngal ding a hi thu hiat a hi.

Minister Nemcha in lei-khitkekna mun entha

Kangpokpi, July 19 (Nisin Thuhiltu): Social Welfare & Cooperation Minister leh Local MLA Nemcha Kipgen in tuni’n Kangpokpi District ah lei-khikek in a suksiat, Haijang Village ah chenna inn te leh UJB School te etthakna a nei hi.Minister Nemcha in thil umdan etthakna nei hun in mipi te bittak ah a um ding uh a thil ngaikhawk pen hin a gen a, expert te thil umdan khualna neisak hiding leh a vaima theipen ah thil umdan hiat chian hiding in a gen hi. Social Welfare and Cooperation Minister Twilang Road (IT Road) ah lei-khitkekna mun te le etthakna a nei hi. Ministerial team a chun, Principal Secretary (Cooperation) & Kangpokpi District In-charge, P. Vaiphei, DC, Kangpokpi T. Ranjit Singh leh SP, Kangpokpi, M. Pradip Singh te a pang ui.
NT 20july2017b

ADC Chairman 6 in CM kimupi

Imphal, July 19 (Nisin Thuhiltu): Manipur ah Autonomous District Councils(ADC) 6 ah Chairman te’n Tribal Affairs & Hills Minister, N. Kayisii panna’n Chief Minister N. Biren Singh , a chenna Bungalow in a kimupiu a, zia hun a chun Teachers leh Staffs recruit bawl ding leh Autonomous District Councils(ADC) te kituptak ah afunction theina ding ah fund pawimawna chung chang a genkhawmpi ui.

NT 20july2017c

Bongbal JP School chungkhu sia siamphat hinailo
Lamka, July 19 (Nisin Thuhiltu): A chiata 7th February 2017 zan ah hui hattak in Bongbal JP School a mutsiatna tawh kisai Letkholal@ David in a genna a chun, hui in school chungkhu langva a mut thak himaleh tuni tiang ah kisaipi thuneitu te’n etzuina neilo uh hin a gen hi. Zia school chu elementary school umsun a hibak ah class V tiang student 57 te ding ah thiamzilna mun hin le a gen a, school chung khu a hawilona chung ah Village community hall chu class room ah mang un a gen hi. Chuleh, tha 5 lam chiata himaleh government thuneitu, NGO leh student organization te kiang ah thil umdan a tut uh limsak ah um nai diaklo a hidan genkawm in school naupang te ding ah school chungkhu kituplo tak ah um chu a lemchanlona tamtak um in a gen hi. Bongbal village ahileh Singngat Assembly Constituency, Churachandpur District HQ a pat 40km ah gamla um a hi.

Manipur U-19 Girls team in “Oorja” National Tournament title la

Imphal, July 19 (Nisin Thuhiltu): Manipur U-19 Girls team in New Delhi ah ‘Oorja’ CAPF/ Assam Rifles U-19 Talent Hunt Football Tournament 2017 final ah Haryana teamer 5-1 ah zo in winner hina a chang hi. Zia kihelna a chun, M Ratanbala, A Roja & Ranjta Hudrom te’n goal khat chiat a khum ua, Ranjana in goal 2 a khum hi.
Manipur team chu 2 Assam Rifles of Headquarters 9 Sector Assam Rifles training a piak a hia, tha masa Shillong ah winner hina a chan nung ua North East Zone a pat national phase ah pangkit leh gualzawna chang kit a hiu. Final match ah gualzawna a chan uh tawh kitawn in Mr Kiran Rijiju Minister of state for Home Affairs in prize piakdawna a nei hi.

Rs. 2 Crore vâl man ding san mandawk
Imphal, July 19 (Nisin Thuhiltu): Indo-Myanmar gamgi kiang nai a um, Khudengthabi ah posting Assam Rifles troop te’n a guk ah gamgi kantan ah kipawlut, 9.63 kg a gik sana mandawk in zia chu Rs. 2 crore vâl man ding hi’n a kigen hi. Customs Superintendent W. Luwang in thuthak lakhawm te kiang ah a puandawna a chun, AR personnel te’n zani international smuggling gang ah member 1 hi ding ah muanmaw, Samir Khan (43) s/o Late Md. Khalid of Muslim Nagar Mathak Leikai, Moreh chu a gari tawl, maruti van (MN 01W-4277) leh sana a puak te tawh Khudengthabi Check Post ah a la man uh hi’n a gen a, sana a puakna gari chule lak piak a um hi’n le a gen hi. Mat a um sana chu a kigawm ah gold biscuit 18 leh gold bar 4 kiman dawk a hi.

CM Relief Fund ding ah Rs. 17,28,557 donate bawl

Imphal, July 19 (Nisin Thuhiltu): CAF & PD Minister Karam Shyam mapuina institution, organisation, hospital leh individual chuam chuam te’n tuni’n state sung ah tuilet ziak ah haksatna thuak te kithuapina ding ah Chief Minister’s Relief Fund ding in Rs. 17,28,557 a pia khawm ui. Karam Shyam in Chief Minister N. Biren Singh khut in Rs. 50,000 cheque piakdawna a nei a, zia nung a chun, Manipur University in Rs. 4,37,000, Sky Hospital & Research Center in Rs. 2,00,000, Maipakpi Maternity & Child Hospital in Rs. 2,00,000, Imphal Hospital & Research Institute in Rs. 1,50,000, Advanced Speciality Hospital and Research Institute in Rs. 1,50,000, Jivan Hospital, Kakching in Rs. 1,00,000, City Hospital and Research Center in Rs. 1,00,000, Catholic Medical Centre in Rs. 1,00,000, Iboyaima Hospital & Research Centre in Rs. 20,000, National Institute of Electronics and Information Technology, Imphal in Rs. 1,01,557, Khongnang Gas Agency in Rs. 30,000, South East Manipur College, Komlathabi in Rs. 50,000 leh Anwar Hussian in Rs. 40,000 donate bawl in Chief Minister khut ah piakdawna a nei ui.
Chief Minister in ziagual panlakna chu kipakpi mama in a gen a, haksatna tuak te kithuapina kituptak ah sum kipia khawm te mat hiding in a gen hi.

CM in compensation Rs 1.8 Crore piakdawna nei; recovery van chawkna ding
Rs 58 lakh sanctioned

Imphal, July 19 (Nisin Thuhiltu) : Manipur Chief Minister N. Biren Singh in tuni nitaklam in Chief Minister Secretariat ah press conference hun in National Highways ah November 2016 - January 2017 sung ah truck leh LPG bullet tanker tuaksiat ziak ah driver liamna tuak leh gari suksiat piak ah um te kithuapina ding in compensation Rs 1,084,1094 piakdawna a nei hi. Zia ah sum Rs 1,084,1094 piakdaw ah um chu truck neitu mi 61 leh driver banah helper te a ding ti a hi. Chief Minister in All Manipur Petroleum Products Transporters’Association khut in Rs. 1,07,01,094 cheque piakdawna a nei a, All Manipur Bulk LPG Transporters’ Association khut in Rs.1,40,000 cheque piakdawna a nei hi. Chief Minister N. Biren Singh in press conference ah a genna a chun, Rs. 58 lakh chu National Highways ah accident ahiloleh emergency hun ah mat ding recovery van chawkna ding ah piak ah um hin a gen a, driver leh handymen te’n society a ding ah pan a laknau thupi mama ah hiat a hina chung ah kithuapi piak ah um a hidan uh gen in State Cabinet in tuma deu a khah kithuapina piak ding ah lemsakna a siam hita in a gen hi. Highway Protection Force siamdaw leh siamdawlo ding tawh kisai ah dawtna a dawnhuna a chun, Manipur Police (2013 & 2016 batches) recruitment examinations result puanzaw a hitak leh a thak ah IRB Battalions lak hiding in a gen a, zia Battalion chu a pawimaw leh Highway Protection Force ah mat hiding in a gen hi. State sung ah tuilet ziak ah haksatna um te tawh kisai a genna a chun, Central Government team in state dinmun etzuina nei zing a hidan uh a gen a, ni 4 lam ki camp hita un a gen hi. Tuiletna mun khenkhat ah tui chawpdawna ding ah State Government in arrangement bawl zing a hidan le a gen a, area khenkhat ah Dengue, Japanese Encephalitis leh Swine Flu natna leng ah a kigenna chung ah a kisaipi Department in a sun a zan ah buaipi zing a hidan gen in, mundang ah natna hik a kithezak lona ding ah panlakna um in a gen hi. Chuleh, tuilet ziak ah a hun tak ah bu-chingtheilo lobawl mite government in ni 100 sung ah a ga lak thei ding bu-chi peding hin a gen hi. Press conference chu CAF & PD Minister Karam Shyam, Forest and Environment Minister Th. Shyamkumar, Agriculture Minister V. Hangkhanlian, Education Minister Th. Radheshyam leh Commissioner (CAF & PD and IPR) K. Radhakumar te’n le a uap ui.

User Rating: 0 / 5

Star InactiveStar InactiveStar InactiveStar InactiveStar Inactive

AYUSH Director in Churachandpur pha
Lamka, July 18 (Nisin Thuhiltu): Lamka a Dengue leh Japanese Encephalitis (JE) hunkhawp mudaw a hitawh kitawn in tuni’n AYUSH Director, Dr. Guneshor Singh mapui team khat in Lamka pha in mun chuam chuam etthâkna a nei a, Dr. J. Son Goukham Samte, Medical Superintendent, District Hospital kimupi in zia hun a chun AYUSH Director thak vaidawnna leh kipakpi suklatna’n thilpiak piakna a um hi. Dr. Guneshor in Dengue leh JE ziak ah thina tuak um maleh a hun ah zen man a hi nakleh lauthawng takluat ding umlo hi’n a gen a, AYUSH damdawi chu damdawi dang tawh kibanglo in kimantak leh bailamtak ah muthei a hi banah side-effect umlo hi’n le a gen hi. Dengue leh JE damdawi te chu a pawimaw dan zil ah kiningting tak ah piak hi ding in a gen a, Bethesda College of Nursing ah lupna 50 um theina, Integrated Ayush Hospital bawl hiding in le a gen hi. Medical Superintendant Room a hun matzaw in Eastern Block, Ground Floor a ATM Booth umna pang ah Yoga Wellness Centre mun ding etthâkna nei in Yoga Wellness Centre bawlna ding ah a pawimaw dan zil ah kithuapina hawitak piak hi ding in a tiam hi. Hospital a pat Dengue Positive case thak 6 mudaw a hina, Trinity Christian Seminary, Sielmat pha in Seminary Hall ah student te lak ah Awareness a neipi hi. Zia hun a chun Dr. Guneshor Singh, Director, AYUSH leh Dr. Jamthianlal, District Malaria Officer, Churachandpur te’n Dengue leh JE tawh kisai ziltilna a piau hi. Dr. Guneshor in Medical Doctor in natna a pat mihingte humbit in damtheina hawitak ah etsui ding leh damlote sukdam ding chu a mawpuakna uh hi’n a gen a, damlo etkawlna tawh kisai ah AYUSH in le mawpuakna liantak nei hi’n a gen hi. Churachandpur a Dengue leh JE natna a lêng chu bang ziak a hi hawitak ah etsui pawimaw hi’n le a gen a, zia na ding a chun mitin in le mani theih chiat ah panla ding ah chial kawm in thokang kipe sak lo na ding ah ching thei tak ah um ding in a vaithak hi. Dr. Jamthainlal in JE leh Dengue natna tawh kisai a genna a chun, a natna kilatdan tangpi kibang in khawsik a kilang masa deu hi’n a gen hi. Natna te chu a hik pua thokang in a pena a pat kivei kha thei hi’n a gen a, zia a pat ah kivengna ding ah innkiang ah thokâng in tui a thaklona ding ah sukthian ding, tui khawlnate hawitak ah sittûp ding leh tui kiting sak lo ding hi ah genlang kawm in damlona nei ah kimuangmaw te’n kintak ah Health Facility naipen a test bawl pai ding in le a hiatsak hi. Chun, Dengue leh JE Outbreak um ma a khan District Administration tawh kithua ah khawpi sung zosia Fogging bawlsuak ding proposal bawl himaleh State Malaria Director in lemsakpilo a hidan a puangdawk a, Fogging chu khawphat hun ah kâp ding a hina ah tulai gua zuk ziak in Village Authority khenkhat a pat dawtna um te le khawsiat ziak ah kâp theilo hi’n le a gen hi. AYUSH Director, Dr. Guneshor Singh mapui Medical Team a chun Dr. Lukhoi Singh, Additional Director, Dr. Promila, Joint Director, Dr. Ksh. Umananda Singh, Medical Officer in-charge, AYUSH Specialist, CHC Moirang, Dr. S. Bishwanath Sharma, Medical Officer, District Hospital, Senapati, Dr. Amita SRF, RRJ (Imphal), CCRH, New Delhi leh Dr. Okram Jet Singh, SRF, RRJ (Imphal), CCRH, New Delhi a hiu a, Lamka ah mun chuam chuam a phak hun ua chun Dr. Jamthianlal leh Dr. Muankim te’n malat u’i.

Overdose Poster, Cards leh Leaflet hawnna nei

Lamka, July 18 (Nisin Thuhiltu): SHALOM Project Sunrise, FHI-360 leh DAPCU, Churachandpur saina nuai ah tuni zingkal dak 8:00 in JJ Plaza, Rengkai Road ah “Harm Reduction and PWID Needs” meeting banah Overdose Poster, Cards leh Leaflet hawngna nei in a um hi. Zia hun a chun District sung a khua hausa, Village Authority lawi upate a pang ua, Dr Romeo, DACO leh Chairman of District OD Manager Team in Overdose OD Poster, Cards leh Leaflet hawnna a nei a, a thugenna a chun, district sung ah khamthei hi zawngsak te khawtuana liantak tawh Shalom Project Sunrise in Overdose te hinna humbitna ding ah Overdose Helpline number a pat daw hi’n a gen a, zia tawh kisai a chun district mipi’n kithua pina pia chiat ding in chialna le a bawl hi. Resource person Benjamin, Supervisor, DAPCU, CCpur in district sung ah HIV/AIDS dinmun tawh kisai hilchetna a pia, Nengkhojam, Advocacy Officer, SHALOM in ‘Basic of Drugs & its effect, overdose, benefit of harm reduction stratergy in prevention of BBV’ banah Esther PM SHALOM IT in ‘Psycho-social support needs of PWID, Rights of PWID leh Oral Substitution Therapy OST’ tawh kisai ziltilna a piau hi. Meeting a hileh khamthei haisan nuam te panpi theina ding dan banah Hausa, VA level ah khawtang panlak ding dan leh overdose a um hun ah eykawl leh zen ding dan hilsawnna ding tup ah a sai uh a hia, hawn a um Overdose Poster, Cards leh Leaflet a chun thingtang pau chuam chuam ah overdose te etkawl ding dan banah amau a ding ah damdawi kimang, Naloxone kiti mat ding dan ti te a kizik banah overdose a um hun ah panpina dawt theina ding Overdose helpline number - 7423918414 leh 8119050881 le a kipiai. Meeting a chun khua hausa leh village authority member a kigawm ah mi 50 tuam a pang u’i.
NT 19july2017

Helmet khuklo ziak ah tamtak liau

Lamka, July 18 (Nisin Thuhiltu): Churachandpur District Superintendent of Police (SP) Rakesh Balwal, IPS malatna nuai ah District police in khawsung - khawtâng hawina leh khangtona ding ah pan a lakna chiapi to zel in District Traffic Control Police (TCP) in chawmkhat sung helmet drive a chawl nung in tuni’n Teddim road ah helmet drive pat in a um kit a, zia hun a chun District TCP OC P Neihsial mapuina nuai ah TCP team in SA Road, lutsukna bul leh Central Road kikal ah helmet drive bawl in helmet khuklo 2-wheeler tawl hunkhawp matdaw a hi. Matdaw a um te chu traffic dan tawh kituak ah TC receipt cut in sum liau sak in a um in zia sum te chu District transport office ah submit in a um hi.
NT 19july2017b

2nd Phase ASHA Training on Malarialogy chiatha zing

Lamka, July 18 (Nisin Thuhiltu): District Malaria Officer, Churachandpur saina nuai in CMO Mini Conference Hall, CMO Complex ah tuni’n Primary Health Centre (PHC), Henglep nuai ah ASHA Worker te’n Second Phase ASHA Training on Malarialogy kiti a nei ui. PHC Henglep ah Facilitator Themhat Haokip leh Kimmy te etsuina nuai in ASHA Worker 49 a um ua, tuni training a chun Themhat Haokip, Facilitator leh S. Thangthianmuan, District Consultant, NVBDCP te’n ziltilna a piau hi. Training a hileh zing leh Henglep PHC a ASHA Facilitator - Lhingneichong leh Lamneikim Baite te nuai a um ASHA Worker 49 te’n nei ding a hiu a, July 20, 2017 leh Henglep PHC a ASHA Facilitator - Kim Irene leh K. Esther te nuai a um ASHA Worker 28 in Training nei in Second Phase ASHA Training zawthiang hiding a hi. Training hun a chun Dr. Jamthianlal, DMO Churachadpur, Gopal Kishore, IEC (C), State Consultant leh S. Thangthianmuan, District Consultant, NVBDCP, Churachandpur te’ hotu in a pang ua, Block sung ah ASHA Facilitator te’n a kithuapi ui. Tu masang cha a khan Sangang PHC leh Saikot PHC nuai ah ASHA Worker te’n training chu a la zawthiang uh a hitai.

Student 452 in Compartmental Exam pia

Lamka, July 18 (Nisin Thuhiltu): Board of Secondary Education, Manipur (BSEM) nuai a High School Leaving Certificate (HSLC), Class X compartment exam external leh regular student te’n tuni sunma dak 9:30 a pat sunnung dak 1 kikal in Ebenezer Centre, New Lamka ah exam a piau hi. Tukum compartment exam chu student 452 in a pia ua, zia lak a chu English subject pia student 2, Mathematic 166, Science 147, social science 127, Home Science 5, Paite MIL 1 banah external ah student 4 a hia, student 3 a absent ui.
NT 19july2017c

St. Mary's Higher Sec. School Building thiansua

Tuibong, July 18 (Nisin Thuhiltu): Churachandpur district a ding ah thiamzilna mun minthang pen te lak ah khat, St.Mary's High School, Tuibong chu Higher Secondary ah upgrade a hi tawh kitawn in tuni'n Higher Secondary School Building le Academic Session 2017-18 hawnna nei a hia, zia hun chu Hill Area Committee (HAC) ah Chairman, T. Thangzalam Haokip @ TT Haokip, MLA, Henglep in Chief Guest hina tawh uap in school building thak hawnna a nei a, Rev. Dominic Lumon D.D in Guest of Honor hina tawh a uap in student te a ding ah malzawl dawt piakna a nei hi. St. Mary’s High School a hileh a chiata 1975 kum ah hawn a la hia, Higher Secondary ah dawsang a hitawh kitawn in Academic Session 2017-18 a pat class XI le sim thei ding a hita, class XI Arts a ding ah student 120 leh Science a ding ah 53, a kigawm ah student 173 te’n admission a bawl ua, zing a pat regular class kipan ding a hi.
NT 19july2017d

A Pension sum mang ah annchang hawm

Silchar, July 18 (Nisin Thuhiltu): Assam, North Cachar Hills district sung Jinam Valley a pat Upa Khupzakam Thiek chun Lamp Co-Operative Society a kum 20 sung a sep nung in, tukum March 31, 2017 a khan a la pension a, zia a pension sum mu chu mangcha'n annchang bag hunkhawp chaw in, Jinam Valley Lamp Co-Operative sung ah innkuan 190 te kiang in annchang kg 25 chiat a hawm hi. A kigendan in, Upa Khupzakam Thiek chun zia gual ah a mipite a ding ah annchang hawm ding a hidan a pension masang in guanggalna a la nei sa a hi. Zani a khan N. Hmarlusei, P. Hmarlusei, Leiri leh Namriengram (Dijung) mun te ah annchang chu a la hawmdawk a, tuni, 18 July 2017 ah Jinamgath mun ah khua 13 ah annchang hawpna sunzawm kit a hidan hiat a hi.
NT 19july2017e

Media leh Medical Interactive Session um ding
Lamka, July 18 (Nisin Thuhiltu): Directorate of Health Services Govt. of Manipur leh Medical Superintendent, District Hospital Curachandpur saina’ 19th July 2017 zingkal lam dak 10:00 leh BRGF Hall, DC Office, Churachandpur ahMedia leh Medical Interactive Session on HIN, Dengue, JE um ding a hi. Shyam Lal Poonia, IAS, Deputy Commissioner, Churachandpur in zia Interactive Session chu hawng ding a hia, Churachandpur District leh Imphal a pat media person te leh medical staff te’n Interactive Session hun neikhawm ding a hiu.

Barak lei siamphat hita
Imphal, July 18 (Nisin Thuhiltu): Manipur leh state dang kawmtuana lampi National Highway-37 (Imphal-Jiribam) ah um Barak lei (bridge) a siat ziak ah vanpua truck tamtak te taitua theilo ah a um nung ua, National Highway- 37 (Imphal-Jiribam) enkawltu National Highways Infrastructure Development Corporation Limited in State PWD kithuapina tawh lei sia siamphatna ding ah panlakna nasatak a nei nung ua, tuni nitaklam dak5:00 tuam ah siamzaw ah umkitta leh gari ngaina gual ah tai thei kitta hin a kigen hi.

Album hawnna nei ding
Lamka, July 18 (Nisin Thuhiltu): Thadou Kuki visual Album Nanglou in kiti chu 19th July 2017 nitaklam dak 1:00 leh Life cafe, Rengkai CCpur ah release bawl hiding a hi.

SC in Guwahati HC ah Manipur road rage case transfer
New Delhi, Jul 18 (Nisin Thuhiltu): Manipur road rage case, Chief Minister N Biren Singh chapa Ajay Meetai in March 20, 2011 ah Irom Roger a kaplupna tawh kisai ah Irom Roger nu leh pa te banah a lawyer uh venbitna peding ah Supreme Court in Centre Government a hiatsak nung in tuni’n a case chu Guwahati High Court ah transferred bawl in a um hi. Chuleh, Central Reserve Police Force (CRPF) personnel te’n Irom Roger nu leh pa te banah a lawyer uh venbitna a piak ding ti a hi. A langkhatlam ah tualthat Ajay Meetai chu section 304 (Culpabale homicide not amounting to murder) of the Indian Penal Code (IPC) nuai ah kum 5 sung jail tang ding ah thutan khum ah um a hia, himaleh Irom Roger nu leh pa te kum 5 sung jail term chu dawikhawplo a hiu.

Bangladesh ah Manipuri student kitha chung ah chut-mun kiphinna nei
Imphal, July 18 (Nisin Thuhiltu): Keikhu Awang Leikai, Imphal East ah tuni’n Citizen organization - Youth Star Sports Union (YSSU), All Manipur Muslim Organisations Coordinating Committee (AMMOCOC), Youth Voluntary Association (YOVA) leh All Manipur Muslim Women Development Organisation (AMMWDO) te’n Chittagong, Bangladesh ah July 14, 2017 ah Manipur mi Ateef Sheikh tha ah a umna chu nasatak ah demna bawl in chutmun kiphinna a nei ui. Kum 25 ah upa MBBS student Ateef Sheikh chu a umpi Winson Maisnam Singh in kinial buaina ziak ah a sawisaklup hi’n Bangladesh Chittagong city based The Daily Star in a gen hi. AMMOCOC president SM Jalal in thuthak lakhawm mite kiang ah a genna a chun, MBBS final year student Ateef Sheikh kithana chu dem taak leh tualthattu Winson Maisnam Singh in suicide bawl a guatdan a pat guanggalna kituptak neikawm ah kithat hin a gen a, Ateef thazaw nung ah tualthana a pat suakchat gua hin a gen hi.

Sepna ah lung-awi ding pawimaw: Radheshyam

Imphal, July 18 (Nisin Thuhiltu): Association of Professional Social Workers Secretariat, Singjamei, Imphal ah tuni’n ‘Social Work Profession and Challenges’ ti thupi nei in "1st Manipur Social Work Practitioners Congress " kiti a um hi. Zia hun chu Manipur Education Minister Th. Radheshyam in khuallian hina tawh a uap a, ama’n a thugenna a chun, mihing khat a sepna chung ah a lung awi ding pawimaw leh society dawpkang theina ding ah panlakna a nei ding pawimaw in a gen a, mawpuakna zo thei chiat ding ah panlakna a um ding pawimaw in le a gen hi. Kipakna leh nawpsakna kiti’n a kikhiakna liantak nei in le a gen a, khenkhat in nawpsakna bei ah kipaktak ah hinkhua mang, khenkhat in nawpsakna tawh lunggimna tawh hikhua mang a hidan uh gen in, mihing khat in sepna chung ah kipaktak leh thanuam tak ah nasep ding pawimaw hin a gen hi. Modi’ ‘Sabka Saath Sabka Vikas’ - masawnna ding ah panlak khawm ding ti chu a zawngkhal diak society te dawpkangna ding ah thil hawitak a hidan te gen in khawvel ah khutdaw hausapen ah kihia, Mother Teresa in a damsung zosia panpi ngai te panpina amat gual ah hinkhua mat ding pawimaw in a gen hi. Chuleh, District Hospital leh Primary Health Centres te ah Mental Health Service umsak ding dawi a hidan a gen hi. Education, Labour and Employment Minister Th. Radheshyam Singh leh Chairperson, MCPCR S. Saratkumar Sharma te’n le zia hun matna chu a uap ui.

Naupang te khamthei pua ah mang sek uh
Imphal, July 18 (Nisin Thuhiltu): Manipur sung ah khamthei a kivei te’n Indo-Myanmar gamgi ah khamthei pua vel ding ah naupang mang sek uh a hi dan hiatdaw a hi. Tengnoupal district ah SP in-charge, Dr. S Ibomcha Singh, MPS etsui combine team in khamthei pua naupang kum 14 mi khat a matdawna a pat zia thu chu hiatdaw a hi. Thutut kimu dungzui in, thuguk mu tawh kitawn ah Manipur police leh Assam Rifles combine team in zani sunnung dak 2:30 tuam ah operation a bawlna a chun Kwatha junction ah Rs. 3.39 crore tuam man ding khamthei pua naupang (a min puandaw hilo) khat leh a kikhutzawppi, Liam Haokip (30) w/o Thinkhojim Gangte of Chikkim Village, Moreh a man a, amau a pat in Brown Sugar 127 grams, Heroin Grade-I 509 gram leh WY tablet 6970 matdaw a hi. Mat a um mi 2 te chun gamlak a haw uh a hia, naupang chun khamthei te chu a puak a hi. Amau kipuanna a pat in Domjahat Haokip (35) w/o Thangkholun Haokip of Chikkim village, Moreh leh Letkhothang Lhungdim (38) s/o Jilhun Lhungdim of Lhangkichoi Veng Moulhoi, Moreh te khawnung ah mat in a um ua, amau te gel chun khamthei te chu Churachandpur a puaklut guat uh a hi. Chun, Moreh a pat khathei thawt a kigawl, Thengkhojam Gangte (35) s/ o Lumcha Gangte of Chikkim Village, Moreh le mat in a um hi. Mat a um te a pat in khamthei bep hilo ah Samsung leh Nokia mobile phone 2 gel, Korean currency - 10,000 Won, American currency - USD 2, SBI ATM 2, UCO ATM 2, Aadhaar card 4 leh PAN card 1 mudaw a hi. Mat a um kum tingnailo chapang chu Juvenile Justice Board mai ah dinsak hi ding a hi.

Relief material tasam lo maleh relief camp a um te’n haksatna tamtak tuak
Imphal, July 18 (Nisin Thuhiltu): Tuilêt in a chenna inn a suksiat ziak in Thoubal District huapsung a um Lilong Ataokhong Gram Panchayat ah tuilêt thuakkha te chu tuni tiang in relief camp te ah a um naklai uh a ngai hi. Imphal Lui a lêt ziak ah zia tuam hi tui in a la chup a hia, Lui tui chu kiam ta maleh nullah a kituplo ziak in Lilong Turel Ahanbi Upak Thong makha, SirilThong leh Lilong Dam te ah mun tamzaw te a chun tui kivei den nalai in inn tamtak chu chenna thei a hi naipuai. Zia tuam ah tuilêt thuakkha te chu relief camp 4 ah umsak in a um ua, district administration leh pawl chuam chuam kigawm te panlakna zal ah relief material lam ah tâksapna umlo maleh nisin mamaw thi chuam chuam - toilet leh a dang dang te kining ting a um lo ziak ah haksatna tamtak um hi’n camp a um te’n a gen ua, zia bep chule hilo in tui ki vei den ziak ah damlona chuam chuam a piangdaw ding lauthawngna thu le a puangdawk u’i.

CM’s relief fund a ding ah sum tuak kibelap zing
Imphal, July18 (Nisin Thuhiltu): State sung ah tuilêt thuakkha te kithuapina ding in Chief Minister’s Relief Fund (CMRF) ah sum tuak a kibelap zing a, local cable television network ISTV, Central Agricultural University (CAU) leh S. Kula Women’s College te’n CMRF a ding in tuni’n Rs. 3 lakh, Rs. 2 lakh leh Rs. 50,000 piakdawna a nei u’i. Sum te chu CM’s Secretariat ah hun kimatna khat in Chief Minister N. Biren Singh khut ah piakdawna nei a hia, zia hun a chun CM N. Biren in kiphal tak ah haksatna tuak te kithuapina ding ah piate chung ah kipakthu puang kawm in maban ah pawl dang dang in le a piak zel uh kinep thu le a gen hi.

Manipur Budget session sukchawm ah um; MPCC spokesperson in lem a saklo thu taklang
Imphal, July 18 (Nisin Thuhiltu): 11th Manipur Legislative Assembly 2nd Budget session, 20th July 2017 leh kipan ding chu ni 18 sung sitting um ding ti himaleh ni 13 sung sitting um ding ah sukchawm in a um hi. July 10, 2017 ni ah Business AdvisoryCommittee (BAC), Manipur Legislative Assembly in meeting a nei hun ah sitting hun ding chu a sukchawm hin Assembly Secretariat in 11th Manipur Legislative Assembly 2nd budget session ding tawh kisai ah thusua a bawlna a chun a taklang hi. State in tuilet ziak ah haksatna chuam chuam a tuak zingna chung ah Budget session hun ding chu sukchawm ah um hin le thusuak in a gen hi. Budget session sukchawm ah a um tawh kitawn ah August 20 tiang ah sitting um ding chu August 16 tiang ah sitting umta ding ti a hi. A langkhatlam ah Manipur Pradesh Congress Committee (MPCC) spokesperson, Khumukcham Joykishan in Chief Minister N. Biren Singh mapui Bharatiya Janata Party (BJP) government in Budget session hun ding puanlawksa thakhat thu a sukchawm chu maksa a hidan genkawm in government department 50 um te budget ding genkhawmna ding ah a tângpi sitting ni 13 sung um sek hin a gen a, issue pawimaw tak tak - Inner Line Permit System, Indo-Naga Framework agreement leh tu ah state in a haksatpi tuiletna dinmun te genkhawmna ding ah hun umlo ding a hidan gen in, dawtna (question) khenkhat a piaklut te le sitting ni ding suktawm ah a um tawh kitawn ah cancel ah um hin le a gen hi.

User Rating: 0 / 5

Star InactiveStar InactiveStar InactiveStar InactiveStar Inactive

JUNE A PAT CCPUR AH DENGUE CASE 14 LEH JE 17 MUDAW HITA

Lamka, July 17 (Nisin Thuhiltu): Churachandpur District ah Dengue leh Japanese Encephalitis (JE) case thak mudaw a hikit tawh kitawn in Rapid Action Team/ Rapid Outbreak Response Team bawldaw a um in tuni case thak mudaw a hina mun zuan ding team member te a kipatdaw masang ua Dr. Jamthianlal, DMO, Churachandpur in emergency meeting nei pi in maban panlak ding dan tawh kisai briefing a bawl hi. Churachandpur District ah July 13, 2017 chan in Dengue case 11 leh JE Case 17 mudaw a hia, zialak a chu Town area ah Dengue 4 leh JE 3 a um hi. Thutut kimu dungzui in, a chiata June 19, 2017 ah Hengkom khawmi te’n damlona a la tuak in khawsung ah ki enkawl maleu damlo zat in punglam a manaw a, ASHA in zia tawh kisai June 21 ah report a bawl dungzui in June 22 a khan DMO, Churachandpur mapui medical team khat in a mun del in Hengkom khua leh a kiang khuate a pat thisan sample a lakhawm hi. July 1, 2017 lakkhawm a um sample te result suak in zia dungzui a chun Bethlehem Veng, S. Molcham, Teiseng, Zenhang Lamka, Hengkom a pat Dengue positive case 9 mudaw in a um a, July 10 ah Santing a pat mi 2 mudaw a hia, JE postive case a hileh July 12, 2017 test result ah Bethlehem Veng, Hengkom ah mi 6, July 3 ah Vengnuam, New Lamka a pat mi 1, July 13, 2017 test result a pat New Pangsang, V. Munhoih, Santing leh Nalon a pat mi 8, July 15, 2017 ah Santing, Muallum leh Lajangphai a pat mi 3 mudaw a hi. Test result tuni kisuadawk a chun Churachandpur District a pat dengue positive 14 mudaw a um in zia te chu Santing, V.Sinai leh Trinity Christian Seminary, Rengkai leh S.Munnuam tite a hia, zia mun te ah Rapid Action Team/ Rapid Outbreak Response Team sawldaw in a um hi.

DAPCU IN THA 3 SUNG AH HIV +VE MUDAW ZAT REPORT PIA
Lamka, July 17 (Nisin Thuhiltu): District AIDS/HIVS Prevention & Control Unit (DAPCU), Churachandpur a pat thutut kimu dungzui in Churachandpur District sung ah tu dinmun in AIDS/HIVS tawh kisai ensui ding DAPCU nuai ah Report unit 31 a um a, 2003 a pat in AIDS/HIV test pat hita in 2017 tiang ah CCpur district sung ah mi vântâng 97,894 test bawlna lak ah HIV positive 4,034 mudaw a hi. Tukum April, May leh June sung ah mi 2,231 test bawlna lak ah HIV Positive 31 mudaw a hia, amau lak ah sex a pat HIV kikai sawn 25 (pawsal 13 leh numei 12) um in khamthei hilui 6 hi ah mudaw a um in mi 31 te lak ah mi 30 chu ART Centre ah ki register in ART damdawi a ne pan ngal ui. Zia tha 3 sung ma a hin nauvawp ANC mi 1,630 test bawlna lak ah HIV positive 3 mudaw a um in ART Centre ah ki register in ART damdawi a ne ngal ui. HIV Postive nu a pat nausen 5 dam tak in a piang ua, nausen leh a nu’n damdawi a ne pan ngal ui. Chun, zia tha 3 hun sung ma a hin HIV positive nu a pat nau piang 12 test bawlna lak ah HIV positive mudaw a um puai. DAPCU nuai a partner NGO in tha 3 sung ah Female Sex Worker (FSW) 458 banah Injecting Drug User (IDU) 383 test a bawlna lak ah positive mudaw a nei puai. Tha 3 sung ah HIV positive mi 31 mudaw thak a um te lak ah kum 14 nuai 1, kum 15 - 24 kikal mi 2, kum 25 - 34 kikal mi 12, kum 35 - 49 kikal 15 leh kum 50 chung lam mi 1 a um a, Block dungzui ah et in Lamka Block ah HIV Postive mi 18, Tuibong ah mi 6, Saikot ah 3, Singngat ah 2 leh Thanlon 2 a um hi.

KHAMTHEI HAISANNA DING AH REHAB CENTRE LUT NUAM 16 TE’N POLICE KIANG ZUAN
Lamka, July 17 (Nisin Thuhiltu): Manipur Chief Minister N. Biren Singh in khamthei addict ah haisan nuam maleh sum leh pai ah haksatna nei ziak ah rehabilitation centre ah lut zolo te’n District police kithuapina leh government sponsor na nuai ah khawpi sung Rehabilitation Centre khat ah a thawn ah um thei ding uh ti ah thupuan a nei tawh kitawn in District police in tu ma khan khamthei addict khenkhat te chu a chanaute phalna tawh rehab centre in a la kawi u’i. District sung ah khamthei hi zawngsak leh haisan nuam 16 te’n tuni’n Rehabilitation Centre ah um ding in Police Station a zuan ua, police in le kithuapina hawi tak pia in amau umna ding ah government in a kawkmu rehabilitation centre 3 te a dawpkualna ua chu centre 2 te chu mi dimta hi’n a kigen hi. Manipur government in CCPur district ah khamthei haisan nuam te chu Ministry of Social Justice & Empowerment, Government of India support na nuai a um centre 3 - Samaria IRCA, Thingkangphai, Lametnamun LRRC, Bungmual leh New Life IRCA, Bangla te ah kawi thei ding in thusua a bawl a, zia te lak ah 2 - Samaria IRCA leh Lametnamun LRRC te ah seat a dimvek ta, New Life IRCA ah a hileh seat um maleh New Life enkawl tute’n document chuam chuam a dawt ziak un tuni sunnung in District Police leh New Life thu neitu te’n kihona a nei ua, zia thu zik a hi chan in thuchian hiat a hinai puai.

ZO SUAN TE DING AH KIVAIHAWMNA CHUAM PHUTNA NEI

Imphal, July 17 (Nisin Thuhiltu): Mizoram leh Manipur ah tribal organization chuam chuam kigawm te’n Manipur ah Zo suan (Chin-Kuki-Mizo/Zomi) te ding ah kivaihawmna chuam a um ding phutna nei in New Delhi ah government official chuam chuam te a kimupi ui. JAC-AATB leader Mangchinkhup in a genna a chun, July 11, 2017 a pat civil society organizations leh political party leader te tawh JAC-AATB leader te New Delhi ah ki camp a hidan uh genkawm in JAC-AATB leh Manipur Government in Memorandum of Understanding (MoU) suai a kaina tawh kisai ah Union Government kiang ah thil umdan tut a hidan uh a gen a, Zo (Chin-Kuki-Zomi/Mizo) te panna Outer Manipur ah tribal te kivaihawmna chuam a um ding phutna nei a hidan uh le a gen hi. A langkhatlam ah JAC-AATB press note in a taklatna a chun, joint delegation in Union Government official leh North East Region ah leader chuam chuam te banah Interlocutor for Indo-Naga peace talks Mr. RN Ravi kimupi un a gen hi. Indo-Naga Framework Agreement sukfel pai hita ding ah ginchat a hi dungzui ah Manipur leh Mizoram a pat joint delegation te’n Interlocutor kiang ah Zo suan te a ding ah kivaihawmna chuam a um ding pawimaw a hidan genpi un a taklang bawk hi. Chuleh, Prime Minister’s Office banah Ministry of Home Affairs ah civil society organizations leh political party chuam chuam - Central Young Mizo Association (CYMA), Mizoram Upa Pawl (MUP), Mizo Hmeichhe Insuihkhawm Pawl (MHIP), Mizo Zirlai Pawl (MZP), Mizo Students’ Union (MSU), Zo Re-unification Organization (ZoRO), Bharatiya Janata Party (BJP) Mizoram State, Indian National Congress – Mizoram Pradesh Congress Committee (MPCC), Mizo National Front (MNF), Zoram Nationalist Party (ZNP) leh Mizoram People’s Conference (MPC) leader te suai kaina memorandum piaklut ah um in le JAC-AATB press note in a taklang hi.
NT 18july2017b

PANPINA DING AH KIDAWL KHAWM TE PIAKDAWNA NEI

Aizawl, July 17 (Nisin Thuhiltu): Young Paite Association (YPA), General Headquarter in Mizoram a tuilian leh nimchim thuakte panpina ding ti ah Block te mangcha ah Unit chuam chuam te a dawlkhawm sak te chu tuni’n Central YMA Office, Committee Room, Aizawl, Mizoram ah piakdawna a um a, zia hun a chun Lalbiakzuala, President, CYMA in a kalsuan YPA puitu te lamtuana a la nei hi. YPA GHQ a pat T. Khailianthang, President, YPA GHQ in Manipur a Zosuan te’n haksatna a tuak hun ua a Unaupi uh, Mizoram a umte khawtuna thupi sa mama hi’n a gen a, Mizoram a Unau te’n haksatna a tuak uh State government in tung ding thak zo ding himaleh, YPA GHQ in hithei umsun ti ah panpina a dawlkhawm te chu a hi gual gual ah Aizawl tut a um hi ah puang kawm in anchang leh sum kidawlkhawm te chu Vanlalruata, Vice President, CYMA khut ah piakdawna a nei hi. YPA GHQ in panpina a dawlkhawm sia chu anchang bag 184, nik leh puan bag 4 leh a sum ah Rs. 1,50,420 a hi. Panpina piakdawna ding a chun truck khat leh Bolero 1 mang ah President T. Khailianthang malatna’n Lianmuanthang Valte, General Secretary, Chin Ngaih Pau, Chairman, CEC leh Khanpau Ngaihte, Member, CEC te a kuan ui. Hun matna a chun, Vanlalruata, Vice President, CYMA in YPA GHQ thilhi thupi sa talua a hidan a gen a, Pick-up mang a kalsuan ding ah a gingchat lai ah truck lian mang ah a kalsuan uh chu thupi mama hi ah taklang kawm in panpina a mu te lak ah a tam pen hinalai hi’n a gen hi.
NT 18july2017c

NÎN PAI THU AH HIATSAKNA
Lamka, July 17 (Nisin Thuhiltu): T Kammuanlal Simte, MCS, CEO/ADCC in tuni thusua a bawlna a chun, bangtik hun a le garbage pick-up point te ah a nîn teu nusia lo ding leh zingkal ah nîn pua gari a hung hun phat le bep pick-up point te ah nîn kawi ding in a hiatsak a, gari a hung hun hiattheina ding ah dâk hung gi sek ding hi’n a taklang hi. Zankal ah pick-up point te ah nîn kipai in lampi dung a sunken ziak ah zia gual chu phal hilo hi’n le a taklang a, zan kal ah pick-up point te ah nin pai matdaw khenkhat um in gawtna chang uh hi’n le a taklang hi.

QUIZ COMPETITION UM DI
Lamka, July 17 (Nisin Thuhiltu): RMSA/CCpur District saina nuai ah Class IX- X (govt. school & private school) te a ding in July 22, 22017 zingkal lam dak 11:00 leh Vimala Raina H/S ah Quiz Competition (written) um ding a hia, July 24, 2017 zingkal lam dak 10:00 leh Class IX-X te ding ah Quiz Comeptition final round (oral) leh Science Exhibition um ding a hi.

AUGUST THA LEH SUPER DIV. LEAGUE KIPAN DI
Lamka, July 17 (Nisin Thuhiltu): Churachandpur District Sports Association (CDSA) saina kum dang gual ah Super Division League chu a hung tung ding August 5, 2017 leh Tuibuong Peace Ground ah kipan ding a hi. Zia chu tawh kitawn in Super Division ding ah teldaw ah um club - UKB, Ahsijolneng FC, RUSS, RACC, LSC, ZFC, NLYC, Koite Youth Union, HQ SC leh Gothol FC te’n bangkim sufel ding ah CDSA in hiatsakna a bawl hi.

BARAK LEI CHIM; MANIPUR LEH STATE DANG KAWMTUA LAMPI HAWILO GEL
Imphal, July 17 (Nisin Thuhiltu): Manipur leh state dang kawmtuana lampi National Highway-37 (Imphal-Jiribam) ah um Barak lei (bridge) chu tuzingkal in a chim hi. Van pua truck keng10 nei khat a tai nung ah lei chimtha hin transport department official thusuak in a gen a, lei condition chu zanitak ah a pat dengdel tak ah um hita hin le a kigen hi. Zia lei chip ziak a chun, Jiribam town a pat Imphal zuan ding vanpua truck 200 lam te taizawm theilo in a tâng den ua, lei a chip tawh kitawn ah Repairing bawlna nasep le pat ah umngal hin official thusuak in a gen hi. Barak lei ahileh Tamenglong, district chuan, Imphal-Jiribam highway ah um a hia, Manipur a ding ah hinna lampi panina (second lifeline) ti ah kihia a hi. A langkhatlam ah Works Minister Thongam Biswajit Singh in tuni nitaklam ah thuthak lakhawm mite kiang ah a Barak lei (bridge) chipna tawh kisai a genna a chun, lei siamphatna nasep chiatha zing hin a gen a, lei kisiam sung ah mipi te’n haksatna a um tak in le thuak ham ham ding in chialna a bawl hi. A vaima theipen ah lei siamphat hiding ah genkawm in, Chief Minister N Biren mapui state government thak in serious tak ah panlakna nei zing hina gen a, Barak lei siatna chung ah Chief Minister tawh kihiatua zing uh hin a gen hi. Chuleh, National Highway-37 (Imphal-Jiribam) chu National Highways Infrastructure Development Corporation Limited etkawlna nuai ah um himaleh state a ding ah hinna lampi khat a hina chung ah a pawimaw dungzui ah State PWD in kithuapi zing ding hin a gen hi. Hiathei khat chu tu leh tu Manipur leh state dang kawmtuana lampi, National Highway- Imphal-Jiribam ah Barak lei (bridge) a siat bak ah Imphal-Dimapur lampi nimchip ziak ah supply vanpua gari te taitua theilo phawt a hi.

KPI DISTRICT AH LEI-KHIKEK IN CHENNA INN LEH SCHOOL SUSIA

Kangpokpi, July 17 (Nisin Thuhiltu): Kalikhola village, Kangpokpi District ah tunaicha lei-khikek thupitak a um nung in Kangpokpi District huapsung mun khenkhat ah le tu ni 1/ 2 sung in lei-khikek a um thak kit hi. Sub Divisional Officer, Saikul in zia ah lei-khitkekna mun te chu District Administration tawh kithua in etthakna a nei a, Island Sub Division nuai ah Maphou Kuki village ah lei-khikek in Mahadev Lok leh BSF camp kikal nasatak ah sukha hin a kigen hi. SDO Saikul, L. Geetchandra Singh in District Administration Kangpokpi chu disaster management experts te thuhiat ding ah chialna a bawl bak in lei-khitkekna a pat buanthuak kitawl thei ding dinmun a hina chung ah kivenna ding ah panla ding in chialna a bawl hi. Zia chu tawh kitawn in District Magistrate le hi, Kangpokpi, Deputy Commissioner, T.Ranjit Singh, IAS in Relief and Disaster Management, Govt. of Manipur chu Geological Survey of India (GSI), NER, Dimapur a pat expert team te thil umdan khualsak ding leh kivenna ding ah panlakna nei ding in zikthaw in hiatsakna a bawl hi. Chuleh, Deputy Commissioner, SDC (HQ), Kaigoulal Kipgen banah staffs leh local media person te’n Kangpokpi District HQ a pat 2 km ah gamla Haijang village ah lei-khitkekna mun te et-thakna a nei ui. Tu ah lei-khikek thak chun, Haijang village ah Ngulkholam Doungel (51), s/o (L) Lhunkhohen Doungel, Thangkhohao Doungel (62), s/o (L) Sehkhohen Doungel leh Lhunkhosei Hangshing (54), s/o (L) Seipao Hangshing te chenna inn banah Haijang UJB School suasia hin a kigen hi. A langkhatlam ah All Manipur Gorkha Students’ Union Irang Unit, General Secretary, Narayan Adhikari in a genna a chun lei-khikek in lampi a suksiat ziak ah local mi te leh school naupang te ding ah kikawmtuana lampi buai um mama in a gen hi.
NT 18july2017d

KEITHELMANBI AH HT TOWER KIPUK, MI 2 LIAM
Kangpokpi, July 17 (Nisin Thuhiltu): Keithelmanbi ah 132 KV Yurembam - Karong line, high tension wire tower a kipuk a, ziana a chun department worker pani’n liamna a tuak ua, 132 KV Karong Sub Station in meivak a piakdaw - Senapati, Kangpokpi leh Sekmai area ah power supply umtheilo in a um hi. A langkhatlam ah MSPCL staff te’n high tension wire tower siamphat ding a buaipi zing lai un, diagonal leh horizontal bracing iron rod khenkhat chu guk mang in a um hi. Chuleh, department worker liamna tuak mi 2 te chu CHC Kangpokpi ah first aid piak a hi nung un Imphal Hospital tut in a um ua, admit a hiu.

EDUCATION MINISTER IN SCHOOL BUILDING THAK HAWNG

Imphal, July 17 (Nisin Thuhiltu): St. Joseph’s Higher Secondary School Sangaiprou building hawnna tuni’n Education Minister Th. Radheshyam in a nei hi. Ama’n a thugenna a chun, Manipur ah school tamtak siam hawithak ding pawimaw in a gen a, higher education a ding ah demand a san dungzui ah seat suktambe ding pawimaw in le a gen hi. Hun matna uap Minister Th Shyamkumar in a thugenna a chun, Catholic Missionary – fathers leh sister te kipiakzawna leh panlakna thupi mama a hidan genkawm in pakchat thu a gen hi. St. Joseph’s Higher Secondary School Sangaiprou building hawnna hun chu- Archbishop of Imphal Dominic Lumon D.D.; MAHUD, Town Planning Forest & Environment, Horticulture & Soil Conservation Minister Th. Shyamkumar; Education and YAS Parliamentary Secretary K. Robindro Singh; Patsoi A/C, MLA Km. AK. Mirabai Devi te’n le a uap ui.

DEPUTY CM IN READING LAMPS PIAKDAWNA NEI

Imphal, July 17 (Nisin Thuhiltu): Manipur Deputy Chief Minister Yumnam Joykumar Singh in tuni’n Lamyanba Sanglen, Palace Compound, Imphal ah Zilla Parishads pali (4) te kiang in Integrated Rural Energy Programme,2016-17 nuai in High Efficiency L.E.D Reading Lamps piakdawna a nei hi. Zia scheme chu Devolution of Powers to Panchayati Raj Institutions (PRIs) nuai ah Manipur ah implement kibawl a hi. Deputy Chief Minister in a thugenna a chun, kingakna electricity ahiloleh hydrocarbons bep mat a hi ziak ah power lam ah taksapna um hin a gen a, power taksapna sukven a hitheina ding ah panlakna um zing a hidan a gen hi. Chuleh, State Government in mantawmcha chawk thei ding LED a um theina ding ah programme chuam chuam chiapi ding hin a gen a, Science & Technology pawimawna tawh kisai ah awareness programme pawimaw in le a gen hi. Deputy Chief Minister in a piakdaw L.E.D. Reading Lamps changkha ZillaParishads pani te chu - Imphal East, Imphal West, Bishnupur & Thoubal district te a hiu a, total ah lamps 4,916 (lamps 1,229 chiat) piak daw a hi.

MANIPUR SUPER 30 WRITTEN ENTRANCE EXAM RESULTS PUAN HITA
Imphal, July 17 (Nisin Thuhiltu): Centre for Social Responsibility and Leadership (CSRL),New Delhi in Indian Army, Red Shield Division leh Coal India Ltd tawh kithua ah Manipur a pat meritorious students 20 select bawl ding leh a thawn ah JEE 2018 exam ah a lawtin theina ding ua, a thawn ah coaching facility piak ding ah MANIPUR SUPER 30 written entrance exam a sai uh results puan in a um hi. Lawtinna nei candidate te ding ah 21 July 2017 wef 0800 am leh Leimakhong Military Garrison ah interview um ding a hia, candidate te’n interview hun ah documents - Admit card, Class 10th & 12th Passing certificate & Mark Sheet, Domicile/Nationality certificate, Caste certificate, Passport size photos – 4 a chawi uh ngai ding a hi. Chun, DM college (science) campus ah 21 July 2017 zingkal dak 6:30 leh interview ah chia te ding ah Bus um ding ti a hia, Tamenglong a pat candidate te 23 Assam Rifles camp ah 18 Jul 2017, zingkal lam dak 10 leh ki report thei ding uh ti le a hi. Thuchian kimzaw contact No. 09402022002, 09402750120, 09436421303 ahiloleh This email address is being protected from spambots. You need JavaScript enabled to view it. ah thuchian kan thei ding a hi. MANIPUR SUPER 30 written entrance exam, results dungzui ah lawtinna nei te chu - DMC-003 Worshang Khodang, DMC-004 Asha Veini Raomai, DMC-005 Sukar Salam, DMC-006 Hidam Boris, DMC-007 Kh Kaone, DMC-008 Nongmaithem Rajkumar Singh, DMC-011 D Eloziia, DMC-013 Mangsatambam Hemapati Chanu, DMC-014 Ailinda Yumnam, DMC-015 H. Pinky Ruth Chanu, DMC-019 Phundreimayum Abid, DMC-021 Thounaojam Filif Luwang, DMC-022 Langpoklakpam Amar Singh, DMC-023 Elve Foungyun, DMC-024 Amandeep Mishra, DMC-027 Thangjam Kelvin, DMC-032 Yumnam Nepolian Singh, DMC-033 L. HrangeneilenKom, DMC-034 Devekar Thokchom, DMC-035 Rajkumar Charlton Singh, DMC-038 Pithuili ID, DMC-041 Yumnam Thoiba Singh, DMC-042 Somleng Silsi Lamkang, DMC-045 Maibam Bidyasagar, DMC-046 Bishwas Nongthombam, DMC-047 Konsam Boboy Meitei, DMC-048 Akhoka Muivah, DMC-053 Mohammed Nawaz, DMC-054 Wahengbam Ranjit Singh, DMC-056 Nongthombam Deepu Singh, DMC-061 Rabichandra Lairenlakpam, DMC-063 Moirangthem Ramila Devi, DMC-065 Salam Malmngamba Meitei, DMC-066 Thangjam Satrajit Singh, DMC-067 Mangte Lienminthang, DMC-068 Lallinthuom Gangte, DMC-070 Lalminthang Vaiphei, DMC-074 Mathiusin Kamai, DMC-076 Mustafa, DMC-077 Saikhom Pravash Singh, DMC-078 Singgamyum Rabeeah Shaikh, DMC-079 Nongthombam Aswini Kumar Singh, DMC-081 Singamayum Anisur Rahman, DMC-082 Shagolsem Inaobi Singh, DMC-090 ingthoujamHemlet Meitei, DMC-093 Lamsari Vaiphei, DMC-099 Mathew Thiumai, DMC-101 Kumam Sanjoy Singh, DMC-102 Akham Debala Devi, DMC-106 Md Amir Khan, DMC-111 S Antony Bariamtak, DMC-113 MM Ibrahim, DMC-114 Rabuanlung Khaidem, DMC-115 Laishram Dayananda Singh, DMC-119 William Thiumai, DMC-120 Sapam Gourabacho Singh, DMC-127 Nongthombam Max Singh, DMC-128 Deny Moirangthem, KPI-004 KS Rophiipao, KPI-008 Catherine Hongsha, KPI-010 DaihriiSalew, KPI-011Daihri Lohra, TL-001 Meithuanbui Newmei, TL-002 Nganthoiba, TL-006 George, TL-007 Namgumei Kamei, TL-008 KaidaijuanangRianei leh TL-009 Peace Panmei te a hiu.

Page 1 of 8