Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

DC/CCpur in NERCORMP, Cane and Bamboo Training hawng

Lamka, Nov. 23 *(Nisin Thuhiltu)* : North Eastern Region Community Resource Management Project (NERCORMP) Churachandpur Office, Family Lane ah tuni sunma dak 10:30 in November 23 a pat December 8, 2017 sung, (ni 14 sung) um ding in Cane and Bamboo Training kiti hawndawna leh Pathian kiang a kawlsakna a um hi. Zia hun chu NERCORMP CCpur Office ah staff leh NaRM-G nuai ah beneficiary te’n a uap ua, Seikhongam Touthang, BDO NERCORMP in hun matna amapui hi. Buaina umlo ah training zawthian a hitheina ding in Pastor MT Khanlal, EBCC ZEnhang Lamka in Pathian khut ah Training kawlsakna a nei a, Thawngkhenmung Hanghal, AAO, NERCORMP CCpur in chial-chuam ah um te thilpiak piakna nei in, Khuala Vaiphei Project Manager, NERCORMP CCpur in vaidawnna, training nei ah a umna ziak leh NERCORMP tawh kisai genlatna a nei hi. Shyam Lal Poonia IAS, DC/CCpur & Chairman NERCORMP CCpur in ni 14 sung um ding, Cane and Bamboo Training leh training hun sung a vanmat ding te a hawnna a nei a, Jagadish Laishram PTO NERCORMP CCpur in kipakthu genna a nei hi. Training hawn a hi tawh kitawn in, Training a kipan ngal a, training hun sung ah Zogam Bamboo Works Proprietor V Ginkhanpau leh Samuel Hangsuanpau, Assistant, Zogam Bamboo Works ten resource person hina tawh ziltilna nei ding a hiu. Trainee in NaRM-G beneficiary mi 10 a pang ua, sunma ah theory class nei ding, sunnung leh practical class nei sek ding a hiu.

Khuala Vaiphei Project Manager, NERCORMP CCpur in a genna a chun, Northeast a ding ah North Eastern Council (NEC) etkawlna nuai ah kum 1999 ah NERCORMP patdaw ah um hin a gen a, Phase III na ding ah CCpur district ah July 2014 ah NERCORMP hawn ah um, project kum 6 sung ding lak ah kum 4 bang sung lam lawting tak ah panlakna umta a hidan taklang in, Phase III in Northeast sung ah Arunachal ah district 3 leh Manipur ah District nih, CCpur District leh Chandel District huapkha a hidan a gen hi.CCpur district sung ah Block 5- Henglep, Thanlon, Samulamlan, Sangaikot leh Tuibong um in a gen a, Block 5 nuai ah khua 364 leh Self-help Groups 917 um hin a gen hi. NERCORMP in a chiapi project te, livelihood project a hi dungzui ah, beneficiary ten a sum mu uh, kihinsuana mat a guat ding uh pawimaw a hidan gen in, Foot Security hawitak a nei ding uh NERCORMP thiltup thupipen in a gen hi.

Shyam Lal Poonia, IAS DC CCpur & Chairman, NERCORMP CCpur in a genna a chun, khutsiam thilbawl kiti, nek mutheina a hidan gen in, Distirct mipi-te’n mimal kitodel theina ding lampi ngaikhawk thak ding leh skill neitam theina ding ngai pawimaw ding a nawp thu a gen a, training hun sung a thilthak tamtak zildaw a theina ding ah lunglut tak leh kukal tak ah training ah panla chiat ding in training ah pang ding te chialna a bawl hi. Training hun sung khutthiam thil siamdaw (product) te training nitawpni ah district mipi te mu leh chawk thei ding ah suklat (exhibition show ) hiding in a gen a, district sung ah khat leh khat kipanpi tuana leh kisum dawltuana pawimaw a sakthu a gen hi.

Two Days Training on Hepatitis B & C bawl

Lamka, Nov. 23 *(Nisin Thuhiltu)* : SHALOM, Progressive People Organization (PPO) leh Lamka Research & Rehabilitation Centre (LRRC) ah Peer Educators (PE)-te a ding in tuni, November 23, 2017 sunma dak 11:00 in JJ Plaza, Rengkai Road ah Two Days Training on Hepatitis B & C kiti a um hi. Zia hun a chun, Paukhansang,District Mentor, FHI in Hepatitis tawh kisai genna nei in, natna umdan, kikaisawn theidan lampi um te, Power Point Presentation bawl in taklatna a nei a, Chinhauniang, Nursing Supervisor, Community Care Centre, SHALOM in sin (liver) tawh kisai genna nei in, Khamzamuan, Counsellor, MSF, Churachandpur in Management of HCV Infection tawh kisai genna a nei hi. Training ahileh 24 Nov. ah sutzawm hiding, zia hun a chu Esther, Program Manager, SHALOM TI, Nengkhojam, Advocacy Officer, SHALOM, Paukhansang, District Mentor, Project Sunrise leh Betty Lalumpui, Helpline Manager, SHALOM Project Sunrise te’n thupi chuamchuam mang ah ziltilna nei ding a hiu.

Hiatthei khat chu, Churachandpur District ah NGO chuamchuam in HIV/AIDS tawh kisai a enzui ua, SHALOM TI in Injecting Drug User (IDU) leh Female Injecting Drug User (FIDU) enkawl in, Progressive People Organization (PPO) in Female Injecting Drug User (FIDU) leh Female Sex Worker (FSW) te a enkawl a, Lamka Research & Rehabilitation Centre (LRRC) in Injecting Drug User (IDU) te a enkawl hi.

CCpur District Hospital ah Accessibility Audit bawl
Lamka, Nov. 23 *(Nisin Thuhiltu)* : Persons with Disabilities (PwD) te bailam tak ah Government building a lut leh pawt theina ding ua, Government building te siam ding ah lemsakna a um dungzui in, tuni, November 23, 2017 sunma dak 10:30 in Assessment Team khat in District Hospital, Churachandpur ah Accessibility Audit a bawl ui.Zia hun a chun, Assessment Team in Hospital Gate ah kipat in, gate letdan leh gate a pat hospital gamlat dan ti te et-thakna a nei ua, zia a pat chu Operation Theatre kiang ah Ramp etthakna a nei ui. Ramp etthakna a nei hun um, Ratio kipia tawh kituaklo in, keen talua leh Wheelchair taina ding ah lemchanglo in a gen ui. Zia nung a chun, Hospital Block chuamchuam a varandah/corridor leh step te et-thakna a nei ua, varandah ah khuamulo te’n a phutkhak thei ding uh, step a val deu ah kisiam (cap) umte guideline kipia tawh kituaklo in a gen ui. Kawt khak te le dawi gual tungzo lo in a gen ua, bang (wall) ah rong kinu te leh toilet te chu Disabled Friendly hilo hi’n gen ui. Disabled Friendly toilet khat OPD Ticket Counter tawh kinai ah a um ding pawimaw in proposal a bawl ua, Hospital Block zosia Ramp kawi ding a le proposal bawl in, Ramp tawh kinai, meter 30 tiang ah PwD te a ding ah Parking Lot chuam umsak ding in le lemsakna a nei ui. Rights for Persons with Disabilities Act 2016 mat a hi pat government leh public building himhim Persons with Disabilities te a ding ah daltu umlo ah government building te umsak ding ti a hia, DC, Churachandpur in a ngaikhawk ziak ah District Hospital Accessibility Audit nei ah um a hi. Centre for Community Initiative (CCI) official te leh Hospital enkawltu Nengvanglian, Architect, Paulungmuan, AE, PHED te’n Accessibility Audit hun ah Official Team mudaw leh proposal bangkim chu DC khut ah pelut ding a hiu a, a kisaipi Government Department in a etzui ding a hi.

Khuga Battalion in lampi siam

Lamka, Nov. 23 *(Nisin Thuhiltu)* : 6 Sikh Light (Khuga Battalion) in tuni'n Khuga Dam zawtna lampi (Mohan junction leh Khuga dam) hawilo tak ah um zing chu civil JCB hire in repairing a bawl hi. Lampi hawilo tak ah um, mipi te kikawmtua lumletna ding ah lemchanlona a um zing ziak ah6 Sikh Light (Khuga Battalion) in mipi khualna zia lampi chu a siam hawithak uh hin a kigen hi.

ADC 6 te a ding fund sanctioned ah a umna chung ah Ex-Chairman in kipakthu puuang
Lamka, Nov. 23 *(Nisin Thuhiltu)* : Manipur ah Autonomous District Council (ADC) te tu Financial Year 2017-2018 a ding in RS 143,77,00000 (One Hundred Forty Three Crore & Seventy Seven Lakh) November 8, 2017 in, Release Order (F.13 (34)FFC/FCD/2017-18) Government of India, Ministry of Finance Department of Expenditure(Finance Commission Division) New Delhi in a sua a, zia chu tu ah Manipur Government Finance Account nuai ah hapta khat sung vel a umta ti a hi. Zia gual ah Fund a pian theina ding a chu, Propose Budget 500 Crore val Panchayati Raj Institution (PRI), Niti Aayog & Ministry of Finance, Department of Expenditure ah ADC Chairman 6 te leh Coordination Committee in kum 2 sung lam a del uh hin le a kigen a, Manipur ADC in 14 Finance Commission a kipat a pat Financial Year 2 (2015-2016), (2016-2017) te enjoy khalo ah a um nung ua, tu Financial Year ( 2017-2018) ah duthusam zat hilo maleh fund zia zat chu sanctioned ah um thei a hina chung ah MDC te leh Hill mipi te’n khantona a nei ding ginchhat a hi.

Manipur ah Autonomous District Council (ADC) 6 te a ding fund a crore a sim sanctioned ah a umna chung in, Langkhanpau Guite Ex-Chairman CCPur in Team Leader khat ah a la pang sek a hina chung in a bik tak ah panla chungchuang diak- Thangzalun Khuptong, Dr Yaransho Ex-Chairman Ukhrul,Genneihkhup, Liangpibou, Manipur Govt. lam a pat NOC pia, Nabakishore(The then Chief Secy) te chung in kipakthu a puang hi.

Comedian Hunt 2017 kipan ding

Lamka, Nov. 23 *(Nisin Thuhiltu)* : Lamka Core saina’ tuni, November 24, 2017 nitak dak 5:00 leh ni 10 sung um ding Comedian Hunt 2017 Chapter-1 (Audition Round) kiti chu YPA GHQ Hall, Hiangtam Lamka ah kipan ding a hi. Lamka Core saina in zingchiang, November 24, 2017 nitak dak 5:30 apan YPA GHQ Hall, Hiangtam Lamka ah Comedian Hunt-2017 kichi kipan ding hi. Zia hun a chu, T. Lawmpi, Chairman, Lamka CORE in Comedian Hunt tawh kisai taklatna nei ding, Thangkhosuanmung Guite, MDC leh Chief of Hiangtam Lamka in Comedian Hunt hawndawna nei ding, Muana Guite, Nacheez, Piangperman, Kapish leh Fair Talent Hunt Star_Zirsanglian leh Siamson te’n stage lua ding a hiu. Zia kidemna a chu 1st Prize Rs. 20,000, Trophy leh Citation; 2nd Prize Rs. 10,000, Trophy leh Citation banah top 5 tiang in Consolation Prize sâng ding a hiu.

Manipur Oil transporterten kiphinna nei

Imphal, Nov 23 *(Nisin Thuhiltu)* : Indian Oil Corp (IOC) in tender notification a suana chung ah All Manipur Petroleum Products Transporters' Association in a lung awi-lo thu taklang in, kiphinna a pan a, petrol leh diesel filling station thautui a bei khak ding lauthawnna tawh tulai in oil pum ah thautui thun mi a tam thei mama hi. Secretary of All Manipur Petroleum Product Transportors’ Association, A Tamphayaima in thuthak lakhawm mite kiang ah a genna a chun, IOC tender process dawilo ziak ah kiphinna nei a hidan uh taklang in, association in Manipur government kiang ah ningkum a khah memorandum pia a hidan uh a gen a, state government in IOC tender process a etzui ding leh a siam thak ding phutna a nei uh himaleh tuni tiang ah panlakna bangma a umlo ziak ah kiphinna nei uh hin a gen hi. Chuleh a demand uh a mu masang siau ah kiphinna nei ding uh hin le a gen hi.

MAHUD Minister in Ima Market dinmun entha

Imphal, Nov 23 *(Nisin Thuhiltu)* : Municipal Administration, Housing and Urban Development (MAHUD) & Town Planning Minister Thounaojam Shyamkumar in tuni’n Ima Market dinmun etthakna a nei a, zia hun a chun, MAHUD Minister in Ima Market basement ah van kawi leh electric mat khautak ah etzui hiding a hidan taklang kawm in Imphal Municipal Corporation chu thupiak kituptak ah zui ding in a hiatsak hi. Ima Market No. 1 (Ima Leimaren Sidabi) basement ah tuni nitaklam dak 3:30 ah electric short circuit ziak ah meikang a um nung ah MAHUD Minister in ziagual thupiak chu a nei a hi. Zia hun a chun, MAHUD department in Ima Market buildings chu numei van zuak te khut ah February 22 leh renovation/repairing work bangkim zawthian a hitak leh pedawk ding hin le MAHUD Minister Th. Shyamkumar in a gen a, van zuak te chu thiantho chiapi zing ding in chialna a bawl hi.

Sushila Chanu in Chief Minister kimupi

Imphal, Nov 23 *(Nisin Thuhiltu)* : P. Indian National Hockey team lui Sushila Chanu in tuni’n Chief Minister N. Biren Singh kimupi in Chief Minister N. Biren Singh chu state sung ah Hockey Academy hawng ding leh khangthak Hockey player te promote bawl ding in chialna a bawl hi. Chief Minister in government in enzui ding leh Ministry/Departments tawh kithu hiat ah panla ding hin a gen a, government in Football Academy hawn ding ah guanggalna nei in a gen hi.

NSCN-in tax collection tawh kisai ah thupiak bawl
Imphal, Nov 23 *(Nisin Thuhiltu)* : NSCN-K in Dy. Kilonser, Hripunii chu tax dawlna tawh kisai ah Revenue Ministry jurisdiction huapsung hilo ah ama mawpuakna lo ah kigawl leh panla lo ding in hiatsakna a bawl hi. NSCN-K press note in a taklatna a chun, Hripunii, Dy. Kilonser in ama thuneina khel ah Southern Chapter (Manipur) ah revenue Ministry panlakna chawkbuai in a taklang a, tax petu te vaulau leh sukgen thei ah um in a gen hi. Chun, tax petu te chu Kilonser Starson mapui Revenue Ministry kithuapi ding in chialna a bawl a, Kilonser Starson kiang ah tax pelo midang kiang ah tax kipia chu null &void hiding in le a taklang hi.

Tripura ah Journalist kithatEGM, MHJU in nasatak ah demna bawl
Imphal, Nov 23 *(Nisin Thuhiltu)* : Editor Guild Manipur leh Manipur Hill Journalist Union (MHJU) in Tripura ah local TV journalist Datta Bhowmik kaplup ah a um chu nasatak in demna a bawl hi. Manipur Hill Journalist Union (MHJU) in thusua a bawlna a chun, Bodhjung Nagar, Tripura ah Tripura State Rifles (TSR) trooper khat in “Syandan Patrika” leh local television channel “Venguard” senior reporter Sudip Datta Bhowmik a kaplup chu nasatak ah demna bawl in, Tripura Government in Journalist Bhowmik a ding ah justice a um theina ding ah panlakna a nei ding pawimaw in a taklang hi. Editor Guild Manipur in le demna bawl in, Tripura ah jourlist tha ah a um sekna chung ah State government leh Central government in journalists te bitna ding ah panlakna a nei ding phutna a bawl hi.

Mandalay women football team te Imphal tung uh
Imphal, Nov 23 *(Nisin Thuhiltu)* : Sangai Tourism Festival ah November 25 & November 26 ah exhibition match nei ding Mandalay a pat numei Football team khat tuni’n Imphal a tung ui. Exhibition match ahileh Mandalay leh India numei football team in Sangai Festival matna kawm ah – ‘Connecting through Sports’ ti thupi nei ah gam 2 te kal a hawi zawk sem ding dawina ziak ah a nei ding uh a hi.

Moreh ah armed dealer 2 mat ah um

Imphal, Nov 23 *(Nisin Thuhiltu)* : 11Assam Rifles leh Moreh Police combined security force te’n Moreh, Indo-Myanmar Border in galvan ah sumkawl vei mi 2 a man dawk ui. Mat ah um te a pat a chun, 5.56 HK rifle leh magazine a mu dawk ua, mat ah um te chu Liansuan Mung Ngaihte, s/o Girenthang Ngaihte (22) of Tualkhiang, Chikha, Distt Chikha, Chin State, Myanmar leh Jamkheng Mung Ngaihte, s/o Dong Khanpao (25) of Bungmual, P/S Churachandpur, Dist. Churachandpur, Manipur te hi ua hiat a hi. Chun, Moreh police custody ah kawi in a um ui.

PLA cadre 3 kiman
Imphal, Nov. 23 *(Nisin Thuhiltu)* : RPF/PLA active member um hi ah thuguk a mu uh tawh kitawn ah Inspector B. Lunthang Vaiphei mapui CDO/ Imphal East team khat in Kakwa Naorem Leikai leh a kiang tuam operation a bawlna ah Naorem Loken Sing @ RK (40) s/o N.Baruni Singh of Kakwa Naorem Leikai, Imphal West; Sanasam Anil Singh @ Tomjou @ Johnson (50) s/o S. Suman Singh of Thongju Part - II, Imphal East leh Phamdom Ibomcha Singh (40) s/o (L) Ph. Gulab Singh of Thongju Part - II te a mandawk ua, amau kipuanna a pat RPF/ PLA active member leh non-Manipuri te tupna’ IED kam ah kigawl kha a hi banua non-Manipuri te kithana leh dan diklo tak ah mipi kiang ah sum dawlna te ah kigawl uh a hi dan uh hiatdaw a hi. Mi 3 te chu 9mm pistol khat, mobile phone 3 leh sim card hunkhawp tawh matkhawm a hiu a, maban ah thudawt ding ti in Singjamei Police khut ah piakdaw in a um u’i.

PMAY-G NUAI AH 1ST INSTALLMENT KIPIAK DAN KHENKHAT DIKLO
Editorial -Nisin Thuhiltu ( 24 Nov. issue)

PMAY-G nuai ah 1st installment kipiak dan khenkhat diklo
Central Government in ‘Housing for All’ by2022 ti thupi nei ah khawsak haksa, inn leh lo kituptak nei zo lo, migenthei te panpina ding ah Pradhan Mantri Awas Yojana - Gramin (PMAY-G) kiti scheme thak pan dawk ah, inn leh lo neilo te chenna inn ding sak piak ding ah panlakna a neina chung in Churachandpur District a le a phatchuampi (beneficiary) ding, khua leh veng chuam chuam ah mi bang zat a hem te select bawl in a um ua, himaleh scheme guideline tawh kituaklo ah panlakna um a hidan muthei in a um hi.

M. Kapajit Singh, Under Secretary (RD&PR), Government of Manipur in Village Authorities/Gram Panchayats/General Public hiat ding ah Public Notice (No.6/19/2017-RD (MC) PMAY-G) ah a la sua dungzui in Pradhan Mantri Awas Yojana - Gramin (PMAY-G) beneficiary khat in inn sakna ding ah Rs. 1.30 lakhs tiang mu ding a hidan taklang in, zialo a chu toilet sakna ding ah MGNREGS nuai Rs. 12,000/- mu ding a hidan uh a la taklang a, beneficiary khat in total ah Rs 1.30 lakhs + Rs. 0.12 lakhs + Rs. 0.19380 lakhs= Rs. 1.61380 lakhs a mu ding hin a taklang hi. Chun, inn sak patna ding ah 1st installment Rs 48,000/-, 2nd installment Rs 42,000/-, 3rd installment Rs 40,000/- Total Rs 1,30,000/- piak hiding ti a hi. Second leh Third instalment ahileh official te’n inn kisa dinmun et-thakna a nei ding uh, verification bangkim a zaw tak uleh sanction hiding ti a hi.

Block Development Officers (BDO) te chu PMAY-G scheme tawh kisai ah Pradhans leh Village te awareness, sensitization meeting neipi ding ah thupiak a hiu a, electronic media leh local newspapers mang ah PMAY-G scheme chia dingdan mipi te a hiatthiam sak ding uh ti le a hi.

Himaleh, PMAY-G scheme tawh kisai ah beneficiary te leh mipi te hiatthiam sakna kituptak umlo in Direct Benefit Transfer (DBT) mode ah beneficiary te bank account ah 1st installment thun piak in a um ua, guideline dungzui ah beneficiary te’n 1st installment Rs 48,000/- a mu ding uh ti himaleh khenkhat 1st installment ah Rs 30,000/- piak in a um ui. Ahileh Rs 15,000/- chu khawi lam ah kihei mang a hita diam? Beneficiary te lah 1st installment Rs 48,000/- hizawlo ah Rs 30,000/- thun piak ah a umna ziak uh hilchian leh genchian piak a hi kit pua ngal ua. Beneficiary te ngawl bawlna a hi zel mai diam?

Zia gual ah migenthei te panpina ding ah fund hung te duchakna leh etlana hi a kuakua’n ihaisan chiat ding uh a hun talua ta a hi. Chuleh, BDO te leh a kisaipi thuneitu te’n guideline tawh kituaklo ah scheme implement kibawl te hi a etzui ua, diklo tak ah nasem official te leh a kisaikhakpi te chung ah action a lak ding uh a pawimaw hi.

User Rating: 0 / 5

Star InactiveStar InactiveStar InactiveStar InactiveStar Inactive

NorthEast Development Summit 2017 hawnna nei;
India’s Act East Policy driver diktak NorthEast region ah state te a hi: President

Imphal, Nov. 21 *(Nisin Thuhiltu)* :Ni 2 sung Manipur ah hun mang ding, India President Ram Nath Kovind chu Assam Chief Minister Sarbananda Sonowal tawh Indian Air Force lenna ah chuang in tuni, 21 Nov. 2017 zingkallam dak 11:30 in Imphal a tung a, Bir Tikendrajit International Airport, Imphal a tun in Manipur Governor Dr. Nazma Heptulla,Chief Minister N. Biren Singh, DGP L.M. Khaute, IGAR South Major General Virender Singh, Deputy GOC 57 Mountain Division Brigadier SK Chouhan, Chief Secretary RR Rashmi, Imphal West. DC, Ningthoujam Geoffrey, Deputy Chief Minister Y. Joykumar Singh, Work Minister Thongam Biswajit Singh, Health Minister L. Jayentakumar Singh, CAF and PD Minister Karam Shyam, IFCD Minister Letpao Haokip, Tribal and Hill Areas Minister N. Kayisii, Forest and Environment Minister Thounaojam Shyamkumar, Social Welfare Minister Smt. Nemcha Kipgen, PHED Minister Losii Dikho, Agriculture Minister V. Hangkhalian leh Education Minister Th. Radheshyam, Rajya Sabha MP Ksh. Bhabananda Singh, Additional Chief Secretary (Home) J. Suresh Babu, Secretary to CM Ashok Kumar, CO of 6th Sikh Light Infantry Col. Mukesh Verma te’n vaidawnna a nei ui. Major Anjum Gorka command bawlna nuai in 6th Sikh Light Infantry in President chu Guard of Honour piakna a nei ua, President in Guard of Honour salute lakna a neizaw in Raj Bhavan a zuan hi. Nitaklam in City Convention Hall, Imphal ah ni 2 sung um ding NorthEast Development Summit 2017 hawnna a nei a,Chief Guest hina tawh thugenna a nei hi.

President Ram Nath Kovind in a thugenna a chun, NorthEast region ah state te chu India’s Act East Policy hektu (driver) diktak a hidan uh taklang kawm in, Northeast India a khanto a, mi tamtak te ding kingakna munpi a um thei leh India ding ah khantona diktak hiding in a gen hi. Summit chu NorthEast India khantona ding, domestic thil mai hizawlo ah gam kinaipi te tiang khantona ding huap ah chiapi ding a nawp thu taklang in, NorthEastern region in socio-cultural ecosystem hawitak nei in a gen hi.

NorthEast chu khawvel ah indigenous community luipen (oldest) te um a hidan gen in, Government of India NorthEast region khantona ding leh masawn theina ding ah panlakna a nei chu masawn zing ah mu a hidan a gen hi. NorthEast ah khantona taktak a um theina ding ah Railwaytun theina ding ah Rs. 90,000 crores tawh panlakna um zing in le a gen a, NorthEast region ah kikawmtuana a hawi zawk sem theina ding ah National Highways & Infrastructure Development Corporation Limited (NHIDCL) in panlakna nasatak ah nei zing hin a gen hi.

NorthEast chu Bangladesh, Bhutan, India leh Nepal (BBIN) tawh trade leh connectivity projects chuamchuam chiapina ah corridor pawimaw tak hin le a gen a, Northeast Tourism Development Council in partnerships ah NorthEast region chu tourist munpi khat a hisak ding pawimaw in a gen hi.

Governor of Manipur, Dr. Najma Heptulla in a thugenna a chun, Summit chu NE Region ah economic potential suklatna hiding leh gam chuam chuam ah Govt agency, Embassy te tawh panlak khawm theina ding ah lemchang siampiaktu a pan ding a nawp thu gen in, ama thil ngaikhawk mama khat chu, Manipur tanggam ah damlo haksat tuak te kithuapi leh etkawl theina ding ah Flying Doctors or Flying Dispensary umsak ding a hidan a gen hi. State government in khangthak sepna neilo te haksatna sukven theina ding ah Skill Development approved bawl ah, khangthak te lam chuam chuam - tourism, hospitality, sports, textiles, pottery, cane & bamboo crafts, tribal arts & crafts ah ziltilna tunung sawtlo ah chiapi ding hin a gen hi.

Minister of State for Civil Aviation Jayant Sinha in a genna a chun, January 2018 a pat Imphal - Delhi direct flight services umta ding hin a puang a, NorthEast region ah air connectivity siam hawi ding pawimaw a hidan gen in, Sikkim ah Pakyong Airport kisiam zing chu hawn hipaita ding leh Moreh, Manipur panna’ NorthEast region ah Airports 19 leh helipads 7 tunung sawtlo ah siamdawbe hiding in a gen hi.

Union Minister for Commerce and Industries, Suresh Prabhu in Northeast region chu gamsung ah khantona lam ah masawn hat mama in a gen a, tunung sawtlo ah Industrial Policy thak chiapi hiding ah puang in,NorthEast region ah E5 (Environment, Economy, Employment, Entrepreneurship leh Enduring) ngaikhawk thak ah um a hidan a gen hi. Summit inaugural function a chun, Manipur Chief Minister N. Biren Singh, Assam Chief Minister Sarbananda Sonawal, Nagaland Chief Minister T.R Zeliang, Arunachal Pradesh Chief Minister Pema Khandu te’n le thugenna a nei ua, First Lady of India Savita Kovind, Minister for Civil Aviation and Tourism of Bangladesh Rashed Khan Menon, Union Minister of State for Tourism K.J. Alphons, Vice-Chairman NITI Aayog, Dr. Rajiv Kumar, Managing Director of Patanjali Ayurved Acharya Balkrishna, United Nations Resident Co-ordinator Yuri Afanasiev, Cabinet Ministers of Manipur leh gam chuam chuam a pat delegate te’n le a uap ui.

MGNREGS-Bank Account Linkage Special Camp bawl

Lamka, Nov. 21 *(Nisin Thuhiltu)* : Lamka TD Block huapsung ah Job Card Holder bank account nei nailo te a ding in MGNREGS-Bank Account Linkage Special Camp for Bank Account Opening Lamka TD Block kiti tuni November 21 ah pat in a um hi. Zia Special Camp chu SDO CCpur Office, Chiengkawnpang ah November 21 a pat November 30 sung um ding a hia, zia hun sung a chu, Job Card Holder bank account nei nailo te’n zero balance ah bank account hawng thei ding a hiu. Bank account hawnna document pawimaw ding te ahileh - Job Card holder te Voter ID, Residential Certificate, Aadhaar Card, ID Proof leh Passport 4 ngai ding a hi. Camp nei hun sung ah SBI Pearsonmun leh Vijaya Bank Churachandpur official te’n, amau bank ah account hawn piak ding a hiu a, November 21 leh 22 ah Mata, Tangmual, Bisanmual leh Tualnuam te a ding ah camp bawl hiding, November 23 leh 24 ah Immanuel khawpi, Suangsibok leh Tangnuam; Novemeber 27 ah T. Mimjang, M Khomunnom leh Lanva; November 28 ah Khominthang, Hmuia veng, Thengra Leirak leh Simveng; November 29 ah Lalzomlien Veng leh Chiengkonpang; November 30 leh Elite Veng leh Hiangtam Lamka; December 1 leh Hiangzou, Hiangtam Lamka, Zoumunnuam leh Neihsial Veng; December 1st a pat 5th sung ah Lamzang khua ah Geljang leh Lamzang te a ding ah camp bawl hiding, December 6 leh 7 ah Ngoiphai khua ah Ngoiphai, Zoumun leh Zoutuinuam te ding ah camp bawl hiding, December 8 ah Mata Mualtam ah Buallian, V. Bethel leh Mata Mualtam te ding ah Camp bawl hiding a hi.

NT 22nov2017a

Santing-L khua ah Rural Market Shed hawnna um ding
Lamka, Nov. 21 *(Nisin Thuhiltu)* : Santing-L khua ah November 24 leh Rural Market Shed hawndawna leh a latna um ding a hi. Zia hun chu S Thienlaljoy Gangte, MCS, Assistant Commission to DC & Chairman Santing-L Rural Market Shed SRMS, Thangchinkhup AGM/DDM NABARD, CCpur, H Timmy Gangte Chief Manager,SBI CCpur leh Nemzating@ Tingnu, Chief of Santing-L ten uap ding a hiu a, S Thienlaljoy Gangte, MCS, Assistant Commission to DC & Chairman SRMS in Rural Market Shed hawndawna nei ding leh Pastor Khailalsiem Gangte, Bial Secreary, Saichang Bial ESC in Pathian kiang ah lan ding a hi. Santing-L khua ah Rural Market Shed ahileh NABARD funding bawlna nuai ah kisa, Toilet, Dringking Water Tanky leh Solar street le kawi a hi.

Vocal Quest Solo kidemna kipan

Lamka, Nov. 21 *(Nisin Thuhiltu)* : For One Life Asia saina’n, November 20, 2017 nitak dak 5:00 a khan kum 16 a pat a chung lam te English laa sak, Vocal Quest Solo kidemna Life Café, Rengkai Road in a kipan hi. Zia hun a chun, mi 20 lak ah Audition Top 12 te chu next Round ah pangzawm thei ding ah teldaw in a um ua, James Pakhuongte, S. Pauginmuan leh Ramdinthari te endiktu in a pang ui. Top 12 te ahiuleh; Rohnem Pangamte of Rengkai, Noami Vungbiakmuan of Muolvaiphei, Lhingjemhoi of Hmar Veng, Zoarthang Hrangchal of Saidan, Lethaolen Misao of Kawnpui, Isaac L Inbuon of Saidan, Marisa Vanrammawii of Ngathal, Chanchinmawi Zote of Rengkai, Lalmakthanga Sailo of Kawnpui, James Hmar of Tuiring, Grace Ramhlukim of Saidan leh Ciinsanpaal of New Lamka te a hiu a, next round ah November 28, 2017 nitak dak 6:00 leh LJ Memorial Hall, JJ Plaza ah Live Performance nei ding a hiu.

Khuga Battalion in a thawn ah Online Registration bawl piak
Lamka, Nov. 21 *(Nisin Thuhiltu)* : Khuga Dam ah um, Khuga Battalion nuai ah Career Counseling Cell in India Army post chuamchuam kilakna ding in, a thawn in Online Registration a bawl hi. India Army nuai a post chuamchuam kila ding te ahileh Officer in Indian Army, Combined Defence Services CDS ah Indian Military Academy nuai ah zi nei nailo Degree zo kum 19 a pat 24 kikal-te a ding a hia, Indian Naval Academy nuai ah zi nei nailo Degree zo kum 19 a pat 22 kikal hi ngai ding, Air Force Academy nuai ah zi nei nailo Degree zo kum 19 a pat 23 kikal leh Officers training academy nuai ah zi nei nailo Degree zo numei/pawsal kum 19 a pat 25 kikal mite a hiding uh a hi. Thiamna leh titna nei te’n Khuga Battalion ah November 8 a pat December 4 2017 sung a thawn in online registration bawl sak thei ding a hi. Post dang ah Staff Selection Commission SSC nuai ah Combined higher secondary Class 12 level ah post chuamchuam Data Entry Operator DEO, Lower Division Clerk LDC leh Junior Secretariat Assistant JSA-te hiding, zia ding a chu Class 12 passed, kum 18 a pat kum 27 kikal hi ngai ding, ST-te a ding in kum 5 relaxation um ding, lunglutna nei ten Khuga Battalion kithuapina November 18 a pat December 18, 2017 sung ah muthei hiding a hi.

Cardon leh Search Operation bawl

Lamka, Nov. 21 *(Nisin Thuhiltu)* : Churachandpur Police in tuni, November 21, 2017 zingkal dak 5:00 -7:00 kikal in Zou Veng Area huapsung ah um, Khuga Tampak in Cardon leh Search Operation a bawl a, zia hun a chun mi 240 te etchetna a nei ui. Operation ahileh Lunkhomang Khongsai, Additional SP (Law & Order), Churachandpur supervise bawlna nuai in Johnny Sharma, SDPO Churachandpur, Nasir Ahmed, OC Churachandpur leh Chiinneilam, OC Women Police Station te’n amapui ua, Quick Response Team leh Reserve Line a pat Team 6 in Cardon leh Search Operation a chiapi ui. Chun, numei 30 leh UPPK leh KCP panglui khat panna mi 240 te hina etchetna a nei ui.

NT 22nov2017b

Kumtawp Vaihawmna leh Khawmpi mang ding
Lamka, Nov. 21 *(Nisin Thuhiltu)* : New Testament Baptist Churches Association (NTBCA) nuai ah Numei Pawlpi in NTBC Suangpeehmun, Thanlon Sub Division ah November 24 - 26 sung ah 52nd Kumtawp Vaihawmna leh Khawmpi mang ding a hi. November 24 leh Pastor LV Thanga in 52nd Kumtawp Vaihawmna leh Khawmpi hawnna nei ding a hia, khawmpi kipatni chu vaihawmna mang ding a hiu. Chun, Khawmpi sung ah Rev. Dr. HC Stephen, Executive Secretary NTBCA leh Rev.S.Kaikhanmang, Director of Missions NTBCA te Speaker ah pang ding a hiu a, T. Danial, Academic Dean, ABBC & S in Seminar hun mapui ding a hi.

SDO/Henglep in PMAY-G leh MGNREGA beneficiary te meeting neipi

Lamka, Nov. 21 *(Nisin Thuhiltu)* : Chunglenmang, MCS, Sub-Divisional Officer (SDO), Henglep in tuni, November 21, 2017 sun dak 12:00 in ama office mun ah Henglep TD Block huapsung ah khua-hausa /Village Authority, Prime Minister Awaj Yojana-Gramin (PMAY-G) beneficiary leh Mahatma Gandhi National Rural Employment Guarantee Act (MGNREGA) nuai ah Job Card holder te meeting a neipi hi. Zia hun a chun, Ministry of Rural Development, Government of India nuai ah PMAY-G Scheme beneficiary te’n first installment sum a mu’u mat ding dan tawh kisai, second installment, third installement um ding leh inn sakna ding tawh kisai ah guideline um te genlatna a nei a, Geotagging (GPS) mat a hi ziak ah lim kilakna mun chet chet ah inn sak ding pawimaw a hidan te a gen hi. MGNREGA tawh kisai ah Direct Benefit Transfer (DBT) system ah Bank Account ah Job Card sum piak hita ding a hidan taklatna nei in, Card holder te’n Bank Account a nei ding uh a pawimaw dan taklang in, Henglep TD Block a ding ah ICICI Bank tawh partnership bawl ah um, ICICI Bank mat tam ding a nawp thu gen in, Village Authority in Muster Roll a hun tak ah a piaklut ding pawimaw a hidan te a gen hi. MANIREDA a pat Aadhar leh Bank Account link dan ding tawh kisai taklatna a um hi.

RSETI-SBI nuai ah Tailoring training chiatha zing
Lamka, Nov. 21 *(Nisin Thuhiltu)* : RSETI-SBI,temporary Office, Bijang ah tulai in puankhui kizilna Tailoring training a chiatha zing a, tuni November 21 a pat Miss Engmawi of Bethel in ziltilna nei in, November 21 a pat December 21, 2017 ni 30 sung practical ah puan aat-dan leh khuidan zil ding a hiu.
. SBI-RSETI in ahileh district sung a Khosakna haksa adiak a BPL sungkuan tuailai kum 18 a pat kum 45 mite adia sum seng ngailou a, athawn a nekmuhna ding in, course chuamchuam ziltheihna pankhia in, tuni tan in course zousiang tamtak in nekmuhna in zang uhi.

India President Ramnath Kovind in Manipur Sangai Festival – 2017 hawng

Imphal, Nov. 21 *(Nisin Thuhiltu)* : India President Ramnath Kovind in tuni’n Hapta Kangjeibung, Imphal ah Manipur Sangai Festival - 2017 hawnna a nei a, zia hun chu First Lady Savita Kovind, Governor Najma Heptulla, Union Minister of State for Tourism (Independent Charge), K. Alphons, Chief Minister of A runachal Pradesh, Pema Khandu and Chief Minister of Nagaland, T.R. Zeliang, Chief Minister N. Biren te’n le a uap ui. Bhagyachandra Open Air Theatre ah opening ceremony hun ah President in Sangai Festival chu Manipur ah cultural diversity suklatna diktak hin a gen a, mi khat in khawvel ah gam hawina chuamchuam en thei maleh Loktak Lake chu chuam bik hin a gen a, government in tourist te munpi sua ding ah guanggalna nei hin a gen hi. Bir Tikendrajit leh a nungzui te’n World War-II a la satna chung ua Manipur chu khawvel ah mitamtak te’n etthak ding lunggul chuam a hidan uh a gen hi. Governor Najma Heptulla in a thugenna a chun, Manipur chu hun dang ah a hawina leh human resources thupidan sang ah dan leh thupiak (law and order) hawilo ah kihiazaw a hidan taklang in, tu ah government in hun tiang ah Manipur hawina sulang thei hin a gen hi. Union Minister of State for Tourism (Independent Charge), K. Alphons in a thugenna a chun, Manipur hawina um te taklang in, NDA Government in Manipur government a muan ngamna chung ah tourism sector siamhawi thakna ding ah Rs. 169 crore sanctioned bawl in a gen a, Union Tourism Ministry in Loktak area ah cable car projects chiapina ding ah panlakna nei ding hin a gen hi.

NT 22nov2017c

Sajik Tampak Area ah kikaptuana kiangnai ah AR ten thi-luang khat mu
Imphal, Nov. 21 *(Nisin Thuhiltu)* : Sajik Tampak Area ah 15 Nov. 2017 ni ah 4 Assam Rifles te phaizang thingnuaimi Revolutionary People's Front (RPF) pawl in attack a bawlna chung ua, 4 Assam Rifles te’n search operations a nei zing ua, ni 7 sung lam search operation a chiapi tak nung un, 15 Nov. 2017 ni ah attack ah a umna mun ua a pat 2 kms (approximately) ah gamla’n ‘Lulun’ kiti KYKL cadre khat a thisa’n a mudawk ui. Thiluang mudaw ah um chu a hina hiatchian chet hilo maleh 15 Nov. 2017 ni ah kikaptuana kapliam ah um, a liamna thuakzo lo ah thina tuak, nutsia ah um hiding in a kigen a, a taksa chung ah bag, nek leh chak ding, damdawi ti te mudaw ah um hin PRO /IGAR (South) thusuak in a gen a, search operation chiapi hizing in le a taklang hi.

CM in Trade & Expo Centre hawng

Imphal, Nov. 21 *(Nisin Thuhiltu)* : Chief Minister N. Biren Singh in Lamboi Khongnangkhong, Imphal ah tuni’n Department of Textiles, Commerce and Industries, Government of Manipur saina nuai in Manipur Trade and Expo Centre hawnna a nei hi. Zia hun chu Member of Parliament, Rajya Sabha Ksh. Bhabananda Singh, Chairman of MANIDCO Dr. Y. Radheshyam, Chairman of Manipur Pollution Control Board L. Radhakishore Singh, MLA Keirao AC L. Rameshwor Meetei, Chief Secretary R.R. Rashmi, Additional Chief Secretary Dr. Suhel Akhtar te’n le a uap ui. Minister for Commerce and Industries, RD & PR, Power and IPR Th. Biswajit Singh in a thugenna a chun, NorthEast Development Summit zintun thei ding leh Trade and Expo Centre hawng thei ding ah hun chawmcha sung ah state a um chu kipak mama a hidan gen in, state government thak ding ah achievement thupi tak hin a gen hi. Prime Minister Narendra Modi in Act East Policy chiapi ding ah idea a puakdaw chu gamsung khantona ding ah thil hawitak a hidan taklang kawm in, Development Summit chu Business Delegates, Investors, Entrepreneurs te kal ah ngaidan leh dawidan kigentua mat hiding in a gen hi. Manipur Governor Dr. Najma Heptulla supervise bawlna nuai ah government in mission thak “Mission on Economic empowerment on Traditional Artisans and Craftsman” kiti hawnna a la neita a hidan le taklang in, zia mission chu livelihood leh traditional artisans / craftsman te promote bawlna ding hin a gen hi.

Manipur Congress MLA 16 te Security Cover lakkhen piak ah um

Imphal, Nov. 21 *(Nisin Thuhiltu)* : Manipur ah Congress MLA 16 vengtu security personnel 15 um te lak ah personnel 7 chiat Sepatni a khan lakkhen piak in a um a, India President Ram Nath Kovind in Manipur ah ni 2 sung hun amat sung ah overall security arrangement bawlna mat ding ah lakdaw ah um hi’n L.M. Khaute, Director General of Police in a gen hi. A langkhatlam ah State Congress President T.N. Haokip in ruling party legislators te security sukhalo ah Congress legislator te security personnel lakkhen piak ah um chu ki chuamkhenna hin a gen hi. Hiatthei khat chu, Manipur ah MLA, MP leh elected member dang dang te armed guards piak ah um a hiu.

CorCom General Strike in hindan ngaina subuai
Imphal, Nov. 21 *(Nisin Thuhiltu)* : India President Ram Nath Kovind in 21 Nov. 2017 ah Sangai Festival hawndawna, Imphal ah a nei ding boycott puang ah, Manipur phaizang thingnuaimi kilawikhawm CorCom in 21 Nov. 2017 zingkal dak 5:00 kipat in Manipur sung pumpi dakkal 26 sung General strike a puan ziak in Manipur ah state sung mun chuamchuam, a diak ah valley district te leh Imphal sung in hindan ngaina a subuai mama a, business establishment, Schools, colleges leh private offices zosia kikhak in inter-district buses service te le a chawl vek hi.
Imphal East leh Imphal West ah security khautak ah kawi in a um a, President Ram Nath Kovind in a phakna ding mun, Imphal Tulihal Airport - Keishampat; Raj Bhanvan a pat Hapta Kangjeibung; INA Moirang area - Sendra Tourist spot, Bishnupur district tuam in le security a khau mama hi. A langkhatlam ah bail-out PLA cadre 2 - Thongam Gyanendro @Ibomcha Singh (57) s/o Th.Yaima Singh of Thangmeiband Polem Leikai leh Kabrabam Lele Singh (52) s/o (L) K.Gourabidhu Singh of Thangmeiband Kabrabam Leikai te chu security force te’n a ma’n ua himaleh thil dawilo umlo tung hiat ding a um puai.

User Rating: 0 / 5

Star InactiveStar InactiveStar InactiveStar InactiveStar Inactive

Vice Chancellor in Kaziranga University tawh kisai taklatna nei

Lamka, Nov. 19 (*Nisin Thuhiltu)* : PK Mishra, Vice Chancellor, Kaziranga University in tuni, November 19, 2017 sunnung dak 1:30 ah Lamka hung pha’n Vocational Training Institute (VTI), Rengkai-Muollhum ah thuthak lakhawm mite kimupi in, Kaziranga University advertise bawlna a nei hi. Vice Chancellor, PK Mishra in a genna a chun, Kaziranga University in lekha lam bep ah thiamzilna chiapilo ah North-East pumpi khangthak te’n lam chuamchuam ah a phatchuampi thei ding uh thil chiapi a hidan taklang in, University chu sum pung hawlna hizawlo ah mi panpi theina ding zawk ah kipan dawk hin a gen hi. Mun dang gamla tak tak ah thiamzil ding ah kuandaw sang ah North East sung ma ah thiamzilna thei, International Standard tawh, University in thiamzilna ngaikhawk hin a gen hi. Romeo Hmar in a genna a chun, University a mu a pat lungtun umsa hidan gen in, University ah numei leh pasawl hostel chuam um, nek leh chak lam ah North-East state 5 ah a kine gual gual um, ragging kiti University ah phal hilo in a gen a, North-East ah khangthak te’n a phatchuampi thei ding ah University phudaw a hina chung ah Churachandpur ah thil umdan taklang a hidan uh a gen hi. University dinmun chu Manipur Chief Minister, Social Welfare Minister te le kimupi ah thil umdan genpi ding uh hin a gen hi. University tawh kisai ah Churachandpur ah Immanuel Varte thuhiat thei zing hiding in le a gen hi.


Zou Gal Centenary lawpna ding tawh kisai ah meeting nei

Lamka, Nov. 19 (*Nisin Thuhiltu)* : Zou Gal Centenary Commemoration Committee (ZGCCC) saina’ tuni, November 19, 2017 sunnung dak 1:30 in ZGCCC Information Centre, Zogal Hall, Zouveng ah Meeting a um hi. Zia hun a chun, ZGCCC member, UZO GHQ ZWC Member te, ZSP GHQ, ZYO GHQ, ZLS GHQ, ZSDS, ZAU, ZOGAA, Information & Publicity, Sports Department, Stone Department, Zou Gal Centenary Committee, Souvenir Committee, Transport Department leh Custom, Culture & Tradition Department te’n meeting uap in, Behiang khua ah Zou Gal kum 100 tinna, Centenary lawpna ding tawh kisai genkhawmna nei in department chuam chuam in panlakna a neidan uh tawh kisai in Report piakna a nei ui. Behiang khua a Zou Gal kum 100 chinna, Centenary zatna ding toh kisai thu poimoh tuamtuam genkhawm uhi.

Zogam Online Music Award-2017
Lamka, Nov 19 (*Nisin Thuhiltu)* : Zogam Online website in a hung tung ding December 28, 2017 leh ‘ZogamOnline Music Award- 2017’ hawpna nei ding a hi. Zia chu chi-leh-nam khenlo ah laa sak thiam talent nei hawi khangthak te dawpsanna ding leh laa thiam te chawisanna hiding a hi. ZOLMA -2017 ahileh category chuamchuam - Best singer (female), Best singer (male), Most Promising Artiste (Male/Female) leh Best Actor hiding a hia, laa thiam lui te Life Time Achievement Award piakna le um ding a hi. ‘ZogamOnline Music Award- 2017’ ding tawh kisai chu www.zogamonline.com ah thuchian kimzaw muthei ah um ding a hia, ZOLMA-2017 teplawkna dan ah, November 24, 2017 nitak dak 6:00 leh New Lamka YPA hall ah ZOLMA concert um ding a hi.


Happy Feet Football Academy in Jarkhand FC zawm ding player 3 thâkdawna nei

Lamka, Nov. 19 (*Nisin Thuhiltu)* : Happy Feet Football Academy in tuni, November 19, 2017 sunnung dak 2:00 in Compound Veng, D. Phailian ah a naupangte’u Jarkhand FC ah kihel ding te thâkdawna a nei ui. Zia hun matna chu, Thiauthianmung Guite, President, CDSA, Th. Jamchinthang Simte, MDC Thanlon, Paulungmuan, Advisor te’n a uap ua, S. Liankhosiam, Head Coach in lawtinna nei te dinmun taklatna a nei hi.
Happy Feet Football Academy ahileh October 2016 ah phudaw ah a la um, player 2 DSK Shivaji ah lut ta, player 3 Jarkhand FC ah lut, Sudeva leh SAI ah player khat tuak lutta ti a hi. Zou Gal Memorial Open Shied Football Tournament ah LSC ah player 5, Avoi FC ah player 2 leh Zoheisa FC, Zouveng YC, Symropia leh Tangnuam YC ah player khat chiat pang uh hin le a kigen hi. Tu leh tu Happy Feet Football Academy ah Under-17 ah mi 41 leh Grass Root ah mi 23 um a hiu a, Bungmual Playground ah football pek ziltil hisek a hiu. Jarkhand FC ah lut ding player te ahiu leh Thang James (15) s/o Tualzakap, Dorcas Veng, Thangsuanlal (15) s/o Khaithianbel, Dorcas Veng leh Ginsanglian (15) s/o T. Chinkhanthang, Dorcas Veng te a hiu a, Thang James leh Ginsanglian ahileh Under-15 ah lut, Thangsuanlal ahileh Under-18 category ah lut a hi. Player 3 te thakdawna hun matpi ah a um tawh kitawn un, Happy Feet Football Academy in Bible khatchiat present a bawl hi.


SSPP FC player te thâkdawna nei

Lamka, Nov. 19 (*Nisin Thuhiltu)* : Siamsinpawlpi (SSPP), General Headquarter, Lamka saina’ tuni, November 19, 2017 zingkal dak 7:30 in SSPP Complex, Siloam Veng, Bungmual ah North East Tamchon Memorial Football Tournament 2017, Ambedkar Stadium, New Delhi ah kihel ding SSPP Football Club (SSPP FC) player te tilkhona leh thâkdawna a um hi. Pausuanlian, Joint Secretary, Human Resources, SSPP GHQ in hun matna a mapui a, Lianzapau Samte, President, SSPP GHQ in hun matna tawh kisai taklatna nei in, Senior Player, Ngulkhosiam khut ah SSPP Flag piakdawna nei in, Sonpau, Ex-Captain in Player ding te taklatna nei in, Lianzapau in tilkhona a nei hi. Chun, V. Nenglian, Divisional Superintendent, EBC Lamka North Division in player te pauchap piakna nei in, M. Jamchinthang, Member, Standing Committee, SSPP, GHQ pauchapna tawh a tha dawk hi. SSPP FC min ah kihel ding te chu SSPP Joint Headquarter, Delhi in kaihuai leh kithuapi ding a hiu a, player te a hiuleh Chatarpur, New Delhi ah inn khat ah zintung ding uh hin a kigen hi. SSPP FC in November 21, 2017 sunma dak 10:30 leh Indian Air Force tawh match nei ding a hiu a, Ningani, November 23, 2017 sunnung dak 2:30 leh Sikkim FC te maitua ding, Lemlal in Coach hina tawh mapui ding a hi.


President Kovind in Arunachal, Assam leh Manipur tour pan

Itanagar, Nov. 19 (*Nisin Thuhiltu)* : Indian President Ram Nath Kovind in northeastern states pathum - Arunachal Pradesh, Assam leh Manipur tour a pan a, tuni’n Arunachal Pradesh ah hun mang in, Arunachal khawpi Itanagar ah 40th Foundation Day ceremony of Vivekananda Kendra a uap ui. Mr Kovind in a thugenna a chun, Arunachal in developmental project chuamchuam a chiapina chung ah khantonalam manaw zing a hidan gen in, Vivekananda Kendra institutions in Arunachal remote area ding ah panlakna a nei chu kipakpi mama kawm in, Naharlagun ah state government in 500-bed hospital hawn ding leh state dang tawh rails ah kikawmtuana a um theina ding ah panlakna a nei chu pakcha mama in a gen hi. President Kovind India’s freedom movement chiapi hun ah Matmur Jamoh leh mitamtak in British Army dona thina a la tuak dan teu le genlatna a nei hi.
Nitaklam in, Mr Kovind in a kisathak Arunachal State Legislative Assembly building hawnna leh state mipi te ding ah a latdawna a nei a, Assembly special session ah thugenna a nei hi.
Zing, 20th November 2017 ah Mr Kovind in Assam ah hun mang ding, Silchar ah Namami Barak festival closing ceremony uap ding a hia, Gauhati University ah civic reception le uap ding a hi.
November 21 leh Mr Kovind in Manipur pha ding, zia hun a chu Imphal ah Manipur Sangai Festival 2017 leh Northeast Development Summit hawnna nei ding a hi. Chun, New Delhi a zawt kit masang ah Moirang ah Indian National Army (INA) War Memorial leh Museum entha ding, zia hun a chu Netaji Subhas Chandra Bose zana piakna nei malam ding a hi.

North East Development Summit (NEDS) 2017 zintun ding State kisazota: CM
Imphal, Nov. 19 (*Nisin Thuhiltu)* : Chief Minister N. Biren Singh in Cabinet Hall, Chief Minister’s Secretariat, Imphal ah North East Development Summit (NEDS) 2017 ding tawh kisai press conference a genna a chun, North East Development Summit (NEDS) 2017 zintun ding ah State in kisingsakna bangkim zo vekta hin a taklang hi. Summit hun ah Manipur government nuai ah Departments chuamchuam in National leh International Companies/Investors te tawh Memorandum of Understandings (MOU) 20 tuam sign bawl ding ua guanggalna um a hidan gen in, Sangai Festival hun ah North East Development Summit (NEDS) zintun ding ah guanggal ah a umna ziak chu gam dang leh mun chuam mite state in food processing industry, bamboo industry, fisheries, real estate etc lam ah theina (potential) hawitak a hidan suklatna nawpna kawm a hidan taklang in, Summit lawtin theina ding ah media houses/professional te chu panla chiat ding in chialna a bawl hi. Manipur Sangai Festival 2017 a ding ah kisingsakna a hileh zawthian vang hita a hidan gen in, government guanggalna um te a lawtin theina ding ah mipi te support pawimaw in a gen hi. North East Development Summit (NEDS) 2017 ahileh delegates 175 te’n uap ding, zia delegate te lak a chu, Union Minister for Commerce and Industries Suresh Prabhu, Chief Ministers of Assam, Arunachal Pradesh and Nagaland, Director India Foundation, Ram Madhav, Vice-Chairman NITI Ayaog Rajeev Kumar, Ministers leh NE state chuamchuam ah official te, Malaysia, China, Japan, Sweden, Taiwan te panna gam chuam chuam ah Ambassadors, High Commissioners leh official te le pang ding uh hin a gen hi. Chuleh, India ah companies/firms 36 te leh Associations - FICCI, CII, NASSCOM, Border Trade Moreh, Myanmar India Business Chamber, India Bangladesh Chamber of Commerce etc official te’n le Summit uap ding a hidan taklang in United Nations Resident Co-ordinator Yuri Afanasiev, High Commissioner of Malaysia H.E Dato Hidayat Abdul Hamid te’n le uap ding uh hin a gen hi. North East Development Summit 2017 chu India President Ram Nath Kovind in 21st November, 2017 nitaklam dak 2:00 leh formal tak ah hawng hin a gen hi. NEDS 2017 ahileh Government of Manipur, Ministry of Commerce and Industry, Government of India leh India Foundation kithua ah organize a bawl a hia, 21st leh 22nd November, 2017 sung ah City Convention Centre, Imphal ah um ding a hi.

CM in Sangai Festival Curtain Raiser hawng

Imphal, Nov. 19 (*Nisin Thuhiltu)* : Manipur Sangai Festival a kimatna ding tawh kisai in tuni’n Chief Minister N Biren Singh in YICC Ground, Keibul Lamjao in Bishnupur district ah Curtain-Raiser hawnna a nei hi. Zia hun chu Deputy Chief Minister Y. Joykumar, Ministers, MLAs, top civil, police leh military officer te’n le a uap ui.
Chief Minister N. Biren in a thugenna a chun, state tourism in masawnna kituptak a nei thei tak leh mipi te’n sum hawlna haksa satalo ding a hidan gen in, domestic leh International tourist te’n state a etla theina ding ua, chamna leh muanna a um zing ding pawimaw leh khawvel gam chuam chuam mi te muthei ding ah Manipur hawina suklat zing ding pawimaw in a gen hi. Chuleh, public haksatna nei te chu ama kiang ahiloleh a kisaipi Minister, MLA te kiang ah a haksatnau tut ding ah chialna bawl in kiphinna kiti haisanta ding in a chial hi.
Zia hun mat masang a chun, Chief Minister in Sendra ah Sangai Run Half Marathon flagged off bawlna a nei a, category pathum - Half Marathon (21 km), Loktak Run (7.5 km) leh School Run (3.5 km) organised bawl in a um hi. Zialo a chun, Chief Minister in Sendra ah Loktak Inland Transport Complex hawnna le a nei hi.

Kiphinna newspaper kihal nasatak ah demna bawl
Imphal, Nov. 19 (*Nisin Thuhiltu)* : Prime Minister, Narendra Modi demna thusua ziak in BJP youth wing in zani 18 November 2017 a khan, Nityapat Chuthek ah party office mai in newspaper halna a nei ua, zia chu Editors’ Guild Manipur (EGM) leh All Manipur Working Journalists’ Union (AMWJU) in nasatak in demna a bawl hi.
Ahonsangbam Mobi, President, Editors’ Guild Manipur (EGM) in a genna a chun, newspaper ah demna thu ahiloleh thu dawilo published a ki bawl khak tak ah le Press Council of India (PCI) or EGM or All Manipur Working Journalists’ Union ahiloleh a kisaipi te kiang ah thil umdan tut thei hinapi ah newspaper kihal chu umchan helo, mimawl te nasep thil bawl a hidan gen in, nasatak in demna a bawl hi. Wangkhemcha Shyamjai, President of All Manipur Working Journalists’ Union (AMWJU) in a genna aa chun, newspaper hal kiti chu kiphinna hizawlo ah mob culture chiapina chi khat hin a gen a, AMWJU in Press Council of India guidline tawh kituak ah local adjustment tawh journalist ethics a chiapi zing lai ah zia gual thil kibawl chu thil dawi umlo tak a hidan taklang in demna nasatak a bawl hi. Telegraph Special Correspondent , Khelen Thokchom in BJP Manipur Pradesh yoth wing thil bawl chu ‘Mob Culture” a hidan genkawm in, Chief Minister N. Biren Singh in state sung ah Mob Culture sungbei ding ah thutiam a bawl chu khawilam ah um a hi em ti’n dawtna a siam hi.

Sangaiyumpham ah Manipur Rural Bank branch thak hawn ah um
Thoubal, Nov.19 (*Nisin Thuhiltu)* : Thoubal district, Nungphou Bazar kiangnai, Sangaiyumpham ah tuni’n Manipur Rural Bank branch thak khat hawn in a um hi. Zia hun chu, Okram Surjakumar Singh, MLA Khangabok Assembly Constituency, Md. Zakir, Pradhan Sangaiyumpham Part-I Gram Panchayat, Md.Ramida Begum, Pradhan Sangaiyumpham Part-II Gram Panchayat, Raghunandan Samantan, AGM UBI Imphal leh Dr. Prasanta Kumar Bal, Chairman Manipur Rural Bank te’n khuallian hina tawh uap in, O. Surjakumar, MLA Khangabok AC in Bank branch thak hawnna a nei hi. Manipur Rural Bank ahileh May 28, 1981 ah Regional Rural Banks Act, 1976 nuai ah a la kiphutdawk a hia, tu leh tu state sung ah branch 22 nei a hi.

SSUM leh MPPDU ann-ngawl kiphinna chawlsan
Imphal, Nov. 19 (*Nisin Thuhiltu)* : Socialist Students’ Union of Manipur (SSUM) leh Manipur Proletariat Peoples’ Democratic Union (MPPDU) in November 16, 2017 a pat Inner Line Permit System implement ding phutna ann-ngawl kiphinna a nei chu government in kihona neipi ah panlakna a nei nung ah chawlsan phawt a hidan uh a taklang ui. Manipur Press Club, Majorkhul, Imphal, Naorem Tanoranjan, Convenor Publicity & Propaganda of SSUM in a genna a chun, SSUM leh MPPDU in kiphinna a neina chung ah memorandum piaklut ah a um dungzui ah Chief Minister kihona neipi ah thil umdan a genkhawmpi nung ah chawlsan ding ah lemsakna a nei uh hin a gen hi.

Manipur Sangai Festival ding ziak ah Security khau
Imphal, Nov. 19 (*Nisin Thuhiltu)* : Manipur Sangai Festival ding tawh kisai in tulak cheng in security sukkhau in a um a, security te’n mun chuam chuam ah cordon leh search operation a bawl zing ui. A langkhatlam ah Coordinating Committee, CorCom in India President Ram Nath in November 21 leh Imphal a phak ding boycott bawl in, general strike a puang hi. Tuzing kal in Mahabali Kabui khul area ah senior police officers Robinsun Khamnam leh B. Lunthang Vaiphei te mapuina tawh Imphal East SP Kabib supervise bawlna nuai in cordon leh search operation a bawl ua, zia hun a chun, numei 105 te panna mi 465 te verified bawl in bail out kibawl mi khat panna , mi 11 te chu verification bawlbe ding ah Porompat police station a tut ui.
Zialo a chun, Ragailong area ah inspector Shimray mapuina police team khat in search operation a bawl ua, inn 80 tuam in search operation a bawl ui.

Minister Biswajit in 1st NE India Regional Women‘s Conference hawng

Imphal, Nov. 19 (*Nisin Thuhiltu)* : Rural Development and Panchayati Raj Mninster Thongam Biswajit Singh in tuni’n Marwari Dharamsala hall ah First North East India Regional women’s conference hawnna a nei a, ama’n a thugenna a chun, society ah chamna leh muanna a um theina ding ah numei te thuneina piakbelap ding pawimaw a hidan gen in, numei te promote bawl ding pawimaw in a gen hi. Chuleh, numei te haksatna leh nekgukna (corruption) ziak ah buaina um te sukven a hi masang sia, society khangto theilo ding hin a gen hi. Conference ahileh Bharat Vikas Parishad, Manipur chapter in ‘Women’s Empowerment’ ti thupi nei ah organised a bawl a hia inaugural session chu National president - Bharat Vikas Parishad Sitaram Pareek, Vice chancellor of Central Agricultural University, Iroisemba Dr M. Premjit Singh, National Additional Secretary General (NER) Bharat Vikas Parishad Swadesh Ranjan Goswami, Regional Patron (NER) Dr S. Rajendra Singh, delegates leh Bharat Vikas Praishad member te’n le a uap ui.


NEGU THEILO TE
Editorial -Nisin Thuhiltu (20 Nov. 2017)
Mihing te’n i tup pen uh chu khantona leh masawnna a hi. Zia tupna ziak achun pawl chuamchuam tamtak in um ui. Thagau lam kai ah le Kochuam te’n i thiltup pen uh chu taksa leh thagau lam ah khantona leh masawnna ma a hi i buai pi uh. Ati leh zia khantona chu bang a hidiam le? Zia chu banggual hileh khangto a hithei diam ti ngaitua a pawimaw hi.
Government inle a thiltup pen chu muanna leh bitna dettak tawh gam sung, state sung, society khanto sak ding ti a hi. Zia ding ziak a chun dan chuamchuam bawl in, project leh welfare scheme chuam chuam te pandawk in, sum leh pai tamtak nisin, kumsin in a seng zing hi. Khenkhat te chu lawting maleh tamtak chu a la lawsam zel hi. A lawsam deu te chu theng zel in, thil thak hung ngaitua zel in, khantona leh masawnna tupna ziak in sum leh pai leh tha leh zung tamtak a seng zing sek hi.
Mihing te’n i dawi leh tuppen chu Gam leh Nam khantona a hi ti chu gen sese ngailo ah a hiatsa gual ah i kawi uh a hi. Zia khantona chu thildang thupi hilo in, a chung ah igensa gual un mipi tamtak umkhawm te’n khatvei thu / thakhat thu ah hung khangto hizianglo in, mimal tin in dan hawitak zui ah thil bangkim titak mai ah a sep leh bawl phat ua leh masawnna leh khantona um tina a hi. Ziltiltu pang te, Solkar leh sumkawlvei leh i nasepna lam chiat ua diktatna tawh i sep phat ua leh i gam leh nam khangto leh masawn a himai hi.
Negutheilo te chu a ngawl, gualphalo leh mi nung del in in ikawi ua, midik leh Pathian hia diktak te le gual phalo leh tulai hun mi hilo dan in i kawi uh a hi. Pathian hiatna chun kintak a lawtinna leh muthei ah masawnna hung um zianglo maleh detlo in, suan um zaw himhim ding a hi. Gam leh nam i kivaipuaknau a hin le tusang ah Pathian hezing kawm in kivaihawm in nasem leu hin lawtinna chu mu ngei ding in ginchak a um hi. Lungdawn lung zin hun mai hilo ah nasep lamzan ni leh lawtin hun a le Pathian hia zing kawm ah thil sia, Pathian dawilo ding zawng kuama hiatlo ah bawl theina ding hun lemchang a um hun ah le diktak leh thu dik tak ah ama geldawk zing kawm ah hun mang in nasem leu hi’n i gam ah tulai ah siatna leh haksatna tung zing te, nekguk chakguk iti te um tawm chuam mama ding a hi.

Page 1 of 15