Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

CM in mipi a ding ah kipezo tak ah nasem ding ah bureaucrat te chial;
Shyamlal Poonia, IAS, DC /CCpur in nasep hawi ziak ah Award sâng

Imphal, April 21 *(Nisin Thuhiltu)* : Conference Hall, Secretariat South Block, Imphal ah tuni, 21 April 2018 in 12th Civil Service Day mat in a um a, zia hun chu Chief Minister N. Biren Singh in Chief Guest hina tawh a uap hi. Chief Minister in a thugenna a chun, Civil Servants te chu mipi a ding ah kipezo tak ah nasem ding leh panla chiat ding in, chialna a bawl a, former Deputy Prime Minister of India, Sardar Vallabhbhai Patel in Civil Servants te Steel Frame of India a ti gual ah tuhun ah bureaucrat te’n kituptak ah panlakna a nei ding uh pawimaw in a gen hi. Public servant dukdalo te’n State administration susia thei a hdian gen in, bureaucrats te chu a ziak leh zal bei ah file pending ah mawk kawilo ding in chialna a bawl a, tu ah state government in kipezo tak ah nasem bureaucrat mai et ah nei in a gen hi.

Chief Secretary Dr. J. Suresh Babu in a thugenna a chun, Civil Servants te chung ah Government kinga a hina chung ah Chief Minister in bureaucrats te mipi haksatna hiatzuipi ding leh etzuipi ding ah thupiak neizing sek a hidan gen in, state government in Hill Leaders’ Day leh Meeyamgi Numit chiapi zing kawm ah ‘Go to Village’ mission chiapi ding ah a guat chu phatchuampi hingei ding ah lam etna nei in a gen hi.

Zia hun mat sung a chun, Chief Minister in Churachandpur DC Shyamlal Poonia kiang in Excellence in Public Administration Award piakdawna a nei a, tha 4 sung ah Nute Bazaar (Women’s Market) of Churachandpur sa zo, Executive Engineer of Manipur Police Housing Corporation Ningombam Romedy Singh leh Special Class Contractor of Manipur Police Housing Corporation, H. Muan te le award piak in a um ui.

25-Sector Assam Rifles in M. Songgel Playround a siamthak piakdawna nei

Lamka, April 21 *(Nisin Thuhiltu)* : 25-Sector Assam Rifles in Military Civic Action project 2017-18 nuai ah Rs. 8 lakhs bei ah M. Songgel Playround Leveling leh Mini-Galary a siam uh chu tuni sunnung dak 2:00 in a hawndawna leh M. Songgel Youth CLub (MSYC) khut ah piakdawna a um hi. Zia hun chu Chief Guest hina tawh Brig. Ajay Kumar, Commander 27-Sector Assam Rifles in a uap a, Guest of Honour in Mithun Shetty, CO 25 AR; James Doujapao, SDO/Tuibong leh Sasang Vaiphei, Vice- President, KSO/GHQ te a pang ua, Functional President in Limsho Lhungdim, Senior Member, Village Authority pang in, Chief Host in Jamkholal Lhungdim, Chairman Village Authority a pang hi.

Chief Guest a pang Brig. Ajay Kumar in M. Songgel Playground Leveling leh Mini-Galary kisiam thak hawnna nei in, Rev. LB Angam, Executive Director, ECA in Pathian kiang ah a latna a nei hi. Zia hun matna chu Onkhopao Haokip, Adviser ATSUM in amapui a, programme sung in khuallian-te a pat thugenna um in, MSFC te'n football exhibition match a nei ui. Zia football exhibition match a chun, Red Team in 2-1 in gualzawna a chang ua, Chief Guest in Best Player, promising player, promising gaolkeeper leh top scorer-te kiang leh gualzawna chang te kiang ah kipakman piakdawna a nei hi.

JNV Academic Session 2018-19 a ding ah entrance exam bawl

Lamka, April 21 *(Nisin Thuhiltu)* : Jawahar Navodaya Vidyalaya (JNV)/Tuinom ah Academic Session 2018-19 ah Class-VI simding lakna ding in tuni, April 21, 2018 in Block 6 ah entrance test a um hi. CCpur disrict a pat in candidate 2151 a, candidate 577 te’n Phungkhothang Govt. High School, Hiangtam Lamka ah entrance test bawl in, Henglep block -te’n centre 2 - Vumhao Govt High School, Tuilaphai ah candidate 115 leh Kangvai Hr Sec.School ah candidate 149 ; Singngat block a pat candidate 106 te’n Singngat Govt High School ;, Thanlon block a pat candidate 171 te’n Bukpi Govt High School; Tipaimukh block a pat candidate 178 te’n Pherzawl Govt High School leh Samulamlan block a pat candidate 279 te’n INA Memorial High School in entrance test a bawl ui. JNV kai ding lakna a chu, 100% lak ah75% te tanggam a pat a hiding uh leh Phaizang a pat 25% a hiding a hi. Chun, 2,151 exam bawl te lak a chu candidate 80 lak hiding a hi.

Bishnupur District in ‘Prime Minister’s Awards sâng

Bishnupur, April 21 *(Nisin Thuhiltu)* : Bishnupur District thasik in Bishnupur District Deputy Commissioner Pawan Yadav, IAS in tuni’n Vigyan Bhawan, Delhi ah Prime Minister Narendra Modi khut a pat in ‘Prime Minister’s Awards for Excellence in Public Administration’ award a sâng hi. “Promoting Digital Payments” kiti kituptak ah chiapi ziak ah “North East and Hill States’ group a pat Bishnupur District chu award piak ah um a hi.

ECCI Annual Leaders’ Conference, 2018’
Lamka, April 21 *(Nisin Thuhiltu)* : D. Phailen ECA Church ah April 20 a pat April 22, 2018 tiang ah um ding, ‘Evangelical Congregational Church of India (ECCI) Annual Leaders’ Conference, 2018’ chu a chiatha zing hi. Zia Annual Leaders Conference chu April 20, 2018 nitak dak 6:00 ah Elder Henkholun Doungel, Vice Chairman, ECCI in a hawn a hia, Rev. T.Kamgin Gangte, Executive Director, ESC in Pathian thugenna a nei hi. Tuni zingkallam dak 10:30 apat Elder Er. Lalthanzam Amo, Chairman, ECCI mapuina’n Business Session a nei ua, nitak biakna kikhawp hun ah Upa Thangkholien in hun matna mapui in, Elder Dr Lalkholien in hun hawnna nei in, ECT report piakna leh Pathian thuthak genna Rev dr Lalrosiem Songate, Principal ECT in a nei hi. April 22, 2018 zingkallam dak 10:30 ah kikhawpna hun ah Rev Th Janga, Executive Director, ECCN in EC Church Nepal report bawlna nei ding leh Pathian thugenna nei ding a hia, ECCN a ding pauchap piakna Rev Dr S Lalpi Vaiphei, Chairman, Executive Committee EOC in nei ding, Nitak biakna program ah Rev Dr. Kaitinkap Vaiphei, General Director, ECCI in ECCI report na leh Pathian thugenna nei ding a hi. Chun, Elder Er.Lalthanzam Amo, Chairman, ECCI in Annual Leaders’ Conference khak (close) ding a hi. Hiatthei khat chu, tu leh tu’n ECCI nuai in kochuam 6 - BBEC, ECA, EAC, EOC, ESC leh EUC a um a, 2018-19 Budget ding in GMC/Foreign fund ah Rs. 15,20,000, ECCI Local account a ding in 35,97,256, Missions Department a ding ah 8,70,000 , ECT Local Account ah 50,85,600, 2018-19 sung a ding ah Budget a siam uh chu a kigawm ah Rs. 1,10,72, 856/- (One Crore, 10 Lakhs, 72 thousands 8 hundred and Fifty six) a hi.

ZEO/CCpur in training ding ah hiatsakna bawl
Lamka, April 21 *(Nisin Thuhiltu)* : N. Chingkhei Singh, ZEO/District Project Officer, SSARTE, Churachandpur in tuni ah thusua a bawlna a chun, District Project Office, SSA-RTE, Churchandpur in 25th April 2018 - 27th April 2018 sung ah YPA Hall Hiangtam Lamka, Churachandpur ah ni 3 sung District Level Training for SMDC & Local Authority Members organised bawl ding a hidan taklang in a kisaipi Headmasters/ Headmistress te’n zia training chu ngaikhawk chiat ding leh training ah member 5 chiat sawl ding in hiatsakna a bawl hi.

Aizawl ah EBCC biak-inn building chimtha thei ding ah um
Lamka, April 21 *(Nisin Thuhiltu)* : Mizoram, Aizawl, Dinthar Veng ah um Evangelical Baptist Convention Church (EBCC) biak-inn building leichimthak ziak ah a building chimtha thei ding dinmun ah a um tawh kitawn in, tuni, April 21, 2018 in kochuam mipi leh mi tawmngai pawl te’n biak-inn van a tawkdawk ui. Biak-inn ahileh a chiata ni bangzat a hem a pat gua a zuk ziak ah biak-inn nuai lam ah leisiat chimtha thei ding dinmun ah um a hi.

State Level Ginger Festival-cum-Business Summit mangzo
Lamka, April 21 *(Nisin Thuhiltu)* : Pherzawl District ah um Parbung khua ah State Level Ginger Festival-cum-Business Summit kiti mat ah um chu tuni, April 21, 2018 in sutzawm in a um hi. Zia hun chu, Th Biswajit Singh, Minister Public Works, RD and Panchayati Raj, IPR, Industries & Commerce, Administrative Reforms in Chief Guest hina tawh Bussiness Summit hawndawna a nei a, Dr Chaltonlien Amo, MLA Tipaimukh in Chief Host hina tawh uap in, TT Haokip, Chairman, HAC leh MLA Henglep in Guest of Honor hina tawh a uap a, V Hangkhanlian, Minister, Agriculture, Veterinary and Animal Husbandry in Functional President hina tawh a uap hi. State Level Ginger Festival-cum-Business Summit ahileh Chief Minister in Chief Guest hina tawh uap ah 20 April 2018 ah a la hawn a hi.

Kilawmlo tak ah ni’n kihal

Lamka, April 21 *(Nisin Thuhiltu)* : District sung ah thiangtho nasatak ah tangko a hizing lai in IB Road dung ah mun pawimaw tak khat ah niin lawm kikawikhawm te hal in a um hi. Chief Medical Officer (CMO) Office leh District Aids Control Officer (DACO) Office kikal, IB Road opposite ah niin tamtak kipai te chu puakdawlo ah kawi a hi zing ziak in tuni’n mei ah hal in a um a, niin kihalna meikhu chu a names mama hi. Niin kihalna mun ahileh District a ding ah office umna, a thang deu ah ZEO office leh Churachandpur Government High School leh a sak ah damlo tamtak umna District Hospital le a hi. Ziagual ah khawpi sung mun pawimaw tak ah niin kikhawl khawm ah kihal chu mitamtak in kilawmlo leh damthei huailo in a gen ui.

MoU suai kai
Lamka, April 21 *(Nisin Thuhiltu)* : Tukum May leh June thasung ah Raja Goukhothang Guite Football Memoriam 2018 umna ding tawh kisai in tuni’n Ropiang Foundation Trust office mission road, Hiangtam Lamka ah Ropiang Foundation Trust leader te leh Ccpur district sports association CDSA leader te’n meeting nei in, Memorandum of Understanding (MOU) suai a kai ui. Zia dungzui a chun, Ropiang foundation trust in Finance, Ceremonies leh Advertisement lam tawh kisai ah mawpua ding, CDSA in personnel, match management leh discipline lam tawh kisai ah mawpua ding ti a hi.

Career Guidance Seminar nei

Lamka, April 21 *(Nisin Thuhiltu)* : Thadou-Kuki Studetns’ Union (TKSU) General Headquarter saina’ tuni, April 21, 2018 sunma dak 11:00 in Bijang Community Hall ah Career Guidance Seminar a um hi. Zia hun chu Lalcha Haokip, Secretary, Education Department in amapui a, Hatkholam, President, KWU in pauchapna tawh hun hawng in, Career Guidance Seminar hun masa ah Lunkhomang Khongsai, MPS, Additional SP (Law & Order), Churachandpur in Competitive Exam chuamchuam ah kisaklawk ding dan leh exam hun ah um dingdan tawh kisai in ziltilna a nei hi. Chun, second session ah Khupminthang Khongsai, Assistant Professor, Maharaja Bodachandra College, Imphal in eima lunglutna tawh nek leh chak hawlna (Career) tawh kisai in ziltilna a nei hi. Zia Career Guidance Seminar a chun, student 100 vel a pang ui.

Swachh Bharat Vikas 2018 hawndawna nei

Lamka, April 21 *(Nisin Thuhiltu)* : Swachh Bharat Abhiyan tawh kisai in tuni, April 21, 2018 in State apat Official Team khat in L. Semol Community Hall ah sunma dak 11:00 in Swachh Bharat Vikas 2018 hawndawna a nei ui. State apat official te chu - TK Savaniar, State Convener leh Angom Gojendro, Convener, Imphal West District te a hiu. Hun mat sung in Thongminthang Lhungdim, Chief of L. Semol apat thugenna um in, Savaniar in Swachh Bharat Abhiyan tawh kisai genna a nei a, Thangmang Haokip, Ex-MDC Khousabung in huntawp ah kipakthu gen in, Jamkhongam in pauchapna tawh hun matna a khak hi.

Legal Awareness Progamme on Fundamental Rights and Duties

Lamka, April 21 *(Nisin Thuhiltu)* : Community Development Society/New Lamka Legal Aid Clinic leh Churachandpur District Legal Services Authority in tuzingkal dak 7 apat in Rayburn College Auditorium, New Lamka ah Legal Awareness Progamme on Fundamental Rights and Duties kiti a bawl hi. Zia hun chu Rayburn College a kai NCC Cadets –te’n a uap ua, Chingsonkim, Para Legal Volunteer NLLAC in hun matna mapui in, Lieutenant Suan L Hauzel , ANO NCC Rayburn College in vaidawna thu gen in, Lianzamung Tonsing, President, CDS in Legal Awareness Progamme on Fundamental Rights and Duties organize kibawlna ziak taklatna nei in, Legal Aid Clinic tawh kisai genchianna a nei hi. Awareness hun ah Chinglun, Advocate in Fundamental Rights and Duties tawh kisai in ziltilna a nei a, Khumi Gangte, District Coordinator, Sarva Shiksha Abhiyan in Rights to Education RTE tawh kisai in ziltilna a nei hi.

User Rating: 0 / 5

Star InactiveStar InactiveStar InactiveStar InactiveStar Inactive

CM in State-level Ginger Festival Cum Business Summit hawng

Lamka, April 20 *(Nisin Thuhiltu)* : Manipur Chief Minister N. Biren Singh in tuni’n Parbung, Pherzawl District ah State-level Ginger Festival Cum Business Summit hawnna a nei hi. Chief Guest, in a thugenna a chun, a vaima theipen ah Parbung ah solar drier system leh packaging units tawh kithua thiing (ginger) processing unit hawn hiding in a puang a, Mission Organic nuai ah state government in hectares 200 ah thiing (ginger) farming chiapina ding ah Rs. 75 lakh bithiat ah nei in a taklang hi. Zia chu mitamtak in a phatchuampi ding kinem a hidan gen in, thiing lei bawl te Rs. 35 lakh tiang Grants ah piak hiding ah gen in, state in kumkit February 2019 leh World Bamboo Conference zintun ding, zia conference chu gam chuamchuam a pat delegates 100 in uap ding hi’n a gen hi.

Khuami (villager) te’n thiing rate a siam uh chu market price sang ah sangzaw a hidan gen in, tukum ah State Government in thiinglei bawl te lawkpi thei ding ah Rs. 20 lakh puakdaw ding gua hi’n a gen a, state sung mun chuamchuam 13 ah cold storages kawina ding ah Rs. 10 crore bithiat ah um in a gen hi.
Chief Minister in mobile network leh internet connectivity tawh kisai Pherzawl District ah mipi te haksatna tawh kisai a genna a chun, BSNL in a pawimaw dungzui ah panlakna nei ding hi’n a gen hi.

Zia hun matna chu, Horticulture and Soil Conservation Minister Th. Shyamkumar, Works Minister Th. Biswajit, Manipur Tribal Development Corporation (MTDC) Chairman leh Thanlon AC MLA Vungzagin Valte, Chief Secretary Dr. J. Suresh Babu banah high ranking officials tamtak te’n le a uap ua, Cultural extravaganza, products exhibition, seminar/workshop leh musical night etc tawh thua ah Ginger Festival Organising Committee mapuina’ Ginger Festival 2018 mat a hi.

CM in Thanlon ah Power Sub-Stations hawng; May 15 ah Helicopter Service kipan ding

Lamka, April 20 *(Nisin Thuhiltu)* : Pherzawl District ah State-level Ginger Festival Cum Business Summit hawnna nei, Chief Minister N. Biren Singh in tuni’n Thanlon ah Tipaimukh leh Thanlon a ding 132/33 KV power sub-stations hawnna a nei hi. Power sub-stations hawnna a nei hun ah Chief Guest, Chief Minister in a thugenna a chun, May 15 leh state sung ah helicopter service hawn hiding, helicopter service umsakna chung ah sen leh so um te Union Home Ministry leh State Government in ratio 75:25 ah a puakdaw ding a hidan gen in, zialo a chu Government’s UDAN Scheme nuai ah passenger helicopter service umsak hiding, zia chu tha 6 zaw leh service kipan ding hi’n a gen a, passenger helicopter service patna ding tawh kisai a chu Joint Secretary of Union Civil Aviation Ministry, Ms. Usha Padhee banah Managing Director of Pawan Hans Ltd, B.P. Sharma in ama kimupi ah thil um dingdan genkhawm a hidan uh a gen hi. Thanlon, Parbung, Moreh, Tamenglong leh Jiribam ah infrastructures bukim tak tawh helipads ums ate a vaima theipen ah siam hawi thak hiding in le a gen hi.

Power infrastructure development tawh kisai a genna a chun, local MLA dawtna dungzui ah a vaima theipen ah Molnom ah 33/11 KV power sub-station kawi hiding, Thanlon Sub-Divisional Headquarters a ding ah 11 KV power line a chuam ah umsak hiding in a puang hi. Zia ah hun matna a chun, Tipaimukh tiang tung theilo himaleh Chief Minister in Tipaimukh ah 132/33 sub-station le a thu ah a hawnna siam in, Tipaimukh a phak theilona chung in mipi te ngaidawmna a dawn kawm in, hun lemchang dang ah Tipaimukh pha ding hi’n a gen hi. Power sub-stations hawnna hun a chun, Power Minister Th. Biswajit, Forest and Environment Minister Th. Shyamkumar, Manipur Tribal Development Corporation (MTDC) Chairman leh Thanlon AC MLA Vungzagin Valte te’n le thugenna a nei ua, Chief Secretary Dr. J. Suresh Babu, Commissioner (Power) M. Lakhsmikumar, Manipur State Power Company Ltd (MSPCL) Managing Director M. Sarat leh State Government high ranking officials chuamchuam te’n le a uap ui.

Minister Hangkhanlian in Dist. Hospital entha
Lamka, April 20 *(Nisin Thuhiltu)* : V Hangkhanlian Minister (Agri/Vety & Animal Husbandry) in tuni nitak dak 1 in District Hospital, Ccpur etthâkna a nei a, zia hun achun, District Hospital in a mamawte uh Medical Superintendent, Dr VC Pau tawh genkhawm in, panlak theidan chuamchuam ah panla ding ahidan a gen hi. District Hospital in tui kiningtinglo zing ahi dungzui in, Syntex liante bangzat hem hun sawtlo ah peding hi’n a gen hi. District Family Welfare office building ah major renovation bawl pawimaw ahidan a gen ban ah, District Hospital, OPD ticket counter waiting hall ah mat ding, TV Screen liante le a umding pawimaw a sak thu a gen hi. Chuleh, Children Ward umna lui a MDS fund mang ah kibawl, building bangzat hem lualo ah umte le etthâkna a nei ban ah, Trauma centre building ding kibawlnalai pen le etthâkna nei in, lungtun um a sak thu a gen hi.

Kuva-che tawh kisai ah ZSF leh CCC in thusua bawl
Lamka, April 20 *(Nisin Thuhiltu)* : Manipur Govt. in State sung ah Kuva-che (betel leaves) puaklut ding a kham ziak in mun chuamchuam ah police te’n gari bangzat hem a man ua, ziaziakchun Lamka ah kuva-che beithiang phialta hi’n a kigen hi. Mahajon (supplier) te’n a kilang ah a kawidawlo ziak uh, ban ah kuva man hapitak ah a pun tawh kisai in, Zomi Students’ Federation leh CCpur Consumers Club kithua in tuni’n mahajon chuamchuam kiang ah stock dinmun leh thil umdan kanchian ding in inspection a nei ua, ziazaw chun, Kuva zuak Mahajon-te kokhawm in holimpina a nei ui. Ziana’ chun, Kuva zuaktute'n van man punsaklo ding in dawtna a bawl ua, Mahajon-te dukan ah Kuva (mitha) che khat ah Rs. 5 sang a tamzaw a chawlo ding leh Bangla-che Rs. 250 chung ah chawlo ding in hiatsakna a bawl ui. Rate bithiak sang ah tamzaw ah zuak a um leh, kintak ah Zomi Students’ Federation leh CCpur Consumers Club kiang ah report bawl ding inle hiatsakna a bawl ui.

NFSA nuai ah anchang hawpdawk
Lamka, April 20 *(Nisin Thuhiltu)* : National Food Security Act. (NFSA) nuai ah tha sin ah anchang hawpdaw ah umsek chu, April 4-7, 2018 sung in Saikot AC/Sub-Division leh Thanlon AC/Sub-Division a Rationing Agent-te kiang ah HQ Veng a FCS Godown ah anchang hawpdaw himaleh, bandh leh thil chuamchuam ziak ah chawl phawt in, zia nung a chun, M. Ginzasuan, Dist. Supply Officer (DSO), CCpur & Pherzawl Dist. in Release Order (RO) leh anchang hawmdaw ding hun bithiak thak (re-sheduled) a bawl hi. Zia dungzui chun, April 13, 2018 in Parbung & Sangaikot AC/Sub-Division a Rationing Agent-te’n RO ladawk in, April 16, 2018 ni’n HQ Veng ah FCS Godown in anchang a ladawk ua, Seppatni mama in Singngat AC/Sub-Division a Rationing Agent te’n RO ladawk in, April 17, 2018 in anchang a ladawk ui. April 17, 2018 in Henglep AC/Sub-Division a Rationing Agent te’n RO ladawk in, April 18 & 19, 2018 in anchang a ladawk ui. April 18, 2018 in CCpur AC/Sub-Division a Rationing Agent te’n RO ladawk in, tuni April 20, 2018 in anchang a ladawk ua, zing April 21, 2018 inle CCpur AC/Sub Division sung a Rationing Agent te’n anchang ladawk zawm ding ahiu a, chuleh zawthian hiding ahi. Block tin ah NFSA ah anchang quota hung zat ahileh; Saikot ah quintal 3746.45, Tipaimukh/Parbung ah 611.80 quintal, CCpur ah 2536.50 quintal, Thanlon leh Mualnuam ah 911 quintal, Singngat ah 2290.40 quintal leh Henglep a ding in 1914.50 Quintal a hungtung hi.

LPG Ujjwala Diwas Programme mang

Lamka, April 20 *(Nisin Thuhiltu)* : Kholmun Community Hall ah tuzingkal dak 10:30 in Vangsei Indane Gramin Vitrak saina in Ujjwala Diwas programme mat in a um hi. Zingkal lam dak 10:30-11:00 kikal in Mrs. Nengneikim mapuina’n Safety Clinic & Demonstration a um a, zingkal dak 11:00 in LPG Ujjawala Diwas mat in a um hi. Zia hun achun, VIP in IOC Official-te; Thangso Baite, MP (Lok Sabha); TN Haokip, MLA & President, MPCC (I); James Doujapao Hoakip, MCS, SDO/Tuibong; Kuki Inpi, CCpur; Kuki Chief Assn./CCpur; KSO/CCpur; KKL GHQ; KWU; Village Chiefs leh Social Worker-te a pang ui. VIP-te apat thugenna a um ban ah, Thangso Baite leh TN Haokip te’n Ujjawala Benefeciary-te kiang ah Gas pedawk in, Lalthlankim of Saidan, Thenlhing of Kholmun, K.Jangnu Kom of Chinglangmei te apat Ujjawala benefeciary tawh kisai thugenna a um a, Rev Letkholen Chongloi, MNPA (ECA) in pauchapna nei in hun a khak ui.

M/S SONGTAL INDANE GRAMIN VITRAK saina in Simte Inn, Sim Veng ah LPG Ujjwala Diwas Programme a mang a, zia hun chu consumer tamtak ban ah khua hausa bangzat hem a pang ui. Hunmatna ah special invitee, Thanlon MLA Vungzagin Valte, Chairman, MTDC thasang in Chinkhanmang a pang a, Grace Zamnu, MDC; T. Thuamkhansuan, SDO/BDO Mualnuam; Liankhoman, Dorcas Coordinator, EBC; Chief Association chuamchuam apat Chairman/Secretary-te a pang ui. Zia hun chu, Michael L. Chinzasuan, Asst Manager, Songtal IGV in mapui in, Rev Thangkholal, Chief of Mong-on in hun hawnna pauchapna a nei hi. Zia zaw chun, Chingngaihvung Guite, Proprietor in presentation a nei a, Ujjwala (BPL) beneficiary-te gas mat a luldan leh damtheina ding ah pawimaw ahidan ban ah pilvang tak ah mat dingdan ziltîlna a nei hi. Chun, Guest-te apat thugenna a um a, LPG New Connection bawlte kiang ah gas piakdawna le nei in, Chingngaihvung Guite in kipakthu a gen a, Hauneilal, Chief of Munpi in pauchapna nei in hun a khak ui. Hun mat sung in, connection thak mi 100 kiang ah a piak ban un, expanded PMUY(SECC-2011) census ah min umkhalote a di’n KYC form le a pengal ui. Songtal Indane Gramin viltrak in Sabka Sath,Sabka Gaon Sabka Vikas nuai ah amau area ah thingtang khua; Thanlon, Bukpi, Hanship, Leizangphai, Phaipheng, Mualnuam, Songtal, Sinzawl, Kangkap, Suandoh, Santing leh a dangdangte, Smokeless Village - 100 percent gas connection neisak gua ah panla uh hi’n a kigen hi.

M/S KIMJOE GAS SERVICE in Rengkai Community Hall in Ujjwala Diwas Day a mang hi. Zia hun chu Thangboi Gangte MCS, SDO/CCpur in chief Guest hina tawh a uap a, Lalramsang Infimate AC to DC/CCpur in Guest Honour hina tawh a uap hi. Himatna ahileh Mercia Lalthamawi leh Thelma te’n amapui ua, Ujjwala la music ah kiplay in, zia hun sung a chun a chiakhawm mipi te a ding ui. Zia zaw a chun, Miss Mercia Lalthamawi in Gas apat kiven ding dan tawh kisai in ziltilna hun a nei a, Ujjwala Diwas tawh kisai taklatna Lienhmingthang Simte (Partner M/S Kim Joe Gas service in a nei hi. Pradhan Mantri Ujjwala Yojana (PMUY) ahileh PM Narendra Modi in May 1, 2016 ah Ballia Uttar Pradesh ah hawndawna a la nei a hia, zia nuai a chu kum 2020 tiang ah India gamsung ah BPL innkuan crore 8 te kiang ah LPG connection a thawn ah piak ding ti a hi.

Nazareth Nursing Home in vanmatchak thak latna nei

Lamka, April 20 *(Nisin Thuhiltu)* : Hill Town ah um, Nazareth Nursing Home in dangka lakh 16 val ah vanmatchâk a chawkte uh tuzingkal dak 11 in Operation Theatre ah Pathian kiang ah latna a nei ui. Zia hun chu, Pauneisiam, Programme Executive Nazareth Nursing Home in mapui in, Pathian kiang a latna Pastor Thangchinlun, Local Pastor, EBCC, Hiangtam Lamka in a nei hi. Vanmatchâkte ahileh operation bawlna ding ah matchâk pawimaw mama, C-Arm leh Ortho Compitable OT table ahia, C-Arm ahileh Lamka a ding ah a masapen ahiban ah dangka lakh 12 val bei ah kichawdawk ahi. BPL Medical Technology Pvt Limited Bengaluru in a bawl, Chennai ah chawk ahia, taksa sunglam a gunên umte hawldawna ding ah kimang matchak pawimaw tak hi’n a kigen hi. Ortho Compitable OT table ahileh lakh 4 val bei ah a chawkdaw uh ahia, Technomed Company, Bengaluru in a bawl hi’n a kigen hi.

Farewell-cum-thanksgiving
Lamka, April 20 *(Nisin Thuhiltu)* : CCpu Govt. College in tuzingkal dak 11:00 in College Campus, Room No. 3 ah farewell-cum-thanksgiving programme a nei ua, zia hun chu, CCpur Govt. College apat 2017 batch lak ah first class a graduate student-te kiang ah kipakpina proficiency award piakna a nei ui. Hun matna Mercy Lalneikim in a mapui a, Elder Dr. Lalzagou Neihsial, Head of Geography Department in hun hawnna pauchapna nei in, Prof. L. Pangamte, Vice-Principal, CCpur Govt. College in vaidawnna thu gen in introduction a bawl a, Dr. Ricky Vanlallawm Guite, Principal, CCpur Govt. College in student-te kiang ah proficiency award leh sum piakna a nei hi. Chuleh, Rev. Vanmawia, Pastor Lamka Presbyterian Church leh President, BSI CCpur Branch in pauchappiakna a nei hi. Prof. Dr. DS Haokip, Head of History Department & Secretary, CCpur College Teachers’ Council in kipakthu genna nei in, Prof. SR Gangte, Head of Pol. Science Department & District Co-ordinator, NSS CCpur District in pauchapna nei in hun a mangzo ui. CCpur Govt. College apat 2017 batch in department chuamchuam ah student 49 first class in a graduate ua, ziate chu Anthropology department apat student 1, Education department apat 25, English department apat 4, Geography department apat 14, History department apat 2 leh Pol. Science department apat student 3 ahiu.

‘Bharat Ke Veer Marathon’ tai te Sinzawl tung

Lamka, April 20 *(Nisin Thuhiltu)* : Bollywood actor Akshay Kumar-sponsored marathon, “Bharat Ke Veer Ultra Marathon” kiti sepai martyred te zana piakna leh chawisanna ding ah organised kibawl chu chiatha zing in Mizoram a pat Singngat lampi zui ah 22nd ahiloleh 23rd April 2018 ah Churachandpur Dist. HQ tung ding uh ti a hi. Marathon taitai te ahiuleh tuni’n 54 Bn. BSF nuai ah special team 1 in Tuivai in vaidawnna a nei ua, nitak lam dak 4:30 ah Tuivai lei kan in, 33 Assam Rifles camp, Sinzawl in a zan giak ui. “Bharat Ke Veer Ultra Marathon” ahileh December 1, 2017 ah DIG, BSF, JS Oberoi in Attari-Wagah Joint Checkpost, Punjab ah flag-off a la bawl a hi. Marathon in states 24 leh Union Territories 7 te cover vek ding tu April thasung ah JCP Attari, Amritsar, Punjab tungkit zo ding ua guanggal a la hi’i. Marathon ah tai te ahiuleh marathon runner minchia mama, Samir Singh leh midang khat a hia, Samir Singh ahileh farmers’ family apat Kanaheda village , Mandsaur district, Madhya Pradesh mi a hi.

Tedim - Khominthang road black topping
Lamka, April 20 *(Nisin Thuhiltu)* : Minister V. Hangkhanlian panlakna’ Special Contractor H. Thangzamuan in Bungmual leh New Lamka kikawmtuana, Dorcas road ah black topping nasep zaw ahi dungzui in, nasem-te’n March 2, 2018 apat College road (Tedim road apat Khominthang chan) black topping a bawl pan ui. Lampi tuang ah 40-60mm a lian boulder a phah zawnung ua, blacktopping bawl a pan ua, Ngulthawng bazaar kiang chan a zotau hi. Blactopping kibawldan ahileh, suangvui suangna Tray khat ah Daba (alkatara tui) dim thum vel kihel hi’n a kigen a, Khominthang ah Zomi Secretariat chan blacktopping hiding hi’n a kigen hi. Tuni’n District Incharge, Minister V Hangkhanlian in lampi bawlte nasep dan leh lampi kibawlna etthâkna a nei a, zia hun achun a Zi Dr Kimboi leh a worker hunkhawp ban ah V Khaikhanmung, Vice Chairman, ADCC a pang ui.

Banking Scheme 2006 tawh kisai ah awareness camp
Lamka, April 20 *(Nisin Thuhiltu)* : Banking Ombudsman, Reserved Bank of India, Guwahati in tuni, April 20, 2018 zingkal dak 11:00 apat YPA Hall, Bungmual ah “Banking Ombudsman Scheme 2006” tawh kisai in awareness camp nei in a um hi. Zia hun achun, Nengkhanpau Hauzel, LDM, Churachandpur in vaidawnna thu gen in, Khupsuanlal Hanghal, Deputy Manager, SBI Churachandpur Branch in awareness camp neina tawh kisai hilchianna a nei hi. K. Rajan Babu, Assistant General Manager leh Secretary, Banking Ombudsman, Guwahati; Arijit Das, Assistant Manager, Branch Office, Guwahati leh Ruth Paununmuang, Assistant Manager, RBI Imphal te’n Banking Ombudsman Scheme chuamchuam tawh kisai zîltîlna a piak ban un, Bank Branch chuamchuam apat customer chiakhawmte apat dawtnate dawnhuna a um hi. Banking Ombudsman scheme ahileh Reserve Bank of India in a bawldaw leh Bank chuamchuam in services dangdang a neite uh customer lam apat complain umte sukvenna ding ah scheme patdaw ah um hi’n a kigen hi. Zia Scheme chun Commercial Bank, Regional Rural Bank leh Primary Cooperative Bank huapkha in, Banking Ombudsman ah Cheque, Draft leh bill piak vaigei leh thil chuamchuam ziak ah Bank lam apat commission dawn a um leh, customer te’n Bank ah complaint a thelut ding uh ti ahia, himahleh Bank lam in tha khat val complaint-tu kiang ah dawnhuna piaklo ahem, reject piak ahem ahiloleh bank lam ah dawnhuna lungtun umlo ahileh, customer te’n Banking Ombudsman ah complaint piaklut thei zing ding ti ahi. RBI in Assam, Arunachal Pradesh, Manipur, Mizoram, Meghalaya, Nagaland leh Tripura ah Banking Ombudsman ding in Anindita Battacharya a guat a, complaint zosia This email address is being protected from spambots. You need JavaScript enabled to view it. ah email theiding ahi.

Free Coaching Class zo

Lamka, April 20 *(Nisin Thuhiltu)* : TIN-FC Pan Centre & CSC Central Lamka in JNV, Tuinom, Lamka ah Class VI zilding lakna ah entrance test exam-na ding ah Free Coaching Class a bawl uh, tuni’n zaw a hi tai.Free Coaching Class ahileh a chiata April 16, 2018 ni ah kipan ahia, Sir Kamminlal Singson, Ex-JNV leh Miss Jamneikim, Ex-JNV te’n ziltîlna pia in, student 60 vel kiang ah Mental Ability, Maths, English-te ah ziltîlna a piak uh ahia, class ahileh nitak dak 4:00- 5:00 kikal ah umsek ahi. Pastor Letzathang Guite, Local Pastor, EBCC Central Lamka in naupangte a ding ah pauchappiakna nei in, Free Coaching Class khak a um hi’n Lianzagou Hauzel, Manager apat thu hiat ahi.

User Rating: 0 / 5

Star InactiveStar InactiveStar InactiveStar InactiveStar Inactive

Kum 40 nung ah Manipur mimang a inn uh tut hita

Imphal, April 15 *(Nisin Thuhiltu)* : Manipur mi kum 40 sung a tunna hiatlo ah um, Bandra, Mumbai khawpi sung ah a vak lumletna, street photographer Firoze kiti'n video la, thudawtna a neina leh laa a sakna, YouTube video ah October 2017 ah upload a bawlna a pat 15th April 2018 ni ah kimudawk chu tuni 19th April 2018 in Indigo Flight ah Imphal tut in a um hi. Imphal Airport ah a vengsung mi tamtak te leh MLA Dr Sapam Ranjan te’n vaidawnna a nei ua, lopi tak ah a chenna inn tiang uh tut in a um hi. Khomdram Gambhir chu kum 7 sung Manipur rifles ah a la sem, a insungmite hiatsaklo ah kum 1978 ah a inn uh nusia pawtdawk a hia, kum 40 sung lam a insungmi te’n a hawl zing uh himaleh a la mudaw zawlo uh a hi.
YouTube ah mudaw ah a um hun ah Khomram Kulachandra naupa (younger brother) in police te kiang ah a genna a chun, Gambhir in a inn uh a nutsia masang ah numei khat zi ah nei maleh tha 3 sung a kichen nung ua kikhen kit uh hi’n a gen a, a zi tawh a kikhenzaw tha 2 nung ah kuama hiatsaklo ah a inn uh nusia’n a gen hi. A insung mite’n a hawl zing uh tawh kitawn ah Mizoram ah um ti thu a hiat uh tawh kitawn ah Mizoram ah a nu leh pa’n va hawl maleu mun dang ah a la kichawn dawk, zia a pat chu a tunna hiatlo ah um zing ti a hi.

Moreh ah Inn 6 mei in kang

Moreh, April 19 *(Nisin Thuhiltu)* : Indo-Myanmar border town, Moreh Phaicham veng ah tuzan dak 10:30 ding vel in mei in chenna inn 6 a kaangtum hi. Zia thu ziak ahi tiang ah meikuang kipatdan leh van kangtum za hiatchian hilo maleh fire bridgade te’n meikuang phelmit gua’n panlakna nasatak a nei ui. Chuleh, inking te lak ah thingtangmi inn 2, Khailiankhual inn leh Mangpu inn le pang in a kigen a, inndangte ahileh Kolte chenna inn hi ah hiat a hi.

APWC in Annual General Body meeting nei
Lamka, April 19 *(Nisin Thuhiltu)* : All Pensioners’ Welfare Council (APWC) in tuni, 19th April zingkal lam dak 10:00 apat in Hiangtam Lamka,YPA GHQ hall ah Annual General Body meeting (PWC) a nei a, Preliminary Session dak 10:00-11:00 sung ah nei in, Annual fee collection tawh kisai sutuak in, dak 11:00 apat in Bussiness Session a nei ua, Upa HL Hminga, member Executive Committee in pauchapna tawh hun hawng in, Rev Dr.Lamboi Vaiphei, Member Executive Committee in vaidawn thugenna a nei hi. Upa Khamzadinga, Vice President mapuina member thina tuak te suunna a nei ua, Secretary (Finance) APWC mapuina’ Financial Statement, Supplement Budget leh Budget 2018-10 discussion & approval in, D. Saidoukhum Joute, Member Executive Committee in kipakthu gen in, L.Thanngur, Vice President, APWC in pauchapna tawh hun a khak hi.

JNV Academic Session 2018-19 a ding ah entrance test um ding
Lamka, April 19 *(Nisin Thuhiltu)* : Jawahar Navodaya Vidyalaya (JNV)/Tuinom ah Academic Session 2018-19 ah Class-VI simding lakna ding in April 21, 2018 ah Block 6 ah entrance test um ding a hi. Zia hun a chu exam ah pang ding CCpur disrict a pat in candidate 2151 a um hi. CCpur block a pat candidate 577 te’n Phungkhothang Govt. High School, Hiangtam Lamka ah entrance test bawl ding a hiu a, Henglep block-te’n centre 2 - Vumhao Govt High School, Tuilaphai ah candidate 115 leh Kangvai Hr Sec.School ah candidate 149 te’n entrance test bawl ding a hiu. Singngat block a pat candidate 106 te’n Singngat Govt High School ah entrance test bawl ding a hiu a, Thanlon block a pat candidate 171 te’n Bukpi Govt High School ah entrance test bawl ding a hiu. Tipaimukh block a pat candidate 178 te’n Pherzawl Govt High School ah entrance test bawl ding a hiu a, Samulamlan block a pat candidate 279 te’n INA Memorial High School ah entrance test bawl ding a hiu.

Ujjwala Diwas programme mang ding
Lamka, April 19 *(Nisin Thuhiltu)* : Kholmun Community Hall ah Vangsei Indane Gramin Vitrak in April 20, 2018 ah Ujjwala Diwas programme mang ding a hi. Zia hun chu Thangso Baite, MP (Lok Sabha); TN Haokip, MLA & President, MPCC (I); James Doujapao Hoakip, MCS, SDO/Tuibong; Kuki Inpi, CCpur; Kuki Chief Assn./CCpur; KSO/CCpur; KKL GHQ; KWU; Village Chiefs leh Social Worker-te’n uap ding, Thangso Baite leh TN Haokip te’n Ujjawala Benefeciary te kiang ah Gas piakdawna nei ding, Lalthlankim of Saidan; Thenlhing of Kholmun; K.Jangnu Kom of Chinglangmei te apat Ujjawala benefeciary tawh kisai genna um ding a hi. Chun, Simte Inn ah M/s Songtal Indane Gramin Vitrak in LPG Ujjwala Diwas Programme mang ding a hi. Zia hun chu Thanlon MLA Vungzagin Valte, Chairman, MTDC; T Paukhanlian, EM/ADCC; Grace Zamnu, MDC; T Thuamkhansuan, SDO/BDO Mualnuam; Lamminlal Simte, SDO/BDO Mualnuam; Liankhoman, Dorcas Coordinator, EBC; Chief Association chuamchuam a pat Chairman/Secretary te’n uap ding ahiu. M/S KimJoe in le Rengkai Community Hall ah Ujjwala Diwas programme mang ding a hi.

YVA Tuipiduang Block hawnna leh vaipaw ding telna nei

Lamka, April 19 *(Nisin Thuhiltu)* : Young Vaiphei Association (YVA) GHQ in April 18, 2018 in YVA Tuipiduang Block hawnna leh kum 2018-19 sung ah vaipaw ding telna Leijangphai khua’n a nei hi. Zia hun a chun, President ding in Lamzakhual of Leijangphai leh Vice President ding in Haulalson of Phainuam te teltin in a um ua, Upa Vungminthang, President, YVA GHQ in kitiam sakna nei in, Upa Lema in pauchap piakna a nei hi. YVA Tuipiduang Block election conduct ding a chun, YVA/GHQ apat President mapui S. Thanglalsiam, Gen. Secretary leh K. Chung Vaiphei, Secretary (Social & Culture) te a kua’n ua, ni 15 sung ah cabinet siamtup hiding in a kigen hi.YVA Tuipiduang block nuai in unit 11 a um a, zia te chu - Leijangphai Unit, Phainuam Unit, Thanlon Unit, Saite Unit, Saihum Unit, Santing Unit, Tuikumuallum Unit, D. Loupum Unit, Phaiba Unit, Chongchin Unit leh Phaikholum Unit te a hiu.

Swachhata Pakhwada 2018 chiapi zing
Lamka, April 19 *(Nisin Thuhiltu)* : Thianthona tawh kisai ah Swachhata Pakhwada 2018 nasep chiazawm zelin, Churachandpur Chief Medical Officer (CMO) Office Complex puaphatna a nei zawmzel ui. CMO office rawng nuthak in, CMO office tawh kizawm ah um, Malaria Department inle office a puapha thak hi. Swachhata Pakhwada 2018 ahileh a chiata, April 2, 2018 ni ah district a ding ah hawndaw ahia, April 14 apat May 5, 2018 tiang ah thianthona tawh kisai ah panlakna chuamchuamnei hiding ahi.

Awareness leh Registration Camp nei

Lamka, April 19 *(Nisin Thuhiltu)* : Sixth Sikh Light Infantry (Khuga Battalion) in tuni, April 19, 2018 zingkal dak 10:00 in Lamka TD Block Building ah Mission Sahyog nuai ahEx-Servicemen leh Disabled Soldier-te a ding in Awareness leh Registration Camp a bawl hi. Havildar Baljinder Singh in gam lei humbit ah pang, Ex-Servicemen leh Disabled Soldier-te a ding ah Central leh State Government in phatchuampi thei ding chi chuamchuam a bawldaw leh scheme patthak a um te taklatna a nei hi. Zia hun achun, Ex-Servicemen leh Disabled Soldier tamtak chiakhawm in, awareness nei zaw in Registration Camp a pan ui. Suvigya Cell in pension sum a mu ding gual ua mulo, Ex-Servicemen leh Disabled Soldier te haksatna, bawldik ngaite registration bawl piak in, a pawimaw bangkim a etpi ui. Khuga Battalion in Mission Sahyog sepdawna ding ah Mobile Interactive Terminal for Rural Area (MITRA) nuai ah Awareness leh Registration Camp a nei uh ahia, District sung a Ex-Servicemen leh gal a thi, sepai zite (Veer Naris) sum muding gual ah mulo te le,Suvigya Cell panlakna in mi 344 a, Government Treasury leh a Bank Account ua sum Rs.3,00,17,868 bawldik ding lak a tuni tiang ah mi 228-te a sukdik piak a um in, a sum a Rs. 2,04,01,499 a pension account ua lutsak hita hi’n a kigen hi.

Jio Office, BoiTeLink in kum 1 tinna lawm

Lamka, April 19 *(Nisin Thuhiltu)* : Jio Office, BoiTeLink, Lamka in tuni’n Lamka ah Jio kimat nung kum khat tinna, BoiTeLink Day-cum-Retailers’ Meet of Lamka JioPartners kiti hun a mang ui. Zia hun chu, Thoubal JC Team apat Rajkumar Bipin Singh, Jio Centre Manager, Moirangthem Biresh Singh, State Lead Sales and Distribution te’n a uap ban ua, Jio premier customer, Lel gangte, Suanlian Tombing, T.Luaichinkhup leh Jio preview customer K Lalhmangaiha, V joylian chuleh K Thanggoulian te’n special guest hinatawha uap ui. Zia hun achun, Thoubal JC team apat thugenna a um a, Liankhansiam in performance data tawh kisai gen in, Chingte Samte in presentation a bawl a, special guest te apat thugenna a um hi.

Miss Zofa International Contest 2018 kipan
Lamka, April 19 *(Nisin Thuhiltu)* : Miss Zofa International Contest 2018 kiti April 18, 2018 zingkal dak 11:00 in Hotel Floria Rooftopah pat in a um hi. Hiatding ah pawimaw leh pawimaw bangkim hiatsakna leh holimna ban ah registration bawlna’n hun a mang ua, zia hun chu Chief Organizer C.Dinthanga in a mapui hi. Organizing Committee a Vice Chairperson, Lalliani in vaidawnna thu gen in, Secretary C. Vanlalmalsawma kipat Report ngaithâkna a um hi. Miss Zofa International Contest ahileh, Zocha khawvel mun chuamchuamapatNam chuamchuam kal a kipumkhatna hawizawksêm umding dawina ziak ah bawl ahia, ga hawitak a sua ding Organizing Committee in a dawithu a gen hi. Miss Zofa International Contest 2018 ahilehApril 18apat April 27, 2018 sung mun chuamchuam a bawl hiding hi’n a kigen hi. Burma, Bangladesh, Tripura, Manipur, Halflong, Shillong leh Barak Valley ban ah, Mizoram apatchiakhawm lak ah, Lamka apat Niangbiakmawi Ngaihte@Rocy Mawi d/o S. Pauchinthang of Vengnuam, New Lamka le a pang hi. Kidemna ah khatna in Rs. Lakh 3, Car Khat leh kipakman mu ding ahia, a 2-na in Rs. 1 Lakh leh kipakman banah mi 7 kiang ah sub-title chuamchuam piak hiding ahiu.

UPF/KNO in kipakthu puang
Lamka, April 19 *(Nisin Thuhiltu)* : United Peoples’ Front (UPF) leh Kuki National Organization (KNO) in Public Consultative Meeting tawh kisai in kipakthu a puang hi. UPF leh KNO thusua in a taklatna a chun, April 18, 2018 ni ah YPA Hall, Hiangtam Lamka a Public Consultative Meeting uap tute;UPF leh KNO apat mapuitute ban ah Innpi, Chiefs, Tribe Councils, Church Leaders, Intellectuals, Civil Society Organization, Student Organizations, Social Workers, Human Right activists leh Sadar Hills, Chandel, Tengnoupal, Churachandpur leh Pherzawl District apatElected Leaderzosia chung ah kipakthu a gen ui. Zia hun matna chu, UPF leh KNO mapuitu te’n political solution a um theina ding ah Tripartite Political dialogue chiatozeltawh kisai genna nei in, zathuaptu mipi chung ah kipakthu a gen ban ua, politics a zalenna um theina ding ah mapuitu, Pathian kiang in kipakthu a gen ui. Zia hun achun, Identity, Political Demand leh maban chiading dan tawh kisai ah ngaidan genkhawmna hiseltak ah nei ahia, kalsuanna tawh kisai ah kiangnai a State dang apattîlkhona thu hiat ah um hi’n le taklang in, midang te’n min chuam ah hung ko maleu, Identity chungchang genkhawmna apat kuama dang kihilo ahi’dan a taklang hi. Thusuak in agenzelna a chun, Common Nomenclature tawh kisai thu dengdel ahiziak in kintak a thupûkna lak hilo ahi atia, chuleh Kuki/Zo suante kihokhawm zel pawimaw ahidan le taklang in, zia hun ah pangtute zosia chung ah kipakthu a vel in a gen ui.

ODF Certificate piakdawna nei

Lamka, April 19 *(Nisin Thuhiltu)* : Henglep TD Block in Chunglenmang Kipgen, MCS, SDO Henglep mapuina’ zani'n Swachh Bharat Parv (Gram Swaraj Abhiyaan) matna ah Cleanliness Drive bawl in, Block huapsung khua 3 kiang ah Open Defecation Free Certificate piakdawna a nei ui. Henglep TD Block sung a Open Defecation Free a puandaw ah um khua 3-teahileh; Vongmol, Khanpi leh L. Khaopijang ahia, khua dang le puan ahitheina ding ah panlak ah um in, maban a puandaw theiding khua bangzat hem le um hi’n SDO apat thu hiat ahi.

Khuga Bn. in thisan pia

Lamka, April 19 *(Nisin Thuhiltu)* : Khuga dam ah um Sixth Sikh Light Infantry (Khuga Battalion) in tuni, April 19, 2018zingkal in District Hospital, Blood Bank ah thisan pawimaw mikhat a ding in a thawn in thisan a piau hi. Damlo ahileh Ngaineiching (32) w/o James Lalboi Mate ahia, naunei ding ah Maternity Ward,District Hospital a admit ah um, April 18, 2018 nitak lam dak 5 in operation ahia, thisan pawimaw ziak ah blood bank ah thisan unit 2 a lak uh, ditkitna ding ah Khuga Battalion a posting ah um ngaita, Captain T. Douminlian, Assistant commandant a hiatsak dungzui ua, tuni Khuga Battalion apat mi 2- Havildar Sahib Singh leh Niak Rajpal Singh te’n thisan piakna a nei uh ahi.

Kinepna-II Premiere Show
Lamka, April 19 *(Nisin Thuhiltu)* : Zogam Film Development Association (ZOFIDA) in a bawl, Kinepna-II Premiere Show-cum-Award Distribution hun, zing (April 20, 2018) nitak dak 6:00 ah YPA Hall, Hebron Veng, New Lamka ah um ding ahi. Zia hun chu Langkhanpau Guite, MDC in Chief Guest hinatawh uap ding ahia, S. Manlian, President, YPA, New Lamka Block in Functional President hinatawh uap in, Khupthang, Social Worker in Chief Host hinatawh uap ding ahi. Film ngaina ah ennuam kua’n le etthei ding hi’n a kigen hi.

CM in Joupi Area a pat student te holimna neipi

Imphal, April 19 *(Nisin Thuhiltu)* : Manipur Chief Minister N. Biren Singh in tuni’n Durbar Hall, Chief Minister’s Secretariat ah Chandel district, Joupi area ah student 50 te leh teacher 2 banah khua-hausa khenkhat te holimna a neipi hi.
Col. Sachin Jain, Commandant of 29 Assam Rifles panlakna nuai ah zia student 50 te chu State Capital, Imphal ah tour nei a hiu. Chief Minister in zia hun a chun student te tilkhona nei in, khamthei leh thil phalo te a pat kikawi kang ding in chialna a bawl a, a haksatnau leh a pawimawna chung ua theitawp sua panlakna neipi ding hi’n a gen hi.
Joupi area ah mipi te’n Kani lei bawl chawlsan ah lemongrass chiin ding ah lemsakna a nei uh chu kipakpi mama kawm in, Assam Rifles te panlakna chu pakchat um a sakthu a gen hi.

State Government thak in ‘War on Drugs’ ti thupi nei ah khamthei dodalna nasatak a chiapi zingna chung ah Kani lei tamtak suksiat ah um hi’n a gen a, Kani lei bawl te nekhawl theina ding lampi ngaitua piak hiding, Sial vul/vak, Agar thaichi chiin ahiloleh lemongrass etc chiin ah a nekhawlnau san hiding in a gen hi.

Ama Government’s ‘Go to Hill’ mission chiapi zing kawm ah ‘Go to Village’ le May 1 ah kipan ding, zia mission dungzui a chu mun gamla tak ah um khuami te haksatna etzuipi ding hi’n a gen a, Assam Rifles te panlakna ziak ah gam kilkawng ah khuami, student, teacher te tawh holimkhawm thei ah a um chu kipak mama hi’n a gen hi. Chun, border areas siamhawina ding ah Border Area Development Programme (BADP) kituptak ah chiapi ding pawimaw in Chief Minister in a gen a, PMGSY funds 80 per cent te chu hill district ah kimang in a gen hi.

Accident tuak te govt official gari hospital tut ding ah thusua bawl
Imphal, April 19 *(Nisin Thuhiltu)* : J. Suresh Bahu, Chief Secretary, Government of Manipur in thusua a bawlna a chun, National Highway leh State Highways ah road accident a um zing sekna chung ah accident tuak te hinna humbit theina ding ah accident tuak a um hun ah Govt. office building kinaipi pen ah officer te’n a official gari’u accident tuak te hospital ah thak lumletna amatsak ding un order a sua a, Govt. gari ah chuang govt. employee te’n le accident a tuakkhak hun ua accident tuak hospital zawtpi ngai te hospital ah a thak ding un order a sua hi.

Manipur CEO thak Prashant Kumar Singh
Imphal, April 19 *(Nisin Thuhiltu)* : Election Commission of India (ECI) notification dated April 16, 2018 dungzui in Prashant Kumar Singh, IAS (MN: 1993) chu Chief Electoral Officer, Manipur ding ah guat in a um a, zia chu tawh kitawn in ama’n CEO panmun chu lua pan ngal ding a hi.

District thak infrastructure development a ding ah Rs. 19 crore: Chief Engineer

Imphal, April 15 *(Nisin Thuhiltu)* : Public Works Department Chief Engineer Kh. Temba Singh in Press Conference ah a genna a chun, Manipur ah District 7 kisiamdawk thak te infrastructure development a ding ah tu Budget Estimate 2017-18 ah Rs. 19 crore bithiat ah um hi’n a taklang a, zia lak a chu Kakching, Kamjong leh Noney in Rs. 5 crore chiat muding, Tengnoupal, Jiribam, Kangpokpi leh Pherzwal in Rs. 1 crore chiat muding uh hi’n a gen hi. Chun, Central Road Fund, nuai ah nasepna mun 13 ah chiatha zing, Ministry of Road, Transport and Highways a pat le mun 6 ah nasepna ding sanctioned um in a gen hi. Zia te lak a chu Inter State Connectivity Scheme nuai ah Mao-Tadubi to Nagaland leh Churachandpur to Mizoram kal ah nasepna chiatha zing in a gen hi.

7th Pay demand ah kiphinna chiatha zing
Imphal, April 19 *(Nisin Thuhiltu)* : State in 7th pay commission a chiapi ding demand bawl ah kiphinna um zing in, tuni’n All Manipur Agricultural Department Employee Welfare Organisation (AMADEWO) mapuina employees te’n Sanjenthong ah a office mai un, sit-in protest a nei ui. Loitongbam Sanatomba Singh, General Secretary, AMADEWO in thuthak lakhawm mite kiang ah a genna a chun, AMADEWO employees te chu Joint Administrative Council (JAC) of All Manipur Trade Unions’ Council (AMTUC) leh All Manipur Government Employees’ Organisation (AMGEO) demand support bawl ah kiphinna nei a hidan uh gen in, demands lawtin masang sia panlak khawmpi zing ding uh hi’n a gen hi. Chun, state kinaipi - Assam, Tripura, Meghalaya ah 7th pay commission scheme chiapi hita himaleh bang ziak ah government of Manipur in zia scheme chiapi thei nailo a hi em? ti’n dawtna a siam a, state government chu Manipur ah 7th pay commission chiapi a hitheina ding ah central government thuhiat ah panla ding in nawna a bawl hi.

Khongjom Day matna ding ah kisingsakna chiatha zing
Thoubal, April 19 *(Nisin Thuhiltu)* : A hung tung ding 23rd April ah Manipur Khongjom Day 2018 matna ding tawh kisai in Khongjom War Memorial Complex, Kheba Ching, Thoubal ah tuni’n Deputy Commissioner, Thoubal, Haobam Rosita leh DLO te banah high ranking Police Officers te’n kisaklawkna nei in, arrangement bawlna a nei ua, Khongjom War Memorial, Paona Brajabashi statue, Khongjom river (tarpan site), Sankirtan Pandal, Main Pandal,..etc te etthakna a nei ui. Deputy Commisioner in Khongjom Day lawtinna ding ah mizosia’n panlakna nei chiat ding a nawp thu a gen hi.

Minister Kayiisii in ADC/Ukhrul residential quarters hawng

Ukhrul, April 19 *(Nisin Thuhiltu)* : Manipur Tribal Affairs & Hills and Fisheries Minister, N. Kayiisii in tuni’n Ukhrul ah Chairman leh Vice Chairman, Ukhrul ADC te Official residential quarter ding hawnna a nei hi. Quarter ahileh ADC office kiangnai ah kisa a hi. Official residential quarter hawnna a neizaw in, Minister, N. Kayiisii in “Ukhrul Town Beautification Drive” hawnna le a nei a, Ukhrul Autonomous District Council panlakna chu pakcha mama kawm in, thianthona ding ah mizosia’n panlakna a nei chiat ding pawimaw in a gen hi. Zia hun mat chu K. Leishiyo, MLA-Phungyar AC, Khashim Vashum, MLA-Chingai AC, Chairman leh Vice-Chairman banah ADC member, DC leh SP/Ukhrul, DLO, CSO leader te’n le a uao ui. ADC official thusuak dungzui in, zia “Beautification drive of Ukhrul town” drive chun, on sanitation leh waste management ngaikhawk pen ah nei ding, “2ndShirui Festival” masang ngei ah Ukhrul district thiangtho tak ah kawi ding ti a hi. Chuleh, funding dang bei ah ADC panlakna liauliau ah Beautification drive chiapi hiding in a taklang hi.

Page 1 of 23