Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

Health Minister in CCpur District Hospital entha

Lamka, Oct. 11*(Nisin Thuhiltu)* : Manipur Health Minister Langpoklakpam Jayantakumar Singh in V. Hangkhanlian, Minister, Agriculture, Veterinary & Animal Husbandry leh Ginsuanhau, Chairman, MANIREDA & MLA 60 Singngat Assembly Constituency te tawh tuni, October 11, 2017 in District Hospital, Churachandpur leh CMO Complex a um, GNM College of Nursing et-thakna a nei hi. Zia hun a chun, Casualty mun ah District Hospital in a pawimaw chuamchuam um te Dr. J. Son Gokham Samte, Medical Superintendent leh Dr. Shyamsunder, Additional Director in a genpi a, District Hospital pawimaw thil te zikthaw ah le piakna a nei hi. Zikthaw ah Churachandpur District Hospital pawimaw piak ah um in a taklatna a chun - District Hospital chu Medical College ah dawpsan ding, zia ding a chu DPR le Health Department nuai ah Administration umta; PPC Building chu OT Building leh CTC Building tawh kizawm ding ah bawl ding; Warehouse thak sak ding; OPD Complex puaphat ding; Medical Officer 42 Hospital in a pawimaw lak ah Medical Officer 24 tasam; LDC post 6 pawimaw lak ah post 5 hukdimlo ah um; single slice CT Scan leh USG chu tulai technology tawh kituak ah thendaw ding; Free Diagnostic, Pathology mun ah Automatic Cell Couter kawi ding, OT Table 2 leh Multipara Monitor 3 kawibe ding ti te a pang hi.

Casualty a pat MS Conference Hall ah hun matna saulo a um a, zia hun a chun, Health Minister leh a Team-te thilpiak piakna a um a, zia zaw a chu Health Minister in OT Building ah CT Scan panna, Machine kimang chuam chuam te etthakna nei in, GNM College of Nursing a nei zawm hi.

GNM College of Nursing building et-thakna a nei hun in, building leh a sung ah room chuamchuam banah toilet, bathroom ti tedinmun etthakna a nei hi. GNM College of Nursing tawh kisai ah Minister in Health Director leh staff-te tawh thil umdan genkhawm ding leh building siamphat hiding in a gen a, zialo a chu a kituplo thil chuam chuam um te le siamhawithak hiding in a gen hi.

DLCC- cum Review meeting nei

Lamka, Oct. 11 *(Nisin Thuhiltu)* : Shyam Lal Poonia, IAS, DC/CCpur mapuina’ tuni’n Conference Hall, DC Office, Tuibong ah District Level Coordination Committee (DLCC) - cum Review meeting a um a, zia hun a chun, Bio-matric /Aadhar enrollment chungchang genkhawmna a um hi. Zia hun a chun, Aadhar enrollment pawimawna tawh kisai ah awareness programme chiapi ding in District Level Officers (DLO) te mawpuakna piak in a um ua, DLO te’n public, Govt. schools, school-dropout etc ah awareness a bawl ding uh ti a hi. A kigendan ah Central Government in tunung sawtlo ah thil zosia Aadhar card pawimaw ding ah puang thei ding a hina chung ah mizosia’n Aadhar enrollment a hiatthiam ding, a ki enroll ding uh pawimaw in a gen hi. Meeting hun sung a chun, district sung ah Infrastructure, work progress leh DLO te sepdaw leh bawldaw um te le ngaithakna a um a, DLO ten zing 12, October, sun dak 12:00 masang ah report kimtak DC kiang ah a piaklut ding un lemsakna a nei hi. Chuleh, Deputy Commissioner in DLO te chu regular tak ah zingkallam dak 9:30 a pat office hawng ding in hiatsakna a bawl a, meeting in DLO 36 te a pang ui.

Lawi (buffalo) thu’ kinak ziak ah thina tuak
Lamka, Oct. 11 *(Nisin Thuhiltu)* : Sainolian Village, Thanlon Sub-Division ah lawi (buffalo) thu ah kinial buaina ziak in Lamzagin (47) s/o Thangkhosiam of Sainolian/Gangpimual chu sawisak lup in a um a, tuni’n a luang Gangpimual tut in a um hi. A ki hiatdan ah inn kiang ah lawi (buffalo) kihen, husat ziak ah lawi (buffalo) neitu Lamlunlal (24) s/o (L) Helkhogin of Sainolian Village tawh a kinial buai ziak ua, Lamzagin (47) chu khetlup khak ah um hin a kigen hi. Zia thina chung a chu indawngcha vai ah kiholemna nei ding un a kigen a, himaleh khutkhial Lamlunlal (24) s/o (L) Helkhogin of Sainolian Village chu Thanlon Police Station ah kipelut in a kigen hi.

Joint Prebytery Khawmpi mang ding
Lamka, Oct. 11 *(Nisin Thuhiltu)* : Presbyterian Church of India, Mizoram Synod: Manipur Area in a hung tung ding 20-22, October 2017 leh Lingsiphai Kochuam Biak-inn ah “.....la lungthim uh siam thaka umin hung danglam zaw ta un” (Rome 12:2) ti thupi mang in “ 2nd JOINT PREBYTERY KHAWMPI” mang ding a hi. Zia hun a chu Speaker ah Rev. Lalrinmawia, i/c Electric Veng Pastor Bial (Ex Synod Moderator) pang ding a hia, Khawmpi Secretary ah Upa Ginkholian, Mata Pastor Bial, Upa Lalthuoisang, Lamka Pastor Bial te pang ding a hiu. Chun, khawpi hunsung ah Pastor bial chuam chuam - D. Khawzim, Kangvai, Dumlian, Panglian, Kawlhen, D. Phailian, Munpi, Sugnu, Phaipheng, Imphal, lamka, S. Kawtlian, Leilon, Saronphai Pastore etc te banah Manipur Area Choir te’n laapawl sakna nei ding a hiu.

Special Aadhaar Camp 2017 nei

Lamka, Oct. 11 *(Nisin Thuhiltu)* : Lamka TD Block sung ah khua 60 ah Aadhaar kila nailo te laksuak vek a hitheina ding in tuni’n Hiangzou khua ah Hausapu Upa P Tuahchinhua Inn ah Special Aadhaar Camp 2017 pat in a um hi. Special Aadhaar Camp 2017 ahileh Sub-Divisional Officer SDO, CCpur saina nuai ah Manitron, CCpur kithuapina tawh nei ah um a hi. Zia hun a chun, Manitron, CCpur a pat AE Supervisor Lalboi Ngaihte leh V Lyansangmung ten Hiangzou Khua sung ah Aadhaar Card nei nailo kum 5 chunglam te ding in registration, Aadhaar lak a pan ua, Lamka TD Block a pat Staff 2 leh Lambu 2 in a kithuapi ui.

Aadhaar card kilakna ding a chun, Student te School I-Card leh Passport khat mat thei a hia, piting te a ding ah Voter I-Card, Driving licence ahiloleh Khua-hausa a pat khaw-sung mi ngei a hinai ti a kichetna ding ah Residential certificate banah Passport khat a pawimaw hi.

Special Aadhaar Camp 2017 hun sung ah Thangboi Gangte, SDO CCpur in Special Aadhaar Camp 2017 chiapi ah a umna tawh kisai a genna a chun, Aadhaar kila kha nailo te khualna ah Home Department leh District Commissioner, CCpur thupiak dungzui ah Special Aadhaar Camp 2017 nei ah um hin a gen a, tuni ah camp kinei chu a thumveina hita hin a gen hi. Special Aadhaar camp chu ngaikhawk chiat ding ah mipi te chialna bawl in Aadhaar card neilo te’n tunung ah
government scheme chuam chuam - NREGS, PMAY, Social Welfare, Scholarship ti te panna thil chuam chuam mutheilo ding uh a hidan taklang kawm in Aadhaar card pawimawna kibelap zing thei ding hin a gen hi. Chuleh, October - December 30 sung ah mun chuam chuam ah Aadhaar camp nei hiding a hidan taklang kawm in, mipi te kithuapina pechiat ding leh Camp lawtinna ding ah panlakpi ding in chialna a bawl hi.

NT12oct2017b

Health Minister in Tunnu School of Nursing hawng

Lamka, Oct. 11 *(Nisin Thuhiltu)* : Tunnu School of Nursing, Pearsonmun hawnna leh latna tuni, October 11, 2017 sunma dak 11:00 in a um hi. Zia hun chu Langpoklakpam Jayantakumar Singh, Minister (Health, Family Welfare, Law and Legislative Affairs and Arts & Culture) Manipur in Chief Guest hina tawh a uap a, Ginsuanhau Zou, Chairman, MANIREDA & MLA 60 Singngat Assembly Constituency in Guest of Honor hina tawh uap in, Vungzagin Valte, Chairman, MTDC & MLA 56 Thanlon Assembly Constituency in Chief Host hina tawh a uap hi. Chief Guest Langpoklakpam Jayantakumar Singh in Tunnun School of Nursing hawnna a nei a, Rev. S. Vung Minthang, General Secretary, EBC in pauchapna tawh a lan hi. Paukhenkhup Guite, Director, Tunnu School of Nursing patdaw ah a umna tawh kisai genlatna a nei hi. Chun, khulian te a pat thugenna a um a, Chief Guest Langpoklakpam Jayantakumar in a thugenna a chun, programme dang nei maleh damtheina lam thil a hi ziak ah ngaikhawkna liantak tawh zia hun matna chu uap a hidan taklang kawm in, mi zosia’n Right to Live a nei dungzui ah nurse te’n mawpuakna nei a hidan uh a gen a, degree nei mai hizawlo ah a pawimaw hun ah matthiam pawimaw a hidan a gen hi. nausen piangtil te etkawlna tawh kisai ah a hithei chan ah panpi ding a hidan le a gen hi. Tunnu School of Nursing in ahileh September 14, 2016 ah School bawl theina ding ah Licence mu a hia, school ah GNM zilthei hiding a hi.

Minister V. Hangkhanlian in Prize piakdawna nei

Lamka, Oct. 11 *(Nisin Thuhiltu)* : Kawmpui a um Ngahthal, Khawmpui, Thingkangphai NKT High School in amau school huangsung ah tuni’n Annual Sport and Games 2017 Prize hawpdawna a nei a, zia hun chu V. Hangkhanlian, Minister Agriculture, Veterinary and Animal husbandry, Government of Manipur in Chief Guest hina tawh uap in Prize piakdawna a nei hi. Zia ah hun matna chu Miss Nempineng, Assistant Teacher leh Henry L Seiminlal Haokip, Assistant ten hun matna a mapui ua, K Laldawngliana, Chairman, School managing Committee school dinmun tawh kisai genlatna nei in , Chief guest V Hangkhanlian in prize piakdawna leh thugenna a nei hi.

RSETI nuai ah training chiatha zing
Lamka, Oct. 11 *(Nisin Thuhiltu)* : Bijang a um State Bank of India-Rural Self Employment Training Institute (SBI-RSETI), Temporary Office ah trade chuamchuam khangthak sepna neilo te traning a piak uh chu chiatha zel in tulai in Beauty Parlor Management leh Basic Videography training a chiapi ui. Beauty Parlor Management ahileh ni 30 sung um ding a hia, 6 -10 October 10 sung ah Mangboi Vaiphei, Faculty, SBI-RSETI in Rural Entrepreneurship Development tawh kisai ah ziltilna nei in, Lhainunnem, Beautician practical ah ziltilna a nei hi. Beauty Parlor Management traning a chun kum 18 leh 45 kikal mi numei 23 a pang ui.

State Cabinet in Social Security Schemes 2 approve

Imphal, Oct. 11 *(Nisin Thuhiltu)* : State Cabinet in Social Security Schemes pani implement ding ah proposal ah um chu approve a bawl hi. Scheme 2 te chu - Chief Ministergi Sottharabasingi Tengbang (CMST) leh Hakshelgi Tengbang approve a bawl hi. Chief Ministergi Sottharabasingi Tengbang (CMST) ahileh (i) high degree disabilities ah registered te a ding ah allowance/maintenance grant (ii) skill training a ding ah self employment loan, subsidy/grants (iii) disabilities student te ding ah scholarship (iv) differently-abled persons te free travel concession (v) inn neilo teksia te maintenance grant piak theina ding a hi.

Hakshelgi Tengbang (Manipur Health Protection Scheme) ahileh BPL/migenthei te damlona serious ziak ah hospital tut ah um te free medical treatment piak ding ahi. Zia scheme nuai a hi, medical treatment Rs. 2 lakhs tiang per family per year cover thei ding , floater basis ah a hiding a hi. Chuleh, natna chi chuam chuam 800 - critical ailments - cardiovascular diseases, cancer, kidney diseases, neonatal diseases, neurological conditions leh burns te le zia scheme hin cover ding a hi.

Cabinet in All Manipur Working Journalists’ Union (AMWJU) in Press Colony a sakna ding ah gam piak ding in lemsakna a nei a, Central Board of Secondary Education (CBSE) affiliation a ding ah school 4 - Imphal Valley School, Mantripukhri, Imphal East, Shishu Nishtha Niketan, Moirang Kampu Sajeb, Imphal East, Tolchou Ibeton Memorial Academy, Hiyangthang, Imphal West leh Bethel English School, Nambol te no objection certificate (NOC) piak ding in lemsakna a nei hi.

Manipur Infrastructure Development Agency (MIDA) siamthak ding, Chief Minister hizawlo ah senior Minister ahiloleh Government official khat Governing Body Chairman ah guat ding in lemsakna a nei a, Indian Forest Service, IFS HAG + scale ah ex-cadre post, Principal Chief Conservator of Forest (Wild Life) umsak ding ah lemsakna le siam in, CAF & PD, Manipur a ding gam (land) 14 acres, C.S. Dag No. 565/756 of Village No. 83 – Lamjaotongba, Imphal West piak ding in le lemsakna a nei hi.

7th Pay Commission: University, College teacher 7.5 lakh te thalaw pung ding ah Narendra Modi Cabinet in approve bawl

New Delhi, Oct. 11 *(Nisin Thuhiltu)* : Union Human Resource & Development Minister Prakash Javadekar in tuni’n Union Cabinet lemsakna dungzui ah Central, State University te leh aided colleges ah teacher 7.58 lakh te’n Seventh Pay Commission benefit mu ding a hidan uh a puang hi. Zia dungzui a chu, IIT panna Central University 213 ah professors 58,000 te’n Centre a pat full funding mu ding a hiu a, academics lam ah career siamnuam te tilkhona ding ah ziagual lemsakna chu um hin Prakash Javadekar in a gen hi. 7th Pay Commission line ah state university 329 leh colleges 12912 ah Assistant leh Associate Professor te’n thalaw (salary) pung ding, zia chu January 01, 2016 a pat hiding in le Javadekar in a gen hi. Prime Minister Narendra Modi chairman hina nuai ah Union Cabinet meeting in Central Government employee te ding ah 7th Central Pay Commission chiapi a hi tak tawh kitawn ah University Grants Commission (UGC) leh Centrally Funded Technical Institutions nuai ah higher educational institutions ah teacher 8 lakh te pay scales, revision bawl ding le approve a bawl a, zialo a chun IITs, IISc, IIMs, IISERs, IIITs, NITIE. Etc panna Centrally Funded Technical Institutions 199 ah teacher te chu revised pay package cover sak ding in lemsakna a nei hi. Zia ding a chu annual Central financial liability on account a ding Rs. 9,800 crore hiding a hi.

Zia ah teacher te pay revision dungzui a chu teacher te pay Rs.10,400 leh Rs. 49,800 range hiding, 22 percent -28 percent ah thalaw (salary) kal ding a hi. State Govt. funded institutions te ding ah revised pay scales ahileh State Governments tin in a siam ding, zia ding a chu Centre in Rs 1400 crore per year ah a puakdaw ding leh State te’n additional Rs 8400 crore a puakdaw ding uh ti a hi. Hiatthei khat chu, kum 2016 a khah 5-member University Grants Commission (UGC) pay review committee siamdaw in a la um a, zia chu VS Chauhan in a mapui, pay review committee in February tha ah university leh college teacher te pay 20% ah sukpun ding ah recommend a la bawl dungzui ah ziagual lemsakna chu siam ah um a hi.

Sports University hawnna ding ah bangkim felta: CM N. Biren Singh

Imphal, Oct. 11 *(Nisin Thuhiltu)* : Manipur Chief Minister N. Biren Singh in Commissioner YAS, H. Deelep Singh, Director YAS N. Praveen Singh banah department official te tawh tuni’n Khuman Lampak Sports Complex, Imphal ah a chiatha zing repairing work etthakna a nei hi. Zia hun a chun, Chief Minister in Manipur Olympic Association, Khuman Lampak building sung ah temporary Sports University office vena le a nei a, Sports University a ding ah panlakna um te chung ah lungtun um a sakthu taklang kawm in, India gamsung ah first Sports University hawnna ding ah kisingsakna zawthian hita hin a gen hi. Prime Minister in hawnna a nei thei ding hun state government in ngak zing, PM a lemchan hun hun ah Sports University hawn hiding in a gen hi. Main Stadium Ground chu International Standard tawh kituak ah football ground a siamdaw hiding a hidan le taklang kawm in tha kit leh I-league tournament a kipat masang ngei ah natural grass turf fields sua hiding in le a gen hi. Repairing work bangkim chu quality neitak a hiding le pawimaw a hidan a gen in, kituptak ah etzui hizing ding in Chief Minister in a gen a, tunung sawtlo ah Main Stadium leh Hockey Stadium ah Flood lighting system kawi hiding in a gen hi. Football ah lunglut state sung ah mitamtak a umna chung ah government inKhuman Lampak Sports Complex kituptak ah siamthak ding ngaikhawk a hidan le taklang in State Government in Imphal East, Imphal West leh Thoubal district ah playground 2 /3 te chu astro turf (artificial turf) ah siamdaw ding ah guanggalna nei in le a gen hi. Chuleh, a kisaipi thuneitu te chu Detailed Project Report siam ding ah hiatsakna bawlzo ta leh Khelo India scheme (a National Programme for Development of Sports nuai ah playground siamna chiapi hiding in a gen hi.

Transparency, gin-um tak leh kukal tak ah panlakna a pat kisanna um ding: CM

Imphal, Oct. 11 *(Nisin Thuhiltu)* : Chief Minister N. Biren Singh in tuni’n 1st MR Banquet Hall, Imphal ah Police-Press Workshop hawnna a nei hi. Workshop ahileh Manipur Police Department in Manipur Police,125th anniversary matna ding tawh kisai ah organize a bawl a hi. Ama’n a thugenna a chun, transparency, gin-um tak leh kukal tak ah panlakna a pat kisanna (change) um thei ding a hidan taklang in, state government in mipi te tawh kal (relation) hawitak nei zing ding ngaikhawk mama a hidan a gen hi. Mipi te tawh relationship hawitak a um theina ding ah state sung ah buaina neucha cha um te sukven ding pawimaw in le a gen a, government thak nuai ah mipi te phatchuampi thei ding scheme chiapi ah um te a pat gausua hawitak a um theina ding ah government in theitawpsua panla ding hi dan le a gen a, mipi te haksatna sukvenna a pat government leh mipi te kal (relation) hawi tak um thei ding hin le a gen hi. Democratic State ah Media chu fourth pillar khat ahidan le taklang in Rule of Law hatzawm semna ding ah media te’n pawimawna liantak um ahidan genpum in journalist te’n sensitive news report a bawl tak ua leh professional ethics a chiapi ding uh, zia a pat chu police ten buaina um te a sukven ding uh hin a gen hi.

Tuhun ah mipi te’n Police te muan-ngamna nei a hitak dan le gen in, hill leh valley ah um te’n State leh National Highways ahpolice patrolling a um ding phutna a nei tawh kitawn ah state sung ah mipi te leh police te kal (relation) hawi mama ta a hidan kilang in le a gen hi.

Police te mawpuakna, kituptak ah dan leh thupiak (law & order) umsak ding a hi dungzui ah a mun tak ah thil umdan leh nuai um te kichian tak ah a hiat uh pawimaw in a gen a, zia chu ahilo leh police te panlakna lawting tak tak theilo ding hin a gen hi. Police Department nuai ah cyber crime unit in case chuam chuam sufel uh leh buaina tamtak pumpel thei ah um in le a gen a, Union Minister for Road Transport & Highways Nitin Gadkari tawh tha masa National Highways siamphatna ding ah Rs. 32 crore released bawl ding ah kihona nei a hdian uh le taklang in National Highways leh state ah lampi thak 12 siamna zia sum chu mat hiding in a gen hi.

Police-Press Workshop hun a chun, Resource persons leh subject expert ten media leh police - media management, safety of journalists, ethical reporting etc tawh kisai genna a nei ui. Workshop hawnna hun chu DGP L.M. Khaute, President AMWJU Wangkhemcha Shamjai, top police officers leh media person ten a uap ui.

Petrol Pump Dealer te’n 13th Oct leh Gen. Strike bawl ding
Imphal, Oct. 11 *(Nisin Thuhiltu)* : Petrol Pump Dealer te’n India gamsung pumpi huap ah October 13, 2017 leh GST nuai ah marketing discipline guidelines siamkhum ah um leh nisin ah petroleum leh diesel man (prices) a kisan (change) sukbei ding phutna One-Day General Strike nei ding a hiu a, zia chu tawh kitawn ah Manipur state sung ah Oil Pump te le kikhak ding a hi. Ziana chung a chu Department of Consumer Affairs, Food & Public Distribution, Government of Manipur in state mipi te pataulo ding in chialna a bawl a, stock kining tak um hin a gen hi. Tu leh tu ni 32 sung dai ding petrol, ni 40 dai ding diesel, ni 34 dai ding, SK Oil, ni 3 dai ding LPG leh ni 14 dai ding Aviation Fuel stock um in a taklang hi. Stock umsa banah oil tanker hun tiang in petroleum products state sung tut zing nalai in a gen a, lauthawn ziak ah kuama petrol ahiloleh diesel kichawk khawllo ding in dawtna a siam hi. Chuleh, petrol pumps te kikhak ding himaleh Petroleum products Black market ah zawk phal hilo ding in le hiatsakna thusua a bawl hi.

Student te data diklo 20 Oct. tiang ah sukdik thei ding
Imphal, Oct. 11 *(Nisin Thuhiltu)* : Dr. Maisnam Bidyasagar Secretary,Council of Higher Sec. Edn. Manipur in tuni thusua a bawlna a chun, Council of Higher Secondary Education Manipur nuai ah Institution te'n student te data diklo, double ah umkha, Registration Certificate, enrolment, registration withdrawal/cancellation um te late fine bei ah 20th October 2017 tiang ah sudik thei ding uh hin a taklang a, a hun kikhel nung ah kuama limsak hita lo ding in le a taklang hi.

Fish Fair -cum-Fish Crop Competition, 2017 um ding
Imphal, Oct. 11 *(Nisin Thuhiltu)* : 21st October 2017 leh “Ningol Chakkouba” mat ah a umna ding ah Department of Fisheries,Manipur saina 20th october, 2017 leh Fish Fair -cum-Fish Crop Competition, 2017 um ding a hi. Zia a chu district zosia a pang nuam taphawt pan thei hiding a hia,a pang ding te'n nga (fish) kg 1000 a puakdaw ding uh, department in fixed a bawl rate dungzui ah nga (fish) a zawk ding uh, department in transportation charge bangkim puakdaw piak ding a hi. Chuleh, zia competition a chu First Prize Rs 1,00,000/- Second Prize Rs 70,000/- Third Prize Rs 50,000/-, Local nga pawdawk tam penpen Prize Rs 20,000/- Consolation Prize mi 20 te kiang ah Rs 10,000 chiat piak hiding a hi. Lunglutna neiten 15th October 2017 tiang ah District Fisheries Officer/Chief Executive Officer te a thuhiat uh ngai ding a hi.

Leimakhong ah army recruitment rally khak hita

Imphal, Oct. 11 *(Nisin Thuhiltu)* : Army Recruitment Office,Rangapahar saina 3- 10 October 2017 sung ah KV Football Ground Leimakhong ah Army Recruitment Rally um chu zani a khan khak in a um hi. Thiangtho tak ah Recruitment Rally zaw thei ah um a hidan PRO Defence, Imphal in a taklang a, 03 Oct 17 - 08 Oct 17 sung ah Physical test bawl ah um, 10 Oct 17 ah medical test bawl ah um hin le a taklang hi. Chuleh, candidates registered 14415 um te lak ah candidate 10466 te run test ah pang un a taklang a, final selection tiang ah pang te chu – Soldier (General Duty), Soldier (Technical), Soldier (Clerk-SKT) Soldier (Nursing Assistant), Soldier Trademan leh Havildar Education ah sem ding a hiu a, candidate 2045 (approx) te’n physical test zo uh ti a hi. Chun, Physical test leh Medical test zo te’n Rangapahar, Dimapur ah 29 October 2017 leh Common Entrance Exam nei ding a hiu.

Film and Television Institute of India, Pune ah Chairman thak ding ah actor Anupam Kher guat in a um hi. Ama’n Chairman lui Gajendra Chauhan thasan ding a hi.

User Rating: 0 / 5

Star InactiveStar InactiveStar InactiveStar InactiveStar Inactive

PHC Behiang in thiantho ziak ah Kayakalp Award 2016-2017 sâng

Lamka, Oct. 9: National Health Mission (NHM) Manipur organised bawlna’n tuni, October 10, 2017 sunnung dak 2:00 in JNIMS Auditorium, Porompat ah 2016-2017 a ding, Kayakalp Award hawpdawna a um hi. Zia hun chu L. Jayantakumar Singh, Minister, Health & Family Welfare, Manipur in Chief Guest hina tawh a uap a, S. Subaschandra Sing, Parliamentary Secretary, Health & Family Welfare, Manipur in Functional President hina tawh uap in, Sumant Singh, IAS, Secretary, Health & Family Welfare, Manipur leh Professor Th. Bhimo Singh, Director, JN. Institute of Medical Sciences te’n Guest of Honor hina tawh a uap ui. Kayakalp Award 2016-2017 ah Manipur damlo-inn thiangtho pen in PHC Behiang a pang a, L. Jayantakumar Singh, Minister, Health & Family Welfare in Award piakdawna a nei hi. Award chu Citation leh Rs 2 lakhs a hia, PHC Behiang thasik ah MO in-charge, PHC Behiang Dr. M Steve Tunung in a sâng hi. Chun, hun matna chu Dr Kim Simte, Chief Medical Officer, Churachandpur District in le a uap hi.

World Mental Health Day 2017 mang

Lamka, Oct. 10 *(Nisin Thuhiltu)* : Rayburn College in tuni’n Rayburn Chapel ah World Mental Health Day 2017 matna a um a, zia hun a chun teacher chuam chuam a pat thugenna a um ban in student te a pat skit lakna a um hi. Hun matna a chun Teacher leh Student te Group 8 ah kikhen in, Mental Health tawh kisai Breaking Session um in zia hun a chun “Depression & Anxiety”, Physical Health, Substance Abuse, Psychological Testing, Suicidal Awareness, Art Therapy, Relaxation Therapy banah Parents Guidance and Counselling ti te tawh kisai ah teacher chuam chuam in hun a matpiu hi. Hun matna chu student leh nu-le-pa hunkhawp te’n le uap in phatchuampi mama uh hi’n a kigen hi.

PTC demna leh sawiselna um te tawh kisai ah PTC GHQ in thusua bawl
Lamka, Oct. 10 *(Nisin Thuhiltu)* : Paite Tribe Council (PTC) General Headquarter in October 17 – 20, 2017 sung Bukpi khua’ um ding General Assembly-cum-Election 2017 chung chang ah social media leh networking site chuam chuam thu kigen te tawh kisai thusua a bawlna a chun, WhatsApp leh social networking/ media chuam chuam ah PTC demna leh sawiselna ding hawl ah nampi vaihawmna te mimal vaihawmna suak sak gua ah panla te, kisuk minsiat utna/ tupna ziak leh mimal huatna ziak ah a lang- a lang ah tai te, khawmpi lawtin ding dawilo ah panlatu te chu nasatak ah nam gensia, musit leh sukmualpho gua hi un a taklang a, nampi vaihawmna leh nam in a zui ding dân a bawl te kal ah tawi te ziak ah kuama lung hei ziang lo ding banah social media chuam chuam ah admin te’n zia gual thute chu thulâk ah nei lo ding in chialna a bawl hi. Chun, nampi kipumkhatna susia thei ding thil te post lo ding ah dawn kawm in khawmpi lawtinna ding ah pauchapna’ pangchiat zaw ding in le chialna a bawl hi.

SSA Primary teacher te 5 days training kipan

Lamka, Oct. 10 *(Nisin Thuhiltu)* : District Project Office (DPO), Sarva Siksha Abhiyan, Churachandpur District saina’ tuni’n DTC Hall, Tuibong ah SSA primary teacher 100 a ding “5-days training on early reading and writing with comprehension and early mathematics under Padhe Bharat Badhe Bharat” hawnna nei ah um in training a kipan ngal hi. Training hawnna hun chu Thienlaljoy Gangte, MCS, AC To DC, DC Office in chief guest hina tawh a uap a, N Chingkhei Singh, ZEO/DPO SSA CCpur leh Ch Bobichand Singh, Program Officer/ DPM SSA CCpur te’n Functional President leh Guest of Honour hina tawh a uap u’i. Function President Ch Bobichand Singh in vaidawnna thu leh ni-5 sung training neina ding ziak genna a nei a, Chief Guest Thienlaljoy Gangte, MCS AC To DC in training hawnna nei in thugenna hun le a mang hi. Ni 5, October 10 - 14, 2017 sung um ding training hun sung a chun Resource person chuam chuam - Science teacher Lokee Thiyam, Mathematics teacher Gospel Laltranthang, Social Science Teacher Kimneihat Gangte, Khuollien Gangte leh Sovarani Deive te’n thupi chuam chuam mang ah ziltilna pia ding ahiu a, zia hunsung a chun SSA Primary Treacher 100 pang ding a hiu.

PO ah Canopy Campaign kipan

Lamka, Oct. 10 *(Nisin Thuhiltu)* : Postal Services, Churachandpur saina’ tuni, October 10, 2017 in Tuibong Post Office mai ah ni 2 um ding ‘One Stop Solution for Saving, Insurance and Mail & BD Needs’ tawh kisai Canopy Campaign tuni’n a kipan a, zia hun a chun Post Office ah Saving Account, Recurring Deposit, Insurance leh a dang dang tawh kisai buaina neite leh Post Office in Scheme chuam chuam a neite hianuam te’n a kanchian ua, tuni’n a account chi 3 – Savings Account (SA), Recurring Deposit (RD) leh Sukanya Samriddhi Account (SSA) te tangpi ah chiapi hideu zia hun a chun Mohammed Nasir, Sub-Divisional Inspector of Post Offices, Churachandpur Sub-Division in le amun in nasepna ethâkna a nei hi. Post Office Savings Account ah a hileh Simple Interest 4% a hia, minimum balance (ordinary account ah) Rs. 50 leh Cheque account ah Rs. 500 a hi banah maximum balance chu fixed umlo a hi. RD a hileh kum 5 sung, kum khat a 4-vei compound interest tawh percent 7.1 ah pung ding a hi. SSA a hileh numei naupangte a ding a hia, kum 21 a hiloleh numei naupang in pawsal a nei hun, amasa zaw penpen tiang, kum khat ah compound interest tawh percent 8.3 ah pung ding leh numei naupang account ah a tawm pen a kum khat ah Rs. 1,000 kawi ngai ding a hi. Canopy Campaign a hileh zing leh sutzawp hi ding a hia, zia hun chuleh Monthly Income Scheme (MIS), Senior Citizen Savngs Scheme (SCSS), Time Deposit (TD), Public Provident Fund (PPF), National Savings Certificate (NSC), Kisan Vikas Patra (KVP) leh Post Office a Savings Account banah Postal Life Insurance ah phatchuamna chuam chuam hiatnuam neite’n kanchian thei ding a hiu a, a mun ah le account hawn thei ngal ding a hi.

Nek leh châk siamna mun te entha

Lamka, Oct. 10 *(Nisin Thuhiltu)* : Food Safety and Standard Wings, Churachandpur in tuni’n khawpi sung ah nek leh châk zuakna mun chuam chuam a phakual u’i. Food Safety and Standard Wings in a hileh tuma lam a pat nek leh châk zuakna banah thingpi hotel tite a thiangtho huntawk nam ti etthâkna a nei hun ua, nek leh châk bawldan tawh kisai lungtun umlo a sakna mun te uh tuni’n etthâkna a nei kit ua, zia hun a chun etthâkna a nei masak hun uh sang ah damthei huai zaw hi ah mu in lungtung mama uh a hidan a mudawk u’i. A hinla, dawr khenkhat ah ‘fssai’ trade mark a umlo banah mihing damtheina ding ah lau um nekthei hunkhawp le a susiau hi. Thudang khat a, Churachandpur District sung ah PDS Rationing Agent chuamchuam in Food Safety and Standard Wings, Office, CMO Campus ah license dawtna form a la tau a, tuni tiang ah Churachandpur Assembly Constituency a pat Agent 79 in form a lâkna lak ua 59 in a pelut ua, Singngat Assembly Constituency a pat form la 20 lak ah 9, Thanlon Assembly Constituency a pat 23 lak ah 17, Henglep Assembly Constituency a pat khat in la a pelut ta, Tipaimukh Assembly Constituency a pat agent khat in form a la pan hi.

NT11oct2017b

DMO in staff te meeting neipi

Lamka, Oct. 10 *(Nisin Thuhiltu)* : Dr Phirthanglien Buhril in District Malaria Officer (DMO) Churachandpur mawpuakna a lak nung ah amasa pen ding in Malaria Office, CMO Campus ah Churachandpur district Malaria Department a sem Staff te tawh meeting nei in department nuai ah Male Health Supervisor, Health Supervisor, Microscopist leh DMO staff te a pang u’i. Meeting a hileh Dr Phirthanglien Buhril in DMO dinmun a lua tawh kitawn ah Malaria department in damtheina lam tawh kisai ah maban panlak ding dan leh staff te tawh kimel hiattua na ding banah PHC tin ah staff-te nasepna leh haksatna a tuakte uh genkhawmna ding ah DMO thak in meeting a ko a hia, zia hun a chun tulai ah malaria natna pua thokang beikuan a hitawh kitawn ah Malaria Rapid Action Team kiti a chawlsak phawt u’i. Maban ah Malaria department in nasatak ah panlak gua in thakit, November a pat End Malaria ti thupi chiapi ah Supervisor tin in amau mawpuakna sung chiat entha ding leh thasin leh DMO Office ah report pe zing ding a hiu. Dr Phirthanglien Buhril in a hileh September 28, 2017 in tukum sung a ding ah a 4 na ding in CCpur Distirct Malaria Officer (DMO) mawpuakna tu ding in a zawm a, ama’n Pherzawl DMO tawh a tuk khawm a hi.

PTC GHQ General Assembly –cum- Election 2017 tawh kisai ah lungkimlo thu puang
Lamka, Oct. 10 *(Nisin Thuhiltu)* : Young Paite Association (YPA) General Headquarters in, Paite Tribe Council (PTC) General Assembly-cum-Election 2017 um ding tawh kisai ah PTC kivaipuakna Dan kal ah vaisai a hina chung ah Chairman/ Secretary, Central Working Committee (CWC), PTC General Headquarters kiang ah lungkimlona leh hiatsakna a bawl hi. PTC General Headquarters in Bukpi khua ah General Assembly -cum- Election 2017 a matna dinga program a bawl chung chang leh Candidate leh Delegate ding tawh kisai ah thu leh la umte ah lungtun um saklo thu a taklang a, Election Commission in September 11, 2017 ni’ PTC General Headquarters, 2017-2020 sung ah Central Working Committee (CWC) member ding puitu 21 kitelna ding Election Notification, a a suadawna thu taklat ah um te bang ziak ah zuilo a hi em ti’n dawtna a siam hi. Aban a genna ah, Election mawpaw ding ah guat ah um te’n election tawh kisai zosia a sai fel ua kikhut san tiang ah maw a puak ding uh hinapi ah bang ti dan ah CWC in election a ding ah candidate te scrutiny a bawl uh a hem, Election Commission in candidate te chung chang leh Election tawh kisai ah amau ma in kivai puakna dân zui ah sai ngamlo a hiu leh a phiat ah a dang guat ding hilo a hem, banah, PTC Election ah PTC kivaipuakna dan bupi mat hi ding maw a hilo leh Customary law ti’n le a dawng hi. Chun, puitu khenkhat in khawlai ah “YPA in ZRO/ ZRA phûkgua a hi” ti leh “Political Dialogue sukbuai gua a hiu” ti ah a thezak uh chu thuzuau hi ah YPA GHQ in kawm in YPA in ZRO/ ZRA hawitak ah a chiato zel ding a dawisak banah zathuap zing ding hi’n a gen hi.

Annual Games & Sports, 2017 hawnna nei

Lamka, Oct. 10 *(Nisin Thuhiltu)*: The Salvation Army - Children’s Training High School (CTHS) School in school huangsung ah October 10 - 13 sung Annual Games & Sports, 2017 a nei ding uh tuni hawnna nei in a um a, zia hun matna chu K Vungzalian, Chairman, School Managing Board (SMB) in special guest hina tawh a uap hi. Hun matna a chun K Vungzalian, Chairman, SMB in Flag kaipal in, thugenna a nei a, zia na a chun, mihing hinkhua ah taksa sawizawi pawimaw mama in a diak ah student hilai ah taksa leh lungthim sawizawina chu lekhasimna lam ah panpi tu hawipen hi ah taklang kawm in student te’n lungthim thiangtho tak nei kawm ah hinkhua a mat ding uh dawithu gen in, Annual Games & Sports 2017 hawnna a nei hi. Hawn a hi tawh kitawn in Letminthang Mate, In-charge, Game and Sports in house tin ah captain te kitiam sakna a nei a, Captain David Lalthazuala, CO, Lamka Corps in Annual Games and Sport 2017 latna leh Pathian khut ah kawlsakna a nei hi. Sports hun ah student te house 4 - blue, green, yellow leh red ah kikhen in item chuam chuam - mathematical race, basketball, futsal, volleyball leh a dang dang te kitetna nei ding a hiu.

NT11oct2017c

Tutha sung ah differently-abled person leh meithai ding ah govt. in special scheme hawng ding: Chief Minister

Imphal, Oct.10 *(Nisin Thuhiltu)* : Manipur Chief Minister N Biren Singh in thasin date 10, Hill Leaders’ Day ah a mat sek tawh kitawn in tuni, 10th October in le zingkallam dak 9:00 a pat nitaklam dak 1:00 kikal in civil society organisation leader, village authority executive leh village chief 500 tuam te a kimupi a, complaint 191 um te ngaithakna a nei hi. Hill Area a pat leader chuamchuam te a kimupi zaw ah thuthak lakhawm mite kiang ah a holimna a chun, Chief Minister N. Biren Singh in hill area ah Government official umlo, infrastructure hawilona tawh kisai a tamzaw ten a kiang tut a hidan uh a gen a, differently-abled person leh meithai hun tiang in le a kiang ah haksatnau tut a hidan uh a taklang hi. State sung ah differently-abled person leh meithai te a ding ah government in tutha sung ah Special Scheme hawng ding in le a puang a, himaleh scheme chu International Day of Disabled Persons (December 3, 2017) a pat chiapi pat ah um ding hin a gen hi.

Hill Leaders’ Day ah mitamtak in inn sakna kithuapi ding ah panpina dawn a hidan uh le taklang in, scheme chuam chuam te a hiding gualtak ah a tunna ding tunglo um a hidan kilang in a gen a, Central Government in a chiapi, rural area ah inn neizo lo migenthei te kithuapina ding ah Pradhan Mantri Gramin Awaas Yojana (PMAY) scheme tawh kisai ah review meeting nei ah um sek leh etzuina nasep umzing a hidan genkawm in, kituptak ah office kailo official te chu explanation call bawl ding ah a kisaipi thuneitu te thupiak nei a hidan a taklang hi. Chuleh,
State budget siam hun ah infrastructure pawimaw te a vek ah huapsak theilo ah a la umna chung ah a kisaipi Deputy Commissioner te chu a pawimaw dungzui ah State Planning Department ah proposal pelut ding ah thupiak nei in le a gen hi. Hiatthei khat chu, Chief Minister in April 11, 2017 ni ah Ukhrul district vena a nei hun ah thasin ni 10 chu Hill Leaders’ Day ah mang ding a hidan a taklat tawh kitawn ah May 10, 2017 a khah Hill Leaders’ Day masapen a la matpat hi a hia, tu ah Hill Leaders’ Day chu a 6 vei tinna a hi.

State in astro turf 2 /3 nei ding: N. Biren Singh

Imphal, Oct. 10 *(Nisin Thuhiltu)* : Manipur Police,125th Anniversary matna ding tawh kisai ah 2nd MR Ground, Imphal ah Manipur Police Department saina’ Manipur Police Quasquicentennial Football Cup 2017 a la um chu tuni’n khak in a um hi. Closing ceremony chu, Chief Minister N. Biren Singh in khuallian hina tawh a uap a, Minister for PHED Losii Dikho, Chairman of Manipur Pollution Control Board L. Radhakishore Singh, Parliamentary Secretary (Planning) Khasim Vashum, Parliamentary Secretary (Home) L. Sushindro Meitei, DGP L.M. Khaute leh top police official tamtak ten le hun matna a uap ui. Chief Minister in a thugenna a chun, state sung ah astro turf (artificial turf) ground 2 /3 umsak pai hita ding in a gen a, Guwahati in World Cup match a zintun thei leh bang ziak ah Manipur in zintun theilo ding a hi em? ti kawm in a chiatha zing FIFA U-17 World Cup 2017 match khat le zintun ding ah Manipur chu dawisakna piak hilo in a gen hi. Manipur chu match khat hiziang leh le U-17 World Cup 2017 zintun ding ah kilawm hin a hidan le gen in, U-17 World Cup 2017 ah Indian Football Team te performance hawisa mama a hidan a taklang hi. Chief Minister in state sung ah police te panlakna thupi mama in a gen a, hun dang ah security personnel te civilian ten a mu tak ua le lauthawnna dim mai sek himaleu tuhun ah security personnel te chung ah mipi’n muanngamna neita a hidan a gen a, Police te mipi humbittu a hidan uh mipi te’n hiathiam ta a hidan le a gen hi.

Hun matna uap, Minister for Youth Affairs & Sports, Letpao Haokip in a thugenna a chun, U-17 FIFA World Cup 2017, India team player ah Manipur mi mi 8 a pan uh chu ki aan mama hin a gen a, Manipur chu sport lam ah talent tamtak umna hin a gen hi. Chuleh, mipi te’n buaina a tun hun ah a vengbittu police te a hidan uh a hiatthiam theina ding ua Police personnel te’n panlakna a nei ding uh pawimaw in a gen hi. Manipur Police Quasquicentennial Football Cup 2017, final match a chun, Imphal East District Police leh Thoubal Kakching District Police team te a kihel ui.

Naupang te bitna ding tawh kisai ah dan (law) hatlo: Acting Chief Justice

Imphal, Oct. 10 *(Nisin Thuhiltu)* : Imperial Hall, The Classic Grande ah tuni’n One day Regional Consultation on ‘Child Rights – Gaps & Challenges in North Eastern States’ kiti a um a, zia chu Juvenile Justice (Care and Protection) Act, 2015, Protection of Children from Sexual Offences (POCSO) Act, 2012 leh The Child Labour (Prohibition and Regulation) Act, 2016 hiathiamna ding ah kisai a hi. Inaugural session chu Acting Chief Justice of Manipur High Court, N. Kotiswar Singh, Social Welfare & Cooperation Minister Nemcha Kipgen, Chairperson, National Commission for Protection of Child Rights (NCPCR), Stuti Kacker, Member, NSPCR, Yashwant Jain, Chairperson, Manipur Commission for Protection of Child Rights (MCPCR), Sumatibala Ningthoujam, Commissioner of Social Welfare, Government of Manipur, H. Deleep Singh, IAS te’n khuallian hina tawh a uap ua, North East India state 8 a pat delegate, Manipur Government department chuam chuam ah official te, Civil Society, NGO leader tamtak in le a uap ui.
Acting Chief Justice N. Kotiswar in a thugenna a chun, naupang te bitna ding tawh kisai ah dan (law) chu hatlo leh chanchum in a gen a, Rabindranath Tagore lekhabu zik ‘On the Seashore’ kiti ah naupang khawhelo te banglam thil hitaleh humbit ding pawimaw a hidan sulang in a gen hi. Social Welfare Minister Nemcha Kipgen in a genna a chun, naupang zosia’n ngaidan leh dawidan banah mudan te gendaw theina ding ah thuneina nei chiat a hidan uh taklang kawm in, “Child Rights – Gaps & Challenges in North Eastern States’ kiti chu tuhun tawh kituak a hidan taklang kawm in consultation ki organised chu kipak mama in a gen hi.

Dy CM in 2- Day National Symposium hawng

Imphal, Oct. 10 *(Nisin Thuhiltu)* : Deputy Chief Minister Yumnam Joykumar Singh in tuni’n Indian Council of Agricultural Research (ICAR), Research Complex for NEH Region, Manipur Centre, Imphal ah Indian Phytopathological Society (NEZ) leh ICAR, Research Comlex for NEH Region, Manipur Centre, Imphal saina, 2- Day National Symposium on “ Emerging and Re-Emerging Plant Diseases in North East India: Challenges and Strategies” kiti hawnna a nei hi. Ama’n a thugenna a chun, North Eastern region ah thaichi piang dawk a hawi zawk sem theina ding ah lo-bawlmi te leh scientist te’n panlak khawmna a nei ding uh pawimaw in a gen a, a hun tak ah thaichi chiin na a pat thaichi lungvei ti te sukven thei hiding in a gen hi. Zia hun matna a chun, Vice Chancellor of Central Agricultural University (CAU), Imphal, Professor M. Premjit Singh in le thugenna a nei a, Deputy Chief Minister in Krishi Vigyan Kendra (KVK) Churachandpur saina nuai ah tha 1 sung, Gardeners Training Programme zota trainee te kiang ah certificate piakdawna le a nei hi.

Bhoomi Pua of Barak and Makru Bridges
Imphal, Oct. 10 *(Nisin Thuhiltu)* : Manipur Chief Minister, Nongthombam Biren Singh in 12th October, 2017, 12:30 p.m leh Barak ah "Bhoomi Puja of Barak and Makru Bridges" uap ding a hi.

Good governance leh democracy sukhatna ding ah RTI mat ding: Karam Shyam

Imphal, Oct. 10 *(Nisin Thuhiltu)* : Lamyanba Shanglen, Konung Lampak, Imphal ah tuni’n Right to Information Week Celebration-2017 khakna programme mat in a um a, zia hun chu Consumer Affairs, Food & Public Distribution and Revenue, Minister Karam Shyam in khuallian hina tawh a uap hi. Minister Karam Shyam in a thugenna a chun, democracy sukhatna ding leh good governance a um theina ding ah kituptak ah Right to Information Act chiapi ding pawimaw a hidan taklang kawm in,
RTI activist ten transparency leh accountability a um theina ding ah panlakna a nei uh chu pakcha mama in a gen hi. Zia hun matna a chun, Dr. Radheshyam Yumnam, Chairman, Manipur Industrial Development Corporation Ltd. & Manipur Electronics Development Corporation Ltd. in le thugenna a nei a, RTI mass awareness programme chiapi ding pawimaw a hidan taklang kawm in RTI matkhial khak ding thil lau um a hiti’n a gen hi. Right to Information Week Celebration, closing function chu RTI activists, Government officials, students leh citizens te’n a uap ui. Right to Information Week (Oct 5th to Oct 10th , 2017) ahileh Manipur Information Commission in Department of Personnel & Training , Ministry of Personnel, Public Grievances & Pensions, Government of India sponsored bawlna nuai ah organised a bawl a hi.

“Ningol Chakkouba” ding ziak ah govt. semtute law, 16 Oct a pat kihawm ding

Imphal, Oct. 10 *(Nisin Thuhiltu)* : Vevek Kumar Dewangan, Principal Secretary (Finance), Govt. of Manipur in tuni governor min ah thusua a bawlna a chun, 21st October 2017 leh “Ningol Chakkouba” mat ah a umna ding ah Central Treasury, Rules (Vol.1) dungzui ah Gazetted Officer te panna Government employee ten pay leh allowances, 16th October a pat October 2017 tha a ding draws leh disbursed thei ding un a taklang hi. Himaleh zia chu DP/Finance Department instruction leh guideline kal ah semtu ding ah kila, adhoc/substitute/officiating/contract/casual/Mr te huapsak hilo ding in a taklang bawk hi.

User Rating: 1 / 5

Star ActiveStar InactiveStar InactiveStar InactiveStar Inactive

T N Chaturvedi Award sâng ding

Lamka, Oct. 5 *(Nisin Thuhiltu)* : Dr. Kham Khan Suan Hausing, Professor, Department of Political Science, School of Social Sciences, UOH, University of Hyderabad chu TN Chaturvedi Award 2016 dawng ding ah teldaw in a um hi. "Multiculturalism and Intercultural Dialogue in North-East Region (NER) of India" kiti article a zikna a pat TN Chaturvedi Award dawng ding ah teldaw ah um a hi. Ama article zik ahileh Indian Journal of Public Administration (IJPA), Vol.62, no.3, July -September 2016 special issue, pp.399-418 ah published a hi. TN Chaturvedi Award ahileh mement, kum 10 sung IJPA free subscription hiding a hia, October 11, 2017 leh New Delhi ah Award piakdawna um ding a hi.

Tripartite Talks community dang sukha a hilo ding: Kuki chief
Imphal, Oct. 5 *(Nisin Thuhiltu)* : Kuki Inpi mapuina nuai ah Manipur state sung ah Kuki khua-hausa (chief) 230 val te’n tuni’n Kuki Inn, Imphal ah tuhun political leh land issues tawh kisai in consultation meeting a nei ui. Zia hun a chun, Kuki chief consultation meeting in Tripartite Talks chiapi- Government of India, Government of Manipur leh United Naga Council in Manipur ah district 7 a kisiamdaw thakna chung ah kinawptuana ahiloleh thuchaina a siam uh chu community dang te dekna/sukha a hilo ding in lemsakna a nei ua, zia chu community dang sukha ding ah Tripartite Talks in thupukna a siam le nasatak ah dodal hiding tina a suak hi. Chuleh, consultation meeting in community khat sukha ding ah UNC in district kisiamdawk thak te zukkit (roll back) ding ah demand a bawl chu thilpha hilo in le a taklang hi.

UNC demand chung ah Tripartite talks sunzawm ding
Imphal, Oct. 5 *(Nisin Thuhiltu)* : Manipur ah Dsitrict thak 7 kisiamdawk dawilo ah zukkit (roll back) ding ah United Naga Council in kiphinna a nei nung ah Government of India (Ministry of Home Affairs (MHA), Government of Manipur leh United Naga Council in Tripartite Talks a chiapi chu 6th October 2017 ah sutzawm hiding a hi. Zia hun a chu United Naga Council (UNC) demand sukvenna ding tawh kisai genkhawm kit ding a hiu a, United Naga Council (UNC) thusuak in a taklatna a chun, Senapati district headquarters ah6th October 2017, 1:00 pm ah Tripartite Talks kipan ding in a taklang a, kihona ding tawh kisai ah Ministry of Home Affairs a pat formal invitation mu a hidan uh UNC president Gaidon Kamei in a gen hi. UNC president Gaidon Kamei in a genna a chun, Tripartite Talks chu ngai serious mama a hidan uh a gen a, kihona nei ah buaina sukven ding kinem a hidan genkawm in, Government of Manipur leh Central Government in UNC sentiment leh dinpi a hiatthiam ding kinem hin a gen hi. Chuleh, August 11 talks hun ah “next round of talks” chu September tha ah nei ding ah kinawptuana nei maleu kihona sutzawmna ding ah panlakna a umlo ziak ah September 29 ni ah Manipur State Government leh MHA chu dakkal 48 sung deadline pia a hidan uh le a gen hi.

UPF in vaipawthak ding guatna nei
Lamka, Oct. 5 *(Nisin Thuhiltu)* : Suspension of Operation (SoO) nuai ah um United People's Front (UPF) in Pragati Manor Hotel, Guwahati ah zani a khah meeting nei ah vaipaw thak ding guatna nei a hidan taklat in a um hi. Zia dungzui a chu- Chairman ding ah Lalropui Famhoite (C-in-C HPC (D) ) guat in a um a, Vice-Chairman ding ah SS Haokip (UKLF); General Secretary -ST Thangboi (KNF); Finance/Treasurer - Thang Lian Pau Guite (ZRA); Information Secretary -Thanglienlal (KRF); JMG Convenor - Jackob Haokip (UKLF) ; Team Leader Political Dialogue - Calvin H (ZRA) leh Spokeperson ding ah Aaron Kipgen (KNF) guat hi un a kigen hi.

Diamond Jubilee mang ding
Lingsiphai, Oct. 5 *(Nisin Thuhiltu)* : A hung tung ding October 19 – 22, 2017 sung in Evangelical Organoisation Church (EOC) kochuam ah department 2 - Women Christian Organization (WCO) leh Young Christian Organization (YCO) te kum 60 tinna Diamond Jubilee leh 40 veina Missions Anniversary matna Lingsiphai khua ah um ding a hia, October 19 nitak kikhawp hun ah Rev. Lamkhogin Khaute, Moderator, EOC in Jubilee matna hawng ding a hi. Khawmpi sung ah Rev. Dr. Kh. Khaizakham, Rev. Dr. Jayakumar Ramachandran leh Rev. Kumam Suresh Singh te thugen ah pang ding banah Rev. S. Prim Vaiphei leh Rev. K. Kamchinkhup te’n thupi chuam chuam mang ah seminar la ding a hiu a, October 22 nitak kikhawp hun ah Rev. Dr. Robert H. Vaiphei, Missions Director, EOC in Jubilee lawpna khak ding a hi.

2nd Jt. Presbytery Inkhawmpui 2017

Lingsiphai, Oct. 5 *(Nisin Thuhiltu)* : Presbyterian Church of India, Mizoram Synod ah Manipur Area in a hung tung ding October 20-22, 2017 sung Lingsiphai Kochuam Biakinn ah a 2 veina Joint Presbytery Inkhawmpui 2017 mang ding a hi. Khawmpi hunsung a chun thugenpi ah Rev. Lalrinmawia, i/c Electric Veng Pastor Bial leh Ex-Synod Moderator pang ding a hia, Pathian Biakna kikhawp leh devotion banah kipawllimna chuam chuam um ding a hi.

Zillai Churachandpur District hawnna nei di
Lamka, Oct. 5 *(Nisin Thuhiltu)* : Zillai General Headquarter saina in a hung tung ding October 7, 2017 sun dak 12:00 leh VPC Complex, Bethel Veng, New Lamka ah Zillai Churachandpur District hawnna um ding a hia, zia hun chu V. Hangkhanlian, Minister (Agriculture, Veterinary & Animal Husbandry), Manipur in Chief Guest leh Khatkhotong Baite, President, VPC General Headquarters in Functional President hina tawh uap ding a hiu. Zillai Churachandpur District a hileh Chief Guest in a hawnna nei in Dr. Hauminthang Vaiphei, President, Zillai GHQ in Zillai Churachandpur District vaipaw dingte guatna leh kitiam sakna nei in Rev. Harry Muanlal, Executive Director, EOC (ECCI) in malzawl dawt piakna nei ding a hi.

October 7 leh IMI hawn hiding

Lamka, Oct. 5 *(Nisin Thuhiltu)* : A hung tung ding October 9 sunma dak 10 leh Churachandpur District Hospital Campus ah Intensified Mission Indradhanush (IMI) lauching programme um ding a hi. Zia hun chuleh Dr VC Pau Tonsing, DFWO/ DIO in IMI kimatna ziak genna a nei ding banah Dr Kim Simte, CMO leh Rakesh Balwal IPS, SP/ CCpur te’n le thugenna nei ding a hiu a, Shyam Lal Poonia, IAS DC CCpur in Intensified Mission Indradhanush IMI hawndawna nei ding a hi. Intensified Mission Indradhanush (IMI) a hileh tha 4 - October, November, December leh January 2018 sung ah tarik 7 a pat 14 kikal sin ah nei hiding a hi. Zia hunsung a chu naupang kum 5 nuai lam te kiang ah natna chi 9 a pat kivenna ding damdawi kap hiding a hi. Natna chi 9 tetanus, Diphtheria, Pertussis, Hepatitis-B, Naupang Awpnâ-Haemophilus influenza Type-B, zeng natna-Poliomyelitis, Sênsî-Measles, Japanese Encephalitis (JE) leh Tuberculosis (TB) ti te a hia, zia natna 9 te vei ziak ah thina tuak thei himaleh a damdawi kikap ah sukdam thei a hi ziak ah naupang kum 5 nuai lam, a diak ah nauvawp leh naupang kum 2 nuailam te kisimna ah min khumlut chiat ah a hunhun a kikap sak tei tei ding ti’n District Task Force-Immunization (DTFI), CCpur District in chialna leh hiatsakna a bawl hi. Mission Indradhanush ahileh health mission, government of India in a chiapi, Union Health Minister J. P. Nadda in 25 December 2014 ah a la hawn, naupang kum 2 nuailam zosia immunize bawl ding leh numei nauvawp te venbit ding tupna a hi.

SBI-RSETI nuai ah Beauty Parlor training kipan ding

Lamka, Oct. 5 *(Nisin Thuhiltu)* : State Bank of India-Rural Self Employment Training Institute (SBI-RSETI) in sepna neilo khangthak kum 18 a pat 45 te kiang ah trade chuam chuam a ding a thawn ah training a piak sunzawm to zel in tulai tak in Basic Photography & Videography training a chiatha zing hi. Basic Photography & Videography Training ahileh a chiata September 18, 2017 ni ah kipan a hia, CT Lian Guite, MDC leh Mangboi Vaiphei, Faculty, SBI-RSETI te’n Rural Entrepreneurship Development tawh kisai ziltilna pia in, Lalboi Samte in Basic Photography lam a ziltil a, training chu October 19, 2017 leh zawthiang hi ding a hi. Zia kawmkal a chun, zing leh ni 30 dai ding, Beauty Parlor Management kipan ding a hia, trainee ding mi 30 lakna ding ah tuni’n interview um in zia hun a chun K. Herachandra, Director, SBI-RSETI leh S. Mangboi Vaiphei, Faculty, SBI-RSETI te’n dawtna chuam chuam a bawl ua, ziltilna a hileh Lhainunnem, Beautician in a piak ding a hi.

PTC GHQ election a ding ah scrutiny bawl
Lamka, Oct. 5 *(Nisin Thuhiltu)* : Paite Tribe Council (PTC) GHQ election ding tawh kisai ah mi 36 te’n Nomination Form a piaklut uh zani leh tuni’n scrutiny nei himaleh complain a um ziak ah chawlsak phawt in a um a, Chairman, CWC, PTC GHQ dawina gual in zing, October 6, 2017 zingkal dak 7:00 leh PTC GHQ Hall, Hiangtam Lamka ah emergency meeting um ding a hina ah CWC PTC GHQ Member zosia pangkim chiat ding ah hiatsak a hiu.

11th Kumsim Khawmpi mang di
Lamka, Oct. 5 *(Nisin Thuhiltu)* : EBC Lamka South Division in zing, October 6 - 8, 2017 sung EBCC Drocas Veng, New Lamka ah “Diktatna a Kilamthakna” ti thupi tawh a 11 veina Kumsim Khawmpi 2017 mang ding a hia, October 6 nitak kikhawp hun ah Rev. V. Nenglian, Divisional Superintendent, LSD in Khawmpi hawnna nei ding a hi. Khawmpi hunsung ah Rev. Paukhanmang Guite, Director of Ministries, EBC leh Rev. V. Nenglian, Divisional Superintendent, LSD te’n Pathian thu genna nei ding leh Pastor E. Chinzamang, Local Pastor, EBCC Zion in Bible Study hun malat ding a hi banah khawmpi sung ah vaihawmna le um ding a hia, October 8 nitak kikhawp hun ah Rev. V. Nenglian in 2018 ah Khawmpi Ulian dingte namdetna leh khawmpi khakna nei ding a hi.

Imphal ah Bihar mi khat kaplup ah um
Imphal, Oct. 5 *(Nisin Thuhiltu)* : Bihar mi, Lal Babu Singh kiti kum 50 mi chu melhiatlo pawl khat in Singjamei Police Station huapsung, Imphal West District in a kaplum ui. Lal Babu Singh ahileh Mantripukhri ah inn-lua um, a chiata kum 10 sung ah nga-keu (dried fish) zuak ah sumkawlvei a hi. A taksa chung ah meichang chang 4 mudaw in a um a, Police te’n a luang chu Autopsy ding ah Rims Morgue a tut ua, Singjamei Police station ah case registered in a um hi. Himaleh a kitha ziak leh kuatha a hi zia thu zik a hi tiang ah hiat a hi puai. Hiatthei khat chu Manipur ah 2011 - October 2017 sung ah non-local mi 105 tha ah umta leh mi 114 te’n liamna tuak a hidan uh India Today in a taklang hi.

Maram Centre ah Lei khikek/ kitawltha’n inn 10 susia

Kangpokpi, Oct. 5 *(Nisin Thuhiltu)* : Kangpokpi District ah Kalikhola Earth Crack (leisiat khikek/ kitawltha) a um nung in Senapati District, Maram Centre Village ah leisiat khikek/ kitawltha muthei ding in a um kit hi. Maram Village Centre ahileh 49-Tadubi Assembly Constituency huapsung ah um, inn 160 tuam chenna, Senapati DHQ a pat 14 km ah gamla a hi. September 25 a pat gua-zuk ziak ah nimchim (landslide) a um zing nung ah leisiat khikek/ kitawltha muthei ding ah um hin thudawnna’n a gen a, NH-2 tawh kinaicha um, Don Bosco College leh Assisi Girls Hostel kiangnai, Car wash point area ah leisiat khikek/ kitawltha muthei ah um in a gen hi. Zia leisiat khikek/kitawltha ziak a chu chenna inn 30-40 te dinmun dengdel tak ah um leh concrete building 3 panna’ inn 10 chu leisiat khikek/kitawltha’n susiata a le hiat a hi. Chuleh, National Highway -2 leh Maram Peren road le buaipha hin a kigen hi.

State Level Mera Houchongba Festival 2017 kimang

Imphal, Oct. 5 *(Nisin Thuhiltu)* : State Level Mera Houchongba Festival Committee mapuina’ tuni’n Kangla Uttra ah State Level Mera Houchongba Festival mat in a um hi. Chief Minister N. Biren Singh, Art & Culture Minister L. Jayantakumar Singh leh Manipur lengpa Meidingu Leishemba Sanajaoba te’n khuallian hina tawh hun matna a uap ua, Minister, Parliamentary Secretaries, MLAs, top civil leh police officers, village chiefs leh hill leh valley a pat mitamtak ten le hun matna a uap ui. Chief Minister in a thugenna a chun, masang ah kihiathiamlona, bawlkhialna, sukkhialna a la um te chu tuhun ah hiatmil ding leh kingaidam tua chiat ding pawimaw a hidan gen in, hill leh valley ah um te kipumkhat hun hita hin a gen hi. Zia ah ki chuamkawina a la um te chu khiindaw ah masawnna ding leh khantona ding ah kalsuankhawm hunta in le a gen a, Mera Houchongba festival chu hill-valley kipumkhatna ding a kimang sek a hi dungzui ah titular king Meidingu Leishemba Sanajaoba in kumsin leh Mera Houchongba festival mang ah a la hinsak zing chu kipak um mama in a gen hi. Government thak nuai ah hill-valley te kal hawi chuam mama ah hia a hidan le a gen a, Ukhrul, Kangpokpi, Senapati leh Churachandpur District ah vaidawn ah a um dan te a pat kithutuaknan’n masawn a hidan le kilang in a gen hi. Lampi haw ah Tamenglong district dinmun leh development work chiapi ah a umdan te et-thaak ding gua a hidan le taklang kawm in hill leh interior areas dawpkang leh sukhatna panglo ah khantona kiti’n umzia neilo in le a gen hi. Zia hun matna a chun, pu leh pa ten a la chiapi sek uh ritual -Mera Men Tongba leh Yenkhong Tamba le suklat in a um hi.

PMUY scheme nuai ah beneficiary te kiang ah free LPG connections piakdawna nei

Imphal, Oct. 5 *(Nisin Thuhiltu)* : Okram Chuthek,Imphal East ah tuni’n Deputy Manager (LPG-S), I.O.C., Stephen Chinkhanson Guite leh Civil Society organization member te uapna tawh Manipur Information & public Relations Minister Th Biwsajit in Pradhan Mantri Ujjwala Yojana (PMUY) scheme nuai ah beneficiary mi 64 te kiang in free LPG connections piakdawna a nei hi. Local MLA le hi, Minister Th Biswajit in a thugenna a chun, central government in gamsung ah migenthei te phatchuampi thei ding scheme 106 chiapi a hidan a gen a, gas agency te leh panchayat elected member te’n a mu ding dawl leh a chang dingdawl te Socio Economic Caste Census Data tawh kituak ah a teldaw ding uh pawimaw in a gen hi.

Kituptak ah RTI chiapi hileh state sung ah corruption dodalna’n masawn chuam ding: Min Biswajit

Imphal, Oct. 5 *(Nisin Thuhiltu)* : Manipur Press Club, Imphal ah tuni, Right to Information Week Celebration, inaugural session ah Manipur Information and Public Relations Minister Th Biswajit in a thugenna a chun, kituptak ah Right to Information Act chiapi hileh state sung ah corruption dodalna’n masawn chuam mama ding hina gen a, government department chuam chuam in a chiapi, development programmes leh policy te hiattheina ding ah citizen zosia’n thuneina (right) nei uh hin a gen hi. Information diklo in khat leh khat kal ah kihiatthiamlona tut thei a hidan te genlang kawm in public & information officer te chu mipi te information pethei ding ah um zing ding in hiatsakna a bawl a, tuhun ah RTI Act kituptak ah chiapi ding pawimaw in a gen hi. Awareness umlo ziak ah schemes chuam chuam te a hiding gualtak ah chiapi hilo in le a gen a, khantona ding ah Sensitization pawimaw mama in a gen hi. Chuleh, Manipur Information Commission sukhat hiding in thutiam a bawl hi. Hun matna uap, Manipur Agriculture Minister V. Hangkhalian in a thugenna a chun, RTI Act kituptak ah chiapi a hitheina ding ah citizens leh journalist te’n panlakna kituptak a nei ding pawimaw in a gen a, mipi te RTI Act hiatthiam sak ding pawimaw in a gen hi. State chief Information Commissioner, Th Ibobi in a thugenna a chun, Right To Information Act. Pawimaw dan genna a nei hi. Zia hun matna a chun, titled 'A compendium of Important Decisions of Manipur Information Commission on Right To Information' kiti lekha le hawn in a um a, state level workshop tawh Right to Information Week Celebration inaugural session mat a hi. Right to Information Week Celebration ahileh Department of Personnel & Training ,Ministry of Personnel, Public Grievances & Pensions, Government of India sponsored bawlna leh Manipur Information Commission saina’ kimang a hi.

Min Biswajit "Mera Houchongba Festive Fair-2017" hawng

Imphal, Oct. 5 *(Nisin Thuhiltu)* : Manipur Textiles, Commerce & Industries Minister Thongam Biswajit Singh in tuni’n Gandhi Memorial hall ah hapta ah sim um ding "Mera Houchongba Festive Fair-2017" hawnna a nei a, ama’n a thugenna a chun, Mera Houchongba in community chuamchuam te kal ah kituakna, kithiamna sulang leh state kupumkhatna sulang in a gen a, khanglui te hun a pat Mera Houchongba festival mat ah umta a hidan taklatna a nei hi. "Mera Houchongba Festive Fair-2017" ahileh October 11, 2017 tiang ah um ding a hia, inaugural function chu MHHDC Ltd Chairman and Manipur State Planning Board, Manipur Deputy Chairman S. Rajen Singh, Handloom and Textiles, Manipur Director K Lamlee Kamei leh HERICOUN, Advisor Mutum Churamani ten le a uap ui.


Mainland India ah kichuambawlna sukbeina ding ah NE mi te kipumkhat ding pawimaw: CM N. Biren

Imphal, Oct. 5 *(Nisin Thuhiltu)* : Hotel Classic Grande, Imphal ah tuni’n Ministry of Labour and Employment, Government of India saina’ “Regional Conference of State Labour Ministers and Principal Secretaries/Secretaries/Commissioners of State labour Departments of North East States” kiti a um hi. Zia hun chu Manipur Chief Minister N. Biren Singh, Minister of Labour and Employment, Manipur Th. Radheshyam Singh leh Union Minister of State for Labour and Employment Santosh Kumar Gangwar te’n khuallian hina tawh a uap ui.

Chief Minister N. Biren Singh in a thugenna a chun, North-East mi te mainland India ah um te’n a chuambawl seknau’ sukbei a hitheina ding ah North-East mi ten kipumkhat tak ah panlakna a neikhawm ding pawimaw in a gen a, gamsung mipi zosia tawh kipumkhat theina ding ah panlak ding chu mizosia mawpuakna hin a gen hi. Prime Minister Narendra Modi mapuina nuai ah Central Government in “Sab ka Saath Sab ka Vikas” ('Together with all, Development for all') a chiapi chu idea hawi mama a hidan a taklang kawm in, North-East India chu talent chuamchuam leh theina chi chuamchuam tawh dim a hidan a gen a, a bik tak a Manipur chu population tawh et ah, India ah state chuam chuam te sang ah sports leh Indian Army ah sem a tamna pen state hin a gen hi. Manipur government in, State Level Skill Development Mission chiapi ding ah lemsakna nei a hidan taklang kawm in Skill Development Mission nuai ah state sung ah sepna tamsem umsak ding, housing leh drinking water kituptak kum 2022 tiang ah umsak ding ah guanggalna um in a gen a, College 40 ah vocational training courses hawn ah um a hidan le a gen hi. Vocational training courses chu khangthak te’n IT, Tourism & Hospitality, Retail Management, Computer Hardware Technology leh thil dang dang ah thiamna a nei ding uh tupna a hidan a gen a, Government in kum 2022 tiang ah sepna nei mi 7.50 lakh umsak ding ah panlakna nei in a gen hi.

Union Minister of State for Labour and Employment Santosh Kumar Gangwar in a thugenna a chun, Government of India in North-Eastern khantona ding ah panlakna nei zing a hidan taklang kawm in State zosia State Social Welfare Board siamdaw ah um a hidan a gen a, State Board ah Chairperson ding chu Central Board lemsakpina tawh State tin ten appoint a bawl ding uh hin a gen hi.

Minister of Labour & Employment, Manipur Th. Radheshyam Singh in a thugenna a chun, labourer te chu society ah tawden ah um leh niamtak ah kawi ah um hin a gen a, labour te dawpsanna ding ah Chief Minister N. Biren mapuina’ Labour Mela nei ah um leh central schemes chuamchuam um te labour te’n a phat chuampi theina ding ua kituptak ah etzui hiding in a gen hi. State sung ah lampi siam, BRTF/BRO nuai ah naupang nasem muthei ah um te ngaikhawk thu taklang kawm in child labour sukbeina ding ah naupang nasem te dinmun etzui thak hiding in a gen a, brick firms, domestic help etc ah naupang nasepsakna chu government kituptak ah enzui ding hin a gen hi.

Zia ah hun matna chu Minister for Labour and Employment, Assam Pallab Lochan Das, Parliamentary Secretary, labour and Employment, Nagaland Dr. Neiphrezo Keditsu, Secretary, Ministry of Labour and Employment, Government of India Smt. M. Sathiyavathy, Financial Advisor & Additional Secretary, Labour & Employment, Government of India Arun Goel leh North-East States chuamchuam a pat official te’n a uap ui.

Page 1 of 13