Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

DIG (Range-II) in CCPur Police Station entha

Lamka, Sept. 18 *(Nisin Thuhiltu)* : Manipur sung District chuam chuam ah Police Station um te lak ah thiangtho pen etthâkna chiatha zing in tuni’n K. Radhashyam, IPS, DIG (Range-II) in Churachandpur Police Station etthakna a nei a, ama a hileh Bikramjit, MPS, CO 3rd Battalion IRB in a malat a, Police Station a phâk uh tawh kitawn in M. Nasir Ahmed, MPS, OC mapuina’n Guard of Honor piak in a um hi. Zia hun a chun OC Churachandpur Police Station in Police Officer leh Personnel um zat report piakna nei in a Room sung ah thingpi dawn in holimna a nei uh hi. DIG (Range-II) in tuni Churachandpur Police Station a phak hun a chun Rakesh Balwal, IPS, SP Churachandpur leh District sung ah Police Officer zosia’n a zui uh hi.

Sept 15 tiang ah malaria vei 4 mudawk
Lamka, Sept. 18 *(Nisin Thuhiltu)* : Malaria Department, Churachandpur in tutha September 1 a pat September 15, first Fortnight sung in Malaria positive 4 a mudawk hi. Malaria Department, Churachandpur a pat report kimu dungzui in September 1 - 15, 2017 sung ah malaria vei ding ah muanmaw mi 645 thisan test na lak ah Positive 4 mudawk in, Plasmodium Falciparum (PF) a hileh mudaw neilo hi’n SMO, Regional Health & Family Welfare, Imphal leh Director, Health Services, GoM ah report a pia’i.

AMNEWA in kiphinna sunzawm

Lamka, Sept. 18 *(Nisin Thuhiltu)* : All Manipur National Health Mission Employees Welfare Association (AMNEWA) in a sepna uh regular hisak ding phutna a nei uh sunzawm in tuni’n Churachandpur District a National Health Mission nuai a sem staff te’n CMO Office Campus ah Sit-in-Protest a nei uh hi. Sit -in- Protest a hileh a chiata September 14, 2017 ni’ Medical Directorate office ah AMNEWA malatna’ neipat a hia, September 15 ni ah Bishnupur District te’n nei in, September 16 ni’ Chandel District leh tuni’n Churachandpur District a NHM Staff te’n a nei ban ua, zing ah Imphal East leh zing kit, September 20 ah Imphal West District te’n nei ding a hiu. National Health Mission nuai ah Churachandpur District a pat Department chuam chuam ah Staff 193 a um ua, State sung pumpi ah a hileh Staff 2,265 um in, 2006 kum a pat Contract basis a sem ding ah lak a hiu. AMNEWA in regular hisakna ding in a chiata July 28, 2017 ni’n Manipur Chief Minister, Health & Family Welfare Minister, Health & Family Welfare Secretary, Mission Director leh Parliamentary Secretary, Health & Family Welfare kiang ah memorandum pia in a bawzuina August 21, 2017 ni ah pekit maleh Government a pat bangma thuhiat a neilo ziak ua kiphinna a pat uh hi’n a kigen hi. National Health Mission nuai a 2006 a pat staff lak a hi nung ah State in damtheina lam tawh kisai hihawi mama in Times of India news report dungzui in Manipur ah Infant Mortality Rate (IMR) 1,000 a pat 9 ah khesuk in, gamsung pumpi a 43 banah Assam ah 62 a hia, NHM a sem te’n Director chuam neilo in Directorate of Health Services nuai ah Mission Staff dan ah sem a hiu.

CDVDFWA) in MGEL/CPIS/SIN Form Fill-up ding dan tawh kisai ah hiatsakna bawl
Lamka, Sept. 18 *(Nisin Thuhiltu)* : Churachandpur District VDF Welfare Association (CDVDFWA) in MGEL/CPIS/SIN Form Fill-up ding thu tawh kisai thusua a bawlna a chun, MGEL/CPIS/SIN Form fill-up nailo member te Association in bawl piak thei ding leh mimal ah kibawl te’n le October 20, 2017 chan ah pawlpi a hiatsak uh ngai ding hi’n a taklang a, MGEL/CPIS/SIN delna ding tawh kisai ah member sung ah Rs. 500 dawlkhawm ah a la um pekha nailo te’n Form fill-up hun ah Form man ding Rs. 100 chawichiat ding in a hiatsak hi. Association hiatpilo ah form fill-up leh Rs. 500 pe khalo memberte’n haksatna a tuak uh leh pawlpi’n mawpawlo ding hi ah hillawk kawm in Bradchelle Inc. (Computer Works), B. Aijalon Bazaar ah sunma dak 10:00 a pat sunnung dak 3:00 kikal ah pawlpi puitute um ding uh a hina ah, a ni kipia dungzui ah Form fill-up chiat ding in hiatsak a bawl hi. Form fill-up ni ding bithiat dan a hileh - Kangvai Post leh Mini Secretariat te’n September 20, 2017, Singngat leh Sangakot Post te’n September 21, 2017, Thanlon leh Parbung Post te’n September 22, 2017, Henglep, Session Court leh Fire Station te’n September 23, 2017, Churachandpur Police Station te’n September 25, 2017, TCP, Office Runner leh Hospital outpost te’n September 26, 2017 leh Reserve Line ah umte’n September 27, 2017 hiding a hi.

Henglep ah DBT mat pat hita ding
Lamka, Sept. 18 *(Nisin Thuhiltu)* : Sub-Divisional Officer (SDO) Henglep panlakna’n Henglep Sub-Division ah MGNREGS Beneficiary te sum piakna ding ah Direct Benefit Transfer (DBT) mat hita ding a hi. Delhi a pat hung MGNREGA nuai ah Job Card holder te nikhawtha chu SDO office a pat a mutu ding te Bank Account ah lutsak hiding a hia, zia na ding ah Village Chief leh Village Authority tawh nasepna, Action Plan guan a um te genkhawmna chiatha zing hi’n Chunglenmang Kipgen, MCS, SDO Henglep in a gen hi. DBT etthâkna ding ah Henglep, Vungbuk, Tuilaphai, Lhenjang, Najang leh Munpi ah September Job Card sum lutsak hiding a tia, nikhawtha le nikhat ah Rs. 197 hisek chu Rs. 204 ah pung ta a hi dan gen in, Bank Account neikha nailo te’n SDO Office, Bijang ah Zero Balance ah HDFC leh SBI Bank Account hawnthei ding banah Aadhar Card leh Aadhar Seeding le bawlpiak thei hi ding ti’n SDO in a gen hi. Chun, Sub-Division sung ah Hill House Tax pelo khua te’n a bat uh a dit thiang masia uh nithâ mulo ding uh hi ah hiatsak kawm in khua 104 umlak ah khua 20 vâl in Hill House Tax pethiang ta uh hi’n a gen hi.

SBI-RSETI ah training chiatha zing

Lamka, Sept. 18 *(Nisin Thuhiltu)* : State Bank of Inding ah-Rural Self Employment Training Institute (SBI-RSETI) ah tuni’n Piggery Farming Training a kipan a, zia na’ chun Piggery Farming ah lunglut mi 27 a pang in S. Mangboi Vaiphei, Faculty, SBI-RSETI in ni 5 sung Entrepreneurship Development Training pia ding banah P. Khamsanglian, Progressive Farmer in ni 5 sung ma Practical leh Field Visit kithua ah ziltilna pia ding a hia, September 28, 2017 leh Piggery Farming Training zawthiang hi ding a hi. Tu hin SBI-RSETI, Bijang ah Basic Photography & Videography training le a chiatha zing in October 19, 2017 leh zawthiang hi ding a hi.

RIMS hospital ah Lamminlun admit a um
Lamka, Sept. 18 *(Nisin Thuhiltu)* : Hydrocephalus natna nei Master Lamminlun (2yr & 2month) s/o Genthianlian & Veineichin of Bisanmual chu tuni'n RIMS ah Surgical (Female Ward) Bed No. 15 ah admit in um hi. Ama ahileh Sept. 16, 2017 ni NHM nuai a RBSK te panlakna leh Team Khawvaiphei support na bawlna JNIMS Hospital, Imphal ah Neurology Department ah doctor te etsak in um a, doctor in a etzaw ah operation a kibawl masak (Oct. 2, 2016) hun ah a lu (head) sung ah tui umte luandaw theina ding ah pipe (stent) kitua pawtdawk, stent kikawi te a kimtaklo ziak ah a umna hiatchian theina ding ah X-Ray, Ultra Sound panna test chuamchuam bawl in a um a, test results kimtak tawh RIMS ah pui a hi nung ah doctor in admit hi’n kigen a, doctor in hawitak ah investigation a bawl zaw tak leh treatment pat ding dan kihia pan ding in le a kigen hi. Lamminlun etkawlna ding tawh kisai in National Health Mission, CCpur in nasatak in panlakna a nei a, Team Khawvaiphei in le donation bawl nuamte a ding in platform khat a bawl piak a, tuni tiang ah mimal leh organization chuam chuam 90 val in panpina peta ua hiat a hi.

Grace Amazing Foundation in panpina pia

Lingsiphai, Sept. 18 *(Nisin Thuhiltu)* : Hydrocephalus natna nei Master Lamminlun (2yr & 2month) s/o Genthianlian & Veineichin of Bisanmual panpina ding in mimal leh pawl chuam chuam in panpina a pezing ua, zia chu tawh kitawn in zani a khan Grace Amazing Foundation, Lingsiphai in le panpina piakna a nei hi. Grace Amazing Foundation ah Secretary Mr Khamlal Vaiphei leh Treasurer D Mina Vaiphei te’n donation bawl nuamte a ding in platform siampiak Team Khawvaiphei member te khut in Rs 3000/- piakdawna a nei ui.

Union Minister in Exhition -cum- Seminar ‘Naya Bharat –Hum Karke Rahenge’ hawng

Imphal, Sept. 18 *(Nisin Thuhiltu)*: Union Minister of State, Heavy Industries & Public Enterprises Babul Supriyo in tuni’n Manipur State Film Development Society Hall, Palace compound, Imphal ah “Exhition -cum- Seminar of ‘Naya Bharat –Hum Karke Rahenge’ hawnna a nei a, “New India” a ding ah panlakna sukpitinna ding ah kitiamna (pledge) hun amapui bawk hi. Exhition -cum- Seminar of ‘Naya Bharat –Hum Karke Rahenge’ ahileh 2022 leh Quit India Movement leh Independence kum 75 tinna lawpna ding kawm ah India Prime Minister Narendra Modi vision “New India” sukpitin theina ding ah organised kibawl a hia, Ministry of Parliamentary Affairs, Govt. of India in designed a bawl, Directorate of Advertising & Visual Publicity, Ministry of Information and Broadcasting, Govt. of India in organised a bawl, Ministry of Petroleum and Natural Gas, Govt. of India nuai ah Oil and Natural Gas Corporation Ltd in sponsored a bawl a hi. Prime Minister Narendra Modi vision “New India” nuai ah India chu kum 2022 tiang ah, free corruption, free poverty, free filth, free communalism, free terrorism leh free casteism umsak ding ti a hi. Hun matna a chun, Deputy Commissioner, Imphal East District Th. Chitra Devi leh Chairman, Council of Higher Secondary Education, Manipur L. Mahendra Singh te’n “New India” tawh kisai in thugenna a nei ua, Dy Secretary, Parliamentary Affairs, SumanBara, Director, DIPR Meghachandra Kongbam, Field Exhibition Officer, DAVP Imphal, Premlata Loitam, Kashyap Joshipura, Chief Manager, ONGCte’n le a uap ui. Exhibition chu 19th September 2017 tiang ah umzawm ding a hi.

CM in Chandel district ah development projects dinmun tawh kisai review meeting neipi

Imphal, Sept. 18 *(Nisin Thuhiltu)*: Manipur Chief Minister N. Biren Singh in tuni’n in Chandel district ah development projects chuamchuam chiapi ah um te dinmun tawh kisai a kisaipi official te review meeting a neipi hi. Zia hun a chun, Deputy Commissioner, Chandel Krishnakumar in power point presentation bawl in development projects chiapi ah um chawmkimtak ah suklatna nei in, District Administration in haksatna chi chuam chuam – staffs kidailo, official vehicles gari umlo, drinking water, health sector etc te genlatna a nei hi. Chief Minister in DC chu haksatna leh thil kituplo te zikdawk ding leh developmental works chiapi ah um te kituptak ah enzui ding in hiatsakna a bawl a, District Level Monitoring Committee in developmental project zosia kituptak ah a etzui ding pawimaw in a gen hi. Khantona ding ah lampi, power supply leh drinking water supply te ngaikhawk diak ding pawimaw in le a gen a, hill areas ah lampi kiangnai tuam ah drainage system kituptak a um ding pawimaw a hidan le a gen hi. Chun, Administrative Secretary te leh DC chu hill districts ah a chiatha developmental projects te 2018 tiang ah zawthian a hi teiteina ding ah panla chiat ding in hiatsakna a bawl hi.Government employees te transfer & posting tawh kisai a genna a chun, Chief Minister in transfer & posting chu a pawimaw dungzui ah chiapi hiding leh zia chu kidawi chuambikna umlo ding hin a gen a, hill districts ah posting chu a lotheilo ah kum 2 tiang rotation basis ah a um ding hin a gen hi. Differently-able students/ persons te haksatna tawh kisai, Chief Minister in a genna a chun, talented special child/ person te subsidized rates ah loan piak hiding leh monthly stipend Rs. 2000 piak hiding in a gen a, Ministry of HRD, Government of India in state sung ah flood affected school buildings te sakphat ding ah lemsakna nei hin a gen a, 50 bedded District Hospital, Chandel District Sports Complex, Joupi Power Sub-Station chu October tha leh hawn hiding in a gen hi. Review Meeting chu Minister for IFCD & MLA Chandel AC Letpao Haokip, MLA Tengnoupal AC D. Korungthang, Chief Secretary R.R. Rashmi, DGP L.M. Khaute, Administrative Secretaries, DC leh SP Chandel & Tengnoupal District, head of department te’n a uap ui.

Meitei Traditional Dance Teaching School & Performing Centre in Silver Jubilee mang

Imphal, Sept. 18 *(Nisin Thuhiltu)*: Chandrakriti Auditorium, Art & Culture Complex, Palace Compound, Imphal ah tuni’n Meitei Traditional Dance Teaching School & Performing Centre, Imphal in Silver Jubilee lawpna a nei hi. Silver Jubilee thupi ding ah “ Preservation of Traditional culture for peace & prosperity under the roof of love & unity One family One nation ONE WORLD.” kiti mat in a um a, Manipur Governor Dr. Najma Heptulla leh Director, CHORUS Repertory Theatre, Imphal leh former Chairmen, National School of Drama, New Delhi, Dr. Ratan Thiyam, Chairperson, MSCW, Dr. K.Sobita Devi leh Retd. Commissioner, Arts & Culture, Government of Manipur, IAS, Dr. P. Bharat Singh te’n khuallian hina tawh hun matna a uap ui. Governor Najma Heptulla in Souvenir “Meitei Traditional Dance Teaching School & Performing Centre” hawnna leh M.T.D.T.S & P.C. website hawnna a nei a, Meitei Traditional Dance Teaching School & Performing Centre ah gold medalists 4 te leh Dr.K.Sobita Devi leh Dr. P. Bharat Singh te kiang in shawl leh momentoto khat chiat piakdawna banah 40 Consultant Awards, 26 Ningshing Awards leh 13 Special Honours te le piakdawna a nei hi. Governor Dr. Najma Heptulla in a thugenna a chun, Manipuri culture bep masawnna ding hizawlo ah tuhun ah art & culture dinmun te genkhawm ding leh siamhawi thak ding dawi hin a gen a, “ Dance leh music in kipakna leh social, cultural history leh tradition sulang in a gen hi. Chun, khangthak te culture hausakna hiatthiam sak ding leh venbit ding pawimaw in a gen hi.

CM in Behiang ah police station hawnna ding ah nasep pan ding ah hiatsak

Imphal, Sept. 18 *(Nisin Thuhiltu)* : Chief Minister Secretariat, Imphal ah tunio’n Chief Minister N. Biren Singh mapuina’ kum 2017-18 sung ah Government Departments chuamchuam in a chiapi developmental projects ahiloleh scheme te sukpitin theina ding ah panlakna tawh kisai in review meeting a um hi. Zia hun a chun, Chief Minister in a kisaipi official te chu Behiang ah police station hawnna ding tawh kisai ah nasep pan ding in hiatsakna a bawl a, Manipur Police Department nuai ah gari um te dinmun enzui ding leh field visit bawl ding committee khat siamdawk ding ah thupiak neikawm in gari mattheilo ah um zat hiachian ding in a kisaipi te hiatsakna a bawl a, gari siam thak kit thei ding te zawk ding leh siamphat thak thei taklo ding te suksiat leh paimang ding pawimaw in a gen hi. Tuni meeting a chun, Home, Finance, MAHUD, MOBC leh Labour and Employment Departments in a chiapi scheme leh project te nasatak ah genkhawm in a um a, mipi te’n cooking gas/ LPG supply lam ah taksapna a neinau tawh kisai in Chief Minister in CAF & PD official te thil umdan dawtna a nei hi. Chun, a kisaipi official te’n thil umdan taklatna a nei ua, Chief Minister in a kisaipi thuneitu te chu mipi haksatna sukven theina ding ah a vaima theipen ah panla ding in a hiatsak hi. Deputy Chief Minister Y. Joykumar, Health leh Family Welfare Minister L. Jayantakumar, CAF & PD Minister Karam Shyam, MAHUD Minister Th. Shyamkumar, Agriculture Minister V. Hangkhanlian, Social Welfare Minister Nemcha Kipgen, Chief Secretary R.R Rashmi, DGP L.M Khaute, Additional Chief Secretary (Home) Dr. J. Suresh Babu, Administrative Secretaries, Head of Department te Review Meeting in a pang ui.

World Bamboo Day 2017 mang

Imphal, Sept. 18 *(Nisin Thuhiltu)* : Singjamei Community Hall, Imphal ah tuni’n World Bamboo Day 2017 mat in a um hi. Zia hun chu gua (bamboo) matthiam dingdan leh Healthy Environment a um theina ding tawh kisai ah awareness bawlna tawh mat a hi. Hun matna chu Mayor of Imphal Municipal Corporation L. Lokeshwar, Sukumar Haobam, President, Bamboo Forum of India ten khuallian hina tawh a uap ui. 5-Day Exhibition on Bamboo & Cane and Allied Crafts le tuni’n a kipan a, 19th September 2017 ah “Bamboo for Environment, Energy & Employmen” ti thupi mang ah Class V-VIII (Group B) leh Class I-IV (Group A) te ding ah Painting Competition le um ding a hi. Manipur Legislative Assembly Speaker Yumnam Khemchand Patron hina nuai ah World Bamboo Day chu kimang a hi. Hiatthei khat chu, kum 2009 a khah World Bamboo Organisation nuai in Prachan Buri, Thailand cah World Bamboo Day masapen mat in a la um hi.

 

User Rating: 0 / 5

Star InactiveStar InactiveStar InactiveStar InactiveStar Inactive

VPC GHQ Cabinet in Community Hall sakzaw dingdan nasatak ah genkhawm

Lamka, Sept. 16 *(Nisin Thuhiltu)* : Vaiphei People’s Council (VPC), General Headquarter ah vaipaw thak ding ah guat ah um te’n tuni’n VPC GHQ Office, Bethel Veng, New Lamka ah a masapen ding in Cabinet Meeting a nei ui. Meeting chu Khatkhotong Baite, President, VPC GHQ in amapui a, Upa Liankhothang in pauchapna tawh hun hawnna nei in meeting a pan ui. Meeting hun in Agenda chuam chuam genkhawmna a nei ua, a bik tak ah VPC Community Centre Hall sakna, sum taksap ziak sutzawm theilo ah a umna tawh kisai a genkhawm ui. VPC Community Centre Hall sakna sutzawpna ding ah VPC GHQ Cabinet Member zosia’n Rs. 5,000 chiat tuak khawmna le a nei ua, Building Construction Committee in Community Centre Hall sakna a sutzawm ding un thupukna a siam ui. Chun, cabinet member te a lak ah Mr. Mangbeldam, Special Contractor, Mr. Genlal Khaute, Special contractor leh Mr. Lunkhomang Vice President te chu Building Construction Committee member ding ah guatbe in a um ui. Meeting chu VPC GHQ Cabinet Member 25 um lak in mi 2 a absent ua, mi 2 leave la a um ui. Hiatthei khat chu - kum 2017 -2020 sung VPC GHQ President leh Vice President ding telna (election) a chiata August 25, 2017 ni, Kangvai Community Hall ah nei in a um a, September 9, 2017 ni ah Cabinet Member ding guatna a la um hi. Cabinet Member ding ah guat ah um te min leh mawpuakna (portfolio) chu - Khatkhotong Baite, President, Lunkhomang Neihsial, Vice President, Nangzakai Suante, General Secretary, T. Liansong, Joint Secretary, L. Sanga Vaiphei, Secretary (Finance), Manglianpau, Treasurer, Khamneithang Vaiphei, Secretary (Organization); Liankhothang, Secretary (Custom & Culture); Jamsei Baite, Secretary (Judicial); Lesei Vaiphei, Secretary (External); Kapbanyan, Secretary (Statistic); Tongkholam, Secretary (Relief & Rehabilitation); Khuptinlam, Secretary (Information & Publicity) banah Member ding ah Lunneikhup, Mangbeldam, D. Khuala, Khuallianmang, Genlal Khaute, TS Anek Vaiphei, Laltinlian, Jangmang Vaiphei, Dr. Lamkhogen Vaiphei, Lalunkam, Jamliankhup leh Ngamlet Baite te guat a hiu.

Mr T. Lala Vaiphei in UKB kithuapina Rs. 2,20,000 pia

Lingsiphai, Sept. 16 *(Nisin Thuhiltu)* : United Khawzim Brother (UKB) in Churachandpur District Super Division League 2017 ah Champion hina a lak uh tawh kitawn in UKB Board Member te leh Adviser te’n tuni’n Mr T. Lala Vaiphei, Special Contractor vena a nei ui. Zia hun a chun, Mr T. Lala Vaiphei in UKB in Churachandpur District Super Division League 2017 ah Champion hina a lak uh kipakpi mama a hidan taklang kawm in maban ah Winners Cup tournament ah kihel thei ding ah a um uh kipakpi kawm in Winers Cup a kihelhun ua a pawimaw dungzui ah amat ding un panpina Rs. 2,¬¬¬20,000 (lakh-ni leh sing-ni) UKB board te kiang in piakdawna a nei hi. Ziana chung a chun, UKB President H. Sangpi in in T. Lala Vaiphei chung in UKB ngainatute leh a fans te thasik in kipakthu genna a nei hi.

Press Media Workshop on Intensified Mission Indradhanush

Lamka, Sept. 16 *(Nisin Thuhiltu)* : Chief Medical Officer (CMO) leh District Immunization Officer (DIO), CCpur saina in tuni, 16 September 2017 sunnung dak 1:00 a pat in DIO, Immunization Office, IB Road ah Press Media Workshop on Intensified Mission Indradhanush kiti a um hi. Zia hun a chun, Dr. Kim Simte, CMO, Dr VC Pau Tonsing, DFWO/DIO, Veven Manager Cold Chain Management Unit leh DIO staff te’n tuchung Intensified Mission Indradhanush lawtinna ding ah mipi te panlaktheina ding leh hiat ding ah pawimaw te genlatna a nei ui. CMO Dr Kim Simte in naupangte natna a pat venbitna ding leh nauvawp te damtheina a hawizawk sem theina ding ah Intensified Mission Indradhanush patdaw ah um a hidan taklatna nei in, damtheina tawh kisai ah National Program chuam chuam um te lak ah Intensified Mission Indradhanush chu a pawimaw pen in a gen a, a lawtinna ding ah panlak chiat ding pawimaw in a gen hi. Intensified Mission Indradhanush (IMI) ahileh October, 2017 a pat January 2018 sung ah chiapi hiding, ziana ding a chu District sung ah ASHA leh nurse te training piak ah um zing a hidan uh le taklatna a nei hi. Dr VC Pau in Intensified Mission Indradhanush lawtin ding dawina ziak ah Press Media Workshop on Intensified Mission Indradhanush nei ah um a hidan a gen a, Mission Indradhanush kiti 2015 a pat umpanta a hidan taklang kawm in, India government in Intensified Mission Indradhanush chiapina ding ah District 118, City-17 a teldawna, North East ah District 52 te lak ah CCpur district le pang a hidan a gen hi. Veven Manager Cold Chain Management Unit in agenna a chun, India gamsung pumpi ah immunization damdawi vaccine hawpdawna munpi, Government of Medical Store Depot GSMD 4 um a hidan taklang kawm in, GSMD 4 te chu India gamsung ah vaccine supply na tawh kisai enzuitu a hidan uh a gen a, State vaccine store 53, regional vaccine store 110, vaccine store 666 nuai ah PHC/CHC ah vaccine store 2555 um in a gen hi. India gamsung pumpi, vaccine store 26388 um in le a gen a, zia mun a chu refrigerator mang ah vaccine damdawi siatlona ding ah kawitup a hidan a gen hi. hi. CCpur District ah vaccine store tawh kisai a genna a chun, District sung ah District Hospital panna PHC/CHC Saikot, Singngat, Sagang, Behiang, Sinzawl, Thanlon leh Parbung ah Vaccine store um in a gen a, zia a pat chu vaccine carrier mang ah immunization bawl ah um sek hin a taklang hi.

Thalai Week matna ding ah sport bawl
Lamka, Sept. 16 *(Nisin Thuhiltu)* : Evangelical Free Church of India (EFCI), Rengkai kochuam ah Kristien Thalai Pawl (KTP) in October hapta masa leh Thalai Week mat ding ah guanggalna a neina chung ua kihelna chi chuam chuam a pat uh chu tuni’n le a sunzawm ua, Pastor David Ralsun, Bialtu Pastor in hun hawnna nei in,numei leh pawsal- Football, Volleyball, Badminton, Marathon, Tug-O-War, High Jump ti te ah kidemna a nei ui. Football leh Volleyball Final kihelna a hileh Thalai Week hun ah um ding a hi. Chun, Thalai Week matna ding tawh kisai ah KTP Idol leh KTP Band kidemna le um, Idol ah mi 26 leh Band 6 kidemna chiatha zing hin a kigen hi.

Freshers’ Meet-cum-Felicitation Program 2017
Lamka, Sept. 16 *(Nisin Thuhiltu)* : Hmar Students’ Association (HSA) Churachandpur College Unit in tuni, September 16, 2017 sunma dak 1:30 a pat in VTI Auditorium, Muolhlum, Rengkai ah Freshers’ Meet-cum-Felicitation Program 2017 a mang hi. Zia hun chu Lalhmangpui Fimate, MDC, 6 Parbung ADCC in Chief Guest hina tawh a uap a, Mangkhanthang Simte, Second in Command, 54th Battalion, BSF in Guest of Honor hina tawh uap in, Debory Fimsangpui, CEO, Arcadia School, Molnom in Functional President hina tawh a uap hi. Chun, HSA Joint Headquarter, Churachandpur leh Imphal, Rayburn Unit, MZP Churachandpur College Branch, TKSU Churachandpur College Unit, SSPP Churachandpur College Unit leh GSO Churachandpur College Unit te’n Special Guest hina tawh a uap ui. Zia hun a chun, Hmar Students’ Association (HSA) Churachandpur College Unit nuai ah Education Department te mapuina nuai ah prize chuam chuam hawp in a um a, Mister leh Miss HSA Churachandpur College Unit telna le a um hi. Chuleh, khuallian ah pang ten thugenna a nei ua, student te zilna lam ngaikhawk dingdan tawh kisai ah a ngaidan uh leh a dawidan teu genlatna a nei ui.

District First Division Football League 2017 kipan

Lamka, Sept. 16 *(Nisin Thuhiltu)* : Churachandpur District Sports Association (CDSA) saina nuai ah (Late) Khaikhanlian Memorial District First Division Football League 2017 Opening Ceremony tuni, September 16, 2017 sun dak 12:00 in Peace Ground, Tuibuang ah a um hi. Zia hun chu, Seilenmang Khongsai, EM ADC Churachandpur in Chief Guest hina tawh a uap a, Michael Ginzasuan, District Supply Officer, Churachandpur in Guest of Honor hina tawh uap in, Hemkholun Doungel, Co-ordinator, NYK Churachandpur leh Chief of Saihenjang in Functional President hina tawh a uap hi. Chun, John Deng-te nu-pan leh a chapau Lianminthang te’n League Donor hina tawh hun matna a uap ui. Hun matna chu, James Thangluai, Vice President, CDSA in amapi a, Pastor H. Laithang in pauchapna tawh hun hawnna nei in, Donor te a pat thugenna a um a, guest chuam chuam te’n thugenna a nei nung un, Chief Guest Seilenmang in thugenna nei in (Late) Khaikhanlian Memorial District First Division Football League 2017 kick-off a bawl hi. Tuni Opening Match in Ganggam Soccer Club (GSC) leh Neihsiel Veng Youth Club (NVYC) te a kihel ua, GSC in 4 – 1 in gualzawna a chang hi. Second Match ah First IRB leh Churachandpur Police te a kihel ui. District First Division Football League 2017 ah First Division Team 20 a pang ua, zia chu Pool 4 in a kikhen hi.

25th Assam Rifle saina Mass Social Awareness

Lamka, Sept. 16 *(Nisin Thuhiltu)* : 25th Assam Rifle saina nuai ah tuni’n SDO Block Office, Sangaikot ah Government Scheme chuamchuam um te tawh kisai in Mass Social Awareness a um hi. Awareness programme hawnna hun chu Khaopao Haokip, Chairman, ADC Churachandpur in Chief Guest hina tawh a uap a, Josanglur Joute, SDO Sangaikot in Special Guest hina tawh uap in, Major Besrilal in hun matna amapui hi. Chief Guest Khaipao in a thugenna a chun, Brigadier Ajay Kumar, 27 Sector Assam Rifle mapuina nuai ah Awareness programme chuam chuam chiapi a hina chung ah mi tamtak in phatchuampi a hidan uh genkawm in 25th Assam Rifle te panlakna chu pakcha mama hin a gen a, ziagual programme chu phatchuampi ding dan leh dan leh thupiak enzui tawh kal siamhawi ding pawimaw in a gen hi. Special Guest Josanglur in a thugenna a chun, ama etkawl Block sung ah ziagual programme organized ah a um chu kipak mama a hidan taklang kawm in, Assam Rifle te panlakna chu pakcha mama hin a gen a, ziagual Awareness hun matna chu bailsung ah um tamlo a hina chung ah bial mipi’n a phatchuampi ding uh kinem a hidan a gen hi. Colonel Mithun, CO 26 Assam Rifle in huntawp ah kipakthu genna nei in Awareness hawnna programme a khak ui. Awareness programme hun sung in Suvigya Cell, SBI leh AXIS Bank Extension Counter, Army Welfare Education Scheme (AWES), CDS Extension Counter banah, Medical Camp nei in a um a, Medical camp ah Specialist Doctor 9 te’n natna chuam chuam neite etna a nei bak un a thawn in a kituakpi ding uh damdawi piakna a nei ui. Counter chuam chuam um te lak in Suvigya Cell chu a luun mama a, zia counter chu pensioner te’n a pension sum uh a dik tak ah a mu leh mulo uh et (check) piakna a hi. Army Welfare Education Scheme ahileh Army a sem leh pension sa, a chateu school kai nalai umte ding ah scheme a hia, a hiachian nuam te zia hun a chu thil umdan genchian piak leh hiathiam sak a hiu.

Army recruitment rally ah pang nuam te ding ah training chiatha zing

Lamka, Sept. 16 *(Nisin Thuhiltu)* : Leimakhong, Kangpokpi district ah October tha leh Indian Army recruitment rally a umna ding tawh kisai ah Indian Army ah pangnuam khangthak te ding in Assam Riffle camp Tuibong in trainning a chiatha zing hi. Zia trainning ah pang te chu Assam Riffle, Churachandpur battalion in recruitment rally hun ah panlak ding dan tawh kisai in ziltilna a nei ua, khangthak Indian army ah pangnuam mi 100 training in a pang ui. Training ahileh, July 3 ah a pat uh hita a hia, zingkal dak 6 a pat physical training nei in, sunma dak 10 a pat theory class a neisek ui.

YPA New Lamka Block in kum 36 tinna mang
Lamka, Sept. 16 *(Nisin Thuhiltu)* : Young Paite Association (YPA) New Lamka Block in tuni’n YPA Hall, New Lamka ah YPA New Lamka Block dindaw a hi nung kum 36 tinna a mang hi. Zia hun a chun, YPA New Lamka Block nuai ah Unit 12 a pat lawiupa te leh YPA GHQ a pat lawiupa te uapna tawh S Manlian, President, YPA New Lamka Block in YPA flag kai palna a nei hi. Paumuanlal Guite, Assistant Secretary in hun matna a mapui a, department chuam chuam te a pat report piakna a um hi. S. Manlian Block President in a thugenna a chun, lawiupa masa te kukalna, gin-umna leh lemhiatna ziak ah tuni tiang ah YPA masawn zing thei a hidan genkawm in, YPA Block, Unit zosia OB Executive, Val Upa, Vengsung Nu leh Pa, Nungak Tangval te tilkhona nei in, nam leh gam sung ah identity, Culture leh Literature kawltup tu hina kihiatdaw thak ding pawimaw in a gen a, kum 36 tinna mat ah um chu, kihepina, kilainatna tuntu a hiding a nawp thu a gen hi. Chuleh, YPA thupi hemillo a, damtheina, thianthona, chaga leh liangvai te hiamillo ah a zawng a hau liangvaite leh panpi ngaite kingakna kham ting ding ah Unit tin in mawpuakna nei chiat a hidan taklang in, thudik dinpi ngam ding leh Nam a ding ah kingakna taak ting ah Block, Unit te a um ding pawimaw in a gen hi.

State Govt. in state sung ah good governance a um sak theilo ahileh govt. in umzia neilo: Chief Minister

Imphal, Sept. 16 *(Nisin Thuhiltu)* : Cabinet Hall ah Manipur Chief Minister N. Biren Singh mapuina tuni’n government departments chuam chuam in a chiapi projects/scheme te dinmun tawh kisai in review meeting a um hi. Department 14 ah official te panna tu financial year 2017-18 sung ah developmental projects ahiloleh scheme zawthian ah um ding te dinmun tawh kisai genkhawmna a um hi. Meeting hun ah Chief Minister in state khantona ding ah public oriented developmental work te ngaikhawk ding pawimaw in a gen a, government in state sung ah migenthei te phatchuampi thei ding ah panlakna a neilo a, good governance a um sak theilo ahileh government in umzia neilo hin a gen hi. Information Technology (IT) department nuai ah scheme chiapi ah um te dinmun tawh kisai genkhawm hun ah Chief Minister in a genna a chun, IT kiti chu Prime Minister Narendra Modi, priority list a pang a hidan taklang kawm in Information Technology bei ah state sung ah digital revolution umtheilo ding hin a gen hi. State sung ah Common Service Centres (CSCs) te chu welfare schemes chuam chuam te ding ah service points a hiding uh pawimaw a hidan gen in mipi te panpi nuam Nationalised bank te chu hill areas ah bank branch hawnna ding ah lemchang piak masat hiding in a gen hi. Review Meeting hun sung a chun, IT, TA & Hills, Tourism, Higher & Technical Education, School Education, YAS, SCERT, Health, Revenue etc nuai ah panlakna um te genkhawm in a um a, digital village umsak ding dan, cadastral maps chungchang, teachers recruitment tawh kisai ah thuneina hawp khen ding, transparent leh automated transfer policy etc. te le genkhawm na’n a pang hi. Zia meeting a chun, Cabinet Ministers, Chief Secretary, Administrative Secretaries, Commissioners leh departments chuam chuam ah Directors te a pang ui.

CM mapuina’ State Level Mera Houchongba Festival mat dingdan genkhawm
Imphal, Sept. 16 *(Nisin Thuhiltu)* : Chief Minister N. Biren Singh chairman hina nuai ah tuni’n 5th October, 2017 leh Mera Houchongba matna ding tawh kisai in 1st State Level Organising Committee meeting a um hi. Meeting hun ah Chief Minister in Mera Houchongba chu khawvel ah festivals luipen a hina chung ah State Level ah mat ding ah lemsakna um a hidan taklang kawm in, state sung ah community chuam chuam te kal ah chamna leh kituakna tuntu a hiding a nawp thu a gen hi. Zia gual festival kimatna a pat chu community chuam chuam te kipumkhatna, chamna leh muanna a thak ah siamhawi ding ah ginchatna nei a hidan le taklang kawm in, Mera Houchongba in political system, economic y, kipumkhatna siam hawi ding hin a gen hi. Deputy Commissioner te chu festival uap ding te a ding ah transportation kituptak ah arrange bawl ding in a hiatsak hi. State Level Mera Houchongba Festival Committee member te a hiuleh Chairman- Chief Minister ; Vice Chairman- Minister for Art and Culture; Member Secretary - Commissioner Art and Culture; Member ding ah Cabinet Minister, MLA, DC zosia leh Director (Art and Culture, TA & Hills, IPR), Sana Konung Thousillupa pat palai 7, Sanamahi Temple Board a pat palai 2 leh Kangla Fort Board te a pat palai 2 te a hiu. Minister for Art and Culture L. Jayantakumar Singh, Chief Secretary R.R Rashmi, Commissioner Art and Culture M. Lakshmikumar, Deputy Commissioners, Director Art & Culture Dr K Sushila, Director IPR K. Meghachandra, Sana Konung Thousillup leh Sanamahi Temple Board palai te’n tuni meeting chu a uap ui.

AMWJU in 43rd Foundation Day mang

Imphal, Sept. 16 *(Nisin Thuhiltu)* : All Manipur Working Journalists’ Union in tuni’n Manipur Press Club ah 43rd Foundation Day a mang hi. Zia hun chu Information and Public Relation Minister Thongam Biswajit Singh, Law Minister L. Jayenta, Konthoujam A/C MLA Dr Sapam Ranjan Singh, AMWJU president Wangkhemcha Shamjai te’n khuallian hina tawh a uap ui. Minister Thongam Biswajit Singh in a thugenna a chun, public leh government kal ah journalist te chu mediator a hidan uh a gen a, journalistic principle nei tak ah media person te’n panlakna a nei ding uh pawimaw hin a gen hi. Chun, mipi te’n Government scheme -Pradhan Mantri Awaj Yojana, Unnat Jyoti by Affordable LEDs (UJALA), Pradhan Mantri Ujjwala Yojana (PMUY) etc a hiatthiam theina ding ua media persons te chu awareness thezaktu ah a pan ding uh a nawp thu a gen hi. Tu ah state government in government masa’n a hawn schemes leh projects te bep a buaipi a hi ti ah gen leh sak um te a dawnhuna a chun, a process sutzawm ah um zing a hidan a gen a, tu ah government sukpitinlo project um te sukpitin ding dawi ah panla hin a gen hi.

User Rating: 0 / 5

Star InactiveStar InactiveStar InactiveStar InactiveStar Inactive

State Cabinet in Senapati Sub-Division siamdaw ding panna thupukna chuamchuam siam

Imphal, Sept. 13 *(Nisin Thuhiltu)* : Chief Minister’s Secretariat, Imphal ah Chief Minister N. Biren Singh chairman hina nuai in tuni’n State Cabinet Meeting a um hi. Zia hun a chun Cabinet in Manipur Legislative Assembly complex opposite ah Manipur leader lui Jananeta Hijam Irawat lim siamkawm (statue) siam ding in lemsakna a nei a, zia chu za (respect) etsakna hiding ti a hi. 76-Salam Keikhu, Lamshang, Imphal West District ah gam (land) Dag No. 383 (area of 8.10 acre) chu State Health Department in 60-bedded State Mental Hospital a sakna ding ah piak ding in lemsakna a nei a, Manipur Water Policy, 2015 etthakna nei ding leh tuhun tawh kituak ah haksatna um te sukven theina ding ah panlak ding in lemsakna a nei hi. Irrigation and Flood Control Department (IFCD) chu Manipur Water Policy, 2015 implemnet bawlna ah Nodal Department ding in lemsakna a nei a, IFCD chu Department of Water Resources ti zawk ding in lemsakna a um hi. IFCD chu lui (river) leh tui (water) lam tawh kisai thil himhim banah drainage system te planning leh develop bawl ding ah mawpuakna piak a hi. Medical Directorate nuai ah MSc (Nursing) of College ah teacher te service kum 62 tiang hisek chu 65 tiang hiding in approve a bawl a, World Bank funded North Eastern Region Power System Improvement Project (NERPSIP) nuai ah Hiyangthang ah 33/11 KV sub-station kawina ding gam lakna ding ah proposal um le Cabinet in approve a bawl hi. Senapati Sub-Division siamdaw ding leh zia chu Tadubi Sub-Division a pat khua 27 lakdaw ding leh Willong Sub-Division a pat khua 4 lakdaw ding in cabinet in approved a bawl a, Sub-Division thak a chu, household 6983 leh population 37250 um ding a hi. Senapati Sub-Division siamdawzaw a hitak leh Tadubi Sub-Division nuai ah khua 12, households 5292 leh population 38842 um ding a hi. State Cabinet in NH-37 ah lei (bridge) siamna ding ah gam kilakpiak te chu compensation piak ding in le lemsakna a nei a, 10th September 2014 ah Manipur Conservation of Paddy Land and Wetland Act, 2014 chiapi a hinung ah digitised cadastral maps mang ah kisiam, lo (paddy land) conversion ahiloleh reclamation chungchang ah buaina um te sukven ding in le State Cabinet in lemsakna a nei hi. Chun, thuthak a um kit masang sia Deputy Commissioner te chu a mau mawpuakna district chiat etzui ding ah mawpuakna piak a hiu.

Meeyamgi Numit
Lamka, Sept. 13 *(Nisin Thuhiltu)* : Shyam Lal Poonia, IAS, Deputy Commissioner, Churachandpur in thusua a bawlna a chun, hun dang gual ah tutha September tha a ding ah 15th September, 10:00 AM – 4:00 PM sung ah District Training Centre (DTC) Hall, M. Songel ah Meeyamgi Numit (Peoples Day) um ding a hi. Zia hun chu M. H. Khan, IAS, Principal Secretary, Government of Manipur in le uap ding a hi. Chun, DLO zosia chu pello ah Meeyamgi Numit uap chiat ding in hiatsakna a bawl hi.

District Public Grievances Redressal Cell siamdaw ah um
Lamka, Sept. 13 *(Nisin Thuhiltu)* : Shyam Lal Poonia, IAS, Deputy Commissioner, Churachandpur in District Public Grievances Redressal Cell (DPGRC) kiti siamdaw ah um hin a taklang hi. DPGRC ding ah Superintendent of Police, Churachandpur chu pansa ding leh public in haksatna leh complaints/grievances ti te zikthaw leh phone call ahiloleh kihomatna dang dang mang ah pelut thei ding a hidan uh taklang kawm in, zia Cell chu Civil, Police administration leh Government department chuamchuam in enzui khawm ding a hidan uh a taklang hi. Thasin leh "Meeyamgi Numit" lawtin theina ding ah panlatu hiding a hiu. Cell official te’n tha sin date 5 leh DC/CCpur kiang ah detailed monthly report a piaklut zing ding uh a hi. SP office, Churachandpur ah control room number 03874-233239 chu dedicated Helpline number hiding , District Public Grievances Redressal Cell (DPGRC) ah official ding ah 1. Augustine Khongsai, MPS, SDPO, Thanlon, 2. A. AKrishnachandra Singh, APS to DC, Churachandpur, 3. J.K Maiba Singh, APS to SP, Churachandpur leh 4. Khozamuan, LDC, DC office, Churachandpur te guat a hidan uh Deputy Commissioner, Churachandpur in thusua a bawlna a chun a taklang hi.

UNLF cadre khat kiman
Moreh, Sept. 13 *(Nisin Thuhiltu)* : CDO Moreh in tuni, 13 Sept. 2017 nitaklam dak 5:00 tuam in Imphal- Moreh van parking, Moreh ah UNLF cadre khat a man dawk ui. Mat ah um chu Lairenlakpam Priyokumar Singh (23) @ Tayan S/O. Sanajaoba Singh of Moreh Tali Road, ward no.6 hi ah hiat a hia, Lance Corporal, Army no 2361, 37th Batch le a hi. Chuleh, UNLF, s/s Tiger kiti nuai ah sem hin a kigen hi.

KIC mapuina ‘Sahnit Nikho’ mang

Tuibong, Sept. 13 *(Nisin Thuhiltu)* : Kuki Inpi Churachandpur (KIC) mapuina’ nuai ah tuni’n KIC Office, Tuibong ah Sahnit Nikho (Kuki Black Day) mat in a um hi. Zia hun a chun, Soiminthang Doungel, Chairman, Political Affairs, KIM in Black Day taklatna a nei a, PS Haokip, President, KNO leh Kuki Nampi sung ah leader chuam chuam te a pat thugenna a um hi. PS Haokip in a thugenna a chun, Kuki mite’n pi-leh-pu a pat gitlona tamtak a nei ziak ua Tangkhul (Naga) te mang ah Pathian in a kona ah mi 900 val in hinna chân uh a hidan gen in, Pathian lam bel a mipi’n pauchapna a nei nung ua, Pathian in dawnhuna Chonlhun mang ah pia’n zia chu Pathian nam tel, Manaseh suan te hih ah kihiatdaw thakna piang hin a gen hi. Zia h thina tuak te chu amau thiammaw ziak ah thi hizawlo ah pu leh pa te thiammawna ziak ah thi a hidan uh le a gen a, Kuki te Naga leh Meiteite’ chenna gam dawn hizawlo ah, Kuki mite’ chenna gam zosia chu State ah puan ding ah Government ah dawtna bawl hizaw a hidan a gen hi. Sahnit Ni mattaklo ding ti pawl um maleu ama mimal ngaidan ah thupitak ah mat zawk ding, nikhat tei chu National Holiday ah kimang ding hin a gen hi. Sahnit Nikho (Kuki Black Day) ahileh September 13, 1993 ah Joupi, Zalenphai leh Gelnel khua ah NSCN-IM te’n Kuki mi 108 a tha uh, Kuki khangthu mithi tamni pen ah tepte a hi tawh kitawn ah thina tuak te suunna leh zana etsakna kum sin leh September 13 chu Kuki Black Day ah mat hisek a hi.

NT 14sep2017b

Drug Overdose tawh kisai ah Awareness programme nei

Lamka, Sept. 13 *(Nisin Thuhiltu)* : Salem Hall, Salem Veng ah tuni’n Salem Veng Village Authority leh Shalom, Sunrise Project, Family Health International FHI360 kitua in ‘Awareness program on Overdose’ kiti a nei ban ua khawsung thianthona ding tawh kisai a le awareness a nei u’i. Zia hun a chun, Sunrise Project, Family Health International FHI360 a pat resource person 2 banah ADC CCpur a pat Paukhanlian, Town Planning & Sanitation, EM, ADCC leh T Kammuanlal, CEO, ADCC te a pang u’i. Overdose awareness hun ah Sunrise Project, Family Health International FHI360 a pat Resource person, Jehova Coordinator in ‘Drug Overdose - prevention and management’ tawh kisai a ziltil hun a chun, Overdose tuakkhak khat te chu a chang ua nutsia lo ding, a ipmut theng lo na ding ua phawt zel ding leh a sil lam ua lupsak ding hi’n a gen a, Overdose ziak ah thina tuak suktawm na ding ah Helpline Number leh Management Team bawldaw ah um in Helpline Number a hileh 7423918414 leh 8119050881 a hia, kua a hem in overdose a tuakkhak hun ah gal et mailo ding leh zia number te lak ah khat zawk zawk call ding in a hil hi. Paukhansang, Consultant in Drug Awareness leh prevention tawh kisai banah Shalom naasep leh mawpuakna tawh kisai a genna a chun, Shalom in khawpi sung ah khamthei zuak, hi zawngsak te buaipi lo in khamthei bawl te a pat kikai sawn thei natna lau um chuam chuam te a pat mi dang te vengbitna ding ah panla hi’n a gen a, zia tawh kisai thuchian hia nuam te’n Shalo, Office ah kan chian thei ding hi’n a gen hi. Khawsung suk thiangthona ding tawh kisai ah Paukhanlian, EM, ADCC in a genna a chun, District sung ah a khat veina ding in ADC panlakna nuai ah Government, NGO, Village chief/ Authority, pawl chuam chuam banah mipi tawh pangkhawm ah zia chu sep pitin hi ding ti’n a gen a, khawsung sukthianna le hikawm in police kithuapina tawh khamthei, gucha ti te a pat kivengna ding ah panlak to hi ding in a gen hi. Kammuanlal, CEO, ADCC in khawsung suk thianthona ding tawh kisai ah ADC bep in zolo a hina ah pawl chuam chuam tawh pangkhawm ah tukum December tiang nei hi ding leh zia chu a lawting a hileh kumkit ah sutzawp hi ding ti’n a gen hi.

NGMF meeting
Lamka, Sept. 13 *(Nisin Thuhiltu)* : NATIONWIDE GOSPEL MUSIC FESTIVAL (NGMF) in tukum December tha leh K Salbung ECA GALARY ah NGMF Motivational Cum- Advent Christmas Programme matna ding tawh kisai ah a hung tung ding September 15, sunnung dak 2 leh NGMF Office, Vengnuam, Hiangtam Lamka ah meeting nei ding a hia, zia hun chu NGMF member zosia’n uap chiat ding in NGMF a pat hiatsakna a um hi.

August tha sung ah HIV+ve 26 mudawk
Lamka, Sept. 13 *(Nisin Thuhiltu)* : District AIDS Prevention & Control Unit (DAPCU), Churachandpur in tha lui, August 2017 sung ah mi 763 HIV/ AIDS test a bawlna lak ah positive mi 26 a mudawk u’i. Churachandpur District sung ah Integrated Counseling & Testing Centre (ICTC) chuam chuam ah mi vantang (General Client) 751 test nei a hina lak ah positive mi 23 a mudawk ua, zia lak ah mi 18 te’n ART damdawi a ne pan ngal u’i. Zia hunsung ma ah numei nauvawp 496 test na lak ah HIV/AIDS positive 2 mudaw ah um in nausen leh a nu te chu ART patsak a hiu a, Positive numei a pat piang nausen 2 test bawl a hina ah negative a hi gel u’i. August 2017 sung ah Injecting Drug User (IDU) 133 test bawl a hina lak ah HIV positive mi khat ah um in ART Centre ah registered a hia, Female Sex Worker (FSW) mi 132 test bawl a hina lak ah HIV/AIDS positive mudaw umlo hi’n report a kidawng hi.

Ankuang ûmpi
Lamka, Sept. 13 *(Nisin Thuhiltu)* : CM Reception Organizing Committee saina nuai ah lawting tak ah Manipur Chief Minister vaidawnna nei a hina chung ah S. Genlunthang leh H. Haulianmang te’n kipakpi mama in Organizing Committee ah Convener, Co-Convener pang in puitu banghem zat te ankuang a ûmpi u’i. S. Genlunthang leh H. Haulianmang te’n a hileh Chief Minister vaidawnna lawting tak ah nei a hi banah CM in thu a hung puak leh thu kigen te kikpai mama a hina’u a zia gual annek khawmna chu a sai uh hi’n a gen ua, zia hun chu Organizing Committee ah Convener, Khaipao Haokip, Chairman, ADC Churachandpur, Co-Convener Thangkhosuanmung Guite, MDC leh Paukhanlian, Executive Member (Town Planning & Sanitation), ADC Churachandpur te’n a uap u’i.

TYCM in hilchetna dawna
Lamka, Sept. 13 *(Nisin Thuhiltu)* : Tribal Youth Council, Manipur (TYCM) in a chiata September 7, 2017 ni’ Manipur Governor a ding lekha pia in, Health Service nuai ah Doctor, Post Graduate leh a chunglam thiamna neite pension kum ding tawh kisai Chief Minister Secretariat in August 17, 2017 ni’ thusua a bawl leh Chief Secretary in August 30, 2017 ni’ thusua a bawl a kituaklo tawh kisai hilchian ding in a dawn hi. RR Rashmi, Chief Secretary (DP), GoM in thusua a bawlna a chun, Manipur Health Service nuai ah Doctor, Post Graduate leh a chunglam thiamna neite pension kum chu 62 a pat 65 hita ding a hi dan taklang kawm in zia chun Administrative Position tu kha, Allopathic leh Dental Cadre te huap khalo ding ti ah taklang maleh Chief Minister Secretariat thusuak in khenchuam umsak lo in a huapsak vek hi. Zia chung chang ah TYCM in, government in State dang te gual ah pension kum ding a belap kipakpi kawm in, thusua kibatlo tawh kisai hilchian ding in a dawn hi. All Manipur Tribal Union (AMTU) in Manipur Governor a ding Memorandum a piak na ah Health Services a Director ding, gawlgukna leh nekgukna a kibualmi a hilo ding ti tawh kisai ah, Administrative Power neilo Specialist Doctor khat pension hunding kum thum belap hileh, amau sang ah naupang leh Junior zaw te nuai ah a sep uh ngai ding a hina ah zia chun taksa leh lungthim ah Administrative leh Technical Post a tûk uh ngai ding suak hi ah taklang kawm in State ah non-clinical Specialist Doctor 68 umlak ah 26 te non-clinical Specialist Tribal Doctor te tawden ah um ding in zia chun thil diklo tut ding hi’n a taklang hi. State ah khenchuam neilo ah vaihawmna leh khantona kibang a um theina ding ah mimal phatchuamna ding ah thudik umsa then danglam leh thusua kibanglo tite bawldik ding in a dawn a, Cabinet Decision etthak a hiloleh Administrative Position tawh kisai ladawk thak ding in TYCM in dawtna a siam hi.

16th Sept. leh District First Division League 2017 kipan ding
Lamka, Sept. 13 *(Nisin Thuhiltu)* : Churachandpur District Sports' Association(CDSA) in 8th Sept, 2017 ni ah club/team managers te tawh meeting a nei hun ua thupukna a siam dungzui un, (L) Khaikhanlian Memorial District First Division League 2017 chu 16th September Sept, 2017 leh Peace Ground, Tuibong, Churachandpur ah kipan ding a hi. First match (opening league match) ah Ganggam Soccer Club leh Neihsial Veng YC te kihel ding a hiu a, tukum District Super Division League a chu kum masa Super Division League a pat relegate ah um M. Songgel YC leh SC Leatherite te panna team 20 te’n match nei ding a hiu. Chun, team 20 te chu groups 4 ah khen in a um ua, zia dungzui a chu ; Group A ah 1. SC Leatherite (SCL) 2. Bungmual Youth Club (BYC), 3. Khallai Football Club (KFC), 4. Zeal SC (ZSC) leh 5. Guolkilungtuok FC(GKTLFC); Group B ah 1. M. Songgel YC (MSYC) , 2. Ganggam Soccer Club (GSC), 3. Taqchapa United FC (TUFC), 4. Neihsial Veng YC(NVYC) leh 5. Zoheisa FC (ZoFC); Group C ah 1. YC Pearsonmun(YCP), 2. Zillai FC (ZFC), 3. FC Zotal(FCZ), 4. FC Zion(FCZi) leh 5. S. Molcham YC (SMYC); Group D ah 1. Lamka FC (LFC), 2. Lenlai Club (LC), 3. Zenhang Lamka YC (ZLYC), 4. Molnom YC (MYC) leh 5. Sanakhang FC (SFC) te a um ui. Chuleh, District First Division League kichai tiang ah point mutam penpen team 2 te chu kumkit leh Super Division League ah promote hiding a hiu a, point mutawm penpen team te chu 2nd Division ah khianiam suk ding a hiu.

Chief Minister in projects/scheme chiapi ah um te dinmun et-thakna nei
Imphal, Sept. 13 *(Nisin Thuhiltu)* : Manipur Chief Minister N Biren Singh mapuina’ tuni’n Cabinet Hall, Chief Minister’s Secretariat ah government department chuamchuam in kum 2017-18 sung a sepdaw ding ah a chiapiu developmental projects ahiloleh scheme chuamchuam te dinmun et-thakna (review) meeting a um hi. Zia hun a chun, Chief Minister in projects/schemes chiapi ah um te dinmun etzuina a nei a, Administrative Secretaries leh Head of Department zosia chu amau department in a chiapi’u developmental project ahiloleh scheme te tukum sung ngei ah supiting thei ding ah panla chiat ding in hiatsakna a bawl hi. District Level Monitoring Committees te chu district level ah developmental activity chiapi ah um te review bawl ding in hiatsakna a bawl a, hapta sin leh progress report pelut ding in a hiatsak hi. N. Biren Singh in tuhun ah working system ahiloleh style te chu san (change) ding pawimaw in a gen a, Administrative Secretary te leh departments chuam chuam ah head of department te chu gin-um tak leh kukal tak ah panla chiat ding ah thupiak bawl in, field visit chiapi ding leh state sung ah good governance a um theina ding ah theitawp sua ding in chialna a bawl hi. Meeting hun a chun official chuam chuam - Agriculture, Horticulture, Forest, RD & PR, IFCD, MSPCL, MSPDCL, Commerce and Industries and Science and Technology etc in power point presentation bawl in development project a chiapiu teu dinmun taklatna a nei ui. Meeting chu Cabinet Minister, Chief Secretary, DGP, Administrative Secretary te, Commissioners leh departments chuam chuam ah Directors te’n a uap ui.

Swachh Bharat Mission nuai ah sanitary latrine 3,41,652 sak hita
Imphal, Sept. 13 *(Nisin Thuhiltu)* : Central Government's Swachh Bharat Mission (GRAMIN) Programme nuai ah Manipur state sung a diak ah rural area ah individual household 3,41,652 te ding ah latrine sakzaw hita a hidan taklat in a um a, sanitary complex 329, school toilets 3919 leh Angawadi toilets 1201 sak ah umta ah taklat a hi. Chun, 2nd October 2019 tiang ah government school chuam chuam ah sanitary latrine 3919 Angawadis 1201 ah sanitary latrine sakzaw ding ah guanggalna um hin le a kigen a, state sung ah toilet function talo ah 40,482 te le siam phat hiding leh function sak hiding in a kigen hi. Toilet function talo te siamthak ahiloleh ahileh state chu Open Defecation Free (ODF) hitheilo ding ti a hi. Ministry of Drinking Water and Sanitation, Government of India in zia ding a chu Rs.48.57 crore sanction bawl ding a hi. Public Health Engineering Department, Government of Manipur (PHED) chu State ah Swachh Bharat Mission (Gramin) implement bawltu leh Planning, Investigation, Project formulation, Implementation leh Operation and Maintenance (O&M), WATER SUPPLY, IMPHAL SEWERAGE thil ah mawpuakna piak ahi. Chun, State government in estimated cost Rs. 89.75 crore tawh “Integrated Water Supply Project for Imphal Planning Area” chiapina ding in a Detailed Project Report (DPR) a siam a, Phase-I a ding , JNNURM transition phase, January 2014 a khah sanction kibawlta ti a hi. Zia project nuai a chu . Water Treatment Plant 9; i) Koirengei ii) Khuman Lampak iii) Minuthong (Kangla) iv)Porompat v) Chinga vi) Canchipur vii) Singda viii)Kangchup leh ix)Kangchup extension leh Sangakpham Zonal Reservoir khat umsak ding ti a hi. Zia ah panlakna chu March 2017 tiang ah zawthian hiding in DIPR in thusua a bawlna a chun a taklang hi.

Kangpokpi DHQ ah Kuki Black Day kimang
Imphal, Sept. 13 *(Nisin Thuhiltu)* : Kumsin leh 5th September Kuki Black Day ahiloleh Sahnit Ni ti ah mat a hi sek tawh kitawn in tuni’n le mun chuam chuam ah Kuki Black Day mat in a um hi Kuki Black Day ahileh Th. Muivah mapui NSCN-IM in nautang tamtak a tha teu hiatzingna ding leh a suunna ah mat a hi sek hi. Kuki Students’ Organization Sadar Hills saina ah 24th Kuki Black Day chu ‘Remembering the past while forging ahead’ ti thupi mang in KBC Centre Church, Kangpokpi DHQ ah mat in a um hi. A langkhatlam ah 24th Kuki Black Day matna ding mun kiang ah bomb um ti ah thuthang a um ziak in Kangpokpi DHQ ah hun matna chu chawbuai in a um a, Kangpokpi police leh 38 Assam Rifles Kangpokpi Post te’n bomb ah kigen thil chu a etchian nung ua bomb hilo ah hiatdaw thei ah um hin a kigen hi. Zia hun matna chu Kangpokpi ah CSO leader te, Kuki Inpi Kangpokpi District, UPF-KNO leader, Kangpokpi local body te, a la suakcha te leh victim’s family te’n a uap ua, L. Jacob, President, KNO/KLA, Dino Zou, President, ZDV leh Aaron Kipgen, Convenor UPF/General Secretary, KNF te’n thugenna a nei ua, KSO-GHQ mapuina ah hawnkhat in Imphal city ah rally a nei ui.

CM Relief Fund ding ah Rs. 55,000 donate
Imphal, Sept. 13 *(Nisin Thuhiltu)* : Mao Union, Imphal in tuni’n Manipur tui-let ziak ah haksatna thuak te kithuapina ding in tuni’n Chief Minister’s Relief Fund (CMRF) ah lut ding in Rs. 55,000 donate a bawl a, Chief Minister N. Biren Singh khut in Union team member te’n sum piakdawna a nei ui.

Page 1 of 12