Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

Government khut ah thingnuaimi pawl 6 a pat cadre 68 te ki pedawk

Imphal, Aug. 14 *(Nisin Thuhiltu* : Manipur ah BJP mapui government thak in thingnuaimi te muan-ngamna chang a hidan a kilatna ding in, tuni’n thingnuaimi pawl chuam chuam a pat cadre 68 te a ki surrender ua, Banquet Hall, 1st Manipur Rifles, Imphal ah “Homecoming Ceremony” matpi in a um ui. Chief Minister N. Biren Singh, Deputy Chief Minister Y. Joykumar Singh, Minister for Health and Family Welfare L. Jayantakumar Singh, Minister for CAF&PD K. Shyam, Minister for Education Th. Radheshyam, Minister for IFCD Letpao Haokip, Minister for Agriculture V. Hangkhanlian, Chairman of Hill Areas Committee T.T. Haokip, Parliamentary Secretaries Dr. Sapam Ranjan, K. Robindro, Chief Secretary R. R. Rashmi, DGP L.M. Khaute, IGAR(South), IG CRPF, top civil leh police officer te uapna tawh homecoming ceremony hun in cadre 68 te’n galvan piakdawna a nei ua, Chief Minister in a thugenna a chun, state khantona ding ah gitlo bawl chawlsan ah surrender cadre te kipakpi mama a hidan taklang in gitlo bawlna’n buaina suveng lo ding leh khat leh khat kal ah thisan suana tungzaw ding a hidan a gen hi. Political dialogue ahiloleh talks nei ah a lemlo thil chuam chuam te sukven thei hizaw a hidan gen in, mainstream zawm cadre te kipiakdawna chu government thak sepdaw (achievement ) hin a gen hi. Thingnuaimi te ding ah surrender policy designed umsa chu lawtinglo a hidan taklang kawm in et-thak leh siamhawi thak pawimaw in a gen a, surrender te ding ah revised Surrender cum Rehabilitation Policy kisiam thak chu Ministry of Home Affairs, Government of India in final approve a bawl ding ah ngak hizing in a gen hi. Government khut ah ki pedawk thingnuaimi te buaina leh haksatna enzui ding Nodal Officer appoint ah um ding a hidan le puang in, a kipedawk thingnuaimi te bitna ding leh a haksatnau sukvenna ding ah government in panla ding in thutiam a bawl hi. Chief Minister in a gen belapna a chun, government in fundamental right to life & dignity ngaikhawk mama a hina chung ah ngaina gual ah hinkhua mang ding ah kipedawk thingnuaimi cadre te chu humbit hiding a hidan gen in tunung ah thingnuaimi cadre dang dang le a ki piakdaw ding uh kinem hin a gen hi. Manipur banah India integrity humbitna ding leh kituptak ah sep khawm leh panlak khawmna pawimaw a hidan gen in, panlakkhawmna hawitak a um tak leh state sung ah chamna leh muanna um ding leh India ah Manipur chu top State ah pang thei ding hin a gen hi. Chuleh, tunung kum 10-15 zaw leh State sung ah a phalam ah kisanna, khantona nasatak um ding a hidan gen in Manipur gam hawina, culture hausakna leh tradition hausakna te chu siamhawi thak ding pawimaw hin a gen hi. Tuni ah thingnuaimi pawl chuam chuam a pat cadre 68 ki pedawk te chu - numei 4 panna KCP cadre 23, UNLF cadre 17, PREPAK cadre 10, PREPAK (Pro) cadre 7, PLA/RPF cadre 7 leh KYKL cadre 4 a hiu.

Tu ah state in a pawimaw electric meivak 170 MW: Minister Th. Biswajit

Imphal, Aug. 14 *(Nisin Thuhiltu* : Power Minister Thongam Biswajit Singh in tuni’n Mao ah 33/11 kV Sub-Station hawnna a nei a, Minister Thongam Biswajit in a thugenna a chun, tu globalization leh industrialization khang ah electric meivak pawimaw mama a hidan gen in Patriots Day leh 71st Independence Day celebrations tiang ah State government thak in 33 kV sub-stations sagi (7) - Henglep (2x1mMVA), Oinamlong (2x2.5MVA), Gelnel (2x2.5MVA), Ukhrul Khunjao (2x2.5MVA), Phungyar (2x2.5 MVA), Chakpikarong (2x1 MVA) leh Mao (2x5 MVA) hawng dawkta a hidan a gen hi. Chuleh, BJP mapui state government thak in hill leh valley ah khantona kibang tak a um ding tup ah panla zing a hidan gen in tu ah state in a pawimaw electric meivak 170 MW himaleh state in power kining ting tak 200 MW nei hin a gen hi.

Bengaluru YPA Joint HQ hawng ding

Lamka, Aug. 14 *(Nisin Thuhiltu*: Young Paite Association YPA GHQ nuai ah Joint Headquarter khat hiding in August 15, 2017 ah YPA Joint Headquarter, Bengaluru hawnna um ding a hi. Joint headquarter hawng ding in tuni’n YPA GHQ team khat in Lamka nusia in Bangalore a zuan ui. Bangalore zuan ding YPA lawiupa te chu zingkal dak 7 ah YPA GHQ Office Hiangtam Lamka ah kingak khawm in T khailianthang, President YPA GHQ mapuina hun saulo mang in, President umlo sung ah President mawpuakna tuding in Luahkhanchin, Vice President, YPA GHQ khut in a pedawk a, Lianbenson Khuptong, Executive Secretary EELC in pauchapna tawh a thadawk hi. YPA GHQ team Bangalore zuan te chu T. Khailianthang, President, YPA-GHQ in a mapui a, member dang a kitawnpi te a hiuleh - Chin Ngaih Pau, Chairman, CEC, Lianmuanthang Valte, General secretary, leh V. Vungzapau, Finance Secretary te a hiu.
NT 15aug2017d

T. Lala Vaiphei, Special Contractor in lampi siamhawi

Lamka, Aug. 14 *(Nisin Thuhiltu* : Lingsiphai area ah Tedim Road lampi siatna mun chuam chuam te tuni, August 14, 2017 zingkal in mipi te khualna leh lampi taitua te haksatna sukven theina ding in T. Lala Vaiphei, Special Contractor in ama mimal sum leh van mat te mang in ballu single sung in siamphatna a nei hi. Zia hun a chun, JCB 2 leh Tipper 3 mat in a um a, JCB khat in Tuitha Lui ah Ballu Single khuat dawk in, Tipper- ah load bawl in, lampi kuakna mun te ah sun in a um a, zia te chu JCB khat in kaizak in, a sutuak hi. Zia nasepna chu mipi’ tha panglo a sep ding ti a hia, Lingsiphai kim leh kiang ah lampi hawilona te a pawimaw dungzui ah siamhawina nasepna chiapi ze hiding in a kigen hi.

PTC Block 2 in vaipaw thak ding telna (election) nei

Lamka, Aug. 14 *(Nisin Thuhiltu* : Paite Tribe Council (PTC) Lungthul Block leh Singngat Block ah lawiupa te term a bei tawh kitawn in, August 12 & August 13 a khah vaipaw thak ding telna (election) a um hi. August 12 sunma dak 11 in PTC Lungthul Block headquarter ah Election Commission Chinkhanmang Ngaihte, PTC GHQ mapuina ah lungthul block lawiupa thak ding telna a um a, zia hun a chun kum 2017-2020 sung President ding ah S Ginkhansiam, Vice President Thangkhankhual, Secretary Mangkhankhup Guite, Assistant Secretary K Lamkhanmuan, Finance Secretary G Lianzamuan leh Treasurer ding ah S Lunchinthang te teltin in a um ua, committee member ding ah Tunkhansiam, S Nengkhanlun leh K Doukhankhup te a tel ting ui. Election Commission Chinkhanmang Ngaihte in teltin ah um te kitiam sakna nei in, Pastor T Lammkhanthang, EBCC Suangdoh in pauchap piakna a nei hi. August 13 sunnung dak 2 in PTC Singngat Block headquarter ah Election Commission Pumlianpau mapuina vaipaw thak ding telna a um a, zia hun a chun, President ding ah H.Dalkhanlian, Vice President - Zarual, Secretary G. Nengzamawi, Assistant Secretary T. Paudam , Finance Secretary M. Khuplun, leh Treasurer ding ah G. Thonzakham te a tel ting ua, committee member ding in Zammung, Tunlamthang leh Chinkholal te a guat ui. Chun, Election commission leh President GHQ PTC Pumlianpau President GHQ PTC in teltin thak ah um te kitiamna a neisak hi.

Galvan suklatna leh Career Counseling

Lamka, Aug. 14 *(Nisin Thuhiltu* : Assam Riffle CCpur Battalion in tuni sunma dak 11:30 a pat in St. Mary Senior Secondary School, Tuibong ah student te a ding in Career Counseling Cum Weapon Display kiti organize a bawl hi. Zia hun a chun, Assam Riffle te’n school compound ah galvan chuam chuam suklatna a nei ua, school auditorium ah Career Counseling a nei ui. Counseling hun ah St. St. Mary Senior Secondary School ah kai class X leh XI student te a pang ua, Assam Riffle a pat Major Radha Krishnan in India Army nuai ah sepna chuam chuam um te taklatna nei in, India Army aha luttheina ding ah taksa leh lekha thiam pawimaw a hidan te a gen hi. Chuleh, entrance exam chuam chuam ah lawtin theina ding ah kisaklawk ding dan leh lekha sim dingdan tawh kisai student te ziltilna a nei a, numei te a ding ah le Indian Army nuai ah sepna chuam chuam um a hidan a gen hi. Assam Riffle CCpur Battalion in school/college student te lak ah India government nuai a sepna chuam chuam um te hiathiam lo um ah a hiat uh tawh kitawn ah awareness programme organize a bawl hin a kigen a, zia hun matna a chun, Student 700 banah school teacher 76 val a pang ui.
NT 15aug2017c

VPC leh YVA Gangpimual Unit mapuina social work nei

Lamka, Aug. 14 *(Nisin Thuhiltu* : CCpur district sukthiantho ding leh khawsung/veng sung te thiangtho tak ah kawi ding ti ah District Administration in panlakna a nei tawh kitawn in, tuni’n Gangpimual khawsung mipi’n mass social work a nei ui. Mass social work hun ah Gangpimual kawsung ah lampi kuakna mun leh siatna mun teVaiphei People Council VPC Gangpimual Unit leh Young Vaiphei association YVA Gangpimual Unit te mapuina’n a siam hawi ua, lampi siamna ah saktiman 2 leh JCB khat a mang ui. Social work hun ah mipi nasem te chu group 2 ah kikhen in, group khat in BSF camp a pat nasepna pan in, group khat in Tangnuam lutna bul a pat nasep a pan ua, nulla leh lampi dung le a suthiang ui. Social work ah panla khawsung mipi te zosia chung in VPC Gangpimual Unit leh YVA Gangpimual Unit in kipakthu a puang ua, khawsung thianthona ding ah panla zawm chiat ding in le chialna a bawl hi.

Peace ground ah 71st Independence Day 2017 mat hiding
Lamka, Aug. 14 *(Nisin Thuhiltu* : District Administration, Churachandpur mapuina August 15, 2017 zingkal dak 7:00 a pat Public Ground, Tuibong ah a 71-veina Independence Day 2017 mat hiding a hi. Zia hun chu Shyam Lal Poonia, IAS, Deputy Commissioner, Churachandpur in Chief Guest hina tawh uap ding leh India puanlap kaipalna nei ding a hia, Parade Contingent-te a pat salute a lak ding banah thugenna nei ding a hi. Chun, Cultural Show leh Band Display, Stall kibawl chuam chuam te DC in et-thakna nei ding a hi. Chuleh, lam chuam chuam ah panla chungchuang diak te kiang ah Award piakdawna le nei ding a hi. Zia hun mat sung a chu traffic hei lamdang ah um ding a hia, zingkal dak 7:00 a pat Programme zawthian a hi masang sia, Imphal zuan ding gari te Tuibong Traffic Point ah petto ding, ADC Office a pat DTC Hall, Songgel chuan ah Khawmawi ah Tedim Road mansuk sak hiding a hiu. Chun, Imphal lam a pat Churachandpur town zuan te’n le zia lampi ma chu a zui ding uh hi’n Liankhansang, SI, OC Traffic in a taklang hi.

Entrepreneurship tawh kisai ah Awareness Campaign nei
Lamka, Aug. 14 *(Nisin Thuhiltu* : CT Lian Guite, MDC, in tuni, August 14, 2017 sunma in VK Tawna College ah Entrepreneurship tawh kisai in Awareness Campaign a nei hi. Zia hun a chun VK Tawna College a kai student leh Staff te lak in CT Lian in ziltilna a nei a, profit hawlna lam thil ah panlak ding dan genna a nei hi. C.T Lian in a thugenna a chun, bazaar nupi te’n kum tamtak mezuak tamaleu tuni tiang ah a zawk ngainngai uh a zuak dan uh leh Thingpi Hotel bawlte’n le a Puri kan zat uh a kan kan ziang dan teu etsakna mang in, sum lawk/tuang hawlna a tamzaw sem mutheina ding ah panlakna pawimaw a hidan a gen hi. Nek-le- chak hawlna kawng ah kukalna pawimaw leh sum matdan thiam pawimaw in le a gen a, chipchil tak ah sum mat ding, hun mat thiam pawimaw a hidan te a gen hi.

Pauchappi zawm ding ah ZRO dawtna bawl
Lamka, Aug. 14 *(Nisin Thuhiltu* : Ministry of Information & Public Relations, Zomi Re-Unification Organization (ZRO) in thusua a bawlna a chun, Kochuam leh pauchaptute chung ah kipakthu gen in, maban kalsuanna ding ah Pathian’ umpina pawimaw a hi dungzui ua,pauchappina pawimaw zing a hidan uh a taklang kawm in, pauchappi zawm ding in Kochuam leh pauchaptute te chialna a bawl hi. Political Dialogue a 3 vei tinna a um tak nung ah Government in Interlocutor ding ah Dineshwar Sharma, IPS (Retd.) leh Former Director, (IB) a guat chu Government in kihona lunglutpi a hidan sulang in le a taklang a, Manipur ah Zo-suante’ a ding ah kalsuanna khat a hidan taklang kawm in, UPF/KNO in Government tawh August 31, 2018 tiang ding ah Suspension of Operation susau a hidan a taklang hi. Interlocutor Dineshwar Sharma mapuina kihona September 2017 sung ah nei kit hiding ah ginchat thu le taklang in, Manipur ah Zo-suante’ a ding ah kihona a pat gasua hawitak a um theina ding ah mipi te kithuapia leh pauchappina pawimaw mama hin Kenneth, Secretary, Information & Public Relations suai kaina press release in a taklang hi.

Lingsiphai-Mata Lourup pawl in canal siamhawi

Lamka, Aug. 14 *(Nisin Thuhiltu* : Lingsiphai-Mata Lourup pawl in tuni, August 14, 2017 zingkal in Mata khawsung chuan Khuga Dam Canal siam hawi thakna a nei ui. Canal ahileh Mata Area bep hilo, Ngathal zau tiang ah um tuilo te kingakna hin a kigen a, Canal ah niin a dim bak ah hampi tam ziak ah tui kituptak ah a luan theilona chung ah canal siam hawi thakna a nei uh ti a hi. Lawbawl tut e gendan ah a haksatnau a kisaipi thuneitu kiang tut sek maleu panlakna bangma umlo hin a gen ua, Canal siamna ah Lingsiphai-Mata Lourup te’n amau thahatna khat-vei a siam tak nung ua, JCB mang ah tuni a nasep uh tawh sim ah 3 vei a siamthaknau hita hin le a gen ui. Chuleh, sum tuak khawm ah tuiluanna kituplo canal chu JCB guai ah a siam uh hin le Genlunlal, Chairman, Lingsiphai-Mata Lourup in a gen hi. Zia Canal chu tuma lam a khah Mata khua ah chim maleh Department in a ngaisaklo ziak ah mipi’n Pipe lawng 2 mang ah tui a zawl lut uh hia le a hi. Canal a hileh lo-bawl mi 50 vel in a etkawl, Tuilo Pari 50 val a ding tui piakna hi’n Lingsiphai-Mata Lourup pawl in a gen ui.
NT 15aug2017e

UZO, Singgnat Unit in election
Lamka, Aug. 14 *(Nisin Thuhiltu* : United Zou Organization UZO, Singgnat Vengnuom Unit in August 13, 2017 a khan, kum 4 sung vaipaw ding telna a nei hi. Zia hun a chun, President ding in Kamkhanlam, Vice president Pumsuonthang, Secretary Chinjungthang, Joint Secretary Thangminlien, Finance cum treasurer Tongminlal, Organization secretary Paumuanthang leh information and publicity secretary ding in Pauminlun@ andrew Lulun Zou te a telting ui.

Upper leh Primary Teacher te training ding tawh kisai ah hilchianna
Lamka, Aug. 14 *(Nisin Thuhiltu* : Sarva Shiksha Abhiyan (SSA), ZEO, Churachandpur nuai ah Lower Primary Teacher (LPT) leh Upper Primary Teacher (UPT), September 3, 2001 a pat semte’n Training of Untrained In-Service Elementary Teachers tawh kisai ah a hiat ding un N. Chingkhei Singh, ZEO, Churachandpur in hiatsakna thusua a bawl hi. Hiatsakna thusua dungzui ah UPT, B.Ed leh NOC neite’n Training a nei thak uh ngailo ding, B.Ed leh NOC neilo te’n Training a nei uh ngai ding ti a hi. Ziagualma a chu, Primary Teacher, D.El. Ed leh NOC neite Training ngailo ding, D.El.Ed leh NOC neilo te Training ah a pan uh ngai ding ti a hia, September 3, 2001 nung ah sempan, Untrained Teacher zosia’n Training a nei uh ngai ding ti le a hi. Training ngai ding te’n August 17, 2017 sun dak 12:00 tiang ah ZEO ah a ki report uh ngai ding a hia, Class XII mark-sheet ah Reserved Category, 45 percent tunglo te’n NIOS tungtawn ah exam a piak thak uh ngai ding hi’n le N. Chingkhei Singh, ZEO, Churachandpur in a taklang hi.

Fogging machine mang ah thokang kapna nei

Lamka, Aug. 14 *(Nisin Thuhiltu* : Khawpi sung ah Japanese Encephalitis (JE) leh Dengue case nei kibelap zing ah hiat a hi tawh kitawn in Malaria Department in Fogging machine mang in tuni, August 14, 2017 sunnung in mun chuam chuam ah thokang kapna a nei ui. Thoukang kapna ahileh tuni nitaklam in Tollen; Zion Veng, Tuibuang; Saltbrook School, Kamdou Veng leh Eden Thar, Rengkai mun in a nei ui. Malaria Department in July leh August tha ah District sung ah Dengue case 67 leh JE case 42 mudawk thak uh hin a kigen a, a kigawm ah case 109 mudawkta uh hin le taklat in a um hi. Dengue leh JE ahileh pena a pat kipan natna a hia, a kiven theina ding ah inn- kim leh kiang, tui-kawina thiangtholo te sukthian ding, puan-ak ban tung, tawka lawngsau ah kivan ding, thokang puan (mosquito net/repellant) te kituptak ah mat ding leh thokang kipe saklo ding a hi.

Plastic ann-chang mudaw ah um

Lamka, Aug. 14 *(Nisin Thuhiltu* : India gamsung a diak ah malsua bial ah plastic mang ah kisiam ak-tui, ann-chang leh nek thei chi chuamchuam a ki than mama tawh kitawn in Ccpur district ah amasapen ding in Plastic ah kisiam, ann-chang muthei in a um hi. Plastic ann-chang mudaw ah um ahileh Lower Chapel Lane, Hiangtam Lamka ah um L Ginzalian@ Puala ten nek ding a, police station opposite Rajbans Variety Store, Old Bazar ah a chawk uh a hi. Ginzalian in a genna a chun, August 11 ni ah, ann-chang a chawk sekna, Rajbans Variety Store a pat ann-chang (Super Fine) bag khat a chawk, zia ann-chang chu a nek ua pat a innkuan ua, gilna/sungpuak leh dip nasa a hidan uh a gen a, ann-chang nek ding ah Super Fine leh Moirang Phou helkhawm sek maleu hun dang guallo tak ah zia ann-chang thak chu a nek ua a pat a sungkuan ua taksa nuam lo, ti te nei zing sek a hidan uh a gen hi. Tuni, sunma ah ann-chang (super fine) etchianna a nei tawh kitawn ah, ann-chang dang tawh kibanglo ah a hiatdaw nung ah Police Station ah report bawl a hidan le L Ginzalian@ Puala in a gen hi. Zia tawh kisai a chun, Food Safety department in ann-chang chu la’n Imphal ah test bawl ding in a thawt hi. Ann-chang Super Fine zuaktu Rajbans Variety Store in Bishnupur a um, ann-chang supply tu Prem a pat August 6 ni ah ann-chang bag 140 a lak, zia lak a chu a tamzaw zuak zo ta leh tu ah ann-chang bag 16 a nei nalai hi.
NT 15aug2017f

CCpur District in 1st State Level Swachhata Award 2017 sâng ding
Lamka, Aug. 14 *(Nisin Thuhiltu* : MAHUD Department, Government of Manipur saina’ Manipur District lui 9 ah Cleanliness leh Sanitation Drive a um nung in 1st State Level Swachhata Award 2017 dawng thei ding in Disrtict pathum teldaw in a um hi. 1st State Level Swachhata Award 2017 dawng thei ding District te lak a chun, Churachandpur District in First hina a chang a, Second ah Imphal West leh Third in Thoubal District a pang hi. Ranking dungzui ah 4th in Tamenglong District a pang a, 5th , 6th, 7th 8th leh 9th in Ukhrul, Imphal east, Bishnupur, Chandel leh Senapati te a pang ui. Zia ah teldaw ah um District pathum te chu Imphal ah State Level 71st Independence Day 2017 matna award piakdaw ah um ding a hiu a, award la ding ah Deputy Commissioner te’n palai sawl ding a hiu.

Editorial:
Lampi neitu buanthuak hi ta
Kikawmtuana lampi te a neitu leh a mangtu mipi te kihi himaleh tulak tulak,buanthuak leh buan thuak-tui te a neitu gual in a kilang a, kineisak mama hileu a ki lawm hi. Buanthuak leh buan thuak-tui te lampi neitu a hi takna chung un, mipi te ding ah haksatna liantak a tung zing a, buanthuak tawh in-sung lut zing mai a ngaita a hi. Zia gual ah haksatna a tunzingna chung ah pawl chuam chuam leh mi phachuam ngai te’n thei dan dan ah kikawmtuana nuamlo tak ah um te siampha’n panlakna a nei ua, lampi chung ah haksatna um te a thawveng chuam mama hi. A langkhatlam ah government in a tangko chu kikawmtuana lampi a hawi ding ti a hi kit a, bangtik leh kikawmtuana lampi a hung hawi diam ti chu mipi te thiil leh ngak zing a hiphawt mai hi. Mipi te’n lampi ziak ah haksatna I tuak teu hi Government hiat ah mipi te haksatna ah sim kham hilo a hi diam ti nawp a um a, official chair leh car ah chut-kawm ah lampi siam hawi ding a hi ti chu mipi te ding ah a hun tawk a hi diam ti nawpna le a beilo a hi. Mun dang leh gam dang ah um te gual in ei un le mipi palai inei chiat a, lampi ziak ah haksatna um te hi mipi palai te ding ah le buaipi kham hilo a hi diam ti thei in a um a, buaipi kham ahiloleh, banggual thil te chu mipi te ding ah buaipi khawm ting a hi diam ti nawpna a bei diaklo a hi. Lampi ziak ah mipi te haksatna muthei ah a um zing lai in, first State Level Swachhta Award 2017 kiti District thiangtho pen teldaw a hina ding ah District Administration panlakna nuai ah khawpi sung sukthian in a um a, mipi te ding in a nuam chuam mama hi. August 12, 2017 ah Survey Team khat in Khawpi sung leh Institution chuam chuam ah thianthona dinmun et-thakna nei in, DC Office leh Government Office chuamchuam, Hospital leh PHC, School leh College, Bazaar Area leh lampi kim leh kiang, ni’n buakna leh Public Toilet ti te dinmun a enthau hi. Survey Team, Churachandpur vena nei te chu MM Ziaur Rahaman,Executive Officer, Thongkhong Laxmi, Soubam Niranjit, Executive Officer, Kakching Khunou leh Daryal Rocko Anal, Executive Officer, Sugnu-te a hiu. Zia ah thianthona et-thakna a hi kikawmtuana buanthuak leh buanthuak-tui kinawk zengzung te thil thiangtho ah pang a diam ti ngaitua kham a ting a, award muna ding mai ah thianthona nasep in bangchan a dai zo diam ti le ngaitua kham a ting bawk hi. Kikawmtuana lampi kituptak umlona mun ah khantona umtheilo ti, a kua kua’n ihiatsau a hina chung ah government leh mipi palai te’n kikawmtuana lampi a ngai khawk thak ding uh pawimaw mama in a kilang zing hi.

User Rating: 0 / 5

Star InactiveStar InactiveStar InactiveStar InactiveStar Inactive

Police Station -Lanva Lei kikal lampi phiat thiang

Lamka, Aug. 13 *(Nisin Thuhiltu)* : Swachh Bharat Mission (Gramin) nuai ah nasepna chiato zel in tuni’n khawpi sung ah dawr/dukan bawl, pawl chuam chuam te kigawm in Tedim Road dung ah Police Station a pat Lanva Lei kikal munphi mang in lampi a phiat thiang ui. Nasepna ahileh a khat-veina State Level Swachhta Award 2017 ding tawh kisai ah kisaklawkna a hi. Tuni ah lampi suthiang pawl chuam chuam te chu - Bihari Society, Malwari & Punjabi Welfare Society, Nepali Society te a hiu a, Cleanliness Pledge dungzui ah hapta khat sung ah dakkal 2 sung kim-le-kiang sukthianthona mat ding ti chiapina le a hi. Lampi suthianna nei pawl chuam chuam kigawm te gendan in Pathianni sin leh zingkal dak 8:00 a pat dak 10:00 kikal sung ah Tedim Road sukthianna nei zing sek ding uh hin a gen ui.

EBCC Hiangtam Lamka in panpina pia

Lamka, Aug. 13 *(Nisin Thuhiltu)* : Baptist Dorcas Fellowship (BDC), EBCC Hiangtam Lamka in tuni’n V. Munhoih ah um damlona chuam bik nei leh insung haksa diak hi ah kihia Nianghoihkim @ Hoihkim (18) d/o (L) H. Rema vena a nei a, a ki etkawlna ding mat ding ah panpina sum a dawl khawm reu piakdawna a nei ui. Zoram Tonsing in a thugenna a chun, News a pat Hoihkim’ chanchin a hiat uh tawh kitawn ngaikawk mama ah, Dorcas pawl in a ki-etkawlna lam thil ah sum leh pai ah kithuapina ding ah Bawngsa chaw, a minsa zuak uh le, zia a sum mudaw teu chu panpina a piak uh a hidan a gen hi. Finance Secretary in panpina sum piakdawna a nei a, Dorka pawlte Adviser Upa T. Singneng in pauchap piakna a nei hi.

Team Khawvaiphei in panpina pia

Lamka, Aug. 13 *(Nisin Thuhiltu)* : Team Khawvaiphei in V. Munhoih ah um damlona chuam bik nei leh insung haksa diak hi ah kihia Nianghoihkim @ Hoihkim (18) d/o (L) H. Rema vena nei in, Nianghoihkim @ Hoihkim panpina ding ah mi pha chuam ngai te a pat a kai khawm uh kithuapina sum Rs 10,000/- piakdawna a nei ui. Team Khawvaiphei member te lak ah Administrator Mr SN John in panpina a piak hun ua a thugenna a chun, Khawvaiphei.com kipatdan leh a thiltup te genlatna neikawm in Khawvaiphei.com kiti chu Vaiphei kampau mang te patdaw himaleh kuama khenchuam neilo a hidan a gen a, Khawvaiphei member mun chuam chuam ah um te’n Hoihkim panpina ding ah kiphal dan dan a tuak khawm teu kithuapina ding ah pia a hidan uh taklang in, a hung damdawi pai ding dawisakna thu a lan hi.

Henglep ah Independence Day 2017 mat hiding
Lamka, Aug. 13 *(Nisin Thuhiltu)* : A 71-veina Independence Day 2017 matna Sub-Divisional Headquarter, Henglep ah August 15, 2017 sunma dak 9:00 leh kipan ding a hi. Zia hun chu Chunglenmang, MCS, SDO Henglep in Chief Guest hina tawh uap ding a hia, OC Henglep, Paothang Haokip, DI ADC, Henglep, Nehkhohao Haokip, DI ZEO, Henglep, Dr. Alex Touthang, MO Henglep leh Kaikam, RO Forest, Henglep te’n Guests of Honor hina tawh uap ding leh Company Commander, 25 AR Henglep in Functional President hina tawh uap ding a hi. Hun matna T. Lhunkholet, Executive Officer, (Dev.) Henglep TD Block in mapui ding a hia, Chief Guest in India Flag kaipalna nei ding, Assam Rifles te’n March Past nei ding a hiu. Chun, Nehkhohao Haokip, DI ZEO, Henglep in vaidawn thugenna nei ding a hia, Governmental Department chuam chuam in report piakna nei ding, Law & Order tawh kisai ah Assam Rifles leh Police lam a pat thugenna um ding leh Dr. Alex Touthang, MO Henglep in Henglep bial ah JE leh Dengue natna a lenna tawh kisai genna nei ding a hi. Chun, Aadhaar Seeding, Job Card Verification leh Geotagging tawh kisai ah P. Shyamananda, SO Henglep thugenna hun mang ding a hi. Zialo a chu, Anganwadi Cenre tawh kisai ah K. Devananda Meetei, ICDS a pat thugenna um ding, Chief Guest a pat thugenna um ding leh SDO/BDO Henglep Office saina prize chuam chuam hawpna le um ding a hi.

CDVDFWA in GS thak ding telna leh General Body Meeting nei

Lamka, Aug. 13 *(Nisin Thuhiltu)* : Churachandpur District VDF Welfare Association (CDVDFWA) in tuni’n Reserve Line, SP Office Complex ah General Body Meeting nei in, General Secretary thak ding telna a nei ui. Meeting hun chu Dilo Onkholen Mate, Adviser in amapui a, General Secretary in innsung buaina a nei ziak ah a kizawm ah Meeting bangzat vei a hem tak pang theilo ah a umna chung ah thupukna umsa- Office Bearer khat a kizawm ah 3 vei Meeting Notice mu ah panglo te thasang ding guat hi ding ti a hi tawh kitawn ah General Secretary Mr Ginpaulson thasang ding telna a nei ui. Proposal System ah candidate ding guatna leh vote lakna a nei ua, Finance Secretary mawpuakna tuzing lai Mr Kamminthang Kipgen chu General Secretary tawh mawpuakna a tuk kawp ding in a tel ting ui. Meeting hun ah S. Laltingen Vaiphei, President in Association in VDF- P-cap leh Shoulder Badge a bawl chaw chiat ding leh kuama hina zachatpilo ding in chialna a bawl a, VDF simmaw bawl a um leh kintak ah hiatsakna bawl ding leh, ama’n SP ah Report bawl ngal ding a hidan a gen hi. Meeting hun ah MGEL, CIPS, Highway Protection Force leh a dangdang tawh kisai le genkhawmna a nei ui. Tu ah CDVDFWA vaipawte chu - Dilo Onkholen Mate, Adviser, Jimmy Gangte, Adiver, Md. Amarkhan, Spokesperson, S. Laltingen Vaiphei, President, L. Limkhosei, Vice President, S. Pauchinlian, Vice President, Kamminthang Kipgen, General Secretary-cum-Fiance Secretary, Henlunlal, Joint Secretary, Thangkhankhai, Auditor, Th. Ngamsat Baite, Auditor ban ah Information Secretary ding in Kapmuanlal, PL Thanga, Suankhokam, Chinkholal Misao, Lalramlien Hmar, Lamkhanpau, Gingoukhup, Kelvin Kom, Romesh Sharma, Robert Gangte leh Letminlun te a hiu.

YVA GHQ in Henglep bial ah Dengue/JE damdawi hawpna leh Wheel Chair piakdawna nei

Lamka, Aug. 13 *(Nisin Thuhiltu)* : Henglep bial ah Dengue/JE damdawi leh Wheel Chair hawm ding ah chia Young Vaiphei Association, (YVA) General Headquarter team in President leh Vice President te mapuina’n Henglep lampi kiangnai ah um Tuiliduang panna khua chuam chuam in Dengue/JE damdawi hawpna a nei ua, Young Vaiphei Association, (YVA) Munpi Unit lawiupa te tawh kithua in Munpi Village ah Hathoizo d/o Sangvung kiang in Wheelchair piakdawna a nei ui.

Manipur in Patriots’ Day nit;
State khangto pen ah Manipur a pan theina ding ah panlak khawm pawimaw: Governor Dr. Heptulla

Imphal, Aug. 13 *(Nisin Thuhiltu)* : Manipur in tuni’n 1891 Anglo-Manipur War ah thina a la tuak te hiatzingna leh zana piakna’n Patriots' Day a mang a, Bir Tikendrajit leh Thangal General khailup ah a umna mun uh tu ah Bir Tikendrajit Park a kitina mun ah main function mat in a um hi. Zia hun matna chu Manipur Governor Dr. Najma Heptulla leh Chief Minister N. Biren Singh te’n khuallian hina tawh a uap ua, Cabinet Ministers, Parliamentary Secretaries, MLAs, Chief Secretary, DGP, top civil leh police officials banah student tamtak te’n le hun matna a uap ui. Saheed Minar ah 1891 Anglo-Manipur War ah thina a la tuak te zana piakna leh pakvui piakna tawh hun matna a kipan a, Manipur Rifles contingent te’n guard of honour leh general salute piakna leh minute 2 suunna hun mat in a um hi. Governor Dr. Najma Heptulla in a thugenna a chun, gitlo bawl chawlsan chiat ah kipumkhatna tawh Manipur khantona ding ah panlak chiat ding pawimaw a hidan a gen a,khantona lam ah India ah state khangto pen ah Manipur a pan theina ding ah panlak ding pawimaw in a gen hi. Bandh culture - bandhs, economic, blockades etc te chawlsan ding dawi a hidan gen in, state khantona ding ah buaina umsaklo ding pawimaw in a gen hi. Kibatlona leh kituaklona um te sukbei ah panlak ding pawimaw a hidan le gen a gen hi. Patriots' Day chu District Headquarter chuam chuam ah le District Administration mapuina mat in a um hi. Chief Minister N. Biren Singh in a thugenna a chun, government in Kanlgla venbit ding leh siamhawi ding ah guanggalna nei zing ahidan gen in, Kangla, Eastern Gate siam hiding in a gen a, political weapon ah kiphinna khenkhat ah student te mat ah a hi sek uh chu khawk sa mama a hidan a gen hi. Kiphinna lamhizawlo ah zilna lam amasawn theina ding ua student te ziltil zawk ding elh tunung ah khangthu a hiatthiam theina ding uh leh a ki siklona ding lampiu kawkmu ding pawimaw in a gen hi. State sung ah um insurgent group chuam chuam te tawh kihona nei ding ah government kimansa um zing a hidan gen in, transparency leh accountability a um theina ding ah government in panlakna nei zing hin a gen hi. Buaina chuam chuam um te genkhawm ding leh sukven theina ding ah kihona nei ding ah government chu 24X7 kihawng tak ah um a hidan taklang in, bandhs leh blockades sukbei ding dawi hin a gen hi. State mipi te chu gitlo bawl chawlsan ding leh khanto lampi zui chiat ding in chialna abawl a, buaina chuam chuam um te dialogue/talks ah sukven thei hin a gen hi. Manipur chu state sung ah um community zosia aa a hidan gen in venbit leh siamhawi ding pawimaw a hidan gen in community khat leh khat kal sukha thei ding thil bawllo ding in state mipi te chialna a bawl hi. Khangthu (history) a pat a kimu dungzui ah hills leh valley ah um te’n kipum khat tak ah Manipur zalenna ding leh bitna ding ah British Empire a la dodal khawm a hidan uh muthei ah um hin a gen hi. Zia chu tawh kitawn ah masang ah thi ngam ah pu leh pa te panlakna story mai sualo ah a kipum khatnau leh a pan lakkhawmna teu chu tunhun ah zui ding leh kipumkhatzawk semna ding ah mat ding pawimaw in a gen hi.

Awareness program on Vector borne Diseases nei
Kangpokpi, Aug.13 *(Nisin Thuhiltu)* : Primary Health Centre Saikul leh CSOs Saikul saina zani a khan Kuki Inpi Saikul Gamkai Hall, Saikul Hill Town ah “one day awareness program on Vector Borne Diseases” kiti a um a, zia hun a chun, Dr. Ph. Henkhoneng Mate, District Malaria Officer, Kangpokpi District leh Akhup Karong, Malaria Technical Supervisor te’n resource persons hina tawh awareness program uaptu te ziltilna a nei ui. Chuleh, zia awareness program on Vector Borne Diseases chu Dr. Pinky, Dr. Alhing, Dr. Surjit and Dr. John Lupheng, Saikul PHC staffs, village chief, youth clubs delegates leh CSO chuam chuam a pat leader te’n le a uap ui. Kuki Inpi Saikul Gamkai, President, Seimang Lupho leh KSO Saikul Block President, Lamgouthang Chongloi te’n Saikul Gamkai ah Vector Borne Diseases ziak ah buaina um te sukven theina ding ah panlak ding pawimaw a hidan District Malaria Officer kiang a tut nung ua awareness program chu organized ah um hin a kigen hi.

KSO-GHQ in executive body keklian
Imphal, Aug. 13 *(Nisin Thuhiltu)* : TKuki Students’ Organization-GHQ in KSO Constitution nuai ah Article 52 (ii) tawh kituak in executive body keklianna zani a khan, Kuki Inn, Imphal in a nei hi. Zia hun a chun KSO-GHQ (term 2017-2019) executive member ding ah guat thak ah um - Thangminlen Kipgen (VP-External), Doumang Haokip (Secretary Education), Boilhing Lhungdim (Secretary Social & Culture), Solomon Joute (Treasurer), L. Thangkhupreng Kom (Secretary Relief & Rehabilatation), Victor Jangkhotinthang Doungel (Joint Secretary), Lynda C. Suantak (Secretary Law & Justice) leh David L. Gangte (Secretary Information & Publicity) te laklutna leh kitiamna sakna a um hi. KSO Standing Committee, Chairman Kamkhohao Khongsai in Thangkhosei Haokip (Kumpipa) uapna tawh member ding ah laklut thak ah um te chu kitiamna a neisak hi. David L. Gangte, Secretary, Information & Publicity in member laklut thak ah um te dinmun tawh kisai a genna a chun, Kuki cognate tribes chuam chuam - Gangte Students’ Organization (GSO), Komrem Students’ Union (KRSU), HAS, etc te’n KSO General Headquarter ah palai ding nominate a bawl uh hin a gen hi.

Bir Tikendrajit statue hawn ah um

Imphal, Aug. 13 *(Nisin Thuhiltu)* : Manipuri Sahitya Parishad Assam, District Committee, Hojai mapuina ah tuni’n Manipuri Kala Mandir, Dhalpukhri, Hojai district, Assam ah 126th Patriots’ Day mat in a um a, zia hun a chun, Bir Tikendrajit lim (statue) hawn in a um hi. Anglo-Manipuri War, 1891 ah martyr te suunna leh zana piakna banah pakvui piakna le a um hi. Zia ah hun matna chu Yumnam Khemchand, Speaker, Manipur Legislative Assembly in Chief Guest hina tawh a uap a, Guest of Honour hina tawh Thounaojam Shyamkumar, Minister MAHUD, Town Planning, Forests and Environment and Horticulture and Soil Conservation in a uap hi. Yumnam Khemchand in a thugenna a chun, Assam ah kum 10 sung lam - All Assam Taekwondo Association founder president hina tawh hun mang a hidan gen in, Chief Minister N. Biren Singh mapui state government thak in mipi muan ngamna nasatak mu a hidan gen in, a thu mai hizawlo ah septhaw ah panlakna nei a hidan a gen hi. Minister Th. Shyamkumar in a thugenna a chun Chief Minister N. Biren Singh in Speaker Y. Khemchand leh ama chu Hojai mun vena nei ding leh Manipuri diaspora te haksatna kantha ding ah a sawl a hidan a gen hi.

NSCN-IM leh ZUF kal ah kikaptuana piang
Imphal, Aug. 13 *(Nisin Thuhiltu)* : Cachar District, Assam, Namdailong area ah tuni’n NSCN-IM leh ZUF te kal in kikaptuana a piang a, thina tuak hiat ding umlo himaleh NSCN-IM cadre te’n ZUF cadre khat hantang un a kigen hi. Thudawnna’n a taklat dan in, NSCN-IM cadre te’n Namdailong area ah um NNC/FGN office leh prayer centre le hal piak un a gen hi. Pawl 2 kal ah kikaptuana a pian tawh kitawn in Assam Rifle leh Police combing team in kikaptuana mun del ah combing operation bawl un a kigen hi.

Plastic ann-chang um ah kigen
Imphal, Aug. 13 *(Nisin Thuhiltu)* : Plastic aak-tui um ah thuthang a um nung in plastic-annchang um ah gen in a um kit hi. Nungourok Village, Tengnoupal District ah villager khat in NFS/PDS scheme nuai ah a mau ann-chang ki huan-minsa chu rubber ball gual ah um a hidan taklang kawm in, tual ah I sethak leh rubber ball gual ah ki vawk kit thei hin a gen hi. Zia gual ann-chang piak ah a umna chung a chun complaint a bawl hi.

User Rating: 0 / 5

Star InactiveStar InactiveStar InactiveStar InactiveStar Inactive

Parade contingent ten final rehearsal nei

Lamka, Aug. 12 *(Nisn Thuhiltu)* : A hung tung ding August 15 leh India gamsung pumpi ah 7st Indian Independence Day 2017 lawpna a umna ding ah, District level ah Peace Ground Tuibong ah Independence Day 2017 lawpna ding tawh kisai in tuni zingkal dak 7 a pat in Peace Ground, Tuibong ah parade contingent ten final rehearsal a nei ua, zia hun a chun march past ah pang ding ah min a la khumlut school chuam chuam banah STC BSF, District Police, Women Police, VDF, ICDS, ASHA, Nurse Training School, ADC Sanitary Team leh college ah NCC, School leh college a pat parade contingent team banah IRB Band Party te a pang ui. Tuchung Independence day lawpna hun ah parade contingent te H Johny Sharma, MPS SDPO CCpur in parade commander hina tawh mapui ding a hia, Maipaksana Singh leh Paudoumuan te pilot ah pang ding, Jem Paolen Haokip in flag hosting in charge tuk ding a hi. Havilder Awas Bhiari, Havilder Shijal Das, Havilder Ratna Singh leh Havilder Jangkhomang te field marshall ah pang ding a hiu a, Independence day ah Parade contingent 51 in march past nei ding a hiu. Chun, Shyam Lal Poonia, IAS DC CCpur in chief guest hina tawh hun matna uap ding leh India puanlap (flag) kaipalna nei ding, parade contingent te a pat salute a lak ding bak ah Independence Day 2017 thucha (message) genna nei ding a hi. Program hun sung ah Chief Guest Shyam Lal Poonia in district sung ah teldaw ah um Department chuam chuam ten Stall a bawl uh et-thakna le nei ding a hia, March past ah prize hawpdawna le nei ding a hi. Chuleh, Tribe tuamtuam apat cultural items suklatna um ding a hi.

Nauchaga etkawlna mun 2 vena nei
Lamka, Aug. 12 *(Nisn Thuhiltu)* : Salem Veng ah um Don Bosco Higher Secondary School ah kai Class VIII student ten tuzingkal in khawpi sung ah nauchaga etkawlna mun te vena a nei ui. Class VIII Section A leh C student te school ah kingak khawm in Truck leh Pick-up khat mang in teacher pathum Sir BC Nangpu, Sir David leh Sir Sangboi te mapuina tawh Bijang ah um Sanggah Muon-inn leh P Kamdou Veng ah um Mercy Home vena anei ua, zia hun a chun panpina le a piau hi. Don Bosco Higher Secondary School ah kai Class VIII secton A leh C ten thalui ah July 28 ni, school mun ah Science 7 Arts Exhibition a nei hun ua 2nd prize a lak uh tawh kitawn ah, kipakman ah asan uh sum mang ah van chuam chuam piakna a nei uh a hi. Bijang Sanggah muon-inn ah um naupang 45 panpina ding in, anchang bag khat , school van leh sil leh chen a piau a, Mercy Home ah um numei naupang 44 te panpina ding in school van mat, sil leh chen hunkhawp a piau hi.

YVA GHQ team in Henglep zuan

Lamka, Aug. 12 *(Nisn Thuhiltu)* : Henglep bial ah Dengue damdawi leh Wheel Chair hawm ding Young Vaiphei Association, (YVA) General Headquarter team in President leh Vice President te mapuina’n tuni’n Henglep a zuan ui. A ki patdaw ding kuan un, Upa Khupliankap in pauchapna tawh thakdawna a nei hi. Hawp ding Dengue damdawi chu Chief Medical Office (CMO), Churachandpur District Hospital in a piak hi’n a kigen hi.
KNF (N) in Indian Independence Day 2017 boycott puang
Lamka, Aug. 12 *(Nisn Thuhiltu)* : Kuki National Front (Nehlun) / KNF(N) ah Secy Info. & Publicity Gogou Vaiphei suai kaina press release in a taklatna a chun, 15th August ah Indian Independence Day 2017 lawpna chu KNF(N) in Manipur Hill District zosia huap ah boycott a hidan a puang a, 14th August zan a pat 15th August nitak khawthim tiang bandh hiding in le a taklang hi. Manipur Government in Kukiland a piaklona chung ah Indian Independence Day 2017 boycott leh bandh puan ah um a hidan le taklat in a um a, National Sport University (NSU) umna ding mun tawh kisai L Tangnuam (Haraothel) gam diklo tak ah lakpiak ding ah Government panlakna le nasatak ah dodal ding a hidan uh le a taklang hi.

Division Missions Khawmpi 2017

Lamka, Aug. 12 *(Nisn Thuhiltu)* : EBC Lamka North Division in EBCC Bungmual ah August 11 a pat August 13 tiang ah “Sun a hi lai in hukdampa na I sep ngei ngei ding uh a hi” ti thupi mang ah 8-veina Division Missions Khawmpi 2017 a nei uh tuni’n a ni ni na a mang ui. Division Missions Khawmpi ahileh August 11 nitak kikhawp dak 6:30 ah Rev E paukhanlian, Division Superindent, Lamka North Division in pauchapna tawh a hawn hi a huia, khawmpi hun sung ah Rev T Lalmalsawm, Field Superintendent, Nepal EBC Mission Field, Rev V Khamvum, Principal, Grace Bible College te speaker ah pang ding a hiu.

NT 13aug2017b

Workshop on Zou Ham Zahdan

Lamka, Aug. 12 *(Nisn Thuhiltu)* : Zou Literature Society ZLS (Zou Lailam Saipawl) saina tuni sunma dak 10 a pat sunnung dak 3:30 kikal in Zogal Hall, Zoveng ah Workshop on Zou Ham Zahdan” ti a um hi. Zia hun matna chu Jemes Khamchinsuan leh Kamneichiin mapui ua, Pastor Kammang in pauchapna tawh workshop hawnna a nei hi. Workshop hun sung in S Kaikhankap, Father Mark Thangkhanai, retired Rev Dr Hangminthang, Liensuonkap ten Zou pau matdan leh zik dan tawh kisai in ziltilna a nei ua, Zou namsung ah kochuam leh pawl chuam chuam ZPCS, MELC, ZCBC, RCC banah Chinlunthang, President UZO, Dr Lachinkhai, Chairman, ZLS, Nengkhosoi, President ZSP, Ginkhankhup, President ZYO leh Upa Khupsuankham, Chairman ZSDS te a pat thugenna um in, Dr Lachikhai, Chairman, ZLS in India nampi pa MK Gandhi chanchin banah Rev Kamkhosoi a zik modern Zou history lekhabu hawnna a nei hi. Workshop on Zou Ham Zahdan hun chu Zou nam sung ah kochuam leh pawl chuam chuam a pat mi 70 val in a uap ui.

SSPP Joint Fresher’s Meet 2017

Lamka, Aug. 12 *(Nisn Thuhiltu)* : A khat-veina Siamsinpawlpi Joint Fresher’s Meet 2017 tuni, August 12, 2017 sunma dak 10:00 a pat YPA GHQ Hall, Hiangtam Lamka ah nei in a um hi. Zia hun chu Thangzamuan Hauzel, General Chief Manager, RBI in Chief Guest hina tawh a uap a, P Goulungmuon Singsit@PG Singsit, Assistant Director, Manipur Police Training College, Pangei in Guest of Honor hina tawh a uap hi. Chun, Rev. Dr. Khen P. Tombing, SSPP Emeritus in Functional President hina tawh a uap a, Lianzapau Samte, President, SSPP GHQ in Chief Host hina tawh a uap hi. hun mat sung in T. Thangkhankhup, Secretary, Joint Fresher’s Meet Committee a pat Secretary Report piakna a um a, Siamlian Khuptong, Secretary, SSPP Jt. Hq. Lamka in Award piakdawna hun amapui hi. Rev. M. Khamlianmang, Co-ordinator, Institution, PCI (R) in Freshers leh Award sang te pauchapna a nei piak a, SSPP Jt. Hq. Lamka nuai a Branch Secretary te’n Report piakna a nei ui. Guest-te a pat leh Special Invitee hina tawh uap, SSPP Standing Committee, SSPP Life Member leh Branch Adviser-te a pat le thugenna a um in, Niangngaihmang, Deputy Director, Admin & HR, CCI, Ricky Vanlallawm Guite, Chairman, Standing Committee, SSPP GHQ leh Vungthianhoih, Assistant Secretary, SSPP VK Tawna Branch, T. Tuanzakhup, President, SSPP Jt. Hq, Lamka Branch te a pat le thugenna a um hi. Chun, Cultural Item chi chuam chuam suklatna le a um hi.

MZP, Manipur 65th Anniversary lawpna zo thiang

Lamka, Aug. 12 *(Nisn Thuhiltu)* : Mizo Zirlai Pawl (MZP) Headquarter, Manipur in August 11 a pat Chiengkawnpang Community Hall ah a kum 65 tinna Anniversary lawpna a nei uh tuni’n a ni tawpni a mang ui. Tuni sun dak 12:30 in hun matna a kipan a, V. Hangkhanlian, Minister (Agriculture, Veterinary & Animal Husbandry), Manipur in Chief Guest hina tawh uap in, T Khaipao Haokip, chairman, ADCC CCpur, leh K Vanlalrinliana president, MPC Manipur ten Functional president leh chief host hina tawh a uap ui. T Paukhanlian EM ADC CCpur/Chairman Elim Veng Village Authority, Thangkhosuanmung, MDC, ADC/Chief of Hiangtam Lamka leh Mizoram a pat L Ramdinliana, General Secretary, MZP GHQ, Aizawl, Mizoram MZP lawiupa team khat in le hun matna a uap ui. Paul Lalchhanhima, President, MZP Hq. Manipur in vaidawnna bawl in, Edenmawia, Secretary, MZP HQ Manipur in award piakdawna hun amapui a, khuallian te a pat thugenna um in, GF Lalniropuia, Vice president, NZP HQ Manipur in kipakthu genna nei in hun matna a zo ui. Zia hun matna ah Award sangte chu; Doctorate Degree ah Dr. Lalhmingmawii Gangte d/o Pakai leh Dr Roluahpuia s/o Late Miliantawna ten sang au, BA Geography ah Joseph Gangte leh Lalmakthanga, BA Political Science ah Issac Lalengkima Khiangte, BA History ah Lienlungnuon, BA ah Daniel Rualkhuma, B Tech Civil ah P Ginsangkhum, B Tech Electrical Engineering ah Alan Siamzading Guite, B. Sc. EVS ah K Zamminson, M Sc Earth Science ah S thangliengou gangte, B Sc Nursing ah Lalramengi leh B Sc Physic ah Cristorpher laldinmawia te a hiu a, tuni hun mat sung in MZP CCpur College Branch leh MZP Lamka Branch a pat Nam lam chi chuam chuam suklatna le a um hi. Chief Guest Hangkhanlian in a thugenna a chun, Zo-suan te Myanmar, Mizoram leh Manipur ah pau chuam chuam mang ah khuasa himaleh pau leh ham ah danglamna umlo, pi leh pu khat suan zo-suan te ihiu tikawm in, tuhun ah khangthak te lak ah gam leh nam itna liantak piang in, gam leh nam it takluatna ziak ah buai lona ding mun ah buaina piang a hi sek dan taklang in, gam leh nam it chung ah ki-etthak pawimaw hina gen hi. Nitak hun matna ahileh T. Kammuanlal Simte, CEO, ADCC in Chief Guest hina tawh a uap a, Sangboi Gangte, MPS, Deputy Commandant, 1st IRB in Guest of Honor hina tawh uap in, L. Ramdinliana Renthlei, General Secretary, MZP GHQ leh CV Duhawma, President, GYMA te’n Functional President leh Chief Host hina tawh a uap ui.
NT 13aug2017c

Division Dorcas Khawmpi 2017 khawmpi kipan

Lamka, Aug. 12 *(Nisn Thuhiltu)* : EBC Division Baptist dorcas fellowship DBDF Lamka south division in August 12 leh 13 sung ah Gospel Centernary hall, New Lamka ah “ La um dan uh Khrist chanchin hawi tawh kituak sak phawt phawt un” ti thupi mang ah a 7-veina Division Dorcas Khawmpi 2017 a nei ding uh tuni’n a kipan hi. Tuni sunma kikhawp dak 10 in Rev Nenglian, Division Superintendent, Lamka south division leh Adviser DBDF in Dorcas Khawmpi hawnna a nei a, khawmpi hun sung ah speaker ah Rev. N Pumsuanmung, Youth Co-Ordinator EBC pang ding, Rev S Vung Minthang General Secretary EBC in seminar hun mapui ding a hi.

Sunday School Talent Competition 2017 nei

Lamka, Aug. 12 *(Nisn Thuhiltu)* : Manipur Presbyterian Church Synod (MPCS), Tuithaphai Presbytery in tuni, August 12, 2017 sunma dak 10:30 in Synod Hall, IB Road ah Sunday School Talent Competition 2017 kiti nei ui. Zia hun matna chu Lalremruata, Thingkangphai leh Elizabeth Lianthangkimi, Lamka te’n amapui ua, Rev. R. lalnunmawia, Executive Secretary in hun pat pauchapna nei in kidemna chi chuam chuam a nei ui. Beginner, Primary, Junior leh Intermediate te’n Solo kidemna a nei ua, Beginner leh Primary te’n Bible chang gen kidemna nei in, Sacrament leh Senior pawl in Solo kidemna a nei ui. Junior, Intermediate, Sacrament leh Senior pawl te’n Bible chang gen kidemna a nei ua, Beginner, Primary, Junior, Intermediate, Sacrament leh Senior te’n Worship Dance kidemna a nei ui. Hall sung ah kidemna chuamc huam neikawm in Work Shed sung ah Drawing kidemna le a um a, zia hun a chu Beginner leh Primary te’n thupi chuam umlo in amau lemsak sak zik kidemna a nei ui. , Chun, kidemna zosia zawthian a hi hun in Rev. Lalthantluanga, Moderator prize piakdawna nei in Upa Rochangliana in pauchapna tawh hun matna a khak hi. Manipur Presbyterian Church Synod ahileh Presbytery 4 a kikhen, Tuithaphai Presbytery nuai ah kochuam 14 um a hi.

Ex-Servicemen rally
Lamka, Aug. 12 *(Nisn Thuhiltu)* : Khuga Dam ah um Khuga Battalion Friend of Punjab in tuni sunma dak 9 in 27 Sector Assam Riffle, Tuibong ah Ex-Servicemen leh gal ah thina tuak si Veer Naris insung mite’n haksatna a tuak teu tawh kisai in hun matna a nei ui. Zia hun a chun, Ex-Servicemen leh galphual ah thi Veer Naris insung mite’n pension sum, central in panpina chuam chuam a piak te banah bank tawh kisai ah haksatna a tuak teu genkhawmna a nei ua, Khuga Battalion in zia hun a chun thil umdan te hilchianna a nei ui. Hun matna chu Ex-Servicemen leh galphual ah thi Veer Naris insungmi mi 50 valten a uap ui. Khuga battalion in ahileh sepai pension leh thina tuak insungmite ding amau camp Khuga Dam ah Ex Servicemen Grievance cell/Suvigya Cell a hawn bak ah team kikhen ah mun chuam chuam ah Ex Servicemen tamzaw te pahtchuampi ding thil te tangko sek in a kigen hi. Tuni tiang ah Khuga battalion in pension tawh kisai case chuamchuam 313 etzuina neita Ex Servicemen 157 te mu ding dawl sum kituptak ah a sukfel piak hun tiang um hin a kigen hi.

Panpina ding ah sa-minsa zuak

Lamka, Aug. 12 *(Nisn Thuhiltu)* : EBCC Hiangtam Lamka nuai ah um Dorcas pawl in tuni sunnung in damlo panpihna ding in Biakinn huangsung ah sa minsa a zuak ui. EBCC Hiangtam Lamka Dorcas pawl in ahileh New Lamka V Munhoih ah um Nianghoihkim @ Hoihkim (18) d/o (L) H. Rema, in natna lamdang tak a neina chung ah, ki et-kawlna ding sum leh pai tasam tak ah um a hi ziak ah kithuapina ding ah panlakna a nei hi a hi. Tuni ah Dorcas pawl in sa minsa a zawknau a pat sum a mudaw teu chu 13th August ah Hoihkim khut ah piakdawna nei ding un a kigen hi
NT 13aug2017d

Survey Team in Khawpi sung leh Institution chuam chuam entha

Lamka, Aug. 12 *(Nisn Thuhiltu)* : A khat-veina ding ah State Level Swachhta Award 2017 kiti District thiangtho pen teldaw ah a umna ding tawh kisai tuni, August 12, 2017 sunma a pat Survey Team khat in Khawpi sung leh Institution chuam chuam et-thakna a nei ui. Survey Team in et-thakna a nei masang un, District Survey Team in Inspection a nei masa; Office thiangthopen pathum te Independence Day hun ah kipakman piak hiding a hi. Survey Team Imphal a pat District sung entha te chu T. Kammuanlal Simte, CEO, ADC Churachandpur, Thienlaljoy Gangte, AC to DC, Churachandpur leh John Thanglienmang, AE, PHED te’n a puihuai ua, District Survey Team member in Joyce Lalhlimpui, Project Officer, DRDA, Hnunliansang, Structural Engineer, AE/DRDA leh Gin Johnson Paite, MTO SP Office te a pang ui. Survey Team in DC Office leh Government Office chuamchuam, Hospital leh PHC, School leh College, Bazaar Area leh lampi kim leh kiang, ni’n buakna leh Public Toilet ti te dinmun a enthau hi. Survey Team, Churachandpur vena nei te chu MM Ziaur Rahaman, Executive Officer, Thongkhong Laxmi, Soubam Niranjit, Executive Officer, Kakching Khunou leh Daryal Rocko Anal, Executive Officer, Sugnu-te a hiu.

Khangthak te’n skills leh creativity a sukhin zing uh pawimaw: Governor

Imphal, Aug. 12 *(Nisn Thuhiltu)* : Manipur State Film Development Society, Auditorium, Palace Gate, Imphal ah tuni’n Manipur University of Culture, First Foundation Day mat in a um hi. Zia hun chu Manipur Governor Dr. Najma Heptulla , Chief Minister N. Biren Singh leh Deputy Chief Minister Y. Joykumar Singh te’n khuallian hina tawh a uap ui. Governor Dr. Najma Heptulla in a thugenna a chun, Manipur culture siamhawina ding ah khangthak te’n skills leh creativity a sukhin zing ding uh pawimaw a hidan gen in Manipur literature, folk, theatre, music leh dance etc te a chuambik a hidan a gen hi. Zia chu tawh kitawn ah Manipur culture a pat Indian culture sukhin zing ding leh siamhawi ding pawimaw a hidan a gen hi. University of Culture phudaw ah a umna ziak chu state culture hausakna siamhawi thakna ding a hidan gen in, Manipur University of Culture in state sung ah cultural integration, growth leh prosperity banah communal harmony a um theina ding ah panlakna a nei chu pakcha mama a hidan genkawm in, Manipur University of Culture in mawpuakna liantak nei in a gen hi. Chief Minister N. Biren Singh in a thugenna a chun, Manipur University of Culture chu NorthEast region ah Culture University masapen hinalai in a gen a, Manipur chu talents chi chuam chuam - sports, arts ,culture, visual arts etc umna munpi khat himaleh a panlaknau leh a thil bawldaw teu masang ah hiatpi hingailo a hidan gen in, pu leh pa te nutsia, cultural art forms te tu-hun ah state mipi te ki letsakpi a hidan a gen hi. Government in tunung sawtlo ah permanent Manipur University of Culture campus a um theina ding ah panlakna nei zing a hidan taklang in, campus umna ding mun sukfel hinailo maleh kikawmtuana lampi hawitak a umna mun, Hill Areas ah umsak ding ah guanggalna um hin a gen hi. Art & Culture chu state sung ah mipi te kankhawmtu leh gawmkhawmtu a hidan gen in government in thillui written record ah a la um- Puyas transcript ti te English ah translate bawl ding ah guanggalna nei taklang in, translation work chiapi ding committee khat siamdaw hiding leh committee member ding ah scholar leh academician te pansak hiding hin a gen hi. Government thak in kivaihawmna lam thil te ah transparency chiapi zing ding a hidan gen in, government in mipi te kithuapina leh panpina pawimaw a hidan a gen hi. Chun, state ding ah buaina thupi pen chu hun matdan leh sum matdan thiamlo ziak hipen in a gen a, hun matdan leh sum matdan thiam hun hun ah state in talent a nei te khawvel in compete theilo ding hin a gen hi. Hills leh valley ah um te kal ah kihiatthiamlona leh kidaidanna um te sukbeina ding ah government in panlakna nei zing ding a hidan le gen in hills leh valley ah um te kal ah kihiathiamna leh kipumkhatna a um theilo leh politician te pawimawna umlo hin Chief Minister in a gen hi. Chuleh, government in a phalam ah society leh system a kisan theina ding ah panla zing ding a hidan gen in, State sung ah handloom & handicraft product te promote bawl theina ding ah government in state dang leh foreign gam ah handloom & handicraft product export ding ah panlakna nei hin a gen hi. Deputy Chief Minister Y. Joykumar Singh in a thugenna a chun, pu leh pa te’n a nutsiau chawndan hausakna um te chuambik leh kepbit ding pawimaw in a gen a, literature/novel etc te bep research leh study bawlna ding ah University siamdaw hizawlo ah literature, dances, music leh culture tawh kisai ah thil chuam chuam te research leh study bawlna ding ah University um a hidan a gen hi. Hun matna chu Minister for Art and Culture L. Jayantakumar Singh, Minister for Education Th. Radheshyam Singh, Vice Chancellor of Manipur University of Culture Prof. N. Khagendra, Commissioner Art and Culture M. Lakshmikumar, Director Art & Culture Dr. K. Sushila Devi te’n le a uap ui.

CM Relief Fund ding ah donate bawl umzing
Imphal, Aug. 12 *(Nisn Thuhiltu)* : Manipur ah tuilet ziak ah haksatna tuak te kithuapina ding ah organisations leh individual chuam chuam te’n Chief Minister’s Relief Fund ding ah monetary donation a bawl zing uh tawh kitawn in tuni’n All Manipur Government Drivers’ and Technical Association in Rs 21,101 leh Chingakham Yumjao Singh of Heingang in Rs. 1000 donate a bawl ua, Chief Minister’s Secretariat ah Chief Minister N. Biren Singh khut in piakdawna a nei ui. Chun, Railway Protection Force ah sem, Guwahati based Manipuri Group in online transaction ah Rs. Donate a bawl ui.

Manipur ah education dinmun kituptak ah etzui hi ding: Education Minister

Imphal, Aug. 12 *(Nisn Thuhiltu)* : Education Labour & Employment Minister Th Radheshyam in tuni’n Patsoi ah Keisham Birjit High School(aided) in founder (L) Keisham Birjit Singh, 7th Death Anniversary matna uap in HSLC, 2016-17 ah lawtinna chungchuang diak nei student te incentive cash awards piakdawna a nei hi. Minister Radheshyam in a thugenna a chun, school kitupna ding ah a fellona um te hawl ding leh siamhawi ding pawimaw a hidan a gen a, tu ah 1:13 teacher –student ratio chu kituptak ah chiapi ding pawimaw hina gen hi. School records, pass percentage a la sang mama, kum 2011-12 ah 87-97% tung himaleh tu ah a niamkiak chu khawk a sakthu gen in, Manipur ah education dinmun kituptak ah etzui hizing ding leh State Government in rural areas panna teacher vacancy 4000 um te dinmun enthak ding leh aided teacher te regularise hisak ding dan ngaitua ding hin a gen hi. Zia hun matna chu first batch student MLA, Patsoi A/C, Km. A.K. Mirabai Devi, Pradhan, Patsoi Gram Panchayat, N. Tomba Singh;President, SMC,K Birjit High School, Shri Keisham Binodkumar Singh; Subscriber, SMC, K Birjit High School, Keisham Birbal Singh & Donor, SMC, K Birjit High School, Keisham Bijoychandra Singh te banah Keisham Birjit High School ah teachers, staff, students leh nu leh pa te’n le a uap ui.

Kisan SAMPADA Yojana in farmer te income supung di: Minister Biswajit

Imphal, Aug. 12 *(Nisn Thuhiltu)* : Commerce and Industries Minister Thongam Biswajit Singh in Hotel Classic Grande, Imphal ah tuni’n Road Show on World India & Seminar on New Scheme Kisan SAMPADA Yojana kiti hun matna a uap a, ama’n a thugenna a chun, Kisan SAMPADA Yojana in farmer te income supung ding a hidan gen in, Department of Information and Public Relation mang ah scheme tawh kisai mass publicity bawl hiding in thutiam a bawl hi. Kisan SAMPADA nuai ah schemes 7 um a hidan taklang in, Backward leh Forward Linkages siamdaw ding thil pawimaw mama hin a gen hi. Government thak in Common Facilities Centres thak hawn ding ah guanggalna nei in le a gen a, tuhun ah state sung ah thei (fruit) production le niam kiak a hidan a gen hi. Tamenglong ah Orange , Senapati leh Churachandpur ah Passion Fruit production niamkiak zing a hina chung ah Common Facilities Centres hawnbe ding pawimaw hin a gen hi. Hun matna chu Additional Chief Secretary (Agriculture) Government of Manipur Dr. Suhel Akhtar, Ministry of Food Processing Industries, Government of India, Economic Adviser Dr.Bijay Kumar, Ministry of Food Processing Industries, Government of India, SS Aggarwal te’n le uap in Kisan SAMPADA scheme umdan genna a nei ua, SS Aggarwal in a thugenna a chun, government in tunaicha a khah outlay Rs.6000 crore tawh Kisan SAMPADA hawn ah um a hidan a gen hi. Department of Textiles, Commerce and Industry, Government of Manipur Principal Secretary Lungmuana Lakher in a thugenna a chun, Manipur ah Kisan SAMPADA chiapi ding chu thil hawi mama hiding in a gen hi.

Mao ah 33/11 KV Sub-Station hawng ding
Imphal, Aug. 12 *(Nisn Thuhiltu)* : Manipur (PWD/RD&PR, Comm.& Industries/Power/Adm. Reforms &Training/IPR) Minister Th. Bishwajit Singh in 14.08.2017 leh Mao ah Manipur State Power Company Limited in installed a bawl thak 33/11 KV Sub-Station hawnna nei ding a hi.

Manipur in Patriots’ Day nit ding
Imphal, Aug. 12 *(Nisn Thuhiltu)* : Manipur Government in Kangla ah 13th August,2017 leh Patriots’ Day, 2017 mang ding a hi. Zia hun chu Governor Dr. Najma Heptulla leh Chief Minister N.Biren Singh te’n Chief Guest leh President hina tawh uap ding a hiu a, zingkal lam dak 4:00 leh Prabhat Phery um ding, zia zaw chuleh Hicham Yaicham Pat, Moirangkhom ah zingkal dak 8:00 ah pakcha piakna um ding, zia nung a chu Thangal General Temple, Palace Compound ah Patriots’ Day, 2017 matna um ding, nitak lam dak 3:30 leh Kangla mun ah Governor leh Chief Minister te mapuina wreath laying ceremony um ding a hi. Chun, Manipur Rifles contingents te’n Martyr te Guard of Honour/ General Salute piakna nei ding a hiu.

Page 1 of 10