Nisin Thuhiltu

User Rating: 0 / 5

Star InactiveStar InactiveStar InactiveStar InactiveStar Inactive

Kerala ah Nipah Virus ziak ah mi 6 thi; Scientists joint team te’n khualna nei

Kozhikode, May 21 *(Nisin Thuhiltu)* : Northern Kerala's Kozhikode area ah Nipah virus ziak in mi 6 te’n thina a tuak ua, mi 8 te etkawl ah um a hidan taklat in a um hi. Nipah virus kiti natna mihing a ding ah natna lau um tamtak te lak ah chi khat, gancha a biktak ah bak (bat), vawkcha leh gancha dangdang banah thei (fruit) nekbang kipaimang, Nipah virus pua ganhing te’n a nekbang uh thei (fruit) nekkhakna leh Nipah virus natna nei te direct contact bawlna a pat kilasawn thei a hi. Nipah Virus ziak ah damlo tuak te chu khawsik, luchangna ti te leh thuak (brain) lam buai nuam sek ti a hia, zia te chu etkawl vak ahiloleh dakkal 24-48 sung ah khua helo ah um thei a hi. Kerala ah Nipah virus case mudaw a hi tawh kitawn a chun, Scientists te’n Kerala ah natna dodal thei a hina ding in panlakna nasatak a nei ngal ua, National Centre for Disease Control, New Delhi; National Institute of Virology, Pune leh Integrated Disease Surveillance Programme, Kerala a pat scientists team te’n Kozhikode ah thil umdan khualna a nei zing ui. Official thusuak in a taklatna a chun, mi 6 in thina a tuak banua mi 8 te Medical College Hospital, Kozhikode ah etkawl ah um a hidan taklang in, mi dang khat Kochi ah Nipah virus case ah etkawl ah um in a gen hi. Zia natna chu mihing a ding ah natna lau umtak himaleh lauthawnna ding umlo, a huntak ah ki-etkawl ahinak leh sukdam thei ti a hi. Manipal Virus Research Centre a pat Dr Arun Kumar in Kozhikode’s Changaroth panchayat ah Nipah virus ziak ah mi 2 te’n thina a tuakna mun uh etthakna a neina tawh kisai a genna a chun, Nipah virus ziak ah damlona tuak mudaw thak neilo a hidan gen in, ni 2 sung zia locality a chu hun mang hi’n a gen a, lauthawnna ding umlo leh health worker te’n natna kaisawn khak ding le kichat umlo in a gen hi. Sample a chawmkhawm teu chu international standards tawh kituak ah laboratory testing bawl hiding, a result leh Nipah virus tawh kisai ah mudaw a neiteu chu Union Health Ministry kiang tut ding uh hi’n a gen hi.

National Institute of Virology ah director Dr D T Mourya in a genna a chun, Kiginni nitak ah sample a chawmkhawm teu test bawl ding ah laboratory tut hita a hidan gen in, a huntak ah zia natna nei te chu etkawl ahi ua le damthiang kit thei uh hi’n a gen hi.

Nipah virus kiti ahileh Malaysia gam ah Nipah kiti khua khat ah September 1998 ah la kimudawk masapen a hia, zia chu tawh kitawn ah Nipah khaw min putsak ah Nipah Virus kiti a hi. A kimudaw limlai, September 1998 -April 1999 sung in Nipah Virus case 265 a la um a, zia lak a chu mi 105 te’n thina a la tuak ui. India gamsung ah kum 2007 in West Bengal’s Nadia ah zia natna chu mudaw in a la um kit a, mi 5 te’n thina tuak in, mi 30 in zia natna case chu nei ua tepte in a um hi. Bangladesh leh South East Asian gam chuamchuam ah le zia natna case chu um ah gen a hi.

One Day Training and Awareness Program on Disaster Management

Lamka, May 21 *(Nisin Thuhiltu)* : Department of Relief and Disaster Management and Civil Defence leh District Administration, Churachandpur saina’n tuzingkal dak 10:30 in District Training Centre (DTC), Tuibong ah One Day Training and Awareness Program on Disaster Management a um hi. Zia hun a chun, district sung ah SDO, BDO, government department chuamchuam- PWD, PHED, IFCD, Agriculture, CMO, Fire Service Sub-Station leh Philanthropic Organization apat mi bangzat hem a pang ua, Shyam Lal Poonia, IAS, DC, CCpur in Chief Guest hina tawh uap in, Kammuanlal Simte, CEO, ADC, CCpur in Functional President ban ah Mannuamching, IAS, DC, Pherzawl District leh Mohd Ayub Khan, Deputy Controller of Civil Defence te’n Guest of Honour hina tawh a uap ui. Shyam Lal Poonia, IAS in a gendan in, tuaksiat tuak hun ah mani a ding ah a phatchuam ding ban ah mite panpi leh hukdawtheina ding ah tuni awareness program hi pawimaw mama ahi’dan a gen ban ah, Department of Relief and Disaster Management and Civil Defence in tuaksiat tuak hun ah mat ding vanmatchak chuamchuam district a ding in pethei leh ti pha a sak thu a gen hi. Chuleh, tuni May 21 hi World Anti-Terrorism day ahi tawh kitawn in, thingnuaimi dodalna leh sukbeina ding ah kua’nle panla chiat ding in a chiakhawmte kiang ah kithiamna a neisak ngal hi. Hun nina ahileh training leh awareness hun in a mat ahia, zia hun a chun, Department of Relief and Disaster Management and Civil Defence apat resource persons- Mohd. Ayub Kham, Deputy Controller, Civil Defence, Manipur; O. Ratan Meitei, Instructor, Relief and Disaster Management; A. Achouba Singh, Sub Team Commander (IDRF) leh Mohd Shahiruddin, Master Trainer, Relief And Disaster Management te’n tuaksiat tuak hun ah mani hinna humbit ding dan chuleh, midangte panpi leh hukdaw ding dan tawh kisai in vanmatchak chuamchuam mang in ziltîlna a nei ui.

Zogam Bridge kiti siamdawk

Lamka, May 21 *(Nisin Thuhiltu)* : Thanlon Sub-Division sung ah um, Leijangphai apat Phaiba tâng zawtna lampi in a hawkhak, Tuiku Lui ah Lei kibawl, Zogam Bridge kiti matthei ding ah bawlzaw in a um tai. A hawndawna chu kibawl nailo hi’n a kigen hi. Lei bawlzaw a hitheina ding ah Leijangphai, Tuikumuallum, Tuipiphai, Phaiba leh Phainuam te’n a tuakkhawm uh, leingawi, thingpêk leh thingzawl ban ah MLA leh MDC te’n amau sakhau apat a sawkdaw uh sum mangcha ah kibawl hi’n a kigen a, chuleh nam sepai, Phaiba Camp a um te’n le nasep thilbawl ah nasatak ah kithuapi uh hi’n a kigen hi. Zaw ahi tiang ah zia lei bawlzawna ding in nitha 247 a lut hi. Lei ahileh thing, thikkhau leh thikzang mang ah kibawl ahia, chuk lai ale gari luttheita ding ban ah, lampi le blacktop hilo maleh matthei ding ah bawlzaw hiphawt hi’n le thu hiat ahi. Mipi a ding ah a phatchuam mama ding ban ah, a bîk ah Leijangphai a School kai naupangte a ding ah tui pal ngaitalo ding hi’n le a kigen hi.

FMPB Missionary candidate-te pauchappiak

Lamka, May 21 *(Nisin Thuhiltu)* : Friends Missionary Prayer Band (FMPB), CCpur in tuni nitak dak 1:30 in DS Office, Lamka South Division, New Lamka ah FMPB Missionary candidate-te pauchappiakna a nei ui. Zia hun a chun, FMPB, CCpur ah mapuitute a pang ua, Rev V. Nenglian, DS, Lamka South Division, EBC in missionary candidate-te a ding ah tîlkhona thu gen in pauchappiakna a nei hi. Missionary candidate mi 8-te a hiu leh - Mampui of Laktak Project, Lalduhsaka of Kanaan, New Lamka, Lhingneihoi of Sabual North East Tangnuam, Manbiakkim of G. Mualkoi, N. Lunminthang of Leisanbung, K. Vunggoulian of Lailam Veng, K. Luaiminthang of Nehru Marg leh Lalkim of Gangpimual ahiu a, Guwahati ah interview ding ah zing leh Lamka nusia ding ahiu a, interview ah lawtingte ahiu leh FMPB in India gamsung mun chuamchuam ah missionary nasem ding ah training pe ding ahiu.

KIC leh PTC in kithuakhawmna hun nei

Lamka, May 21 *(Nisin Thuhiltu)* : Kuki Inpi Churachandpur (KIC) mapuina’n tuni May 21, 2018 nitaklam in Paite Tribe Council (PTC), General Headquarter Conference Hall, Hiangtam Lamka ah PTC, GHQ mapuitu thakte tawh kithuakhawmna a nei ui. Zia hun a chun, KIC nuai ah KKL, KSO, Joint Committee on Anti Drugs, Churachandpur leh PTC, GHQ apat teltin thak ah um mapuitute a pang ua, khawtang a siatna chuamchuam tawh kisai ban ah pau kihetua non-Naga group-te kituak zawdiak ah umkhawm ding dan genkhawmna a nei ui. Khawtang siatna lampang ah a diak tak in, khanglai lak ah khamthei tawh kisai ah kithutuak tak ah dodal khawm ding dan leh chi leh nam ah kikhenchuamna a umlona ding ah kipawlkhawmna hâbawl diak ding ahi’dan leh mipi lak ah kampau matdan pilvan ngai ahi’dante genkhawmna a nei ui.

Kani tawh mi khat mat ah um
Lamka, May 21 *(Nisin Thuhiltu)* : Churachandpur Battalion, Assam Rifle leh District Police pangkhawm in a chiata May 19, 2018 in Vajing khua ah mi khat apat khamthei Kani (Opium) tamtak matdaw in a um hi. Combine team in thugûk a mu dungzui ah Joint Operation a bawlna ua, Seiminthang Tuboi (36) s/o Jamlet of Vajing a chenna In in a man ua, ama apat Kani Kg 2.34 ban ah Kani chii tu ding Kg 22.240 mandawk uh hi’n a kigen hi. Khamthei matdaw zosia tawh police khut ah piakdaw in a um hi.

May 27 a pat CCpur Dist. ah polythene/plastic bag khap hiding
Lamka, May 21 *(Nisin Thuhiltu)* : District sung a polythene/plastic bag matna tawh kisai ah a chiata February 6, 2018 ni ah Deputy Commissioner, Churachandpur mapuina ah genkhawm ahi nung ah suizuina nei ding ah vaihawm ahi dungzui ah suizui ah um in, district sung a polythene/plastic bag matloding/khâm hiding hi’n a kigen hi. A kigen dan in, Lamka leh a kimvel ah nicheng ah plastic bag 1.86 lakh matbei ah um hi ah mudaw ahia, mihing hinna a ding ah lauthawn theina tiang tunthei ding ah mu ahi ziak in, khâm hiding hi’n a kigen hi. Central Government, State Government leh Local Government in plastic bag khâm ding pha a sak dungzui ua, a chiata March 19, 2018 ni ah Shyam Lal Poonia, IAS, DC Churachandpur leh M/K Plastic in biodegradable plastic/polythene district sung ah hung supply ding ua kilemna suai kai uh hi’n a kigen hi. India in World Environment Day 2018 a zintun ding tawh kitawn ah World Environment Day, June 5 ah polythene bag consumption free district ti ah puandaw a hitheina ding ah May 27, 2018 apat district sung a polythene/plastic bag khâm ah um zuipat hiding hi’n le a kigen hi. Zia hi sub-division tin ah mat hiding ban ah, a ensui ding in Enforcement Committee patdaw in a um a, a chairman in Sub-Divisional Magistrate, Member Secretary ding in Sub-Divisional Police Officer leh member in Range Officer (Forest), Assistant Engineer (PHED) leh CEO/ADCC in a guat, DI-te hiding ahiu.

Gate kipai in mi 1 delkha
Lamka, May 21 *(Nisin Thuhiltu)* : Hilltown ah tuni sunnung dak 2:30 vel in inn gate kipai in a kiang ah um pawsal khat delkha’n, aveilam keng nasatak in a liam hi. Gate in a delkhak ahileh Ngamlal (36) s/o Seilet of Joljam Village a hi. Pawsal khat gate sunglam a kipat gari neu a taidawk in gate a hetkhak leh gate (thikpek) le kipai hi’n a kigen hi. Zia ah gate kiseppai chun, a kiang ah um Ngamlal chu a delkhak a hia, a liamna a serious ziak in doctor te’n hospital in admit a bawl ui.

ZYA G. Tonjang Unit hawng ding
Lamka, May 21 *(Nisin Thuhiltu)* : Zomi Youth Association (ZYA) GHQ in May 25,2018 sunnung dak 1:00 leh Thangkhosei Guite, Chief of G. Tonjang inn ah ZYA G. Tonjang Unit hawnna nei ding a hi. Zia hun chuleh V. Chinsiam in hun matna mapui ding, Thangkhosei Guite, Chief of G. Tonjang in vaidawnna thu gen ah, Lianzalal, President, ZYA/GHQ in ZYA Unit hawnna leh Officer Bearer-te kitiamsakna nei ding a hi. Pastor G. Sanglian, Bialtu Pastor, EBCC G. Tonjang in Officer bearer-te pauchap piakna nei ding a hi.

Imphal ah Rhohingya muslim mi 9 matdaw ah um

Imphal, May 21 *(Nisin Thuhiltu)* : Manipur state sung ah illegal migrants (Rohingyas) te dodalna nasatak chiapi ah a um zing tawh kitawn in Manipur Police in Hatta Golapati area, Imphal East ah numei 4 panna’n illegal migrants 9 a mandawk hi. Mi 9 lak ah mi 4 te chu Mohammad Younus, 27 s/o Abdul Hakim of Laungdung Fakiduang village, Nakura N.M.5 Maundaw, Myanmar; Mohmad Anwar, 28, s/o Kulla Miya of Manrunah village, Buthidang, Myanmar; Md.Ismaile, 28, s/o Md. Savar Ahamad of Buthidaung Block-II, Myanmar leh Sultana, 27 w/oMd, Ayub of Thoubal Moijing te a hiu a, amau hung kipatna diktak ahileh Bagladesh tu leh tu Golapati ah khawsa a hiu. A dang te ahiuleh naupang, kum 18 ah upa numei 2, kum 18 ah upa pawsal naupang 1, kum 15 upa pawsal chapang khat leh kum 8 ah upa pawsal chapang khat a hi. Mat ah um te a pat a chun, mobile handsets 4 leh UN UNHCR (United Nation High Commissioner for Refugees) ID cards 2 leh fake Aadhar cards 4 mudaw in a um hi.

Imphal West Police office ah DIG K. Jayantakumar in thil umdan tawh kisai a taklatna a chun, Mohammad Younus leh Mohammad Anwar te a kipuandan ua, kum 2015 ah Mynmar nusia, Bangladesh refugee camp ah um, zia nung a chu Bangladesh a pat India ah a guk ah lut, Kolkata a tun ua, Delhi zuan ah Muslim Indian agent mi khat puihuaina nuai ah UNHCR ID card ngaitua ah, Bethindi Bitatanagar, Jammu and Kashmir zuan ah zia mun a chu khawsa, May 16 a pat innlua ah Golapati ah khawsa kit hiu ah kipuang un a gen a, Md. Jamaruddm,(7) s/o late Md. Turak Ali of Hata Golapau Maning Leikai ahileh khawsakna ding ngaitua zing hi’n a gen hi. Naupang 5 te ahiuleh Buthidaung area, Myanmar mi, Rohingya Muslim te buaina ziak ah Bangladesh refugee camp a tung nung ua India ah Muslim agent te panpina India gamsung lut uh ti a hi.

Citizenship (Amendment) Bill 2016 ah dawilo ah kiphinna nei
Imphal, May 21 *(Nisin Thuhiltu)* : All Manipur Students’ Union (AMSU) leh North East Students’ Organisation organised bawlna tuni’n Keishampat, Imphal ah Citizenship (Amendment) Bill, 2016 dawilo ziak in sit-in rally a um hi. AMSU Vice-president Peter Laishram in a genna a chun, chief minister kiang ah memorandum piakna nei ah Manipur Accord in illegal immigrants te nawdaw theina ding ah thutiam bawl a hidungzui ah Citizenship (Amendment) Bill, 2016 pass a hilona ding ah panlakna nei ding ah chialna bawl un a gen hi.

Citizenship (Amendment) Bill, 2016 ahileh Citizenship Act of 1955 siamthakna ding Bill,19th July 2016 ah Lok Sabha ah luidaw ah um a hi. Citizenship (Amendment) Bill 2016 dungzui ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis te India mi leh sa hina nei (citizen) ah pawm thei ding ti a hi. Citizenship Act, 1955 dungzui ah gamdang mi phalna bei ah India gam ah pemlut te chu “illegal migrants” ti a hiu a, Indian Citizenship mutheilo ding ti a hi bawk hi. Zia ah “illegal immigrant” kiti chu valid travel documents (passport & visa) neilo ah India gamsung lut te, ahiloleh valid travel documents nei himaleh a hun tiam kipia sung khel ah India gam ah um te genna a hi. Foreigners Act, 1946 leh Passport (Entry into India) Act, 1920 dungzui a chun, illegal migrants te chu jail ah khumthei ahiloleh gamsung a pat nawdaw ding ti a um a, zia ah Act pani te apat chu illegal immigrant te India gamsung lut leh pawt, India gamsung ah a khawsakna chung ua thuneikhum thei ding ah central government thuneina piak a hi.
Central government in kum 2015 leh 2016 ah notifications a suadawna a chun, December 31, 2014 masang ah India gamsung lut, gam dang mite lak ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis community te chu India ah khawsa thei ding ah lemsakna a nei hia, zia gual mite chu valid documents neilo ziak ahiloleh India mi ahilo ziak ua jail ah khumlo ding, gamsung apat le nawdawlo ding ah lemsakna a nei a hi. Zialo a chun, India mi leh sa hina nei (citizen) ah pawm ding, Foreigners Act, 1946 leh Passport (Entry into India) Act, 1920 dungzui ah illegal immigrant te’n Indian citizenship apply a bawl theina ding ua a tawmpen ah kum 11 sung bek India ah um a hiding uh ti chu kum 6 tiang ah sukniam ding ti Citizenship (Amendment) Bill, 2016 mang ah proposed bawl a hi. Himaleh Citizenship (Amendment) Bill, 2016 in illegal Muslim migrants te genkhak in a nei pua, Afghanistan, Pakistan leh Bangladesh a pat minority community dang Jews, Bahais etc te le genkhak in a nei puai. Assam ah Citizenship (Amendment) Bill, 2016 nasatak ah dodal ah a umna ziak ahileh Assam Accord of 1985 tawh a kikal ziak a hia, Assam Accord of 1985 dungzui ah Bangladesh a pat March 25, 1971 nung ah Assam sung lut te “illegal migrants” ah pawm ding leh Assam state sung a pat nadaw thei ding ti a hi.

State in Anti- Terrorism Day nit

Imphal, May 21 *(Nisin Thuhiltu)* : 1st Manipur Rifles Banquet Hall, Imphal ah tuni’n India Prime Minister lui Rajiv Gandhi death anniversary leh Anti-Terrorism Day nit in a um hi. Zia hun chu, Agriculture, Veterinary and Animal Husbandry Minister V. Hangkhanlian leh Education, Labour & Employment Minister Th. Radheshyam te’n Chief Guest leh Functional President hina tawh a uap ua, Chief Guest, V. Hangkhanlian in a thugenna a chun, India gamsung pumpi May 21st chu Prime Minister lui Rajiv Gandhi kithana hiatzingna ding ah Anti Terrorism Day ah kimang sek hi’n a gen a, Prime Minister lui Rajiv Gandhi ahileh 21 May 1991 ni ah numei suicide bomber 2 te’n Sriperumbudur,Tamil Nadu State ah a tha uh a hi. Huham tak kithana leh nasep thilbawl nei kiti chu freedom of life kala hidan gen in, terrorism ziak ah mitamtak in hinna a chan zing uh chu demna nasatak bawl kawm ah India in Anti-Terrorism Day a mat sek hi’n a gen hi.

Th. Radheshyam, Education, Labour & Employment Minister in a thugenna a chun, terrorism kiti chu humanity leh modern civilization a ding ah melma a hidan gen in, mihing hinna susia hi’n a gen a, terrorism ziak ah state in le buaina chuamchuam tuakzing sek a hidan a gen hi. Prime Minister lui Rajiv Gandhi chu vision hawitak nei leh Punjab Accord, 1985 leh Mizoram Accord, 1996 te chung ah suai a la kaitu a hidan gen in, kihona leh non violence ah buaina chuamchuam um te sukven thei a hidan muang ngam ah a la chiapitu khat hi’n a gen hi. Terrorism kiti chu kipumkhatna tawh dodal chiat hileh Manipur, India leh Khawvel ah sukbei thei hiding in a gen hi. Zia hun mat sung a chun, Anti-terrorism/ Anti-Violence pledge bawlna hun, Minister V. Hangkhanlian in a mapui a, Government Officials leh staffs tamtak te’n hun matna a uap ui.

Citizenship (Amendment) Bill, 2016 kiti bang?
Citizenship (Amendment) Bill, 2016 ahileh Citizenship Act of 1955 siamthakna ding Bill,19th July 2016 ah Lok Sabha ah luidaw ah um a hi. Citizenship (Amendment) Bill 2016 dungzui ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis te India mi leh sa hina nei (citizen) ah pawm thei ding ti a hi. Citizenship Act, 1955 dungzui ah gamdang mi phalna bei ah India gam ah pemlut te chu “illegal migrants” ti a hiu a, Indian Citizenship mutheilo ding ti a hi bawk hi. Zia ah “illegal immigrant” kiti chu valid travel documents (passport & visa) neilo ah India gamsung lut te, ahiloleh valid travel documents nei himaleh a hun tiam kipia sung khel ah India gam ah um te genna a hi. Foreigners Act, 1946 leh Passport (Entry into India) Act, 1920 dungzui a chun, illegal migrants te chu jail ah khumthei ahiloleh gamsung a pat nawdaw ding ti a um a, zia ah Act pani te apat chu illegal immigrant te India gamsung lut leh pawt, India gamsung ah a khawsakna chung ua thuneikhum thei ding ah central government thuneina piak a hi.

Central government in kum 2015 leh 2016 ah notifications a suadawna a chun, December 31, 2014 masang ah India gamsung lut, gam dang mite lak ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis community te chu India ah khawsa thei ding ah lemsakna a nei hia, zia gual mite chu valid documents neilo ziak ahiloleh India mi ahilo ziak ua jail ah khumlo ding, gamsung apat le nawdawlo ding ah lemsakna a nei a hi. Zialo a chun, India mi leh sa hina nei (citizen) ah pawm ding, Foreigners Act, 1946 leh Passport (Entry into India) Act, 1920 dungzui ah illegal immigrant te’n Indian citizenship apply a bawl theina ding ua a tawmpen ah kum 11 sung bek India ah um a hiding uh ti chu kum 6 tiang ah sukniam ding ti Citizenship (Amendment) Bill, 2016 mang ah proposed bawl a hi. Himaleh Citizenship (Amendment) Bill, 2016 in illegal Muslim migrants te genkhak in a nei pua, Afghanistan, Pakistan leh Bangladesh a pat minority community dang Jews, Bahais etc te le genkhak in a nei puai.

Assam ah Citizenship (Amendment) Bill, 2016 nasatak ah dodal ah a umna ziak ahileh Assam Accord of 1985 tawh a kikal ziak a hia, Assam Accord of 1985 dungzui ah Bangladesh a pat March 25, 1971 nung ah Assam sung lut te “illegal migrants” ah pawm ding leh Assam state sung a pat nadaw thei ding ti a hi. *(Nisin Thuhiltu)*

Tripura ah tuilet ziak ah inn kuan 3000 val te’n a inn mun uh nusia; mi 6 thi

Agartala, May 21 *(Nisin Thuhiltu)* : Tripura ah tuilet nasat ziak in inn kuan 3000 val te a chenna mun ua umtheilo in a um ua, mi 6 te’n thina a tuak ui. North Tripura in tui a let nasa diak a, Assam–Agartala National Highway ah le tuilet in traffic a chawk buai a, mun khenkhat ah school te le khak in a um hi. Tripura Chief Minister leh Ministers dang te khualzin kal ah govt affair tawh kisai mawpua, State’s Education Minister Ratan Lal Nath in tuiletna mun te etthakna nei in, govt official te chu tui ziak ah mundang ah pawtdawk theilo ah um te puidawk ding leh kithuapina nasep kituptak ah chiapi ding in hiatsakna a bawl a, innkuan 3000 val te chu makeshift camps 36 ah umsak a hiu. District official te gendan in, NDRF, fire service, civil defense leh volunteers te’n tuilet ziak ah haksatna tuak te kithuapina nasep chiapi zing uh hi’n a gen a, inkuan khat a pat mi 3 panna mi 6 te’n buanthuak kitawl ziak ah thina tuak uh hi’n a gen hi. A langkhatlam ah Chief Minister Biplab Kumar Deb in victim family te chu financial assistance piak hiding in a puang hi.

Hepina bei hial ah Dalit thiksia hawlmi 1 jeplup ah um

Rajkot, May 21 *(Nisin Thuhiltu)* : Gujarat, Rajkot district, Shapar village ah kum 40 ah upa Mukesh Vaniya of Parnala village, Surendranagar district chu khau ah hen in pawsal 5 in a jeplum ui. Police in thil umdan a taklatna a chun, jeplup ah um Mukesh Vaniya leh a zi banah numei dang khat chu thiksia/vanlui chawmkhawm mi a hiu a, Shapar ah um Radadiya Factory kiangnai tuam ah thiksia a chawm nau ah Radadiya Factory ah semtu te tawh kinial buaikha, factory neitu panna Mukesh Vaniya chu khau ah kan hepina bei hial ah a jep uh a hi. Zialo a chun, a zi leh numei dang khat te le sawisak a hiu a, liamna tuak ua gen a hi. Zia gual ah kisawisakna chu CCTV camera ah record a hi dungzui ah social media ah a video muthei ding ah thezak in a um hi. Zia gual ah Dalit nam niam te sawisak ah a umnau tawh kisai chu Dalit MLA 'Mr. Mukesh Vaniya in nasatak in a tangko a, Twitter ah a video upload bawl in thiltung chu nasatak in demna a bawl hi. Jeplup ah um Mukesh Vaniya zi’n police ah compliant a bawl tawh kitawn in, Police te’n Mukesh Vaniya jeplum tu te chu a man ua, Scheduled Castes & Scheduled Tribes (Prevention of Atrocities) Act leh Indian Penal Code - murder, assaulting a woman and wrongful confinement nuai ah case ziklut ah um hi’n a taklang hi. Mat ah um mi 5 te chu- Radadiya Factory neitu Jaysukh Radadiya leh a lawite Chirag Patel, Divyesh Patel, Jaysukh Radadiya leh Tejas Zala te a hiu, kisawisakna ziak diktak hiat hilo maleh kimusitna ziak ah thil tung hipen ding ah ginchat a hi.

Gujarat Minister of State for Home Pradipsinh Jadeja in thiltung tawh kisai a press conference a genna a chun, kilawmlo tak ah gamtatna chung a chu government in action khautak ah lading a hidan taklang in, thina tuak insung mite compensation Rs 8.25 lakh piak hiding leh victim family te dinpi zing ding a hidan a puang hi. Chun, sections 302 (murder), 323 (punishment for voluntarily causing hurt), 342 (wrongful confinement), 354 (assaulting a woman to outrage her modesty) of the IPC and the SC/ST Prevention of Atrocities (POA) Act nuai ah FIR ziklut ah um in Minister Jadeja in a gen hi.

User Rating: 0 / 5

Star InactiveStar InactiveStar InactiveStar InactiveStar Inactive

Mizoram election zaw leh Northeast ah “Congress-mukt” sukbei hita ding; NEDA’s next meeting ah chief minister 8 chukhawm ta ding: BJP national President Amit Shah

Guwahati, May 20 *(Nisin Thuhiltu)* : Guwahati ah North East Democratic Alliance (NEDA) 3rd conclave uap ding BJP national President Amit Shah chu Citizenship (Amendment) Bill, 2016 dawilo ah kiphinna nei te’n kiphinna tawh a vaidawn ui. Zia chu tawh kitawn in kiphinna nei, RTI activist leh farmers' body leader Akhil Gogoi te chu police te’n a man ui. Activists of Krishak Mukti Sangram Samiti (KMSS) leh NGOs te’n Citizenship (Amendment) Bill, 2016 chu a dawilo uh a hia, zia bill chu indigenous te ding ah thil lau um hi ah a gen uh a hi. BJP national President Amit Shah chiana ding lampi, Guwahati’s Lokapriya Gopinath Bardoloi International Airport kim leh kiang leh NEDA conclave umna ding mun Srimanta Sankardeva Kalakshetra ah flag vawm takdaw in a um hi. BJP national President Amit Shah ahileh special flight ah zingkal lam dak 10:30 in Airport a tung hi. KMSS chief Akhil Gogoi in a genna a chun, Citizenship (Amendment) Bill, 2016 kiti chu anti-Assam bill a hih ti’n BJP te bill pass sak hilo ding in a gen hi. Citizenship (Amendment) Bill, 2016 ahileh Citizenship Act of 1955 siamthakna ding a hia, zia dungzui a chu Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis te India khua leh tui hina nei (citizen) ah pawm thei ding ti a hi. Mukesh Agarwal, Additional Director General of Police in kiphinna neite mat ah a umna ziak a genna a chun, VIP te ding ah free movement a um theina ding ah panlakna hi’n a gen hi.

North East Democratic Alliance (NEDA) ahileh North East ah political party chuamchuam, a biktak ah Congress supportlo te kikhaikhawmna a hia, tu leh tu NEDA member te ahiuleh - Bharatiya Janata Party (National) Asom Gana Parishad(Assam) National People's Party(Meghalaya) , Bodoland People's Front (Assam), Sikkim Democratic Front (Sikkim), Mizo National Front (Mizoram), Manipur Peoples Party (Manipur) , Indigenous People's Front of Tripura (Tripura), Manipur Democratic People's Front (Manipur), Ganashakti Party (Assam), United Democratic Party (Meghalaya), Hill State People's Democratic Party (Meghalaya), People's Democratic Front (Meghalaya) leh Nationalist Democratic Progressive Party (Nagaland) te a hiu.

NEDA 3rd conclave chu, BJP vaihawmna state ahiloleh coalition ah a vaihawmna state ua a pat Chief Minister 6 - Assam Sarbananda Sonowal, Arunachal Pradesh’s Pema Khandu, Manipur’s Nongthombam Biren Singh, Meghalaya’s Conrad Sangma, Nagaland’s Neiphiu Rio leh Tripura’s Biplab Kumar Deb te’n a uap kim vek ua, Sikkim Chief Minister Pawan Kumar Chamling ahileh melmu a hi puai. NEDA convenor leh Assam minister Himanta Biswa Sarma in Sikkim Chief Minister in NEDA 3rd conclave uaplo maleh a thasik ah mi sawl nei in a gen hi. Hiatthei khat chu tu dinmun ah Mizoram state bep chu North East ah Congress vaihawmna state umsun a hi.

A langkhatlam ah Narendra Modi government in Citizenship (Amendment) Bill, 2016 pass ding a guat dawilo ah Assam ah mitam te’n kiphinna nei ah, kiphinna tawh a vaidawn uh himaleh BJP national President Amit Shah in a thugenna a chun, Mizoram election zaw a hitak leh Northeast ah “Congress-mukt” sukbei hita ding in a gen a, NEDA’s next meeting ah chief minister 8 chukhawm ding uh hi’n a gen hi.

‘Thagau Thiangtho Kangai’ album thak hawng

Lamka, May 20 *(Nisin Thuhiltu)* : Young Christian Organisation (YCO), Gen. Headquarters saina’ tuni sunnung dak 1:30 in Hilltown a EOC Central Church ah EOC Central Choir in a saim ‘Thagau Thiangtho Kangai’ kiti Music Video Album Volume-II hawn in a um hi. Zia hun chu Chief Guest hina tawh Mimi Khaute, Research Officer, Planning Department, Govt. of Manipur in a uap a, Functional President in Kapthiangou @ VLK Vaiphei, Dy. Commandant BSF a pang hi. Pastor SL Minlun in pauchapna tawh hun matna hawng in, Pastor S. Khambuang, Coordinator YCO in Album tawh kisai taklatna leh presentation hun amapui a, programme sung in EOC Central Choir, Lingsiphai YCO leh Tualnuam YCO te’n lapawl sakna a nei ui. Hun mat sung in Chief Guest in Album thak hawnna nei in, Rev. Kaitinkap Vaiphei, General Director, ECCI in Pathian kiang in pauchapna tawh a latna a nei hi. Album thak sung in Pathian la 10 um in disc copy khat ah Rs. 150/- ah chawk thei ding hi’n a kigen hi.

Singngat ah Disabled Gospel Live Concert nei
Lamka, May 20 *(Nisin Thuhiltu)* : Gospel Ministry for Disability India (GMFDI) saina’ Manipur ah amasapen hiding in May 19, 2018 nitak dak 6:30 in Singngat ah Lhanghoi Veng, Community hall in ‘The First Disability Gospel Live Concert’ a um hi. Zia hun a chun, Manipur, Mizoram leh Nagaland ah gualphalo te banah Sinngat area ah mipi tamtak a chiakhawm ui. Zia concert ah musician te chu mitthum, artiest-te le a tamzaw gualphalo a hiu a, live concert ah GMFDI, Gigin, Nengpi, Mangneo, Mercy, Mamang, Hechin, Lalboi, Chongboi, Ompuii, Neopi, Evan. Onkholet te'n lasa’n, Chinkholam, Founder, GMFDI in Pathian thugenna a nei hi.

ZYA Unit hawng ding
Lamka, May 20 *(Nisin Thuhiltu)* : Zomi Youth Association (ZYA) GHQ vaisaina’ May 25, 2018 sunnung dak 1:00 in Thangkhosei Guite, Chief of G. Tonjang inn ah ZYA G. Tonjang Unit hawnna um ding a hi. Zia hun matna chu V. Chinsiam in mapui ding, Pastor G. Suanzalam, Bial Pastor (PCI) in pauhchapna tawh hun matna hawng ding a hi. Thangkhosei Guite, Chief of G. Tonjang in vaidawnna thu gen ding leh Lianzalal, President, ZYA/GHQ in ZYA Unit hawnna nei ah Officer Bearer-te kitiamsakna nei ding a hi. Chun, Pastor G. Sanglian, Bialtu Pastor, EBCC G. Tonjang in Officer bearer-te pauchap piakna nei ding, ZYA GHQ leh ZYA Lamka Block lawiupa te banah mimal chuamchuam in hun matna uap ah thugenna nei ding a hiu. Chuleh, Ginzathang in kipakthu genna nei ah Bial Pastor Daimuanlian, CBA Kanaan veng in pauchapna tawh hun matna khak ding a hi.

UKB in Season Closed Programme nei

Lamka, May 20 *(Nisin Thuhiltu)* : Managing Board, United Khawzim Brothers (UKB) in tuni sunnung dak 1:30 in IB Road KKL Complex ah season closing programme a nei hi. Zia hun a chun, mangaging baord member leh player-te te a pang ua, Season Closing programme kipat masang in managing baord member te'n meeting nei in, Annual session closed, State League a ding budget tawh kisai banah future plan chuamchuam tawh kisai genkhawmna a nei ui.

Season closing programme ahihleh Kh. Vaiphei, Secretary in amapui a, Lallianthang, Fin. Secretary in sum dinmun report piakna nei in, player-te apat in thu genna a um a, Lallunkam, Advisor in tilkhona thu a gen hi. Chuleh, H. Sangpi in presentation leh presidential speech bawl in, Rev. (Retd) PK Lianmang in kipahthu genna leh malzawl dawt piakna a nei hi. United Khawzim Brothers (UKB) ahileh CCpur Dist. Sports Association nuai ah affiliated football club 70 val umte lak ah CCpur District ai-awh ah Manipur State League, 2018-19 Season ah kihel thei ding umsun a hi.

Lenlai Club in Jersey thak hawng
Lamka, May 20 *(Nisin Thuhiltu)* : Lenlai Club (LC) managing board in tuni sunnung dak 1:30 in Lenlai Club (LC) Head Office, Toms Villa, Chiengkawn ah Raja Goukhothang Guite Memorial 2018 ah a akding uh jersey thak hawnna a nei hi. Jersey thak ahileh Vision Academy in a sponsored, jersey ah player-te min kizik in, tournament zaw a hitak leh player te’n a kichanden ding uh hi’n a kigen hi.

Hunmatna Th. Thonglunthang Simte, Vice Chairman, Lenlai Club in amapui a, TK Simte, Chief Manager in vaidawnna thu genna nei in, MKT Simte, 2 IC, 54 Bn, BSF in Chief Guest hina tawh jersey thak hawnna a nei a, CL John, GC Member- NTBCA Adviser in player leh official-te pauchap piakna a nei hi. James Tawia, Coach AIFF-D in player-te introduce bawlna nei in, B Khupkhochinthang, Adviser Lenlai Club in player-te tilkhona a nei hi.

Maoists attack ah Chhattisgarh police 6 thi

Dantewada, May 20 *(Nisin Thuhiltu)* : South Chhattisgarh, Dantewada district huapsung ah um Cholnar village kiangnai ah tuni’n Maoists te’n police personnel 7 chuanna private gari khat chu IED bomb mang in attack a bawl ua, ziana a chun, police 6 te’n thina a tuak ua, mi 1 nasatak in a liam hi. IED bomb attack bawlna kimang chu hat mama in police te gari le kiphelzak ziang ah muthei in a um hi. Dantewada Deputy Inspector General of Police, Mr..P.Sunder Raj in police 7 lak ah police 5 te a mun ah thiden ngal a hidan uh confirm a bawl a, police personnel2 te chu hospital tut ah um himaleh police khat chu a liamna thuakzo lo ah lamkal ah thi hi’n a kigen hi. A kihiatdan ah Maoists te’n police te meithal chawi zosia leh lakpiak vek un a kigen hi. Zia thiltung chu Chhattisgarh Chief Minister Raman Singh' in Dantewada District vethak a guat tawh kitawn ah piang in le a kigen hi.

Manipur railway nasem te truck khat kihal piak

Noney, May 20 *(Nisin Thuhiltu)* : Noney district, National Highway-37 zul ah Imphal-Jiribam railway project nuai ah nasem te truck khat tuni, 20 May 2018 zingkal lam dak 10:30 tuam in melhiatlo pawsal pathum in mei in a hal ua, himaleh thina leh liamna tuak umlo ah hiat a hi. Truck hal ah um chu cement pua a hia, Noney district headquarters kiangnai ah a nasepna mun uh zuan lai chu Irang lei (bridge) leh Awangkhul-2 kikal ah mei ah hal ah um a hi. Luikham, Additional SP Noney police station in a genna a chun, bangma vaulauna umlo ah truck chu kihal hi’n a gen a, truck ah chuang te ahiuleh chawmtha man uh hi’n a gen hi. Additional SP, Noney in a genna a chun, hill based militant group te’n sum demand a bawl uh piak ahilo ziak ah gari a hal uh hiding in a muanmaw thu a gen a, himaleh truck attack ah a umna ziak kichian tak hiat hilo in a gen hi. Chun, zia thiltung tawh kisai a chu police in case ziklut ah khualna nei hi’n a gen hi.

Hiatthei khat chu 110.62 Kms ah saulong Jiribam-Imphal railway project ahileh kum 2004 ah kipan hita a hia, himaleh thingnuaimi group chuamchuam in sum demand bawl ah a chawbuai zing uh tawh kitawn ah nasepna kituptak ah chiatha theilo ti a hi. Zia chu tawh kitawn ah Union Minister of state (Railway) Rajen Gohein in kum 2016 ah nasepna a etthak hun in, railway project chu 2018 ah zawthian ding ti himaleh December 2020 tiang ah zawthian ding in extend a la bawl hi. A langkhatlam ah nasemtu puimangna ahiloleh nasem te meithal ah kap ti kithang mama in a chiata kum 1 sung a khah zia gual case chu 14 ziklut in a um a, Assam Rifles, Manipur Rifles, IRB, State police leh Railway Protection Force a kigawm ah security personnel 1500 nasem te venbitna piak sak a hi.

Nongmeibung mipi’n “Plant & Protect” campaign pan

Imphal, May 20 *(Nisin Thuhiltu)* : Nongmeibung khua-mipi te’n ni 10 sung ah lampi pam ah thingno phu ding leh locality green suaksak theina ding ah project a nei chu tuni’n a pan hi. Khawvel pumpi huap in ngaituana nei inlah sem in” ti thupi nei ah plantation programme chu Eastern Students’ Club, Nongmeibung, Green Planters Society leh Chakpram Leirak Development Society mapuina a chiapi uh a hi. Organisers te’n Nongmeibung ah Ashoka thingno 1000 phu ding guanggalna nei in a kigen a, thingno ahileh state forest department in a piak a hi.

Meithal tawh Chingpi kap mi 4 mat ah um

Lamka, May 20 *(Nisin Thuhiltu)* : Assam ah Nagaon Police te’n Chingpi (rhino) kap mi 4 leh a khutmat uh AK 47 Rifles 2, magazines 6 leh meichang chang 200 a man dawk ui. Mat ah um te chu tunaicha Kaziranga chingpi kap mat ah um te tawh group khat hiu ah taklat in a um hi. Mat ah um Chingpi kap mi 4 te - Biaklal (25), s/o Pumkhanjan of New Lamka, Churachandpur; Jamlun (30) s/o Lianzakai, Bukpi, PS- Thanlon, Churachandpur; James Liankhanmung s/o Songkhankhup, Bukpi, PS- Thanlon, Churachandpur leh Liankhansuan, s/o Lt. Khamlang of New Lamka, Churachandpur te a hiu.

General Krishna in Indo- Myanmar dinmun entha

Imphal, May 20 *(Nisin Thuhiltu)* : Lieutenant General Abhay Krishna, PVSM, UYSM, AVSM, SM, VSM, General Officer Commanding-in-Chief, Eastern Command in Spear Corps Zone ah security dinmun etthakna a nei tawh kitawn in Indo- Myanmar International Border, Nagaland ah security dinmun leh infrastructure dinmun te etthakna a nei a, General Officer te tawh panlak dingdan genkhawmna le a nei hi. General Krishna chu Lieutenant General Gopal R AVSM, SM, General Officer Commanding Spear Corps in a kithuapi a, Assam Rifles troops te panlakna chung ah a lung tung mama in a kigen hi.

Jwalamukhi Battalion in meithal leh meichang mandawk

Kangpokpi, May 20 *(Nisin Thuhiltu)* : Senapati Brigade nuai ah Jwalamukhi Battalion leh Saparmaina police station a pat police team khat in May 18, 2018 ni ah Khengjang village, Kangpokpi district ah joint operation a bawl hun un, AK-47 Rifles 2, M-16 Rifle 1 leh magazines & meichang hunkhawp a kimudawk ua, amatdaw uh galvan te chu 19th May 2018 in Saparmaina police station in a pelut ui.

Road accident ah numei 1 thi

Moirang, May 20 *(Nisin Thuhiltu)* : Moirang Assembly constituency huapsung , Bishnupur district ah zani a khan numei 5 chuanna diesel auto khat leh alto car bearing registration number MN01G-1366 a kiphutua a, ziana a chun, diesel auto ah chuang numei 1 in thina a tuak a, diesel auto driver panna mi dang 5 te’n liamna a tuak ui. Thina tuak insung mite’n Moirang CHC ah facility kituptak a umlo ziak ah liamna tuaktu hinna hukdaw manlo ah um in a gen ui. A kihiat dan ah liamna tuak Moirangthem Ongbi Bidyaluxmi @ 30 chu a dinmun a serious ziak ah doctor in JNIMS, Imphal ah referred a bawl, JNIMS a zawtpi nau ah Bishnupur bazaar a tun kuan ua lamkal ah thi hi’n a gen ui.

A kikhailumsa pawsal 1 kimudawk

Imphal, May 20 *(Nisin Thuhiltu)* : Ibudhou Lolang Leiyon Pakhangba, Laibung, Wangoo Sabal, Imphal West district ah tuni’n pawsal khat a kikhailumsa mudaw in a um hi. Zia a kikhailumsa kimudawk chu Amom Selmanin (17 Yrs.) S/ o A. Leibakmacha of Wangoo Heinouyam Chingkhong, Kakching District hi ah hiat a hia, himaleh khailup ah a umna ziak chu hiatchian a hipuai.

Thoubal District Magistrate in CPC 144 puang
Imphal, May 20 *(Nisin Thuhiltu)* : Deputy Commissioner leh District Magistrate, Thoubal Haobam Rosita Devi in Usoipokpi area of Waithou Protected Forest (Usoipokpi Hill Lock) of Thoubal District ah 19th May 2018 nitak dak 6 a pat in thuthak a um kit masang sia Section 144, Criminal Procedure Code puan ah um prohibitory orders a sua hi. Zia chu tawh kitawn ah zia area a chu mi 5 sang ah tamzaw kikhawp khawm thei hilo ding ti a hi.

Cuban lenna tuaksiatna Pastor 20 panna mi 110 in thina tuak

Havana, May 20 *(Nisin Thuhiltu)* : Cuban lenna Boeing passenger jet chu Havana airport apat a kipatdaw nung sawtlo in tuaksiat a tuak a, a sung chuang mi 113 lak ah mi 110 te’n thina a tuak ui. Tuaksiatna mun ah lenna black box 2 te lak ah khat chu a condition hawi mama nalai ah mudaw in a um a, black box khat zawk le mudaw a hiding kinepthu Cuban authority in press conference in a taklang hi. Transport Minister Adel Yzquierdo in a genna a chun, thina tuak te lak ah gamdang mi 11 pang in a gen a, tuaksiatna apat numei 3 suakcha maleu a ha liam mama ziak ua a dinmun uh lauthawng um hi’n a gen hi. Zia thiltung chu Cuba a ding ah air disaster huaisia pen ah tepte in a um a, ni 2 sung gamsung pumpi ah sun hiding in Cuba Govt in a puang hi. Investigators te’n Cuban capital apat 20 km tuam bep ah gamla, Boeing 737 tuaksiatna chungchang chu khualna a nei ua, mudaw ah um black box apat information kituptak mudaw a hidan official te’n a gen ui. Tuaksiat ziak ah thina tuak mi 110 lak a chun, Cuba mi 99 leh Mexican crew member 6 a pang a, Cuban Nazarene Church apat pastor/evangelical nupan kawp 10 ( mi 20) te le a pang ui. Pastor/evangelical te chu retreat programme mangzo inn lam zuan a hiu.

User Rating: 0 / 5

Star InactiveStar InactiveStar InactiveStar InactiveStar Inactive

UNC leh Govt. in 7th Round of Tripartite talks nei

Imphal, May 19 *(Nisin Thuhiltu)* : Government of India, Government of Manipur leh United Naga Council (UNC) in Manipur ah district kisiamdaw thakna thu ah a 7 veina ding in tuni’n DRDA Hall, Senapati District Headquarter ah tripartite talks a nei hi. Government of India palai hina tawh Satyendra Garg, Joint Secretary (NE) Ministry of Home Affairs in kihona a mapui a, Government of Manipur palai hina tawh Agriculture Minister V. Hangkhalian, Education Minister . Th. Radheshyam, Principal Secretary (Finance and Health) Vumlunmang Vualnam, Secretary (Revenue) . T. Ranjit Singh te’n a uap ui. United Naga Council (UNC) lam ahileh President, Gaidon Kamei, General Secretary, United Naga Council S. Milan, President, All Naga Students’ Association Manipur, Joseph Adani leh President, Naga Women’s Union, Smt. Asha Wungnam te’n palai hina tawh a uap ui.

Tuni ah zia kihona a chun tumasang ah kinawptuana suai a la kai uh chu etthakna a nei ua, UNC palai te’n Government of Manipur tawh Memoranda of Understanding (MoU) suai a kai uh sukpitinlo ah a umna chung ah a lung awi-lo thu’u taklang in, Government of India in zia MoU suai chu enzui ding in thutiam a bawl hi. Kihona a nei masak hun ua, State Government in district thak kisiamdawna thu ah mipi te haksatna sulfel hiding leh UNC demand etzui hiding ah thutiam a la bawl a hia, zialo a chu 10th April, 2018 ah UNC demands bawl finalize hiding ah lemsakna nei a hidan Central Government leh UNC kiang ah a la tut a hi.
A langkhatlam ah tuni kihona a chu thupukna bangma siam thei nai diaklo in, 28th July, 2018 ah kihona neizawm kit ding in lemsakna a nei ua, zia hun chuleh State government in proposal a bawl te genkhawmna nei ding uh ti a hi.

Hiatthei khat chu, November 2016 ah District 7 - Channel district a pat Tengnoupal, Ukhrul a pat Kamjong, Churachandpur a pat Pherzawl, Senapati a pat Kangpokpi, Imphal East district a pat Jiribam, Thoubal District a pat Kakching, Tamenglong District a pat Noney siamdaw thak ah um chu United Naga Council (UNC) in nasatak ah dodalna a la nei a hia, a biktak ah Naga area ah District kisiamdawk thak chu zukkit ding phutna nei ah Manipur khangthu tepte thei ding ah highways (NH-2 leh NH-37) ah economic blockade tha 5 sung a chiapi nung ah 19 March, 2017 ah tripartite talks kipan a hi.

STC/BSF Mualkoi ah training zo thak te’n Passing Out Parade bawl

Lamka, May 19 *(Nisin Thuhiltu)* : Gangpimual Mualkoi ah um Subsidiary Training Centre (STC), BSF ah training zo thak BSF constable 148 te’n tuzingkal dak 9:00 in ‘Passing Out Parade’ a nei ui. ‘Passing Out Parade’ neite ahiuleh Batch Number 232 te a hiu a, Sh Solomon Yash Kumar Minz, IPS IG BSF in kitiamna a neisak hi. Constable Kumar Burdak mapuina ‘Passing Out Parade’ a nei hun un, Sh Solomon Yash Kumar Minz, IPS IG in salute lakna nei in, tilkhona thu a gen hi. Traning zo thak BSF constable 148 te ahiu leh hapta 44 sung training bawl a hiu a, training sung ah Physical Efficiency, Arms & Amunition, Map Reading, Field Engineering, Border Management, Internal Security, Law leh Human Rights ah a chungchuang diak te kiang ah medal piak a hiu. Passing Out Parade chu Shyam Lal Poonia, IAS DC/CCpur, Khaipao Haokip Chairman ADCC, Sh SK Singh Commandant 54 Bn BSF; Sh Gentlnlal, Commandant (Retd) leh khaw chuamchuam a pat mipi hunkhawp te’n le a uap ui. Subsidiary Training Centre, BSF ahileh March 15, 1968 ah Shillong ah kiphutdawk, February 16, 1990 ah Churachandpur ah kichawn a hi. STC/BSF Mualkoi ahileh Border Security Force (BSF) in North East India ah Training Centre a nei sun a hia, North East India a ding ah Training Centre lianpen le hi ah hiat a hi. STC/ BSF Mualkoi ah tuni tiang ah Constable leh Tradesman banah State Armed Police Forces personnel 60,000 val, Batch 232 ah kikhen in, training a la zodawk ta bawk ui.

YVA Town Unit in election nei

Lamka, May 19 *(Nisin Thuhiltu)* : Young Vaiphei Association (YVA) Town Unit in tuni, 19th May 2018 zingkal dak 7:00 apat sunnung dak 12:00 kikal in T. Manga Vaiphei chenna inn Compound, Red Cross road, CCpur ah kum 2018 - 2020 sung ah President leh Vice President ding telna (election) a nei hi. Zia hun a chun, YVA Town Unit huapsung ah innsuan in vote khat chiat nei in, President leh Vice President ding telna a nei ua, President leh Vice President ding ah proposed kibawl candidate 13 - Mr Rex Pauboi, Mr Lallianthang Mr Thianminlian, Mr Thangkhosiam, Mr Ginmalsawm, Mr Davi P.G Vaiphei, Mr Paulemsiam, Mr Thangmuanlal, Mr James, Mr S.N John, Mr Hauboi, Mr H Kamlianpau leh Mr Lunlalpui te lak ah Mr Davi P.G Vaiphei leh Mr Lunlalpui te YVA Town Unit President leh Vice President thak ding ah teltin in a um ui. Chun, teltin thak ah um President leh Vice President in cabinet a siam ding uh ti a hi.

Pache chin dan tawh kisai ah training bawl

Lamka, May 19 *(Nisin Thuhiltu)* : All Tribal Women Union (ATWU) GHQ nuai ah Lamka Tribal Women Upliftment Society in tuni, 19 May 2018 in ATWU President Nu Inn, New Lane Bungmual ah ATWU Pache Buk ah pache chindan tawh kisai in training a bawl ui. Training ahileh district sung ah numei-te a dik bik ah kibawl hi’n a kigen a, practical ah ziltilna a um hi. ATWU President Nianglian in a genna a chun, pache chiin kivakna kham leh chiin tak a hidan gen in kihinsuana mat thei a hidan a gen hi.

GYO /CCpur in Blood Donation Camp bawl

Lamka, May 19 *(Nisin Thuhiltu)* : Gangte Youth Organization (GYO) Churachandpur District in tuni, May 19, 2018 in Blood Bank, District Hospital ah Voluntary Blood Donation Camp-cum-Awareness Campaign a bawl hi. GYO Churachandpur District in District Hospital a damlo thisan pawimaw te’n a mat phatchuam ding uh tupna Voluntary Blood Donation Camp a bawl uh hi’n SN Zamboi Gangte, Joint Secretary in a gen hi. Voluntary Blood Donation Camp ahileh National Health Mission kithuapina a bawl uh hi’n a kigen a, GYO Churachandpur District apat numei 4 panna member kigawm mi 19 in thisan unit khat chiat Blood Bank a ding in donate a bawl ui.

Washington DC, USA ah posting ding

Lamka, May 19 *(Nisin Thuhiltu)* : India government in May 17, 2018 ni ah posting order a suana a chun, GL Romuan Paite, Senior AO @ C&AG government of India ah sem zing lai chu Washington DC, USA ah posting ding in order a sua hi. A kihiatdan ah zia post lua ding a chu India gamsung pumpi ah amau level officer ah mi 40 interview bawl um lak ah ama dawisakna piak ah um hi’n a kigen hi. GL Roumuan ahileh a zi leh chate tawh Lamphel Imphal ah khawsa, sepna gin-um leh mi kukal mama hundang ah le official duty ah North Korea phakha ngai hi’n a kigen hi.

Medical officer 247 kila ding
Lamka, May 19 *(Nisin Thuhiltu)* : Manipur Public Service Commission (MPSC) in thusua a bawlna a chun, Health department, Manipur nuai ah Manipur health service Grade IV ah sem ding Medical officer 247 kila ding a hi. Post 247 lak a chun, Unreserved ah post 127, SC 3, ST post 82, OBC M 22, OBC MP 11 leh OBC TNB post 2 a um a, differently-abled persons (DAP) te a ding ah post 7 reserved a hi. Titna nei lunglutna nei te’n Manipur Public Service Commission (MPSC) official website www.empsconline.gov.in ah thuchian kimzaw etthei ding a hi. Chuleh, 21st May 2018 a pat 4th June 2018 sung ah online ah apply bawl ngai ding, SC/ST te'n online ah fee 250 a piak uh ngai ding, Gen. te'n Rs 500 a piak uh ngai ding leh differently-abled persons (DAP) te ding ah fees umlo ding a hi.

Training te’n field visit bawl

Lamka, May 19 *(Nisin Thuhiltu)* : Manipur state solkal thupiak dungzui ah state sung ah Teacher zosia’n Diploma in Elementary education a zaw teitei ding uh ti a hi dungzui in, NIOS study centre chuamchuam ah Diploma in Elementary education Course zilte’n tulak in Work Based Activies -I (2017-2019) nuai ah Field visit leh study tour a bawl zing ua, zia chu tawh kitawn in tuni’n Kangvai Hr Sec. School study Centre ah enrollment bawl mi 100 lak ah mi 91 te’n Keibul Lamjao National Park ah Field visit leh study tour nei in, Lamjao National Park (KLNP) banah Karang Island leh Sangai etna a nei ui.

Chura-Sugnu Road siamna chung ah KWU, KSO Sangaikot in kipakthu puang

Lamka, May 19 *(Nisin Thuhiltu)* : Chura-Sugnu Road (kilometre 26 asau) siam hizing chu Kuki Women Union (KWU), Sangaikot Sub-Division leh Kuki Students' Organisation (KSO), Sangaikot Sub-Division te'n etthakna a nei ua, bialtu MLA in lampi siamhawi thak theina ding ah panlakna a neina chung in a kipak thu’u a taklang ui. Phaneineng Baite, President, Kuki Women Union, Sangaikot Sub-Division in a genna a chun, lampi pawimaw mama Chura-Sugnu Road kum 35 sung lam siamhawilo ah a la um, Chief Minister N. Biren Singh leh bialtu MLA Ginsuanhau te panlakna ziak ah siamhawi thak kit ah a um chu kipak mama a hidan gen in, Chief Minister leh MLA Ginsuanhau chung in kipakthu a gen hi. Jamchinlien, President, KSO-Sangaikot Sub-Division in lampi tawh kisai a genna a chun, Chura-sugnu Road siamthak a hi masang ah mass social work tiang bawl ah mipi'n kikawmtuana lampi siamhawi ding gua zing sek maleu chuuk gua zuk hun tak leh gari taithei ngailo hi’n a gen a, kikawmtuana lampi hawilo ziak ah mipi’n haksatna tuk zing sek in a gen hi. Bialtu MLA Ginsuanhau panlakna black topping bawl ding dinmun ah a um chu kipak mama a hidan gen in, quality neitak ah lampi siam a hiding anawp thu a gen hi. Chura-Sugnu road ahileh Ministry of Development of Nort East Region (M/o DONOER) nuai ah Social and Infrastructure Development Fund (SIDF), Rs. 47.96 Crore project ah kisiam a hia, black topping bawl zaw a hitak leh kikawmtuana thawveng chuam mama ding a hi. Chuleh, M/S HVS Construction Patsoi Lamkhai, NC Road in tha 24 sung lampi siamthakna nasep a zawthian ding, first installment ding ah March 31, 2018 ah Rs. 23.98 Crore sanctioned ah um tawh nasepna kipan hi’n a kigen hi.

RGG Football Memoriam 2018 kipan

Lamka, May 19 *(Nisin Thuhiltu)* : CCpur District Sports Association (CDSA) leh Ropiang Foundation Trust (RFT) saina’ tuni sun dak 12:00 in Lamka Football Ground ah Raja Goukhothang Guite Football Memoriam 2018 (RGG Football Memoriam 2018) hawnna a um hi. Zia hun chu, Justice T. Vaiphei, Chairperson, Assam Human Rights Commission; P Doungel IPS, ADG, Prisons/Training, Manipur ; Shyam Lal Poonia IAS DC/CCpur te’n Chief Guest, Guest of Honour leh Functional President hina tawh a uap ui. Chief Guest Justice T. Vaiphei in RGG Football Memoriam 2018 hawnna nei in, CDSA President in Tournament ah kihel ding te oath taking a neisak a, RGG football Memoriam Anthem sakna um in, Chief Guest in Kick off bawl in opening match a kipan hi. RGG Football Memoriam 2018 ah pang ding club te ahiuleh Pool A ah Korte Brothers, Sialchal (NVYC) leh Happy Feet Academy; Pool B ah Lenlai Club, Symropia FC leh SAI recreation club; Pool C ah New Lamka Youth Club (NLYC, Tuiring Youth Organization (TYO) leh Angel's Place FC (APFC); Group D ah Ahsijolneng FC (AFC), FC Zomi Colony (FCZC) leh Unau FC (UFC) ; Group E ah Lamka SC (LSC), FC Zotal (FCZ) leh Senvual FC (SFC); Group F ah Muvanlai Athletics, Zenhang Lamka Youth Club (ZLYC) leh AVOI Football Club; Group G ah Bungmual Youth Club (BYC), Konsham FC leh Anpak FC ; Group H ah Headquarters SC (HSC), United Chikim Federation (UCF) leh ABC - Saidan te a hiu. May 19, 2018 ah opening match um ding a hia, Korte Brothers leh Sialchal FC te kihel ding ahiu. Tournament ah Champion Team in Rs. 2 Lakh sang ding, Runner’s Up in Rs. 1 Lakh leh best performer ban ah kihelna pangkha zosia citation piak hiding a hiu.

Petrol leh Diesel man kal

New Delhi, May 19 *(Nisin Thuhiltu)* : Petrol leh diesel man (prices) 17 paise leh 21 paise per litre ah kalsak in a um kit hi. A chiata ni 19 masang a khan le Petrol leh diesel man (prices) man kalsak in a um hi. Zia chu tawh kitawn in, national capital New Delhi ah diesel per litre ah Rs 66.14 a man a, Petrol ahileh per litre ah Rs 74.80 a tung a hi.

Gospel Music Album thak hawng ding

Lamka, May 19 *(Nisin Thuhiltu)* : EOC Central Choir in Gospel Music Album panina ding ah a siam thak “Thagau Thiangtho Ka Ngai” kiti hawnna May 20,2018 (Pathianni) nitaklam dak 1:00 leh Centre Church, EOC, Biak-inn Hill Town ah um ding a hi. Mimi Khaute, Research Officer, Planing Deptt. Govt of Manipur in album hawnna nei ding, Rev Dr. Kaitinkap Vaiphei, General Director, ECCI in Pathian kiang ah a latna nei ding a hi.

Karnataka Assembly floor test ah BJP'n majority hina sulang zo lo

Bengaluru, May 19 *(Nisin Thuhiltu)* : Karnataka Legislative Assembly elections results puan ah a um nung ah BJP leh Congress-JD(S) kal ah government form ding kichuna nasatak a umzing tawh kitawn in tuni’n Supreme Court thupiak dungzui ah floor test bawl in a um a, BJP’n majority a hidan uh a suklat ding ti himaleh BJP’n majority ahidan uh a suklatzaw lo ziak in, Congress-JD(S) in Karnataka ah government thak siam ta ding a hi. Zia chu tawh kitawn in BJP leader leh Karnataka Chief Minister thak ding ah ni 2 masang ah kitiamna nei B.S. Yeddyurappa in Chief Minister hina a pat in haina lekha a pelut a, floor test um ding kuan ah minute 20 sung thugenna nei in, Assembly hawl a pawtsan hi. Hiatthei khat chu, tuchung Karnataka Legislative Assembly elections ah Bharatiya Janata Party (BJP) in single largest party hina tawh seat 104 a lua a, Congress in seat 78, Janata Dal (Secular)/JD(S) in seat 37, JD(S) ally BSP in seat 1 leh Independent leh party dang (others) te’n seat 2 a lua ui. BJP chu single largest party himaleh government form theina ding ah seat bithiak 112/113 tiang lua zo lo a suak a, government a form theina ding ah MLA 7/8 support pawimawbe a hi. Congress leh JD(S) leh party dang te pangkhawm ah seat 116 lua a hidan uh taklang kawm ah coalition government form ding dawl hiu ah a taklat uh himaleh Karnataka Governor Vajubhai Vala in BJP Chief Ministerial Candidate B. S. Yeddyurappa govt form ding leh ni 15 sung ah floor test ah majority a hidan uh sulang ding ah huntiam a piak a hia himaleh Congress-JD(S) in ni 15 sung hun kipia chu sawttalua leh MLA te chawkdaw theina ding ah Governor in BJP hunsawtpi pia, Supreme Court ah hekna a siam tawh kitawn ah Supreme Court in tuni 19 May 2018, nitak dak 4:00 ah floor test bawl ding ah thupiak a bawl a hi. Congress President Rahul Gandhi in press conference ah a thugenna a chun, Prime Minister Narendra Modi in nekgukna/ corruption dodal ding tangko zing himaleh zalen tak ah MLA chawkna ding ah a party member te panlakna a neisak chu corruption dodal hizawlo ah ama le nekgukna/ corruption chiing a hidan a kilatna hi’n a gen hi. Karnataka government siamna ding tawh kisai buaina um te a pat BJP, Prime Minister Narendra Modi leh party chief Amit Shah banah Rashtriya Swayamsewak Sangh (RSS) in Indian institutions te zabawl ding leh mi khat leh ni’n ut dandan ah Indian institutions um te bawl thei ahilodan a hiatdaw thak ding uh pawimaw in a gen a, Indian institutions te chu a sumbawm (moneybags) sang ah lianzaw a hidan a hiatdaw thak ding uh pawimaw in a gen hi. Opposition te’n kithutuak tak ah BJP chung ah gualzawna a chan uh chu kipak mama leh democracy susia thei ding ah panla te dodalna Congress in opposition party te tawh chiapi zing ding hi’n a gen hi. Karnataka mipi te chung ah kipakthu genkawm in, Bharatiya Janata Party (BJP) chu Rashtriya Swayamsewak Sangh (RSS) in pui dandan ah um hin a gen hi. Chuleh, Karnataka Assembly hall ah majority vote lakna ding ah kikhawp khawmna a um hun ah Nation Anthem a kigit zinglai ah Congress legislator te’n Assembly hall a pawtsan uh chu Nation Anthem za lo hiu ah gen in, demna nasatak in a bawl hi. Karnataka Assembly floor test ah Congress leh JD(S) gualzawna chung a chun, opposition party leader dang, Andhra Pradesh Chief Minister leh Telugu Desam Party chief N Chandrababu Naidu, West Bengal CM leh All India Trinamool Congress chief Mamata Banerjee in, Bahujan Samaj Party chief Mayawati, Samajwadi Party president Akhilesh Yadav te leh opposition leader chuamchuam in “democracy in gualzo” ti’n a gen ui.

Bandh in Ukhrul road ah hindan ngaina subuai
Imphal, May 19 *(Nisin Thuhiltu)* : Sagolmang area apat District Hospital chawndaw ding dawilo ziak ah kiphutdawk JAC te’n dakkal 48 sung genral strike chiapi ding ah a puan uh tuni, 19 May 2018 zingkal dak 5:00 ah kipan in Sagolmang area, Imphal- Ukhrul road in hindan ngaina a chawkbuai hi. Khurai heikhru makhomg area leh mun chuamchuam ah volunteer te’n gari taitua te khak in, mun khenkhat in tyres a hal ua, Khwairambandh Keithel leh business center chuamchuam - Lamlong Kheithel, Khurai assembly constituency ti te ah mipi sumkawl veina a buai hi.

Nagaland ah NPF in govt form ding:
Kohima, May 19 *(Nisin Thuhiltu)* : Karnataka Legislative Assembly elections results puan ah a um nung ah single largest party leh coalition ah government siam ding kichuna nasatak a um nung ah opposition te’n single largest party a hina state chiat ua government form ding phutna a nei uh tawh kitawn in single largest party a hina chung un Nagland ah chief minister lui leh tu ah opposition leader TR Zeliang of Naga People’s Front (NPF) in government a form theina ding ah panlakna nei ding a hidan a taklang hi. Nagaland state Assembly election ah NPF chu seat 60 umna seat 26 lua a hia, himaleh government form sa
k hilo a hi.

'Modi regime' beina ding kipatna a hi: Manipur Cong
Imphal, May 19 *(Nisin Thuhiltu)* : Karnataka ah BJP Chief Minister B S Yeddyurappa in Assembly floor test ah majority a hidan uh a suklatzawlona chung in, Manipur Congress in Modi mapui BJP regime a bei ding kipatna hi’n a gen hi. Manipur Pradesh Congress Committee (MPCC), President T N Haokip in Karanataka assembly buaina chu Modi Regime beina ding kipatna a hidan taklang in, BJP Chief Minister B S Yeddyurappa chu awimawlo himaleu New Delhi ah boss lian pani Narendra Modi leh Amit Shah nasep thilbawl gu nekha pang hi’n a gen hi. Karnataka ah BJP Chief Minister B S Yeddyurappa in hapta khat sung majority prove bawlna ding a dawt himaleh Governor in ni 15 sung hun a piak chu nuizat umtak hi’n le a gen a, Constitution of India enzui ding leh vengbit ding ah Supreme court um a hidan a gen hi. Manipur, Goa, Meghalaya leh Nagaland ah central government agent (governor) te’n single largest party te’n govt a form ding ua dawisakna a piaklo himaleh government in thakhat thu "U" turn bawl ah Karnataka ah largest single party in government a form ding ti ah panlakna a nei uh chu zachat umtak hi’n a gen hi.

Manipur fake encounter thu ah SC in Defence Ministry thiamlo chan

New Delhi, May 19 *(Nisin Thuhiltu)* : Manipur ah army, Assam Rifles leh police te’n extra-judicial killings leh fake encounter a chiapinau tawh kisai khualna nei, Central Bureau of Investigation’s Special Investigation Team (SIT) in dawnhuna peding ah Ministry of Defence kiang ah lekha a piaklut limsak ah a umlona chung in Supreme Court in Ministry of Defence chung ah a lung awilo thu a sulang hi. Justices Madan B. Lokur leh U.U. Lalit mapui SC bench in National Human Rights Commission (NHRC), judicial inquiries tawh kisai ah SIT in 30 June 2018 ah case khualna a zaw ding pawimaw hi’n a gen hi. Additional Solicitor General (ASG) Maninder Singh in CBI kiang ah Ministry of Defence ah thil umdan tut hiding leh Ministry of Defence in thil umdan a genchian ding ti himaleh Ministry of Defence a pat dawnhuna bangma um nailo ti a hi.

Page 1 of 25