Hornbill News

User Rating: 0 / 5

Star InactiveStar InactiveStar InactiveStar InactiveStar Inactive

Global Iodine Deficiency Disorders Prevention Day mang

Lamka, Oct. 27 *(Nisin Thuhiltu)* : National Health Mission - District Health Society (NHM/ DHS), Churachandpur saina ah tuni, October 27, 2017 sunma dak 11:30 in CMO Conference Hall, CMO Complex ah Global Iodine Deficiency Disorders Prevention Day matna um in zia hun chu Shyam Lal Poonia, IAS, Deputy Commissioner/ Chairman, NHM/ DHS Churachandpur in Chief Guest hina tawh a uap a, T. Paukhanlian, Executive Member, ADC, Churachandpur in Functional President, Dr. Kimngaihching Simte, CMO/ DMD, NHM/ DHS Churachandpur in Guest of Honor leh T. Kammuanlal, CEO, ADC Churachandpur in Special Guest hina tawh a uap hi. Hun matna ah Dr. Tunlalmuan, ENT Surgeon, District Hospital, Churachandpur in National Iodine Deficiency Disorder Control Program (NIDDCP) tawh kisai presentation hun a la, Huaisianvung, DCM, NHM/DHS Churachandpur in chibawm hawitak pawimaw dan lakna nei in khuallian te a pat thugenna hun a um hi. Global Iodine Deficiency Disorders Prevention Day a hileh October 21 ni a matding ti himaleh Manipur ah Government Holiday a hi ziak ah tuni mat a hi.

RKS Governing Body in Dist. Hospital entha

Lamka, Oct. 27 *(Nisin Thuhiltu)* : Rogi Kalyan Samiti (RKS) Governing Body in thupukna alak uh dungzui in Deputy Commissioner, Shyam Lal Poonia, IAS, Chairman, RKS Governing Body, District Hospital, Churachandpur mapuina’n tuni, October 27, 2017 sunma dak 10:00 in District Hospital etthâkna a nei u’i. A chiata October 25, 2017 ni’ RKS Governing Body Meeting hun ah thupukna dungzui ah District Hospital in a taksap leh siam ding um te siam phat ding tawh kisai etthâkna nei ding ti a hia, zia tawh kitawn ah District Hospital etthâkna anei hun ua Medicine Ward tilo ah ward dang cheng a ensuak u’i. Zia hun a chun, Public Water Drinking Facility, Reverse Osmosis (RO) banah Dedicated Syntax khat kawi ding in lemsakna a nei ua, District Family Welfare Officer (DFWO) Office building a lui mama tak banah quality hawilo tak ah kibawl chule PWD a pat Engineer te Safety Assessment bawlsak hi ding in Chairman, Shyam Lal Poonia in a gen hi. District Hospital etthâkna anei hun ua Dr. Kim Simte, CMO Churachandpur, Dr. VC Pau Tonsing, Medical Superintendent leh District Hospital staff hunkhawp te’n a kithuapi ua, RKS Governing Body ah NGO Representative, Pauzagin Tonsing, Holkhomang, Inderpal, Vunglallian Tonsing banah T. Paukhanlian, EM, ADC Churachandpur, T. Kammuanlal, CEO ADC Churachandpur leh Johnny Sharma, MPS, SDPO Churachandpur te’n a zui u’i.

Bus Waiting Shed -cum- YMA Lamka Branch Office phiat ah um

Lamka, Oct. 27 *(Nisin Thuhiltu)* : Autonomous District Council (ADC) Churachandpur in New Bazaar ah Women Market bawlna ding in Bus Waiting Shed -cum- YMA Lamka Branch Office chu tuni, October 27, 2017 zingkal in JCB khat mang in a phiat hi. Waiting Shed -cum- YMA Lamka Branch Office phiatna ding tawh kisai ah a chiata October 16 ni ADC Churachandpur in ni 5 sung ah su-awng ding ah Eviction Notice a sua a hita, tuni zingkal dak 7:30 in Thangboi Gangte, MCS, SDO Churachandpur in sua ah um Eviction Notice chu Waiting Shed-cum-YMA Lamka Branch Office ah tâk in, YMA Lamka Branch Office kam in a chabi T. Kammuanlal, CEO, ADC Churachandpur khut in a pedawk hi. Mawpuakna piak ahi tawh kitawn in Kammuanlal in JCB khat ko in, police venbitna nuai ah Waiting Shed -cum- YMA Lamka Branch Office suksiat in a um hi. Hiatthei khat chu, YMA Lamka Branch in Waiting Shed bawlna ding ah a chiata 1993 kum a khan ADC, Churachandpur a pat phalna a la lak a hia, Branch dawtna gual ah investment bawl ding le phal piak in Shed chung ah Office ding a la sak uh a hi. Eviction Notice sua zaw ah YMA Lamka Branch in phiatlo ding ah dawn in October 21 a pat Sit-in-Protest a la nei ua, phel ding a hi tawp a le zangna dawpna kilawm tawk piak ding ti ah phût maleh hun kipia sung ah Office nutsia hilo in zia tawh kitawn a chun SDO Churachandpur in October 27, 2017 zingkal dak 7:00 ah Eviction Order sem piting ding ah CEO, ADCC kiang ah mawpuakna a piak banah buaina a um ding venna ding ah Superintendent of Police, Churachandpur in Security kiningting pe ding in le a hiatsak hi.

VPC Kangvai Block office hawn hiding
Kangvai, Oct. 27 *(Nisin Thuhiltu)* : Vaiphei Peoples' Council (VPC) Kangvai Block in 28th October 2017 zingkal lam dak 8:00 leh Kangvai Bazar ah Block Office hawnna nei ding a hi. Zia hun chu Thangso Baite, MP (Outer Manipur) in khuallian hina tawh uap ding a hi. Chun, Khatkhotong Baite, President VPC GHQ, Genlal Khaute, Special Contractor, P Kamkholal, EM/ ADCC te'n Functiona President, Guest of Honour, Special Guest hina tawh uap ding a hiu. Zia hun matna chu K Chung, Phaltual leh Nk Ruthi te'n mapui ding a hiu a, Thangso Baite, MP (Outer Manipur) in Office hawng ding leh Rev. S Khaikholam, MPCS in Office latna nei ding a hi.
YVA Laika Mualsau Unit hawng

Kangvai, Oct. 27 *(Nisin Thuhiltu)* : Young Vaiphei Assocation (YVA) Kangvai Block President, K. Chung Vaiphei leh a cabinet member te te mapuina nuai in tuni’n YVA Laika Mualsau Unit hawnna leh 2017 - 2019 sung ah vaipaw ding têlna a um hi. Zia hun matna chu Upa HL Bana in pauchapna tawh hun hawnna a nei a, YVA Kangvai Block President, K. Chung Vaiphei in YVA tup leh nasep dan tangpi puandawna nei in, Unit President leh Secretary ding têlna a nei ui. Zia hun a chun, YVA Laika Mualsau Unit President ding ah Tv. Pauthamuan s/o Upa HL Bana teltin in a um a, Secretary ding ah Tv. Khupkhosoi s/o Zamkholam a teldawk ui. Teldaw ah um te chu YVA Kangvai Block President in kitiamna a neisak a, YVA Flag piakdawna le a nei ngal hi. Unit President leh Secretary ding ah teldaw thak ah um te’n ni 10 sung ah cabinet a form ding uh a hi.
GVI Gualnawp 2017

Guwahati, Oct. 27 *(Nisin Thuhiltu)* : Guwahati Vaiphei Inkuan (GVI) in Don Bosco Cathedral, Pan Bazaar Guwahati ah 28th October 2017, 11 am - 4;00 pm sung ah “Gualnawp 2017” bawl ding a hi. Zia hun chu GK Chin, NEC, Financial Advisor, Shillong Vaiphei Welfare Chairman and Family, Shillong Zillai President Mr Loveson te’n Special Guest hina tawh uap ding a hiu a, Rev Dr JM Pau in thilkhona thucha genna nei ding a hi. Gualnawp hun ah Vaiphei nam lam, Sang sang bok bok ti te suklat hiding, Debate, panel discussion, talent show ti te um ding, laa sa thiam chuam chuam – Nu C Hoiniang, Nu Momoi, Nu Zoneu, Nk Ngilnei, Nk Lemhoi, Tv. Boithang, Nu C Hoiniang, Nk Hoisiam leh Pastor Lempu Suantak te’n laa present bawl ding a hiu.

SSPP Residential School in van-thak hawnna leh latna nei

Lamka, Oct. 27 *(Nisin Thuhiltu)* : Ngathal a um Siamsinpawlpi (SSPP) Residential School ah School Managing Committee saina’n tuni sunnung dak 2 in School campus ah SSPP Residential School in vanthak a nei te hawnna leh latna a nei ua, SSPP Residential School kiphudaw kum, 1998 a pat tuni tiang ah school tawh kisai ah mawpuakna tukha te’n zia hun chu a uap u’i. Van thak te latna nei zaw ah K Khamminthang, Secretary, SMC SSPP-RS mapuina’n puitute’n Audio Visual Classroom cum Auditorium Hall ah kiho khawmna nei in school maban ding genkhawmna a nei u’i.

UKB’n Away match ah HUSO zo kit

Lamka, Oct. 27 *(Nisin Thuhiltu)* : All Manipur Football Association (AMFA) saina’ a chiatha zing Birchandra Maipakpi Memorial 22nd Winners Cup 2017 ah tuni, October 27, 2017 nitaklam dak 1:00 in Chuarchandpur District ah champion United Khawzim Brothers (UKB) leh Senapati District ah Champion Hills United Sports Union (HUSO) in T. Khullen, Senapati District (HUSO home ground) in match a nei ua, UKB in 2-1 in gualzawna a chang hi. UKB in gualzawna a chan zawm tawh kitawn in Aggregate 3-1 ah HUSO zo a suak hi. Zia kihelna a chun, half masang in UKB player Lalcha’n goal 1 khum in kihelna amapui ua, half nung ah HUSO lam in goal 1 khum in goal 1-1 ah kihelna a chiathak zing lai in hun bei ding kuan lam in UKB striker Paulemsiam in goal 1 a khum a, zia chu UKB ding ah gualzawna’ goal in a pang hi. UKB goal khum khat chu off-side ah refree’n a mat ziak in goal ah simlo in a um hi. UKB in Home leh Away ah HUSO zaw tawh kitawn in Winners Cup 2017, Semi - Final lutta a suak a, semi-final match ah YUFC, Ukhrul / KSPC, Kakching /RAU, Imphal East khat penpen 5th November 2017 leh 1st Leg (Away match) ah maitua ding, 8th November 2017 (Home - Leisang Ground) ah 2nd Leg ah maitua kit ding a hi.

Firecrackers kihal puak ziak ah mitamtak imut chawk buai
Lamka, Oct. 27 *(Nisin Thuhiltu)* : Khuga Tampak leh Neihsel Veng kikal ah 27th October zingkal lam dak 4:00 tuam ah Kol te’n "LAIKATPA" tidan ah Boombala (firecrackers) a hal puak ziak un, mitamtak ding ah imutmawna a suak hi. Hun banghem chan Boombala (firecrackers) halpuak ah a um nung in, Churachandpur Police QRT (Quick Response/Reaction Team) khat in a mun del in boombala (firecrackers) halpuakna chu a haisak ui. Zia ah boombala (firecrackers) kihal puak chu mitamtak in meithal git sa’n kikaptuana ahiloleh buaina thil tung hiding ah a muangmaw pawl a um ua, khenkhat in sepai te firing bawl hiding ah muangmaw kawm ah lungthim-thek tak in a um ui. Zia gual thil mipi te supatau thei ding thil te hiatsak lawkna bei ah tunung tuban ah a um kitlo ding pawimaw in a kilang hi.
Headmaster/ Headmistress te’n One Day training nei
Lamka, Oct. 27 *(Nisin Thuhiltu)* : Synod hall, IB Road ah tuni’n District Project Officer (DPO), SSA/ RTE Churachandpur saina ah One Days training program for headmasters/headmistress on Collection of DCF UIDISE & SDMIS 2017-2018 kiti nei ah um in zia hun chu Samulamlan Block, Henglep Block, Singngat Block leh Churachandpur Block sung a ADC leh ZEO nuai ah school tin a pat headmasters/ headmistress te a pang ua, training hun ah RK Krishnakumari Devi, System Analyst, Kaikhanlian Guite, DI Of School, Churachandpur Block, Salam Parsuram Singh, System Analyst leh Yambem Tiken Singh, Data Entry Operator te’n resource person hina tawh uap in ziltilna a piau hi.

Deeper Spiritual Life Convention 2017 kipan

Lamka, Oct. 27 *(Nisin Thuhiltu)* : Evangelical Congregational Church of India (ECCI) saina’n ECCI Headquarter, Nehru Marg ah ‘Ambassador for Christ’ ti thupi ah ni 2 sung um ding, ‘Deeper Spiritual Life Convention 2017’ chu tuni’n a kipan a, Elder Er. Lalthanzam Amo, Chairman, BOT in Convention hawnna a nei hi. Tuni hun matna ah Rev. Dr. HM Songate in ‘The Marks of a Good Ambassador’, Rev Dr Dongza Thawng in ‘Freedom from Generation Iniquity’ banah Rev Dr H.M. Songate in ‘Living the Word through’ ti thupi tawh thugenna hun a mang chiat u’i. Zing, October 28 leh Rev Dr Dongza Thawng in ‘Ten Stage of Church Growth’ Rev Dr H.M. Songate in ‘Commitments to the tasks He entrusted us’ banah Rev Dr Dongza Thawng in ‘A Believer’s Personal Wor-ship’ ti thupi te tawh thugenna nei ding a hiu a, Rev Dr Jangkholam, Chairman Mission Board, ECCI in ‘Deeper Spiritual Life Convention 2017’ khakna nei ding a hi.

National Football Tournament a pang ding te kipandawk

Lamka, Oct. 27 *(Nisin Thuhiltu)* : 48th National Football Tournament kihel ding Kendriya Vidyalaya, Churachandpur ah Under 19 Football Team te tuni, October 27, 2017 in Lamka nusia in kipan dawk ua, Lekhraj Meena, Principal in thâkdawna a nei hi. Tournament ahileh zing, October 28, 2017 leh Orissa khawpi Bubaneswar ah kipan ding a hia, zia na’ pang ding ah Kendriya Vidyalaya, Churachandpur a pat student 13 a kuan u’i. Thudang khat ah, Kendriya Vidyalaya, Churachandpur a pat Aakriti Tiwary in a 5-veina Korea-India Friendship essay competition ah All India Junior kitetna a chun top 10 a tungphak tawh kitawn in Korean Embassy a pat Certificate of Honor a sâng hi.

Bangalore ah Manipur numei 3 hukdaw ah um
Imphal, Oct. 27 *(Nisin Thuhiltu)* : Manipur Police in Karnataka Police leh Manipur Women Helpline kithuapina tawh Manipur numei pathum human traffickers te a pat in a hukdawk hi. Hukdaw ah um numei 3 te chu Senapati 1, Churchandpur district 2 a hi. Numei 3 te chu Beauty Parlor ah beauticians sepna piak ding ah puidaw ah um a hiu a, himaleh a mun a tun tak ua zuauthep a hidan uh a hiatdaw uh a hi. Zia nung a chu
Manipur Women Helpline kiang ah thil umdan tut ah a um tawh kitawn a Manipur Police in khualna a nei a hia, Karnataka Police kithuapina hukdaw thei ah um a hiu.

State Cabinet in ni 365 sung ah sep leh bawl ding genkhawmna nei

Imphal, Oct. 27 *(Nisin Thuhiltu)* : Chief Minister N. Biren Singh chairman hina nuai ah tuni’n State Cabinet in ni 365 sung ah state government thak in a sep leh bawl ding te genkhawmna a nei hi. Zia hun a chun, State Government in ni 365 sung ah sector chuamchuam - Health & Family Welfare, Information Technology, Science & Technology, Agriculture, Horticulture, Transport, Public Works Department, Home, Art and Culture, Public Health Engineering Department, Finance Department, Power, Tourism, Rural Development & Panchayati Raj, Education, Planning, Social Welfare, MAHUD, Minorities and Backward Classes etc nuai ah developmental works /activity 161 chiapi list a siamdawk hi. Developmental works /activity 161 list siam ah um chu ni 365 sung ah seppitin vek ding, nasepna leh panlakna bangkim chu Minister leh Administrative Secretary level ah etzui ding, overall ah Planning Department leh Chief Minister’s Office in nasepna leh panlakna a etzui ding in lemsakna a nei hi.

Chief Minister in a kisaipi Minister leh Departments te chu developmental works chiapi ah um te a huntak ah zawthian a hitheina ding ah panla chiat ding in thupiak a nei a, Ministers te chu a mun tak ah thil umdan enzui leh entha zing ding in a hiatsak hi.

Langol, Imphal ah a chiata 2nd March, 2017 ni Leishiyo Keishing chenna inn ah bomb a puak ziak ah a nei leh go hun tiang a siatna chung ah compensation Rs. 1,41,690 piak ding in le Cabinet in lemsakna a nei a, Manipur Police Housing Corporation Limited nuai ah Superintending Engineer (Civil) post 2 siamdaw ding le approve a bawl hi.

Chun, Manipur Building and Other Construction Workers’ Welfare Board, Manipur chu Labour Cess 1% refund bawl ding in l lemsakna a nei a, PHED nuai ah Integrated Water Supply Project for Imphal Planning Area ah restricted tender ah chiapi thei ding in le phalna a pia, zia nuai a chu Koirengei, Sangakpham, Khuman Lampak, Porompat, Canchipur, Iroisemba, Singda, Kangchup, Kangchup Extension leh Iroisemba Reservoir ah water supply project pat ding in lemsakna a nei hi.

CM mapuina’ Old Aged Pensions doorstep delivery tawh kisai genkhawm
Imphal, Oct. 27 *(Nisin Thuhiltu)* : Manipur CChief Minister N. Biren Singh in tuni’n Old Aged Pensions doorstep delivery leh banking arrangement tawh kisai in a kisaipi thuneitu te review meeting a neipi hi. Zia hun a chun Old Aged Pensioner te umna tawh bank umna 15km ah sang ah kigamla lo te ding ah bank branch in Ru-Pay cards issue a bawl ding in lemsakna a nei ua, Banks leh Social Welfare Department in Ru-Pay cards delivery tawh kisai ah mawpuakna a lak ding in lemsakna a nei ui. Pensioner te a umnau tawh kinai ah bank branch /Banking Correspondents/Common Service Centres (CSCs)/Customer Service Points (CSPs) a umlo leh amau te ding a chu Social Welfare Department in doorstep delivery a bawl ding, 15th November 2017 tiang ah Social Welfare Department in Ru-Pay cards leh delivery arrangements a zawthian ding in lemsakna a nei bawk ui. Zia review Meeting chu, Parliamentary Secretary Awangbow Newmai, Chief Secretary R.R. Rashmi, Principal Secretary (Planning) Vineet Joshi, Principal Secretary (Finance) Vivek Kumar Dewangan, Commisionner (Social Welfare) H. Deleep Singh, Director (Social Welfare) Jacintha Lazarus, Additional Director (IT) N. Debenand leh banks official te’n a uap ui.
Numei te panlakna society’n a hiatpi pawimaw: CM

Imphal, Oct. 27 *(Nisin Thuhiltu)* : State Level Committee on Beti Bachao Beti Padhao leh State Social Welfare Department organize bawlna’ tuni’n DM College Multipurpose Hall ah Beti Bachao - Beti Padhao Spot Painting Competition of Imphal West a um hi. Zia hun chu Chief Minister N. Biren Singh in khuallian hina tawh a uap hi. Ama’n a thugenna a chun, society in numei te panlakna a hiatpi ding pawimaw a hidan taklang kawm in State Government in BPL family te a ding ah welfare scheme thak khat hawnbe ding ah guanggalna nei in a gen hi. Zia scheme thak chu November 4 leh Chandel a phak hun ah hawng ding hin le a puang a, numei te’n society a ding ah contribution nei hawi mama in a gen hi. Himaleh, Manipuri society ah numei te kawi niamna tuni tiang ah bei nailo hin a gen a, government thak in meithai te a ngai khawk mama na chung ah meithai te a ding ah social security leh welfare schemes chuam chuam chiapi hin a gen hi. Zia hun matna chu Social Welfare Minister Nemcha Kipgen in functional president hina tawh a uap a, ama’n a thugenna a chun, state mipi te Child Sex Ratio siamhawina ding ah thutiam bawl ah panla chiat ding in chialna a bawl a, Manipur numei te hangsandan, skill leh active tak ah social, economic, political leh cultural activity te ah pan a lak dan uh chu khawvel pumpi hiat hin a taklang hi.
Zia hun matna chu Rajya Sabha MP Ksh. Bhabananda, Commissioner (Social Welfare, YAS & Higher Education) H. Deleep and Social Welfare Director Jacintha Lazarus ten Guests of Honour hina tawh a uap ui.

PMEGP tawh kisai review meeting nei

Imphal, Oct. 27 *(Nisin Thuhiltu)* : Manipur Textile,Commerce & Industry Minister Thongam Biswajit Singh in tuni’n Pradhan Mantri Employment Generation Programme (PMEGP) tawh kisai in a kisaipi thuneitu te review meeting a neipi hi. Zia hun a chun, Minister Biswajit in applicant tamtak ten scheme guidelines a zui diklo ziak ua bank te’n a bank loan dawt uh a pawm piak nuam seklo uh chu ngaikhawk mama in a gen a, a kisaipi official te chu applicant te ding ah awareness leh training campaign bawl ding in chialna a bawl hi. Chun, applicants te chu a loan lak uh ditkitlo ah kawi thei ding ah lungggel neilo ding in chialna a bawl bawk hi. PMEGP chu MSME lawtinna ding ah thil pawimaw mama a hin a gen a, a kitup thei ding pen ah chiapi (implement) bawl ding pawimaw a hidan taklang in, entrepreneur te tawsawttu leh sepna belap tawh PMEGP a pan ding pawimaw in a gen hi. Chuleh, bank te chu a haksatnau government kiang tut ding in a hiatsak a, zia a pat chu a buainau sukven hiding in a gen hi. Principal Secretary P. Vaiphei in a genna a chun, PMEGP chu thiangtho tak ah chiapi ding pawimaw in a gen a, DC khenkhat in scheme kituptak ah a chiapi dan uh taklang kawm in DC te chu tusang ah a hawizaw panla ding in a chial hi.
Meeting chu, Principal Secretary Textile, Commerce & Industry P. Vaiphei banah Deputy Commissioners, General Managers of District Industry Centres, banks chuam chuam ah official te, Khadi Village Industry Board leh Khadi Village Industry Centre official te’n a uap ui.

Socio-Economic Advisory Committee meeting

Imphal, Oct. 27 *(Nisin Thuhiltu)* : Textiles, Commerce & Industry Minister Thongam Biswajit Singh in tuni’n a khatveina ding in Manipur State Industrial Development and Socio-Economic Advisory Committee member te ama office in meeting a neipi hi. Zia hun a chun, Advisory Committee in draft a bawl Manipur Industrial and Investment Policy ding chu etkhawmna a nei ua, state sung ah chatgana sukbeina ding ah panlak ding dan tawh kisai a genkhawm ui. Principal Secretary Textiles, Commerce and Industry P. Vaiphei in member leh expert te chu North East Industrial and Investment Policy chung ah ngaidan leh dawidan peding in chialna a bawl hi. Manipur State Industrial Development and Socio-Economic Advisory Committee ahileh Chairman ah Minister (Textiles, Commerce &Industry) pansak a hia, member 17 nei, Joint Secretary Textiles, Commerce & Industry Laltanpuii Vanchhongis chu Committee convenor a hi.

Oct. 28 ah All Political Party Meeting um ding:CM
Imphal, Oct. 27 *(Nisin Thuhiltu)* : Manipur Chief Minister N. Biren Singh in 28th October 2017, 4:00 PM leh CM’s Secretariat ah all-political party meeting um ding hin a taklang a, Manipur territorial integrity susia thei ding thil te dodal khawm ding dan genkhawm hiding in a gen hi. All-political party meeting thupukna dungzui ah all-political party delegate te’n New Delhi ah Central leaders te kiang ah thil umdan tut ding uh hin le a gen hi. Union Home Minister Rajnath Singh in Assam’s territorial boundary sukkhak hilo ding ah Assam Chief Minister Sarbanand Sonowal thutiam a bawlna tawh kisai ah dawtna a dawnhuna a chun, N. Biren in Prime Minister Narendra Modi, Home Minister Rajnath Singh leh BJP National president Amit Shah in zia gual thutiam chu Manipur le Assembly election hun ah bawl in a taklang a, tu ah Union Government leadership chu muang mama hin a gen hi. Himaleh banghem ti ah muanmaw thei thil a um leh State Government in direct ah Central Government kiang ah thil umdan tut ding hin a gen hi.

11th Indo-Myanmar Regional Border Committee Meet

Imphal, Oct. 27 *(Nisin Thuhiltu)* : India leh Myanmar Army te’n Spear Corps of Indian Army mapuina nuai ah Mantripukhri, Imphal ah ni 3 sung (25th -27th Oct. 2017) 11th Indo-Myanmar Regional Border Committee Meet a nei uh chu tuni’n a zo thiang ui. Zia meeting chu Myanmar Army leh Civil departments official member 18 ten a uap ua, border management, bi-lateral cooperation leh terrorism thil ah panlak khawm ding dan genkhawmna nei in, maban ah gam 2 in border security sukhat ding leh panlak khawm zing ding in lemsakna a nei ui. Indian delegation te chu Lietenenat General Anil Chauhan, AVSM, SM, VSM, GOC Spear Corps in amapui a, Myanmar delegation te a hiuleh Maj Gen Phone Myat, Commander, North West Command in amapui hi

User Rating: 0 / 5

Star InactiveStar InactiveStar InactiveStar InactiveStar Inactive

hornbill news logo*SSPP in Walk for Health Nei
*Bungmual EBCC Saptuam 3 in Khotang Siatna Awlmawh in Thumna Nei
*Lalpa Damna Ministry Pawl in Lampi Zuihna Nei
*ZEO in School Omna Gam Patta Xerox Copy Submit Ding in Theisak
*ZYA in Rev Dr Chin Do Kham Sunna Hun Zang
*CDSA Saina in (L) T. Doulenmang Haokip Memorial District 3rd Division League 2013 Kipan
*Seminar on Participation of Youth as Co-Operative Workers will enhance The Co-operative Movement Om Ding
*MLS in Golden Jubilee Lawm Ding
*MEV Nute'n Kipahthu Gen

Tanchin Kimzaw:
***Siamsinpawlpi Residential School, Ngathal in tuzingkal dak 6:00 in a Walk for Health chih thupi anei in lampi zuihna nei uhi. Tuzingkal a lampi zuihna hun ah N. Ginzamung Asst Commandant STC BSF in khuallian hihna toh uap a, Rev T.Lalzagin, Area Pastor EBC in thumna in student te khahkhia hi. SSPP residential School apan Ngathal Road zui in Jamsuan Road-Awnsuak Road, Dorcas Road zui in Marian street ah pawtkhia in Tipaimukh Road zui uhi.Tipaimukh Road apan Police Station mai ah Tedim Road ah pai uh a, Tedim Road apan SSPP Residential School ah lutnawn in zou uhi.

***EBCC Bungmual, EBCC Bethany, Bungmual leh EBCC New Lane, Bungmual a numei pawl in tuni sunma dak 10:00 in EBCC New Lane, Bungmual ah khotang siatna toh kisai in thumkhawmna nei uhi. Tuni a thumkhawmna neihna hun ah Nu Chingngaihlun in Pathian thugenna nei in thum khawmna makaih hi. Hiai hun ah Bungmual khosunga saptuam 3 omte apan nunmei tamtak tel uhi.

***Lalpa Damna Ministry pawl in tukha bul apan kholai leh mun tuamtuam ah Pathian thugenna hun zang zel ua, huai toh kiton in tuni in sunma dak 11:30 in Tribal Museum Hill Town akipan Forest Gate Tuibuang kikal tan lampi zuihna nei uhi.Lalpa Damna Ministry pawl in Biak khawmna aneihna uah, Vanlalrengpui in Pathian thugenna hun zang zel hi.

***Apaisa September 23, 2013 a Directorate of Education (S) in thusuah abawl dungzui in Joseph Lalrothang ZEO/CCpur in zan in ZEO/CCpur nuai a Government School a Headmaster leh Headmistress-te kiang a theihsakna abawl dungzui in school Headmaster leh headmistress teng in mahni school omna gam patta xerox copy bawl chiat ding leh akintheilam a, ZEO/CCpur office submi chiat ding in theisak hi. Gam patta copy ZEO/CCpur kianga Submit zoh ahih chiang in ZEO/CCpur in Directorate of Education (S) Imphal ah submit nawn ding hi.

***Tuzingkal dak 7:30 in Zomi Youth Association Central Executive Committee te'n Zomi Administrative Office Nehru Marg ah meeting nei ua, tua ah ZYA Cabinet in anasep khiakte uh report na leh pomkipna aneih ban uah, Rev. Dr. Chin Do Kham suunna hun leng nei uhi. ZYA in 3rd World Zomi Convention omding tawh kisai in zingchiang hall bawlna van kaikhawm ding ua, October 17, 2013 apan hall bawl pan ding uh hidan in gen khawm uhi.

***CCpur District Sport Association saina in (L) T. Doulenmang Haokip Memorial District 3rd Division League 2013 tuni sunnung dak 1:00 in Lamka Public Ground ah opening ceremony neih in om hi. Tuni a hiai hun zatna ah Michael Ginzasuan DSO/CCpur in chief hihna toh uap a, T. Awnchinkap chief of Awnchinkap Veng in guest of honour hihna toh uap a, H. Samson MLA representative Tipaimukh A/C, Kapboi Vaiphei MLA representative Henglep A/C, H. Khamsonmuan MLA representative Singngat A/C Goulal Naulak MLA representative Thanlon A/C, Kamlemthang Zou, MLA representative Sangaikot Block te'nspecial invitees hihna toh uap uhi. Tuni a hiai hun zatna a chief guest in a thugenna ah tupna kichian neih a kimawl ding leh huai dinga lunglutna taktak toh kimawl le uh chin khovel theih phak tan leng tun theih ahih dan gen a, tua ban ah football kimawlna khen tuam bang mah neilou a chih game kichi in leng kha (spirit) nei a, huai game spirit toh kimawl poimoh ahihdan gen hi. (L) T. Dolemmang Haokip Memorial District 3rd Division League 2013 ah club 65 kihel ua, pool 15 a khen in om ua, pool khat team 5 zel om hi. CDSA makai lam apan thutut kingah dan in Lamka Public Ground mun a The 3rd World Zomi Conference om ding ziak in zingchiang apan kimawlna Peace Ground Tuibuang ah nei ding uh hidan in gen uhi.

***The Manipur State Co-Operative Union, Co-Operative Complex Imphal saina leh National Co-Operative Society of India leh Manipur State Co-Operative Union te sponsore na in zingchiang sunma dak 11:00 in B. Vengnom Community Hall ah Participation of Youth as Co-Operative Workers will enhance the Co-operative Movement chih thupi aneih in seminar om ding hi. Seminar ahih leh zingchiang sunma dak 11:00 in hon khiakna programme om dinga, tua ah T. Haokip MLA Saikot, L. Tompishak Singh, President Manipur State Co-operative Union, Kaikhankap District Co-Operative Officer, CCpur, Demmang Haokip Vice Chairman ADC/CCpur, leh Jamkhosei Baite (Retd) District Co-Operative Officer te'n chief guest, functional president leh guest of honour hihna toh uap ding uhi. Seminar Programme hon zoh sunnung dak 1:30 in technical session om dinga, tua ah Kh. Tomba Singh DCO Y. Ningthem Singh leh K. Joychandra Singh te resoure person apang in sinsakna peding uhi.

***Zingchiang, October 16, 2013 in Mizo Literature Society, Manipur in kiphuhkhiak nung kum sawm nga chinnna Golden Jubilee lopna, Synod Compound, IB Road ah zinglam dak 10.00 apan in nei ding hi. Hiai hun ah Chief Guest in Pu Lungmuana IAS, Commissioner pang ding a, Jubilee' Pa in Pu H Darkhuma pang ding hi'n S Zothanga, Secretary, MLS Information and Public Relation apan in thutut kingah hi.

***Mission Road-Eden Huan-Vengnuam, MEV Nute zat ding in The Lamka Post editor Pu Th Thangzalian in receipt book 12 athawn liuliau a a piak ziak in MEV Nute kipak mahmah ua, news tungtawn in kipahthu gen uhi.

Gamdang Tanchin:
***Human Rights group, Amnesty International in Nigerian suangkul ah mi za tamtak thah aom uh ahihdan chetna nei uh hi'n puang uhi. Amnesty International thusuak in a gendan in, Nigerian sepaihte'n Islamic helpawl Boko Haram-te tung ah June kha apan beihpi a suah nung uh Nigerian suangkulte ah kithahna leh misi pung mahmah hi. Army commander khat in Amnesty kiang ah a hilhdan in, Boko Haram helpawlte tawh kizopna nei mi 950 vel suangkul sung ah nek-le-dawn ding piaklouh ziak a si hiam , ahihkeileh thah hiam in om uhi.

***Islam sakhua a ding a poimawh mahmah Eid festival zatna leitung mun tuamtuam a Muslim-te'n a neihlai un, Afghanistan a Logar province ah Eid tawh kisai a biakbuk ah thumna nei a Islam gingtute aom lai un, helpawlte'n biakbuk sung a IED bomb a kam uh puakzak a, misi 16 lak ah Logar Province governor Arsala Jamal leng tel hi. Afghanistan ah tuni in Eid lopna kipan a, Logar Province governor leng eid thumna nei a biakbuk sung aom midangte kiang ah thugenna a neihlai tak a IED bomb puakzak hi'n kigen a, midang 15 val in leng liamna tuak uh hi'n kigen a, mi tamtak in Taliban helpawlte sulnung hiding in muangmawh mahle uh, Taliban in amau sulnung ahih leh hihlouh bangmah puanglou hi.

***Philippines gam Cebu leh Bohol Island zinling, tehna a 7.2 magnitude a hat in nuai a, atawmpen in mi 32 si ua, midang hunkhop in liamna tuak ua, inn tamtak kisia hi. Zinling bel Bohol tuikulh gam aom Carmen town a leinuai kilometres 56 a kipan hi'n kigen hi. Hutkhiakna leh panpihna nasep pai lel hi. Philippines zinling ah skul tamtak leng kisai hi'n kigen a, himahleh tuni Philippines ah skul-te suty ni ahihman in, skul naupang si leh liam kuamah omlou hi'n kigen hi.

***Myanmar khopi Yangon aom hotel minthang leh changkang mahmah khat ah bomb khat puakzak a, hotel a tung American numei khat in liamna tuak hi'n kigen hi. Kuate sulnung hiam chih theihlouh in Myanmar gamsung mun tuamtuam ah ni bangzah hiam kizom in bomb ana puakzak a, mi 2 si in midang bangzah hiam in liamna ana tuak uhi.

***Iran nuclear programme thubuai tawh kisai Iran palaite leh world power gam 6 makaite'n ni 2 sung Geneva ah closed door kihouna leh genkhawmna tuni'n kipan hi. Iranian nuclear programme thubuai tawh kihouna ding ah lam-etna sang mahmah a, himahleh masawnna thupilua bel piang ding in gintak huai nailou hi. Iran in tuni tan a nuclear programme ana delhzui pen peaceful nuclear programme, galvan bawlkhiakna ding hilou hi'n pang mahleh, gam tamzaw in hiai pen Iran in nuclear galvan a bawlkhiakna ding a paulam a zat hiding in muangmawh veve uhi. Iran in nuclear energy/power neih ding tuh a rights uh hi'n gen ua, himahleh Tumlam gamte economic sanctions khauh mahmahte ziak in Iranian economy in siatna thupitak tuak a, haksatna leh buaina apan a Iran suahtaksakna ding ngimna in Iranian President Hassan Rouhani in Iranian nuclear programme thubuai tawh kisai Tumlam gamte tawh genkhawm a, kihouna neih ding in thusun bawl hi. Israeli Prime Minister Benjamin netanyahu in bel Iran tung ah nawhna hatsak sem a deih thu gen a, Iran nuclear programme a lauhuai dan gen nawn hi. Israeli Prime Minister in, tu-le-tu a Iran tung ah sanctions omte khahkol leh lakkhiak hun hinailou ahihdan gen in, Iran in nuclear galvan ahi a delhzui tinten chi'n pang hi. Iranian President thak Hassan Rouhani in, khovel gam hat leh liante'n Iran tung a sanctions tuamtuam a koihte uh khahkol ding leh lakkhiak ding deihna in Tumlam gamte tawh Iran nuclear programme tawh kisai genkhawm a, kitheihsiamna bawl ut ahihdan a gen nung in, US in leng tua pen bawhzui a, himahleh Israel in bel Iran gingta tuanlou ahihman in, US leh ISrael kal a kizopna in siatlam ma-nawh ngal hi. Iran in tukum a president thak a neih nung in Iranian nuclear programme tawh policy tawh kisai kikhekna khenkhat muh theih in kilang ngal a, Iranian President lui Ahmadinejad leh Hassan Rouhani in Iran nuclear programme tawh kisai a policy a zuih uh kibanglou ngal hi. Himahleh Israeli Prime Minister Benjamin Netanyahu in Iranian President thak Hassan Rouhani leng gingta tuanlou in, Iranian nuclear programme tawh kisai a Hassan Rouhani leh Ahmadinejad kibatlouhna bel, Ahmadinejad tuh ngia, ngia' vun silh ahi a, Hassan Rouhani bel ngia, belam' vun silh ahi chi'n UN General Assembly ah tuma in ana genta hi.

***US in hel 'wanted' a puangkhumte lak a lauhuai mahmah khat hi a kigen Abu Anas Al Liby nipikal lui in Libya gam khopi Tripoli ah US Special Forces-te'n va mankhia ua, tuni'n New York court ah ding ding hi. Abu Anas Al Liby bel 1998 a Kenya leh Tanzania a US Embassy beihna a kigolh dia muangmawh ahi.

***Somali Pirate Group makai khat police-te'n mat ding a a zon nilouh uh matkhiak in om khongta hi. Somali pirate makai Mohammed Abdi Hassan bel kum li paisa a belgium longpi khat tuipi tung ah hijack-na tawh kisai a mat ding a police-te'n a delhzui uh ahi. Police-te'n thangkam in, Mohammed Abdi Hassan leh pirate midang khat kiang ah piracy tawh kisai a TV Documentary khat ah pang ding in zol ua, pirate mi nihte leng Belgium khopi Brussels a tung uh tawh kiton in, a gintaklouh dantak un mat in om hiau ua, TV ah bel kilang veve uhi.

***Suangmeihol laihsuahna ding tawh kisai a coal block hawmzakna a thubuai, coal scam ah suizuitu CBI in India a mi tallang leh min thang mahmah mi nih tung ah FIR bulh behlap nawn uhi. FIR gelhkhum thak aomte bel Aditya Birla Group apan Kumar Mangalam leh Hindalco & Coal Secretary lui PC Parakh-te hi uhi. Amaute tung ah CBI in zuau a mi khemna, lai poimawh bawltawmna leh sum zat thelthangna thubuaite bulhkhum uh hi'n kigen hi. FIR ah kigelh dan in, coal block ngah theihna ding in Hindalco in pomawh khenkhat fulfilled lou a, hinapi'n coal block tang veve hi.

***Madhya Pradesh state a temple town minthang mahmah Ratangarh a Sindh luipi tunga lei a zuihlai ua mipi patauhna leh taizakna ziak a mi 115 totlup leh siklup a aom nung un Madhya Pradesh BJP solkal in Datia Disrict collector, Sub-divisional Magistrate, SP leh policemen 17 a sepna ua apan in khawlsak hi. Hiai lei a kichiplai tak in a tung ah mi sang sawmnih-le-nga a pai uh hi'n Madhya Pradesh police thusuak in gen hi.

***Ayodhya, Uttar Pradesh ah Ram Temple bawlthakna ding tawh kisai in thubuai tamkhop piang a, Ram Temple bawlthakna ding tawh kisai a laithon khak ziak in Uttar Pradesh a Samajwadi Party solkal in UP Principal Secretary (Home) RM Srivastava suankhia nawn hi. Somnath Temple tawh kibang a Ayodhya ah Ram Temple bawlkhiak nawnna ding tawh kisai a IAS officer, UP Home Secretary SC Mishra in meeting a sap ziak in Pathianni in a sepna apan in khawlsak in ana om hi. Tuabangkal ah, Ayodhya a Ram Temple bawlkhiak nawnna ding a legislation bawlkhiak ding phutna ding a VHP in October 18 a Sankalp Diwas neih a sawm pen leng UP solkal in phallou in, 'ban' puankhum hi. Hiai ban puankhumna pen a lohchinna ding a police-te'n kisakkholhna bangkim feltak a neita uh ahihdan UP police thusuak in gen hi.

***Tuni zingsang in Assam gamsung ah, Dibrugarh apan Delhi kal a tai Rajdhani Express a pantry car ah meikuang kipan a, sawtlou sung in bogies dang khenkhat leng meikuang in peh a himahleh lamdangtak in sihna leh liamna tuak kuamah omlou hi'n kigen a, Ist AC coach ah van khenkhat bel kaang man zek hi'n kigen hi. Dakkal nih nung in meikuang phelhmit zawh in om a, hiai lampi zui a tai train dangte leng dakkal thum sung dinkhawlsak in om ua, zingsang dak 8.00 vel in train service dangte sutzop theih in om nawn hi.

User Rating: 0 / 5

Star InactiveStar InactiveStar InactiveStar InactiveStar Inactive

hornbill news logo*YPA GHQ in School leh College-te Vehna Sunzom
*National Food Security Ordinance 2013 Beneficiaries-te a Ding in Form Hawmkhiakna Kipan
*CMO in Singnngat PHC Vehna Nei
*District Level Committee on RGGVY Meeting Om Ding
*Vodafone Post Paid Mini-Store Honkhiakna Neih in Om

TANCHIN KIMZAW:
***Young Paite Association (YPA) GHQ in khopi sung leh pua aom school leh College tuamtuam a thuneitute kiang ah student numeite nik singlua leh pasalte khekol kuawng tuallua banah khekol gong tight luate enkai ding in school leh college a thuneite kiang ah apaisa July 13, 2013 in theihsakna abawl uh August 1, 2013 apan in hunpiak hunsung a beitoh kiton in school tuamtuamte panlak dante August 2, 2013 apan etkhiakna nei uhi. YPA GHQ makaite apan thu kiza dan in khopi sung ah private leh government school leh college 34-te etkhiak hiding a, tuni in leng YPA GHQ makaite'n school tuamtuam etkhiakna nei nawn ua, tuni tan in school leh college tuamtuam 26 etkhiakna nei khinta uhi. Maban ah leng sunzom zellai ding uh hidan in gen uhi. Tuni a YPA GHQ makaite'n school tuamtuam etkhiakna aneihna hun ua, S. Chinngaihpau President YPA GHQ in school naupangte kiang ah thuhilhna leh hasotna thugen a, aman a thugenna ah christian innkuan a kipan ngen ihi ua, tuaziak in school kaina leh laisimna ah christian hinkhua toh omkhawm poimoh mahmah ahi chi a, kholai a student niksing lua leh khekol tuallua banah khekol gong tight lua khong muh ahih chiang in et-hak mahmah ahihziak in maban ah leng tua dan a zuitou den ding in student te kiang ah ngen a, tua ban ah student te'n YPA GHQ makai te thupiak zahtak tak a zuih ziak un student te tung ah kipah thugen hi. Aban a gen behna ah noute maban hun hong paizel ding ah nuleh pa ding, khotang leh gamsung mai ding, saptuam makai ding leh offcier lian taktak hiding te na hi uh chi kawm in hun hong paizel ding ah laisim nakzaw sem apang ding leng student te kiang ah ngetna bawl hi.

***National Food Security Ordinance 2013 tungtawn a veng tuamtuam a household beneficiaries te ading in form hawm khiakna Sub-Division tuamtuam ah neih in om lel hi. CCpur Sub-Division sunga Veng tuamtuam te a ding in SDO/CCpur Office ah National Food Security Ordinance 2013 Hosuehold Beneficiaries form hawmkhiakna neih in om lel hi. Hiai form fill-up a submit nawn theihna ding in income certificate leh domicile poimoh ahih man in mi tamtak in SDO/CCpur office ah sum 20 apan 40 kikal seng in la uhi. Certificate late laka mi khat in a genna ah income certificate leh tribe certificate lakna ding in sum 40 piak ngai a, tua banah verified bawlna ding in Rs10 piak beh angaih ban ah birth certificate affidavit lakna ding in in 50 piak ngai ahihdan gen hi. Tualai tak in student-te scho form fill-up uh ngai ahihman in student tamtak in certificate tuamtuam alak uh ngai a, certificate lak khiakna ding in sum hun khop piak ngai ahih man in niteng nektawm zong a kilohte'n khengvallua a sak thu uh tamtak in gen uhi.

***Dr. HL Liensang Chief Medical Officer CCpur in zan in Singngat khua vapha in Singngat khua a Primary Health Centre (PHC) etkhiakna va nei hi. CMO in a gen dan in zan a Singngat PHC aphak hun ah staffte toh houlimna nei khawm uh ahih dan gen a, Singngat PHC ahih leh 24X7 sung function theihna dinga panlak dingdan genkhawm uh ahihdan gen hi. Huailou in, tumalam deuh a Singngat PHC a transformer, Zoveng a ten a puak khiakna u toh kisai, zan mah a Singngat MLA pu houpih ahihdan gen in, hiai thu pen, MLA pun sawl kha lou ahihdan gen a, zingchiang, September 19, 2013 a SIngngat khua pha ding ahihdan gen hi. Dr. HL Liensang, CMO/Ccpur in ahihelh singngat leh Lamka kikal a PHC leh PHSC om teng leng pha vek a, hun dang a sang a ahoih zaw a function theih ding dan gen khawm pih na nei vek ahihdan gen hi.

***A hongtung ding September, 20, 2013 sunnung dak 1:00 in DC office ah, District LEvel Committee on Rajiv Gandhi Grameen Vidyutikaran Yojana, RGGVY meeting om ding hi. Official lam apan lai kimu dan in, meeting hun ah, RGGVY implement ding dan toh kisai, Load Shedding toh kisai, Urgent Identification of BPL Households for Electrification under RGGVY, Revenue collection, List of Villages which are not at all electrified so that they can be included in 12th Plan(RGGVY) leh Identification of difficult and remote areas which can be covered only under Solar Power.....toh kisai gen khawm na nei ding uhi. Meeting ahihleh, District level Committee on RGGVY a chairman, concern DC in makaih ding a, ban ah, member a tel ding te, Concern Superintending Engineer(Nodal OFficer, Hill Distirct Council a chairman ban ah, concern Electric department a EE te tel ding uhi.

***CCpur District sunga masapen ding in tuni sunnung dak 4:00 in Tedim Road Opposite Batta Store mun Vodafone Post Paid Mini-Store ding hon khiakna neih in om hi. Hiai hun ah Kamsuanlun EM ADC/CCpur in khuallian hihna toh uap in Vodafon Post Paid Mini-Store honkhiakna nei a Rev. D. Kamchinmang Local Pastor EBCC Hiangtam Lamka in Pathian kiang ah latkhiakna nei hi. Vodafon Post Paid Mini-Store ahih leh Thangliankhup in enkai dinga tua ban ah Vodafon post paid toh kisai thuchian zaw leh complaint ut neite'n hiai mun tak ah office kai hunsung in S. Valte kiang ah complaint bawl theih ding hi. Tua ban ah sim card replacement bawl utte'n Imphal lam asum seng hiam ahih kei leh ni 2/3 khong ngai ngailou in hiai mun tak a bawl theih ngal ding hidan in leng gen uhi.

GAMDANG TANCHIN:
***Pakistan thuneihna nuai apan Bangladesh in 1971 a zalenna a suallai a war crimes ah kigolh a ngawh a om Islamist politician khat Abdul Quader Mollah tung ah court in February a damsung suangkul taang dia thutanna a bawlkhum nung a, Bangladesh Supreme Court si ding a thutanna a bawlkhum thak nawn ziak a Islamist Jamaat-e-Islami Party-te lungkimloou in ni nih sung daih ding Bangladesh gamsung pumpi ah general strike puang ua, kiphinna ah hiamgamna leh thagum suahna ziak in mi khat in sihna tuak hi. Bangladesh War Crime Tribunal in tu'n Jamaat-e-Islami Party ah makai lian mahmah 6 jail ah khumta hita ua, khenkhat damsung suangkul tang dia thutan khum om ua, khenkhat si ding a thutan khum in om uhi.

***Australia's Prime Minister dinga telching thak aom Tony Abott in Australian Prime Minister ding in numei Governor General in kichiamsakna nei hi. Australian Prime Minister dinga kichiamna leh office luahpan phet himahleh mawhsakna leh demna tuamtuam in Tony Abott khetul-suih ngal hi. Cabinet member thak 19 kichiamna neite lak ah numei khat chauh portfolio a piakziak in kilkawmteng apan mawhsakna leh demna thu tuamtuam in a bil deng ngal hi. Tony Abott in a makaih solkal thak pen buaina leh haksatna hivengtu solkal hiding ahihdan gen hi. Longneu zang a Australia ah bukna leh bitna zong ding a lutsawmte dalna ding a panla ngal ding ahihdan leng gen kawm in, tua ding in Deputy Chief of Army kiang ah mohpuakna pia hi. Himahleh hiai nna pen bangchi banga sepsuah hiding hiam chihbel bangmah a chiangkuang om nailou hi. Banah, Australia apan air pollution piangkhia hihkiamna ding a carbon tax leng hihbei ding ahihdan gen hi. Tony Abott makaih coalition solkal in Australian Lower House ah majority hihna nei mahle uh, Senate ah bel hat lawmlawmlou uh hi'n kigen hi.

***African gambup apan Europe gambup lut tum mi za thum vel in Morocco apan Spain territory huamsung aom Melilla leh Ceuta ah gamgi dai kantan in Spain ah luttum ua, Spanish police-te tawh kinawktuahna nasatak a piannung in mi bangzah hiam in liamna tuak uhi. Mi za thum vel in hiai Africa leh Europe gambup khentu gamgi dai kantan tum ua, mi za khat vel lutsuak thei veve uh hi'n kigen hi. Hichibanga dankalh a mi za thum val in gamgi kantan a Europe a lut tupna uh tunaizek thiltung a ding a a lianpen hilai hi'n kigen a, hichibanga gamgi kantan a gamdang ah lut tum mi tamtak in Morocco ah ngaklai uh hi'n leng kigen hi. Africa gambup mite'n dankalh a gamgi kantan a Europe ah a lutna uh venna ding in Morocco solkal kiang ah European Union in kumteng in sum tamtak pe gige a, himahleh mite'n a hinna uh a chhan uh le-leng poisalou zena gamgi kantan a tup ziak un gamgi venbitna thubaihlam hilou hi'n gen uhi. Nikum in, 72,000 sanga tamzaw in gamgi kantan in Europe gam tuamtuam ah dankalh in lut uhi.

***Austria ah pasal khat in mi li a kaplup nung in a inn ah amah amah-le-amah kihallum hi'n police thusuak in gen hi. Austria gam ah poaching tawh kisai khauhtak in police-te'n enzui ua, tua tawh kiton in Seppatni nitak in huchibang poaching tawh kisai dappina a neihlai lai un car khat khawl ding a a khaam uh leh car apan mi khat in thau in kap a, special forces officer khat kapkha hi. Hiai kikapna mun Red Cross Society-te ambulance in delh ngal a, huai pen leng muangmawh a om mipa'n kap zui nawn a, mi nihte a liamna ua pan damsuah zoulou in a nung in si tuak uhi. Huai nung in police officer khat kaplum nawn a, police officer dang khat man in, hostage dan in pikhia a, huai pen leng kaplupsa in a khonunga muhkhiak in om hi. Police-te'n leng delhzui in, dakkal bangzah hiam nung in a farmhouse ah mei a kihallumsa in muhkhiak in om hi.

***Tropical huihpi leh vuihpi in Mexico's Acapulco a nuai tawh kiton in, gamdang apan hiai mun ah khualzin, tourist-te lenna zang a puakkhiak leh hutkhiak in om uhi. Tropical storm nih Ingrid leh Manuel kichi in khat-vei thu a Mexico gam suahlam leh tumlampang ah a nuai nung in tuni tan in mi 57 chingta a, mi tamtak taang in buai mahmah lai ua, mihing million khat val belh ding neilou in om uhi. Vuah tamluat ziak in lei min in, menchim nasa mahmah mun tamtak ah piang a, Xallapec ah inn bangzah hiam leh bus khat leitolh in vukmang hi. Kawng tan a sang in Acapulco Airport leng tum lai hi.

***Karnataka's Primary and Secondary Education Minister Kimmane Ratnakar leh a staff-te'n innkuan khat dil sung a tuikia a si dinglai hunkhia hi. Bangalore zuan in a khua uapan Kimmane Ratnakar leh a staff-te kipankhia ua, sawtlou nung in car khat in makhelh a, himahleh huai car pen dil sung khat ah ana lengkhia hi. Ratnakar leh a convoy in minute 15 vel nung in huai car pen tuakkha nawn ua, himahleh Beguvali dil sung ah denlama amah car makhelh car pen tui lak ah tum ding a kisa in Ratnakar' driver in a side mirror apan in mu a, Ratnakar kiang ah a hilhphet in, Ratnakar in a convoy kintak in khawlsak a, bodyguard leh driver-pa tuilak ah tawmlut in tuikia innkuante va hunkhia uhi. Car ah naupang 3 tel in mi 6 tuang uhi. Minister in a genna ah, amau convoy in huai tuikia innkuante mukhalou hiam, ahihkeileh neuchik zekai zek hile uh a innkuan khozang ua tui sung ah si vek ding uh hi'n gen hi.
Indian politician ettontak mahmahte laka khat ahi.

***Telecom giant Airtel in BCCI tawh sponsorship deal a neih pen bei ding ahihtak tawh kiton in Airtel in sponsorship deal pen hihsau nawnlou ding hi'n puang hi. Airtel leh BCCI in sponsorship ah deal a bawlna uah, India gamsung a international cricket match a omteng in Airtel in 3.3 crores a piak zel ahi a, hiai pen April in a hun ana beita a, huai nung in Airtel in sponsorship hihsau ding kilawp nawnlou ahihdan taklang hi. Tu'n BCCI sponsorship thak a zon nawn kul ding hi.

***Tuma a Uttar Pradesh state a Muzaffarnagar District ah Muslim-Hindu buaina tawh kisai in UP a politician 24-te tung ah mat theihna ding, arrest warrant suahkhiak in omta hi. UP Chief Minister's Office thusuak in a gendan in, state solkal in Muzaffarnagar buaina tawh kisai a FIR bawlkhum khak aom politician 24-teng man ding in thupiak bawlta hi. Tuate lak ah, BJP MLA Sangeet Som, Hukum Singh, Bhartendu-te leng telkha ua, BSP MP Kadir Rana, BSP MLA Noor Salim Rana, Jameel Ahmed leh Congress MLA Saeed-ur-Zama-te leng telkha uhi. Mat dia arrest warrant suahkhum aomte laka Sangeet Som in, kei ahong kimat leh SP leader Azam Khan leng mat ding ahi chi hi. Politician mi 24-te tuni a bei tawh kiton a matkhiak vek hiding un Chief Minister's Office thusuak in gen hi. Hiai Muzaffarnagar buaina ah mi 48 in ana sih-lawh uhi.

***Punjab DGP lui Sashikant in tuni a Punjab and Haryana High Court ah a puang dan in, Punjab state sung a political party - Akali Dal leh Congress-te leh MLA/minister-te tanpha damdawi khamtheih zuakna a kigolh uh ahihdan gen a, huai khamtheih zuakna apan a sum a muhkhiakte uh election tuhna dinga zang uh hi'n ngawhna bawl hi. A ban a genna ah, Punjab state police-te politician-te kigulluk a, khamtheih zuakna ah pangkhawm uh hi'n leng ngawhna bawl hi. Hiai thubuai tawh kisai a Punjab and Haryana High Court ah Public Interest Litigation kithehlut a om ziak a Punjab DGP lui court ah ding dinga sap aom hi'n kigen a, High Court in Punjab solkal kiang ah hiai tawh kisai dawnna pia ding in ngetna leh theihsakna bawl zui ngal hi. DGP lui in a genna ah, Punjab ah narco-terrorism a beina sawtkuam ahita a, himahleh narco-politics bel abei ngeikei a, narcotic a sumdawnna apan sum muhkhiakte political party-te'n politics ah naktak in a zanglel uh chi hi.

Page 1 of 25