UPDATES:

S5 Box

ZOGAM.COM Login

"Shaikham" leh Chin Liberation Army

Amah Pu T Awnzagen in Siamsinpawl Annual Magazine khat ah Class Ten a exam dek in laisim awlmohna nei mahmah lou hidan in kigen a, himahleh Pu H Jelshyam IAS toh a kichibai khak un a hinkhua lamdang tak a kheng ahihdan a gelh ka simkha ngei hi. “Shaikham “ kichi laibu gelhtu Pu T Awnzagen in a pianna pa Shaikham biography abawl Evangelical Book House Lamka ah Teng 150 pia in bukhat ka lei a, ka pawtna ah ka sim leh nuam salua in koihkhe thei pah zezen kei ing.


“Shaikham” laibu review dan a hon gelh ka laizang kei a, himahleh a sung thutun te thupi sa in kei mimal muhdan toh hong gelhkhawm nuam hi zaw ing. Pu Shaikham  mipil saikhammasa , laisiam masa I neih te lak ua khat ahi a, siamna lam ah MA tan sim a, Circle Officer, Compounder leh Headmaster nna bang ana sem in, Second World War lai in “Tuitaw Galkap “ in ana kuan hi. Mifel leh ngaihhuai hingei ding a, laibu ah kigelh bang in Greece nungak Medina kichi khat toh ana kingaikha dan uhi. Tulai in Vai nungak melhoih duangchingte lailung kuai Zomi tangval khat bek ki om zoulou hiam maw ?


Pu Shaikham hunlai in siamsinna ana haksa hingei ding a, sum le pai neihsa omlou himahleh Pu TC Tiankham in a sawm- a- khat tang in na chawmtou hidan in kigelh hi. Ban ah Paite Education Committee kiciten a siamdeuh naupangte ana panpih ahihdan kilang hi. Pu Shaikham in loh hon neihchiang in Pu Tiankham kiang ah a lehsawm in ditsawm mahleh utlou hi.Zodawn a siamsinna tuni chiang in enkik leng khanlam manoh lou bang a, Pu Shaikham hunlai mah bangden ahidiam chih hon ngaihtuah sak.

Chin Hills ah Hausate thuneihna mipin nin huai sa mahmah ua,Britishte honglut nung in haksa sadiak uhi. Tuaziak in February 19-22 1948 in Falam ah “Mangkang gamkek sawltakte thuneihna leh vaaang” lakkhiakna ding leh Hausate beisakna ding thupukna palai 5000 val in laa uhi.Hiai hun chiamtehna in February 20 teng Chin National Day kilawm a, en zong Zomi Nam Ni chin lawm hihangh.


Pu Shaikham vanglai in I nam politics ana niam keihial, Lushai Hills lamten MIzo Union paipih uh a , ei Guite kual lam ah Khul Union hat hi. A tuppi uh Hausate kiang amipin saliang , buhsun sun gige uh beisak ding chih ahi. Mizo Union lohching in Mizogam ah hausate hihbei uhi.Himahleh ei bial ah hihbei lou in buhsun , saliang khai chihte hihbei zou ua, mipi haksatna nakpitak in dawnzang khai uhi. Saliang khai, buhsun chihte saltanna a ngai uh ahiding e,India in zalenna ana ngah toh kiton in ei leng suakta ni chih a laa thupi khat uh ahi. Hun hongpai tou zel in tu dinmun in etkik in huai hunlai Khul Union in mipi haksatna theisiam a Buhsun-Saliang khai ana beisak uh introduced thak uh I bang uh a, mipite’n haksa sanawn loudan a kimu hita hiam? Tuni chiang in Zodawn apan ahithei liai teng in Lamka lam ah pem khiak sawm kibang hi.1997 galven zoh lak in ka theihngei mahmah khat Lamka ahong pem a,a ziak ka dot leh. “ Nidang a piak ngei leng hilou hausate kiang a buhsun piak nawn ding mahmah in ka lungsim hon nasak ahi” chin hon dawng hi.


Chin Liberation Army makai Pu Tunkhopum Baite sihdan chiangtak in hiai “Shaikham” laibu ah kigelh hi.CLA movement pen MNF sang a masa zaw, tuitum zaw mahleh Laldenga in CLA makaiten hon hihchi mit sak thu in lungsim hon vut tenten hi. I makai te hon thahgam thu ah PNC makai ten Laldenga Chief Minister hihlai tak in va mu uh a, Laldenga in  “Unau melhaih hun” chin a dawng chih Siamsinpawl Annual Magazine khat ah sim kha vuat ing.


Hiai “Shaikham” laibu gelhtu in gelhna ding in mi tuamtuam , laibu tuamtuam enkhawm in dik hi a theihteng hon gelh khawm hi. I nam politics leh history hoihtak in tun kha in simtak petmah, laibu manpha khat ahi. Pu Tunkhopum Baite toh ana kithuah tawntung PA to CLA President Paukhohau Khuptong bang damlai bang a, CLA panlai thu a nen aham in ngaihkhiak uthuai asa Zomi lia-le-tang tam na in chia...

 

.
COMMENT (5) PHA TA..  
  •  
  •  

#5#5 awnzagen tombing » 2013-03-08 21:48

Ka lai gelh a tarik, khomin leh tua ziak a paukam dik zoulou deuh hongpiang kha non hilh ziak kin kakipak, sut nawn chiah kon bawl dik di aw.

  •  
  •  

#4#4 awnzagen tombing » 2013-03-08 21:48

Ka lai gelh a tarik, khomin leh tua ziak a paukam dik zoulou deuh hongpiang kha non hilh ziak kin kakipak, sut nawn chiah kon bawl dik di aw.

  •  
  •  

#3#3 thang_samte » 2012-10-11 17:13

Chin State lamten Chin mah paipi den lai ua ana lohching mahmah uhi..tulel inleng CNF/CNA te bang in Burma Government toh kilem sawm in pan nasatak in la uh chih thu Khonumthung News Group khong ah sim theih ding in om(http://khonumthung.org/?p=915)
:-*

  •  
  •  

#2#2 Paulian » 2012-10-11 15:18

a bu deih huai na e..koi kho ki mu di oi???

  •  
  •  

#1#1 Suan Khuptong » 2012-04-28 21:39

Hiai laibu laibu hoihtak ahi a, tunung chiang a leeng kingakna tak tak laibu hong hi ding chih a ginleh huai kei. Himahleh bawldik ngai khenkhat om kasa a kon gen mawk di:
1- Pek 144 2nd Para a February 1, 1966 in zankhat thu in chih pen February 28,1966 or March 1, 1966 chih tuak ahi. February 28,1966 zan dak 12 geih in MNFten security postte luh in Independence a puang uh.
2- 2nd para 3rd line a Irabung chih pen Tlabung(Demagir i) ahi zaw. Huai hun in Zomite tenna Hnahlan khua leng a bomb khum uh.
3- Huai pek mah a 2nd last para a.." kha khat phial khawng MNFten aa op khum nung un.....' chih pen leng a dik kei a, March 4 sunnung leh March 5, 1966 in Aizawl leh mundangte ah bomb khiakkhum in a om. Huai leng mipite leh MNFten amaute panpih dia UNOte hong kuan ana sa zaw mah uh. Huai bomber pilotte lak ah Congress ( I ) leader nih Rajesh Pilot leeh Suresh Kalmadi (huai hunlai a air force pilot} te ahi uh chih ahi.

Hiai a tung ate next edition a bawl thak ngeingei tuak ahi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING