Diamond Jubilee Lunggel

User Rating: 0 / 5

Star InactiveStar InactiveStar InactiveStar InactiveStar Inactive
 

zosonMadamme U Nem , (Nangkhannem Heutunu Niangkhannem Guite) in YPA Programme khat ah tel ding in hon facebook ngei hi. YPA toh kisai tulai a khangthak deuhte ngaihdan lakkhawm utdeuh ahihdan zong hon theisak ngal hi. Tel din kisakhol tenten mahleng kei lam ah kizenlouhna khat ka tuah pepuih ziak in ka telkha kei hi. Ka kisuanglah chihkan gendi ka thei kei hi! Huainung lam in  Vasant Vihar a voksa sung huansiam specialist U Jamgoumuan Ngaihte inn a lusunna programme khat neihni in Unem toh ka kimukha uhi. U Nem in ” I kimuh vang le hoih himai maw” hon ci a, diksa lua ing!

 

Tampi tak I pianna Zolei nusia in khopi ah vaite tehkal ah I khosa ua, nekzonna ziak zaw hingei dia, innlam kiksawm kitam hetlou hi. Kik lehang le neekzonna didang fianrial omtuan lou ahihchia!Mihingte khatvei tei sihding I maban uh a hihziak in sihni manni a intektak a vai honsai sak YPA I neihkhak uh hamphathuai dan vaigam Delhi bang ah kilangdiak hi. Ka maitang phatna hilou, aziak kon genlai ding. Kum bangzah hiam paita in ka seppihte khat a nu hong si a, a galding in Kashmere gate kiang a kihalna mun ah ka va hoh uhi. Anu luang haltum ding in hon pawta ngei ua, ka seppih pa un   anu luang halna ding sing a zuakna ah ser a buk in hon lei hi. Kuamah dang panpih ding omtuan lou in kou leng a sing ding khawng ka va lakpih uhi

 

Siatni dahni hun a ki-uap liailai te I hihman un huchibang hun chiang in a kigalna munding I heututen I buaipih sek uhi. Quarter khawng a tengte bel a dan omdeuh lai,huaite leng kigalna mun ding a kibawl ahihlouh ziak in sigal chiang in kawchik mahmah a, tutfuh ngial kei leh tawlhuai mahmah hi. Ban ah mi tamzaw quarter a tengkha lou, vaite inn luah a khosa tamzawte adin buaihuaipi suak hi.A tamzaw vaite, a inn neite vaite bang in lem a saklouh chiang in buaihuai diakthei hi. Makaiten tua bang haksatna thei in mun le mual neihding bang lunggulh in a zon hang un solkar in munthak hawmkhe ut bilbel tadih lou ahihman in hitheilou suak hi.Huaiziak in makai khenkhat in bel mun le mual neitheilou ding I batziak in lease in mi inn I khel ding uh chih ngaihdan neipawl zong omtham hi.

 

Visionary khenkhat in khopi ah siatni hun ah siluang innsung a pilut chindan I tawpsan ding uh chi uhi. Ban ah kigalna I neihsek uh inn hilou a koi mun hall hiam a neih chindan a neihding chi om uhi. Delhi milun khat in “MIzo ten condolence programme a neihdi nak uleh Mizoram House naih uh ahi” chin gen hi. Huchibang hun in Manipur Bhawan or EBC basement khawng a sunna programme neih a galtu leh gaal a omte adin a lemchang zaw maikei ding maw? Nidanglai in I gam ah misi omchiang in innmun a kivui sek, hanmual a vui ding chihthu a gen chiang un pom haksa sa uhi. Diamond Jubilee lop toh kiton bang lam ah kikhekna hong omdiam?