UPDATES:

S5 Box

ZOGAM.COM Login

CHINDAN TANGPI BAWLPHAT TUAKTE

CHINDAN TANGPI BAWLPHAT TUAKTE
By Vungzamuan Valte

vungzamuan valte new

Ei Zosuante kivaihawmdan tangpi leh I society sung ua I paidan tangpite uh kietthak tuak khenkhat tampitak omkha ding hi. Singttang dawn ah khawta a inn 30-40 khawng a iten lingling lai in bel, atek akhang, amei apa, aneu alian pankhawm' takmeuh poimohna hun tampitak om mah ahi hi. Damlouh hitan, loukhoh louma, innbawl, samat sa-aih, dougal nawkna, sih le man, nopni leh dahni hunte ah khawzang in kipangkhawm lou theilou suak hi. Pan'khawm siamte lelmah khawsuak thei phet ahihna khovel ahi hi.Sungkuan kinai chikchik leh insak inkhang, a kikhen theilou ngenta ihi zawmah ua, nopna leh dahnate ah inntek isuak vek mai uhi, huchidan hikei lehbel misi nasan kivui zoulou ding suak ahi hi. Huaiziak in, singtang hinkhua ah bel phatuamngaihna alian a alou theilou leng ahi hi. Khawsung a misi omni a gamkuan teiteite ngialhouh koihdan khat nei maidan ahi uhi, I khosakna dinmun toh kituak a septuak, tantuak leh zuihtuak tampi mah ana om ahizaw hi.


Hun hong pai zel a, nekzonna nuamzaw leh khangthakte a ding khualna in khawpi zawdeuh ah awl awl in itenglut ua, Thanlon, Singngat, Sinzawl ban ah Lamka khawpi nasan ah, mi asang a sim ikiseklut zungzung ta uhi. Etsakna dingin, didang lai 1970's apat Singngat khua ah Hanmual 2 kinei gige hi, I om khakna lam chiat ah kibuai hiven, khawzang in misi hiam... kibuaipih ngei khollou hial hi. Khawpi lian huntawk tak khat ahihna ah kizen mahmah linlian hi. Huchia hunte hong pai zel in, Lamka khawpi ngialhouh metropolitan city suak pah ding hileh kilawmta hi, akol avai, a pangngal, a Bihari, a Maruari, a Bengoli, a Assamese, A Meitei, a Naga leh ei Zosuante mahmah in belh penin kinei a lakh a sim mihing ki omta mawk hi.

Huchia I khosak khawm chiangin nam tuamtuam ten paidan tuam ahon nei ua, khawl ni leh khawllouh nibang ahong kituak vek nawnta kei a, chibing khat leh nihte deihdan a pai miaumiau theih ahong hinawnta kei hi. Biakna tuam tuam leh gindan tuamtuam tengkhawm isuak ua, kizahtat tuah leh kitheihsiam tuah akul leh poimoh ahong suakta hi. Langkhat a etin I Tribal Identity mangsak dek ibatna aomta a, a lunggel theite a dingin bel, midangten a hon chipmang mase un, ILP kipoimoh hilou hiam chih a lungtang sungnung ua gingden dingin koih theihta hi. Mihing I tam chiangin nektak zonna ding hongtam a, sualna le ahong pung a, Bengoli papi khat khemmangsa tampitakte khutchin nuainuai a chihmohhuai sapipi tamtak ki om hi. Guktak laktak mahmah ahong uang mahmah mai a, I traditional institutions ten ahon kembit zou nawn ta kei hial hi. Dan bangtak a kimat chatchat leh kigawt ziauziau dingdan I lunggel kei uleh, pupa dan a kingaihdam gige na' khovel in ahoihlou lam ah hontun ding abangta hi.

ETKAI TUAK KHENKHAT TE:
1. Damlou kiveh: A diakin damdawi in ah damlou kitam thei mahmah a kingaina a kiveh te ihi uhi. Mihing kitamta ahihna ah damdawi inn kepsiangthouna leh damloute mahmah khualna in visiting hours kichi zahtak in zui thei le a deihhuai. Damdawi inn sung a nopbawl hi awmtak a chiak zuazua chihte diklou mah ahi, khatvei thu a lutthei ding a bikhiah omsate palsat sese lou in kikhelh thoh thei leng navakhuai mahmah ding hi.

2. Misi galna: Sihna in a tek a khang khen tuamlou hial in sihna limguam lam ah niteng in khutzung a simtham ding mahmah kisi zungzung gige mai hi. Hanmual mun tuamtuam ah inei ua kizen mahmah linlian hi, a semtute leng a vengmite mohpuak deuh dan a kikoih ahihna ah kipumbuai loudeuh mah ahi hi. Phone tungtawn in sihna kithei pah zungzung a, a delh in kidelh huan maidan ihi uhi. Si inn ah singpi, tutna, mike, hulliap leh adang dang buaipih ahong poimoh pah a, misi vuikhiak tan in mipite kitungkim dek panpan sek tangpi hi. Sikkhat thu in mipi a omkhawm hut chiangin amenities tampi poimoh a, dakkar 2 sung lel khawng a dingin naktak in i kipalbuai naknak uhi. Inn lam a delh thei ten inn lam, Hanmual lam delh thei ten hanmual lam, I hunneih dan bangjel in panla hile huchitel a buaina ding omlou himaithei hi. Inntekte mimaltak a va mukhaban leng hilou a va hehnem ban le hituanlou ihih inchu, a nitaklam, a zingkar lam, a ninawn lam chia khawharte khawhar saan lel ahihna uah, sepna leh seplai taizan zena kidelh huhu khollouh a hoihna khattak om hiin thei ing. Sungkhat laina, unau meltheih luatte zaw le thutuam hileh, a tangpi thu igen ahi zaw hi.

3. Kigal dan: Pawl min hiam, sanggam lainate hiam in I pipute paidan a puan kikhuh, misiruang tuamna alou theilou tan hihding om hi. Himahleh, a milip ten puan chituam tuam adiakin puandum kihahzat mahmah mai hi, situamna puan suakta ahi hi. Puan mantawmchik a paisawn ding chih theihsa, puan mantampi inntekte hawm mang nawn lel ding chih theihsa ihih sosouh sang un, puan man 500-600 khawng hita ahihna ah asum a kipia hile inntekte nakpitak a dawn zangkhai ding ahi hi. Chini kg khat leltak inle nakpitak in a dawn zangkhai thei hi, singpi awmawm mai ngai ahihchia. A nei deuh tengin pak mantampipi leh puan mantampipi toh ipan chiang un, a neilou deuhte sigalna sum pen chihtham lou lua suakthei a,khawpi liantak a khosa ihihtak ziak un, thil tengteng hautak vekta ahihna ah, etthak tuak om leh kilawm sa ing. Pass lopna, mou lopna, sigalna ichihte ah ken bel asum mahmah in pia in, a poimohna mun uah ana zang thei le uh chitinten ing.

4. Family programme chihdan deuh Hansuang honna, mou lopna, mou khakna, pass lopna, anniversary lopna, kaisanna lopna, birthday lopna, retirement lopna leh adang dang tampitak te I khawpi sung ah niteng hunteng in om gige zouhial hi. Ngaipoimoh vek ding chile mahni nasep' sem manlou zen a diandian nading tampitak omkha ding hi. Pensioner itamta ua a kizen vanglak, hun nei zawdeuh ahihna uah. Huchih hun chiangin pak piakna ichi ua pak man tampipi izang sek uhi. A neite a dingin apoi thahah keihial, a neiloute a dingin pak bawk khat leltak le 200/300 a leitei hong ngai, kilohtawm leh mehzuak, puangan a mite pangbel a khosa tampitakte' a ngaihtuah huai thei kopmai le, mittui dai maisek dan ahi ka muh chia. Trend leh Fashion dan a ikoih thilte a zatdan leh a zat-hun itheihsiam keileh hoih hetlou anahi dan aka. Mipite mai a pakpiak nahun aom sangin a tuam deuh a sai theih bang hileh, unau ngoih ngoih le nektak zonna leh neih le lam kikhai lua om veu teisek boksi, ki ipip in a om khanak. Kei mimal ngaihdan inchu, chial a om ihihleh ahon chialtute' I zahtakna in, taksa mahmah I va kilat naknak leh, huai kan a thupi dang a om a hia? Chi ut dan kahi, gift lamen a programme bawl lah omsam lou ding hang a, a mihing mah kingai tuntun ihizaw kei ua hia?

5. Huchia family programme aom chiangin puandum kipiakna in nasatakin azui lou theikei, puandum amutute vanglak in mumu mumu mai, a pekhetu te vanglak in pekhia pekhia pekhia mai, asum a man tampipi zaw hi. Himaleh, a dongtute a dingin khawlumpi nuai ah dongkholh maimai asuak thei a, paisawn, paisawn jel, puan paisawn ahi achita uhi. Khat in puan pia, khat in sang, asang pa'n midang pesawn, huchia pai kualkual in atawpchia ama puan mah tangkik kha chihbang omta ahi hi. Omzeneitak a thil ichiin khenkhatte, ahun sawt dungjui a omzenei hinawnlou a, akilawmsakna dan suak thei laizang hi. Ka puan piak ka tangkik a "MAHUT KA MU" mang lah mang lou, pun lah punglou, chia chiamnuih maimai suahsak sangin I kideihsak taktak leh puanman tang di asum in kipia hile a deihzawng uleh, insung van hiam, naute poimoh ngoihngoih te, van hileh bang hitaleh, leithei ding ua, kithaman mahmah ding hinazenpi.

6. Hun zatdan: Khawpi vai leh vai tuamtuam, pawl tuamtuam, saptuam hiileh bang hitaleh atam kei chithei I om kei himhim ding, asia hipah khollou ahi, programme bawl kulsa a kipeipei, nekzonna a nei kitamta ahihna ah. Programme I bawl chiangin ahun, adak gin toh kiton in pan chetchet thei le, mi kingak saksak khollou in ahun geih geih in pan in zou chetchet hile hun kimangsak lou deuh ding hi. Programme himhim, sungkuan thil ahih naknak leh zinglam annnek ma in vaisai fel diam le kizen mahmah hi, etsakna dingin Hansuang Honna. Sun nilouh a sep ding leh bawl ding omtuanlou ahihna ah, zingtha a baihsamtak a zohkhiak pen mitampite thadawn kihi naknak zaw hi, office kaite, school/college kaite, dawr kaite etc. Programme tamtaknitak lam dak 3 nung khawng a pat theih ding omnawn leuleu hi. Kikhakna leh lop tuamtuam ineih te uah atangpi thu in nitak annkuang ilui ut sek ua, thil kilawm leng ahi him hi. Programme dak 1 khawng chitang giugeu lou in, nasep ding teng dak 3 tan in non zousiang ding ua, nitaklam dak 3.30 in hall programme ipan ding ua, khawmui zul dak 4.30 khawng apat annkual I sawkkhawm ding uh, chile fuh mahmah ding hinazenpi, programme ineih chiang ua thugenna tamtheilua in, zaksasa kithuhilh hilh maite ihi ua, huaidante kiamsak deuhta le, hall programme leng tuihuai zawtham ding ahi. Formal programme himhim dakkar 1 vaal chu pitek putekte loungal in uksak nawnlou deuh hi ua theihtheih dankhat om hi.

7. Nektak zonna: Sumpung uumm I tam mahmah mai ua, duhamna leh huaihamna khovel ah kileng ahita hi. Poisakna neilou a sum zong, khem ding zong a vialvak itamta, huaiziak in tuahsiat tuah theihmah ahi hi. Ka muhdan in hauhsak phut tum ngen kihileh kilawm, lottery jackpot mat vek theih ahi kei, talent hihpung siampa,Toupa Jesu ngei in a vualzawl hilou hiam? Awl awl pai khiankhian a diktattak a kalsuanna pen vualzawl huaizaw naknak hi. Thil himhim ah zuau bulom toh panla a pang teiteite zaw a maban uh abing baih diak, maimoh pah ahi uhi, mi hai nileng tuanlou chu. Bengali papi khat khempuksa tampiten a loh ngaihna a theihlouh lai un, huchidan khemding zong a kipeipei hong om nawn lou ding chih genhaksa hi, pilvan kan omlou ahi, mobile tungtawn a kikhem khong olsam diak lai.

8. Dawr bawl: Business ichih siamnel ngai mahmah a, vaite mah siam tuanse bang uhi. Sum le nei namah ua, advance booking Meiteite khawng in bawl ziahziah mai uhi. Mullitna om hetlou in vaite, Meitei te inn iluahsak ua, sum imuhnak leh I kipak emem mai uhi. Eimi ngoih ngoih dawr bawl ut tepromote sangin huai Vaite/Meitei te iluahsak zaw ua, sum I etlah ziak un a kol uah itang semsem ding uhi.

Kon gen chiang vanglak di. New Lamka lak ah dawr mai (room) khat luah dingin Rs. Lakh 2 tan khawng advance napiak ngaita hi, eimi hunchi thei om zeuhzeuh unchin, huchia dawr bawl thei ki om zek.

New Bazar lam paisuk lechin, dawr bawl dingin kisa mah dih, na mangbang rumrum ngot di. Dawr mai khat luahtheihna dingin advance lakh 10-15 tan khawng deposit ngai teltawk eivoi. Huchidan a ipaitak ziak un, sum deihtakna lianlawmtel mahmah ahihna ah VAITE/MEITEITE mah in huai sum deposit ding nei ahih chiang un, luah hmiahhmiah mai uhi.

Nam itna, Gam itna ichih khawng kahase, a langkei himhim a ground zero ah. Hun sawlou chik nungin eimi teng Ngathal khanglam leh Khominthang zausuk lam ah kisekkhawm tuktuk le kilawm, dawr bawlzou lah omlou ding hanga, kietthak ngai lua hi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING