UPDATES:

Lungonhuai Khatel E!

LUNGDONHUAI KHATEL E!
by Vungzamuan Valte

vungzamuanvalte

Manipur gamsung aa eilawipi! Chin apat Khulmi, Khulmi apat Hill People, Hill People apat Zomi, Zomi apat??? Burma ah Chin chia kithei tengteng Chin Hills aa teng tangmite chihna ahi. Chin chia kiminlawhna deihlouhna hong piang aa Tedim Chin mite chih hong hi uhi. Huaikhit nungin Zomi chihdan hong thangsuah leuleu.

Unau dangdangte toh kithutuak a vaisaikhawm leh kalsuankhawm' ding deihna leh ngimna in kum 30 paita in Zomi kichi in gamkekna maa ila uhi. Hiai kalsuanna in siatna leh mangbatna tampitak ahon tun a, hinna leh neih le lam tampitak I chaanlawh hial mah uhi. Haksatna tamtakte palsuah in dinmun neuchik khat beek neithei dingin kigintakna lianpi tawh maban nei kisatak in kipahna meel kipuchiat hi. Hattak a kalsuan toutou in India sorkar tanpha in ahon bildawh mahmah ua, Union Home Minister tanpha I gam hong siik in, I mun leh mual te ahong enkhia hi.

Huchikawmkar ah, eite a dia kilawmchiang 6th Schedule provision bang hou isa ua, heutumasate' panlaknate agahsuah hun dingtakin I nawlkhin bawl hial uhi. Nagate ahong hat hulhul ua, a lawhching naknak uleh ei a ding leng piang mahmah ding ahi, chiin I kihehnem touzel uhi. Nagate mahleng thupi kisa in bangmah dang deihlou, 6th Schedlue khawng zaw neplua achi latlat zawzen uhi. Unau Kuki ten lah Zalengam delh theih theih in a delh ua, Sadar Hills full-fledged district hihsak ding toh, tulaitak in Kuki State chih aging ngaih nawn mahmah ta hi.
I huchih neunou kar un tampakzang a teng ten pan ahonla ua, kum tampitak a kisakkholhna gahsuahte uh mukisa in bill 3 te ahon vawkkhia uhi. Hill State kichi leng tangmite tawh kideidanna bei ding hi, Tribal kichi leng dinmun khat ah kiding ding hi, chihkhawng a slogan thupi penpen uh ahong hita hi. Gam kideihgawhna liansemsem ahihna tawh, amawkna a kisuhsak mawk omtheisam lou ahihna ah, pilsiamtak in Manipur Mite chih genchetna ahon bawlkhia ua, I phechelchul maita uhi.

Hiai bill 3 te setan sanga lauhuai zaw ahi chiin I tangkou kheukhou ua, sihna manna tampi I tuaktou nalai uhi. Sinlai ah, lailung ah, thawmhau kisakna (vulnerable), gamlei itna, mailam hunding mial sakna in ahon pumtuam a, khasiathuai I sa ngohngoh ua, tangkou theihna teng ah I tangkou lou thei kei. Pathian I sam ua, leitual beng zenzen in A panpihna I ngen uhi. Ka gam ka lei, ka pianna gam ah, kei mikhual hitel ding maw, gamdangmi chih ka hihtel.....chiin I mangbat kikou tuaituai hial uhi, na mahtak e maw, lawmte.

Mangbang kisakna in ahon khilkhawm a, munchih mualchih a omte thukhat lakhat sat thei in Tribal Unity ichih minhoih mahmah khat ahong piangkhia hi. Kivaihawmna tuam deih in I husa uh a etlawm mah mah mai a, aneu alian, amei apa ...hihtheihna lam chiat ah, nupite bangchu hahpan petmah uh himai, a sung ua kamkei kual ahong suakkhia a, meiser tawi in lampi ahon zui dupdup ta mai uhi, gam itna leh minam itna thawmging kilawm leh kahna awging te ngaihpha hinatel e.

Huchia kalsuan' kilawmtak I suan lailai un, bangdawh-ai hi hiam, eisung ah kibuluh utna lungsim ahong piang mawk hi. I kibuluh neknek ua, Zomi kichi aa I kikhilkhawmnate (ZC) bang ahong muih hial zawzen hi. Kamka heuhou in, bang kisuah sawm ihi ua, chihna toh, lungngaitak in kidawi keikawi hialmah hi. Bangchichi hiam in, awlawl in paidan ahong kikhek toutou a, tuni in I maban ah Kuki state chih a hong langsar mahmah ta hi. Hiaihun chance hoih ahingei ding a, opportunity hoih mansuah khak ding lauhuaipi khat ahi ngeingut hi.

Bangding a hichidan lungkhamna leh patauhna hong piang hi hiam chihbel mipite tengteng in I theihsa vek ahi, gen sawnsawn nawn kei ni, laigelh muhding leng adim aha simsenglouh phial ding a omta hi. Kivaihawmna tuam deih chia I tangkou lailai un, I sung a KILOK ek ek maita a, Paite namsung ah kideidanna leh kimuhsiamlouhna gap lianpi ahong piangkhia hi. Thuhoih lahoih deihloute nasep hi hiam? mi ten hon bumhai uhiam? sum a hon lei hi uhiam? bangziaktak ahia??? chih kidotna omlou theilou ahi hi. Henchip a om, nekchip a om, leh nemniam a om kisate hong kikhoukhia ahi uhia? kikhekna lamen ihi uhia? kikhetdarh vek sawm ihi uhia? bangtak deih ihi ua?? Chihte kidotna poimoh ahinawn leuleu hi.

COMMUNICATION GAP: Mipite toh nam makai kichite kikar huthe lua, emotional bonding omlou leh kithuzaktuahna omlou ahi ichi, dik mahmah inte. Hiai communication gap pen nasatak a bawlphat ahih kei leh, I maban ah haksatna huaise zawsem omkhathei hi.Pawlpi ichih mipite bawl ahi, mipi omlou a pawlpi omtheilou ahi chih theih ngailua hi. Nialkalh pawl omlou theilou ahi a, insung nasan ah nupa kituak diamdiam a khosa kitamlou hial ahihna ah, nialkalhnate apuakdan siam kul hi. Mipite theih ding a kilawm dawm puankhiak zel dan aom hoih leh kilawm ahi hi.

PAWLPI LAM: Election chiangin I buai gige, buaitheihna mah ahi. Hitamah leh, ei buaidan huaise se hi. Sum nei ten vote lei, mipi ten vote zuak zel, kua mawhna ahia? Electoral politics ah kigolh louding teng kigolh kha gige mawk, a utmawng ua kigolh ahi uhia,or candidate te' kigolh sak? MLA/MDC election ding chiang in lunggulh kisa a, kum tampi kisakhawl mi tampitak om gige uhi, huai lunggulhna neiten Songtal lam delh duaiduai se uhi, bangziak ahia? sap a om uhia? Nomination paper khiakna lah DC office hibuang sam a! Hiai paidan dikloutak I khekkhiak ngeingei ding ahi. A utteng ki candidate sak le, mipi deihpen telching hong hiding a, pawlpi'n telching a om penpen naseppih theih sawm ding ahilel zaw hi. Thuguk kiselgu om ahi ichih veu leng dik kumkhua lou ding hi, panpih tuam nei a election sai'gige ahih chiangin lungkimlouhna leh khasiatna kitun lel ihi, hiai in mipite tawh gap lianpi omsak ahi naknak. Candidate ut teng in sum sung nainai, kuan hong sung un chi ahia? candidate ten genthei ding uh hivaw! Utmawng a vasung ahih uleh, phunphun se lou in chillum toh valhsuk mai le uh, I chinlouh chia zaw gending sakding tam mah ahi.

COTERIE SYSTEM: Pawlpi toh, contractor mihausate toh MLA/MDC te ahong pankhawm vek chiangun, amau lou gamtang zou kuamah omlou mawk uhi, sum in nasem thei ahihna ah. Contract pehoih theithei ding phungvuh in om ua, contractor hausate toh kigulluk uhi, huchiin a khut ua saminsa asuak zel uhi. Huaiziakin, a nengkai omthei lou hial in a luak ngal in aluak oih oih maimah ua, hausa hulhul maidan ahi uhi. Mipite lungsim ah, gam itna ichih leng hichi mai ahi, sesum sesum ngenta chihna in lunghelna piangsak hi. Lalgam khahsuah ding lauhuai zel le ahia eive, akua peuhmah a dingin. Huchia I paitouh touh chiangun, genthei kisa, liangvai kisa, mipitamtakte a khase lou theikei uhi, government a panpihnate khawng lah gamlapi asuak a, amusunsun ten akim alang leng mubanlou zel ua, thangpaihhuai velvul ding mah ahi. Kikhekna chikhat a om ngeingei ngaidan ahi, bank account a direct transfer hih ngeingei chi ahi.

CONTRACT SYSTEM: Mi tengteng contract hihthei vek ding kisa, delh souhsouh mai, sepding omloupi toh, semloupi toh sum lakkhiak kiching laizang hi, hiai paidan in I lungsim uah chituh dikloutak mai chiituhta hi. Contract kia kigen hehu hial a, project in leng daihzou le sazaw ka hi kei bangin, bawltawm project ngen zaw hihial kente maw? Mimal contractor zat sangin company liandeuh mah honglut uhenla, crore 1 tunglam nasep himhim te a khut uah pekhia hile chidam zaw ding hi. Aziak om ahi, sum deihgawhna toh MLA/MDC te nungzui ua, azu asa thuak kisa ua, sihngap a pang le kisa uhi, contract mah beisei ngen hitaget zel uhi. Huchia MLA te good books a omsate mah in work order hong tang ua, contract sem hoih in... sem hoih kei tale uh gensiat theih ding hinawnlou. A tangkhaloute lahchu khasia kisa a pau phanphan, nam itpen dan a kigen thei zel, pawlpi doudaltute kha contract a muhlouh ziak khawng uh hinuam mahmah laizang ahi. Contract system khek ngai hi, Guite Road hi in, bang road hitaleh, FCI Godown ngial houh, a specification sang ua hoihzaw, soisel bei a bawl ding hiawmtak!!!
Pangzawl ah bus a khawl kei ding chih theih gegu hinapi a, aminpu lel a sum a kimawlna hitaget zel, buaihuai gaivek ahi, a system khek ni, construction company te bawlsak ta ni.

KEUPI TANGKHALOU KISA:Election chiangin achinpen ding kisa tam mahmah ua, ding suau suau sek uhi. Post ut zahzah create mawk theih hilou ahihna ah a ching khat le nih kan om theilou himhim ahi hi, constituency khat ah khat lel. Chinlouh theih ahi chih thei gegu nazenpi a candidate dia kisa, chinlouh chiang a khasia in nawk theih teng nawk mawk chihchu, a chinlouh ding mah uh ahi, ching hile uh huaise lawtel ding uh eihbang.
Contract mutei ding kisa, muh zohlouh chiang a khasia in nawk theih teng baan nawk zelzul. Contract ichih khawng pupa gou dan a neih theih hithahah louhial hinchin maw.....Mipite leng kihuaiham lua ade aw, tum sanglua, kibeisei sanglua ihikha hia? Kivel thak ni. Nekzonna ding dang omlou hilou a, zankhatthu a hauhsak awih sawm ngenta ihihna ua, hiaibang a ki-itsikna lungsim sia paai ihi uhia le?
I telkhaklouhna teng Pawlpi hi in, Organisation teng, adem a dem hehu mawk, pawlpi hoihna ding I deih lehchu, I bawlphat dingdan ahi, a sung ah kihel in bawlpha zaw ni, a neitu kuadang gamdangmi Negrote lah hilaizang lou ua. Eisung siatna, eimah in I bawlphat dingdan ahi, SUKCHIMIT maimah sawmna lungsim ineihse uh lamdang, maktak ahi. Nam itna hizawlou in, nam melma hihna suakthei daih ahi hi.

ANEI LEH NEILOU: I society pen zalentak ahi, a aneu alian tengkhawm a takhawm liiliaite ihi uhi. Pupa hunlai in kiitna leh kikhawtuanna, kilainatna lian mahmah mai a, tunitan in imi isate kiitsiam takin akoi akoi ah kikhawsa liiliai hi. Gamkektak ihi ua, khopi gamlapipi leh gamdang muntuam tuam ah I kithehzakta uhi. Nekzonna hoihzaw lametna ziakin laisin dingin sum leh pai sengin nu leh pate ahahkat thei mahmah mai ua, leibazen in ahon enkol uhi. Lawhching mahmah a hong khawsuakte leh khawsuak loute kikar hong kigamlat petmah a, neih le lam ah, khosakna ah, hong kikhai pah geigoi mawk hi. Khawpi a mihausate Khawsak dan, thu leh la, neih le lam te muphaban kitam mahmah ta a, I lohching louh chiangin khasiatna ding tam mahmah zel hi, ngawhtheih ngawhmawh omlou ahihna ah, singbul suangbul nasan kingawh thei mawk hi. A kisin hoih ten bel, a nekzonna ding uh ahon maisuah teisam ua, competition asang deuhdeuh chih leng I thei, lohchin' vek sipsip chihpen omtheilou khat ahizel hi. Thazoi ngoihngoih in nektak zon ahaksa a, sepna lei mai ding lah huchi ziau thei khollou ahi zawmah lai hi.

Huaiziakin, I dinmun enkimvel le, laisiam kichi sepna mulou kitam deuhdeuh ding a, I society ah buaina tam deuhdeuh ding abang maimah hi. I chihsa mah bangin, a nei ngalten nei hulhul mawk, a neiloute adia haksa semsem, society zalentak lah hingalsi, tukthei taithei neih lah utchiat, phone e laptop e ... a changkang kang kipoimoh, top up, net pack poimoh gige laizawmah, kicheina achangkang theithei kideih chiat, a lohsuah ding lah peih zel lou, huchia phunna ding, lungsim siatna in hon phunon, insak inkhangte huatna, anei te huatna leh muhdahna hongpiang, huchidan koltanna in tawp in tai neilou, buaihuai kimvel vekta ahi. Khamtheih bang duh/hih ut zawmah, zi bang neithei viau zawmah, pasal khen thithe..gensenglouh om hi. Ki-etthak kimvel vek poimoh mahmah sa ing. Mi I kawk ma in, ei ki-en masa thei leng, delh leng ka pha lai diam? Chih lungsim ineih ua i kichituh uh poimoh mahmah ahi hi.

KA THEIPEN CHIHNA LUNGPUT: Internet in I khawvel a neusak hiai hiai a, lungsim ngaihtuahna paizungzung ten ngaihtuahna mumal hon neisak lou hialin thuthak lathak kithehthang zengzung hial hi. Muh masak paih masak, muh masak dik sakna, muh masak thehzaak utna, adik hia diklou chih kanchetna lungsim kinei nawnlou, internet khawvel ah kihingta hi. A hamphatpih ten sum muhna dingin zang ua, nasepna dingin zang ua, panpihtu dingin lawmhoih pen ahi hi. Laibu tampi lei tektuk ngailou a muhziang theihna mun ahia, zi/pasal zonna munpi leng ahi a, research bawlna panpihtu muanhuai leng ahi hi. Online a van hoihtaktak lei ziauziau theihna munpi ahi a, sakhau a sum awngvang a khiak bangsaktu leng ahi hi. Muhna toh kituaklou a hiaite I zat chingin I tawkheng mulou in ahon peibuai a, I tawkheng I muhtak chiangin zawng mah battheih veve hi. Internet revolution in Aigupta leh Libya ah kumpite khekkhiakna bawlkhia hi, ahoihlam sangin aselam tunzawdaih hi. Facebook leh Whatsapp in ahon pumtuam lel lel a, hoihna sangin siatna hontun ade aw? Chihtheih mahmah lel inte.

Thuthak leh lathak theihna dingin I zang ua ahoih mahmah mai, ahia atamzaw te maw... kigensiatna, kienghouna, kikouna, kinakna, nam khat leh khat kitauhtuahna, kisukminsiatna hitel ei valong ve, dahhuai lua hi. Thudiklou kithehzat ten ei sung ahong luh gulgul a, lungsim sia leh maimah aw, chitel aw, kisiamtan ule kasa, mahmah aw...chih chihna hon tun hi, a kansui taktak peih leng omselou, gospel truth dan a ngai vek mai, om mun a phun nulnul. I society ah unhealthy completion hontun a, website e, fb group e, whatsapp group e, adang dang ah sensationalism in I khawvel leh ngaihtuahnate uh pumtuam gaivek mawk hi. Disconnect cheuhcheuh thei le bel, internet khawvel lou a le Khawsak theihluat, lunggimna ding le tawmzaw ahi hi.

Bangziak a I lungsim uh huchitel a corrupt ahi dia? I tellouhna teng condemn vek ding chi le JAC, MTDF, SOO, ZC, PTC, ATSUM, ZEPADA, JPO etc. ah I tel kim zou vek dia hia? Ei sep ding dawm a om ding a, mite mawhpuakna teng muanglou leh siamlou savek teltawk ihih chiang un, huchi thouthou chu kuansuk thurthur in makaih vutvut le khuzen in. Idea hoihzaw neile hilou khat, migensiat kia siam kitam lua hi, INTELLECTUAL CORRUPTION lauhuaipi ahi. A LITTLE LEARNING IS DANGEROUS chihtoh, keilou kua aom tuan dia kichihna lungsim ten I society peibuai mahmah lel hi. Ken bel, ka insung ka kep zawhlouh khak ding lau penpen ing, bangdang teng sangin. Nam leh gam it chia kipekhiate dem kailou omlou, ei le hithou, mihing ngeina ahi, TO ERR IS HUMAN.

POISAKNA BEI HINKHUA: Thupi isakte uh dan pawlam thilte ahi hi, government kaam zuakte, commission agent te, a leitute, mi min a sepna mute, sepna mun a omloute, akop athuah a sepna neitheite, kumpi nasem politics saikawmte, transfer pai ngeiloute leh adang dang. Huchidante kha sum neite hinaknak unchin, mithupi leh tallang hisukjiang mai uhi.Indongta level leh pupa ngeinadan a tatlekna huham taktakte kingaihdamna i bawl sek ziak un, khelhna, dan palsat pen poisaklouhna kichituh hihang, kingaihdamna leh Christiante ihihna bang leng kizangkhial ade aw! Mimal kingaihdamna pen thutuam ahi, dan in dan mah azuih ding hileh kilawmtak...

TUAILAITE MAKAIHNA AH: Nupi ten puan roupi ahon thangsak ua, neihvek a ut zel ua, gold khi leh bilbah ahon thangsak ua, bag mantou leh khedap mantou ahong thang a, a kichihmuh supsup uhi. A neizou ten a nei namah kei dua maw? Va engsese khol kei le! Khawmpi ahon sai ua, ka neih dandan in kong kichei ding chih omlou, uniform khawng nei supsup, khatvei silh ding leltak, kiphutluihna a leitei hong ngaita, a neiloute a dia zumhuai hongsuak, kikhop thazoina tunthei hi.

Tuadan hi, tuailai pawlten vaisai khat ahon nei ua, nungak tangval te etlawm thei mahmah sungsung uhi. I tuailai hunin a siangthou theipen leh a kilawm etlawm thei penpen a kizep ding mah ahi, mi hipna hoihtak lah ahi ngal a. Himahleh, vaisai theih programme ahong tamluat chiangin, video shooting ding khawng leh khawmpi chia uniform chihte a tamluat chiangin, tuailai insung tualniam deuh a kipante a dingin nguina, kingaihsiatna, khanvual phazoulou kisakna piangsak hi, Insung ah kinakna piangsak hi. Telzoulou kisakna in tuailai thahat thazoisak a, depression tanpha tunthei hi. Nidang lai in, kisekdou thei mahmah a, kou inngaktu ding omlou, tuitawi ngai, singpuak ngai, annhuan ngai, naudon ngai, loukuan ngai chihte ah kibuai hi, I hun neihsunsunte ki-aam thei mahmah mai hi, tulai khawvel bel tuam mahmah ta, tukthei taithei etlahna, kizepna hoihtata deihgohna, tawitheih kilawm, a ging lenglengte....i dinmun in a phakchiang a khosakdan kisinsakna kitasam mahmah hi. Saptuam hileh Tuailai heutute hitaleh, I vaihawmna te michih a dingin, a hoih kimvelvek hia? Chih etkimvel kullua hi, huchilou inzaw kikhawm zoulou a, vulningniang ding, dan siangthou a pasal/nupi nei ngamlou ding tampi I seksuah lemlum kha ding uh. Huaite mah ahi, I society in a dopkang masak penpen ding.

SAPTUAM AH: Pathian biakna ichi ua mihing biakna bangmai I suaksak ta uhi. Thawhlawm thawhtam theithei I pakta ua, I puang kheukhou uhi. Pathian lauhna nei a, khawsa chikchik, haksatak a biakin hongkai zou hamham te dinmun ding I khual hetkei mawk uhi. Khatvei lawmte khat in, kou zaw k'ong kikhawm, zoukei phot ding uh, khatawp lam chiangin zaw a buaihuai achi hi. Ka ngaihtuah vengveng chiangin, sungkuan a taxi hire zen a kikhawm, sen neuhneuh toh, kiknawnna tawh sangkhat chu bangmah hilou dan anahi. E khaih! A thugen dik hinatel e...ka chichi mai. Pathian bia ding, Pathian ngai a mi'n biakin haksa haksa a honnaih, Pathian thu sang a thupi ngaihzawk nei a, pulpit apat I kikou kongkong chiang un, mitampite lungliapsak ahi hi. I thupi bawl ding pen thei khalou a, sesum mah buaipih ihih ding leh, buaihuai takpi mah hikha inchia, kivel thak ni. Biakna mun hial ah zaw, bituk bawlna khawvel i paisan hunlawtelta sa ing. Meithainu thawhlawm bangtu kigen ut nawn deklou hiin maw, buaihuai kimvel vek ahi.

GALGAM LEH INNMUN: Thil himhim i gal et chiangin olsam chik ding abang naknak; huchih ding aka, khachih ding aka ichi zauzau vial na a, teuhsuailou dan ahi. A takgam leh galgam kikhai mahmah a, mipite khuisa vengvung a aom lai un, galgam apat nuamtak sa in i tawsawn lawilawi ua, i hangkhe tawihtawih zawzen uhi. Galgam apat lauhding neilou leh hinna/gou leh gam it neilou mah bangin, siattawp tung leh le poisalou ding khopin a kikouzaak lawi om hialmah uhi. Thuhoih ah kitawsawn ding mah ahi, thusia a kitawsawn ek ek mawkin, i mi leh sa te hinna a dingin lauhuai thei a, sisan naisan kisuahna, gou leh gam siatna atun lel zaw hi.Banghiam hileh, kei tel lou, chidaih ding ngen lah hisi.Huaiziakin, galgam apat ahuntawk lel a kitawsawn dan i siam mahmah uh kul hi, minkhem nei a, kibawltawm a, miteng choukual kual te mahmah, nam melma hilel zaw un thei ing.

THUKHITNA: Hiai a tunga thu tamlou kon gelhkhiakte kei mimal muhdan ahi a, ka lungsim honkam tinten khenkhat kon taklak mai ahi, hehna dingin hon laksak kei unla, amawk hamkhiak tei maimai ahi, thulaklouh, chilel zaw un aw, poi thahah louhial ahi. Revolution hia ideih, Reformation, Reformation hia ideih Change, Change ichih chiangin a puak a zangtuan a, haksalouchik a zawhtheih thil ahi. Reformation I poimoh ua lamtuam tuam ah reformation process a pai lel lel hi, hiai reformation process in transparency I society leh sorkar kivaihawmnate ah hon tun henla, mipite toh heutute kikar a awngvang lianpi hukdim hong hi hen. Hiai kikhekna huihnung ngaikhelou a, I kitheihmawhbawl lailai tel leh zaw, Revolution ahong tung ding a, iki-buhal ding ua, iki-busatzaak peetmah kha ding uh, mipite thangpaihna in zawhlouh neilou ahi, "THE VOICE OF THE PEOPLE IS THE VOICE OF GOD", chih thupil chiampellou aom hi.

Heutute Pathian' bawl ahi chihpen dikvek thahah louhial ahi chih mipite muhdan ahia, I kimakaihna te uah ki-enthak chiat ni. A lungkimloute zong huchi bongbong lou in, thuzuau pansan in mipi haikhem khem kei ni, ahong kilehbut khak ding ngaihngam huai vak tuanlou ahi hi. Revolutionary, kichi ten le, a khiakna theikichian uhenla, Babel innsang lamna lam ah hong kidem nawn kei thei le uh, chihchu mipite deihdan leh muhdan hiin thei ing, a dik diam a?

Mipite sik leh tang a organisation/society I dinkhiak vanglak leh, I functioning ah transparency omsak in, a poilou chiang dingte ah mipite a stake holders ahi ua, amai uah luikhia in, theihsak dingdawm chiang theisak zel ni. Tuadan hileh, I maban kalsuannate ah mipi thahatna tawh mailam ki-sawn thei ding hi. Nam leh Gam makaite aw, na makaihna uah, mipite tonpih unla, tup leh ngiim nei ihihleh puangkhia un, huchilou thouthou ahihleh, bangding a 6th SCHEDULE nang2 se!!!!

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING