UPDATES:

KITUAK KAWIKAWI ZAWZEN

KITUAK KAWIKAWI ZAWZEN
By Vungzamuan Valte, Columnist Zogam.com

vungzamuan valte new

Mihingte hinkhua ah ganhingte bangmai a mawk tolten hithei lou hi, khosakna, nektak-zonnate ah inten louten, insak inkhang, u le nau, pi le pu, silh le ten, khanvual le laina, ni le gang chihte tengteng banah zi le ta neite, leh poimohte ihi uhi. Social being ihihna uah atek akhang ki-om a, nat le sat hun, sih le man hun, gal le sa mun, leh niteng khawsakna, nektak zonnate ah a kihuhtuah theite ihi uhi. Mihing ahong pichin chiangin khawsakpih ding lawm poimoh hi. Sungkuan dinkhe ding leh chii kikhahsawn a kisuangsawn thei dingin, ta leh tu I neihtheihna kalbi poimoh penpen, zi leh pasal a kitenna kichi hi. Mi khat leh khat ahong kiten chiang un, atek akhang, aneu alian a kipaklou ki-omlou hial hi, banghang hiam chihleh, nupa kigawmna pen, mihingte hinkhua a dingin hun poimoh penpen asuak a, kithalawphuaipi leng ahihim hi.

Huaiziakin, kiheeldan (courtship), man le mual, kiten dan leh kimakna dan, dan leh dun kichi bawlkhiak ngai hial thok a, lohchingtak a kitenna tan tungtheite bel kipahpih ding mah ahi uhi. Ki-it leh kingai ngoihngoih nazenpite, a kitengkha hichitchiat kholse lou uhi, sehsa Pathian samsuih ahihlouh chiangin, bangteng genin, kichiam hialthok mahle, ahithei taktak kei. Kiten hun ding deihdan kituahlouh ziak leltak a kiphakhen theihna khovel ahi hi, zawluite ngai a khuisa vungvung hial a, hinkhua zang mihing tam mahmah ding hi. Tuaziak khawng adiam maw, zehphi chih aom naknak sek, tantawk a lungkimlou ichihte.

Mi nih, kituak ding a gintakhuai kholloute kituak chitchiat utse ua, ki complement tuah thei zawmah uhi. Mel et a kituak mahmah ding leh kilawm tuanse ding a I gintakte, huchi lawmlawm khollou jel uhi, Priyanka Gandhi in pasal tawi tingteng khat a neihtheih pen minautangte ngaihsutna ah thulamdang asuak hi. Siamna sangtak neite, a IQ level uh sangtuak mahmah maithei hi, nupa lohching pente ahi keihial uhi, kiniamkhiaktu dingsam omlou ua, a spark leng phungphung den hinkhua zangkhawm nilouh himaithei uhi. Banghang a nupa khenkhat huaisetak a kisia ua, banghang a nupa khenkhat lohchingse ahi ua? Pitek putek kheukheute genchimlouh, “pi/pu na ngaih mahmah toh kiteng khalou ahon chi ua, na mangngilhta hia? Mangngilh theihvual ahi kei, tunitan in ka lungleng lailai, manglam in ka musek lai”, achih u`bel thudik leh maan hikha gun ding hi.


1.    Siamna lam a lohching mahmahte toh siamsang ngellou akituak ut phian uhi. Theihna leh khovel pilna bel sintawm theih a, a kisinthei mite a dingin pasalte khazakna nuai ah kisin theih veve hi. Lohchingtak tuak, dik kisa tuak, ka sepsuah sa chi trittret tuak, kisathei tuak linlente kikar aathubuai khen haksa mahmah vial laijang hi.

2.    A tangpithu in pasal dinsang ngekngok in nupi dingsang ngekngok enlah khollou mawk hi, numeite leng huchi thou. A sang leh a niam ki complement tuah uh ichi hia, pasalte gei a ding titeuh, nupite gei a ding tingteng chihte nupa atamzaw hi uhi. Nupa lohching tak hi ut mahmah vial uhi. Kipuak zual (damlouh hitan, patauh, meikang) poimoh leh kawlzaalpi a kuahziang theihding, naupuakpuan a puaksuk ziang theihding chi himaithei uhi.


3.    Numei siangthou vekvuk leh pasal siangthou ngellou kituak kawikawi uhi, khat in hahsiang siang peih vanglak inchin, atawp in kilawh khong uhi.

4.    Numei maingal (suahngal) mahmah leh, pasal zahkai mahmah kituak kawikawi uhi, khatpa zahkaina liahkhuh geih inchin, a hoihluatna om veve.


5.    Numei pau nuam mahmah toh pasal pautam ngellou kituak vialvial uhi. Kilawhsawn theih thil adiam, pasal pautam ngellou hong kokkawlek theisam hi, nui suihsuih kawm in. Numei paunuam in insung a sulum hi.

6.    Numei hangsawktak toh pasal zaidamtak kituak vialvial uhi, khatpen haang zauzau, khat in ngaihsak khollou. Tate thununna ding leh insak inkhang migilou saloute gamtatna daitheutu dingin a muanhuai veve.


7.    Kholakmitak toh innsung a om khinkhian kituak vialvial uhi, khat inn-ngaktu muanhuai, khatpen khawlak a vialvak, thuthak tuamtuam tunjel.

8.    Bazar kaai hattak toh bazar kaai peih ngellou kituak zaw uhi, sum senna kiam thei hi.


9.    Cinema/serial/computer games et/kimawl haat mahmah toh apeih ngellou kituak zaw uhi, hun heksak ahihna ah, khat in inn naa semman bek hi.

10.    Singpi hai-viau toh singpi duh ngellou kituak zaw uhi, na ninhuai zouzai chia a khamtheitu om poimoh hi.


11.     Saptuam vaai leh pawl tuamtuam vaai a kipingpapei thithe toh, huchidan ngai-na kholloute kituak zaw uhi, innsung leh khosakna vuaksuak loudeuh ngeingei hi.

12.     Football kimawl en ut mahmah toh a ngaihsak ngellou kituak zaw uhi, banghang hiam chihleh, zaanhah khaak chia, zing thoutu ding aom ngai ahi.


13.     Sum zeekdan siam toh siam ngellou kituak vanglak uhi. Chilkon luat leng dikkim vek khollou hi, sum zatdan hungeih piankhesak thei hi.

14.     Kiphal/thilphal mahmah toh piakkhiak ding haksa sa mahmahte kituak zaw uhi, innsung vante leh neih le lam a bubit ngeingei.


15.     Thummi leh thum ngei ngellou kituak kawikawi uhi. Nekzonna leh khosakna ah thum keleu in hitheilou a, mahni panlakna mah poimoh hi.

16.     Kichei gige toh kichei ngaihsak hetlou kituak vialvial zaw uhi. Kicheina pen sumsenna lianpi ahi, brand conscious tuaktuak bel kituak moh hial uhi.


17.     Thadahtak toh thanuamtak a kituak mahmah vial laizang uhi. Khat a kual ngeunguau sungin khat in naasem zalzal, hoih lehlam mahmah, kilawh theih thil zong ahi hi.

18.     Mi zuaugen thei khat toh mi chitak khat kituak zaw uhi, diktat lawtel ken chih thupiak aom bangin, ahuntoh kituak a khosak siam pen practical zaw hi. White lie kichi, kihepkhiakna dinga poimohte a zat-hun theih poimoh hi, adiak in traffic police te khut apat.


19.    Ki-Pathian mi sak mahmah toh, huchi ngellou kituak mahmah uhi, athu kia hiam, tanghou kia hiam toh mihingte kihing theilou ahihna ah.

20.     Ekbuk a newspaper sim utse toh hihsukzual theite kituak zaw uhi. Ekbuk a laizial tepse toh tepselou kinei ut mahmah laizang uhi.


21.     Ziing thoubaih leh thoubaih lou kituak vial uhi, khat pen zaan tusawt thei a, khat lumbaih thei hi.

22.     Mehlim duh gige toh, nektak a chilgil ngellou kituak viau zaw uhi. Gige eive, chia kikhamthei I om poimoh a, damtheihna kepbitna banah sum save na zong ahi hi.


23.     Veih nemdeuh leh veih khahsuah ngei ngellou kituak zaw uhi, khahsuah gige pen diklou deuhmah zaw hi, a kidamthei aom poimoh a, lawmlawm tel eive.

24.     Zuduh mahmah toh zudawn utselou kituak zaw uhi, a dawn thei tuaktuak bel kichaivot hijiang mai. Ki-bawlhoih theihna chance om zawmah hi.


25.     A thau toh a thaulou kituak zaw uhi. A thau tuaktuak bel, huntampi ah haksatna tuahtheih ahi hi, rickshaw nasan in paw utlou thei hi.

26.     Mi neihteng deihgoh toh mahni neihdan a lungkim thei kituak kawikawi zaw uhi, tu-lel dinmun a lungkimna in maban ding honmusaklou a, hahkatna kiamsak thei hi. Deihgohna in mihing a tawsawn a, tupna a piangsak hi.


27.     Sungkuan,leh tanau laina ngaihsak mahmah toh, a ngaihsak ngellou kituak zaw uhi. A poimoh leh hutlel piangsak a, kipumvakna khovel daitheu thei hi.

28.    A thau leh a gawngte ki-enlah, a sang leh a niamte ki-enlah, a vom leh ngou hekhuakte ki-enlah, kituak mohlou uhi. Tu leh ta suanding lunggelna ahipen hi. Mihing taksa kikhek zelzel hiven, samsau neite samtom neisak, a gawng neitea thau neisak, a vom neite a ngou neisak, bouble benefit hijiang.

29.     Serena Williams sexy sa-mahmah te`n Sharapova genguang sa uhi. Martina Hingis hoihsate`n Anna Ivanovich hoihsa sese lou uhi. Himahleh, numei hisim betbuat deihte bel pasal nunnemte hi ua, numei nuudeuh diudiau deihte bel pasal hideuh betbuat hise uhi. Kituak kawikawi zelsam hi.


30.     La mi, kimawl mi, leh music ngaina mahmah toh, laa ngaina ngellou, kimawl lunglut ngellou, music ngaina tuansam lou kituak utviau laitei uhi. A langtang in kituaklou bang mahleh, a guktak in hoihzawtham hi. Nektak zonna ah panlatu aom ngai hi, la leh kimawlna in nekkhop pezoulou hi.

31.     Mi serious ngetngut toh ngaihtuah luat leh lungkham luat nei khollou kituak kawikawi zaw uhi. Nuih zong damtheihna chikhat hi a, nuihmai leh nuihging husa in a serious ngetngut pen, a khuak ah oxygen hoih penpen guanlut hi. Insung nuam suaksak a, nuihna leh chihtakna ki complement tuah.


32.     Heh pah phe phu, sin sia, heh phut phut, pau gam gam, khut kuan pah pah, sin leh lungtang sou mai, mit mial mai, achintawk theilou, mi toh kinana thei, kisual ngap den, singkhuah leh tem maipah…..huchidan mihing toh, numei zaidam tak, kituak mahmah uhi. Numei haangsawktak, akbubah apat kawkkawlek kawm, muhteng maiphuai, chihdan suisuite`n, pasal hi-hiuhiau, hi-hithiat, bawi aw, ana huchi nawn ke`n aw! Chi theitu nei utviau uhi. Kituak kawikawi zaw uhi, kibalsialnuai loudeuh ngeingei uhi.

33.     Nungak kikhamisak mahmah toh ngolvei kimaikha ek ut mahmah uhi, kituak mohlou hial uhi. Hehpihna mark a ngaidam dam mai, bawlhoih zou hithet.

34.     Numei naupangchik toh pasal upagemgam kituak mohlou uhi, pichinhuai zawtham hi. Ahangbel, numei leh pasal kikhanvual lawtel a kitengte akise utse uhi, kingapthoh tuaklua chihdan omthei hi. Ahia, numei upa mahmah leh pasal naupangchik kiteng mawkmawk te bel, theihsiam haksa sa mahmah zel. Mihingte deihdan a kibatlouhna himai lou di hia!!

35.     Numei khaini haimahmah in pasal kisiangthousak mahmah maidok utviau hi, lawh pahpah zawmah, muamkhawm tiktik.

Huiajiakin, ka zi toh ka kituak kei, ka pasal toh ka kituak kei, chikei ni, ki complement tuah lel ihizaw hi. Khat siatna, khat a dia hoihna, khat hoihna khat a dia siatna, sia leh pha kipetuah ihilim uhi. A hoihlam kipetuah in, a selam suppress zou leng, leitung nuam mai ding aka hia.

Khatvei, nu Chhungi in, na pa Mang (Pu Thangzamang) toh ka ki complement tuah ua, a hoihlouhna te a paihkhia a, ka hoihnate ken ka lawhsawn a, ama hoihnate tampitak ken ka lawsawn a, huchi in, nupa kituak leh nuamsa ka hi uh, achih ka mangngilh theikei. (opposites attracts chih thudik khat zaw hivaw)

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING