UPDATES:

S5 Box

ZOGAM.COM Login

Ihmut Theihlouh Mahmah Le!

Ihmut Theihlouh Mahmah Le!
Written by Vungzamuan Valte, Columnist Zogam.com

vungzamuan valte new
1983 kum ahi, kha-vaak eng ong mai, eng petmah lai simtheih hial leh kilawm.Nitak dak 12 khitnung ahita, kidek zou nawn mahmah louin thoukhia a pawtkhe khialkhial. Singngat football ground ah sakorte nitak khavaknuai a gamta tamkhoptak om uhi, a um a um ek mawk, huchia Model School mualtung a hunlui mualliamsa leh lawmte toh kikholhlainite ngaihtuah kawm a tuhithiat. Awl a huihvot leh khuavot ahihdan phawkkhia in dak 2 vel a paikik, huchia ihmu thei khong.Lungsim helhholh, thawmhau, lungleng ichihte ziakin ihmut mohna omthei hi.Puaknat tuntun leh haksatna guk khilkhial I neihte ziakin zong ihmut mohna omthei veve hi.Tulai pau takleh stress in ihmutmohna tunthei hi. Damlouhna khat hikei mahleh, taksa tawlsak mahmah a, mood swing omsak zawmah hi, hehphutphutna piangsak thei a, concentration buaisak vial phiangsan hi. I Ihmut chiangin I taksa tawldam a, I lungphu awlpaideuh a, I khuak in memory file tuamtuam ah filing system buaipih mahmah hi, current file, records file, archieve leh thaimang, huaite consciousness, sub-consciousness ahi ua, khudak a zattheih leh sia-le-pha theihna (inner voice) chambers ahi uhi. Huchih sungin, I ngaihtuah khollouh thu leh la, mi leh sa, mun leh mual tampitak I khuakin hon phorksuah mawkmawk sek hi, ka mumang kichi hi, ngaihzawng luite khong I geinai ah tuhithiat, nuihmai deuh a kihou tittit, kigalmuh cheuh chih leh adang dang. Mi sisa khong muhkhakguih olsam mahmah vial laizang hi, gam hohngeilouhna nasan ah kilengtung duaiduai theiteltawk hi. Sikha in ahon um chiangin ki-ik nuahnuah sek a, ki-kiguih zotzot hial hi, huaibel Mau (night-mare) kichi hi. Mangsia pumpelhna damdoi hoihpen chu khut leh khe kikhepsa leh kikilh/kithuapsa a lup louh ding chihna ahi, huchileh sikha in ahon ummoh hial. I Ihmut hithiat sungin I taksa sung a toxin tampitak nuaimang in omua, repair ngaite repair charchar den ahi hi. Tension ziakin depression omthei a, tension ziakin stress omnawn leuleu a, stress in ihmutmohna tun hi, hiaidan haksatna insomnia kichi hi. Taksa leh lungsim tawlsak mahmah a, stress related natna ichih lungsim hileh taksa khawlbu tampitak buaisak thei hi, BP, sugar, liver, ulcer, thyroid, kidney leh metabolism buaina tampitak tunthei hi.

Khaih! Huailam lam gen ut le hikhang ei! Insomnia aom chiangin sleeping pills valhsuk khak olsam mahmah dan ahi, ahia sleeping pills in side effects nei a, addict theih zong ahi hi, huaite a ki-depend louh ahoih pen. Stress release na dingin exercise, hobby khat peuhpeuh, music ngaihkhiak chihkhong phatuam mahmah hi. Itmut theilouh chia…Toupa Toupa chia kikhimleh 1 2 3 sim sim in omzia neilou maithei hi, lungsim paisau semsem, harh deuhdeuh chih omthei hi.Laisim suk ek a phavengveng thei zong ahi hi, himahleh khopi ah bel TV etkhak ek sam mahmah a, TV etnamun a lusuk khak leh ihmut suaksuk ek poilou hi. A phattuamna ensin le:
2002 kum in ihmu mohhial chih hau mahmah ing, nitak khat zinglam dak 2 a thoukhia National Geographic Channel en, nuam ahina ve. China a singtang gam, ei zosuante kipatna lam zaw ahihtuak, tribe khat documentary film ahi hi.
 
Singtang khua khat om hi, huai ah pa khat toh a tanute nih khosa uhi, azi`n sihsan pah hihtuak. A tanute nih toh bi-inn (thatched house) ah khosa ua, akhua pen in 30 vel ding ahi hi. Khosakna dingin hiai khua ah vaimim chingtangpi ua, vaimim mun (farm) lianpipi nei uhi. Tupi sanga neuzaw deuh tu chikhat in vaimim mun khousek uhi. A tanu lianzawpen in apa` nungjui a, loukuan in niteng in ahun zang hi. A tanu neuzaw pen, village school ah kaisak hi, school building senimnem, blackboard langthei hamham leh class room tuam chih leng omsamlou, atuang (flood) leivui khu nungnung lak ah teacher khat in naupang class III tan hilh hi. Ui, ak, vok leh kel nei ua, naupang nu`n zingsang in kelte gamta sak zel hi. School kaitawp chiangin kelte a huangsung ah guanglut in galmuangtak in khumkhawm zelzel hi. Nitaklam chiangin ak te akulsung uah khum khawm zel a, vok ann pekhial lou hial hi. Nitak chiangin a unu tohapa hong vaitung ua, ann huantawm in buaithei mahmah uhi. A naunu bel laisim kithalawp mahmah a, meilah de in laisim sek hi.A unu`n bel nitak chiangin nasep ding hauthei mahmah a, nu omlou ahihna ah tawl kisathei mahmah mai hi. Nu neilou leh sanggam pasal neilou ahihziak un mite simmohna thuak nak mahmah sek ua, hou-se zialzial sek uhi.

Khatvei, a khawsung ua mi khat kiphasak deuh tempawng toh hongdiang suk hi, lampi a naupang nu`n a kelte uh a hawl damdam lai, keltal lianpen ngawng bantan toih mawk hi. Na kel uh ka louuah lut, vaimim teng nesia, sum lah neilou ding na hi ua, na kel pum ka kipuakding chita. Lampilai ah kellu nusia in a kel pum kipuak liahliah lel hi.Nu zong neilou, na pa sanggamte leng omlou, pu leh pi lah neilou, sanggam pasal leng neilou hilai, kon suallui zialzial ding chisuk giap laitel hi. Khosung a tangvalte hon bankhoihsak ding ka hi, pasal leng na mukei ding uh, chizawmah lai hi. Naunu lah chihngaihna tuan theihlou in kap nilnel lel a, akellu lamlai a om kilak in pumkawi tonton hial hi. A pa kiang ah agen chiangin chihngaihna theituan lou ahingei ding, mihausa leh sanggam laina neite ahi ua, bang iloh thei tuan dia? Chi`n a tanute hehnem theilel hi. Mite bangin na nu dam hileh zaw, mite bangin sanggam pasal nei hile uchin zaw, hichitel a simmohna kituak lou ding hi a maw? chi in kap tiktik maimah ua, mittui a luang zoih zoih mai.

Kumtawplam ahita a, annual exam ah naunu`n hihhoih pen hi, result suak chih apaloukuan tungphet kiang ah hilh pah a, kithalawp takin papa papa chi chi mai hi. A pa zong kipak lawtel mahmah ahingei ding, a innsung ua pawl 3 pass omnailou ahihna toh, a zi`n a omlouhsan nunga huchibang thukipahhuai tuanghongtung bel kipahhuai mah ahi, I vok gou ni, a dang bangmah neih nei kei lengzong kipak petmah ihi, chita hi. Insak inkhang hongpaikhawm siausiau ua, vok gou in nuamsatak in, naunu zong a khanvualte toh nuihmai kilawmtak toh phelsalsal maita hi. A pa lah omngaihna leng theilou hial hileh kilawm, alang alang ah gengen mai, kipaktakzet chu ahi. Ahia, a unu pen hongkawdawk mawngmawng lou, lupna ah kual maimah hi. Naunu`n a sap chia hehsan zawsop, apa`n a sap chia hichia honchita, “niteng in lou-na sem in ni-tum tantan khaw-ul kai in naa kasem a, ka nau school nuamtak a kai maimai, kei tung ah kipah naksang in, ka nau tung ah na kipak zaw a, thupitak in lopna na bawl zawmah, huai vok le kei vaksa hilou hiam”, chita hi. Ann nek hun tanpha in lungkim moh hial a, pass lopna kipahhuai ahikei, khasiatna in apumbuakta hi, lungngaihna leh tangkhat kisakna in apa khasesak a, tapsak tung ah kun ngiungiau lel hi.

Zankhua in, mite paitheng zawh in, apa lungkham kisa semsem hi, tangkhat kisa semsem a, azi ngaihtha khong suaksuah zungzung hial hi, anu apa, api apu te tanpha honngaihtuah khia hi. Ihmut chih omthei vual ahikei, mitui kangmoh hialin lupna tung ah thum hithit maimah hi. A tanute kikar a kisiatna bang ziaka tung hihiam, nu thuhilhtu ding aneihlouh ziak uhiam, u pasal aneihlouh ziak uhiam, mite`n ahon simmoh naklai ua, chih kia a lungsim ah omden maimah hi. Huchi in, lungsim hon bawlta hi, ka thou ding a ka nu ka pa, ka pi ka pute omna ka zuan ding chih ahita. Zingsang baihtakin thoukhia a, kawlzalpi sung ah tempawng leh bangbang hiam thunta hi, uum tuithawl nih zong guang hi, tuithawl khat ah zupi siang thun a, khat ah tuisiang thun hi. Huchi in, a tanute thohkhiak ma in gamlam manohta hi, mualsangtung ah kaltou a, gamla kuamtak atuntakin, mun khat apipute kivuina ahingei ding, hon vatsiangta hi….huciin phuisamna leh kahla lungsimtawng denghial in sam vongvong mai hi..”ka zi aw, koilam tuang hon heisan na hiam? Bang ding a kei kia hon nawsia na hiam? Mite`n hon simmoh lua uh eive, I tanute kina na uh ahi, hon theihpih loutel na hihiam aw, hon enmah ve, ka dinmun haksa lua ahi, tapa lah neilou inga, I tanute kua te`n neita ding uhiam? Ka hinkhua haksa lawtel mahmah ahi……Ka nu leh pa aw, bang ding a honpaisan na hi ua, bang dia keikia hon nawsia na hi ua, hon mulou na hi uhia, hon panpih mahmah un aw? Ka pu ka pite aw, bang na lungnoplouhna ding uh khoihkha ka hia? Ka zi`n hon sihsan, tapa lah neilou inga, ka hinkhua haksalawtel mahmah eive, ka tanute bangchikep ding ka hiam, sanggam pasal aneihlouh ziak un mite simmoh leh hamsiat in aom uh, bangdia keikia hon nawsia na hi ua? Hon mulou tel umaw, ka tan selua eive, hong huh mahmah un, hihkhelh khak ka neih leh hon ngaidam un aw? Chi`n kap ngelhngelh mai, lei beng zel, a tempi tawi a lei khetna toih zel, azu hon lakhia, huchia hon phit…

Ka lungsim a khoih khop mai, ei khosakdan toh kibang na e, huai keltal angawng a bantan pa kuate hiam toh tehlua ing. I khosakdan kibang hinatel e, Chinate le huchidan ahi uh maw, I pipute mah ahive ua…ka chi chi mai.

Ihmut Theihlou le chu aw!!!!

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING