UPDATES:

Zomite digital media masapen Zogam.com etkiikna

Zomite digital media masapen Zogam.com etkiikna
By Ninglun Hanghal.

ninglunhanghal

Kithuzak tuah na, information communication hoih zaw leh kin zaw digital media ei Zomi te lak ah leng hong om ta hi. Hiai digital media , ei Zomi context ah www.zogam.com a masa peen hi in ka thei hi. A pankhetu Pu Ginza Vualzong in kum sawm leh thum (13) ahita chi hi. Hiai kum sawm vaal bang ching thei ta ahih leh digital media tungtang eilak ah re-view chi diam etkik na khat hon ngaihtuah sak hi.

Pu-Pa hunlai in Singtangmite kithuzakna ahih leh kam aki gen sawn, ahih kei leh "taangkou" tungtawn in information leh communication a paidan ana hi hi. Christianity hong luut nung leh India in independent ana ngah nung in pau leh lai lam ah khan na nasatak hong om in, Bible, newspaper leh magazinete i honsuah theita hi. Banah Televisionte hong luut in tuin "local cable network" bang inn chih ah om phialta hi.

Tulel dinmun in digital media, social media tuamtuam, website, facebook leh whatapps te zang in i kithuzaktuahta uh hi. Hiai peen baihlam in kin mahmah leh poimoh peen leeng suak hi. Digital media peen newspaper leh television bang lou in mimal in leeng ut dandan in zang thei khat suak hi.

Etsakna diing in www.zogam.com bang ah article leh ngaihdan - opinion suah theih na platform lianpi hong suak hi. Huchi mah bang in mitampite adiing in counter argument leh ngaihdan debate theih na leng hon pia hi.

Kum 13 bang www.zogam.com ana etkol nung in Ginza Vualzong in hichiin chi hi "eimite a dia platform hoihtak bawl khia akihih man in, kipahhuai kasa, internet – digital media khat pankhetu – pioneer khat ka hihna ah ka kipak mahmah" a chi hi. A genzel na ah, "bangtan hiam in mite respect/zahna mu in leeng ka ki thei hi" chi hi. Amah Ginza in a genzel na ah, hiai Zogam.com tungtawn in mitampi toh kimel theihtuahna amah mimal a ding in leng phatuamna khat hong suak hi. Huai kia lou in Ginza adiing in hiai digital media tungtawn in "nam leh gam" a dia pantheih na chi khat ahih na ah tuban khangthakte, tu-le-ta te kiang ah "hichibang kithuzak tuah na – platform - khat ana pankhia kahi chihtheihna in kisaktheihpihna khat hon pia hi" achi hi.

Himah leh, hiai www.zogam.com website leh facebook page pankhetu leh tuni tan a enkol tou ngitnget tu Ginza in haksatna tamtak zong ana tuaktou hi. Digital media peen a thu kin leh thuthak theh zak theihna baihlam tak leh lemchangtak ahih na toh, mimal in leeng "ut dan dan " a khoih theih na nei mawk a hih man in Ginza in "phone tungtawn leh message khong ah "thu nuam lou sim taktak" na dawng tou ngitnget sek hi.

Eilam mite – a Zomi te chi biik leng, thil peuh mah ah "society" leh community – nam leh gam a diing, chih dan in apan khetu mi khat leh nih himah leh, a neitu biik lua chih om tuanlou in mipi' a hi vek dan in pai sek hi. Hiai pen in commitment lam ah hon sukha sek hi de aw chihna om hi. Eilam a diak in local media te ahih leh commitment leh passion taktak mah poimoh pet mah hi. Aziak ahihleh a tung a chih sa mah bang in "mipi" a " gam leh nam a diing" chih hi mawk hi.

Huan ah "business" hilou in a kipe zou leh lungluut te patkhiak leh sutzop ahi taangpi hi. A tung a Ginza in agen bang in "nam leh gam" a ding a pan na chi khat ahi hi. Amah ngei Ginza bang leeng "zogam.com" peen gam leh nam adiing a anapat khiak mah ahi. A resource leh revenue om chihte hilou in, a pankhetu hiam a enkoltu hiam in "philanthropic " chi diam "nam leh gam a diing a contribution" chih dan hi mawk hi. Hiai pen ahoih kei chih na hilou in.

Kum tamtak ana experience na ah, a tuah touh te hon gen na ah Ginza in " Website leh group pat khiak a nuam a himahleh a sustain bel a hak sa mahmah" a chi hi. Zomite a diing a platform khat a hih na toh, Ginza in a gen dan in "admin" – enkoltu tuam tuam koih in leeng om hi. Himah leh hiai platform peen "misuse" theih na kong tam pi khat hong suak thei zel hi in a experience te hon gen hi . "Hun tamzaw ah mahni pocket a pat ngen ahi" a chi a " khen khat in mahni ngaih dan leh – control ut na ziak in buai na bang na tuak sek ka hi" chi hi.

Gam leh nam a dia contribution chih peen a thupi leh ngim, a slogan "Bridging the Zomis" chih ahihmah bang in Ginza in lungkelou in pang tou ngitnget in "ka commitment peen hangsan tak in ka paipih tou a,i gam adia hong phatuam di ahi chih ka vision pen chiang taka ka paipih ahi" chi in chiamnuih thutak in "Haipih deuh le a ngai a hi" chi hi.

Digital media pen nuam in, kin mahleh a enkol tute a diing in na mai leeng hilou hi. Ginza in a gen dan in "effort piak petmah ngai hi. Fel mahmah ngai in, niteng a hih diing om gige ahi" chi hi. Huan ah tawlngalou in sun leh zan a enkoltu Ginza leh adminte'n in thu suah – post te monitoring – filtering bawl den uhi. Huai kia in leeng mi toh ki muh siamlouhna tun thei lai din mun ahih dan Ginza in hiai Zogam.com kum 13 bang ana etkolna ah a experience hon gen hi.

Print, Electronic leh digital media kibatlouhna a gen na ah Ginza Vualzong in hichin chi hi "internet media ah feedback leh response ompah ngal a, a hunhun a update leh explanation omthei ngal hi. Tua banah user interaction tamzaw a, user te toh relationship neihsiam mahmah ngai hi. Users te trust/ muan na neihna dia news supply banah users te queries a tamthei pen resolve sak ngai hi. Print media a bel one-side ahi a, editor in hoih a sakte suah in, mipi a simtu ahi lel ua, mipi response omtheihna diin ni bangzah hiam ngai hi."

Tuhun in website mai leng hilou in Facebook toh WhatsApp ahi non ta a, huchih hun in miteng media hivek simta hi, chi in Ginza in "miteng in information thehzak theita, media te sese ngainon lou in tuchiang in WhatsApp leh FB a mimal khatpeuh in thehzak theita ahi" a chi a. Himahleh Ginza in ana experience dan leh muh dan in hiai personal leh individual "users" te information a na thehzak mah le uh media taktak leh website – portal te mah mipi te'n authentic leh thudik in pomzaw uh hi a chi hi.

Tuhun a digital media – website leh social media mi tam zaw ten a zatzawk na ziak uh amuh dan a gen na ah Ginza in "newspaper leh television ah readers/viewers te interaction om theihlou ziakin, digital media te luun zaw uh hi. Mun khat a thiltung a huai hun mah in update ompah thei a, tua ziakin mipiten Digital Media nuam sa zaw uh ahi" achi a " thiltung khat ahih kei leh topic khat pepeuh a discussion a om theih pen le mi thanopna khat ahi" chi hi.

Tuni tan in mite'n www.zogam.com ana ngaihnat dan uh, ana phatuam pih na thu te uh, kipahpih na leh hanthon na thute Ginza in dongtou zel in, hiai te mah leeng amah adiing in "inspiration" leh motivation khat ahi hi.

Tuni tan in Ginza Vualzong in www.zogam.com peen amah mah lungluut na leh kipiak zoh na toh, mipi leh "nam" a diing chih paipih tinten in sunzomtou zeel in, maban ah leeng pangtou zel diing in gen hi.

Zogam.com bang kum sawm val ei Zomi te laak ah kithuzaktuahna leh discussion platform ahong hih nung in, tuin hiai pen a enkoltu hiam, a pankhetu kia mohpuak na hi lou in a "users" ten tung a leng poimohna "responsibility leh accountability" lianpi om hi. Digital media pen individual leh personal tak bang mah leh public medium leeng ahi hi. Eilam context ah adiak in "mipi" "nam pumpi" platform ahih na ah a enkol tu – thusuah leh thugelhtu te leh "users"- azangtu te ivekpi in "responsibility leh accountability" inei hi. Media apoimoh mah bang in a "user" te poimoh na leeng lian mahmah hi. Media amah kia in a hing thei kei- a reader/viewer leh user om lou in amah kia in a poimohna omthei mawk lou ahih na ah, mimal chih in leeng poimoh na nei hi, adiak in digital media leh Zomite context ah.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING