UPDATES:

Buaina Bul

BUAINA BUL
By L.T. Ngaihte, Columnist Zogam.com

LT Ngaihte New

Zan a Lamka leh a sehvel a mipi sousanna kipatna kana ngaihtuah a, Kabul ka tuntung a ka Driver pan President pa tenna gei a singkung khat hon ensak a,’hiai singkung ahi Nazibullah akhailupna uh’ acih ka phok khe hial hi.Hucidan a singkung cu inei hial nai kei na ua, kithuzakna,kithumuhna hoihtak ipat khiak kei uleh,huai bang le neih theih ahi.Ka muh dan in,I buaina kipatna uh kithuzak ginatlouh ziak hi’n ka mu hi. Hiai mah tuh sappau a ithansak mahmah uh ‘communication gap’ kichi ahi.Hici dan in gen le.

Kithuzak ginatlouhna pen ‘makai’ te leh ‘mipi’ kikal kia hilou in, singtangmi te leh phaizangmite kikal leng ahi.Kithuzaktuah na dia poimoh masa pen tuh taksa mahmah a kimuhtuahna ahi.Huai kimuhtuahna in thukikupna kiciantak tun thei lel hi.

I makai(telching te ka genna ahi) ten mipi te kimuhpih a thu kikuppih titip in bangzah hun a zang ua? Atup angim te uh mipin hoih asakpih hiam ci in,mipi lak a bangzah vei a gen ta ua? A haksatna uleh panpih a agaihna uh mipi kiang bangzah vei a genta ua ? Thu im leh tupguk nei a gamta khat ahi zaw u hia ?Huaiziak mah a mipi te toh thu kikup ut lou a, pumpelh gige ahi zaw uhia ? Guta delhlouh in atai akici bang a,mipi sum di khong a guksak ziak ua,amau apan ki hem khiakhia ahi zaw uhia ?

Mipi lam pang ah, makai khat na meltheih,na tanau ziak a mimal hamphatna ding kia va zong sek na hi hia ? Sum 1000 Government apan hon laikhia inla,akim khat na tang na di,va cici na hi hia ? Aban a kitheihsiamna omna dia kipahman ci a makai te sum a va themthem na hi hia ? Khawmpi a sum bangzah hiam hon thoh na lamet ziak a makai te chief guest dia va cial guigui nak khem na hi hia ? Saptuam a van bangzah hiam na lamet man a makai te Upa dinmun khong va ciam na hi hia ? Mimal a banghiam lokna na lamet ziak a makai te nung delhdelh na hi hia ?

Kimaituah a kikupna omlouh cian,makai te’n amuhkhak peuh uh panpihna leh sum deih ngen a koih uh. Hucibang deihlou te kuamah makai te kiang va hoh nuamlou uh. Ava hoh nuamlou ten ngaihdan nei zaw uh, ava hoh sunsun ten midang va gensia uh!

Phaizang miten singtang mite sum adeih/kam adeih ziak lel a amau va zuan a hon ngai uh. Singtang miten Phaizang te gam a deihziak lel ua kamsiam ua ngaihtuah. Huci didan a kimuanmohna koi a hong kipan ? Hicidan a ki muanmohna a om taktak mah hia ahihkei leh lungsim a ngaihtuahna ? Meitei te khatehnen lel kimu pha’cih bang le tatak mah hia, aih keh makai te gen maimai,amau kisiam tan na dia ? Singtang mite tandia sehkholhsa om lou mah hia ? Amau sang a ei ate nekguk tawm zaw tham mah a diam ? 6th Schedule recommend na a ‘with local adjustment’ akici khong singtangmi te tupna mongmong mah ahi diam ? Hiai provision a omsak pen uh singtangmi te akhualna uh houh a zaw diam, ei adia phatuam a zattheihna omzaw lou di hia ? Huai provision a omlouh leh a om a ipunna/supna bang om a ? ILP bang le, foreigner issue a huapkhak khat lel ahi a,dencia 6th Schedule mu in,ATS mu bang hi lele,enle I poimoh ding mah khat uh hilou hia ? MLR&LR Act  bang le singtangmite gam laksak di cih a tuptak hidin a gintak huai kei. India gamsung a state dang Manipur bang a gamthu a kituaklou a omsam diam ? Meitei te 100 a 60 val mihing in a gam za a 20 khong lel a aten uh hithei himhim di hia ? Banghiam khatcu hihngai mah hilou di hia ? Ei agam hauten neukhat I khinkhiak di mah le hilou di hia ? Tenglah teng utlou, mi ten di lah phal tuanlou. Kristian cu hi.

Hiai atung a dotna tampi omte dawn theihna tuh maitang a kikupna ahi. I makai te mipi te kiang siangthoutak a tuplehngim leh tunna mun tan theihsak ding,mipi ten le sumlehpai lunggulhna kia hilou a,makai te haksatna leh panpihngaihna te uh kikuppih/theihsiam ding. Phaizang lam a laisiam (intelligentsia) te toh singtanglam a late avangkim a thupi imaituah khak thilte a kimuh khawm zel ding. MLR&LR Act tungtang, ILP tungtang hileh,seminar bang neih khawm ding,kikup khwm ding.Tuabel,ki gaal melmak,ommun tuak a ki gaalnak nilouh kihi kha ding.Meitei tekiang le I deihdan latsak ding,amau deihdan le ngaihkhiak ding,huaiapan kituahna mun omsak ding. Tua ipaidan a seminar bang eisung a nei,amau le amau sung a nanei uh. Kitheihbat pih lou, ki dongtuah lou, kithumuhlou. I muhdan tuak diksa,paipih sawm. Buailou vual kihilou.Atawp a Meitei lamlam le hikha nonlou, eimah leh eimah ! Makai te khailupna mun bang le omthei khong di bang. Lungkhamhuai.

COMMENT (1) PHA TA..  
  •  
  •  

#1#1 kgualnam » 2015-09-02 07:54

Pu Ngaihte, thil suut chiatchiat mi, daitak a mun gamlapi apat honna observe gige khat ahi a,agen kenle kapompih mahmah. Palai dia teelkhiakte leh mipite kala kichimatna omlou,amaule genkhawmna dia chance bawl ngeilou, a mipi lama inle vakum ngielou, hiai "disconnect" gahsuah tua i thiltuahte himahmah in kathei.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING