UPDATES:

S5 Box

ZOGAM.COM Login

Abba Pa Chin, Ci'n Kikou Ni!

Abba Pa Chin, Ci'n Kikou Ni!
By LT Ngaihte, Columnist, Zogam.com


Eastern Baptist Theological Seminary kici American Baptist thugin pansan a Bible thu kisinsakna 1925 bullam a Philadelphia khua a phuhkhiak a hi a,huai mah tuh 2004 in Palmer Theological Seminary akici hi. Hiai Seminary apan ka hiang khat khangtou jel in, 1952 in amah a ding Seminary a suak a ‘Eastern Baptist College’ min a hon pu hi.1972 in Eastern College ahong kici a,2001 in Pennsylvania Department of Education in ‘university status’ apiak ziak in, Eastern University akici den ta hi.1952 apan tunitan dong 1300 Eagle Road,St.Davids, PA ah a om hi.

Hiai Seminary ah heutupa Pa Nengzachin kum 1936 in ana ki admit hi. Adamlai in a tapa U Joyful inn, Mission Road ah zingan kane khawm kha ua,agen dan in, Kolkata pan Long a pai vengveng dan ahih tuak ua, mun tampi ah a khawlsuk ua, kei omkhak ngeina Italy a Sicily lawngkhawlna ah leng ava tawlnga kha uh aci hi. Kha 3 phial mahmah Long a tuang a tung ahi ua,khovel pumpi fangsuak kici te khat himai ding uhi. July 1939 a nusia ahi a,kum 3 bangcu Seminary a va kai, Galpi om dekziak a sawlkik a om hiding dan ahi. Degree bel la manlou, High School (9 Class) khong a na zilsak pan un, hong paikhiak a Freshman zou ta, eilam a IA icih dan te,Intermediate level hiding dan ahi.

Pa Nengzachin tungtang gending-sakding tampi petmah om, a gen ut asa ut zong tampi om hi. Tuate lak a thubultum mahmah tuh Rev.Pumzathang ahi. Aman zankhat,atanu inn Tulsa apan hon houpih a, ‘thu tam kuam ka genkhe ta a,tua kipan a gelhthoh a kipat thak ka tum a,eimi masa ten America a Bible ana sinna munte uh phak a,amau toh kisai lai omlai te va et a,a zilna mun leh khosakna munte uh mitngei a vamuh ban a, University President pa kiang a I gam a Missionary a hon sawl uh, ei Paite-Zomi te sik leh tang a, kipahthu gennuam ka hi’ achi a, thupi gen sa in,support tuak mahmah kasa hi. Huai University thuzak tu ding in Pu S T Hau Go tate a gei zek a,amau inn neihsa a  teeng,  amau pa(Rev. S T Haugo) mah zong huai University a nakai kha ngei, a tanu te bang leng na kai zom jelna mun ahihman in, a President pa uh,Dr.Robert G. Duffett toh kimuhtheihna ding hun honna laksak ua,huai delh in, amau inn ah ka bang malam uhi. A tanu thum te inn khat ah a tengkhawm ua, atapa pen a inkuan te toh a gei mah ah a teng uhi. Atanu lai, Maan Sukte leng hiai University mah a Master degree lasa ahi. Niangtui limtak leh home-made sang limtak ka dawnkhit un, sun-an ahon nekpih ua,voksa/aksa leh salad limtak toh an ka ne uhi.Maan Sukte makaihna in,University President toh kimu in, kum 77 a upa laidal ka muhnop te uh muthei in ka om ua,Pa Nengzachin lim laidal a kitak bang kava mu ua, amin ‘N’ a ka zonpat leh mu zawklou, aman ‘Paite Nengzachin’ ci a na gelh ana hi ! Duailou mah !  Student record a akimu dan in, Pu Nengzachin in 1936  hiai Seminary ah na lut pan hi. Registration No.R-673, apianni: 9.12.1912 in ki gelh hi. A sandan 5ft.5” in in ki record a, (huai a alut nung khanglai hi din ka gingta hial hi, huci ahih keileh, kei tan khong lel a sang hihtuak mawk hi). A seminary a nutsiat bel, 1939 ahi. General Remarks ah: ‘Secretary in Mission, Assam, India’ cin ki gelh a,aban ah, ‘Returned to his native home, July 14,1939. While a student in Eastern he was under the supervision of the North East India General Mission. Very acceptable student, although not particularly strong scholastically’ cin ki ciamteh hi !! Pu S T Hau Go in 1950 kum in hiai Seminary apan mah na graduate leuleu hi. Amah min pen Sukte T.Hau Go cin ki gelh hi. Hiai laidal kumluitak,haksa lou hial a honna musak,University Librarian, taksa a kum 84 hita ahi a,pahtakhuai in zahtak huai petmah hi.

Pa Chin tangthu pen America apan hong kiknung in kipan taktak hilel lai hi. Bible translation bang leng America a om sung a apat hikha ding, Labupi bawl ngai asakna, Sintungbu neih kul asakna khong hiai Philadelphia taang leh kuam te azuih zuih lai a aneih hita ding. Inn hong tun ciang a,Typwriter hon puak toh,miallak ci lou a,zing leh nitak a type pah cetcet mai hi ding hia,cih bang a hon ngaihtuah sak hi. Amah a omlai a kaina mun pen mun tuampi ahihman in kava siik thei kei ua, ahihhang in,alai poimohte muh theih teng va zongkhia,tullel a a Principal pa room a nuamtak a swtlou va houlim. Pathian in mi koihiam khat a azat nop te,muntuampi khong a na sinsak sek mah zaw ahi, cih muh thakthak in om.

Rostad Memorial High School a kakai lai a,ka kituah khak uh, a office a kava hou khak lai te, a insung ngei ua kava muhkhak lai ni te,kum 43 bang a cingta na a,ka zahtakna leh ka ngaihthupina a kiam tuannai kei hi. A kha khamuang in om hen la,anasep thupite a mi asa ten kilawm leh kithutuaktak in paipih tou jel uhen cin Father’s Day message I zou ding. Anuai ah lim khenkhat kon koih himhim hi,for record.

pachin1
  

pachin2

pachin3

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING