Lametna Meivak II

User Rating: 0 / 5

Star InactiveStar InactiveStar InactiveStar InactiveStar Inactive
 

Lametna Meivak-II
By L.T. Ngaihte, Columnist Zogam.com

LT Ngaihte New

Zan(9.5.15) zingsang beltak in ka tenna uh, New York apan dakkal 3 vel a taiphak, Pennsylvania lam manoh in Rev.Pumzathang toh, ka loinu Khol toh dak 6 in car in ka kipan khia uhi. 1938-39 lak a Pu Nengzachin leh Pu S T Hau Go kaina Bible College, Eastern University va phak a a heutu te va muh himhim utna nei ka hi uhi
Rev.Pumzathang in hiai visit a ahon ngaihna ziak a genkhiak naciang ah,gari sung a houlim ding, mundang a houlimna hun kimumanlou’ cih ahih dungzui in, ka houlim suak sim uh ahi pen.A gente lak a khat,kana zaktheih leh ciamteh mahmah tuh, ‘tuma zekin Thanlon MLA deihsakna in igam kava fangkual a,thugenna hun leng bangzahvei hiam kava zang kha a,khangthak ten thu ana sui mahmah ta ua, thilomdan a bil doh ua,tua I omna apan masuan dingdan geel mahmah ta un ka mu a,eilawi thilhih khelh leh diklouhna te bangle amu mahmah ua, hon taisan thei hile uh hon taisan nuam lua uh hi ding in ka ummoh hi’ aci hi. Hiai siksan ala in, ken tutung MDC election a thiltung, tangval laisiam khat in, sum zang hetlou a telching ahih akingapna a paipih a,a gamtat leh khohei apan,hong cing ding in leng ka gingta, Lamka mipi ten a ‘chouna’ a lohcinsak kei ua leh,milak a ei-leh-ei ki tawlem toh kibang ding ihi’ ka ci hi. Aman leng nazakha mahmah ahihman in, hicibang thil hong omtheih in lametna pia ahihdan a gen a,ka nih un nopsak cihtak in nuam kasa uhi. Ka loinu le atelziak kia hilou in, ka houlimna uh ‘athu’ ahoihziak kawm in, Pennsylvania leng,official a ka hoh masak lai sang a tungbaih zaw hin ka kithei hial hi.

Lametna icih India sawlkal apan hiam, America sawlkal apan hiam hong kipan ding hilou, unau Mizoram te leh Naga te  a hong kipan dile hilou, eimah sung a,eite lak a khat apan hong kipan ding ahi. Kum sawm tampi hucibang mi muhtheih ding omlouh na ah, mite ngaihtuahna a ngui mahmah a,thillamdang(miracle) ngak bang lel in in khosa ua, sumlehpai itna leh deihna in hon liau a,lamet theihdia hong kilang zual te leng,huai thang mah ah,a awk lum zel uhi. Awksak a kaihniam,kalsuan zoulou dia a thagui keihtansak pawl bang le om himai thei,gamlak pi leh miallakpi ahihziak in,namlehgam it kici,hiai sumlehpai hauhsakna a pukselou a,amau thudikna leh cihtakna a nasem zou dia kipan kuamah a om kei hi. Khang hong kikhen dungzui in,thil etdan leh ngaihtuahna dan leng hong kikheng mahmah ta. Ka kum upat ziak a ka theihna te zattak ahi nawn kei a,ka tapa ten keisang in thil atheitam zaw mahmah ta uhi.Ka theihlouh theite thu mah ka ngaihkhiak ngai, kei tangthu- singtang louneih thu a khangthak te lunglut nawn lou uh, a lunglut nadi san ule om nawnlou,bang hita. ‘Kou neulai a zaw…’ cih dawldawl a,aomdan peuh uh I theihsiamlouh ziak a,mohsaksak mai diklou hita. Ka Pu Rev.Ginneithang in a thugen na khat a,insung a tate omdan I soi selsel cia ning law mahmah uh, inn dang om hileh hon taisan khinta ding uh ahi’ ahi cih bang phok huai mahmah kikkik hi.

Tuciang in, gamdang masawn zawte gam a laisim a,a thilhihdan te vamu a vathei  bang zong om panta.Huaite lak a igam ilei ngaihnatna ziak liauliau a hong kik pawl zong omthei panta.Tunungcian huacibang mi hong tam semsem din leng lametna om thei ta.Sumlehpai vaihawmkhum hizawlou a,sumlehpai tung a vaihawm dia lamet theih tampi omta. Mikhat in, ‘sumtuh heutu hoihlou tawp ahi a,nasemtu hoih mahmah cu ahi’ ana cih zuithei om panpan hita.Tagah-gentheite dinmun in igam dinmun taklang ahi cih thei khia,aniampen te dinmun ahoih masiah igam khang ngeilou ding cih mu kilkel bang zong omta.Huaite sum bangzah hiam vapiak maimah in a khosakna uh kialou a ngaihtuahna uh khek lou ding ahihdan bang leng athei ki omta.Sumlehpai,zulehsa sang a khosak nopna,neklehtak hoihna,damtheihna leh laisinna hoih te deihhuai zaw tham ahi cih mukhia tampi omta.Taksa leh lungsim a gilkial te Pathian thu a hatmahmah dia lametna adikouh dan theikhe panpan ta.Politics sang pipi, itan khak ngeilouh ding te ki gen pihpih in masawnna hon pelou ahihdan thei kheta.Eimah iki panpih kei leh kuamah in hong panpih lou ding ahih dan thei khe panpan ta. Sawlkal makai te,nam makai te kingakna taklou pi ahi uh cih theikhe panpan ta. Thudik leh nasep sa te zang a vote zong ngam bang om ta. Na seem hoih leh semhoihlou mipin thei cian mahmah ta,mundang taisan nadi omlouh man a a thu h ngai hamham lai.

MDC election result in tampi hon musak. Nasem hoih leh gam it ten vote mu ziahziah ta. Sum leh neihlehlam leh min suang te vote kuamah in pe nawnlou, pelou deuhdeuh ding. Dikloutak a hih a vote tampi a cing venvon te kuamah in ngaisang nawn lou! Thupi in kipahhuai kasa.Kuapeuh in kipahhuai isak uh ka gingta. Hiai lametna meivak muhciat sawm ni,huai vak kiukiau pen mutkuang sawm ni. Khalam a halhthakna atunlouhna khangkhat phial hita,hiai sum duhgawlna in hon valh ziak ahi. Taksa lam a khanlohna omzek leh khalam ah leng I sang ding. ’Na vak uh mi muh ding in vak hen’cipa thei gige ni.