A maimai lou ka thiltuah khat

User Rating: 4 / 5

Star ActiveStar ActiveStar ActiveStar ActiveStar Inactive
 

Leitung a I hinsung in, lamdang isak, aziak lah theihlouh bangzah hiam bek kituak ciat ding in up huai hi. Adiakin, khualzin mite ading in,lauh huai sak sim pian bang tuah khak zeuhzeuh ahi. Huaite iva gen ciang in, ‘sikha’ peuh kisuah a, a gen te ‘dawilok’ peuh kihi sak zel hi. Lauhding tam mukha te, ahangsan te hizaw ding hia, a dawilok te hizaw ding hia, cih bang leng kikuptham khat ahi.Hangsan hih ut a, a patauhna u leng kuamah kiang gen khe lout e,hangsan himai mah uh bang hi.Hucite leng a lauh sim hun u bel om ngei din ka gingta.

Tua kon gen dek zenzen pen, akhua leng ka gen kei dia, a mi te leng ka gen kei ding. Ahihziak in, ka tuah khak mahmah, kei ngeingei in ka zak, tutan a ka lungsim a mang theilou ahihman in leh, mangngilh thei lengle ka ut mahmah ahihman in, gen khe leng, ka ngaihtuahna apan a beithei kha hiam cihna leng ahi. Ana theisiam un.

Bangpi lawmlawm zaw hisam kei. Ka tangval lai ahi a, ka tleorol tung, picing nailou ka hih apan khual zin khakha khat ka hihi. Hucibang a ka zinna khat ah,tangval etlah huai lua ka hihlouh hang in, nungak a inn ua giakdia hon zawn bang leng omsam hi.Tuk khat, pi leh pu te kampau a ‘sianglou’ kici te ahih thei zen pi in, a inn ua giah ding lem kasa a,lupna phaitam lamdeuh, a numei ute lupna apan gamla lou ah,khat honna bawlsak hi.

Nitak mundang a pawt paihak sim ka hihman in, ka giahna ding ka tunciang in,a upa lamte ana lumta ua, a nungaknu leh amou uh ana tu ua, ngaihtak a leng paungamlou in sawtlou ka houlim ua, ka lum ta u hi. Lupnung sawtlou in, khawnvak te hekmit vek ahi a, ana lum masa te ihmu khin uh ahihman in, insung a hong dai mahmah hi. A daih dan leng nuamlou thei cih bang te hin ka thei ngal hi.A nungak nu bel,kei luplouhna lam,meipam lehlam a lum ahi a, athawm mawngmawng kiza nonlou hi.

Kei leng, asun nilouh a lampaina toh gim mahmah sam ka hihman in, tawldamtak a ihmut ki lamen in, dai zikzik in ka lum a,ihmut ngal ka sawm hi. Hucia tangtak a thallup lai, ka batsam lak hong thak in,ka khuat a,a phual tektuk hi. Ka meivak a ka et leh,namsia(bed-bugs) ana hi a, ka lukham nuai ah lianpipi nih mahmah ka that ngal hi.Hucin, koizawn hong kei non duam aw cih ngaihtuahna in,hon ihmu sak thei kei a,ka lupna tung ah keikia halh mahmah kiukiuau in ka om hi.

Hucihlai in, baang nawk kha a vasa hong leng ging lelep in ka za a,ka lungsim in,baak(bat) houh adiam aw cihna ka nei a,kuamah in ngaihsak lou uh ahihman in,ka kithei kei sak hi.Ahihziakin, huai vasa hi a kangaih in, tuang tung (singpek tuang) bang boh zel, pai ging setset, ka lupna nuai lam bang hong tung jel in ka thei a,khat veivei bang a gin hong ngaih deuh sa in, intekpa a thou diam aw cin ka lu bang kana phong zel hi. Himahleh, insung a te kuapeuhmah ihmu ciat uh hiam, a dai dide uhi. Ka lungsim in, nungaknu bang le alup phet a ihmu ngal mai hiding hitah e,ka ci a,kei vathou leng,mei cih ngai dia,khawnvak koi a akoih uh ahia cih bang le kithei lou ahihman in, ka lupna tung ah ka om den hi.

Hucia ka lup ciang in, namsia tampi petmah lupna a na om ahi cih ka phawk a,ka pheipi,ka zadang leh siak bawm te nasan a sa hehu hial uhi.Lupna sawtpi loih a om, namsia omte gilkial mahmah,puksi dikuan phialte nek dia om kahita mai cih ka kiphawk hi. Ka lupna tung ah torchlight neukha de in ka man khe zel a,ka khut teng khong anamse gai ta uhi. Light ka det louh a,namsia dangte hong tun makal in lah,den a vasa akal lak a leng,tuang zuul a kipeel tuah vevu uh hileh kilawm in thawm a om a,lupna tung a namsia te sang in leng,tua thawm lamdangtak nei a, phe lulup in lauhna cikhat ahon pia hi.Ka lungsim in, zingsang dam a muh leh,hiai inn a giah non louh ding cih ka thupuk hi. Apaulam di bang ka ngaihtuah a,’veng tawlam a ka lawmten giakkhawm di aci uh’ cih paulam hoihpen din ka koihta hi.

Namsia dou in,meivak toh ka lupna tung ah buai mahmah leng le,kei pamzek a lum te kuamah a phawk a om ci het kei ua,misi bangmai in a thip uhi. Namsia omlou hileleng,tua vasa bang a leng hileh kilawm a ki peel tuah vengvung te lak a,bang kha tang a, hici ihmut tel aduam aw,bang ka ci hi.Bang hiam khat a ‘khim’ tu om hilou in zaw,kuamah dang tuabang mun ah,hici khop in ihmu thei ding un ka gingta kei. Vasa leeng bang a ging hehu te lah,hong boh khawng le uh kilawm thei uhi. Miallak a ahon enen om hileh kilawm sakna ka nei a,dencian ka taksa a dawkna omleh,hong kei kha thei uh ahi cihna toh,ut leh louh in ka kilukhuh a,amalam kumkhat Pherzol te matkhak a ka omzan sang un leng, alehtampi in haksa kasa a,ka lunglai ah lauhna a om zawmah hi.

Awl in zingkhua hong vak thei khongkhong a,ka omdan a guk athei vek mah uh a diam, kuamah in, ’na ihmut a lim hia?, ’na tawl adam hia?’ci a hon dong mawngmawng leng a om kei uhi. A nungak nu bang leng,kisuanlahna nei hileh kilawm in,angeina bang a maitai leh nuihmai in ka mu kei. Ka tunna lam manoh in ka paitou a,ka lungsim a suakta kisakna leh hiai bang inn a hun zang nonlou dia kiciamciam sa in,ka zintunna ka tung a,kuamah kiang lah gen lou in, a zan a ka thiltuah ka ngaihtuahtuah hi. Namsia hon buaisaktu di omlou a,bangmah phawklou a ihmu bang hita leng, vasa bang a insung lupna nuai a kipeel tuah vengvung te’n,ka sisan ana tawp ding uh khat adiam aw, bang ka ci a, ka nak leh ka bil sung te ahong lut a, ka sung a hong lut di khat uh adiam aw bang ka ci a,ka mul akim deuhdeuh thei lai hi.