Kilamdanna Om Theilou - Kei Leh Ka Gam

User Rating: 5 / 5

Star ActiveStar ActiveStar ActiveStar ActiveStar Active
 

KILAMDANNA OM THEILOU- KEI LEH KA GAM
By Kimbawi’Pa

kimboipa

Ka ngaihtuah thak leh Lamka ka nutsiat kum guk bang hong ching dek maimah a, himahleh ka in, ka khua leh ka veng ngai a lunglen chih ka nei kei vanglak hi. Lamka ah om le’ng le ka lawmte a dalh gaita ua, a nopna di ka thei tuan kei hi. Lamka leh Imphal khawng a posting a seppihte toh RUMMY kai a nitum zen a ompihte lah dalh vekta uh; ‘Tongluang’monthly magazine ka saipihte lah sepna leh nekzonna tuam ziak a dalh khin zel uh, Lamka tungkik hile’ng le Aizawl khawng a chim kisa a ka khawdak-dak mah toh kibang leh kilawm ka sa hi. Ka lawm leh ka kithuahpihte a dalh uh kia hilou in ka in leh a compound bang a dalh zak zawmah a, tenna taktak dia bawlhoih nawnna dia sum tampi ka sen ngai zawmah leh a kilawm hi.

Lamka ka nutsiat nung in ka sepna bang a kikheng toutou a, kei lah a ngeingei ka hi a, kiakniam lam ka manoh zawmah hi. Customs Headquarters, Audit Branch a pai masa in huai a kipan Bangladesh gamgi bul Umkiang ah ka va om a, huai a kipan Shillong Customs Division ah promotion ka muh tan Statistics Branch ah hon koih uhi. Promotion ka muh tak in Customs hi nawn lou in Central Excise & Service Tax, Aizawl Range a hong hi. Huai a kum nih val ka om nung in Central government in siah lakdan thak Goods and Services Tax a hon chi ua, huai a henlut in ka om hi. Sepna min kikheng zel in kei min ahihleh khek in a om tuan kei hi. Ka omdan le ka kheng thei tuan kei lai hi. Keimah ka ngeingei leh upat lam manoh lel ka suak hi.

Kum a hong thak tung a, ‘tu kum chu.....huchi...khachi ta di’chi zel mahle’ng kikhen zaw haksa deuh ahi di, ka kikheng thei tuan mahmah kei hi. A hoihlam a kikhen di zaw ngaihtuah in a om tham, a bul kipan thei mahmah lou khat in a om hi. Biakin kai bang le in lam a kai ngei mahmah lou hinapi in Shillong bang ah biakin ka va zuan deuh a, huai in kei ah kilamdanna hon tun hehu kei lele ka om a nuam sak deuh in ka thei hi. Aizawl ka lut ua, biakin ka zuan zek man sam hi. Hilele ka omna utoh a kigamlat luat leh Pathianni a motor muh a haksat luat man in huai paulam a nei ka hi dia, ka tha hong dah deuhdeuh in ka gamlat hiaihiai zel hi. Kei a di’n a hoihlam a dia kikhen leh kilamdan haksa petmah a suak hi. Kei bangbang midang a om sam diam, chih bang ka ngaihtuah hi. Mizoram a Congress solkal in a paipih New Land Use Policy (NLUP) kichi New Economic Development Policy (NEDP) chi’n a khek ua, a gense ut pawl a tam mahmah ua, ‘a min kheng le ule a mite a ngeingei’a chihsak utoh houh kibang ka kisa hi. Ka min Kamchinthang pen Mizo min in kheng in Vanlalhmangaihzuala kichi le’ng le Van lal in a hon it tuam tuan kei dia, Kamchinthang’sapum leh lungsim leh omdan a ngeingei ahi thou di. Huai ahi.

Mizoram bang le ei lak a khenkhat in ou’ di ahi, chi’n i gen ua, hilele ei le Zogam/Zomi i kichi thou uhi. Mizote’n o ban a u behlap a tum dek kei uh. Huchia Mizouram chia khek bang hile ule a sung a tengte a ngeingei thou di ahi uh. Huai in lamdanna a nei kei. Min ah bangmah thupina a om kei. Mizoram a hih ngeingei in a min hilele a puah nop uleh heutu leh solkal hoih a tungkhe di ua, a gam in ma a sawn in a khangthou mai di hi. Gam puahtu di’n heutu/makai hoih a poimoh lel hi. A milip in pawngpaw puahtheih ahi kei, michih in bel mohpuakna i nei chiat uh, chih thu lel ahi.

Huchia, kum guk phial bang Lamka ka nutsiat nung a ahoihlam a lamdanna ka neih theihlouh mah bang in i gam mah un le lamdanna a hoih lam ah a na nei tuan ka sa kei hi. Guite Road black topping a hon bawl ua, hoi hi sa mahmah ua, social media bang ah i lakkhia-khia mai uhi. Motor four-wheeler pei ta zou changchang a ki-black topping ahi. Huai lel thupi sa lua hi hang a, i kipahna uh a neu mahmah lai hi. Mun gamla ka thei kei, Shillong by-pass Road bang a i gam ua lampi hoih kibawl hileh nuam mahmah di eive, ka chi lel hi. Shillong leh Guwahati kikal four-lane lampi hoihdan khawng mu kha loute a dia Guite Road lampi-tuang suak lou a black topping kibawl chu hoih sak di mah leh pahtak di mah ahi veve hi.

Political aspiration (tup) tampi gengen hang a tua vutu maimah. Zogam a kipan a khul, Zale’n gam a kipan a huai, tum deuhdeuh tum deuhdeuh mai. Neulai a tangthu khat Únau Tangmai Tuhte’ i chih uh tangthu a a-u in ‘Tum aw i tum i tum, Nau in tangmai pedah e tum aw i tum’chih bang mai hile kilawm ka sa hi. Lamka ah in hoih, motor hoih tam mah e, a kikhom in a tam petmah hi, himahleh politics pansan a nawmvalh khak a om di pen kiven hoih mahmah di’n ka gingta hi. Politics a makai di a thak hong kivawkkhe leh kilamdang deuh di i kisak leh a luite’khap mah, duh-amna mah a hon zui zel uhi.

I gam uh hong kikhek deuh khak leh chia pawlpi thak bang bawl in heutu bang i limbawl mahmah ua, a hoihlam a kikhekna a om tuan kei. Heutu neih behbeh a kikhekna om tuan di le ahi kei, chih i paidan uah a kilang chiang mahmah hi. Huaiziak a heutu khek leh bawlbehlap sang a i paidan uh khek in a hoihlam a kilamdanna hon tun zaw di’n a gintakhuai hi. Himahleh heutu’poimohna a om kei chi bel ka hi kei hi. Muslim gamte bang le a sakhua uah a na kulmut sawt mahmah uh. Himahleh Kemal Pasha heu a Turkey gam a tumlam gamte’tawndan zuih mah hoihzaw a hihdan a hon tunkhiak uleh huai in a gam a khangtou sak pah hi. India bang le sakhuana lam a sawt a kulmut luat ziak in Britishte’ukna nuai a kipan suahtak didan a gelkhe thei zok kei uhi. Himahleh tumlam gamte’tawndan thei a hong tam tak un zalenna sualdan a hon thei pan uhi.

Eilawi in tua leitung pumpi khut sung a ettheih bang a i tawi nung ua i paidan uh i khek theih kei lailai uleh leitung a nam hai pen suah theih ahi lai hi. Mizoram ah Tuikuk (Brute) a simmoh mahmah ua, a hawlkhia ua, Tripura ah refugee in a va om uhi. Hiai thil central solkal in a ngaihthah thei mawk kei a, Mizoram mah a lutsak nawnna di central solkal leh state solkal in a buaipih uh a ngai nilouh hi. Tua Tuikukte lakkik di a chih chiang un a thil phut uh a sangta mahmah a, state solkal a dia thubaih hetlou khat a suak maimah hi. Refugee a kum tamkhop a tan nung ua bang va zilkhia ua, mipil leh thil thei kua teng in thu muam uh ahia, chih Mizote’a dia ngaihtuah tham a ching mai hi.
Huaiziak a en le India dan siam leh thei dot di zon a, maban a hoih hon kawkmuh thei di mi i poimoh uhi. Huai dia pan la a, i zuih ua, lampi dik a i kipi kei uleh Tuikukte le tuklou suak di i bang uhi. Kei mah le a hoih lam a ka kikhek a, mipite’n le i gam uh a hoihlam a hong kikhek theihna dia pan i lak uh a poimoh petmah hi. Kikhekna hoih i neih theihna di ua taisan ngai a om lele i taisan ngam uh a poimoh chiat hi.