An afternoon with Zorock

kimbawi paLamka lamte'n hon sial mah bang in fb ah 'A Nite with S. Chingnu' chih vel leh a hong tung nawn di 'A Nite with Benny Khongsai' chih a hong ging lai hi. Hiaite gel 'The Malsawm Initiative' in a sai sa leh a sai nawn di ahi. Concert ahi ngei a, Benny a di le concert mah hi di'n ka koih hi. Kei concert hohna pen atung a thupi kipia ahi a, stage performance a om kei, hilele stage performance sang mah a nuam zaw hi'n ka ngaihtuah phial hi. A sim peih na om uleh ana sim d'ua.

ZOROCK toh houlimna di toh kisai zogam.com fb ah kikupna sousang tak mai a hong piang hi. Huaite ana enzui a comment ka na piak leh sousang petmah ahi dia, Mc Muan in ZOCK' mobile number a hon pia a, contact di'n a hon sawl mawk hi. 'Kikhothang simput sak' nadan om nawnlou, ka contact ngal a, lem a hon saksak ngal hi. Himahleh kei equipments bangmah neilou pi ka hi a, ka tonpih di a hong poimoh hi. Biak Phaipi a dawp uleh amah ana lem thei kei zel a, huchi'n tup masak tuh a 'lamzuih' phot hi. ZOROCK mah lah Mizoram a zin dia kisa khin ahi a, huchia a hong tunkik di ngak hong ngaita hi.

Hiai a kipan a admin lamte'n na theih di ua hoih ka sak a om hi. Khopi tuamtuam ah tangval hiai bang 'interview' bawl thei di a zangkhai koih le uchin fel mahmah di'n ka gingta hi. Kei bang a khanglui gemgum lou deuh bang hileh a deihhuai lai hi.

ZOROCK pen Mizoram a kipan in a hong tungkik, chih thu a kizak tak in kintak a dawp ahi nawn a, a tung a nitaklam dak 4 dia kigen himahleh ken ka contact leh dak 1.30 pm lak di'n aman a hon gen hi. Huai ni pen kiginni ahi a, amah Seventh Day Adventists ahih ziak a nitak biakna programme subuai lou dia ut ana hi hi. Huchi'n Biak leh a nau toh dak 1.30 ka delh tingteng nawn ua, hilele amah pen 'Ka Thai' Happy Valley lam a kha in ana kuan a ngak zek a hong ngai hi. Hilele a tanu nih in ngak a omte a fel mahmah ua, nektheih limtak leh singpi limtak toh, houlim toh chiak in ka na chiak hi.

ZOROCK hong tung ngiahngiah, 'a sawt hia?' 'sawt lou e, naute a fel ua a nuam mahmah', houlim kipan hi ngal mai. Hiai houlimna a dotna tengteng user-te' hon post ngen ahi a, kou a va kuante a kuan ka hi ringot uhi. Amah le ana pau ut mahmah a, a thugente bangzah 'hawitel' a bangzah paih di, chih tanpha a theih haksa mahmah hi. Dotnate a hon dawng thanuam thei vek phial a, hilele 'communal tone' lamte a lunglut vak kei hi.

Tagah a kisakna leh ki-Mizo sak toh kisai hichi'n a gen hi. Kum 14 ahih tan in a nu toh tagah in Burma Lusei lak ah a khangkhia hi. Huchia a omkhawm lai un a pute'n a nu pen pasal a nei sak ua, huaitak a apa' kiang a hong kik ahi. Tua maban bang a pension thei hileh a puzawnte' tenna Kolasib a azi-atate toh khosak sawm ahi. 'Ki-Mizo' sak na chih chiang ua Lusei pau zangte na genna uh ahi a, ka pension nung in le Lusei lak a khawsak sawm ka hi a, ka tate chu Lusei ahi mai di uh. Hilele kei a Langel sisan chikmah chiang in a bei kei di. Tua Mizo pau ichih uh Lusei pau bang le tunung kum 500 hong hileh bang pau a suak dia, chih gen theih ahi kei' achi ngat hi. 'Ken chu i kipumkhat theihna uh ahih lele KUKI kichi vek lele ka nial kei' achi lai hi.

Hiai ZOROCK outlook bangchi na sa uh? Fb hileh ka like chiang ahi mai!

A late leh a music toh kisai a genna ah, 'kei phuah vek ahi mai, gim le ka gimpih mahmah, ihmut hun a ki-ihmu lou, zan khawvak bang a ka la phuah di ka ngaihtuah zan a tam,' achi hi. Huaiziak a midang in ngaihtuahna tampi seng a la a phuahte uh siam tak in sa le ule ngaisang lou, achi hi. 'A hoih thei pen dia hun tampi seng a i phuah a hon sa uh chu siam le ule ka ngaisang thei kei' chih ahi a TM@.

A la phuahte' lak a Mizo a in 'Ka Thai' chih ka zi a dia ka phuah ka deih pen a, hilele tua ka nu toh ka va kimuh nawn uleh ka nu a di'n la ka phuak a, 'Chunnu' chih, huai ka deih pen dek sek, achi hi. Paite la ah 'Pallai Ni' chih a deih pen lai hi. Tua a nu kiang a a va zinna toh kisai la khat a phuak a, 'Ka Zinna' chih la ahi a, a music (Trumpbond) tel lai di achi a, tape in a hon play chu a nasa rumrum mahmah hi. Tuni tan a lasakte ah a mutthoh a tel nai kei a, 'Ka Zinna' chih la a telsal sawm ahi hi. 'Chunnu' chih pen record ana bawl nai kei a, hollow guiter a hon lakhia a, a hon sa thriapthriap hi. Hoih mahmah. 'Chunnu' la a chorus tawpna ahihleh 'Tuipui ral ah awm mah ila, Min tawngtai sak tu ka nei' chih ahi.

Music zilna toh kisai dotna khat a om a, 'tuailaite bang music lunglut hi le uh bangchi panlak di?' chih dotna ah 'Music institution hoihtak a a kizir uh ka deih,' achi hi. Amah tungtang a music a siamdan dot ahih in 'Kei chu huchi bang a zirna neilou keimah a kizir mai' chih a dawnna ahi.

Abum bawl a hong kipatna toh kisai hiai ahi. Album bawl ut mahmah, sum lah neilou. A GPF lakkhiat a Rangoon a recording bawl sawm, gen mun sim ahi dia, a zi'n ah 'Hon awi kei leng lah meima thak nei bang mai a gengen di na hih chiang in va kuan mai in, a lohsap lele poilou,' chi'n a dawng a, huai tak a GPF Rs. 10000/- lakhia a va kuan ahi. Hilele a hon release a, huai album a la tengteng hit suak vek mai, hidan ahi.

Album a release lak a lohching pen huai ZOROCK-I ahi.

Album dang a kipat in le hit tuamtuam a tam, achi hi. Huaite a la in a puak ahi tangpi ahi, achi hi.

Eilawi, Music leh La: ZOROCK-II pen Lusei la leh Paite la in a release ton a, hilele eilawi in I ngaihsak khol kei ua, a soiselna di lam I zong daih uhi. Paite hilou tanpha a gen a dem pawl I om lai uh. Huai kia hilou in a late 'lapau' omlou lua a gen a demna di zong I tam uhi. Huaiziak in a Paite la pen a khawng lah lampang ahi. Aman a gendan in Paite la pen a naute'n sum muhna dia a zat theih sam uleh, chia a naute khualna kawm a release ahi. Hilele, gensa bang in a khawng kei mahmah a, V. Siampute' dawr 'Laizom Store' a copyright Rs. 5000/- a ava zuak uleh a la kei lai ua, ZRS in a kilak hiau hi. A music leh late a hoih lam I theih tak un I deih phing ua, hilele a copyright pen Luseite'n ana la khin ua, Luseite mah in ei la a lawk pih zel uhi. Huchi vel maimai khawng ihi uh.

ZOROCK leh Kei: Beh-le-phung ah kinaihna ka nei kei uh. Amah Langel, kei Munsong ka hi. Himahleh Mizoram a hong buai a, a pa Lalngheng pen Sinzawl ah a inkuante toh a hong pem uhi. Sinzawl vel a Langel om kholllou ahi dia kou Phaitong a khosa a hong inkuan bawl hi. Phaitong leh Sinzawl chu a kinai mahmah hi.

Huchi'n a sanggam pianpih teng in ka pate 'pa' achi vek ua, ka nite 'ni' a hon chihpih bok uhi. Huai bang a kinaichik himahle ung U Sang in a pa' kiang a hong belh ma in kou Singngat ah kana pem ua, hun masa lam ah kimeltheihna ka nei man kei uhi. Huaiziak in U Sanga chiah chu huai hun lai in ka mukha nawn kei hi. Phaitong khawng ka va phak chiang a khawlai a 'Sanga music siamdan, a la siamdan' chih khawng a hon hilh uh ka na zak mai ahi. Sinzawl a a in uah ka mikhual ngei kei bok hi.

Kimaituah a houlimna di'n (?) kum in Lamka ah Zomi Nam Ni a chial ahih dungzui in a hong hoh a, huailai in 'Tongluang' magazine a di'n a pa' in ngei ah houlimna ka neihpih ua tutung in bel Shillong a atenna in ngei uah ka houlim uhi. Huai kia hilou a tutung in ahihleh zogam.com a di'n ka kuan ua, U Sang chu mi polhnuam leh kihong hi mahmah in ka thei hi. A ngaihdan ama' kampau khel leng 'zau' kasa mahmah hi. Eilawi in communal mindedness toh thu dot tamlouh a hoih di, a ngaihdan a zau mahmah hi.

Etton huai mahmah khat a om lai, tua a sepna a kipan a pension dia kisa ahita a, a pension chiang a service record hoih tak leh leave encashment a full a lak teitei sawm in concert hiam, mite chialna dang omte nawlkhin phot in a pang trang-trang hi. Kikhual siam ka sa mahmah hi.

 

Related article : http://www.zogam.com/articles/interviews/1189-pu-rosangliana-zorock-tawh-houlimna.html

 

Zogam.com te toh houlimlaiZogam.com te toh houlimlai (file photo)

http://misual.com/wp-content/uploads/2007/12/zorock.JPG

Meixcan lukhu khu Zorock (file photo)