KASHMIR GAM VEHNA (10.6.2018 – 16.6.2018)

KASHMIR GAM VEHNA (10.6.2018 – 16.6.2018)
By Vungzamuan Valte

vungzamuanvalte buktep

THUMAPI: India map i et chiangin a tungvum ah lu-nih nei hi-awmtak in om vevauh mahleh, tumlampang a lu-khat pen POK ahi a, Baltistan leh Gilgit region in zom hi. Suahlampang a lu-khat pen Akshai Chin kichi a China te’n luah uhi. Hiaigel omlou hileh akpum lu-neilou mah bang genggong dingdan ahi hi. Border kichi kichiantak omlou sim ahi a, LOC achih thoh mai uhi, Siachin Glacier omna tantan border danin India in omkhum hi. Jammu and Kashmir kichi state poimohtak himahleh khualzin dingin kisakkhiak thil haksapi ahihziak adiam a, Army lam loute a dingin va zin mawkmawk buaihuaipi khat ahi hi. Galmuang lou leh buaina omden chihdan a i theihkhak ziak leng ahi ngei ding, zinkhiakna dingin mullitna toh ki-om tangpi hi. Tukum June kha in naute suty lai ahih toh ka va gamvak thei zenzen uhi. Jammu toh Kashmir Division chidan a kikhen ahi a, Jammu khopi pen Winter capital ahi a, Srinagar pen Summer capital hisak uhi. Kashmir pen tanggam ahihna toh amite leng tuamdeuhse ua, Muslim ten dominate zou mahmah mai ua, Namaz hih in alang alang ah chiau hehu mai uhi. Kasmir ah Muslimte biakbuk 2000 val mahmah om ahi a, hiai biakbuk a kisinsakna ten nasatak in buaina tokthou hiding in gintakna omlou theilou hi. Kashmir mi leh sate aduang uh chingthei nguaknguak mahmah mai a, Crotian Footballer te toh a taksa piandan uh kibang dekvial laizang uhi.

SRINAGAR AH: Jammu pen lampi ah kitawm kha himahleh UP khawng mah toh kibang sim nenua ahi a, vakkhiak sese kullou suak hi. Lenna a paite a dingin Srinagar boh mai theih ahi a, Jammu apat surface a paite a dingin dakkar 6 val khawng pai ngai hi. Srinagar khopi omna Jhelum valley kichi lui liansim khat in gamzang nuamtak mai abawl ahi a, Kashmir te hamphatna ahihleh huchidan a luiluang ten Manipur Valley toh kibang simsim bawlkhia ua, nektak zonna munpi leh khosakna munpi suaksak mawk hi. Manipur toh a kibatna tampitak om hiven, mualsangtak ten a tuamkimvel ahi a, feet 4600 valzek a sang (sea level apat) himahleh phalbi chiangin vuk hahkiak thei mahmah mawk hi, banghanghiam chihleh, akimvel a mualsang taktak te, feet 10000 lam khawng ah vuk adimdim in ke neinoi sek a huai in vuk-tuk tungsak sek hidan ahi hi. Tuadan hikei leh Shillong feet 6000 a omin vuk tampitak neileh kilawm tak ahi hi. Kashmir Valley chile, Srinagar khopi omna pen zanggam nuamtak kiphah zihziah ahi a, Manipur Valley toh tehkhin theih viau ding hi, himahleh, Manipur Valley pen feet 2400 val-zek a om ahihna ah khua lum mahmah mai a, Srinagar bel khua vot hiuhiau den ahi hi. Hiaimun a khosate a taksa uh hat in taima thei mahmah mai ua, dam leng damthei ahi ngeingut ding uh, sepaite bang um-um peih ahi ua, suangdeng dingin alang-lang ah tai gawnggawng den peih uhi. Vaite a dingin Manipur a khualzin ding a lauhuai dan mah in, hiaimun Kashmir a khualzin ding lauhuai veve a, buaina bawl lam, helna leh nuakna lam toh kisai in Manipur toh kibatna tampi nei uhi (lungkim moh uh). Tuabang kawmkar ah Hindi pau tualleng mahmah mai a, Hindi film late ngaina mahmah zawmah lai uhi. Pakistan te’n huchitel in huna leh buaina tokthou zou gige kei le ubel Kashmir mi-le-sa te’n gamtuam a om ding lunggulh tuntun khollou maithei uhi. POK toh kigawmkhawm a gamkhat a dinkhiak ding chihpen thil hithei taktak ding a gingta khollou tampitakte paukhe ngam lou in dai khinkhian uh hihtuak sa ing. Hiai state sung buaina lianpen hidan a ka muhchu hichidan ahi, politician kichite Hardliner leh Moderate chihdan in kikhen ua, hiaitegel kikar a gap neuchik petmah ahi hi. Election ding chiangin Hardliner ngentang hile uh kilawm maimah a, Opposition a aom chiangun Abdullah te pata nasan Hardlinerte mahtoh kibang in pau phanphan thei zelzel uhi. National Party hat vekvuk ngeilou ahihna toh separatists kichite toh Regional party te kikawi/kigulluk tangpi ua huai in galmuang saklou tangpi dan ahi hi. India sum tan ziahziah kawm in buaibuai peih mawk uhi, buaina ding zong den chihzawk ding hinteh.

Gam hoih leh gam nuam ahihna bel nektak zonna mahmah nuamsa ua, agam ah apple zuaksenglouh piang helhul a, Tulip nasa mahmah mai a (huaise zen a hoih), Saffron kichi khawvel mun tuamtuam ah supply ua, walnut khawng lamgei ah gah-tut-tut maidan ahi hi. Khualzinmite ziakin nek-le-tak nuamtak in muthei ua, Tourism related activities pen Srinagar te 70% khawng in nekmuhna dingin zangthei uhi. Huaiziak in galmuang lou sasa inle nektak zonna buai lawmlawm khollou a, poisak tuak hetlou in om veuvau thei mawk uhi. Kashmir te gawttheihna ding lampi hoihpen a ka muh chu “khualzin kuamah omlou hileh” amausung ah kibalsialnuai hialthok dingun ka gingta. Traditional Cottage Industry kichi Carpet bawllam ah kiva mahmah mai ua, vuahzu in vukzu hen aw, bandh hi in buaina om hitaleh, innsung ah carpet khamuangtak kawm in khui miaumiau den thei uhi. A carpette uh khawlvel pumpi a minthang pha ahihna ah marketing lam buailou ua, sumnak kangthei lou nei den uhi. Kel chikhat PASHMINA WOOL pawden om zawmah a, hiai kel ganchingmite’n asang a sim khoi dumdum mai uhi. Pashmina shawl kichi leh Kasmiri shawl minthang zou mahmah mai a, mantam boksi, hoih boksi, azuak khiak lam haksa salou zawmah ua, embroidery (khutsiam) lam asiam utoh, innsung a nasem kawm in hauhsak lawh thei mawk uhi.

Nek-le-tak lam haksa hetlou in agamsung ah buh le bal piang mahmah mai a, vegetables kichi namkim nei ua, hotel khawng ah nektak man tam lelu tuanlou hial hi. Hotel bang leng mantam lua ahi kei, nominal tak a tuntheihna ding adim aha om hi. Circuit House ka book vial laizang uleh, ut dandan in a pawtkhiak theih kei a anuam keihial. Khualzin ihihchia zalentak a om utna kinei ahihna ah kivial vakvak ut ahi a hamphathuai takin ka omsung un bangmah buaina omlou chile lah, ningkhak kawng ah zaw suangdeng gawng-gawng pawl om kha mah unteh, life goes on chidan in a koih tei mai uhi.

SRINAGAR THUGUK: Buaina tamna leh helpawlte stronghold pen South Kashmir ahi a, himahleh Kashmir pumpi ah India sepaihte a tampetmah mai ua, Imphal airport apat I pawtkhiak chiangin sepaih munteng ah dim metmoh uh ichihdan in Kashmir ah leng diang hehu ua, sial-ek tam ahipen mai uhi. Srinagar khopi sung bel Shillong mah toh kibang mahmah mai a, inn bawldan (building style) leng kibang mahmah mawk hi. Concrete building hitangpi mahleh, rangva khuh ua kilawm thei lenlon mahmah mai hi. Hiai khopi sung ah garden/park kichi tampi petmah om ahi a, City of Gardens chihtheih hialthok ding hi, Manipur dandeuh mah in Dal Lake kichi Loktak lake bangmai lianpi om depdup a phattuampih peuhmah mai uhi. Nupa kitengthak leh sungkuan kuan a lake a hunzang thei khualzinmi tampetmah mai ua, sumnak hoihtak suahsak uhi. Boathouse achi ua, hotel, Inn leh dawr dingin hiai boathouse te hahzat mahmah mai ua, siangthou dingin a gintakhuai keihial (uanglaw liap). Hiai Lake sung ah long bazaar tampetmah mai a, long in sumdawng ziahziah mai ua, khopi sung a Ramzan hun a muhzohlouh thil tampi petmah kizuak ziahziah lel hi, foreign brand toh bang toh. Khualzin utte a dingin, Srinagar khopi sung ah ni 3 khawng hunzang le nuamhun geih dindan ahi hi. Gulmarg lam a minthang khopmai a va sik sese louh ahoih, sum duhthei lawtel mahmah zouzen uh. Hiai Kashmir te kichi India gam in Independence amuh ma apat gam-etlawm leh nuam, Switzerland of the East chia minthang ahihna ziak toh, seasoned thei mahmah mai ua, zei uh hitop mai, daylight robbery chih hial ding hikei mahleh, Tourist spot te ah kineksiatna tampetmah mai hi. Gulmarg pen km 40 lel ahi a, mualtung lam tun touhna dingin sakor a tuan angaisak se ua, Gondola ride (cable car) tuanman khawng a tamsak vial laitei ua, kikhemna ngen ahiziak in Gulmarg chu ahitheitan a pumpelh/phaklouh hoih sa ing. May kha in TULIP hahpak mahmah achi ua, June kha in bel muhding om nawnlou ahi mai, ahia vuk kiakna mun lam a zin-utte a dingin lampi kihong lou chih omthei ahihna ah May khatawp lam lou a khialzin pen safe lawmlawm lou suak hi. Pahalgam lamah mun nuam taktak aom bok a khualzinmite a dingin viak-vak theihna ding tam mahmah mai hi. Srinagar khopi sung ah i vial-vak vak chiangin singtangmite khopi ding mah bang kasa a, hiai Pangal te tenna dingin kilawm lou sakna lungsim ka nei mawkmawk hi. Agam omdan etin pammaih leh eilamte tenna dingin etlahhuai petmah sa ing, gam tutphah fuh bik lawzen ua, hazathuai hial a kei ua!

LADAKH LAM: National Highway number 1 ah pai charchar le Sonamarg lam ah camping site Sindhu luinak lam ah tampetmah mai a, khualzinmi adim in dim tuktuk mai uhi. Vuk-khal om meuhmouh leh mualpang a luangkhe zeizoi muhding tampi petmah om a, luigei tantan khawng kizansuk peupou mai hi. Hiamunte ah hun zangin sungkuan tampipi om tuktuk den ua, Hindute' Amarnath Pilgrimage a paina munpi uleh a kipatna munpi uh ahi a, July khabul in hiaimun camping site dingin zang ua, mihing lakh 3 khawng Amarnath Cave a khualzin dingin kikholkhawm nuanua maidan ahi uhi, huchih hun chiangin Sindhu River Valley kichi pen kihhuai hialthok dingin gintakhuai hi. Hiai Highway in Himalaya mual sangtak kantan a, Zojila Pass kichi lampi kensetak leh lauhuai dinmun tamtakte paikan in kitung hi. Huchi in Drass lam kitung a vukgam leh vuktui pianna munpite kitawn in lui tampi petmah piankhe sak hi. Hiailam agam omdan tuam mahmah mawk a sing-le-louhing muhding om nawnlou chihtheih phial ahi a, ganchingmite akar laklak ah puan-inn neuchikchik kaiparh in khosa ua, vuklak leh khovot lakpi ah agante utoh alang-lang a diang kawikawi in khosa mawk uhi. Vuk in a tuamna gam ahihziak leng hinte, amual te keu velvul mai a, luipang khawng ah mi tamlou chikchik khawng teng tiltel lel uhi. Drass leh Kargil kichi i thei tangpi ding ua, Tololing Hill, Tiger Hill kichi khawng a genchim moh uh Kargil War lai a Pakistan te ahong lutna munpi uh ahi a, Kargil War Memorial leng lampi gei ah bawl uhi.

kargil

KARGIL

Ladakh lam zintheihna lampi thum aom a, huite chu Srinagar to Leh Highway, Manali (Rohtang pass) to Leh, leh, Lenna a Leh Airport boh ahimai hi. Lampi dang himhim omlou ahihna ah kum khat a kha 6 sung vuk in tuamden ahihna toh Drass district, Kargil District leh Leh District teng cut-off ahi mai hi. Huai vuk in a tuam sungteng nek-le-tak ding kholkhawm ua, Army te ngialhouh hahpan thei ngial uhi. Army te convoy heavy vehicles lampi ah kituak mun mahmah mai a, ninhuai hialthok in tampetmah mai uhi. Motor 100 valval ding kizui ngoingoi mai ahi ua, overtake a buaihuai ban ah kipelh ding leng nuam khollou sek hi, kenselakpi khawng ahihna toh. Indian Army te’n mun thawveng deuh teng luahdim himai le uh kilawm hial in detachment lian loulou lampi gei ah lamtawn in om zou uhi. Supply line poimoh lua ahi ding a army truck depot leh supply depot lampi gei ah muhding tampha ngial hi. Civil lam ahihleh, population tam helou ahi ua vukkiak sung a nektak ding district administration in kholkhawm masa sek danin gen uhi. Srinagar to Leh pen dakkar 12 alou theilou ahi a gamla mahmah kuaikuai vial hi, muh ngeilouhna gam ahihziak in muh-ut leh et-ut atam a hun nei deuhte a dingin lampi a zan-giah zialzial theihna ding mun tampi ah om hi. Kargil khua pen hiai lampi a khaw lianpen ahi mai a, luipang a om ahihna toh business centre lianpi asuak a khaw nuampi leng hihtuak hi.

Leh khua pen khaw khangtou mahmah khat ahi a, tourism nasatak in kum 5 paita apat develop mahmah mai a, khaw lianpi asuakta hi. Lenna phual pen airforce te airport himahleh civilian aircraft leng tusak ua, hiai airport busy petmah mai hi. Indian Army ten munpi in nei ua, ITBP te munpi zong ahi hi, museum khat HALL OF FAME thupitak mai Kargil gal toh kisai leh sepaihte vanzat chituam tuam phoukhiakna bawlkhia ua, hun-awl zatna dingin khualzinmite’n hahzat petmah uhi.....

leh
LEH KHOPI:

LEH TOWNSHIP
Uisumluh chihdandeuh in Vaite’n thilkhat a theihkhiak khak chiangun adimpah hawhaw ua, Ladakh lamah leng duaisan louhial uhi. A mite lah mihoih thei ua, a gam lah galmuang mahmah mai a, mihing dimlet hehu hial sek uhi. Summer sung lou khualzin thaman lou ahihna ah vuk kiaklouh lai leh anop lai suam chiat ahi ding ua, two wheeler khawng in amei-apa kikhoh fufu gouh uhi. Foreigner te gamtat utdan chituam mahmah mai a, back-pack achi uhia, trekking achi uhia, ni 7 sung daih di, ni 9 sung daih di, ni 14 sung daih di...chihdan khawngin program bawl ua adventure chikhat, gamvak in kipawkhe lunglung sek uhi.

A SEHVEL: Ladakh lam minthangsaktu leh mite lunggulhna lungsim guantu ahihleh Hindi Movies te ziak ahi tangpi a, Lakshya, Bhaag Milkha Bhaag, Bunti Aur Babli, Jab Tak Hai Jaan, Dil Se, Paap, The 3 Idiots chih khawngte ziakin mihing tampi te’n amun muh-utna lungtang nei ua, Rancho School pen Druk White Lotus School leh Kareena Kapoor Khan Scooter zat pen khawng mu-ut khemkhem uhi. Kargil lam toh kisai ngial houh a cinema te un vaite lungsim zouthoh mahmah mai a, patriotic feeling neisak zouhial dan ahi hi. Travel Agency piching taktak om ahi a, sum-le-pai i neihdan dungzui a khosak theihna, ei kituahpih dingdan lampi zonsiam poimoh mahmah mai hi. Kashmir sung leh Ladakh region sung muntamzaw ah special permit poimoh lou a, himahleh, China Border lam toh kisai munkhenkhatte ah permit ngaisak sese uhi. Hiai Permit system pen Foreigner te a dingdan himahleh Jammu and Kashmir Government in Tax/Revenue muhna dingin hahzat petmah ua, India mite (Kashmir state mi hiloute) tung nangawn ah hiai permit impose uhi. Environment fee leh Red Cross fee chihkhawng telsak ua, lamdang sak luat in aom aka!
LEH khopi sung leh akimvel ah muhding hunkhop om teisam a huaite va etsak teisam kilawm hi. Leh khua ichih high altitude feet 11000 a om ahih ziakin ki acclimatize poimoh ahi chi ua, huai dingin dakkar 24 sung khawlsak tangpi sek uhi. Kou bel manmoh sim hehu ka hi ua, huaidan hih sese khollou in ka va uingolgamphut suk ziau mai uhi. Naupang leh pitek-putek lamte a dingin bel oxygen tawm deuh ahihna ah pilvan kul mahmah leh kilawm sa ing, zingkar khat ka walking leh naksam dekdek chihdan in a om maimah!

Leh khopi sung leh a kimvel ah Thiksey Monastery kichi Lhasa a Monastery toh kibang sim a abawl uh kumluipi khat phak mamoh ahi a, suang, sing leh buannawi-lei a kibawl mualtung ah om veuvou mawk hi. Shanti Stupa kichi mualtung sangtak a om ahia, huaimun apat nitaklam nitumkuan et pen manpha sa uhi. Stupa kichi lamgei khawng ah om teltul mawk a lamdang sakna lianpi ka nei mawk hi. Mihing tawmchik om ahi ua, a bawlkhiak a hautak dingdan ka ngaihsun nilouh sek a, mi khat in kigawtna dan a kibawlkhia ahi tangpi chi hi. Stupa te kivuina mun hivek khollou a, a Raja te un migilou leh thumangloute gawtna dan a aneih uh hihtuak mahmah, ut-leh-utlouh, peih-leh-peihlouh thu hilou a Raja order sepsuah ngai hihtuak mawk hi. Namngyal Palace kichi a kumpite uh vaihawmna munpi mualtung a om 1700 kum vel a kibawl hoih mahmah lai a, i kaltouh touh leh sangsim vengvong ahihna ah kinaksam thei dekdek ahi hi. Huchia mualtung sangtak apat Leh valley i etkimvel chiangin INDUS valley nuamtak kiphah zizia mai a etlawm petmah mai hi. Castle khat bel Archeology department te’n enkol ua kem siangthou zou mahmah uhi. Stoke Village kichi gamla louchik ah Castle khat om leuleu a museum danin a Raja khanglui sungkuan te’n kem uhi. Hiai Stoke village khenlam pek ah mual sangtak om vengvong a Stoke Glacier chi ua, vuk tampi mai pak khekhua zawzen hial hi. Adventure sports chihdanin mun nuam taktak ah leivui khuvutvut hial in DART BIKE zangin kikhoh futfut ua time pass nading in noptuak zawzen hial hi. Huih hatna mun leh huih tamna mun ngenta ahi a, leivui tam mahmah mawk a, muktuamsa a pawtkhiak ngai hialthok leh kilawm.

MUN TUAMTUAM:
LEH khopi apat vakkhiak theihna ding muntampi aom a, Zansker lam ah mihing tamtak tailiam duamduam sek uhi. Landscape tuamtuam muhtheih ding tampetmah mai a, vuktui in a bawl leh huih hat taktak te’n abawl uh ahi tangpi hi. Khenkhatte Snow Water Rafting bawl in kuankhia ua, khenkhatte Khardung La Pass lam manoh in feet 18000 phial a sang ah taitou ua huchin NUBRA Valley kichi lam ah hun zang uhi. Pangong Tso kichi Leh khua apat km 150 vel a gamla ahi a, huaimun tungthei dingin lampi haksa leh vukgam tawn in Chang-la Pass taikan ngai hi. Chang La Pass pen feet 17600 vel a sang ahi a, oxygen tawm deuh mah zaw hinteh, ka sungte ahi neunou gouh ua, naksam chihdan sim, sunglam kitok, awm bing ek-uk leh amhai heihuai chihdan ahi a, altitude sickness chikhat omdan ahi hi. Kipuk phut theihna dinmun om baih mahmah leh kilawm a, sepaih te’n a genmangmoh uh theihkhiak thakthak in aom hi (ni bangzah hiam tawldam phot kul ahi chih). Travel Agency pilvang te’n numei, naupang leh teklamte a dingin oxygen buk pawsek tangpi uhi. Lampi kivial tou kual ngeunguau a picture khawng i muhsek dante uh kitawn tam mahmah mai a, kivial suk, kivial tou chihdan tam petmah mai hi. Chang La khen in vukgam kitawn suksuk a tuichinna munte khawng vuk suak vek ua atung ah va diang kheukhou sek uhi. Himahleh, hiaimunte ah vuk om sawt khollou a tuahfuh mahmah chu ngai ahi hi.

PANGONG TSO LAM:
Mualsang taktakte teptuah kikar ah wind Corridor chihdan omsek a, huih hatthei fufu mahmah mai a, leivui tuahkhu lunglung mai a, Magnetic Field omna mun ngailhouh ah numeite banghiam lim lang-throk zouhial in mutpailet zouhial hi. DORBUK Valley ah Indian Army te munpi om a munzang nuamtak mai ahi, himahleh Galte’n khumkha hile uh taikhiak a haksa viau di. Arunachal Pradesh a Walong Battle field ahon phawksak hialthok hi, China te’n 1962 in Indian Army Brigade khat umkimvel ua nuai chimit hithet hial uhi. China Border ah Pangong Tso kichi Fresh Water lake lamdangtak mai om a, huai chu China pau/min ahi hi. Hiai Lake pen a gal apat a colour chituam mahmah mai a, sky blue chihdan in kimu hi. Pangong Lake in colour 1001 nei ahi chizawzen hial ua, i muh hun leh muhna mun toh kituak zel in a rong/colour kikhek khek thei mawk takpi hi (Youtube ah enle a chiang pen di). Hiai Lake pen km 135 a sau ahi a, India sung ah 1/3 lel om hi, China lam Tibet lam ah kizan phei peupou a sautak ahi. Vuktui luangkhawm te bawl ahi a, luankhiakna ding nei tuanlou ahihna toh mual leh mual kikar a ching memouh mai ahi a, feet 14000 vel a sang a huchibang vuktui chingkhawm om chu a nasa khop mai, phalbi chiangin vuk khal asuak a atung ah gari khawng a tai ziahziah thei chi uhi. Hiaimun ah camping site nuam taktak bawlkhia ua zan-giah theihna mun tampitak om hi. The 3 Idiots film shooting namunpi ahi a hiai film in Pangong Lake minthang sak semsem hi. A tui geinai ah bel fresh water (siang kilkel) hiven, khut a i khoih leh vuktui vot peuhmah, khoih ngam di le hikei, hon tawm tonton maidan ahi, tuipi danin wave neizawmah venchin a thuk dingdan theihbut hilou a.... A depth (thuklam) lamteh aom uhia ka chihleh, tongteh le om kei uh, feet teh le om kei uh achi uhi. Indian Army te theihdan in Metre 200 a thuk ahi chi ua, feet 600 val chu hi himhim dingdan ahi ve. Huchituk a tui-vot (vuktui/vuk-suak zel) ah ganhing om dingin gintakhuai lousim bang mahleh Albatross muhding om ua, sanga chu om ahi di, khenkhat te’n sanga lianpipi om ahi chi ua, mat ngeilouh chu ahi ngei ding uhi.

autonomous
AUTONOMOUS DEVELOPMENT COUNCIL:

LAD Council Secretariat
Ladakh Region pen Autonomous Region chihdan in kem ua, Gamhaksa leh munhaksa ahihna toh nidang deuh lai in The Ladakh Autonomous Hill Development Council chihdan in 1995 apat LEH District leh Kargil District te kivaipuak khawm uhi. Kargil District te’n Council tuam ngen ua, 2003 apat Leh Autonomous Hill Development Council leh Kargil Autonomous Hill Development Council chi’n atuam tuak in kivaipuak ta uhi. Drass district leh kargil district te ah Muslim te tampen ua, Buddhist te tam lawmlawm khollou uhi. LEH District ah bel Ladakhi te tampen ua Buddhist ahi tangpi uhi. Thil lamdang ka sak mahmah bel, a population uh tawm petmah mai a, mihing tampi om hile uh nektak muhna ding Leh khopi sung lou ah om mahmah lou chih ding himai hi, ahia numei population tawm petmah mai a, pasalte a dingin zi ding muh haksa lawdeuh leh kilawm sa ing. Buddhist ahi ua, zi neilou a banghiam tumging a, banghiam mutging a, banghiam peiging kawmkawm leh phuisam kawm nulnul a hinkhua zangzang thei a tam vanglak ua, kizen kawikawi thousam leh kilawm.

Hiai Autonomous Hill Development Council dan a kivaipuakna felhuaipi khat hi in mu ing. Sixth Schedule neilou ahi ua, development toh kisai lam himhim akhut uah koih hmiah maidan ahi uhi. Division tuam a om ding lunggulh teisam ua, Jammu Division, Kashmir Division banah Ladakh Division dang khat bawlkhiak a Commissioner khat in a kep ding chihdan ahi hi. Khenkhat te’n Union Territory neihding lunggulh ua, a local politics uh om tei neuhneuh sam ahi. LEH khopi leh Kargil khopi te ah Municipality nei tuaktuak ua kizen mahmah mai hi, huchi in, LEH khopi pen khang hat mahmah ahihna ah LEH DEVELOPMENT AUTHORITY chih nei ua, land development lam leh housing lam ah masawn mahmah hulhul lel uhi. Cold Desert gam ahia, Afghanistan gam khawng TV a imuh danduh a gam keu velvul, sing muhding le omlou, teklei inn sang a tungman in (mud House) tamna gam ahi a, vuah zuklouhna gam ahih toh lei-inn (mud house) te mawk siat lou hial dan ahi hi. 2010 kum in LEH khopi tungah CLOUD BURST thupitak mai om kha a, FLUSH FLOOD in a khopi sungteng nuaimat gai dektak hial hi. Hiai khopi nasatak in dinkhe thak nawn ua, concrete building ngen sim in inn bawlta uhi, sumsinna munpi, tourism ziaka sum luak oih-oih ahita ua, gamzalen leh gamthawveng, gamgalmuang ahihna zarzou takmeuh ta uhi.
EILAM TE’N LENG AUTONOMOUS HILL DEVELOPMENT COUNCIL CHIVANGLAK LE FUHZAW LEH KILAWM....SIXTH SCHEDULE LOU THOUTHOU DINGIN CHU!!

THUKHITNA:
Khualzin ichih thil haksapi khat ahi a, I zin chiangin theihtuak leh theih ding a kilawm tampite kepbit zelzel dingdan ahi hi. LEH gam ah kizin nawn kha kollou ding in ka kikoih, khatvei zin le deihkhop huai mahmah, anuam kei chihna hilou in, a haksa em a, sum senna leng atam. J & K State Road Transport Corporation te’n mantawm chikchik in bus taisuak sak vek ua, public transport te zia toh kituak a khualzin utte a dingin sum hautak louchik a zin theih ahi hi. Jammu apat Bus, Srinagar apat Bus, Kargil apat Bus, Leh apat Pangnong/Nubra etc ah Bus paisak vek uhi. Share taxi leng hoih mahmah, gari tuam hire fafat dingin bel hautak lou theilou, ahia, Lamka apat Imphal Airport tan leltak 3000 a hire theite a dingin bel hautak chih omsam kenteh, Shillong apat Guwahati Airport 3000 khawng a ki hire thei hi a....
Tuakawmkar ah, Srinagar khua ah naute Khupsuanmang Valte innkuante BSF te Training Centre uah ana om ua, Officer mess ah zankhat nuamtak in ka va giak ua, khamuangtak leh lungtaitak in hiai khualzinna ka zoukhia uhi.
KASHMIR A ZIN DINGIN TUH, SUANG DENGTE LAULOU A, SUANG DEN A KULLEH KENLE KA DENG THEI TEI THOU...CHIHDAN LUNSIM NEIH KUL HI.
Kashmir te’n kuva ahai kei ua, muh ding leng omlou himhim ahi. Cigrette a hai mahmah mai ua tep khu-hluah-hluah maidan ahi uhi. Pan Masala na zonsiam leh na mu zeuhzeuh ding a, lamdangtak in KHAINI KAWKTA te Pahari te’n muam uh ahi achi a, Gulmarg ah Sharmaji store ah om tektuk zenzen.

pangong

PANGONG LAKE