Bawng Lei-ding Zong

User Rating: 0 / 5

Star InactiveStar InactiveStar InactiveStar InactiveStar Inactive
 

Bawng Lei-ding Zong
By Vungzamuan Valte, Columnist Zogam.com

vungzamuan valte new

KUANKHIAKNA: Kineulai sim hiven, 1976 kum hi`n ka thei milmial, papa`n bawngpa vanpawte leiding` va zong ni chi hi. Bawngpa vanpuate 4 kinei khinta a, Dumde (Burma) khua apat Duma kilei a, achilgil pha mahmah khat ahi hi. Tualkhiang (Burma) khua apat khat pen Tualkhiang kichitop mai, haat peetmah a, pai vurvur mai hi. Bula leh Vara pen Thangchungnung bawng zatlai kilei ahi uhi. Hoih thei mahmah ua, thumang thei petmah uhi, a chilgil pen chihlouh siah. Duma zaw akii lah hoih lua inchin, a pian lah fuhtabuang, a thukthuvum (hump) bangtu apai kawm in kisawih hlerh hlerh maidan ahi hi. Akii hiam chihtak in hiam maimah a, lei leh khoubang khong, singbul suangbul te ah tathiam gige teltawk hi. A hunlai a dingin Singngat khuasung ah Animal Transport Association te bawng neih tengteng lak ah CHAMPION hihna dinmun len nilouh hialmah hi. Lau leh ling doidoi kawm a khoihte thei mahmah a, ngamthoh deuh a hihdeuh fife loute si ek nuam chitchiat hi. A lau in naute innnuai apat kapsa in hong taipawt chelchul sek uhi. A gamtatna uah tlafal (maltat) utse a, zonmuh haksa mahmah sek hi. Bawngpa vanpaw ding leh sumdawn theihna tham ding adang kitasam a, papa`n khat zonbeh lai ding chidan ahi hi.

Ka kuankhiak un, Singngat khua apat khe in nuamtakin ka pai zarzar uhi, Tuivai kaan in, Maukot ban ah Tuivel, huchiin Mualjin ah ka giak uhi. Tuivel luidung a naklam kon zuitou taktak ta uhchu a haksa tel mai aw! Phullakpi, mun lauhiaipipi, khe lah naal, suang lah naal, hiam thei boksi, kital kital mai, siakguk, khepi -kheme teng nna thremthrum mai. Luidung kizui tou kizui tou mai, lampi dang lah omlou, Burma gamsung ka lut ua, Tuivel luidung ka zuizui ta mai uhi, hon lammanpih chu ahi dek mai. Mangbathuai chihlouh chu gending avang khop mai le! Mihing` sulnung muh ding mawngmawng omlou ahihna ah; papa zong mangbang lawtelta zaw ahi dia, lampi haih, lammang ka hihdan uh hon genta hi, gilkial tongkhong kihita ahihchia, khua muhding lah omlou, mihing` khekhap aom hiam chih ahon etpih zel a, lah muhding aomsi kei, pheisam khekhap nasan muhding aom kei hi.

Huchia mangbangtak a ka omlai un, maban sawnzel in, ka pai hamham ua, luipang taklam ah mualpang nuamtak ka mu uhi, loutul (buhlakna sa) ahia, pai zou nawnlou sim kihiven, loubuk a giahmai ka lungsimta uhi. Himahleh, nekding lah omlou ahihchiangin, ka paisuak teitei uhi, khua mialdek kuanlam ahia, lou lampi zui in mualtung ah ka kaltou uhi. Huai vokzawi chialek lampi in, koilam khua hon tunpih ding ahiam chih kithei lou hial hi. Mualtung ah kong khawdak ua, thawmging kiza chiaichiai thei hi, tua thawnging pen bangdang hilou in dakpi leh khuangpi ging dungdung khong ahi a, zu-ne a nuamsa ahihdan uh chiang mahmah hi. Papa`n, Lingthuk khua ahi ding chita hi, Pathian thu-awi –loute omna khua ahia, Pathianni chiangin zu-ne in nopbawl sek uh ahi chi hi. Ka paipai ualeh, khawmial nungin Lingthuk khua ka tung ua, bawngpa nih hoihtak nei aom uh chih honhilhta uhi, huaite inn ah ka kinga ngaltop mai uhi.


LINGTHUK KHUA: Lingthuk ah ka giak ua, zankhua in dakpi leh khuangpi gingden maimah hi. Khua lah vot, zan lah sawt hiai hiai, thawmging lah ngaih deuhdeuh mai, kilaugusim giugiau den hi. Ihmut leng mumumallou in zingkar khua ahong vakta a, bawng neitute`n lah zuak sawmlou ahihchiang un, beidothuai petmah asuak hi. Dawp theihdan chiteng in kidawp mahleh phal tuanlou ahihchiang un, koilam manoh ding ahiam chih ngaihtuah kawm in kidawi keku hialmah hi. Khuaivum khua ah bawngpa hoihtak nei aom uh chih chanchin kipahhuai kiza hiven, ka sun paiphei ua, mualtung a tesawsing leh farsing hoih taktakte huih in amut ling duamduamna leh huih vot hiauhiau te`n ahon vaidawnna mun ka tungta uhi. Khawmual kichi, kotsuah ah hansuang kitung ferfur khong kipaipel a, nitak khawmial kuan in ka tung thei ham uhi.


KHAIVUM: Khuaivum khua ka tuntak un kingakna ding lah theituanlou ka hih maimah chiang un, bawngpa hoihtak neite inn ka panta uhi. Inntekte lah tanu kha in a buaisan mahmah mai ua, tanu khakna vok gou in, zu lup ua, nuamsa mahmah lel uhi. Innsung ka lut ua, bawng neitu ka houlimpih chiang un, tuni zaw nopbawl ni ahia, zingkar chiangin I houlim ding uh achita hi. Tung chu ka hita mai ua, tapsak ah meilum awi in khuk kheptou ngeungou leh ngal sausim petpuat in ka tu tei reurou hi. Zu ne ua, nuamsa mahmah mai uhi. Inntekpa leh a thallouh..thusa te`n papa kiang ah zu tep dingin sawlsawl maita uhi, papa lahchu kipathianthu awisak chihmahtak, ut bilbellou mawk hi. A sawltute lah kuhkal, a nialpa lah kuhkal, sawt kuamtak kinang nilouh mah uhi. A tawp a tawp in, tapsak apat, hepa.. mi`n ahon sawl ualeh nial teitei di ahisam a, na duh tam keileh na tep tawm dia, aminpu bekin tepsak ve, a kipahna ding bek un..ka chi eksam hi. Papa le kisuanglah kawmkawm in a kuanta a, tep zaw a tepsam a, bangzah tep ahia chihbel kitheilou hi, tep taktak lou le hithei. Huchi in, a kipak mahmah ua, inntekpa bang nui siusiau in khuang beng ging datdat mai hi.


MOU KHAKNA: Khuamialta ahih chiangin, mou khakna annkuang ahon luita uhi, voksa mehpok ahia, ane toh, ane theilou toh, annkuang a kisawn gawng gawng lah beilou, kina kongkong gouh uhi. Kei naupang hai chihmahtak, alaupen in ka pangtaget hi, ann ne mumal ngamlou in, gilvah loupi in ka khamta a, khutsil in meigei ah ka kualta hi, lausim maimah ihih chia, avot a vot zawmah lai, puanlum lah omlou, huih lah nung huau huai zawmah, farsing khong faifuk ging hurhur laitei. Tanu kahakna hun ahonzangta ua, van kensak leh saseng puaksak chih khong bukimtak in inndongta te`n ahih sipsip uhi. Huchi in, tanu pen a pikia ua, innkongtual ah anu akah in a kap ta maimah a, paisaklouh sawm in leitual bei maita hi, nuta ki itna huchituktel ahi maw chih ahon phawksak mahmah mai. Hunsawt kuamtak a kinawk khit nung un, tanu pen mittui tampitak toh khakhia ua, a pasalte in manoh in a paithei khong khongta hi.

Zansawt e sawtlou e, chih omlou ahi diam a, zu ahon ne nawn leuleu ua, papi hon kisan mahmah lel uhi. Kei pangkhang lam ah ihmut sawm in k alum bimbem a, amau innsung leh kongtual ah lamtual sai maimah uhi. Khenkhat a sa nekhalou toh, zu deihkhoplou toh, singkhauh khong in leitual khen puak dumdum maimah ua, lau in ka liing liing maita hi. Kisual buai petmah ua, ihmut ngaihna aom himhim kei, ommun ah sihkhak ding lau in kizial khinkhian in ka dawi keekaw hial hi. Zankhua in buai ua, ihmu leng omlou ding isak leh, zingkar in a siang hiuhiau mawk a, lamdangsa takin ka dak kualkual a, mihing` si kai neunuai, lei lak a si (blood) om ding leh singkhuak a kikhenlum gawp ding uh ka sak leh, huchizen hial omlou ahi ding a, zing singpi dawn khawm in a houlim chiauchiau zawmah uhi…


BAWNG MAT-SAWM: Khuaivum ah zingkar singpi khawng dawn zou in houlimna kineita hi, inntekpa`n a bawngpa zuak ut ahihdan hon gen a, kithalawptak in ann nekding ka ngakta uhi. A gendan un, a bawng pen inn leng pai ngei ngellou khat ahia, gamlak ah gamtangden leh gamsa bang phial a haat ahihdan genchimtheilou uhi, beidothuai simpian pah hi. Zing ann nekhin phet, a naute nih toh mi li ka kuankhia ua, khauhual leh chi (salt) ka pua ua, tempawng bel sakhau ah kikuah gige hi. Gamla simtak ka pai nungun Tuivel naak lam gamnuamtak, zaanglou dia bawl theih ding lah phullakpi ah ka tuak lutsuk ua, bawng hon gamta tampkhoptak ka maituah uhi. February kha ahia, gamkaang in mun khenkhat a giausak thousam na a, muntamzaw akul in akul maimah a, lampi mumal leng omlou ahitoh, mihing piching dintantan ding bii, pumpeng, luang, leh gamsai pou ngeingoi kawmkawm ah ka lut kulkul ua, daidaw atam a, kikawt ngikngiak hial hi.

Gamsa chikhat sathuum (skunk) ichih a nam a namsia mai, I painalam teng ah zun hon thakkhum venchin, agim kipumnam hialthok a, luak lamlam asuak thei hial hi. Khekor ah agim namden maimah a, milak ah kisuanlahhuai tuntun hial hi, perfume gimsedeuh, hatdeuh toh a tehkhin thei viau di e. Luigal lam ah bawngpa pen a neitu te`n galmuh ua, ka painai dek chiang un, a kikhoh maimah a, mangbat chihtakpi in mangbathuai maimah hi. Ka uum ek chiang un a kikhol manghiau zel a, ka muh chiangun gamkawm ah a lutmang zel hi, Sakhi leh sazuk matsawm mah bat in a om a, delhphak ngaihna omlou in a diang zorzor maimah hi. Gamsa toh kilamdanna omlou hial in amual aguam a kantuah zungzung mai a, gim le tawl` thaman omlou ding chih kitheichiang mahmahta hi, kou sangin a neitute beidong baihzaw uhi. Huchi in, lohngaihna dang omlou, lohsam ihi chi in innlam paikik mai ka sawmta ua, suun hunin Khuaivum ka tungkik leplup thahah uhi.


SERBUNG AH: Inntek te`n suun ann hon nesak ua, bawng leiding man zoulou in ka vul ningniang hial uhi, papa`n chihngaihna dang theituanlou ahi ding a, na pite khua Serbung ah I hoh mai ding ahon chita hi (pipi pen Serbung a pasal nei ahia, papa NI taktak, pupute unau a aneupen ahi hi). Lohsam in Serbung lam ka manoh ua, nitak khawmui kuan in ka tung uhi. Serbung pen khaw lui mahmah khat ahi a, mualsuang thupi taktak tamkuamtak khawnawl ah muhding aom hi. Sing-inn hoih kuamkuam leh rangva inn nalh simsim muhding aom ua, khosa thei thousam hihtuak uhi. Sai-sek, sekkhum leh zawngtah mahmah atam ve, nekseng louh gah kai tuttut maidan ahi.

Serbung (Selbung) khua 1894 in Hangzote sat ahi a, 1896 in Pu Thangkhai leh a innkuante Songtal apat pem in hiai khua uk uhi. Serbung khua agam hoih in lian mahmah a, Tuimui, Lingthuk leh Khuaivum khuate hiai Serbung khua apat inndang (Serbung khua kisehkawm a zuakkhiak) ahi uhi. Serbung khua ah ankhing, tuibuk, mim le tang kiching mahmah a, gamsa tamna gam zong ahi a, nidang lai in inn 300 khong phazezua hial dan ahi hi. Mizogam toh Manipur lam kikawmtuahna lampi poimohtak hingitnget a, khualzin gamvakte leh pemtuah hehute tot mamoh khua ahi hi. Mi tamtakte a dingin, gamdang ahihziak in khamuanna khua leh bitna khua ahi a, sungkhat laina hoih neite a dingin tawldamna leh khamuanna mun ahi hi. Serbung khua pen Vaikhotlang, Suangbem, Haichiin, Lingthuk, Khuaivum, Vaivet leh Tuimui khua te`n umkimvel uhi.

Pipi pen (Donvung) nasem mi diktak hi a, lunat neimi ahihziak in Singngat apat APC bawm liante kikhak sek hi. Zanah (dum), thaksik keu (malta keu) zuakding neizou gige a, a pasal loh nelou phial in nektak sutuah thei hi. Pu Thongkam Tangpua (a pasal) ahihleh, Pastor masa hi a, hiai mun ah penson tanpha sem hi. Vangtahna ziakin ta neilou ua, kemtu ding a asanggam tapa a ompihpen un a sum uh 30000 lai late 1970`s in taimangpih a, tuaziak in a penson chiang un (1980`s) Singngat ah Pa Sangkhum Tangpua hong bel uhi. Pipi pen huanhai neimi hi a, sekkhum gahtuttut mai, lah anetu ding omlou ahihchia, kitai petmah himai, a radio uh sing-almirah chia lai ahia mak kisa mahmah memouh hi. Ak ahon gawh ua, papa nini leh gangangte kiang ah ka khamuang petmah ua, lohsapnate ka theihngilh phialphial zawmah uhi….


TUIMUI AH: Nitak giak in hun ka zangta ua, bawng leiding koi ah aom mahmah de aw! Chih kia papa lungsim ah thamden hiven, Serbung khua ah vialvak nilouhta hi. Huchi in, Serbung ah bawng vanpawte a zuak ut ding kimulou a, azingnawn in Tuimui lam manoh ka sawmta uhi. Serbung leh Tuimui pen kinaichik, km 6 khong lel ahi a, ann nekhin in ka paiphei uhi. Ka tungpah ngeingut ua, gintak sangin a khua lian in thupi mahmah hi. Singngat khua sangin a innte uh detdouzaw ua, sing-inn leh rangva in tamkhoptak kongzing nuamtaktak ah kivual seusuau maimah uhi. Singtak taktak a kilam ahi ua, design ichi hia, wood curving ichih dandeuh leh salu, sakii hoih taktak kitak sesua muhding tampha ngial hi. Modern town chih theih ding tuk a changkang hi in ka thei hial hi, ahangbel Lingthuk leh Khuaivum toh tehkak kha kihi maimah dan ahi hi. Tuimui gam pen Serbung hausa khut apat 1898 in Phaipi leh Thawmte te kithuah in sum cheng 50 a aleikhiak uh ahi hi.

February kha ahi a, school kai dingin naupang uniform toh lampi aa pai daudaute ka muh chiangin ka lung a leng mahmah mai. Singngat ah bel school lut mahmah ta ahihna uah, inn a om hileng zaw, kei le school kuanta ding hive`ng maw, chih ka lungsim ah ahong lang dundun mai hi. Ka gintakdan in, Tuimui khua ah High School om ade aw, English sinna school omteisam hi`nteh, uniform toh kithuam thekthak hive un ka chilungsim hi. Papa`n tunna ding thei mahmah hive`n, kei sungkhatte inn ah hon kingasak a, amah muntuam ah kinga hi, nuam ka sak hetlouh bel, ann nek mahmah ahi, kuangpi a ann kine, ui toh ak toh, chiltui kai duahduah khongte toh ann nek ahia, nuam tehchiam lou hial hi. Ka vialvakna lam uah, mak kasak mahmah chu, Tuimui khua pen changkang bangsim mahleh, mihing khanvual phazoulou muhding atam mahmah mai ua, hiai khua hi khaw hoih ngellou ade aw! Chih ka lungsim ah a thaamden maimah hi.

Huchi in, bawng zongte pata` chih ka minthanna uh ahita a, bawngpa hoihdeuh mai neitu ka theisuahta uhi. A ninawn in ka va en ua, hoih chitakpi in ahoih maimah a, chi katah ua, I khut khong ahon liaksak duamduam mai chu, anuam mangtak eh aw. Azual a zuak ahi, a tung zong tuantheih ahi achi zawmah lai ua, ka kipak lumloudeuh chauh ahi mai. Bawng kisik dingdan inbel a pian fuhchetlou a, champion zat chu ahi kei, beram kii bang a akii kuisuk niknek ahih chia, ahon sik ek ding lauhuai thahah lou hizel. Ka Kidawp fel pah ua, sum deih tenten toh, bawng deih tenten kisutuah kha kihiven, vaiveng pah lian hi. Huchi in, nitaklam in Serbung lam manoh in ka pata un, bawng thau-tuaidawng thitthet toh ka kikta ua, lungsim hahdam in aguk in kinuinui maidan ahi hi. Akii a khih theihlouh ahihchiangin a ngawng ah khua nih in ka khih ua, khat ke`n ka len a, khat papa`n alen hi, himahleh thumangtak in apai ngiaungiau maimah a, hit fuh ka kisaten uhi. Gamgi (Tuimui leh Serbung) ka tuntak un a kipek ek mawk a, lamkhang ah pialkhe mawkta hi, kikaizou vual ding hilou ahihchia` “hepa hepa na khua singkung ah vial oh”, chi`n ka kikou sawksawk a, ke`n a mailam ah ka sawm leh a kilehhei vanglak a, tuaban siah kipek nawn selou hial hi.


KIKNAWNNA: Serbung ka tun un pipi kipak lua ahi ngei ding a, zawngtah puakding tampi ahon lousak a, ka kal gawnggawng hi. Na puanpi ding chi in singtangpa puanthupi zaangkhai litlet khat, athuul (lelpi) apat ahon lakhia a, hiai kei gat mahmah ahi, ana pua inla, na puanthuah dingin kon pia achi hi. Sawt kuamtak ka nei a, a khawnung lam in matress dingin apang nilouh lai hi. A ninawn in Serbung apat ka paikhia ua, Tualkhiang toh Serbung kikar ah Lunglenkham (Hausapi kawl) chiangtak in kimuthei a, thupi kasa mahmah mai a, papa kiang ah, khopi abang tel, ka chihleh Japan gal lai in Japan te`n khopi asa ua, jet fighter in a kap zeek uh, chih honhilh hi. Kawl-tung lam ah meipi kai ngeinguai a, meikhu khong suang lak ah pawtkhe theimawk a, mun khenkhat ah puan ngou kiphoukhia hiawmtak khong muhthei aom hi. Lunglenkham ah zohngeu mit-khat nei aom a, amu mu asi, chih leng kithei hi.

Serbung leh Tualkhing kikar ah Burma sepaihte kituak nawn leuleu venchin, ka liing poppop hial hi, enlou a paikhen san ding chih thuhilh ka hihchiang in ka en hetkei a, bawng lausim ahihna uah lamsak ah kaltou ua, ka paikheng thei uhi, bangmah hon lohlou uhi. Ka pem lai ua zaw hon subuai nak lawtel ua, neihteng teng hon lakmangsak hive un. Haichiin lam a giaklou in Keimitui omna lam ah ka pailiamsuk ua, keimitui chih ka ngaihtuah chiangin ka chimul athousak a, a geinai ah leng kipaingamlou hial hi. Keimi khat gamlak apat hong suaksuak thilthul dingdan ngen in mitkha in muthei ahih chia`.

Suangdai ah ka giak ua, ni-gamlate inn ahi achi ua (distant aunt), Singngat khua a Dinglian nu toh unau ahihtuak. Suangdai khosak lam ah mualkuisuk ngeunguau om hiven, huai mual kuisuk ngeunguau nuaitak ah Suangdai khua om settawk eivoi. Lausim ka hihchiang in, hiai khua le menchim in khuhmang thei inten, bang ding a Suangdaite hiai nuai tak a teng sese ahi ua, apam zek a kisuan khiak theihlouh adiam? Chih kia ka lungsim ah aom den hi, zanin ihmut mohna in ka nei a, suang hongtuksuk hitaleh, hon nuaimat a, hon khuhmang ding eivoi… ……ahia, tunitan in huai mualkui ngekngok apuksuk chih kizanailou lai hi.

Huan huchi ahi a, Suangdoh, Mawngken, Tuilakzang leh Maukot khong ka paikan lai un, kikhamuang mahmahta hi, Singngat Gimsi zong leng-panpanta a, meltheih khong kimuta a, Maukot khua a Meitei papi Pa Rabi, zi thum neipa inkongtual khong kimelhgu giaugiau ta hi, a zite bangchi om adua aw, zi thumthum nei chih-tel, chih ngaihdan kinei `eihchu. Pa Rabi pen Maukot ah sawtpitak khosa hi, Paite pau siampetmah hi. Tui leuhsiam mahmah ahi a; Tuivai leh Tuivel khong ah tuikia aom chiangin, liluh pahpah sek hi. Tuikiate zongtu muanhuai ahi hi.Tua hunlai in khe ngekngek in kpai kauhkauh ahi a, Maukot to Singngat paina haksa thei petmah hi, Meilum-tou-kah….kichi hi.

Singngat ka tuntak un, ka nuam mahmah ua, naute bang aphur thei mahmah mai ua, ka tupapa Vungzamang ahong taiphei a, puMuan atung ah ka tuang thei diam achi hi. Tuangthei tehreng e, kon tuanpih ding ka chi a, ka nau Rosang (Sanga) toh Vungmang toh ka tuanpih hi, ka boss kher mai. Huai ni kan a ka kipah hun aom kei himhim, tunitan in BUANGA inn ka tunpih ni mitkha ah mang nailou lailai hi, nuam tak ahi, agen a gensuah theih vual ahi kei rengreng. Hun haksate anuam suakta hi, Toupa Hon Piinate thupi lua!!