MIN-KIPIAKTAWM

User Rating: 0 / 5

Star InactiveStar InactiveStar InactiveStar InactiveStar Inactive
 

MIN-KIPIAKTAWM
Written by Vungzamuan Valte, Columnist Zogam.com

vungzamuan valte new

Given name kichi, mihing ten naungek a pian chiang in sapna ding min khat peuhpeuh kipia a, naungek pianmadaih a min neisak, piankhiak phet a min piak leh awl a min phuahna neih chihte chihdan chituam tuam ahi hi. Khovel a mihing kibanglou leh gam tuamtuam a teng ihihna uah, chiindan leh tawndan kibang hetlou napi in, minpiak tungtang ah ahoih theipen kideihsak chiat hi. Pian hun, pian ni, pian dan, pian kar, pian kha, pian kum, ni leh kha, aksi, lui leh gam, guam leh mual khong kitamsak neinuai om takpi ua, hat leh hangsan, hoih leh lungkuai, pak etlawm, vasa kilawm chih khongte a tamsak naknak uhi. Mihing a pian’khiak chiangin anu, apa (male-female) kichi hiven, numei min, pasal min chihdandeuh in kikhen hamtang a, hiai paidan pen leitung a mihingte khempeuh in kizui deuhchiat hi. Himahleh, anu apa khentuamlou a min kisapdan om zeuhzeuh thousam a, unisex name ichi hiam, sapte’n Gene, Gerry, Ronnie, Terry achihte u’leh Chinese ten Li achihte uh unisex name ahi hi. Pipute min, beh min leh min neitu mintak, chi’n kikhen tangpi a, South Indian ten huchidan min saupipi nei deudou naknak uhi. China ten huchidan in sungkuan min masasak ua min neitu mintak in zom hi, atangpithu in kilawmna, melhoihna, nunnemna ichihte numei pia ua, hangsanna, galhatna, thupina chihte pasal petangpi uhi. Lili, Marie, Bridget (strong), Etana (strong) numei a deuh hi ua, Kevin, Kenneth, Jamil, Lalitmohan (handsome chihna vek) pasalte pedeuh tangpi uhi. Min kipiak in khiakna nei chitchiat se ahihna ah, min hoih hi a itheihte, a khiakna theih kul mahmah leuleu hi, ut ut phuakziang khenkhat om ihihna uah.

Alan= Tribe min, Cheroke=Tribe min, Cheyene= Tribe min, Cree= Tribe min, Dan= Israel tribe, Erie= Tribe min, Frank= Tribe min, Gad= Israel tribe, Ismael= Muslimte pu, Joss= German tribe, Kain= Kananite te, Levi= Siampi nam, Mohawk= Tribe min, Cree= Tribe min, Barrington= Buaina bawlte, Dalmat= Beram, Devon= mivom neu, Dorian= Tribe min, Engelbert= minthang (German tribe), Gidoni= Galhang, Jeno= Pianfel (Tribe min), Hasso= Tribe min, Kuno= Kuni tribe, Warren= Warni tribe, Wendel= Gammang , Zeev=wolf, Zuni= tribe min, Paris= khua min, Shaka= Zulu tribe, Saxon= German tribe, Shayan= Tribe min, Martin= Spanish leh Red Indian mix blood, Berkeley= Khua min, Angus, Angie= Breed of cattle (class), Covey= Brood of birds, Ashley= mi min, Arun= Colour, Wesley= Denomination khat, Andrew= Pasalhuai, Colleen= Numei naupang, Kishori= Numei naupang, Mwana= Numei, Niu= Numei neu, Wuti= Numei, Andrew= Pasalpha, Manfred= Galmuang, Colleen= Numei naupang, Kishori= Numei naupang, Mwana= Nungak, Niu= Numei naupang neu, Wuti= Numei, Francis= mi min, Li (kaihniam) = Strong, Li (kaihsang) = Beautiful, Akili= Pil, Alva= Ngou, Amulya= Manpha, AN= nungchang hoih, Anwar= vaak singseng, Anbar= perfume, Ayo= kipahna, Azhar= Tanvak, Bala= khangdawng, Bao= tuamtu, Billie= Helmet deihhuai, Bo= Melhoih, Carmen= La (song), Chanda= Vaak pempuam, Chandana= sandalwood, Chang= kipak, Chapa= Beaver, Charlie= mi naran, Claude= khebai, Coby= suhsakpa, Cong= pilkhel, Dada= naupang samkir, Dale= guam, Dana= family min, Dao= lampi, Daya= kiniamkhiak, Fadhili= Deihsakna, Fatin= Etlawm, Fu= Hehnemtu, Furaha= Kipahna, Gene, Eugene= Pian’fel, Gerry= Thudeih, Guan= Tlawmngai, Gulzar= Rose pak huan (garden), Hao= Damthei, Harsha= Kipahmel, Hikmat= Pilna, Hillary= Nuihmai, Honovi= Haat, Huan= Kipak, Hui= smart, Innes= Island, Isha= Vengtu, Ishra= Suakta, Jamal= Etlawm, Ji= Polhnuam, Jinan= Paradise, Jo= Piak beh lap, Kamal= Lotus, Kanan= Gammaang, Kelly= Family name, Khurshid= Ni (sun), Kiele= Huanbawltu (gardenia)…

Sap min leh Bible a mite min ikipiak chiang in a khiakna thei hileng kilawm mahmah hi, tuaziakin Baibul a min omte zaw sut khol kei ni in, khovel a mi khempeuh in, akichangkan’ sak chiang ua gamdangte min lakhem unchin, Nepoleon, Hitler, Elizabeth, Arthur, Nelson, Charles, Mary, Margaret, Mathusel, Solomon, Samson, Isak, Imanuel, David leh adang dang. Changkan’na dan a kingai ahingei ngut dia America chih khong bang leng piang tel ahih chia. Unau Lusei te lak ah kum 40 vel paita in uang mahmah hiven, tunitan in huai min phuahtawm paiden laitel hi, Andrew kichi bangchu tam ahina ve ua. Tuchiang chiang inchu Fak leh Dik a deihnawn chiah kei ua, Mafaka chihbang chu himahmah loungal eive. Adiak in, eilak ah Catholic lam ten min phuahtawm nei hamtang ua, John, Joseph chihbang I pate khong anahi maimah uhi, huchih sese ngailou chileng lah apaidan uh himawk inchin. I minte uh sap haksa ahi dia, asap nuamzaw deuh ding chihna chu ahipeuhmah ding, himahleh pianpih min selmang zen a kibaptistna in I given name (pianpih min) dausak a, manthatna gam ah hon pilut ding bang maimah hi. Min hoihtak nei nazenpi a James, Albert, Nicholas, Mike I kichih kuaukuau chiang ua, gamdangmi kisa dekdek khanak inchin, khenkhat ten a pianpih min uh selmangsak hilhial teltawk ua, changkan’na hia, kitheita lou.

Nam khenkhat ten pianpih min, ei Zosuante dan in nei lou uhi, etsakna dingin Meghalaya te lak ah, Adolf Hitler Sangma, Boldness Nongrum, Bombersing Marak, Clever Marak, Darling Lamare, Field marshall Mawrphniang, Frankenstein Momin, Fairly Kharrngi, Friday Lyngdoh, Hilarious Dkhar, Britain War, Hopingstone Lyngdoh, Ulyssis Nongrum, John Manner Marak, Keneddy Marak, Moonlight Pariat, Process Sawkmie, Rockfeller Momin, Zenith Sangma, Morning star, Chrismas, Moon Light, Evening Star, Easter etc. etc. Hiai minte I et vengveng chiangin a min uh (given name) omloupi ahi hi, Sangma, marak, momon … ichihte kha Nam min ahidaih mai, maktak ahi. Christianity, Western Influence ichi lou theikei, himahleh om hiveh aw, hiaiten changkan’na a angaihte uh, mi mangthang a suahna khat uh suak daih hi, tawndan, paidan, kivaipuakdan neisam ding un um tinten ing. Namesake ichi dia, minkhem kipiak pen society a changkangta, mite a baanta, ahihkei leh mite bat sawmna lam ah, huai minkhem bawltawm neih a kilungkimsak, kivawksang ihi hia le? Bangalore kimlak ah Hakki Pikki kichi namniam chikhat om uhi, vanzuak in alang alang ah diang kawi kawi ua, Nomads chikhat ahi uhi. Hiaite leuleu in minkhem (namesake) kipiak hahkat mahmah sese ua, pineapple, Train, Delhi, Revolver, Mysore Pak, British, Elizabeth, Badminton, Telivision etc. chih khong in a muhphakna chiang chiang uah min kipe mawkmawk uhi. Amau ngaihdan inbel, social ladder ah kaltouhna, kaisanna leh kivawkkhiakna in ngai ua, midangte a dangin bel nuihzakhuai suak uhi. Cinema, Television ichihte hon muteisamta ua, Rani, Sri Devi, Juhi Chawla, Anil kapur, Mayura, Mantri, Janata, Congress etc. etc. chih khong min nei ua, kisam chuahchuah dan ahi uhi. Kalsangtak zaw ahita ve ua, amau muhdan tan ah chu; hilehle om hiveh aw! A hihna uh, a root uh mangsak ahihlamtak uh a kitheihsuah pah kei ua lehbel, mangthang kiikeei dingdan eive ua, a pi leh pute uh, a khaggui uh, a suangtute, a sigui uah zaam mahleh, amin un pukhanawn lou ahihchiang ua, kisuut bun nawnlou pah ding uhi. Khangthak ten bang ngaihdan anei ua, lungdong panpanta ahi ve ua.

Ei Zosuante lak ah Lushai Hills pen Missionay te lut masakna hikha hiven, pau mumal omsam mahleh a gelhthoh omlou ahi hi, Chin Hills ah huchimah bangin. Min kipiakdan tungtang ah Mizote duhdah mahmah ua, Lalte (hausate) thunuai a om ahihna uah min hoih leh adeihdan uh kiphuah ngamlou uhi, Lal ten a huat khak ding lau hidan ahi uhi. Banah, pasal leh numeite min kibang mawkmawk inchin sapten lamdang sa ua, khen theilou ahihna uah, pasalte min zoh in “a” koihsak ua, numeite min zoh in “I” koisak uhi, huchi’n amei apa khenthei chauh uhi, huaidan pen paitoutou a, tunitan in “a” leh “I” kichi truh truh laitel uhi. Midangte min nasan Indirai, Rajiva, Davida, Adama, Johana, Abrahama, Valtea… chitel ua, ahuat a huathuai ahi uhi. Ei Paite kampaute lak ah zong huchimah bangin, min hoih, min ngaih, min deihhuai kipe ngam lou ua, koltanna khat, kikolbutna khat nuai ah om kenkon uhi. Luseite lak ah, sapten hiai koltanna sutkhia ua, min hoih leh deihhuai kiphuak thei pah uhi, huai masang tengin VAN LAL chih bangchu kipiak ngam ding hilou hial. Min kipiakna ah khanggui sutna dingin Lusei ten zang kholou ua, lui min, guam min, tang min leh min mak deuhdeuh phuak maimai ua, KAWIPUIPIANGA chih khongin khiakna neisam mahleh houlawtel dan ahi hi. Sibuta chih ringot khong omze neilou tak ahi, a ut ut in phuak thei ua, invengpa/invengnu/adomtupa/adomtunu khong in phuak suk maimai ua, Piangliana chih maimai khong, min kipiaksawn chih neilou uhi, khunkhan lou lua sa ing. Mizote lak ah, naupang piang tung omleh, a min phuaktu ding kituh zenhouh ding uh eive, wold cup 1994 lai in naupang Brazila piangtam ngial uhi, huaima deuh in Roberto Baggio tam mahmah ua, Rahula khong aom kei ding uh chihtheihlouh lai hi.

Nidanglai deuh in ei kampau sung ah min tangnih (two syllables) hitangpi hi, Songthu, Nigui, Guingen, Vuihang, Vumsum, Sumum, Goupau, Kailun, Goupum, Sumkam, Khanthuam, Kamhau, Henhong, Hendai, Kawmkim, Dahniang chihdan deuh ngen ahi hi. Guite innpi Goukhothang chihlouh siah Kum 1900 ma a piangte himhim min tangthum nei om manglou ua theih theih in om hi. Behmin pen Nam chi ua, ngai poimoh mahmah uhi, huaipentak ahi I khanggui suitheihna uh. Huaiban ah, min phuaktu kinei chiat a, min petu apat naupang nu leh pa, pi leh pu, a khanggui ding kisuithei zenhouh hi, hoih mahmah ana hi eive. Tuaziak mah ahi, singtang ah khual zin leng, I min apat, aw nang chu hiai phuah, huai phuah, na pa na nu, na pi na pu, hiaite ei ve ua, chia papi pilvang ten genthei chetchet maidan ahi uhi. Hiai paidan mumaltak ineih ziakin, I bubit ua, kikahiangna zong dik dawmdeuh a, kitanauna, kilainatna leh kiguizopna kitatsatlou deuhmah hi.

Namesake kipiak ahoih kei chihna hilou in, min tak, min hoihtak te liahkhuh vek hial penzaw diklou deuhmah ahi, James Thang, Robert Lianmang, David Lallian chih khong hithei leh deihhuai mahmah ahi ve. Numei nasan in namesake hon nei ua, hoih thei lehlam zawzen. Bangteng hileh, changkan’na a ngai ihihleh hitave, sap min hoihtak paw veuvou a guktak laktak hih khualkhual, Baibul a mite min pawzoulou a no.4 kham nuangnuang maimah khong ihih khak ding uh lauhuai lou thahah keihial. Khenkhat ten min neihoih thei lua ua, amin mahmah zong Pathian/Siamtu chou ahihna ah, amin pawzoulou chih kinei sek hi. Tuachidan a min thupitak ineihziak ua khangtou I kisak leh, manthatna lampi kizui himaithei hi, Robert kichi kuahiam om hitaleh, haksatna gamdang ah tuak hitaleh, eimi ahi chih kuan thei mahmah ding hiam?? Emergency case hitaleh kikhel dimdem dingdan eive. “Ka liim in tau bun bingbiang…” chihdan deuh lel ahi kha diam maw?

 Numei khenkhat ten tulai in a pianna beh min u’leh a pasalte beh min koih leeiluuai ua, etlawm tuanse ahih ua leh athu uh hiven, soisel ngam kei ni. Colonial hangover, missionary hangover, inferiority complex ineih ziak ua hiaidan chiingkha ihih ua leh, nungheikik in, kienthak leng deihhuai lua hi. Ka hihna zumpih kei ning, ka mel zumpih kei ning, ichih leh, baa I min diktak, deihthohtak a honpetute’ simmohtak a nuaisiah ding ihia? Vun ngou lou pi, vun ngoute min va put sese ziaka kivak seksok ding amaw? Macbeth khong Judas khong bangchu deih hetlou thepthup zel, ahia, I min kipiakkhem te uh, a khiakna bang thei khollou leng kihi thei, lawmte khat in Joycee kichi hiveh aw, pasalpitou numei min va puak laizang.

Awle! Jenny, Jennife, Whitney, J Lo, Britney, Martin, Rambo, Isak, Teresa, Margaret, Anthony, Stephen, kichi ni, hey dude, it’s cool, na? Himahleh, na given name mangsak kei hamham in, na shadow in na hihnatak liahkhuh kei himhim hen. Gamdang, vaigam, kawlgam, ah ihei zong, I Zo ngeina mah lenkip ni. Robet Suanlian kichi unaute khat om hiven, se hetlou eive, Vai ten Robert chimai ding ua, Suanlian pen a Given Name mangsak lou, hoih veve ahi. Nepali, Thai, Chingki, bangteng hileh, na hihna na paikhe theikei, Luseite la in…” ani ang I soi mai, ani ang I soi mai, I soi zawng poh in, I nihna a lang e” achihdan deuh in, kisel kisel lengzong I lu ihum dia, I taw ihum dia, dawk veve ding ahihna ah, kikhualtelem nilouh lou in, I hihna mah lenkip chinten leng thadamna, lungdamna, min phuaktu te a hankhuk ua kitom kitom lou ding ua, adam sung nangawn ua, eh! Ka min honpiak lah na zang het kei maimah ua, kichih omlou ding hi. Meitei ten Kennedy chih theiloupi a sapmin kiphuak unchin Rennedy chi ua, fooball siam khat hivenchin, Rennedy Rennedy Rennedy, thawm aw, thawm aw, chia kikou zaizai uh, ka nuihlui a suak lua ka chi. Huaite engsawn zaw hikei ni mataw.

Pet Name kichite zong, kiduatsapna ahitangpi ua, kinoutawina leng ahi, himahleh pilvan’kul mahmah leh kilawm; banghang hiam chihleh, Niangnou, Vungnou, Thangnou, Paunou, Neneu, Piseuh, Duatduat, Dingding, Lianboi etc. te a hong khanlet chiang un kilawm nawnlou suak hi. Putek, pitek ahih nung nangawn ua Nou ngikngek den ding mah uhia’m? Ahihkeileh, Seuh den ding, Duat den ding, Bawi den ding, theih haksapi ahi veve. Lungdam.