Kilem na masa : Palai tellou a kihou diing

User Rating: 0 / 5

Star InactiveStar InactiveStar InactiveStar InactiveStar Inactive
 

Kilem na masa : Palai tellou a kihou diing.
By Ninglun Hanghal

ninglunhanghal

Kal masa in United People's Front (UPF) leh Kuki National Organisation (KNO) heutute Delhi ah India solkal toh "ki houna" masa peen a panta uh hi. UPF leh KNO te'n India sepaih toh kum 2005 in "kikaaptuah" non lou diing in kilem ua, 'suspension of operation' (SoO) kum 2008 in suai na kai uh hi. Banah, tu din mun in 'tripartite talks' ( palai thum - Centre , State leh helte) nei diing in kilem tadih phot uh hi.

Kum 10 bang pailiam ahih nung in hiai bang thil hong om theih peen a hoih lam ahi kei chih na diing om lou a , helpawlte hi leh solkal lam palai te hitaleh , hiai amasa peen "kihou na" na ah lungtun louh na om lou hi a theih ahih jiak in kihouzeel na diing uh mavang mah mah diing a gin taak leeng ahi. India Solkal in UPF leh KNO helpawl te toh ki hou na neih diing poimoh sak na nei uh ahih dan Center government palai te apatmah leeng theih a om jiak in maban a hoih touh jel a lamjang diing in ginhuai hi.

UPF, KNO leh solkal te kihou na diing ah "interlocutor" – palai ngai lou a kihoudiing chih ahih sawn nawn na ah, a tuam deuh na jiak in maban diing bil doh huai mah mah hi. India mal-suah ( north east) gamte et in solkal leh helpawl / gamnuai luut a zalenna na sual te "peace talks" tam tak na ki za ta in, ki gen nasa mahmah a, diak in Naga Peace talks chih bang hiai te lak a khat ahi. Hiai helpawl te kihou na himhim te ah 'interlocutor' – palai tung tawn a kihou na peen India solkal in na zui ngit nget hi. Achangleh hiai "palai" a azat te uh 'retire' man hiam ahih kei leh solkal kikhek chiang bang in thakhek zel uh hi.

Himah leh UPF leh KNO te pawl ki hou na ah, hiai palai pen tellou in 'kimai tuah' a kibei diing dan in om uh. Hiai peen solkal lam te' ngaih dan (proposal) ahih agin tak huai a. Langkhat lam et in bangjiak hi diing hiam chih na om mah leh, party thum (tripartite) kihou ten ki tuak tak in kilem thei uh ahih man in ngah khawk huai lou hi. A jiak pi peen a theih ahih leh, kihou na leh ki lem na thu gen na diing ah hun sawt a luut louh na diing leh 'formality' tampi zuih ngai lou diing hi peen hi. Palai tellou diing chih bikbek peen hituan lou in, a poimoh dan dung jui hi diing chih ahi. Tu din mun ah poimoh louh diing chih a hi phot hi.

Helpawl dangte et in ULFA hiam , a kigen minthang NSCN(IM) hita leh, palai te'n bang tan mah tun pih tuan louh hi le uh kilawm hi. ULFA te'n kum 2011 in kihou na apan ua, NSCN(IM) te'n ahih leh 1995 pek in ana pan uh a, akihou na ua Palai thum bang ki thakhek man hial ta hi. Hiaite et in tutung a UPF , KNO leh solkal lam palai te'n ki tuak tak a "palai ngailou" a chih theih peen uh "kilemna masa" hong hi pah hi. A banah leng akilem touh zeel diing uh lam et ahi.

Kum paisa te ah UPF ahih kei leh KNO te'n kihou na pan diing in naak tak in phut tou ngit nget uh hi. Kum 2012 in KNO lam te'n SoO suai kai non lou hial khop in solkal kiang phut uh a , kihouna neih pat ahih kei leh 'designated camp' te solkal lam te'n veh thei lou leh luut thei lou diing , leh 2014 election bang boycott ding in na vau uh hi.
Bangteng hitaleh SoO pen kalh a gam tang om lou in, hun sawt tak thumang tak a daih nung un tu in UPF leh KNO helpawl a heutu te kihou diing in hong kiman uh hi. Kithalawp lotel (non) kholkei mah le uh hun sawt apat SoO leh kihou diing a thutan na a na bawl na jiak un "thumang tak" in kisa uh hi.

Abul a panta ahih man un, tawp san lou a solkal leh helpawl te'n hon sunzom tou ngit nget uh a deih huai hi. Helpawl dang te toh ki bang lou deuh a approach leh strategy tuam deuh a kihou diing chih a hih mah bang in, atam zo peace talk/ kihouna te toh kibang lou a ' atawptan ' a hong mual suah ngei a lamet leh kinep ahi. Hiai ah center solkal tung ah mohpuak na lian tak a kinga a , huchi mah in a diak in state solkal tung ah leng. NSCN(IM) te kihou na ah state peen tellou in, centre toh kihou uh a , tu in state solkal tel sak ahih na ah, "theihpih lou" chi a state solkal kilep thei lou ding hi.

Pu Narendra Modi nuai a NDA government kum nih a chin na toh ki ton a hiai bang kal suan na hong om ahi chih haih vual ahi kei. Nikum August kha bul in NSCN(IM) toh kum tam tak "palai" tung tawn a kihou na uh bang tan mah tung lou pen , Prime Minister in 'framework' agreement tan tun pih hi. NSCN(IM) te kihou na peen a guuk thei tawp a ki pai pih ahi a , himah leh nikum in PM in public mai ah agreement puanzak na bawl pih hi. Hiai peen 'kilemna' chi khat mah ahi. Kum sawmnih phial "kihouna " ana buai pih uh, Pu Modi in PM ahih nung kum khat na ah hiai tan tun pih in , official tak in "ki lemna chi bai " kibuk thei uh hi.
Tam tak te'n kum nawn election diing jiak ahi chih ngaih dan nei leh gen tang pi uhi . Adik mah ahi, election kichi peen democracy a diing a hun poimoh mah mah ahi . Huai jiak mah in leng khah suah louh diing mah ahi. Election peen ngaih dau na leh awlmoh louh na ( awlmoh dan chih tuamdeuh chih zawk di adiam) jiak in tullel in leeng igam ah buai na in hon tuam hi .

Bangteng hileh, "lemna" diing a ki hou na om thei peen a hoih lam ahi in. Kihou tuah a "'lemna leh muana" tak tak tun na diing in 'stakeholder' tam pi om hi. Ahuchi mah bang in solkal in leng 'stakeholder' tuam tuam te ngai poimoh mahmah in 'inclusive' ding chi tin ten hi. Maban ah solkal in 'stakeholder' tuam tuam te leng hon ki muh leh ki houlim pih ngei uh a gin tak huai a . Huai hun pen poimoh mah mah diing hi. Tua hun ah " final exam " "litmus test" tak tak hong om diing in , huai ah 'negotiate' leh 'compromise' diing tam tak om ngei a gintaak huai in , challenging mah mah diing hi.

Banah, centre leh state solkal te chihtakna leh ngaihpoimohna ah kinga pet mah diing hi.

Time, Context and Relevance poimoh dan akigen sek mah bang in, a hun-le-mun, leh thiltung te et in tuhun peen hun hoih leh manpha chi leng akikhial kholkei maithei ding.